മാളികപ്പുറം രണ്ടാം ഭാഗം; സൈജു കുറുപ്പിന്റെ കഥാപാത്രത്തെ കൂടുതലറിയാം: അഭിലാഷ് പിള്ള

Movie

നൂറ് കോടി ക്ളബിൽ ഇടംനേടിയ ആദ്യ ഉണ്ണി മുകുന്ദൻ സിനിമയാണ് മാളികപ്പുറം. ഈ വർഷത്തെ മലയാളത്തിലെ ആദ്യ 100 കോടി ക്ലബ് ചിത്രമാണ് മാളികപ്പുറം. ആന്റോ ജോസഫും വേണുകുന്നപ്പള്ളിയും ചേര്‍ന്ന് നിര്‍മിച്ച് വിഷ്ണുശശിശങ്കര്‍ സംവിധാനം ചെയ്ത ചിത്രത്തിൽ ഉണ്ണി മുകുന്ദനെക്കൂടാതെ സൈജു കുറുപ്പ്, രമേഷ് പിഷാരടി, ടി ജി രവി തുടങ്ങിയവർക്കൊപ്പം ബാലതാരങ്ങളായ ദേവനന്ദന, ശ്രീപദ് യാൻ എന്നിവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചത്. ഇപ്പോഴിതാ മാളികപ്പുറത്തിന്റെ രണ്ടാം ഭാഗം എത്തുമെന്ന സൂചന നൽകിയിരിക്കുകയാണ് ചിത്രത്തിന്റെ തിരക്കഥാകൃത്ത് അഭിലാഷ് പിള്ള.

അഭിനയിക്കുന്ന എല്ലാ സിനിമകളിലും സൈജു കുറുപ്പിന്റെ കഥാപാത്രം പണം കടം വാങ്ങുമെന്ന ട്രോളുകൾ അടുത്തിടെ സമൂഹമാദ്ധ്യമങ്ങളിൽ നിറഞ്ഞിരുന്നു. ഇത്തരം ട്രോളുകൾ സൈജു കുറുപ്പ് തന്നെ സമൂഹമാദ്ധ്യമങ്ങിൽ പങ്കുവയ്ക്കാറുണ്ട്. ഇത്തരത്തിൽ പങ്കുവച്ച ട്രോളിലാണ് അഭിലാഷ് പിള്ള കമന്റുമായി എത്തിയിരിക്കുന്നത്. 'മൂന്ന് നാല് കഥകൾ പ്രാരാബ്ധം, കടം ഒക്കെ ഉള്ളത് കമ്മിറ്റ് ചെയ്തിട്ടുണ്ട്. നമ്മൾ പൊളിക്കും' എന്ന കുറിപ്പോടെയായിരുന്നു നടൻ ട്രോൾ പങ്കുവച്ചത്.

 'മാളികപ്പുറം 2ൽ ഞാൻ പറയാം കടം വാങ്ങിച്ചതിനുള്ള യഥാർത്ഥ കാരണം' എന്നായിരുന്നു അഭിലാഷ് പിള്ളയുടെ പ്രതികരണം. ഇതാണ് മാളികപ്പുറത്തിന്റെ രണ്ടാം ഭാഗം എത്തുമെന്നുള്ള ചർച്ചകൾക്ക് വഴിവച്ചത്. 

അയ്യപ്പ ഭക്തയായ മാളികപ്പുറത്തമ്മയുടെ കഥ പറയുന്ന ചിത്രത്തിൽ പ്രധാനപ്പെട്ട കഥാപാത്രത്തെയായിരുന്നു സൈജു കുറുപ്പ് അവതരിപ്പിച്ചത്. സൈജു കുറുപ്പിന്റെ കഥാപാത്രത്തെക്കുറിച്ച് രണ്ടാം ഭാഗത്തിൽ കൂടുതലായി അറിയാൻ കഴിഞ്ഞേക്കുമെനാണിപ്പോൾ സിനിമാ ഗ്രൂപ്പുകളിലെ ചർച്ച.

Share this story