🔥🔥അഗ്നിയായി അവൾ🔥🔥 : ഭാഗം 8

എഴുത്തുകാരി: മിന്നു

അന്ന് തന്റെ മുന്നില് നെഞ്ച് പൊട്ടി കരയുന്ന പപ്പയുടെ മുഖം ഓർമ വന്നതും മിഴിയുടെ കണ്ണുകളിൽ സൂര്യയോടുള്ള പക ആളി കത്തുകയായിരുന്നു... സൂര്യയെ വെന്ത് വെണ്ണീറാക്കാൻ പാകത്തിലുള്ള പ്രതികാരാഗ്നി........ പപ്പയെ ഒന്ന് ആശ്വസിപ്പിച്ച് മിഴി മിത്രയെ ചെന്ന് കണ്ടു. ഇന്നലെ വരെ തന്നോട് ചിരിച്ചു സംസാരിച്ച മിത്രയാണ് ഇന്ന് ഒരു ചെറുവിരൽ പോലും അനക്കാൻ കഴിയാതെ... അവളുടെ ആ കിടപ്പ് മിഴിയ്ക്ക് കണ്ടിട്ട് സഹിക്കാനായില്ല... നെറ്റിയിൽ ചോര കല്ലിച്ചു കിടക്കുന്നതിൽ പതിയെ തലോടി... "അക്കീ... ആ... നോവണൂ...." പണ്ടെപ്പോഴോ അടുക്കളയില് പാചകപരീക്ഷണത്തിന് ഇടയിൽ കത്തികൊണ്ട് ചെറുതായൊന്ന് വിരൽ കോറിയപ്പോൾ ഒരു ദിവസം മുഴുവൻ ആ മുറിവും നോക്കി വിതുമ്പി കരഞ്ഞിരുന്ന മിത്രയുടെ ശബ്ദം കാതിൽ വന്നു പതിക്കുന്നതായി തോന്നി.... വേദനയോടെ മുഖം ചുളിച്ച് വീണ്ടും വീണ്ടും ആ മുറിവിലേക്ക് പതിയെ ഊതി കൊടുക്കുന്ന മിത്രയെ ഓർമ്മിച്ചെടുത്തു. ആ അവളാണ് ഇന്ന് മേല് മുഴുവൻ രക്തം ഒലിപ്പിച്ച് ഈ അവസ്ഥയിൽ.... എപ്പോഴും പുഞ്ചിരി തെളിഞ്ഞു നിന്ന ചുണ്ടിന്റെ ഒരു വശം പൊട്ടി രക്തം കട്ട പിടിച്ചിട്ടുണ്ട്... കഴുത്തിൽ പല്ലുകൾ ആഴ്ന്നിറങ്ങിയ പാട് തെളിഞ്ഞു കാണാം...

കൈയിലും കാലിലും ഒക്കെ അങ്ങിങ്ങായി രക്തം പൊടിഞ്ഞ് നീര് വച്ചിട്ടുണ്ട്... എന്നാൽ ഇതിനേക്കാൾ ഒക്കെ ആഴത്തിൽ മിത്രയുടെ മനസ്സിൽ മുറിവ് പറ്റിയിട്ടുണ്ടെന്ന് മിഴിയ്ക്ക് നിശ്ചയമായിരുന്നു. മിത്രയുടെ ആ അവസ്ഥ കണ്ട് അവളെക്കാൾ ഏറെ മിഴിയുടെ മനസ്സ് നീറി. എപ്പോഴും തന്നെ കാണുമ്പോൾ തന്നെ ചുറ്റി വരിയുന്ന കൈകൾ അനക്കമില്ലാതെ കിടക്കുന്നത് കണ്ടപ്പോൾ കൺകോണിൽ നിന്നും കണ്ണുനീർ കവിളിലേക്ക് ഒലിച്ചിറങ്ങി. പുറം കൈ കൊണ്ട് ആ നീർമണിയെ തുടച്ച് മാറ്റി അവൾ മിത്രയുടെ കൈകൾ തന്റെ കൈക്കുമ്പിളിൽ പൊതിഞ്ഞു പിടിച്ചു. തനിച്ചാകില്ല... കൂടെ ഉണ്ടെന്ന് പറയും പോലെ.... മിത്രയ്ക്ക് ഇപ്പോൾ ചലിക്കാൻ കഴിയില്ല എന്ന യാഥാർത്ഥ്യത്തോട് അവരെല്ലാം പൊരുത്തപ്പെടാൻ ശ്രമിക്കുകയായിരുന്നു. ഡോക്ടറെ കണ്ട് മിത്രയുടെ കാര്യങ്ങൾ കൂടുതലായി ചോദിച്ചു മനസ്സിലാക്കി. ശരീരത്തേക്കാൾ ആ തളർച്ച അവളുടെ മനസ്സിനെയാണ് ബാധിച്ചിരിക്കുന്നത്. തന്റെ ഈ അവസ്ഥയിൽ നിന്നും പഴയ ജീവിതത്തിലേക്ക് തിരിച്ചു വരണമെന്ന് എത്രമാത്രം അവൾ ആഗ്രഹിക്കുന്നുവോ അത്രമാത്രം റിക്കവർ ചെയ്യാനുള്ള ചാൻസും കൂടും...

അവളുടെ ഒരു വിരൽത്തുമ്പെങ്കില്ലും ചലിച്ചു കിട്ടിയാൽ അവളെ ജീവിതത്തിലേക്ക് മടക്കി കൊണ്ട് വരാൻ കഴിയുമെന്ന് ഡോക്ടർ പറഞ്ഞതോടെ അസ്തമിച്ച പ്രതീക്ഷകൾക്ക് ഒക്കെ വീണ്ടും ജീവൻ വച്ചു തുടങ്ങി. പിന്നീടുള്ള നീണ്ട ആറുമാസം അതിനുള്ള ശ്രമത്തിലായിരുന്നു അവർ എല്ലാവരും... മിത്രയുടെ ഇടംവലം നിന്ന് അവരെല്ലാവരും പരിചരിച്ചു. അവൾക്ക് ഇഷ്ടപ്പെട്ട പാട്ടുകളും മൂവീസും ഏതുസമയവും മുറിയിൽ പ്ലേ ചെയ്തു കൊണ്ടിരിക്കും . ചെറുപ്പത്തിലെ അവളുടെ കുസൃതികളും കുരുത്തക്കേടുകളും മറ്റും പറഞ്ഞ് അവളെ എപ്പോഴും സന്തോഷമായി ഇരിക്കാൻ ഓരോരുത്തരും പ്രത്യേകം ശ്രദ്ധിച്ചിരുന്നു. എന്നാൽ അതൊന്നും അവളിൽ കാര്യമായ മാറ്റങ്ങൾ ഒന്നും ഉണ്ടാക്കിയില്ല. ഒരു ദിവസം മിഴി മിത്രയുടെ അടുത്തിരുന്ന് ഫോണിൽ എന്തൊക്കെയോ കാണിച്ചു കൊടുക്കുകയായിരുന്നു. അപ്പോഴാണ് അവിചാരിതമായി സൂര്യയ്ക്ക് യൂത്ത് എന്റർപ്രൈസസ് പുരസ്കാരം ലഭിച്ച വാർത്ത കണ്ടത്.

ഒപ്പം സന്തോഷത്തോടെ മൊമെന്റോ ഉയർത്തി നിൽക്കുന്ന അവന്റെ ഫോട്ടോയും... അത്രയും നേരം മിഴിയുടെ ചുണ്ടിൽ ഉണ്ടായിരുന്ന പുഞ്ചിരി മാഞ്ഞു. ഉയരങ്ങളിൽ എത്തിയതിന്റെ സന്തോഷത്തോടെ നിൽക്കുന്ന സൂര്യയുടെ മുഖവും തളർന്ന് കിടക്കുന്ന മിത്രയുടെ മുഖവും ഒരേസമയം മിഴിയുടെ മനസ്സിൽ തെളിഞ്ഞു നിന്നു. സങ്കടം... ദേഷ്യം... അതിൽ നിന്നും പക... മനസ്സിൽ ആളിക്കത്തുന്ന പക... മിത്രയുടെ ഈ അവസ്ഥയിൽ മറ്റെല്ലാം മറന്നിരിക്കുവായിരുന്നു. ഇപ്പോ തന്റെ മിത്രയെ വേദനിപ്പിച്ചവൻ സന്തോഷിച്ച് നടക്കുന്നത് ആലോചിച്ചപ്പോൾ ഭ്രാന്ത് പിടിപ്പിക്കുന്നത് പോലെ തോന്നി മിഴിയ്ക്ക്... അപ്പോൾ അവളുടെ മനസ്സിൽ പക മാത്രമായിരുന്നു തന്റെ മിത്രയെ വേദനിപ്പിച്ചവനെ ഇഞ്ചിഞ്ചായി ഇല്ലാതാക്കാനുള്ള പക..... അന്ന് തുടങ്ങി അവനെ കുറിച്ചുള്ള അന്വേഷണം... മിത്രയുടെ ഈ അവസ്ഥയ്ക്ക് കാരണം അവൻ തന്നെയാണോ എന്നായിരുന്നു അവൾ ആദ്യം അന്വേഷിച്ചത്. അന്ന് എല്ലാവരും മിത്രയെ അവസാനമായി കണ്ടത് സൂര്യയോടൊപ്പമാണ്. അന്ന് ആ ഗസ്റ്റ് ഹൗസിൽ മിത്രയും സൂര്യയും മാത്രമേ ഉണ്ടായിരുന്നുള്ളൂ എന്ന് സെക്യൂരിറ്റി ഗാർഡ് ഉറപ്പ് പറഞ്ഞു.

അന്ന് സൂര്യയാണ് അയാളെ നിർബന്ധിച്ച് വീട്ടിലേക്ക് പറഞ്ഞയച്ചത്. പോരാത്തതിന് മിത്രയ്ക്ക് റോഡിൽ ആക്സിഡന്റ് നടത്തിന്റെ കുറച്ചു മുമ്പ് സൂര്യയുടെ കാർ അതിവേഗം ആ വഴിയിലൂടെ പാഞ്ഞ് പോയത് കണ്ട ആൾക്കാരുണ്ട്. പോലീസിൽ നിന്നും അറിയാൻ കഴിഞ്ഞത് ഉന്നതരുടെ ഇടപെടലുകൾ കൊണ്ടാണ് അന്ന് മിത്രയുടെ കേസ് ക്ലോസ് ചെയ്തത് എന്നായിരുന്നു. സൂര്യ പോലീസിന് കൈമടക്ക് കൊടുത്ത് കേസ് ഒതുക്കി തീർക്കുന്നത് പപ്പ നേരിട്ട് കണ്ടതാണല്ലോ... തെറ്റൊന്നും ചെയ്യാത്തിട്ടില്ലെങ്കിൽ അന്ന് സൂര്യ എന്തിനത് ചെയ്തു??? പിന്നീടുള്ള ഓരോ ദിവസവും സൂര്യയുടെ എങ്ങനെ ഇല്ലാതാക്കാം എന്ന ചിന്തയോടെ ആയിരുന്നു മിഴിയുടെ ഓരോ ദിവസവും തുടങ്ങിയത്. മിത്ര പറഞ്ഞറിഞ്ഞ സൂര്യയുടെ ഇഷ്ടങ്ങൾ ഓർമ്മിച്ചെടുത്തു. കവിതകൾ അവന് ഇഷ്ടമാണെന്ന് ഉള്ളത് കൊണ്ട് അത് തന്നെ തിരഞ്ഞെടുത്തു.. പണ്ടെപ്പോഴോ ചെറുതായി എഴുതിയിരുന്നത് കൊണ്ട് അതായിരുന്നു എളുപ്പവും...

മനപ്പൂർവം അവനുമായി ഒരു ബന്ധം സ്ഥാപിച്ച് എടുക്കുകയായിരുന്നു. പ്രണയം തന്നെ ആയുധമാക്കി. ചതിക്ക് ചതി... മിത്രയെ തളർത്തി കിടത്തിയെങ്കിൽ അവനെ എന്നന്നേക്കുമായി ഉറക്കി കിടത്തുമെന്ന് തീരുമാനമെടുത്തു. പീന്നിടുള്ള ഓരോ ദിവസവും അവനെ ചതിക്കാനുള്ള വഴികൾ മാത്രമായിരുന്നു മിഴിയുടെ ചിന്ത.. പപ്പയും അമ്മയും അറിഞ്ഞാൽ സമ്മതിക്കില്ലെന്ന് ഉറപ്പായിരുന്നു. ആരെയും ഒന്നും അറിയിച്ചില്ല... അവനോടുള്ള തന്റെ പ്രതികാരം ഒറ്റയ്ക്ക് വീട്ടണമെന്ന് അവൾക്ക് നിർബന്ധമായിരുന്നു... 🔥🔥 "മിഴീ........." ഡോറിന് കൊട്ടി കൊണ്ടുള്ള സൂര്യയുടെ വിളി കേട്ടപ്പോഴാണ് മിഴി ചിന്തകളിൽ നിന്നും ഉണർന്നത്............... തുടരും......

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...