💟 സങ്കീർത്തനം 💟: ഭാഗം 5

രചന: കാർത്തിക

ഉള്ളിലുയർന്ന സങ്കടങ്ങൾ കണ്ണുനീരായി പെയ്തുതോർന്നു. പിറ്റേന്ന് എഴുന്നേൽക്കുമ്പോഴും എന്റെ മനസ്സ് ശൂന്യമായിരുന്നു. ആഭി ഏട്ടന്റെ സംസാരം അത്രത്തോളം എന്നെ മുറിവേൽപ്പിച്ചിരുന്നു ഒരു ഭാര്യ എന്നതിലുപരി ഒരു സ്ത്രിയേ അപമാനിക്കുന്ന തരത്തിലുള്ളതായിരുന്നു അദ്ദേഹത്തിന്റെ വാക്കുകൾ. ഇനി എങ്ങെനെയാണ് മുന്നോട്ട് ഉള്ള എന്റെ ജീവിതം എന്ന് എനിക്കു തന്നെ നിശ്ചയമില്ലായിരുന്നു. ദിവസങ്ങൾ മുന്നോട്ട് പൊയ്ക്കൊണ്ടിരുന്നു അഭിഏട്ടൻ ജോലിക്ക് പോയി തുടങ്ങിയിരുന്നു. ആ വീട്ടീൽ അഭിഏട്ടനൊഴികെ മറ്റെല്ലാവരും എന്നെ ഉൾകൊണ്ട് സ്നേഹിക്കാൻ തുടങ്ങിയിരുന്നു. അച്ഛനും അമ്മയും മകളെപ്പോലെ കണ്ട് സ്നേഹിച്ചു തുടങ്ങി. അച്ചുവേട്ടന് ഒരു കൂടെപ്പിറപ്പിനെ പോലെ ആയിരുന്നു ഞാൻ. കഴിവതും അഭിഏട്ടന്റെ മുന്നിൽ പെടാതെ ഞാൻ ആ വീട്ടിൽ കഴിഞ്ഞു. പതിയെ പതിയെ ഓരോ ദിവസങ്ങളായി കഴിഞ്ഞു പോയി ഇതിനിടയിൽ അച്ഛൻ ലീവ് കഴിഞ്ഞു തിരികെ പോയിരുന്നു.

അച്ചുവേട്ടൻ ലൈബ്രറിയിൽ നിന്നും കൊണ്ടുവരുന്ന ബുക്സ് ആയിരുന്നു എന്റെ ഏക ആശ്വാസം, കോളേജിലെ വിശേഷങ്ങളൊക്കെ എന്നോടു വന്നു പറയുമായിരുന്നു അച്ചുവേട്ടൻ അങ്ങനെയാണ് ജിതചേച്ചി അവരുടെ കോളേജിൽ ടീച്ചറായിട്ട് ജോയിൻ ചെയ്ത കാര്യം ഞാൻ അറിയുന്നത്. അതാവും ഇപ്പോൾ ഇങ്ങോട്ടൊന്നും വരാത്തത് കോളേജിൽ വച്ചുതന്നെ അഭിഏട്ടനെ കാണാല്ലോ, ജിതചേച്ചി വന്നില്ലെങ്കിലെന്താ പകരം അനിയൻ വരുന്നുണ്ടല്ലോ മനുഷ്യനെ ഭ്രാന്ത് പിടിപ്പിക്കാനായിട്ട്, ഒരു ഏട്ടന്റെ വൈഫിനോട് ഉള്ള സമീപനമല്ല എന്നോടുള്ളത്, ആരോടും ഒന്നും പറയാനും പറ്റില്ലല്ലോ ഏതു വരെ പോകുമെന്നു നോക്കട്ടേ ഇവൻ മിക്കവാറും എന്റെ കൈയ്യിൽ നിന്നും മേടിച്ചിട്ടേ പോകു എന്നാ തോന്നുന്നേ. അഭിഏട്ടനും ഇപ്പോൾ എല്ലാവരും ഉള്ളപ്പോൾ എന്നോട് ഭയങ്കര സ്നേഹമാണ് എന്തോ മനസ്സിൽ കണ്ടിട്ടുണ്ട് അല്ലാതെ ഇങ്ങനെയൊന്നും കാണിക്കില്ല. ആരും ഇല്ലാത്തപ്പോൾ എന്നെ തരം താഴ്ത്തുന്ന രീതിയിൽ ആക്ഷേപിക്കുകയും ചെയ്യുമായിരുന്നു.

അഭി ഏട്ടന്റെ അച്ഛന്റെ നിർദ്ധേശപ്രകാരം ഞാൻ അഭിഏട്ടൻ പഠിപ്പിക്കുന്ന കോളേജിൽ തന്നെ അഡ്മിഷൻ എടുത്തിരുന്നു. എല്ലാത്തിനും കൂടെ അച്ചുവേട്ടൻ ഉണ്ടായിരുന്നു. എനിക്കും വാശിയായി തുടങ്ങിയിരുന്നു എന്നെ അപമാനിച്ച അഭി ഏട്ടനു മുന്നിൽ തന്നെ വേണം എന്റെ പഠനം എന്നു. അന്നു രാത്രിയിൽ പതിവുപോലെ അഭിഏട്ടൻ എന്നോട് ഉടക്കാൻ വന്നു, കേട്ടു കേട്ടു ശീലമായതുകൊണ്ട് ഞാൻ മൈൻഡ് ചെയ്യാൻ പോകാറില്ലായിരുന്നു. "ഓ കെട്ടിലമ്മ ഇനി പഠിക്കാൻ പോകാത്തതിന്റെ കുറവു കൂടിയെ ഉള്ളു... " "ഏട്ടനു നഷ്ടമൊന്നുമില്ലല്ലോ ഞാൻ പഠിക്കാൻ പോകുന്നതു കൊണ്ട് " അല്ല പിന്നെ ക്ഷമിക്കുന്നതിനും ഒരു പരിധി ഇല്ലേ. "നീ എവിടെ വേണമെങ്കിലും അഴിഞ്ഞാടാൻ പൊയ്ക്കോ പക്ഷെ നീ എന്റെ ഭാര്യയാണെന്ന് ആരോടെങ്കിലും പറഞ്ഞാൽ നീ എന്റെ മറ്റൊരു മുഖം കാണും...." ഇതിൽ കൂടുതൽ ഇനി എന്ത് കാണാനാ എനിയ്ക്കും ദേഷ്യം വന്നു തുടങ്ങിയിരുന്നു. "എന്താടി നിന്നു പിറുപിറുക്കുന്നെ.... "

"ഞൻ ആരോടും പറയില്ല നിങ്ങളുടെ ഭാര്യയാണ് ഞാൻ എന്ന് അത് നിങ്ങളെ പേടിച്ചിട്ടല്ല, നിങ്ങളെ പോലൊരാളുടെ ഭാര്യയാണെന്നു പറയാൻ ഞാനും ഇഷ്ടപ്പെടുന്നില്ല താലി കെട്ടിയ പെണ്ണിനെ നോക്കാതെ ഇപ്പോഴും കാമുകിയുടെ പുറകേ പോകുന്ന നിങ്ങളും എനിക്ക് ഇപ്പോൾ അപമാനം തന്നെയാ, പിന്നെ അഴിഞ്ഞാടി നടക്കുന്നത് ഞാനല്ല നിങ്ങളുടെ കാമുകി ജിതയാണ്, അതുകൊണ്ടാണല്ലോ അവളിപ്പോഴും അഭി ഏട്ടന്റെ പുറകെ നടക്കുന്നത്..... " പറഞ്ഞു കഴിഞ്ഞതും അഭിഏട്ടന്റെ കൈ എന്റെ കവിളിൽ പതിഞ്ഞതും ഒരുമിച്ചായിരുന്നു. ഓ അവളെ പറഞ്ഞപ്പോൾ ഇഷ്ടപ്പെട്ടില്ലായിരിക്കും, ഒരു അടി കൊണ്ടാലെന്താ മനസ്സിലുള്ളത് പറയാൻ കഴിഞ്ഞല്ലോ, ഹോ എന്തൊരു അടിയാ ദുഷ്ടൻ അടിച്ചത് വേദനിച്ചിട്ട് വയ്യ പല്ലിളകിയെന്നാ തോന്നുന്നേ കണ്ണാടിയിൽ നോക്കിയപ്പോൾ ചുണ്ട് പൊട്ടിയിട്ടുണ്ട് വല്ലാത്തൊരു ദേഷ്യമാണ് എനിക്ക് അപ്പോൾ അഭിഏട്ടനോട് തോന്നിയത്. എന്നെ അടിച്ചിട്ട് റൂമിൽ നിന്ന് ഇറങ്ങിപ്പോയതാ കക്ഷി ഇതുവരെ വന്നില്ല ഞാൻ പതിയെ പുറത്തിറങ്ങി നോക്കി ഹാളിലെ സോഫയിൽ കിടപ്പുണ്ട്. ഞാൻ തിരികെ വന്നു എന്റെ സ്ഥിരം പ്ലേസായ തറയിൽ കിടന്നു.

പിറ്റേന്ന് എഴുന്നേറ്റപ്പോഴും കവിൾ നീലിച്ചു കിടന്നു. ദിവസങ്ങളോരോന്നായ് പൊയ്ക്കൊണ്ടിരുന്നു നാളെയാണ് എനിക്ക് ക്ലാസ് തുടങ്ങുന്നത് അഭിഏട്ടനോടൊപ്പം പോകാമെന്ന് അച്ഛൻ പറഞ്ഞെങ്കിലും, ബസ്സിനു പൊയ്ക്കൊള്ളം എന്നു ഞാൻ പറഞ്ഞു പിന്നെന്തോ അച്ഛൻ ഒന്നും പറഞ്ഞില്ല. അച്ചു ഏട്ടനോട് ചോദിച്ച് ഞാൻ ഇറങ്ങാനുള്ള സ്റ്റോപ്പിന്റെ പേരോക്കെ ഞാൻ നേരത്തേ മനസ്സിലാക്കിയിരുന്നു. അച്ഛനോടും അമ്മയോടും യാത്ര പറഞ്ഞ് ഞാൻ ഇറങ്ങാൻ തുടങ്ങവേ അച്ഛൻ എനിക്ക് കുറച്ച് ക്യാഷ് വെച്ചു നീട്ടി മോളിത് വച്ചോ എന്നു പറഞ്ഞു. വല്ലാത്തൊരു സന്തോഷമാണ് എനിക്കപ്പോൾ തോന്നിയത് പക്ഷേ ഞാനത് സ്നേഹത്തോടെ തന്നെ നിരസിച്ചു, " വേണ്ടച്ഛ പൈസയൊക്കെ എന്റേൽ ഉണ്ട്, എന്റെ അച്ഛൻ തിരികെ പോകുന്നതിനു മുന്നേ കുറച്ചു ക്യാഷ് എന്റെ പേരിൽ അക്കൗണ്ടിൽ ഇട്ടിരുന്നു ATM കാർഡും എടുത്തു തന്നിരുന്നു. ഇവിടെ എനിയ്ക്ക് ഒരു കുറവ് വരുമെന്ന് വച്ചിട്ടല്ല അച്ഛൻ അങ്ങനെ ചെയ്തെ..."

"ഞാനും നിന്റെ അച്ഛനല്ലേ" പിന്നെ ഞാൻ എതിർപ്പൊന്നും പറയാതെ അച്ഛൻ തന്ന പൈസ വാങ്ങിച്ചു അവരോട് യാത്ര പറഞ്ഞു ബസ്സ്റ്റോപ്പിലേക്ക് നടന്നു. ആദ്യം വന്ന ബസ്സിൽ തന്നെ ഞാൻ കയറി നല്ല തിരക്കുണ്ടായിരുന്നു അതിൽ അരമണിക്കൂർ യാത്രയുണ്ട് കോളേജിലേക്ക്. കോളേജ് സ്‌റ്റോപ്പിൽ ഇറങ്ങാൻ ഒത്തിരിപ്പേർ ഉണ്ടായിരുന്നു. റോഡിൽ നിന്നും കുറച്ചു ഉള്ളിലോട്ട് നടക്കണമായിരുന്നു കോളേജിലേക്ക്, ബസ്സിൽ നിന്നും ഇറങ്ങിയ കുട്ടികളോടൊപ്പം അവരിലൊരാളായി ഞാനും നടന്നു. എന്റെ ജീവിതത്തിലെ പ്രധാനപ്പെട്ട ഒരു വഴിത്തിരിവിന് ഈ കലാലയം സാക്ഷി ആവുമെന്നറിയാതെ.... ഗേറ്റിനു മുന്നിൽ തന്നെ അച്ചുവേട്ടനും വിമലും നിൽപ്പുണ്ടായിരുന്നു ഇരുവരും ഇവിടെ തന്നെ പി.ജിക്ക് ചേർന്നിരുന്നു. ആരെയോ പ്രതീക്ഷിച്ച പോലെയാണ് അച്ചുവേട്ടന്റെ നിൽപ്പെങ്കിൽ തന്നെ കടന്നു പോവുന്ന പെൺകുട്ടികളുടെ ലിസ്റ്റ് എടുക്കുവായിരുന്നു വിമൽ. ഞാൻ നടന്ന് അവരുടെ അടുത്തെത്തി അപ്പോഴാ അവർ എന്നെ കാണുന്നത് എന്നെ കണ്ടപ്പോൾ വിമലിന്റെ കണ്ണുകൾ വല്ലാതൊന്നു തിളങ്ങി വൃത്തികെട്ടവൻ ഞാൻ അവനെ മൈന്റ് ചെയ്യാൻ പോയില്ല

''ആരെ കാത്തു നിൽക്കുവാ " ഞാനൊരു ചിരിയോടെ അച്ചുവിനോട് ചോദിച്ചു "വേറാരേയാ നിന്നെ തന്നെ " "ഉവ്വ് ഞാൻ വിശ്വസിച്ചു" "വാ ഞാൻ ക്ലാസിലാക്കിത്തരാം " "മം" അച്ചു ഉള്ളതു കൊണ്ട് ക്ലാസ് കണ്ടു പിടിക്കാൻ ബുദ്ധിമുട്ടിയില്ല എന്നെ ക്ലാസിലാക്കിയിട്ട് അവർ തിരിച്ചു പോയി. ഞാൻ ക്ലാസിലേക്ക് കയറിയപ്പോൾ എല്ലാവരും പരസ്പരം പരിചയപ്പെടുന്ന തിരക്കിലായിരുന്നു, ഫസ്റ്റ് ബഞ്ച് ഉൾപ്പെടെ എല്ലാ ബഞ്ചും ഏറെകുറെ ഫുൾ ആയിരുന്നു പിന്നെ ബോയ്സിന്റെ സൈഡിലുള്ള ബാക്ക് ബഞ്ച് മാത്രമേ ഒഴിവുണ്ടായിരുന്നുള്ളു ഞാവിടെ ചെന്നിരുന്നു ഇപ്പോൾ എല്ലാവരുടേയും കണ്ണുകൾ എന്നിലാണ് ഒരു അത്ഭുത ജീവിയെ എന്ന പോലെയാ നോട്ടം ഇവിടിരുന്നാൽ ഇപ്പോൾ എന്താ കുഴപ്പം (എന്റെ ആത്മ).

ഞാൻ എല്ലാവരേയും നോക്കി ഒന്ന് ഇളിച്ചു കാണിച്ചു. ഇപ്പോൾ എന്റെ മനസ്സിൽ ഒരേ ഒരു ചിന്ത മാത്രമേ ഉള്ളു "ദൈവമേ ആ ജിതയും അഭിഏട്ടനും ഞങ്ങൾക്ക് പഠിപ്പിക്കാൻ ഉണ്ടാവല്ലേ എന്ന്....." ബെല്ലടിച്ച് കുറച്ചു കഴിഞ്ഞപ്പോൾ ഒരു ടീച്ചർ ക്ലാസിലേക്ക് വന്നു "ഹായ് സ്റ്റുഡൻസ്, ഞാൻ റിനു മാത്യു ഞാനാണ് നിങ്ങളുടെ ക്ലാസ് ടീച്ചർ". ടീച്ചർ എല്ലാവരുടേയും പേരോക്കെ ചോദിച്ചു പരിചയപ്പെട്ടു. ആദ്യത്തെ ദിവസം ആയതു കൊണ്ടു തന്നെ ഉച്ചവരെ മാത്രമേ ക്ലാസ് ഉണ്ടായിരുന്നുള്ളു. പിറ്റേന്നും ഞാൻ ബാക്ക് ബഞ്ചിൽ തന്നെയായിരുന്നു, ഒന്നു രണ്ടു കുട്ടികളൊക്കെ വന്നു എന്റെ പേരൊക്കെ ചോദിച്ചു പരിചയപ്പെട്ടു. ആദ്യത്തെ hour റിനു മിസ്സ് ആയിരുന്നു. അതു കഴിഞ്ഞ് ക്ലാസിലേയ്ക്ക് വന്ന ആളിനെക്കണ്ട് എന്റെ കണ്ണ് മിഴിഞ്ഞു പോയി.................. തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...