ജുഡീഷ്യറിക്ക് സമ്മര്‍ദ്ദമില്ല; തിരഞ്ഞെടുപ്പ് കമ്മീഷന്റെ തീരുമാനം ഇതിന് തെളിവ്: ഡി വൈ ചന്ദ്രചൂഢ്
ജുഡീഷ്യറിയില്‍ സര്‍ക്കാരിന്റെ സമ്മര്‍ദ്ദമില്ലെന്ന് സുപ്രീം കോടതി ചീഫ് ജസ്റ്റിസ് ഡി വൈ ചന്ദ്രചൂഢ്. ജുഡീഷ്യറിയില്‍ സമ്മര്‍ദമില്ലെന്നതിന്റെ തെളിവാണ് തിരഞ്ഞെടുപ്പ് കമ്മിഷന്റെ (ഇസി) തീരുമാനം. ഒരുപാട് കേസുകള്‍ കെട്ടിക്കിടക്കുന്നുണ്ട്. ഇത് ജനങ്ങളുടെ വിശ്വാസത്തിന്റെ കൂടി പ്രതിഫലനമാണ്. ജില്ലാ ജുഡീഷ്യറിയിലും അടിസ്ഥാന സൗകര്യങ്ങളുടെ അഭാവമുണ്ട്. അത് മെച്ചപ്പെടുത്തണമെന്നും
അദ്ദേഹം പറഞ്ഞു. ഇന്ത്യാ ടുഡേ കോണ്‍ക്ലേവ് 2023ല്‍ സംസാരിക്കുകയായിരുന്നു അദ്ദേഹം.
ജുഡീഷ്യറിയില്‍ സമ്മര്‍ദ്ദമില്ല
ജഡ്ജി എന്ന നിലയില്‍ 23 വര്‍ഷത്തെ എന്റെ ഔദ്യോഗിക ജീവിതത്തില്‍ ഒരു കേസ് എങ്ങനെ തീര്‍പ്പാക്കണമെന്ന് ആരും എന്നോട് പറഞ്ഞിട്ടില്ലെന്ന് ചീഫ് ജസ്റ്റിസ് പറഞ്ഞു. നിയമമന്ത്രിയുമായി ബന്ധപ്പെട്ട വിഷയങ്ങളില്‍ ഇടപെടാന്‍ ഞാന്‍ ആഗ്രഹിക്കുന്നില്ലെന്നും ഞങ്ങളുടെ ധാരണകളില്‍ വ്യത്യാസമുണ്ടെന്നും നിയമമന്ത്രി കിരണ്‍ റിജിജുവുമായി ബന്ധപ്പെട്ട ചോദ്യത്തിന് മറുപടിയായി അദ്ദേഹം പറഞ്ഞു. സര്‍ക്കാരില്‍ നിന്ന് ജുഡീഷ്യറിക്ക് മേല്‍ സമ്മര്‍ദമില്ലെന്നും അദ്ദേഹം പറഞ്ഞു. ജുഡീഷ്യറിയില്‍ സമ്മര്‍ദമില്ലെന്നതിന്റെ തെളിവാണ് തിരഞ്ഞെടുപ്പ് കമ്മിഷന്റെ (ഇസി) തീരുമാനമെന്നും ചീഫ് ജസ്റ്റിസ് കൂട്ടിച്ചേര്‍ത്തു.
ജുഡീഷ്യറിയുടെ നവീകരണം ആവശ്യമാണ്
'ഇന്ത്യന്‍ ജുഡീഷ്യറിയെ നവീകരിക്കേണ്ടതുണ്ട്. ബ്രിട്ടീഷുകാരില്‍ നിന്ന് പാരമ്പര്യമായി ലഭിച്ച കൊളോണിയല്‍ മാതൃകയിലാണ് നമ്മുടെ ജുഡീഷ്യറി. നീതി എന്നത് കേവലം ഒരു പരമാധികാര പ്രവര്‍ത്തനമല്ല. അടുത്ത 50-75 വര്‍ഷത്തിനുള്ളില്‍ ഇന്ത്യന്‍ ജുഡീഷ്യറിയെ ആധുനിക സാങ്കേതിക വിദ്യകളാല്‍ സജ്ജീകരിക്കേണ്ടതുണ്ട്. പാന്‍ഡെമിക്കില്‍ വീഡിയോ കോണ്‍ഫറന്‍സിംഗ് പ്ലാറ്റ്ഫോമില്‍ ഞങ്ങള്‍ ചെയ്ത തരത്തിലുള്ള പ്രവര്‍ത്തനങ്ങള്‍ ലോകത്ത് ഒരിടത്തും നടക്കാത്തതാണ്.', അദ്ദേഹം കൂട്ടിച്ചേര്‍ത്തു.
നമ്മള്‍ കോവിഡ് ഒഴികെയുള്ള സാങ്കേതികവിദ്യയിലേക്ക് നോക്കേണ്ടതുണ്ടെന്നും ഇന്ത്യന്‍ ജുഡീഷ്യറിയെ നവീകരിക്കേണ്ടതിന്റെ ആവശ്യകതയുണ്ടെന്നും ആധുനിക സാങ്കേതികവിദ്യയെ പരാമര്‍ശിച്ച് ജസ്റ്റിസ് ചന്ദ്രചൂഡ് പറഞ്ഞു. ഭരണഘടനാ ബെഞ്ച് കേസുകളുടെ തത്സമയ സ്ട്രീമിംഗ് നടത്തുന്നു. തത്സമയ സ്ട്രീമിംഗിലൂടെ പൗരന്മാര്‍ക്ക് മുന്നില്‍ കോടതികള്‍ തുറക്കുന്നത് എന്റെ ദൗത്യത്തിന്റെ ഭാഗമാണ്.', ചീഫ് ജസ്റ്റിസ് പറഞ്ഞു.
നീതി ഒരു അവശ്യ സേവനമാണ്
എന്നെ സംബന്ധിച്ചിടത്തോളം നീതി എന്നത് ഒരു പരമാധികാര ചടങ്ങ് മാത്രമല്ല, നമ്മുടെ പൗരന്മാര്‍ക്ക് ഞങ്ങള്‍ നല്‍കുന്ന അവശ്യ സേവനം കൂടിയാണെന്ന് ചീഫ് ജസ്റ്റിസ് പറഞ്ഞു. ജനങ്ങളിലേക്ക് അവര്‍ക്ക് മനസ്സിലാകുന്ന ഭാഷകളിലൂടെ ഞങ്ങള്‍ക്ക് അവരിലേക്ക് എത്തിച്ചേരേണ്ടതുണ്ടെന്നും അദ്ദേഹം കൂട്ടിച്ചേര്‍ത്തു.
ജുഡീഷ്യറിയുടെ ഇന്ത്യാവല്‍ക്കരണം; പ്രതികരിച്ച് ചീഫ് ജസ്റ്റിസ്
രാജ്യത്തെ ജുഡീഷ്യറിയെ ഇന്ത്യാവല്‍ക്കരിക്കേണ്ടതിന്റെ ആവശ്യകതയില്‍ പ്രതികരിച്ച് സുപ്രീംകോടതി ചീഫ് ജസ്റ്റിസ് ഡി വൈ ചന്ദ്രചൂഢ്. രാജ്യത്തെ ജനങ്ങളുമായി ബന്ധപ്പെടണമെങ്കില്‍ അവര്‍ക്ക് മനസ്സിലാകുന്ന ഭാഷകളില്‍ അവരെ സമീപിക്കണം. കോടതിയില്‍ ഇതിനകം തന്നെ പ്രക്രിയ ആരംഭിച്ചിട്ടുണ്ടെന്ന് അദ്ദേഹം പറഞ്ഞു. ഇന്ത്യാ ടുഡേ കോണ്‍ക്ലേവ് 2023ല്‍ ഇന്ത്യന്‍ ജുഡീഷ്യറിയെക്കുറിച്ചുള്ള കാഴ്ചപ്പാടിനെക്കുറിച്ച് സംസാരിക്കുകയായിരുന്നു അദ്ദേഹം. ഇതാദ്യമാണ് ഒരു തത്സമയ പരിപാടിയില്‍ ഇന്ത്യയിലെ ഒരു സിറ്റിംഗ് ചീഫ് ജസ്റ്റിസ് ചോദ്യങ്ങളോട് പ്രതികരിക്കുന്നത്.
