🌸മയിൽ‌പീലി🌸: ഭാഗം 23

രചന: അനു രാജീവ്

തെയ്യം താഹ തെയ്യം താഹ തിതിത്തെയ് തിതിത്തെയ് തെയ്യം തെയ്യം തെയ്യം താഹ.... മുന്നിലെ വരിയിൽ നിന്നുകൊണ്ട് താളത്തിന് അനുസൃതമായി ചുവടുകൾ വയ്ക്കുന്ന പീലിയേ കണ്ണിമയ്ക്കാതെ അഭി നോക്കിനിന്നു.. അവളിൽ നിന്നും നോട്ടം മാറ്റാതെ തന്നെ ഒരു ചെയർ വലിച്ചിട്ട് അതിലേക്ക് ഇരുന്നു.... ആ കരിമിഴികളിൽ മാത്രമായി അവന്റെ നോട്ടം ഒതുങ്ങി.... ഇത്രയും പെൺകുട്ടികൾ നൃത്തം ചവിട്ടിയിട്ടും എന്തുകൊണ്ട് മറ്റാരെയും തന്റെ കണ്ണുകളിൽ കാണാൻ സാധിക്കുന്നില്ല എന്നത് അവന് അത്ഭുതമായിരുന്നു... പീലിയുടെ ശ്രദ്ധ മുഴുവൻ നൃത്തത്തിൽ ആയിരുന്നു എങ്കിലും കണ്ണുകൾ അവന്റെ മുഖത്ത് തന്നെ തറച്ചു നിന്നു... അഭിയെ നോക്കിക്കൊണ്ട് തന്നെ ഇളം ചിരിയോടെ അവൾ ചുവടുകൾ വച്ചു... പുറകിൽ തന്നെ സഞ്ജു ഇരിക്കുന്നത് കണ്ട് പീലിയുടെ നോട്ടം അങ്ങോട്ടേക്ക് ചലിച്ചു... അവന്റെ നോട്ടം എങ്ങോട്ടോ ഒരു ഭാഗത്തേക്ക് മാത്രമാണ് എന്ന് മനസ്സിലാക്കി കൊണ്ട് പതിയെ അവളുടെ നോട്ടവും അവന്റെ നോട്ടത്തിന്റെ ദിശയിലേക്ക് മാറി...

അടുത്തുനിന്ന് നൃത്തം ചെയ്യുന്ന മീനുവിൽ ആണ് അവന്റെ കണ്ണുകൾ എന്ന് കണ്ടതും അവൾ അവനെ ഒന്ന് കൂർപ്പിച്ചു നോക്കി... പക്ഷെ ആളുടെ ശ്രദ്ധ ഇവിടെ ഒന്നും അല്ല, മീനുവിനെ മാത്രം നോക്കി കൊണ്ടിരിക്കുകയാണ് എന്ന് മനസ്സിലായപ്പോൾ ചുണ്ടിലൊളിപ്പിച്ച ചിരിയോടെ അവൾ അത് ശ്രദ്ധിക്കാതെ നൃത്തത്തിലേക്ക് തന്നെ ശ്രദ്ധതിരിച്ചു.... അന്നത്തെ ക്ലാസ്സ് കഴിഞ്ഞു ഓരോരുത്തരും പോകാൻ തുടങ്ങി... കാലിൽനിന്നും ചിലങ്ക അഴിച്ചുവച്ച് തിരിഞ്ഞുനോക്കുമ്പോൾ അഭി പുറകിൽ നിൽക്കുന്നു... കണ്ണുകൊണ്ട് കുളക്കടവിലേക്ക് വാ എന്നുപറഞ്ഞുകൊണ്ട് അഭി പോയി... അവൾ അവിടെത്തന്നെ ചിരിയോടെ നിന്നു... പെട്ടെന്ന് സഞ്ജുവേട്ടൻ വന്നു കയ്യിൽ പിടിച്ചു.. "പീലി കുട്ടി.. എനിക്ക് മീനാക്ഷിയെ ഇഷ്ട്ടായി.. നിന്റെ ഹെല്പ് വേണം.." അവൾ അന്തം വിട്ടു നോക്കി... കാര്യം മനസ്സിലായിരുന്നു എങ്കിലും, ചിലപ്പോ വായിനോട്ടം ആയിരിക്കും എന്ന് കരുതി...

ഇനി സീരിയസ് ആണെങ്കിൽ തന്നെ ഒരു മറയുമില്ലാതെ പെട്ടെന്ന് തന്നെ തന്നോട് ഇക്കാര്യം സംസാരിക്കുമെന്ന് അവൾ വിചാരിച്ചിരുന്നില്ല.. പിന്നെ ആലോചിച്ചു അഭിയേട്ടന്റെ ഫ്രണ്ട് അല്ലേ... കുറച്ചു ഗുണമെങ്കിലും ഇല്ലാതിരിക്കില്ല.. ഇല്ലെങ്കിലും ഇവർക്കൊക്കെ എന്ത് നാണം എന്ത് ചമ്മൽ.. അവളുടെ ഓർമ്മകൾ വീണ്ടും കാലത്തുണ്ടായ കാര്യങ്ങളിലേക്ക് നീങ്ങി... ഓർമ്മകൾക്ക് കടിഞ്ഞാണിട്ടു കൊണ്ട് അവൾ സഞ്ജുവിന്റെ മുഖത്തേക്ക് നോക്കി... "അതിന് ഞാൻ എന്ത് ചെയ്യണം സഞ്ജുവേട്ട??" " ഇങ്ങനെ ചോദിക്ക്. നീ സമയം കിട്ടുമ്പോഴൊക്കെ മീനാക്ഷിയോട് എന്നെക്കുറിച്ച് നന്നായി പൊക്കി അടിക്കണം... സത്യങ്ങൾ പറഞ്ഞാൽ മതി.... പക്ഷേ അവൾ ഇമ്പ്രെസ്സ് ആവണം... ബാക്കിയൊക്കെ ഞാൻ നോക്കിക്കോളാം... "

എന്തോ വലിയ കാര്യം നടത്താൻ പോകുന്നു എന്ന ഭാവത്തോടെ ആയിരുന്നു അവളുടെ നിൽപ്പ്... അതുകൊണ്ട് ചിരിയോടെ തലകുലുക്കി സമ്മതം അറിയിച്ച്, മീനുവിനോട് വെയിറ്റ് ചെയ്യാൻ പറഞ്ഞ് അവൾ കുളക്കടവിലേക്ക് നടന്നു... കുട്ടികളെല്ലാം പോയി എന്ന് ഉറപ്പായപ്പോൾ സഞ്ജു മീനുവിനെ അടുത്തേക്ക് വന്നു "ഹായ്..." അവൾ വീണ്ടും ഒരു പുഞ്ചിരി മാത്രം തിരികെ നൽകി.. "പഠിക്കുന്നുണ്ടോ...?". "ഹ്മ്മ്.. ഡിഗ്രി 2 nd year..". "ആഹാ.. ഏതാ subject..?". "Bcom..." "ഞങ്ങളും Bcom ആയിരുന്നു..." അവൾ നെറ്റിചുളിച്ചു... അവൾക്ക് ഞങ്ങൾ എന്ന് പറഞ്ഞത് മനസ്സിലായില്ല എന്ന് കരുതി അവൻ കൂട്ടിച്ചേർത്തു.. " ഞാനും അഭിയും " "കോളേജിന്നു തുടങ്ങിയ ഫ്രണ്ട്ഷിപ് ആണോ..?" "ഏയ്‌.. ഞങ്ങൾ സ്കൂൾ തൊട്ട് ഒരുമിച്ചായിരുന്നു.." "ഏട്ടന്റെ വീട്..?." ഏട്ടൻ.. ആ വിളി കൊള്ളാം... അവൻ മനസ്സിൽ കരുതി.. ഉത്തരം പ്രതീക്ഷിച്ചുകൊണ്ട് ഉള്ള അവളുടെ മുഖം കണ്ടപ്പോൾ അവൻ ചിരിയോടെ അവളുടെ നേരെ തിരിഞ്ഞു..

"വീടെന്ന് പറയാൻ.. ദേ ഇത് തന്നെയാ എന്റെ വീടും. .. സ്വന്തമെന്ന് പറയാൻ അഭിയും അമ്മയും... സ്വന്തം അച്ഛനും അമ്മയുമൊന്നും ആരാണെന്ന് അറിയില്ല... 14 വയസ്സ് തൊട്ട് അഭിയാണ് എന്റെ എല്ലാം... പതിനെട്ടു വയസ്സ് വരെ ഒരു ഓർഫെനേജിൽ ആയിരുന്നു.. അതിന് ശേഷം അഭി എവിടെയുണ്ടോ അവിടെ തന്നെയാ ഞാനും.. ഊട്ടിയിൽ ഒരു ഫാം ഉണ്ട്.. സ്വന്തമെന്ന് പറയാൻ അത് മാത്രേ ഉള്ളു... പിന്നെ അഭിയും അമ്മയും.. എന്നെ അങ്ങോട്ട് പോവാനൊന്നും ഇവർ സമ്മതിക്കില്ല... പിന്നെ അവനോടൊപ്പം ചേർന്നതിൽ പിന്നെ അവൻ എവിടെയും അങ്ങനെ നിന്നിട്ടില്ല എന്നതാണ് സത്യം.. ചിലപ്പോ അത് എനിക്ക് വേണ്ടിയാണെന്ന് പോലും തോന്നിയിട്ടുണ്ട്... അതുകൊണ്ട് ഒറ്റയ്ക്കാണെന്നോ അനാഥയാണെന്നോ എനിക്ക് ഇതുവരെ തോന്നിയിട്ടില്ല... ഏത് സമയവും അവന്റെ കൂടെ... ഇങ്ങനെ..." സഞ്ജുവിന്റെ തൊണ്ട ഇടറിയിരുന്നു..

. പീലി പറഞ്ഞത് വച്ച് മനസ്സിൽ കുന്നോളം സ്നേഹമുള്ള ഒരു കോമഡി പീസ്.. അതായിരുന്നു മീനുവിന്റെ മനസ്സിൽ സഞ്ജയ്‌ എന്ന വ്യക്തി... അവൾക്കും സങ്കടം തോന്നി.. പക്ഷെ ആ സങ്കടം എങ്ങനെ പ്രകടിപ്പിക്കണം എന്നറിയാതെ നിന്നു.. അവളുടെ അവസ്ഥ മനസിലാക്കിയ അവൻ ഉടനെ തന്നെ പതിവ് ചിരിയെടുത്തു ചുണ്ടിലണിഞ്ഞു... "പിന്നെ.. ഞാൻ ഇതൊന്നും ആരോടും പറയാറില്ല... തന്നോട് പറഞ്ഞത് ഒരു കാരണം ഉള്ളതുകൊണ്ടാണ്..." അവൻ എന്താണ് പറയാൻ പോകുന്നത് എന്ന ആകാംക്ഷയോടെ അവൾ അവനെ തന്നെ നോക്കി നിന്നു... "നാളെ..നമ്മൾ കല്യാണം ഒക്കെ കഴിഞ്ഞു കുട്ടിയും മക്കളുമൊക്കെ ആവുമ്പോൾ ഇടയ്ക്ക് ചില സൗന്ദര്യപ്പിണക്കമൊക്കെ ഉണ്ടാകുമല്ലോ... അപ്പൊ നീ എന്നോട് പറയും, "ഹും...നിങ്ങൾ അനാഥയാണ് എന്നറിയാതെയാ ഞാൻ പ്രേമിച്ചത്.. നിങ്ങളെ സ്നേഹിക്കുന്നതിനു മുൻപേ നിങ്ങൾ എന്തുകൊണ്ട് എന്നോട് പറഞ്ഞില്ല?,

ഇപ്പൊ നോക്ക്,നമുക്ക് പറയാൻ മാത്രം ബന്ധുക്കൾ ഉണ്ടോ? എന്തിന്... എനിക്കൊന്ന് പോരടിക്കാൻ ഒരു അമ്മായിഅമ്മയെങ്കിലും??? Etc etc... എന്ന്.... അപ്പൊ ഞാൻ ഉത്തരം കിട്ടാതെ പഴം വിഴുങ്ങിയ പോലെ ഇരിക്കാതിരിക്കാനാണ്, ഇപ്പോൾതന്നെ നിന്നോട് കാര്യം പറഞ്ഞത്... മീനു ആകെ കിളി പോയ പോലെ നിൽക്കുകയായിരുന്നു... അവൻ പറഞ്ഞതൊന്നും കൃത്യമായി മനസ്സിലായില്ല... പറഞ്ഞ വാക്കുകൾ വീണ്ടും വീണ്ടും റിവൈന്റ് ചെയ്ത് ആലോചിച്ചു.... ' ഇതൊരു പ്രൊപ്പോസൽ സീൻ ആയിരുന്നു എന്ന് മനസ്സിലായപ്പോൾ അവർ ഞെട്ടി കൊണ്ടു അവനെ നോക്കി.... 🔵🔵🔵🔵🔵🔵🔵🔵

കുളപ്പുര വാതിൽ തുറന്ന് പീലി അകത്തേക്ക് പ്രവേശിച്ചു.... പടികളിറങ്ങി താഴേക്ക് വന്നു... ചുറ്റും അഭിയെ നോക്കിയെങ്കിലും കണ്ടില്ല... അവൾ കയ്യിലുള്ള മീൻ തീറ്റ കുളത്തിലേക്ക് ഇട്ടു.... കുറെ കാലങ്ങൾക്ക് ശേഷം പീലിയുടെ സാന്നിധ്യം അറിഞ്ഞ പോലെ മീനുകൾ കൂട്ടമായി വന്ന് ആ തീറ്റ കൊത്തി പെറുക്കിയെടുത്തു... അവൾ ചിരിയോടെ അത് കണ്ടു നിന്നു.... "എന്നോട് കുളത്തിലേക്ക് വരാൻ പറഞ്ഞിട്ട് ഈ മനുഷ്യൻ ഇതെവിടെ പോയി കിടക്കുവാ????" ചിന്തിക്കുമ്പോഴും കുളത്തിൽ നിന്നും വലിയൊരു ശബ്ദത്തോടെ അവൻ എഴുന്നേറ്റു... അവൾ ഞെട്ടി പുറകിലേക്ക് ചാഞ്ഞു... ഒരു ചിരിയോടെ അഭി പടവുകൾ കയറിവന്നു... ഒരു ടവൽ മാത്രമാണ് ഉടുത്തിരിക്കുന്നത്... ദൃഢമായ ശരീരം മുഴുവൻ വെള്ളത്തുള്ളികൾ കൊണ്ട് നിറഞ്ഞിരിക്കുന്നു... നീണ്ട മുടിയിലൂടെ വീഴുന്ന വെള്ളതുള്ളികൾ നെറ്റിയിലൂടെ തഴുകി നാസിക തുമ്പിലൂടെ നിലത്തേക്ക് പതിക്കുന്നുണ്ട്..

. അവൾ അവനിൽ നിന്നും കണ്ണെടുക്കാതെ നിന്നു.. അവൻ അവളെ മുട്ടി മുട്ടിയില്ല എന്ന രീതിയിൽ നടന്നു പടികൾ കയറി മുകളിലെ പടിയിൽ വച്ചിരിക്കുന്ന ഷർട്ടും ട്രാക്കും കയ്യിലെടുത്തു... അവൻ ടവൽ അഴിക്കാതെ കാലിലൂടെ ട്രാക്ക് ഇടുന്നത് കണ്ട് അവൾ വേഗം തിരിഞ്ഞു നിന്നു... അഭി ചിരിയോടെ പാന്റ് ഇട്ട് ടവൽ വലിച്ചെടുത്ത് പിഴിഞ്ഞു .. വെള്ളം വീഴുന്ന ശബ്ദം കേട്ടപ്പോഴാണ് അവൾ തിരിഞ്ഞു നോക്കിയത്... അവൻ ടവൽ കുടഞ്ഞ് തല തുടച്ചു കൊണ്ടിരിക്കുകയായിരുന്നു... പീലി അവന്റെ അടുത്തേക്ക് നടന്നു... " എന്തിനാ ഇങ്ങോട്ട് വരാൻ പറഞ്ഞെ?? " അവൻ അവളുടെ ഇടുപ്പിൽ കയ്യിട്ട് അവന്റെ ദേഹത്തേക്ക് ചേർത്തുനിർത്തി.... അവന്റെ ദേഹത്തിലെ തണുപ്പ് അവളിലേക്കും പടർന്നു.... അവന്റെ കൈകൾ അവളുടെ നെറ്റിയിലേക്ക് വീണുകിടക്കുന്നു മുടിയിഴകളെ ചെവിക്കു പിന്നിലേക്ക് ഒതുക്കിവച്ച് കൊടുത്തു.. അവൾ കണ്ണുകളടച്ചു നിന്നു.. "ഇന്നും വരട്ടെ മയിലേ...."

അവൾ ഞെട്ടി കണ്ണ് തുറന്നു.. "ഇന്നും രാത്രി വരട്ടെന്ന്..." അവൻ അവനെ തള്ളി മാറ്റി.. "ഇന്നലെ രാത്രിയിലെ ഹാങ്ങോവർ തന്നെ തീർന്നിട്ടില്ല...". " രാത്രിയിലെയോ? രാവിലത്തെയോ?" അപ്പോഴാണ് സംസാരിച്ചതിൽ വന്ന അബദ്ധം അവൾക്ക് മനസ്സിലായത്. "രാവിലത്തെ...." അവൾ താഴേക്ക് നോക്കി കൊണ്ട് പറഞ്ഞു.... " രാത്രിയിലെ ഹാങ്ങോവർ തീർന്നോ മയിലേ.... " അവന്റെ കണ്ണുകളിൽ കുസൃതി നിറഞ്ഞിരുന്നു... ചുണ്ടിൽ ആ കള്ളച്ചിരി സ്ഥാനം പിടിച്ചിരുന്നു... ആ മുഖത്തേക്ക് നോക്കാൻ കഴിയാതെ അവൾ തലതാഴ്ത്തി നിന്നു... "മയിലേ...... 💙" ആർദ്രമായ ശബ്ദം കേട്ട് അവൾ പരിഭവത്തോടെ മുഖമുയർത്തി... "എന്നെ ഇങ്ങനെ വിളിക്കല്ലേ അഭിയേട്ടാ...എനിക്ക് എന്തോ പോലെ...." മനസ്സിലുള്ളത് അങ്ങനെ തന്നെ പുറത്തേക്ക് വന്നു... "എന്ത് പോലെ..???" വീണ്ടും അവളെ ഒന്നുകൂടി ചേർത്തുനിർത്തി അവളുടെ നാസിക തുമ്പിൽ പതിയെ ഒന്ന് കടിച്ചു കൊണ്ടു അവൻ ചോദിച്ചു...

അവളൊന്നും മിണ്ടാതെ കുറച്ച് കൂടെ അവനിൽ അമർന്ന് നിന്നു... ഒരു മൂലയിൽ ആയതുകൊണ്ട് തന്നെ അവൻ ചുമരിൽ തട്ടി നിൽക്കുകയായിരുന്നു... അവളെ ഒന്നുകൂടി ദേഹത്തോട് ചേർത്തുപിടിച്ചു... " ശരിക്കും ഇന്നലെ വേണം എന്ന് കരുതി ചെയ്തതല്ല... എനിക്ക് നിന്നെ കണ്ടപ്പോൾ പിടിച്ചു നിൽക്കാൻ പറ്റിയില്ല... എന്നിട്ടും ഞാൻ കണ്ട്രോൾ ചെയ്തുട്ടാ... നിനക്ക് എന്തെങ്കിലും പരിഭവം ഉണ്ടെങ്കിൽ iam sorry..." പീലിക്ക് എന്തു മറുപടി നൽകണമെന്ന് അറിയില്ലായിരുന്നു.... ശരിക്കും പരിഭവം ഒന്നുമില്ല... മറിച്ച് ആ ഓർമ്മകളിൽ വല്ലാത്ത സന്തോഷവും ഉണ്ട്... എന്നിട്ടും അവൾ മറുപടി ഒന്നും നൽകിയില്ല.. " മയിലേ.... " അവൾ കണ്ണുകൾ ഉയർത്തി അവനെ നോക്കി... " ഇന്ന് വന്നോട്ടെ.... " " വേണ്ടാ... അഭിയേട്ടൻ ഇന്ന് വന്നാൽ ഞാനിനി മിണ്ടില്ലട്ടോ... അവരെയൊക്കെ ഫേസ് ചെയ്യാൻ തന്നെ നാണക്കേട് തോന്നി എനിക്ക്... ഇന്ന് ചിലപ്പോ അപ്പയും അമ്മയുമൊക്കെ പ്രതീക്ഷിച്ചിരുന്നാലോ...? "

"അതിന് ഞാൻ നിന്നെ കാണാൻ അല്ലേ വരുന്നത്... അവരെ കാണാനല്ലല്ലോ..." "വേണ്ട അഭിയേട്ടാ..." അവൾ ചിണുങ്ങി.. "ഒക്കെ...വേണ്ടെങ്കിൽ വേണ്ട...അതിനുപകരം ഇപ്പോൾ..... അവൻ പറഞ്ഞു മുഴുമിപ്പിക്കാതെ തള്ളവിരൽ കൊണ്ട് അവളുടെ ചുണ്ടിന് അമർത്തി തടവി... മനസ്സിലായ പോലെ അവൾ അവന്റെ കഴുത്തിനുചുറ്റും കൈകൾകോർത്ത് കൊണ്ട് അവന്റെ ചുണ്ടിലേക്ക് തന്റെ അധരങ്ങൾ അടുപ്പിച്ചു... അത്ഭുതം കൊണ്ട് അഭിയുടെ കണ്ണുകൾ മിഴിഞ്ഞു പോയി.. ഇടുപ്പിൽ മുറുകെ പിടിച്ച് കൊണ്ട് ആ ചുണ്ടിലേക്ക് അവൻ ആഴ്ന്നിറങ്ങി ... കാലം തെറ്റി വീശിയ ചാറ്റൽ മഴയാണ് അവരെ തമ്മിൽ അകറ്റിയത്.. അവളുടെ ചുണ്ടുകൾ മാത്രമല്ല മുഖവും ചുവന്നു തുടുത്തിരുന്നു.. അവൾ അവനോട് യാത്ര പോലും പറയാതെ ചിരിയോടെ ചാരിയ വാതിൽ തുറന്ന് പുറത്തേക്കോടി.. അവിടെ വച്ചിരുന്ന ഷർട്ട് എടുത്തിട്ടു കൊണ്ടു അവനും പുറകെ പോയി...

കലാക്ഷേത്രക്ക് മുന്നിൽ എത്തിയതും കരയണോ ചിരിക്കണോ എന്നറിയാതെ നിൽക്കുന്ന പീലിയെ കണ്ട് അഭിയും അങ്ങോട്ടേക്ക് നോക്കി 🔵🔵🔵🔵🔵🔵🔵🔵🔵🔵 "ഒന്നും പറഞ്ഞില്ല..." "താനിപ്പോ എന്നെ പ്രൊപ്പോസ് ചെയ്തതാണോ...?" കൂസലില്ലാതെ ചോദിക്കുന്ന മീനുവിനെ കണ്ട് അവൻ ഒന്ന് പതറിയെങ്കിലും അത് മറച്ച് പിടിച്ച് അവൻ ചിരിയോടെ അതേ എന്ന് തലയാട്ടി... '"എന്നാലേ.. എനിക്ക് തന്നെ ഇഷ്ടമേ ആയില്ല.. ഇമ്മാതിരി ദാരിദ്ര്യം പിടിച്ച കീറിയ പാന്റും നരച്ച ഷർട്ടും വളിച്ച ചിരിയും.. ഒട്ടും ഇഷ്ട്ടമായില്ല... " "അയ്യോ.. ഇത് കീറിയ പാന്റ് അല്ല, ripped jeans ആണ്.. ഇത് ഡെനിം ഷർട്ട് ആണ് കുട്ടി.. നരച്ചതല്ല.. ലൈറ്റ് കളറായത് കൊണ്ട്... പിന്നെ ഈ ചിരി അത് പറഞ്ഞിട്ട് കാര്യമില്ല.. Its manufacturing defect....." അവന്റെ പറച്ചിൽ കേട്ട് വന്ന ചിരി അടക്കി പിടിച്ച് അവൾ അവനെ ദേഷ്യത്തോടെ നോക്കി തിരിഞ്ഞു നടന്നു.. "മീനമ്മോ............"

അവൻ വിളിച്ചത് കേട്ടതും അവൾ സ്വിച്ച് ഇട്ടത് പോലെ നിന്നു... ചുവന്ന കണ്ണുകളോടെ തിരിഞ്ഞു നോക്കി... എന്തോ സാധിച്ച പോലെ നിൽക്കുന്ന സഞ്ജു അവളുടെ മുഖം കണ്ട് നെറ്റിച്ചുളിച്ച് നോക്കി.. എന്താ ഇത്ര ദേഷ്യപ്പെടാനുള്ള കാരണം എന്നാലോചിക്കുന്നതിനു മുന്നേ കലാക്ഷേത്ര മുഴുവൻ പ്രതിദ്വനിച്ചു കൊണ്ട് ഒരു ശബ്ദം മുഴങ്ങി. പ്ലാങ്....⚡️ നടരാജ വിഗ്രഹത്തിന് മുന്നിൽ പൂക്കളാക്കി വയ്ക്കാറുള്ള താലം എടുത്ത് സഞ്ജുവിന്റെ തലയിൽ ഒരൊറ്റ അടിയായിരുന്നു.. "ഹമ്മേ........" അലർച്ചയോടെ അവൻ ബോധംകെട്ടു താഴേക്ക് വീണു.. അത് കണ്ടുകൊണ്ടാണ് പീലി വന്നത്.. എന്ത് ചെയ്യണമെന്ന് അറിയാതെ നിൽക്കുമ്പോഴേക്കും പുറകെ വന്ന അഭി നിലത്തുവീണു കിടക്കുന്ന സഞ്ജുവിനെ കണ്ടു അവനടുത്തേക്ക് ഓടി... ഒന്നും അറിയാതെ ബോധംകെട്ടു കിടപ്പാണ്. "ഡാ സഞ്ജു.. എഴുന്നേൽക്ക്.. " അഭി അവനെ കുലുക്കി വിളിച്ചു..

എഴുന്നേൽക്കാതായപ്പോൾ കിണ്ടിയിൽ വച്ചേക്കുന്ന വെള്ളമെടുത്തു മുഖത്ത് കുടഞ്ഞു.. അവൻ പതിയെ കണ്ണ് തുറന്നു... മുന്നിലിരിക്കുന്ന അഭിയേ നോക്കി.. തല അല്പം ചരിച്ചപ്പോൾ പീലിയേയും കണ്ടു.. അപ്പുറത്ത് മാറി നിൽക്കുന്ന മീനാക്ഷിയെ കണ്ടതും അവൻ അഭിയേ തള്ളി മാറ്റി ചാടി പിണഞ്ഞേഴുന്നേറ്റു.. മുഖത്തെ വെള്ളം തുടച്ച് മുടിയൊതുക്കി അവളെ നോക്കി പുഞ്ചിരിച്ചു.. "അല്ല.. മറുപടി പറഞ്ഞില്ലാ...." അല്പം നാണം കലർന്ന രീതിയിൽ വശ്യമായി ചിരിച്ചു കൊണ്ട് മീനുവിനോട് അവൻ ചോദിക്കുന്നത് കണ്ടു പീലി അന്താളിച്ചു നിന്നു... ഇനി ഞാൻ കണ്ടതിൽ തെറ്റ് പറ്റിയോ? അവൾ വീണ്ടും മീനുവിന്റെ കയ്യിലുള്ള ഓടിന്റെ താലത്തിലേക്ക് നോക്കി... ഇതുകൊണ്ട് അടിക്കുന്നത് ഞാൻ കണ്ടതാണല്ലോ... വീണ്ടും അവൾ റീവൈൻഡ് ചെയ്ത് നടന്നത് ചിന്തിച്ചു നോക്കി... സഞ്ജു പെട്ടെന്ന് എന്തോ ഓർത്തത് പോലെ അഭിക്ക് നേരെ തിരിഞ്ഞു " നീ എന്തിനാ എന്റെ മുഖത്ത് വെള്ളമൊഴിച്ചത്?? "

" ബോധംകെട്ടു കിടന്ന പിന്നെ ഞാനെന്തു ചെയ്യണെടാ പന്ന..........." "ഹോ... മലയാളം... അവൻ ചെവി കുടഞ്ഞു... "ബോധം കിടന്നെന്നോ? എങ്ങനെ??" പീലിയും അഭിയും അതിന് ഉത്തരം എന്നപോലെ മീനുവിന്റെ കയ്യിലെ താലത്തിലേക്ക് നോക്കി... സഞ്ജുവിന്റെ കണ്ണും അതിലേക്കെത്തി.. അവള് ആ താലം അവിടെ ഇട്ട് ദേഷ്യത്തോടെ തിരികെ നടന്നു.. പ്ലെങ് ⚡️ അത് നിലത്തു വീഴുന്ന ശബ്ദം കേട്ടപ്പോൾ അത് പോലൊരു ശബ്ദം തന്റെ തലയിൽ നിന്നും വന്നല്ലോ എന്നോർമ വന്ന് സഞ്ജു വേഗം തലയിൽ കൈ വച്ചു... അഭി ചിരിയോടെ അവനെ നോക്കി നിന്നു... കണ്ണുകൾകൊണ്ട് അഭിയോട് യാത്ര ചോദിച്ച് പീലിയും അവളുടെ പുറകെ ഓടി... മഴ ചാറൽ കൊള്ളാതിരിക്കാൻ ദാവണി ഷാൾ തലയിലൂടെ ഇട്ട് പീലി അവളെ പിടിച്ചു നിർത്തി "എന്തുപറ്റി മീനു..??" മീനു ഫുൾ കലിപ്പ് മോഡിൽ ആയിരുന്നു... പീലിയുടെ മുഖം കണ്ട് ദേഷ്യം മാറി ആ മുഖത്ത് ദയനീയത നിറഞ്ഞു...

"അവൻ എന്നെ മീനമ്മോ ന്ന് വിളിച്ചടി..." അതുകേട്ട് പീലി പൊട്ടിച്ചിരിച്ചു....കുറച്ചുനരം ദേഷ്യത്തോടെ മുഖം വെച്ചെങ്കിലും മീനുവും ആ ചിരിയിൽ പങ്കു ചേർന്നു ... 🔵🔵🔵🔵🔵🔵🔵🔵🔵🔵 "എടാ... അവൾക്ക് പ്രാന്താണോ ഇനി...?" "പോടാ.. നീ എന്തെങ്കിലും വഷളത്തരം ചെയ്തിട്ടുണ്ടാവും..." "അതിന് ഞാൻ അഭിയല്ല..." "നിന്റെ തലക്കല്ല.. നാവിനായിരുന്നു കിട്ടേണ്ടിയിരുന്നത്... " "എടാ. എന്നാലും എന്തിനാവും അടിച്ചത്...?" "ആവോ.. മയില് വിളിക്കുമ്പോൾ ചോദിക്കാം..." അപ്പൊ തൊട്ട് അവൾ വീടെത്തി വിളിക്കുന്നതും കാത്ത് ഫോണും നോക്കി ഇരിക്കുകയായിരുന്നു.. അഭിയല്ല.. സഞ്ജു... 😁 ഫോൺ ബെൽ അടിച്ചതും ഒരു റിങ്ങിൽ തന്നെ സഞ്ജു ഫോൺ എടുത്തു.. "പെങ്ങളെ....." "പറയു ആങ്ങളേ..." അവളുടെ സ്വരത്തിലുള്ള കളിയാക്കൽ മനസിലായെങ്കിലും ഇപ്പൊ കാര്യം അറിയുന്നതിൽ ആണ് പ്രാധാന്യം എന്നറിയാവുന്നത് കൊണ്ട് അവൻ സംയമനം പാലിച്ചു.. "അവളെന്തിനാ എന്നെ അടിച്ചത്...??" അതിനൊരു പൊട്ടിച്ചിരിയായിരുന്നു മറുപടി... "ഇപ്പോഴെങ്കിലും മനസിലായല്ലോ അടി കിട്ടി എന്ന്.. 😁😁." "ചിരിക്കാതെ കാര്യം പറ പെണ്ണെ...." "അതേ.. അവൾക്ക് പണ്ടൊരു പ്രണയം ഉണ്ടായിരുന്നു... അയാൾ അവളെ മീനമ്മോന്നാ വിളിച്ചോണ്ടിരുന്നത്. ഇവള് ഭയങ്കര സീരിയസ് ആയിരുന്നു...

അയാളാണെങ്കിൽ മീനമ്മോ മീനമ്മോ ന്ന് വിളിച്ചു ഒലിപ്പിച്ചു നടക്കും.. അവസാനമായി അയാൾ മീനമ്മോ ന്ന് വിളിച്ചത് എപ്പോഴാന്ന് അറിയോ..." "എപ്പോഴാ...???" സ്പീക്കറിലിട്ട ഫോണിലൂടെ ആകാംഷയോടെ അഭിയും സഞ്ജുവും ഒരുമിച്ച് ചോദിച്ചു "മീനമ്മോ.. എന്റെ കല്യാണമാ പത്താം തീയതി.. നീയും നിന്റെ കൂട്ടുകാരിയും നേരത്തെ വരണേന്ന് പറഞ്ഞു പത്രിക കൊടുത്തപ്പോൾ..." ഒരു നിമിഷം നിശബ്ദമായെങ്കിലും സഞ്ജു മാത്രം പൊട്ടിച്ചിരിച്ചു.. "തേപ്പായിരുന്നോ... ഹിഹി ഹിഹി ??" "അല്ല വാർപ്പ്... അവള് ഭയങ്കര സീരിയസ് ആയിരുന്നെന്നെ.. അത് കൊണ്ട് കുറച്ചു ദിവസം വല്ലാത്ത സങ്കടവും കരച്ചിലുമൊക്കെ ആയിരുന്നു.. പിന്നെ അതൊക്കെ ഓർത്ത് രസിക്കാനുള്ള ഒരു വിഷയം മാത്രമായി.. പക്ഷെ പ്രാധാന പ്രശ്നം അതൊന്നുമായിരുന്നില്ല.. അയാൾ സ്കൂളിനടുത്ത് ബുക്ക്സ്റ്റാൾ നടത്തുന്ന ആളായിരുന്നു... ക്ലാസ്സിലെ കുട്ടികൾക്കൊക്കെ കാര്യം അറിയായിരുന്നു...

അയാളുടെ കല്യാണം കഴിഞ്ഞ്തിന് ശേഷം അവളെ മീനമ്മോ മീനമ്മോ ന്ന് വിളിച്ചു കളിയാക്കുന്നത് ക്ലാസ്സിൽ ഒരു പതിവായി... അത് കേൾക്കുന്നതെ അവൾക്ക് കലിപ്പാണ്... ഇപ്പൊ പ്ലസ് ടൂ കഴിഞ്ഞിട്ട് 3 വർഷമായി.. വീണ്ടും ആ വിളി കേട്ടപ്പോ ദേഷ്യം കൊണ്ടാ....". കുറച്ചു നേരത്തെ നിശബ്ദതക്ക് ശേഷം പീലി പറഞ്ഞൂ, ശരി ഞാൻ പിന്നെ വിളിക്കാം..അരുണേട്ടൻ ഇറങ്ങാൻ നിക്കുവാ.. Bye" അവൾ ഫോൺ കട്ട്‌ ആക്കി.. അഭി സഞ്ജുവിനെ ചേർത്ത് പിടിച്ചു.. നീ എന്ത് വേണമെങ്കിലും ചെയ്തോ ഞാനുണ്ടാകും കൂടെ എന്ന് സഞ്ജുവിനോട് ആ കൈകൾ പറയാതെ പറയുകയായിരുന്നു..... തുടരും......

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...