🌸മയിൽ‌പീലി🌸: ഭാഗം 6

രചന: അനു രാജീവ്

"എന്തിനാടി ഇപ്പൊ നീ എന്നെ കിസ്സ് ചെയ്തേ..." അപ്പോഴാണ് താൻ എന്താണ് ചെയ്തത് എന്ന് അവൾക്ക് ബോധം വന്നത്.. അവൾ ഒന്ന് ഇളിച്ചു കൊടുത്തു.. "ഇപ്പൊ വെറുതെ വിടുവാ.. വേഗം ഫ്രഷ് ആയി വാ.. പുറത്ത് പോകാം..." അവൾ രക്ഷപെട്ട സന്തോഷത്തിൽ വേഗം ബാത്‌റൂമിൽ കയറി.. "മയിലേ... സെക്കന്റ്‌ പൈപ്പിൽ ചുടു വെള്ളം വരുംട്ടോ.. അതിൽ കുളിച്ചാ മതി..." അവൻ പുറത്ത് നിന്നും വിളിച്ചു പറഞ്ഞു... "ആഹ്.. ശരി..." അവൾ വേഗം കുളിച്ചിറങ്ങി.. അവൻ വാങ്ങി കൊടുത്ത ടോപ്പും ലെൻഗിൻസും ഇട്ടു.. അവൾക്കെന്തോ മടി തോന്നി അതൊക്കെ ഇട്ടിട്ട്.. "മയിലേ.. നിന്നെ കാണാൻ എന്തൊരു ചേലാടി പെണ്ണെ..." അവളുടെ മുഖം കൈകളിൽ എടുത്ത് അവൻ പറഞ്ഞു.. അവൾ അതിന് നനുത്തൊരു പുഞ്ചിരി മാത്രം നൽകി... പെട്ടെന്ന് ഫോൺ ring ചെയ്തു.. "നിന്റെ അപ്പയാ..." "അപ്പയോ.. എങ്ങനെയാ ഈ ഫോണിൽ..??" "ഞാൻ കാൾ ഫോർവേഡ് ചെയ്ത് വച്ചതാ.. നീ എടുക്ക്... വീട്ടിൽ തന്നെ ഉള്ള പോലെ സംസാരിച്ചാൽ മതി..

അല്ലെങ്കിലും മൂളൽ മാത്രമല്ലേ വേണ്ടൂ.. വേഗം എടുക്ക്..." അവൾ ഈശ്വരനെ പ്രാർത്ഥിച്ചു അറ്റൻഡ് ചെയ്തു... "അപ്പാ..." "ഹ്മ്മ്... ഹ്മ്മ്... ഹ്മ്മ്മ്... ഹ്മ്മ്മ്... ഹ്മ്മ്മ്..." കാൾ കഴിഞ്ഞു.. അവന്റെ ചിരി കണ്ട് അവൾ അടിക്കാൻ കയ്യോങ്ങി... അവൻ കയ്യിൽ പിടിച്ച് നെഞ്ചോട് ചേർത്ത് നിർത്തി.. അവളിൽ നിന്നും വമിക്കുന്ന സോപ്പിന്റെയും ഷാമ്പൂവിന്റെയും ഗന്ധം അവനെ ഉലച്ചു... "ഇനിയും നിന്നാൽ എനിക്ക് പലതും തോന്നി പോവാം.. വാ.. ഇറങ്ങാം.. " അവളിൽ നിന്നുള്ള പിടി വിട്ട് അവൻ ബുള്ളറ്റ്റിന്റെ കീയും പഴ്സും എടുത്തു.. മുടി ഒന്ന് കോതി ഒതുക്കി അവളും പുറകെ ഇറങ്ങി.. തണുപ്പ് അസ്സഹനീയമായിരുന്നു.. ബുള്ളറ്റിൽ കയറി പത്തു മിനിറ്റ് കഴിഞ്ഞതും ഒരു ഷോപ്പിൽ നിർത്തി 2 സ്വെറ്റർ വാങ്ങി.. അതും കൂടെ ഇട്ടപ്പോൾ അവൾക്ക് അല്പം ആശ്വാസം തോന്നി.. "മയിലേ.. നമുക്ക് നാളെ നൈറ്റ്‌ തിരിക്കണം. അപ്പോഴേ മറ്റന്നാൾ വീടെത്തുള്ളൂ.. നാളെ ഇവിടം മൊത്തം കറങ്ങാം.. ഈവെനിംങ്ങിൽ കാണാൻ പറ്റിയ ഒരടിപൊളി സ്ഥലമുണ്ട്.. അങ്ങോട്ട് പോവാം.."

അവൾ ഒന്ന് മൂളി.. ചെറിയ ചെറിയ ഊട് വഴികളും കരിങ്കല്ല് പതിപ്പിച്ച റോഡുകളും, രണ്ടു ഭാഗവും കാട്.. ഉച്ച സമയമായിട്ടും ഇരുട്ട് നിറഞ്ഞ അന്തരീക്ഷം.. അവൾക്ക് പുലിമുരുകൻ സിനിമയൊക്കെ ഓർമ വന്നു.. 'ഭഗവാനെ.. ഇത് പോലത്തെ സ്ഥലത്തൊക്കെയല്ലേ പുലി വരുന്നത്.. ബൈക്കിൽ പോയാലും പിടിക്കില്ലേ.. പ്രതേകിച്ചു ബാക്കിൽ ഇരിക്കുന്നവരെ.. ഇനി ആന വന്നാലോ.. വല്ലതും പറ്റുന്നതല്ല.. അപ്പ അറിയില്ലേ... ഹോ.. ഭഗവാനെ ഒന്നും വരുത്തല്ലേ ' മനസ്സിൽ ചിന്തിച്ചു കൊണ്ട് അവൾ ചുറ്റും നോക്കി... വല്ലതും വരുന്നുണ്ടോന്ന് 😂 ആ ഏരിയ കഴിഞ്ഞപ്പോൾ അവൾക്ക് സമാധാനമായി.. പിന്നെ കുന്ന് പോലത്തെ സ്ഥലമായിരുന്നു.. ഒരു ഭാഗം മുഴുവൻ കാപ്പി ചായ കൃഷി.. ഇറങ്ങാൻ തോന്നിയെങ്കിലും അവനോട് പറഞ്ഞില്ല.. ഇടയിൽ ഒരു ചായക്കടയിൽ നിർത്തി വഴി ചോദിക്കുന്നുണ്ടായിരുന്നു..

പിന്നെ കുറച്ചു കൂടെ പോയപ്പോൾ രണ്ടു മൂന്ന് കാറും നാലഞ്ചു ബൈക്കും ഒരു സൈഡ് നിർത്തിയിരിക്കുന്നു. അപ്പോൾ മനസ്സിലായി സ്ഥലം എത്തിയെന്നു.. അവളുടെ കയ്യും പിടിച്ച് അവൻ അങ്ങോട്ട് ചെന്നു. തണുപ്പ് കൂടി കൂടി വരുന്നുണ്ടായിരുന്നു.. അവളെ ഒന്ന് കൂടെ ചേർത്ത് പിടിച്ച് മുന്നോട്ട് പോയി.. അവളുടെ കണ്ണുകൾ വിടർന്നു. "അവലാഞ്ചി💙" അവൾ മനസ്സിലാകാതെ അവനെ നോക്കി.. "ഈ സ്ഥലത്തിന്റെ പേരാ..." അവൾ ഹൃദ്യമായി പുഞ്ചിരിച്ചു.. ഉയർന്നു നിൽക്കുന്ന പൈൻ മരങ്ങൾക്കിടയിലൂടെ അവർ നടന്നു.. ആദ്യമായി ശ്വാസം വിടുന്ന പോലെ അവൾ ആ തണുപ്പിനെ ഉള്ളിലേക്ക് ആവാഹിച്ച് സാവദാനത്തിൽ പുറത്തേക്ക് വിട്ടു.. 💙 ജീവിതത്തിലെ ഏറ്റവും സുന്ദരമായ നിമിഷം 💙 കുറച്ചു കൂടി മുന്നോട്ട് പോയപ്പോൾ ഇളനീർ പോലെ തെളിമയുള്ള അരുവി.. അതിന്റെ കള കള ശബ്ദം ആ പ്രദേശത്തു മുഴുവൻ അലയടിച്ചിരുന്നു..

അവൾ വേഗം ഓടി പോയി അതിൽ കാല് വച്ചതും തിരികെ വലിച്ചു.. "എന്തൊരു തണുപ്പ്..." അവളുടെ എക്സ്പ്രഷനും പറച്ചിലും കേട്ട് അഭി പൊട്ടിച്ചിരിച്ചു.. അവൾ മുഖം കോട്ടി കൊണ്ട് പാന്റ് അല്പം മുകളിലേക്ക് പൊക്കി വച്ച് അതിലേക്കിറങ്ങി.. ഐസ് വാട്ടർ പോലെയുണ്ടെങ്കിലും അവൾക്ക് അതിൽ കളിക്കാതിരിക്കാൻ ആയില്ല.. ആസ്വദിക്കുകയായിരുന്നു അവൾ.. ആദ്യമായി.. അവനും അത് നിറഞ്ഞ മനസ്സോടെ കണ്ടു നിന്നു.. കുറെ നേരം കളിച്ചു കൊണ്ട് നിന്നപ്പോൾ അവൻ തിരികെ വിളിച്ചു.. "ഇനിയും കാണാനുണ്ട്.. നീ വാ മതി.. " അവൾ ചുണ്ട് ചളുക്കി കൊണ്ട് അവന്റെ പുറകെ പോയി.. ഡ്രസ്സ്‌ കുറച്ചു നനഞ്ഞത് കൊണ്ടും വെയിൽ താഴ്ന്നത് കൊണ്ടും തണുപ്പ് വീണ്ടും കൂടി.. അവളുടെ അവസ്ഥ മനസ്സിലാക്കി അവൻ തിരികെ പോവാമെന്ന് പറഞ്ഞു.. ഒരു മണിക്കൂറോളം വേണം തിരികെ റൂം എത്താൻ എന്ന് അറിയാവുന്നത് കൊണ്ട് അവളും സമ്മതിച്ചു.."

തിരിച്ചുള്ള യാത്രയിൽ അവൾക്ക് ഒരു ഭയവും തോന്നിയില്ല.. ഈ ലോകത്ത് ഏറ്റവും തന്നെ സുരക്ഷിതമാക്കാൻ കഴിയുന്നവന്റെ കയ്യിലാണ് താനിപ്പോൾ എന്നത് അവൾ മനസിലാക്കി കഴിഞ്ഞിരുന്നു... അവന്റെ പുറത്ത് മുഖം ചേർത്ത് അവൾ കിടന്നു.. അവളുടെ മാറ്റം മനസിലാക്കി ചിരിയോടെ അവനും വണ്ടിയിൽ ശ്രദ്ധിച്ചു.. 🌸🌸🌸 തിരികെ റൂം എത്തിയതും അവൻ അവളോട് ഡ്രസ്സ്‌ മാറ്റാൻ പറഞ്ഞു.. പാന്റ് മാത്രം നനഞ്ഞത് കൊണ്ട് അത് മാത്രം മാറ്റി പാലാസൊ ഇട്ടിട്ട് വന്നു.. അവൻ ടീവിയിൽ ചാനൽ മാറ്റി കിടക്കുകയായിരുന്നു.. തണുത്തിട്ട് വയ്യ എന്ന കാരണത്താൽ മറ്റൊന്നും ചിന്തിക്കാതെ അവളും ബെഡിലേക്ക് കേറിയിരുന്നു.. കാത്തിരുന്ന പോലെ അവൻ തലയെടുത്ത് അവളുടെ മടിയിലേക്ക് വച്ചു.. നോട്ടം പക്ഷെ ടീവിയിലേക്ക് തന്നെയാണ്..

"മയിലേ.. ഇവിടെയാകെ നാല് ചാനലെ കിട്ടുന്നുള്ളു.. മൂന്ന് മ്യൂസിക്കും ഒരു ന്യൂസും.. മ്യൂസിക് വെക്കാലെ..." അവൾ ഒന്ന് മൂളി.. * മിന്നൽ ഒരു കോടി എന്തൻ ഉയിർ തേടി വന്തതേ.. ലച്ചം പല ലക്ഷം പൂക്കൾ ഒണ്ട്റാക പൂത്തതെ... ഉൻ വർതൈ തേൻ വാർത്തതെ......** "പ്രഭുദേവ സിമ്രാൻ പൊളി കോമ്പോ ആണല്ലേ... എന്നാ ഡാൻസാ.. നിനക്കും ഇത് പോലെ കളിക്കാൻ അറിയോ മയിലേ.. അതോ തോം തോം തീതിതോം മാത്രേ അറിയുള്ളോ..." മടിയിൽ കിടന്ന് കൊണ്ടെന്നെ ടീവിയിൽ നിന്നും നോട്ടം മാറ്റാതെ അഭി ചോദിച്ചിട്ടും അവളിൽ നിന്നും മറുപടിയൊന്നും കേൾക്കത്തായപ്പോൾ അവൻ ഇപ്പുറം ചെരിഞ്ഞു ആ മുഖത്തേക്ക് നോക്കി. അവളുടെ കരിനീല മിഴികൾ അവനിൽ മാത്രമായി ഒതുങ്ങിയിരുന്നു. മറ്റൊന്നും കേൾക്കാത്ത പോലെ..

ഒന്നും അറിയാത്ത പോലെ.. എല്ലാം മറന്ന് അവനിൽ മാത്രം നിറഞ്ഞ്.... 💙 * ആയുൾ വറൈ ഉന്തൻ പായിൽ ഉറവാട വരുകിറേൻ.. ഓഓ.... കാതൽ വറലാറൈ എഴുത എൻ ദേകം തറുകിറേൻ.. എൻ വാർത്തയ് ഉൻ വാഴ്ക്കെയേ..... *** അവളുടെ കണ്ണിൽ നിറഞ്ഞ് നിന്ന പ്രണയത്തിൽ അവന് തന്നെ നഷ്ട്ടമാവുന്ന പോലെ തോന്നി.. അവന്റെ കൈകൾ അവളുടെ അരയിലൂടെ ചുറ്റി മുറുകി.. മുഖം ആ വയറിനോട് ചേർത്തു വച്ചു.. "മയിലേ.. കുറച്ചു നേരം കൂടെ നോക്കിയാ ശരിക്കും ഇത് നമ്മടെ ഹണിമൂൺ ആയി പോകുമേ..." അവൾ ഇക്കിളി കൊണ്ട് ചിരിച്ചു.. അവൻ വേഗം മുഖമുയർത്തി നോക്കി. "മയിലേ.. നീ വേണ്ടെന്ന് പറഞ്ഞെങ്കിലും ഒരുമ്മ തന്നോട്ടെ.." പീലി അവനെ കൂർപ്പിച്ചു നോക്കി.. "നീയല്ലെടി എന്നെ നോക്കി പ്രലോഭിപ്പിച്ചത്... എന്നിട്ട് ഉണ്ടക്കണ്ണുരുട്ടി നോക്കുന്നോ.. വേണ്ടെങ്കിൽ വേണ്ട.. ഹും..." അവൻ അവളിൽ നിന്നും വിട്ടിരുന്നു..

അവൾ വേഗം റിമോട്ട് വാങ്ങി ചാനൽ മാറ്റി... അപ്പോഴേക്കും അവന്റെ ഫോൺ റിങ് ചെയ്തു.. "ഹലോ.. സഞ്ജു..." അവൻ സംസാരിച്ചു കൊണ്ട് റൂമിന് പുറത്തേക്ക് പോയി.. 'ശേ.. ഒരുമ്മ കൊടുക്കായിരുന്നു.. തന്നതെങ്കിലും വാങ്ങായിരുന്നു.. വേണ്ട. എന്തിനാ വെറുതെ ആശ കൊടുക്കുന്നെ.. എന്തായാലും ഒന്നും നടക്കാൻ പോവുന്നില്ല.. ഒരേ കാസ്റ്റ് എങ്കിലും ആയിരുന്നേൽ എങ്ങനെയെങ്കിലും സമ്മതിപ്പിക്കാമായിരുന്നു.. ഈ കാസ്റ്റ് കണ്ടു പിടിച്ചവന്റെ തലയിൽ ഇടിത്തീ വീഴട്ടെ.. ഹും... ഇത് പോലെ എന്നും സന്തോഷിക്കാൻ പറ്റിയിരുന്നെങ്കിൽ എത്ര നന്നായിരുന്നു കൃഷ്ണ...' അവൾ ഓരോന്ന് ചിന്തിച്ചു കൊണ്ടിരുന്നു.. അവൻ പുറത്തിന്ന് വരുമ്പോൾ കയ്യിൽ പാർസൽ ഫുഡും ഉണ്ടായിരുന്നു.. രണ്ടാൾക്കും പൊറോട്ടയും വേറെ വേറെ കറികളുമായിരുന്നു... അവന്റെ കറിയുടെ മണം അവളുടെ നാസികയിലേക്ക് അടിച്ചു കയറി..

അവൾ അതിലേക്ക് തന്നെ നോക്കി നിന്നു.. "വേണോ??" അവൻ അവൾക്ക് നേരെ നീട്ടി കൊണ്ട് ചോദിച്ചു... "എന്താ അത്..." "ഒരു സ്പെഷ്യൽ വെജിറ്റബളാ.. ചിലവർക്ക് ഇഷ്ടപ്പെടില്ല അതാ നിനക്ക് ഞാൻ വെജ് കുറുമ വാങ്ങിയത്.. ഇത് ടേസ്റ്റ് ചെയ്ത് നോക്ക് ഇഷ്ട്ടായാൽ കഴിച്ചോ..." അവൾ തലയാട്ടി സമ്മതിച്ചു.. അവൻ കടിച്ചു പിടിച്ച ചിരിയോടെ പൊറോട്ട മുറിച്ചെടുത്ത് കറിയിൽ മുക്കി ഒരു കഷ്ണവും എടുത്ത് അവളുടെ വായിലേക്കിട്ട് കൊടുത്തു.. അവളത് ആസ്വദിച്ചു കഴിച്ചു.. "അടിപൊളി ആയിട്ടുണ്ട്.. എനിക്കത് മതി.. " "ഓക്കേ.. എന്നാൽ ഷെയർ ചെയ്യാം.. നാളെ രണ്ടും ഈ കറി തന്നെ വാങ്ങാം.." അവൾ തലയാട്ടി കൊണ്ട് അവന്റെ പ്ലേറ്റ് അടുത്തേക്ക് നീക്കി വച്ച് അതിൽ നിന്നും എടുത്ത് ആസ്വദിച്ചു കഴിച്ചു.. "മയിലേ.. ഒരു കാര്യം പറഞ്ഞാൽ പിണങ്ങുമോ..??" അവൾ കൈ കഴുകി തിരികെ വരുമ്പോഴാണ് അവന്റെ ചോദ്യം.. "മ്ച്ചും..." "അതേ.. നീ കഴിച്ചത് ബീഫാ..." "ഭഗവാനെ.. പശുവോ???..."

"ഏയ്‌.. പോത്തായിരിക്കും..." "എടാ... ദുഷ്ട്ടാ.. അയ്യേ.." അവൾ കയ്യിൽ കിട്ടിയ വേസും എടുത്ത് അവനെ തല്ലാൻ പോയി.. അവൻ കട്ടിലിനു ചുറ്റും ഓടി.. അവൾ പുറകെയും. അവസാനം രണ്ടും തളർന്നു ബെഡിലിരുന്നു.. "സോറി..." അവൻ ചെവിയിൽ കൈ വച്ച് കുട്ടികളെ പോലെ പറഞ്ഞു.. അവൾ ചിരിയോടെ അവന്റെ മുടിയിൽ തട്ടി കവിളിൽ പിടിച്ചു വലിച്ചു.. "എന്തായാലും ടേസ്റ്റ് സൂപ്പർ ആയിട്ടുണ്ട്..." "ഇത് ശീലമാക്കിക്കോ. അല്ലെങ്കിൽ നിന്നെ കെട്ടിയാൽ ഞാനും സാമ്പാറും തോരനും നിന്ന് നടക്കേണ്ടി വരും.. " അവളുടെ ചിരി പെട്ടെന്ന് മാഞ്ഞു. പീലി അവന്റെ കയ്യിൽ പിടിച്ചു.. "അഭിയേട്ടാ.. അപ്പ സമ്മതിക്കില്ല..." "അതിന് ഞാൻ നിന്റെ അപ്പയെ കെട്ടാൻ ഉദ്ദേശിക്കുന്നില്ല.. കിടക്ക് പെണ്ണെ... അവള്ടെ ഒരപ്പ.. തൂകി വല്ല പൊട്ട കിണറ്റിലും ഇടണം.." പിറുപിറുത്തുകൊണ്ട് കിടക്കുന്നവന്റെ നടുവിന് നോക്കി കൈ മടക്കി ഒരു കുത്ത് കൊടുത്ത് അവൾ..

"ഹാ..... ദ്രോഹീ.. എന്തിനാടി എന്റെ പുറം പൊളിച്ചത്.." "എന്റെ അപ്പയെ പൊട്ടകിണറ്റിൽ ഇടണം ലെ..." "ഈ... കേട്ടല്ലെ.. വെറുതെ പറഞ്ഞതാ.. ഒന്നൂല്ലെങ്കിലും എന്റെ അമ്മായപ്പൻ അല്ലേടി.. ഞാൻ അങ്ങനെ ചെയ്യോ..?? അതിന് നീ എന്ത് പണിയാ കാണിച്ചത്?? എന്റെ നടു... നിന്റെ ലൈംഗിക ജീവിതത്തിൽ എന്തെങ്കിലും കുഴപ്പം വന്നാൽ കയ്യിലിരുപ്പ് കൊണ്ടാണെന്ന് കരുതിയാൽ മതിട്ടാ..." "ശേ.. വഷളൻ.. വായൊന്ന് പൂട്ടി വച്ചിട്ട് കിടക്കാമോ.." "ഹാ.. നീ ഇങ്ങനെ കിടക്കുമ്പോ പലതും പൂട്ടി വക്കേണ്ട അവസ്ഥയാ..." അവൾ ഉറങ്ങിയത് പോലെ തിരിഞ്ഞു കിടന്നു. ഒന്ന് നോക്കി ചിരിയോടെ അവനും ഉറങ്ങി.. അവൾ പതിയെ കണ്ണ് തുറന്ന് അവന് നേരെ തിരിഞ്ഞു അവന്റെ നെറ്റിയിൽ ഒരു കുഞ്ഞു ഉമ്മ കൊടുത്തതിനു ശേഷം അവന്റെ കൈകളെ ചേർത്ത് പിടിച്ചു കൊണ്ട് അവളും കണ്ണടച്ചു.. 🌸🌸🌸

രാവിലെ ഉണർന്ന് നോക്കുമ്പോൾ അടുത്ത് അഭിയെ കാണാനില്ല.. അവൾ റൂമിൽ തൂക്കിയ ടൈം പീസിൽ നോക്കി.. "8 മണിയോ. ഈശ്വരാ.. ഞാൻ ഇത്രേ നേരം ഉറങ്ങിയോ.. " "അതിനെന്താ മയിലേ..." കുളിച്ചിറങ്ങി വരുന്ന അവനെ കണ്ട് അവൾ ആകെ മൊത്തത്തിൽ ഒന്ന് നോക്കി... സ്ലീവ് ലെസ്സ് ബനിയനും ഷോർട്സും ആണ് വേഷം.. അവൾക്ക് അല്പം ജാള്യത തോന്നിയെങ്കിലും അത് പുറത്തു കാണിച്ചില്ല. "ഞാനിത് വരെ 6 മണി വരെ പോലും ഉറങ്ങിയിട്ടില്ല. ഏതാണ്ട് ഒരു 7 വയസ്സ് തൊട്ടിട്ട് അപ്പച്ചി 4.30 ക്ക് വന്ന് വിളിച്ചു വിടും.. അമ്പലത്തിൽ പാട്ടു വാക്കുന്നതിനു മുന്നേ പെൺകുട്ടികൾ എഴുന്നേറ്റ് കുളിച്ചു വിളക്ക് വയ്ക്കണത്രെ.. എങ്കിലേ ആ വീട്ടിൽ ഐശ്വര്യമുണ്ടാവൂ... ആദ്യമൊക്കെ കരയുമായിരുന്നു ഉറങ്ങാൻ കൊതിയായിട്ട്... നേരത്തെ ഉറങ്ങാനും വിടില്ലേ... അപ്പയും അപ്പച്ചിയും എനിക്കൊരു അച്ഛമ്മയും കൂടെ ഉണ്ടായിരുന്നു.. അവർ കഴിച്ചിട്ടേ ഭക്ഷണം തരൂ.. അപ്പോഴേക്കും 10 മണി ആകും.. ഉറക്കം തൂങ്ങി ക്ലാസ്സിലിരുന്നിട്ട് ടീച്ചർ എത്ര തവണ അടിച്ചിട്ടുണ്ടെന്നറിയോ... പിന്നെ പിന്നെ അത് ശീലമായി.. ഇപ്പൊ തനിയെ നാലര ആവുമ്പോ ഉണരും..

ഇന്നെന്താണാവോ ഇങ്ങനെ ഉറങ്ങാൻ മാത്രം..." പറഞ്ഞു കഴിയുമ്പോൾ അവളുടെ മിഴികൾ നീർ പൊഴിച്ചിരുന്നു. "മയിലേ.. നമ്മൾ നമുക്ക് വേണ്ടി ജീവിക്കണം.. മറ്റുള്ളവരുടെ ഇഷ്ടത്തിന് വേണ്ടി ജീവിക്കുന്നത് ഒരിക്കലും നമുക്ക് സന്തോഷം തരില്ല.. ആ ജീവിതത്തിനു അർത്ഥം ഉണ്ടാവില്ല... എന്റെ മയില് അവൾക്കിഷ്ടമുള്ളത് എന്ന് ധൈര്യത്തോടെ ചെയ്യാൻ തുടങ്ങുന്നോ.. അന്ന് തൊട്ട് ഈ ജീവിതം നീ ആസ്വദിക്കാൻ തുടങ്ങും..." ഒരു ചിരിയോടെ അവൻ ഫോൺ എടുത്ത് പുറത്തേക്ക് പോയി.. പീലിയുടെ മനസ് നിറയെ അവന്റെ വാക്കുകളായിരുന്നു.. അവൾ ഫ്രഷ് ആയി ഇറങ്ങുമ്പോഴേക്കും അവൻ ഫുഡ്‌ വാങ്ങി വന്നിരുന്നു. അത് കഴിച്ചു കഴിഞ്ഞതും അവർ ഇറങ്ങി.. റിസപ്ഷനിൽ കീ കൊടുത്ത് വണ്ടിയിൽ കയറിയതും അവളും ഓടി വന്നു പുറകിൽ കയറി ഒന്ന് ചിരിച്ചു കൊണ്ട് അവൻ വണ്ടിയെടുത്തു..

ബോട്ടിങ്ങും ബോട്ടാനിക്കൽ ഗാർഡനിലുമായി ഉച്ച വരെയുള്ള സമയം പോയി.. ആദ്യമായി അതെല്ലാം കാണുന്ന ഒരു കുട്ടിയുടെ ആനന്ദമായിരുന്നു അവളിൽ.. ഉച്ചക്ക് ഭക്ഷണം കഴിച്ച് അവർ റോസ് ഗാർഡനിലേക്ക് തിരിച്ചു.. പൂക്കൾ കൊണ്ട് നിറഞ്ഞൊരു സ്ഥലം... ഇതാണോ സ്വർഗം എന്ന് പോലും അവൾക്ക് തോന്നി. പല നിറത്തിലും വലുപ്പത്തിലുമുള്ള അനേകായിരം പൂക്കൾ.. ഓരോന്നും കൊച്ചു കുഞ്ഞുങ്ങളെ പോലെ നോക്കി കൊണ്ട് അവൾ നടന്നു.. പീലിക്ക് പുറകെ ചിരിയോടെ അവനും നടന്നു.. അവൻ ഇടക്കിടക്ക് ആരെയോ വിളിക്കുന്നത് അവൾ ശ്രദ്ധിച്ചിരുന്നു. "ആരെയാ വിളിക്കുന്നെ...". "എന്റെ ഗേൾ ഫ്രണ്ടിനെ.." അവൻ കള്ള ചിരിയോടെ പറഞ്ഞു.. "ഗേൾ ഫ്രണ്ടോ..??! " "ഹാ.. ഇവിടെയാ വീട്.. എന്നെ കാണാൻ വരാമെന്നു പറഞ്ഞിരുന്നു.. കാണാനില്ല.. അതാ വിളിച്ചോണ്ടിരിക്കുന്നെ..." "ഹും...." അവൾ മുഖം കോട്ടി വെട്ടിതിരിഞ്ഞു നടന്നു..

അവൻ വീണ്ടും ചിരിയോടെ ഫോൺ ചെവിയിൽ വച്ചു... കുറച്ചു സ്റ്റെപ്സിനു മുന്നിൽ എത്തിയതും അവൻ പുറകിൽ നിന്ന് പീലിയുടെ കണ്ണുകൾ അടച്ചു പിടിച്ചു.. "എന്താ....". അവൾ ആവലാതിയോടെ ചോദിച്ചു.. "ഒരു കുഞ്ഞ് സർപ്രൈസ്.." അവൻ അവളെയും കൊണ്ട് പതിയെ ആ സ്റ്റെപ്പുകൾ ഇറങ്ങി... 'എന്തായിരിക്കും.. ഇനി ശരിക്കും ഗേൾ ഫ്രണ്ട് ഉണ്ടാവോ... പരിചയപെടുത്താനാവോ... ആണെങ്കിൽ തന്നെ നിനക്കെന്താ പീലി.. ഹും.. അയ്യോ.. എനിക്ക് എന്താ ഇങ്ങനെ.. കുശുമ്പോ.. അയ്യേ. മ്ലേച്ഛം.. ഭഗവാനെ ഗേൾ ഫ്രണ്ട് ആവരുതേ... ' "തൊഴുതി കഴിഞ്ഞെങ്കിൽ സർപ്രൈസ് കാണിക്കട്ടെ..??". അവൻ ചെവിക്കരികിൽ വന്ന് പറഞ്ഞപ്പോഴാണ് തൊഴുതു പിടിച്ച കൈ അവൾ താഴെക്കിട്ടത്.. അവൻ പതിയെ അവളുടെ കണ്ണിൽ നിന്നും കൈ എടുത്ത് മാറ്റി.. മുന്നിൽ റോസ് ഫ്ലവർ കൊണ്ട് ഒരു ആർച്ച്...

ഡിഫ്‌റൻഡ് കളർസ് ആയത് കൊണ്ട് തന്നെ വല്ലാത്ത ഭംഗിയായിരുന്നു അതിന്.. ചുറ്റും കുഞ്ഞ് ലൈറ്റ് കൊണ്ട് അറേൻജ് ചെയ്തിരിക്കുന്നു.. കുഞ്ഞ് കുഞ്ഞു പേൾസ് ഇടയിലായി തൂക്കി ഇട്ടിട്ടുണ്ട്. ആ വൈറ്റ് പേൾസിന് വല്ലാത്ത ഭംഗി ആയിരുന്നു.. ആ ലൈറ്റ്ന്റെ ഷാഡോ അതിൽ മിന്നുന്നുണ്ടായിരുന്നു ... അതിൽ റെഡ് റോസ് പെറ്റൽസ് കൊണ്ട് * I Love You Mayilee❤️* എന്ന് എഴുതിയിരിക്കുന്നു.. അവൾ വിടർന്ന കണ്ണുകളോടെ അവനെ നോക്കി.. അവൻ അവളുടെ ഇരുകൈകളും ചേർത്ത് പിടിച്ചു.. "മയിലേ.. നീ എന്റെ കൂടെ വേണം.. എന്നും.. എന്റെ എല്ലാ സന്തോഷത്തിലും ഇങ്ങനെ ചേർത്തു പിടിക്കാൻ.. ലോകം മുഴുവൻ കറങ്ങാൻ, എന്റെ കുഞ്ഞുങ്ങളെ പെറ്റ് വളർത്താൻ.. പകരം ഞാൻ നിനക്ക് ഒരു മഞ്ഞ ചരടും ഒരു നുള്ള് പൊന്നും തരാം.. ഈ അഭിടെ മാത്രം മയിലായി വരുമോ.. ആകാശത്തോളം ഉയരത്തിൽ നിന്നെ പറത്തി വിടാം. തിരികെ എന്നിലേക്ക് വന്നാൽ മാത്രം മതി..."

തന്റെ കണ്ണിൽ നോക്കി പറയുന്നവന്റെ വാക്കുകളിൽ മറ്റെല്ലാം മറന്നു പോയിരുന്നു ആ പെണ്ണ്.. ഒരു പൊട്ടി കരച്ചിലോടെ അവൾ അവനെ കെട്ടിപിടിച്ചു.. പരിസരം മറന്ന് അവന്റെ മുഖം മുഴുവൻ ചുംബനങ്ങളാൽ മൂടി.. അവൻ അവളുടെ കണ്ണുനീർ തുടച്ചു കൊടുത്ത് നെറ്റിയിൽ ചുണ്ട് ചേർത്തു.. "എസ്ക്യൂസ്‌ മി.. ഇത് അറേഞ്ച് ചെയ്തതിന്റെ ബാക്കി കൊടുക്കാൻ വഴിയില്ലാത്തോണ്ട് എന്റെ RC ബുക്ക്‌ പണയം വച്ചതാ.. അത് കിട്ടിയിരുന്നെങ്കിൽ അങ്ങോട്ട് പോവായിരുന്നു..." എവിടെന്ന ഈ അപശബ്ദം എന്ന് കരുതി രണ്ടാളും അങ്ങോട്ട് നോക്കി.. "സഞ്ജു......" അഭി സന്തോഷത്തോടെ അവനെ കെട്ടിപിടിച്ചു. "മയിലേ.. ഇത് സഞ്ജു. എന്റെ ബെസ്റ്റ് ബഡ്‌ഡി ആണ്.. ഇതൊക്കെ അറേഞ്ച് ചെയ്തത് ഇവനാ.. ഇങ്ങോട്ട് വരാൻ ഐഡിയ തന്നതും ഇവനാ.. " "ഹലോ പെങ്ങളെ.. ഒരു ഐഡിയ പറഞ്ഞു കൊടുതെന്ന് കരുതി ഇമ്മാതിരി പരിപാടി ഞാൻ പ്രതീക്ഷിച്ചില്ല.

. ഇവിടെ ഇതൊക്കെ ചെയ്യാൻ ഇവടെയുള്ളവന്മാർക്കൊക്കെ കൈമടക്ക്.. ഇവിടെത്തെ പൂവൊന്നും തരില്ല പറഞ്ഞപ്പോ ഇതൊക്കെ സങ്കടിപ്പിക്കാൻ ഞാൻ ഓടിയ ഒരു ഓട്ടമുണ്ട്.. പൈസ തികയാതെ വന്നപ്പോ എന്റെ RC ബുക്ക്‌ പണയം വച്ചിട്ടാ.. ഞ ന്നാ. ഞ.. ഭാ.... ബാക്കി പറയും മുന്നേ അഭി അവന്റെ വായിൽ അമർത്തി പിടിച്ച് അവിടന്ന് മാറ്റി... അവരുടെ പോക്ക് കണ്ട് അവൾ മനസറിഞ്ഞു ചിരിച്ചു.. അന്ന് പിന്നെ മൂന്നാളും കൂടിയാ കറങ്ങിയത്.. കുറെ ഇൻസ്റ്റൻഡ് ഫോട്ടോസ് ഒക്കെ എടുത്തു.. നേരം ഇരുട്ടി തുടങ്ങിയപ്പോൾ സഞ്ജുവിനോട് യാത്ര പറഞ്ഞ് അവർ ഹോട്ടലിലേക്ക് തിരിച്ചു പോയി. പോയി ബാഗൊക്കെ പാക്ക് ചെയ്ത് ഇറങ്ങി ബില്ല് സെറ്റിൽ ചെയ്യാൻ നിൽക്കുമ്പോൾ അഭിയുടെ കയ്യിൽ പീലിയുടെ പിടുത്തം വീണു.. അവൻ അവളെ നോക്കിയപ്പോൾ മുഖത്ത് ഭയമായിരുന്നു... അവൾ നോക്കിയിടത്തേക്ക് നോക്കിയപ്പോൾ ഒരു ചെറുപ്പകാരനും പെൺകുട്ടിയും എൻക്വിയറി സെക്ഷനിൽ നിൽക്കുന്നു. അവരെ നോക്കിയാണ് പീലി ഭയപ്പെടുന്നത്...

"എന്താടാ..." "അത്.. ഇന്ദ്രേട്ടൻ.." "ആര്???" "അപ്പച്ചിടെ ഫ്രണ്ടിന്റെ മോനാ... ചേച്ചിയുമായി വിവാഹം തീരുമാനിച്ചത് ഈ ചേട്ടനുമായിട്ടാ..." "ഓഹ്.. കൂടെ ഒരു പെൺകുട്ടി ഉണ്ടല്ലോ..." "ചിലപ്പോ കല്യാണം കഴിഞ്ഞു കാണും.. എന്നെ കണ്ടാൽ ഉറപ്പായും അപ്പച്ചിയോട് പറയും... നിക്ക് പേടിയാവുന്നു.." അവനിൽ കുറച്ചു കൂടെ ചേർന്ന് നിന്നു കൊണ്ട് അവൾ പറഞ്ഞു... "ഇത്ര നേരം കണ്ടില്ലാലോ. ഇനിയും കാണില്ല.. " അവർ കീ വാങ്ങി ലിഫ്റ്റിനടുത്തേക്ക് പോയി.. പീലി അഭിക്ക് മുന്നിൽ കേറി നിന്നു.. മറയുന്ന തരത്തിൽ.. പതിയെ ഒളിഞ്ഞു നോക്കി.. ബില്ല് സെറ്റിൽ ചെയ്യുമ്പോൾ ക്യാഷ് എടുത്തതും നൂറിന്റെ ഒരു നോട്ട് താഴെ വീണു. അതെടുക്കാൻ അഭി കുനിഞ്ഞതും ഇന്ദ്രൻ അങ്ങോട്ട് നോക്കി.. മുന്നിൽ നിൽക്കുന്ന പീലിയെ കണ്ട് നെറ്റി ചുളിച്ചു.. അപ്പോഴേക്കും അഭി എഴുന്നേറ്റ് നിന്നിരുന്നു. പീലി തറഞ്ഞു നിന്നു.. കണ്ടിട്ടുണ്ടാവും എന്ന് അവൾക്ക് തോന്നി..

ബില്ല് കൊടുത്തു കഴിഞ്ഞു നോക്കിയപ്പോൾ അവർ അവിടെ ഉണ്ടായിരുന്നില്ല.. വേഗം പോയി ബുള്ളെറ്റ് എടുത്തു അവൾ കയറിയിരുന്നു.. ചുറ്റും നോക്കി അവൻ വണ്ടി പായിച്ചു.. ഗ്ലാസ്‌ ഡോറിൽ നിന്നും ഇത് കണ്ട് നിക്കുന്ന ഇന്ദ്രൻ 'അമ്മ' എന്ന നമ്പറിലേക്ക് ഡയൽ ചെയ്തു.. 🌸🌸🌸🌸 "എന്റെ മയിലേ.. നീ ഇങ്ങനെ പേടിക്കാതെ.. ഇനി അഥവാ നിന്റെ അപ്പച്ചി അറിഞ്ഞാലും അവന് അത് തെളിയിക്കാനൊന്നും പറ്റില്ലാലോ.. ഞാൻ പോയിട്ടേ ഇല്ല എന്ന് ഉറപ്പിച്ചങ്ങു പറഞ്ഞേക്കണം.. " "ഹ്മ്മ്..." "ഇനി എന്തെങ്കിലും പ്രശ്നമുണ്ടെങ്കിൽ ഞാൻ വരാടി പെണ്ണെ.. നിന്നെ കലാക്ഷേത്രയിലേക്ക് കൂട്ടികൊണ്ട് വരാം.. നിന്റെ ടീച്ചറമ്മ രണ്ടു കയ്യും നീട്ടി സ്വീകരിക്കും..." "അഭിയേട്ടന് എല്ലാം തമാശയ.. നിക്ക് കയ്യും കാലും വിറച്ചിട്ട് പാടില്ല..." "അതീ തണുപ്പിന്റെയാ..." അവൾ ദേഷ്യത്തോടെ അവന്റെ പുറത്ത് കുത്തി.. ഒരു തട്ടുകടയിൽ നിന്നും ഡിന്നറും കഴിച്ച് അവർ യാത്ര തുടർന്നു..

കോയമ്പത്തൂരിൽ നിന്നും പാലക്കാട്ടേക്ക് കയറിയതും മഴ തുടങ്ങി.. രാത്രി ആയത് കൊണ്ടും ഇനി ഒരു മണിക്കൂർ മതി അങ്ങോട്ടെത്താൻ എന്ന് അറിയാവുന്നത് കൊണ്ടും അവർ raincoat ഇട്ടില്ല.. അവൾ അവനെ കെട്ടിപിടിച്ചു കൊണ്ട് പുറത്തേക്ക് ചാഞ്ഞു.. കഴിഞ്ഞ രണ്ടു ദിവസത്തെ ഓർമ്മകളിൽ മുഴുകിയിരിക്കുകയായിരുന്നു അവളുടെ മനസ്.. വല്ലാത്തൊരു സന്തോഷം.. അത് എങ്ങനെ പ്രകടിപ്പിക്കണമെന്ന് അറിയാത്ത അവസ്ഥ... അവന്റെ നനഞ്ഞ കഴുത്തിൽ അവൾ ചുണ്ട് ചേർത്തു... ഇത്രയും നല്ല ദിവസങ്ങൾ തനിക്ക് തന്നതിന് ആ ചുംബനത്തിലൂടെ അവൾ നന്ദി അറിയിച്ചു........ തുടരും......

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...