🌸മയിൽ‌പീലി🌸: ഭാഗം 12

രചന: അനു രാജീവ്

"സഞ്ജു.. എനിക്കാ കുഞ്ഞിനെ എടുത്തപ്പോ..." "എടുത്തപ്പോ..." "എന്റെ മയില് അടുത്തുള്ള പോലെ... ഇവിടെയെവിടെയോ അവളുണ്ട് എന്നൊരു തോന്നൽ..." "എന്റെ അഭീ, നീ ഏത് നേരവും പീലിയെ കുറിച്ച് തന്നെ ചിന്തിക്കുന്നത് കൊണ്ടാ ഇങ്ങനെയൊക്കെ തോന്നുന്നത്... വാ നമുക്കൊന്ന് പുറത്ത് പോയിട്ട് വരാം.. അപ്പൊ ഈ മൈന്റൊക്കെ ഒന്ന് റിലാക്സ് ആകും..." "ഞാനെങ്ങും ഇല്ല..." "വാടാ ഇങ്ങോട്ട്..." സഞ്ജു അഭിയുടെ കൈയും വലിച്ച് പുറത്തേക്ക് നടന്നു... ലിഫ്റ്റിൽ കയറി താഴെ എത്തി നേരെ പാർക്കിംഗിലേക്ക് നടക്കുമ്പോൾ ബാൽക്കണിയിൽ നിന്ന് ആരോ ശ്രദ്ധിക്കുന്ന പോലെ തോന്നി അഭി തലയുയർത്തി നോക്കി... അവിടം ശൂന്യമായിരുന്നു... അതേസമയം ബാൽക്കണിയിൽ നിന്നും ഈ കാഴ്ച കണ്ട് നിലത്തേക്കൂർന്നിരുന്നു കരയുകയായിരുന്നു പീലി.... തന്റെ അവസ്ഥയോർത്ത്.. ഒരുപാട് ആഗ്രഹിച്ച മുഖം ആണെങ്കിലും ഇങ്ങനെയൊരു കാഴ്ച അവൾ ഒരിക്കലും ആഗ്രഹിച്ചിരുന്നില്ല... അവനു മുന്നിൽ താൻ അവനെ ചതിച്ച പെണ്ണാണ് എന്ന തോന്നൽ അവളെ ഉലച്ചു... ഇനി അവന്റെ മുന്നിൽ പോയി നിൽക്കാൻ ഉള്ള യാതൊരു യോഗ്യതയും തനിക്കില്ല.... മനസ്സുകൊണ്ട് എന്നും അവനെ മാത്രമേ പ്രണയിച്ചിട്ട് ഉള്ളൂ... എങ്കിലും ശരീരംകൊണ്ട് കളങ്കപ്പെട്ടിരിക്കുന്നു എന്നത് അവളെ വീണ്ടും വീണ്ടും തളർത്തി....

അവളിരുന്നു കരയുന്നത് കണ്ടുകൊണ്ടാണ് അല്ലി അങ്ങോട്ട് വന്നത്... "എന്തു പറ്റി മോളേ...?" അവൾ വേവലാതിയോടെ പീലിക്കു മുന്നിൽ മുട്ട്കുത്തിയിരുന്നു... അപ്പോഴും അവൾ കാലിൽ മുഖം ചേർത്ത് തേങ്ങുകയായിരുന്നു... " എന്തുപറ്റിയടാ.. കാര്യം പറ... " "ചേച്ചി.... ചേച്ചി...അഭി.. അഭിയേട്ടൻ താഴെ...." "എന്തൊക്കെയാ നീ പറയുന്നേ...." "ചേച്ചി....ഇവിടെ.. ഇവിടെയുണ്ട്.. ഞാൻ കണ്ടു... താഴെ പാർക്കിംഗിലേക്ക് പോകുന്നത്..." "നിനക്ക് തോന്നിയതാകും മോളെ.... അവനെങ്ങനെ ഇവിടെ വരാൻ??" " ഇല്ല ചേച്ചി.. കുഞിനെ എടുത്തപ്പോഴേ എനിക്ക് ഫീൽ ചെയ്തിരുന്നു..." "എന്തൊക്കെയാടി നീ പറയുന്നേ...??" " അതേ ചേച്ചി കുഞ്ഞിന് പോലും അവന്റെ മണമായിരുന്നു.... ഇങ്ങോട്ട് വന്നത് എന്റ അഭിയേട്ടനാ... " "എന്റെ മോളെ നിനക്കെന്താ ഭ്രാന്ത് പിടിച്ചോ.... ആർക്കെങ്കിലും മണം വെച്ചിട്ട് ഒരാളെ തിരിച്ചറിയാൻ പറ്റുമോ??" " എനിക്ക് അറിയാൻ പറ്റും ചേച്ചി...എനിക്ക് ന്റെ അഭിയേട്ടന്റെ ശ്വാസം പോലും തിരിച്ചറിയാൻ കഴിയും... ഇങ്ങോട്ടു വന്നിരുന്നു..." "മോളെ.. ഇങ്ങോട്ട് വന്നത് അപ്പുറത്തെ ഫ്ലാറ്റിലെ രണ്ടു പിള്ളാരാ... എന്താ പേര്... ഹാ.. സഞ്ജയ്‌.. പിന്നെ മനു..." "മനു അല്ല ചേച്ചി.. അഭിമന്യു.." കുറച്ചു സമയം അവർക്കിടയിൽ നിശബ്ദത തളം കെട്ടി.. അവൾ കരയുന്നത് കണ്ട് ഒറ്റയ്ക്ക് വിടാം എന്ന് കരുതി പിന്നീട് അല്ലി അവളെ ശല്യം ചെയ്തില്ല... അരുണിന് ഒരു എമർജൻസി കേസ് വന്നു എന്നു പറഞ്ഞ് ഹോസ്പിറ്റലിലേക്ക് പോയി... ഇരുട്ടു കൂടുംതോറും അവളിലെ ചിന്തകളും കൂടിക്കൂടി വന്നു...

താൻ ഇവിടെ ഉണ്ടെന്നറിഞ്ഞാൽ അഭിയേട്ടന്റെ പ്രതികരണം എങ്ങനെയാവും എന്ന് അവൾക്ക് ഊഹിക്കാൻപോലും കഴിയുന്നുണ്ടായിരുന്നില്ല... ദേഷ്യം ആയിരിക്കുമോ? അതോ പഴയ സ്നേഹം അതുപോലെതന്നെ ഉണ്ടാകുമോ..? അഭിയുടെ കുത്തുവാക്കുകളും വെറുപ്പോടെയുള്ള ഒരു നോട്ടം പോലും ഒരിക്കലും നേരിടാൻ കഴിയില്ല എന്നവൾക്ക് അറിയാമായിരുന്നു... അതുപോലെതന്നെ ഇനി തനിക്ക് മുന്നിൽ സ്നേഹം വെച്ച് നീട്ടിയാൽ അത് സ്വീകരിക്കാനും കഴിയില്ല... ഇനിയിവിടെ നിൽക്കുന്നതിൽ അർത്ഥമില്ല എന്ന് അവൾക്ക് തോന്നി.... ഇരുന്നിടത് നിന്നും എഴുന്നേറ്റ് അവൾ താഴെ പാർക്കിംഗിലേക്ക് നോക്കി... അവരുടെ വണ്ടി വന്നിട്ടില്ല... അവൾ എന്തൊ തീരുമാനിച്ചുറപ്പിച്ച പോലെ കണ്ണുകൾ നന്നായി തുളച്ച് ഫോണും പേഴ്സും മാത്രം എടുത്ത് ചേച്ചിയോട് ഒന്നു പറയുക പോലും ചെയ്യാതെ താഴേക്കിറങ്ങി... ഫ്ലാറ്റിൽ നിന്നും കുറച്ചധികം ദൂരം ഉണ്ടായിരുന്നു എൻട്രൻസിലേക്ക്... അതുകൊണ്ടുതന്നെ അവൾ നടന്നിട്ടും നടന്നിട്ടും ഗേറ്റിന് അടുത്തേക്ക് എത്തുന്നുണ്ടായിരുന്നില്ല... കണ്ണുനീർ കാഴ്ചയെ മറച്ചിരുന്നു... കുറച്ചു കഴിഞ്ഞു മുറിയിൽ ഇല്ല എന്ന് അറിയുമ്പോൾ ചേച്ചി വിളിക്കും അപ്പോൾ കാര്യം പറയാം എന്നായിരുന്നു ചിന്ത... രാത്രി 9 മണിക്ക് ഒരു ഫാസ്റ്റ് പാസഞ്ചർ ഉണ്ട് കേരളത്തിലേക്ക്...

തിരികെ പോകുന്നു എന്ന് പറഞ്ഞാൽ ഉറപ്പായും സമ്മതിക്കില്ല... ചെയ്യുന്നത് തെറ്റാണെങ്കിലും ഇപ്പോൾ തനിക്ക് ഈ ഒരു വഴിയേ ഉള്ളൂ എന്ന് അവൾക്ക് ബോധ്യമുണ്ടായിരുന്നു.... അവൾ വേഗം ഗേറ്റ് കടന്ന് പുറത്തേക്കിറങ്ങി... ചീറിപ്പായുന്ന വണ്ടികൾക്ക് ഇടയിലൂടെ കടന്നു പോകുമ്പോൾ വലിയ ഇരമ്പൽ ശബ്ദം അവളുടെ ചെവിയിൽ മുഴങ്ങി കേട്ടു... തിരിഞ്ഞു നോക്കിയതും തനിക്ക് നേരെ പാഞ്ഞു വരുന്ന ഒരു ലോറിയാണ് കണ്ണിൽപ്പെട്ടത്... കണ്ണുകൾ ഇറുകെ ചിമ്മി അവൾ പുറകോട്ട് നീങ്ങിയതും പുറകിലൂടെ വന്ന ജിപ്സി അവളെ ഇടിച്ചുതെറിപ്പിച്ചു... കണ്ണുകൾ അടക്കുമ്പോൾ 💙മയിലേ...💙 എന്ന വിളി അവളിൽ മുഴങ്ങി കേട്ടു.... 🌸🌸🌸🌸🌸 സഞ്ജുവിന്റെ നിർബന്ധത്തിന് അടുത്തുള്ള പാർക്കിൽ പോയി ഇരുന്നെങ്കിലും പൂക്കൾ പോലും തരുന്നത് അവളുടെ ഓർമകളാണ്... വല്ലാത്ത അസ്വസ്ഥത തോന്നിയപ്പോൾ അവർ തിരികെ മടങ്ങി.. ഫ്ലാറ്റിനടുത്തു ഏത്താറാവുമ്പോഴാണ് റോഡ് ക്രോസ്സ് ചെയ്യുന്ന പീലിയെ കണ്ടത്.. എന്നത്തേയും പോലെ ഇതും തോന്നലാവും എന്ന് കരുതി അഭി ശ്രദ്ധിച്ചില്ല.. അല്ലെങ്കിലും തനിക്ക് ചുറ്റും ഇപ്പൊൾ അവൾ മാത്രം ആണല്ലോ... അവളുടെ നിലവിളി ശബ്ദം കാതിൽ കേട്ടപ്പോൾ ഒരുനിമിഷം അവന്റെ ഹൃദയം നിലച്ചു... "അഭീ.... ദേ..പീലി...."

പുറകെ ഇരുന്ന് സഞ്ജു പറഞ്ഞതും അവരുടെ അടുത്ത് കൂടെ പാസ്സ് ചെയ്ത് പോയ ജിപ്സി അവളെ ഇടിച്ചു തെറിപ്പിച്ചു.. ബൈക്ക് അവിടെയിട്ട് അഭി അവൾക്കടുത്തേക്ക് ഓടി.. രക്തത്തിൽ കുതിർന്ന കൺപീലികൾ അടക്കുമ്പോൾ അവൻ അവളെ കോരിയെടുത്തിരുന്നു.. ഇടിച്ച ജിപ്സിയിൽ തന്നെ കയറ്റി വണ്ടി ഹോസ്പിറ്റലിലേക്ക് പാഞ്ഞു.. "മ... മയിലേ....." അവൻ കരഞ്ഞു കൊണ്ട് അവളെ തട്ടി വിളിച്ചു.. നെറ്റിയിലൂടെ ഒഴുകി ഇറങ്ങിയ രക്തം അവന്റെ കൈകളെയും ഷർട്ടിനേയും കുതിർത്തിരുന്നു.. അവളെ കണ്ടതിൽ സന്തോഷിക്കണോ, ഈ അവസ്ഥയിൽ കണ്ടതിൽ പൊട്ടി കരയണോ എന്നറിയാത്ത അവസ്ഥയിലായിരുന്നു അവൻ.. ഒരു തരം മരവിപ്പോടെ അവൻ അവളെ നെഞ്ചിലേക്ക് ചേർത്തു വച്ചു... ഹോസ്പിറ്റലിൽ എത്തിയതും സ്‌ട്രക്ച്ചറിൽ കയറ്റി കേഷ്വാലിറ്റിയിലേക്ക് കൊണ്ട് പോയി.. അപ്പോഴേക്കും സഞ്ജു ഫോൺ എടുത്തു അരുണിനെ വിളിച്ചു.. അരുൺ കാര്യമറിഞ്ഞതും വേഗം കേഷ്വാലിറ്റിയിൽ പോയി അവളെ icu വിലേക്ക് ഷിഫ്റ്റ്‌ ചെയ്തു.. അഭി വല്ലാത്ത ഒരു അവസ്ഥയിലായിരുന്നു.. അരുൺ icu യിൽ നിന്നും പുറത്ത് വന്നതും സഞ്ജു അരുണിനടുത്തേക്ക് പോയി.. "ഡോക്ടർ.. പീലിക്ക് എങ്ങനെയുണ്ട്...??" "നിങ്ങൾക്കെങ്ങനെ അറിയാം അവളെ??" കലങ്ങി ചുവന്ന കണ്ണിൽ നിന്നും ഒഴുകിയിറങ്ങുന്ന വെള്ളം തുടച്ചു മാറ്റാൻ പോലും കഴിയാതെ മരവിച്ചിരിക്കുന്ന അഭിയെ നോക്കി അരുൺ ചോദിച്ചു... "പറയാം ഡോക്ടർ.. ഇപ്പൊ അവൾക്ക്..."

"കുഴപ്പമില്ല.. പുറമെ ഉള്ള ഇൻജുറീസെ ഉള്ളു.. Nothing to worry.. ഒബ്സെർവേഷനിൽ ആണ്..നാളെ റൂമിലേക്ക് മാറ്റും.." സഞ്ജു ഡോക്ടറിനോടൊപ്പം പോയി... അവൾക്കൊരു അഫ്ഫെയർ ഉണ്ടായിരുന്നു അതിന് സമ്മതിക്കാതെയാണ് ഇന്ദ്രനുമായുള്ള വിവാഹം നടത്തിയത് എന്ന് മാത്രമേ അരുണിന് അറിയുമായിരുന്നുള്ളു. സഞ്ജു, അഭിയെയും അവന്റെ മയിലിനെയും കുറിച്ച് പറഞ്ഞു കൊടുത്തു.. അരുണിന് വല്ലാത്ത വിഷമം തോന്നി.. ആരുടെയൊക്കെയോ വാശിക്ക് വേണ്ടി ഇല്ലാതാക്കിയത് രണ്ടു ജീവിതങ്ങളാണ്... അരുൺ വേദനയോടെ ഓർത്തു.. അരുൺ വിളിച്ചു പറഞ്ഞതനുസരിച്ചു അല്ലി കുഞ്ഞിനേയും കൊണ്ട് ടാക്സിയിൽ വന്നു... Icu നു മുന്നിൽ നിൽക്കുന്ന അരുണിനെ കണ്ട് അവൾ ഓടി വന്ന് ഇറുകെ പുണർന്നു.. "അവൾക്ക് എങ്ങനെയുണ്ട് അരുണേട്ടാ.. നിക്ക്.. നിക്കൊന്നു കാണണം.. " "കുഴപ്പമില്ല ടോ.. നാളെ കാണാം....അവളെന്തിനാ പുറത്തു പോയത്..." "അറിയില്ല.. അഭിമന്യു എന്ന് പറയുന്നത് 6D യിലെ മനു ആണത്രേ... അവനെ കണ്ടെന്നും പറഞ്ഞ് കരച്ചിലായിരുന്നു... പെട്ടെന്ന് നോക്കിയപ്പോ അവളെ കാണാനില്ല.. ഞാൻ താഴെ പോയി നോക്കുമ്പോഴാ അരുണേട്ടൻ വിളിച്ചത്..." പറഞ്ഞ് കഴിഞ്ഞ് തിരിഞ്ഞ് നോക്കുമ്പോഴാണ് സീറ്റിൽ ഇരിക്കുന്ന അഭിയേയും സഞ്ജുവിനെയും കണ്ടത്.. അഭിയുടെ ഷർട്ടിലെ ചോര കണ്ട് അല്ലി അരുണിനെ നോക്കി.. "അവരാ ഇവിടെ എത്തിച്ചത്.. താൻ വാ.. എനിക്ക് സംസാരിക്കാനുണ്ട്.."

കുഞ്ഞിനെ സഞ്ജുവിന്റെ കയ്യിൽ കൊടുത്ത് അവർ മാറി നിന്നു.. "തനിക്കറിയാമോ അഭിയുടെയും പീലിയുടെയും കാര്യം..." "ഹ്മ്മ്.. അവൾ എന്നോട് പറഞ്ഞിട്ടുണ്ട്..." "അവനെ കണ്ടോ നീ... നീ പറഞ്ഞ പോലെ അവൻ ഒരു ഡ്രഗ് അഡിക്റ്റ് ആണ്.. പക്ഷെ അത് യൂസ് ചെയ്യാൻ തുടങ്ങിട്ട് കൂടി പോയാൽ മൂന്ന് മാസം.. അത്രെയേ ആയിട്ടുണ്ടാവുള്ളു.. അവന് പീലിയെ കൊടുത്താൽ തീരാവുന്നതേ ഉള്ളു രണ്ടാളുടെയും സങ്കടങ്ങൾ..." "എന്തൊക്കെയാ അരുണേട്ടാ പറയുന്നത്.. അവൻ....." "അവന്റെ കലങ്ങിയ കണ്ണുകൾ കണ്ടോ നീ... ആണുങ്ങൾ കരയണമെങ്കിൽ അത്രയധികം വേദനിക്കണം.. നിന്റെ അനിയത്തിക്ക് വേദനിക്കുന്നതിലും കൂടുതൽ വേദനിക്കുന്നുണ്ട് അവന്.. അവളുടെ ശരീരത്തു ഒരു മുറിവ് പറ്റുന്നത് പോലും സഹിക്കില്ല അവൻ... അങ്ങനെയൊരുത്തനെ കിട്ടിയാൽ പീലിയെക്കാൾ ഭാഗ്യമുള്ള പെൺകുട്ടി വേറെ ഉണ്ടാവില്ല.." "പക്ഷെ അവള് സമ്മതിക്കുമെന്ന് തോന്നുന്നില്ല..." "സമ്മതിപ്പിക്കണം... താനിപ്പോ വാ.. പീലി ട്രിപ്പ്‌ കയറ്റിയ സെഡേഷനിൽ ആണ്.. നാളെ റൂമിലേക്ക് മാറ്റും... അപ്പൊ സംസാരിക്കാം...." അരുൺ വന്നതും സഞ്ജു എഴുന്നേറ്റ് നിന്നു.. കുഞ്ഞിനെ സഞ്ജുവിന്റെ കയ്യിൽ നിന്നും വാങ്ങി അഭിയെ നോക്കി... "നിങ്ങള് പൊയ്ക്കോളൂ.. കാലത്തെ മുറിയിലേക്ക് മാറ്റുള്ളൂ..." അഭി ഒരു അനക്കവും ഇല്ലാതെ ഇരിക്കുന്നുണ്ട്.. "അഭീ...." "നീ വേണെങ്കിൽ പൊയ്ക്കോ.. " അഭി സഞ്ജുവിനെ നോക്കാതെ തന്നെ പറഞ്ഞു..

"എടാ.. ഡ്രസ്സ്‌ എങ്കിലും മാറ്റേണ്ടേ.. പോയി മാറ്റിയിട്ട് വരാം..." അവൻ അനങ്ങുന്നുണ്ടായിരുന്നില്ല.. "ഡോക്ടർ.. ഞാൻ പോയി അവന്റെ ഡ്രസ്സ്‌ എടുത്തിട്ട് വരാം.. " "നന്ദേ.. താനും പൊയ്ക്കോ.. ഇവിടെ നിന്നിട്ട് കാര്യമില്ലാലോ.. കാലത് വന്നാൽ മതി.. ടോ താൻ കാർ എടുക്കില്ലേ..." "ഹാ.. ഡോക്ടർ..." അരുൺ കാറിന്റെ കീ സഞ്ജുവിനെ ഏൽപ്പിച്ചു.. അവന്റെ കൂടെ അല്ലിയും പോയി.. അരുൺ അഭിക്കടുത്തു വന്നിരുന്നു.. "താൻ വിഷമിക്കല്ലേ ടോ.. അവൾക്ക് ഒന്നുമില്ല... താനിപ്പോ വല്ലതും കഴിക്കു.. കാന്റീനിലേക്ക് പോവാം ." അവൻ ഒന്നും മിണ്ടാതെ ഇരിക്കുന്നത് കണ്ട് അരുൺ അവിടെ നിന്നും op യിലേക്ക് പോയി.. 🌸🌸🌸🌸🌸 "ചേച്ചി.. പീലി എങ്ങനെയാ ഇവിടെ??" കാറിൽ പോവുമ്പോൾ സഞ്ജുവാണ് സംസാരത്തിനു തുടക്കമിട്ടത്.. "എന്റെ അനിയത്തിയാ.. ഞങ്ങളുടെ ഒപ്പം വന്നതാ.." "അപ്പൊ അവളുടെ ഹസ്ബൻഡ്??" "ഡിവോഴ്സ് ആയി..." സഞ്ജുവിന് ഞെട്ടലും ഒപ്പം സന്തോഷവും തോന്നി.. "എന്ത് പറ്റി ചേച്ചി...??" അഭിയെ കാര്യങ്ങൾ അറിയിക്കാൻ ഇതാണ് മാർഗം എന്നറിയാവുന്നത് കൊണ്ട് അല്ലി അവൾ പറഞ്ഞതെല്ലാം, അപ്പയുടെ ഭീഷണിയും ആത്മഹത്യ ശ്രമവും , വിവാഹവും, ഹോസ്പിറ്റലിൽ കിടന്നതും, അവസാനം ഡിവോഴ്സ് ആയതിനു ശേഷം ബാംഗ്ലൂരിലേക്ക് വരാനുള്ള കാരണവുമെല്ലാം സഞ്ജുവിനോട് പറഞ്ഞു.. "എന്റെ അനിയത്തിയോട് വെറുപ്പ് തോന്നരുത്..." "ചേച്ചി.. അവനെന്നും പറയും എന്റെ മയിലിന്റെ ഇഷ്ടത്തോടെയല്ല ആ വിവാഹം, അവൾ ഒരു തെറ്റും ചെയ്യില്ല, എന്റെ മയില് സന്തോഷത്തോടെയല്ല ജീവിക്കുന്നത് എന്നൊക്കെ...

ഞാൻ കരുതി ഭ്രാന്ത് പറയുവാണെന്ന്.. അവന് മനസിലായിരുന്നു അവളുടെ സങ്കടം.. ഞാനാ നിർബന്ധിച്ചു ഇങ്ങോട്ട് കൂട്ടികൊണ്ട് വന്നത്.. എനിക്ക് ഇടക്കെങ്കിലും പീലിയോട് ദേഷ്യം തോന്നിയിരുന്നു.. അഭിയുടെ അവസ്ഥ കണ്ട്... പക്ഷെ അവന് എന്നും അവളോട് പ്രണയം മാത്രമായിരുന്നു.. ഡ്രഗ് യൂസ് ചെയ്യുമ്പോൾ എനിക്കെന്റെ മയിലിനെ കാണാൻ കഴിയും എന്നാ പറയാറ്.. അതിന് വേണ്ടിയാ അവൻ......." സഞ്ജു കണ്ണുകൾ തുടച്ച് വണ്ടിയിൽ ശ്രദ്ധിച്ചു.. 'അരുണേട്ടൻ പറഞ്ഞത് ശരിയാണ്.. എന്റെ അനിയത്തിയുടെ ഭാഗ്യമാണ് അവൻ..' അല്ലി ചിന്തിച്ചു... പാതിരാത്രിക്ക് സഞ്ജു ഡ്രെസ്സുമായി എത്തി.. ഒരുപാട് നിർബന്ധിച്ചപ്പോൾ അഭി പോയി ഡ്രസ്സ്‌ മാറ്റിയിട്ട് വന്നു.. "അഭീ... നിന്റെ മയില് ഒരു തെറ്റും ചെയ്തിട്ടില്ല ടാ..." അവൻ മനസിലാക്കാതെ സഞ്ജുവിന്റെ മുഖത്തേക്ക് നോക്കി.. അല്ലിയിൽ നിന്നും അറിഞ്ഞത് മുഴുവൻ സഞ്ജു അഭിയോട് പറഞ്ഞു.. "എന്തൊക്കെ സംഭവിച്ചാലും ഡിവോഴ്സ് ചെയ്യാനുള്ള ധൈര്യം ഉണ്ടായല്ലോ.. അത് മതി..." "ഡിവോഴ്സ് ആയിരുന്നില്ലെങ്കിലും അവളെ ഞാനിനി എങ്ങോട്ടും വിടില്ലായിരുന്നു.. ഇനി എന്റടുത്ത് വേണം എന്റെ മയിൽ..."

"എടാ.. പക്ഷെ.. അവള് സമ്മതിക്കുമോ.. എനിക്ക് എന്തോ പ്രതീക്ഷയില്ല.. അല്ലി ചേച്ചി പറഞ്ഞത് വച്ച് നോക്കുമ്പോൾ നമ്മളെ കണ്ടത് കൊണ്ടാവണം അവൾ ഫ്ലാറ്റിൽ നിന്നും ഇറങ്ങി പോയത്..." "എന്നിട്ടോ.??. നമ്മുടെ കയ്യിൽ തന്നെ കിട്ടിയില്ലേ.. ഇനി എന്റെ മയിലിനെ ഞാൻ എങ്ങോട്ടും വിടില്ല.. എന്റെയാ. എന്റെ മാത്രം..." അവന്റെ വാക്കുകളിലെ ദൃഡത മനസിലായപ്പോൾ സഞ്ജു പിന്നീട് ഒന്നും പറയാൻ നിന്നില്ല.. രണ്ടു പേരും ചെയറിൽ ചാരിയിരുന്നു നേരം വെളുപ്പിച്ചു.. 🌸🌸🌸🌸🌸 തലക്ക് വല്ലാത്ത കനം തോന്നിയെങ്കിലും പീലി ആയാസപ്പെട്ടു കണ്ണ് തുറന്നു.. തലയിൽ ഒരു തരം മുറുക്കം.. കണ്ണുകൾ കൊണ്ട് ചുറ്റും പരതി... തന്റെ കാൽകീഴിൽ തല വച്ച് കിടക്കുന്നൊരാളെ ശ്രദ്ധയിൽ പെട്ടു.. ഹൃദയം നിയന്ത്രിതാതീതമായി മിടിക്കാൻ തുടങ്ങി.. അവളുടെ മനസ്സിൽ കണ്ണുകൾ അടയുന്നതിനു മുമ്പ് കേട്ട ശബ്ദം അലയടിച്ചു.. കാലിന് ചുവട്ടിൽ ഇരുന്ന വ്യക്തി തലയുയർത്തി മൂരി നിവർന്നു... അവൾ അമ്പരപ്പോടെ ആ മുഖത്തേക്ക് നോക്കി.. കണ്ണുകളിൽ നിറഞ്ഞ് നിൽക്കുന്ന കുസൃതിയോടൊപ്പം കള്ള ചിരിയോടെ ആ ചുണ്ടുകൾ മൊഴിഞ്ഞു, "മയിലേ... 💙"....... തുടരും......

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...