കൊഡംഗൽ പദ്ധതികൾക്ക് വേഗം കൂട്ടി രേവന്ത് റെഡ്ഡി; നാരായൺപേട്ട് ലിഫ്റ്റ് ഇറിഗേഷൻ ഒന്നാം ഘട്ടം 2027 ഡിസംബറിലും രണ്ടാം ഘട്ടം 2028 ഒക്ടോബറിലും പൂർത്തിയാക്കാൻ നിർദേശം

ഹൈദരാബാദ്: തെലങ്കാനയിലെ നാരായൺപേട്ട്–കൊഡംഗൽ ലിഫ്റ്റ് ഇറിഗേഷൻ പദ്ധതിയുടെ നിർമ്മാണ പ്രവർത്തനങ്ങൾ വേഗത്തിലാക്കാൻ സമയപരിധി നിശ്ചയിച്ച് മുഖ്യമന്ത്രി എ. രേവന്ത് റെഡ്ഡി. പദ്ധതിയുടെ ഒന്നാം ഘട്ടം 2027 ഡിസംബറിലും രണ്ടാം ഘട്ടം 2028 ഒക്ടോബറിലും പൂർത്തിയാക്കണമെന്ന് അദ്ദേഹം ഉദ്യോഗസ്ഥർക്ക് കർശന നിർദേശം നൽകി.

​സ്വന്തം മണ്ഡലമായ കൊഡംഗലിൽ ചേർന്ന അവലോകന യോഗത്തിലാണ് മുഖ്യമന്ത്രി വികസന പദ്ധതികളുടെ പുരോഗതി വിലയിരുത്തിയത്. രണ്ടാം ഘട്ട പ്രവർത്തനങ്ങൾക്കായുള്ള ടെൻഡറുകൾ ഉടനടി ക്ഷണിക്കാൻ ജലസേചന വകുപ്പ് അധികൃതരോട് ആവശ്യപ്പെട്ട അദ്ദേഹം, ആവശ്യമായ വാർഷിക ബജറ്റ് വിഹിതം കൃത്യമായി ഉറപ്പാക്കാനും നിർദേശിച്ചു.

​മറ്റ് പ്രധാന തീരുമാനങ്ങൾ:

ഹക്കിംപേട്ട് എഡ്യൂക്കേഷൻ ഹബ്ബ്: നിർമ്മാണത്തിലിരിക്കുന്ന യങ് ഇന്ത്യ ഇന്റഗ്രേറ്റഡ് റെസിഡൻഷ്യൽ സ്കൂൾ, മെഡിക്കൽ–നഴ്സിംഗ് കോളേജുകൾ, 430 ബെഡ്ഡുകളുള്ള ആശുപത്രി എന്നിവയുടെ പണികൾ വേഗത്തിലാക്കും.

​റോഡ് ശൃംഖലയും തണ്ടകളുടെ വികസനവും: ആദിവാസി മേഖലകളായ തണ്ടകളിലേക്കുള്ള റോഡ് കണക്റ്റിവിറ്റി ഉറപ്പാക്കുന്നതിൽ വീഴ്ച വരുത്തുന്ന ഉദ്യോഗസ്ഥർക്കെതിരെ നടപടിയെടുക്കുമെന്ന് മുന്നറിയിപ്പ് നൽകി.

​മഴവെള്ള സംഭരണവും ചെറിയ പാലങ്ങളും: മഴക്കാലത്ത് വെള്ളക്കെട്ട് ഒഴിവാക്കാൻ എഡ്യൂക്കേഷൻ ഹബ്ബിൽ മഴവെള്ള സംഭരണ കിണറുകളും, ഗ്രാമങ്ങളിലെ പുഴകൾക്ക് കുറുകെ ചെക്ക് ഡാമുകൾക്ക് സമാനമായ ചെറിയ പാലങ്ങളും (Culverts) നിർമ്മിക്കും.

​വിവിധ വകുപ്പുകൾ തമ്മിൽ ഏകോപനം ഉറപ്പാക്കി നിർമ്മാണ പ്രവർത്തനങ്ങൾ സമയബന്ധിതമായി പൂർത്തിയാക്കാനാണ് മുഖ്യമന്ത്രിയുടെ നിർദേശം.