ഉത്തരാഖണ്ഡിൽ മഞ്ഞുമല ഇടിഞ്ഞു; 10 മൃതദേഹങ്ങൾ കണ്ടെത്തി

മഞ്ഞുമല ഇടിഞ്ഞതിനേത്തുടർന്ന് ഉത്തരാഖണ്ഡിലെ ചമോലി ജില്ലയിലെ ജോഷിമഠ് ധൗലി ഗംഗാ നദിയിൽ വെള്ളപ്പൊക്കം. സംഭവത്ത് നൂറു മുതൽ നൂറ്റമ്പത് പേരെ കാണാതായതായി റിപ്പോർട്ടുണ്ട്. തിരച്ചിലിനിടയിൽ 10 മൃതദേഹങ്ങൾ കണ്ടെത്തിയിട്ടുണ്ട്. പ്രധാനമന്ത്രി നരേന്ദ്ര മോദി സ്ഥിതിഗതികൾ നിരീക്ഷിച്ച് വരികയാണ്.

വലിയ വെള്ളപ്പൊക്കത്തെ തുടർന്ന് തപോവൻ പ്രദേശത്തെ ഋഷിഗംഗ പവർ പ്രോജക്ടിന് തകരാർ സംഭവിച്ചതായാണ് റിപ്പോർട്ട്. കനത്ത മഴയും പെട്ടെന്നുള്ള വെള്ളവും കാരണം ചമോലിയിലെ റിനി ഗ്രാമത്തിൽ ഋഷിഗംഗ പദ്ധതിക്ക് നാശനഷ്ടമുണ്ടാകാൻ സാധ്യതയുണ്ടെന്ന് മുഖ്യമന്ത്രി ത്രിവേന്ദ്ര സിംഗ് റാവത്ത് ട്വീറ്റ് ചെയ്തു.

ഋഷിഗംഗ വൈദ്യുതി പദ്ധതിയിൽ ജോലി ചെയ്യുന്ന 150 ലധികം തൊഴിലാളികളെ ദുരന്തം നേരിട്ട് ബാധിച്ചിരിക്കാമെന്ന് സംസ്ഥാന ദുരന്ത നിവാരണ സേന ഡി ഐ ജി റിദിം അഗർവാൾ വാർത്താ ഏജൻസിയായ പി. ടി ഐയോട് പറഞ്ഞു.