🌸മയിൽ‌പീലി🌸: ഭാഗം 29

രചന: അനു രാജീവ്

പുറംമോടികളെക്കാൾ തിളക്കമുള്ള പുഞ്ചിരിയോടെ അവൾ വേദിയിലേക്ക് നടന്നു.. അമ്പലനടയിൽ നിന്നും നേരെ മുന്നിൽ ഒരു കുഞ്ഞ് മണ്ഡപം.. വരനും വധുവിനും പൂജാരിക്കും മാത്രം നിൽക്കാനാവുന്നത് .. താലം ഏന്തിയ കുഞ്ഞുങ്ങളുടെ പുറകിൽ സർവ്വാഭരണ വിഭൂഷയായി നടന്നു വരുന്നവളെ അഭി കണ്ണിമയ്ക്കാതെ നോക്കി നിന്നു... അവൾ താലം പിടിച്ച് അഗ്നിയെ വലം വച്ച് മൂന്ന് വശവും നിറഞ്ഞ സദസിനെ തൊഴുത് അഭിയുടെ വാമഭാഗത്തായി ഇരുന്നു... പീലിയുടെ കയ്യിൽ കൊടുത്ത വരണമാല്യം അവൾ അഭിയുടെ കഴുത്തിൽ ഇട്ടു കൊടുത്തു.. പൂജാരി പൂജിച്ച താലി അവന്റെ കയ്യിലെടുത്തു കൊടുത്തു.. എല്ലാവരിലും സന്തോഷം നിറഞ്ഞു നിന്നു.. അവളുടെ കണ്ണുകളിൽ തന്നെ നോക്കി കൊണ്ട് അവൻ അവന്റെ പേര് കൊത്തിയ താലി അവളുടെ കഴുത്തിലേക്ക് ചാർത്തി... തൊഴുകയ്യോടെ ചുണ്ടുകൾ അനക്കി പ്രാർത്ഥിച്ചു നിൽക്കുന്നവളെ കാണെ അവനിൽ പ്രണയം നിറഞ്ഞു..

താലി കെട്ടി അകലും മുന്നേ അവൻ അവളുടെ നെറ്റിയിൽ ഒരു ചുംബനവും നൽകാൻ മറന്നില്ല... അധികാരത്തോടെ.. അവൾ കണ്ണുകൾ തുറന്ന് നോക്കി.. പതിവ് കള്ള ചിരി ഉണ്ടായിരുന്നു അവനിൽ.. അവൾ മറ്റാരെയും നോക്കിയില്ല.. അവനിൽ തന്നെ ലയിച്ച്... അവന് നേരെ പൂജാരി നീട്ടിയ സിന്ദൂരം അവളുടെ നെറുകയിൽ ചാർത്തി കൊടുത്തു.. ഒരു സ്വർണ മാലയും കഴുത്തിലണിയിച്ചു.. വരണമാല്യവും കഴുത്തിലേക്കിട്ടു കൊടുത്തു.. ആ വലതു കയ്യിൽ അവളുടെ ഇടതു കൈ മുറുക്കി പിടിച്ച് അഗ്നിയെ വലം വച്ചു.. ഒരുമിച്ച് സദസിനെ വണങ്ങി.. അവിടെ നിന്നും കുറച്ച് മാറി ഒരു കുഞ്ഞ് ഓഡിറ്റോറിയം ഉണ്ട്.. അവിടെയായിരുന്നു ഫുഡ്‌.. അമ്പലത്തിൽ നിന്നും എല്ലാവരും അങ്ങോട്ട് പോയി.. അഭിയും പീലിയും ഡെക്കറേറ്റ് ചെയ്ത സ്റ്റേജിലേക്ക് കയറി നിന്നു.. പിന്നീട് ഫോട്ടോ സെക്ഷൻ ആയിരുന്നു... ജീവിതത്തിൽ ഓർക്കാനുള്ള ഒരുപാട് നിമിഷങ്ങൾ ചിത്രങ്ങളായി പകർത്തി.. 🔵🔵🔵🔵

മീനു ആണെങ്കിൽ സഞ്ജുവിനെ തപ്പി നടപ്പാണ്.. താലി കെട്ടുമ്പോൾ ഓപ്പോസിറ്റ് നിൽപ്പുണ്ടായിരുന്നു.. ഇപ്പൊ കാണുന്നില്ല.. ഊട്ടുപുരയിൽ പോയപ്പോൾ കണ്ടു... വിളമ്പുന്നവിടെ നിൽപ്പുണ്ട്.. ഒരുപാട് പേരുള്ളത് കൊണ്ട് അവിടെ വച്ച് സംസാരിക്കാൻ പറ്റില്ല എന്നുറപ്പായിരുന്നു... എന്നാലും അവൾ ആ ഭാഗത്തു ചുറ്റിപറ്റി നിന്നു.. അലസമായി നോക്കിയ സഞ്ജു പെട്ടെന്ന് മീനുവിനെ കണ്ടപ്പോൾ എല്ലാം മറന്നു നോക്കി നിന്നുപോയി.. പിങ്കും വൈറ്റും കോമ്പിനേഷനിലുള്ള ഒരു ദാവണി ആയിരുന്നു അവളുടെ വേഷം.. രാവിലെ മുതൽ കണ്ണുകൾ അവളെ തിരയുന്നുണ്ടായിരുന്നുവെങ്കിലും കാണാൻ സാധിച്ചില്ല... ഇന്ന് വരെ കണ്ടതിൽ വച്ച് ഏറ്റവും ഭംഗിയായി കണ്ടത് ഇപ്പോഴാണ് എന്ന് തോന്നി അവന്.. സഞ്ജുവിന് പിങ്ക് ഷർട്ടും വൈറ്റ് ജീനും ആണ് എടുത്തത് എന്ന് പീലി എന്നോ പറഞ്ഞത് കൊണ്ടാണ് അവളും അതേ കളർ കോമ്പോ എടുത്തത്.

അതൊന്ന് കാണിക്കാൻ രാവിലെ തൊട്ട് തിരിഞ്ഞു നടപ്പായിരുന്നു... അവന്റെ കണ്ണുകളിൽ തന്നിലാണെന്ന് മനസിലായതും അവൾ ഒന്ന് ചിരിച്ചു കാണിച്ചു.. അവൻ ഞെട്ടി പുറകോട്ട് നോക്കി.. കുറെപേർ കൂടെ ഉള്ളത് കൊണ്ട് തന്നെ വേറെ ആരെയെങ്കിലും നോക്കി ചിരിച്ചതാണോ എന്ന് പോലും സംശയിച്ചു.. അവൻ ചുറ്റും നോക്കുന്നത് കണ്ട് അവൾ ദേഷ്യത്തോടെ കൂർപ്പിച്ചു നോക്കി.. അപ്പൊ മനസിലായി ഇത് തനിക്കുള്ള നോട്ടമാണെന്ന്. അവൻ പതിയെ അവിടെ നിന്നും മാറി അവൾക്കടുത്തേക്ക് വന്നു.. "ടോ.. രാവിലെ മുതൽ തന്നെ തിരിഞ്ഞു നടക്കുവായിരുന്നു.." "എ.. എന്നെയോ? എന്തിന്?" അവനിൽ അത്ഭുതവും അമ്പരപ്പും നിറഞ്ഞിരുന്നു.. "എനിക്കെ വേറെ കല്യാണം ആലോചിക്കുന്നുണ്ട്.. തനിക്ക് ആരുമില്ലെങ്കിലും ടീച്ചറേയും അഭിയേട്ടനെയും പീലിയേം കൂട്ടി വന്ന് പെണ്ണ് ചോദിച്ചു നോക്ക്.. സമ്മതിച്ചില്ലേൽ ഇറങ്ങി വരാം..." അവൻ കണ്ണും മിഴിച്ചു നിന്നു പോയി...

"തന്റെ നോട്ടത്തിന്റെ അർത്ഥം എനിക്ക് മനസിലായി.. എനിക്ക് അവരോട് സ്നേഹമില്ലാഞ്ഞിട്ടൊന്നുമല്ല, തന്നെ റിജക്റ്റ് ചെയ്യണേൽ അത് തന്റെ ജാതി നോക്കി തന്നെയാവും... അങ്ങനത്തെ പ്രാന്തന്മാരാ കുടുംബത്തിൽ മുഴുവനും.. അത് പറഞ്ഞ് തന്നെ വേണ്ടാന്ന് പറഞ്ഞാൽ ഞാൻ ഇറങ്ങി വന്നോളാം.. ഓക്കേ??". "ങേ.. ഹാ.. ഹാ... ഓക്കേ..." അവന് അപ്പോഴും അമ്പരപ്പ് മാറിയിരുന്നില്ല.. അവൾ തിരിഞ്ഞു നടക്കാനൊരുങ്ങി.. പിന്നേ എന്തോ ആലോചിച്ച പോലെ നിന്നു.. തല ചൊറിഞ്ഞു കൊണ്ട് അടുത്തേക്ക് വരുന്നവളെ കണ്ട് അവന്റെ മുഖത്ത് വിടർന്ന പുഞ്ചിരി പതിയെ മാഞ്ഞു.. വല്ല മുടക്കവും പറയാൻ വരുവാണോ എന്ന ഭയം... "ടോ.. താനെന്നെ പട്ടിണി ഇല്ലാതെ നോക്കില്ലേ?? ഫുഡിൽ മാത്രം അഡ്ജസ്റ്റ് ചെയ്യാൻ പറ്റില്ലാട്ടോ... എനിക്ക് ഡെയിലി 4 നേരം കഴിക്കാനുള്ള പൈസയെങ്കിലും സേവിങ്സ് ആയി ഉണ്ടാക്കി വച്ചോ...

. പിന്നേ ഇടക്ക് വല്ലതും കൊറിക്കാനും..." കടിച്ചു പിടിച്ച ചിരിയോടെ അവൾ തിരിഞ്ഞു നടന്നു.. അവൻ കൈകൾ തലയിൽ വച്ച് വിടർന്ന ചിരിയോടെ കണ്ണുകൾ ഇറുകെ അടച്ചു... ഉള്ളിലെ ആഹ്ലാദം പ്രകടിപ്പിക്കാൻ സാധിക്കാതെ സഞ്ജു അവളെ മതിമറന്നു നോക്കി നിന്നു.. 🔵🔵🔵🔵🔵🔵🔵🔵🔵🔵🔵🔵 ഭക്ഷണം കഴിച്ച് കൈകഴുകി വീണ്ടും സ്റ്റേജിൽ വന്നു നിന്നപ്പോൾ ദൂരെ നിന്നും വരുന്നവരെ കണ്ട് അഭിയുടെയും പീലിയുടെയും കണ്ണുകൾ വിടർന്നു ... ശിവദാസിനെയും ഭാര്യയെയും അവർ പുഞ്ചിരിയോടെ സ്വീകരിച്ചു. വേദിയിലേക്ക് കയറി രണ്ടുപേരും സംസാരിച്ചു ഇരുവർക്കും മംഗളം നേർന്നു കൊണ്ടാണ് താഴേക്ക് ഇറങ്ങിയത്.... ദൂരെനിന്നും വരുന്ന സിതാര ശിവദാസിനെ കണ്ട് നെറ്റി ചുളിച്ചു. പകപ്പോടെ തന്നെ നോക്കിനിൽക്കുന്ന ശിവദാസിനെ തന്റെ മുഖത്തെ പതർച്ച പുറത്തറിയത്ത വിധം പുഞ്ചിരി കൊണ്ട് മറച്ചു അയാൾക്കടുത്തേക്ക് നടന്നു....

സ്റ്റേജിൽ നിൽക്കുന്ന പീലി അത് കണ്ടുവെങ്കിലും മുഴുവനായും അവരുടെ സംസാരം ശ്രവിക്കാനോ ശ്രദ്ധിക്കാനോ പറ്റിയ അവസ്ഥയിൽ ആയിരുന്നില്ല. എങ്കിലും പുഞ്ചിരിയോടെ നിൽക്കുന്ന അമ്മയുടെ മുഖത്തെ വിഷദം അവൾക്കറിയാനായി. തിരക്കൊഴിഞ്ഞതിനു ശേഷം തലതാഴ്ത്തി തന്റെ മുന്നിലൂടെ എന്തോ ആലോചിച്ചെന്നപോലെ നടന്നുപോവുന്ന സിതാരയുടെ കൈകളിൽ പീലി പിടുത്തമിട്ടു. അവർ പെട്ടന്ന് ഞെട്ടി അവളെ നോക്കി.. "എന്താമോളെ..... എന്തെങ്കിലും വേണോ?" " എന്തെങ്കിലും പ്രശ്നം ഉണ്ടോ അമ്മേ? " "ഏയ്‌ എന്ത് പറ്റി... നിനക്കു തോന്നിയതാവും... ഒന്നുമില്ല" " അല്ല...എനിക്ക് അമ്മയുടെ മുഖം മാറിയാൽ മനസ്സിലാകും, ദാസ് അങ്കിളിനെ നേരത്തെ അറിയുമോ? നിങ്ങൾ സംസാരിക്കുന്നത് കണ്ടു.. " അഭി വന്ന ആരോടോ സംസാരിക്കുന്ന തിരക്കിലായിരുന്നു... സിതാര അവളുടെ കവിളിലേക്ക് കൈ ചേർത്തു..

" അറിയാം.. എന്റെ കാമുകനായിരുന്ന ആൾ,ഭർത്താവായിരുന്ന ആൾ, ഒരു കുഞ്ഞിനെ തരാൻ കഴിയില്ല എന്നറിഞ്ഞപ്പോൾ ഉപേക്ഷിച്ച ആൾ " അവരുടെ മുഖത്ത് വിഷാദം നിറഞ്ഞിരുന്നു... പീലി എന്തുപറയണമെന്നറിയാതെ നിന്നുപോയി... ഒരിക്കൽ അമ്മയെ ഉപേക്ഷിച്ച ആളെ കണ്ടാൽ കണക്കിനു പറയണം, മുഖത്ത് നോക്കി നാല് ചോദ്യം ചോദിക്കണം എന്നെല്ലാം കരുതിയിരുന്നു... പക്ഷേ ഇങ്ങനെയൊരു അവസ്ഥയിൽ ഇത്രയും നിസ്സഹായനായി തന്റെ മുന്നിൽ വന്നു നിൽക്കും എന്ന് കരുതിയില്ല... ഇനി എന്ത് ചോദിക്കാനാണ്? എന്തിനുവേണ്ടി അയാൾ ആ ക്രൂരത ചെയ്തുവോ അതിനുള്ള ശിക്ഷ ദൈവം മറ്റൊരു രീതിയിൽ അയാൾക്ക് നൽകി കഴിഞ്ഞു ... ആ കുഞ്ഞിന് വേണ്ടി ആയിരുന്നില്ലേ അയാൾ തന്റെ അമ്മയെ ഉപേക്ഷിച്ചത്. ആ മകൾ കാരണം തന്നെ ഒരു അച്ഛൻ എന്ന നിലയിൽ തകർന്നു നിൽക്കുകയാണ്. . ഇതാണ് കർമഫലം...

പക്ഷെ ഇത് പോലെ ഉറ്റവരെ വേദനിപ്പിച്ചുകൊണ്ടാവരുത് എന്ന് മാത്രം... 🙂 ചിന്തകൾക്ക് വിരാമമിട്ടുകൊണ്ട് അല്ലിയും അരുണും പോകാനുള്ള സമയമായി എന്ന് അറിയിച്ചു... ജാനകി കണ്ണ് നിറച്ച് നിൽപ്പുണ്ട്... അപ്പയുടെ മുഖത്ത് സങ്കടം ഉണ്ടെങ്കിലും അതിനെ പുഞ്ചിരി കൊണ്ട് മറച്ച് പിടിച്ചിരിക്കുന്നു.. അരുണും അല്ലിയും ചിരിയോടെ നിൽപ്പുണ്ട്... സത്യത്തിൽ പീലിക്ക് വലിയ സങ്കടം ഒന്നും വന്നില്ല...വീട്ടുകാരെയെല്ലാം ഒന്ന് കെട്ടിപ്പിടിച്ച് ആശ്വസിപ്പിച്ച് വേഗം തന്നെ അഭിയുടെ കൂടെ കാറിൽ കയറി.. കാറിൽ കയറിയതും അഭിയെ നോക്കി അവൾ മനോഹരമായൊന്നു ചിരിച്ചു.. "എടീ നീ കരയുന്നില്ലേ...?" അവൻ കടിച്ചുപിടിച്ച ചിരിയോടെ അവളോട് ചോദിച്ചു... അവളുടെ മുഖത്തെ പുഞ്ചിരി പെട്ടെന്ന് മാഞ്ഞു.. "എന്തിന്??" "അതാ നാട്ടുനടപ്പ്.." "എനിക്ക് സങ്കടമൊന്നും വരുന്നില്ല..." അവൾ അവനെ നോക്കി മുഖം കോട്ടി, ഗ്ലാസ്സിലൂടെ പുറത്തേക്ക് തലയിട്ടു കൊണ്ട് എല്ലാവരെയും നോക്കി കൈവീശി കാണിച്ചു...

അപ്പോഴേക്കും കാർ നീങ്ങി തുടങ്ങി... അവൾ നേരയിരുന്ന് അവന്റെ തോളിലേക്ക് തല ചായ്ച്ചു.. "എനിക്കെന്താ സങ്കടം വരാത്തെന്ന് അറിയോ അഭിയേട്ടാ.. ആ വീട്ടിൽ ഞാൻ ജീവിച്ചതിനേക്കാൾ ഒരുപാട് സന്തോഷത്തോടെയാ ഞാൻ ന്റെ അഭിയേട്ടന്റെ കൂടെ ജീവിക്കാൻ പോവുന്നെ... പിന്നെന്തിനാ സങ്കടപെടുന്നേ? കരയുന്നെ?? " അവൻ അവളുടെ മുടിയിഴകളിലൂടെ തഴുകി നെറ്റിയിൽ ചുണ്ട് ചേർത്തു. "ഡാ.. ഇത് കാറാണ്... രാത്രി ആയിട്ട് മതി നിന്റെ ഉമ്മ വെപ്പും കെട്ടിപ്പിടുത്തവും.." സഞ്ജുവിന്റെ കമന്റ്‌ കേട്ട് പീലി അവന്റെ നെഞ്ചിലേക്ക് മുഖം ചേർത്തു.. നാണത്തോടെ.. കണ്ണാടിയിലൂടെ നോക്കുന്ന സഞ്ജുവിന്റെ മുഖത്ത് നോക്കി അഭി രണ്ടു മലയാളം പറഞ്ഞപ്പോൾ അവൻ നേരെ നോക്കി വണ്ടി പറത്തി... പത്തു മിനിറ്റ് കൊണ്ട് കലാക്ഷേത്ര എത്തി.. അവിടെ വളരെ കുറച്ച് ആളുകളെ ഉണ്ടായിരുന്നുള്ളു. റിസപ്ഷൻ ഒഴിവാക്കിയിരുന്നല്ലോ..

ധാർമിക നിറഞ്ഞ ചിരിയോടെ ആരതി ഉഴിഞ്ഞ് രണ്ടു പേർക്കും കുറി തൊട്ട് കൊടുത്തു... കയ്യിലേക്ക് വിളക്ക് കൊടുത്ത് അവളെ അകത്തേക്ക് കയറ്റി.. പൂജ മുറിയിൽ വിളക്ക് വച്ചു പ്രാർത്ഥിച്ചു.. അഭിയുടെ കണ്ണുകൾ ദൈവത്തിലായിരുന്നില്ല.. ആ ദൈവത്തോട് മനസ്സുരുകി നന്ദി പറയുന്ന അവന്റെ മാത്രം മയിലിലായിരുന്നു... "നിന്റെ പരിഭവം കേൾക്കാൻ ഞാനില്ലെടി. ഇനിയെങ്കിലും ഭഗവാന് കുറച്ച് റസ്റ്റ്‌ കൊടുക്ക്..." അവൻ പറഞ്ഞത് കേട്ട് അവൾ ചിരിയോടെ അവനെ നോക്കി. അപ്പോഴേക്കും ധാർമിക വന്ന് അവരെ വിളിച്ചു കൊണ്ട് പോയി.. മധുരം കൊടുത്തു... ഡ്രസ്സ് മാറാൻ മുകളിലേക്ക് പറഞ്ഞു വിട്ടപ്പോഴാണ് അവൾക്ക് സമാധാനമായത്.. വേഗം പോയി ഓർണമെൻറ്സ് ഒക്കെ അഴിച്ച് വച്ചു.. മുടിയിലെ പൂവഴിച്ചു വയ്ക്കുമ്പോഴാണ് അഭി കയറി വന്നത്... വാതിൽ ചാരി വച്ച് അവൻ അവൾക്കടുത്തേക്ക് വന്നു.. അവളിൽ വല്ലാത്ത പാരവേശമുണ്ടായി..

അവൻ അവൾക്ക് പുറകിലായി നിന്നു.. മുടിയിൽ കുത്തിയ ഓരോ പിന്നുകളായി അഴിച്ച് കൊടുത്തു.. കഴുത്തിലൂടെ കയ്യിട്ട് അവളെ തന്റെ ദേഹത്തിലേക്ക് ചേർത്തു നിർത്തി.. മറു കൈ കൊണ്ട് വീണ്ടും പിന്നുകൾ ഊരിയെടുത്തു.. "എന്തിനാ മയിലേ വിറയ്ക്കുന്നെ.. നിനക്ക് ഹെല്പ് ചെയ്യാൻ എനിക്ക് അനിയത്തിയോ ചേച്ചിയോ ഒന്നുമില്ലല്ലോ.. അപ്പൊ കരുതി എന്റെ ഭാര്യ ബുദ്ധിമുട്ടണ്ട ഒന്ന് സഹായിക്കാം എന്ന്.." അവസാനത്തെ പിന്നും ഊരി മേശയിലേക്ക് വച്ചു കൊണ്ട് അവൻ പറഞ്ഞു.. ഇരു കൈകളും അവളുടെ ദേഹത്തു നിന്നും എടുത്ത് മാറിയപ്പോളാണ് അവളൊന്ന് ശ്വാസം വിട്ടത്... പിന്നിയിട്ട മുടി മുന്നിലേക്കിട്ട് കൊടുത്ത് അവൻ ബ്ലൗസിനു പിന്നിലെ കെട്ടിൽ പിടിച്ചു വലിച്ചു.. അവളുടെ ശ്വാസോച്വസത്തിന്റെ ശബ്ദം മാത്രം ആ മുറിയിൽ നിറഞ്ഞു.... അവന്റെ കൈകൾ ബ്ലൗസിന്റെ ആദ്യത്തെ ഹൂക്കിനെ അഴിച്ച് മാറ്റി.. അവൾ കണ്ണുകൾ മുറുകെ അടച്ചു... "പീലി............"

മീനുവിന്റെ ശബ്ദം കേട്ട് അവൾ വേഗം കണ്ണ് തുറന്ന് അഭിയേ നോക്കി. "പീലി..." വാതിലിനപ്പുറത്തു നിന്നും ശബ്ദം വീണ്ടും കേട്ടു. അവൻ കള്ള ചിരിയോടെ കട്ടിലിൽ മടക്കി ഇട്ടിരിക്കുന്ന ടവൽ എടുത്ത് ബാത്‌റൂമിലേക്ക് കയറി.. അവൻ ഡോർ അടച്ചതും പീലി നെഞ്ചിൽ കൈ വച്ച് ആഞ്ഞു ശ്വാസം വിട്ടു.. " ടീ പെണ്ണേ..." "ആഹ് ടീ കയറി വന്നോ..." പീലി പറഞ്ഞതും മീനു ചാരിയ വാതിൽ തുറന്ന് അകത്തേക്ക് വന്നു.. "നീ ഉറങ്ങുവായിരുന്നോ.. ഞാൻ വിളിച്ചത് കേട്ടില്ലേ.." "ഇല്ലടി.. അഭിയേട്ടൻ... പറഞ്ഞു കഴിഞ്ഞാണ് അബദ്ധം പറ്റി എന്ന് മനസിലായത്.. "ഓഹ്.. കേട്ടിയോനും കെട്ട്യോളും കൂടി റൊമാൻസിക്കുവായിരുന്നോ.." "ആയിരുന്നു.. നീ അല്ലെ കട്ടുറുമ്പായി ഇടയിൽ കേറി വന്നത്.." "ഞാൻ കാട്ടുറുമ്പായി ലെ.. വീട്ടിൽ വഴക്കും ഉണ്ടാക്കി ഡ്രെസ്സും മാറ്റി ഓടി വന്നപ്പോ ഞാൻ നിനക്ക് കട്ടുറുമ്പ്.. എനിക്കിത് വേണം.. ഞാൻ പോവാ... "ഹാ പിണങ്ങാതെ.. സഞ്ജുവേട്ടനോട് കിടിലനായി സമ്മതം അറിയിച്ചു എന്നൊക്കെ ഞാനറിഞ്ഞു..

" "ശെയ്.. ഒന്ന് പോടി.. എനിക്ക് നാണം വരുന്നു.." "നമുക്ക് പിന്നേ നാണിക്കാം.. ഇപ്പൊ ഇതഴിക്കാൻ ഹെല്പ് ചെയ്യ്..." "ഹാ അത് ശരിയാ.. " മീനുവിന്റെ സഹായത്തോടെ സാരിയിലെ പിന്നൊക്കെ അഴിച്ച് ഒരു ചുരിദാർ എടുത്തിട്ടു.. അഭി കുളി കഴിഞ്ഞ് പുറത്തിറങ്ങിയതും അവനെ നോക്കി ഒന്ന് ചിരിച്ച് മീനു റൂമിൽ നിന്നും പുറത്തേക്ക് പോയി.. പീലി അവളുടെ പോക്ക് കണ്ട് ദയനീയമായി നോക്കി നിന്നു.. എന്നെ കൂടെ കൊണ്ട് പൊയ്ക്കൂടേടി സാമദ്രോഹി എന്നായിരുന്നു ആ നോട്ടത്തിനർത്ഥം.. അഭിയുടെ കള്ളച്ചിരി താങ്ങാൻ കഴിയാതെ അടക്കിപിടിച്ച ഹൃദയമിടിപ്പോടെ അവൾ തല താഴ്ത്തി നിന്നു.. അവൻ അരികിലേക്ക് വന്ന് ആ മുഖമുയർത്തി ആ ചുവന്ന ചുണ്ടിൽ തൊട്ടു തൊട്ടില്ല എന്ന മട്ടിൽ ഒന്ന് മൃദുവായി ചുംബിച്ച് ഷർട്ടുമിട്ട് പുറത്തേക്കിറങ്ങി.. അവളത് നോക്കി നിന്നു.. അത്യധികം പ്രണയത്തോടെ.......... തുടരും......

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...