💞എൻ്റെ ആത്മസഖിക്ക്💞 ഭാഗം 57

എഴുത്തുകാരി: അപർണ അരവിന്ദ്

വൈകുന്നേരത്തോടു കൂടി തന്നെ എല്ലാവരും വീട്ടിൽ എത്തി. വീട്ടിൽ എത്തിയതും രുദ്രൻ എന്തൊക്കെയോ വർക്കുകൾ ഉള്ളതിനാൽ ലാപ്ടോപ്പുമായി ഓഫീസ് മുറിയിലേക്ക് കയറി. അപ്പുവും ഗായുവും അമ്മയുടെ പിന്നാലെ തന്നെ നടന്ന് തറവാട്ടിലെ വിശേഷങ്ങൾ പറഞ്ഞ് നടക്കുകയാണ്. "അമ്മേ എന്നേ എടുക്കോ" പവി അപ്പുവിനോട് കൊഞ്ചി കൊണ്ട് ചോദിച്ചു. "ഓഹ് പിന്നെ പെണ്ണ് വെറുതെ കിണുങ്ങുകയാണ്. അവളെ നീ എടുക്കണ്ട അപ്പു " ഗായത്രി പവിയെ ദേഷ്യം പിടിപ്പിക്കാനായി പറഞ്ഞു എങ്കിലും പവി പതിവിന് വിപരീതമായി ഒന്നും മിണ്ടാതെ അപ്പുവിനെ കെട്ടിപിടിച്ച് നിൽക്കുകയാണ് ചെയ്യ്തത്. "അമ്മടെ പൊന്നിന് എന്താ വയ്യേ. ഉറക്കം വരുന്നുണ്ടോ " പവിയെ എടുത്ത് അവളുടെ നെറുകയിൽ ഉമ്മ വച്ച് കൊണ്ട് അപ്പു ചോദിച്ചു. " ഉം "പവി അപ്പുവിൻ്റെ മാറിൽ തല വച്ച് കിടന്നു കൊണ്ട് മൂളി. ** രാത്രി വീട്ടിൽ എല്ലാവരും ഭക്ഷണം കഴിക്കാൻ ഇരിക്കുകയാണ്. എല്ലാവർക്കും അമ്മ ഭക്ഷണം വിളമ്പുന്നുണ്ട്.

അപ്പു ആണ് രുദ്രന് ഭക്ഷണം വിളമ്പി കൊടുക്കുന്നത്. രുദ്രൻ അപ്പുവിനെ തന്നെ ഇടക്ക് ഇടക്ക് നോക്കുന്നുണ്ടെങ്കിലും അവൾ രുദ്രനെ മൈൻഡ് ചെയ്യുന്നില്ല . രുദ്രൻ പതിയെ മേശക്കടിയിലൂടെ അപ്പുവിൻ്റെ കാലിൽ തൻ്റെ കാല് കൊണ്ട് ഒന്ന് ഉരസി . കാലിലൂടെ എന്തോ അരിക്കുകയാണെന്ന് കരുതി അപ്പു കാല് കുടഞ്ഞു കൊണ്ട് നീങ്ങി നിന്നു . അപ്പുവിൻ്റെ മുഖത്ത് പ്രത്യേകിച്ച് ഭാവവ്യത്യാസവും കാണാഞ്ഞതിനാൽ അപ്പുവിൻ്റെ കാലിൽ ഒരു വട്ടം കൂടി രുദ്രൻ തട്ടി. പെട്ടെന്ന് താഴേക്ക് നോക്കിയ അപ്പു കാണുന്നത് ഒരു കള്ള ചിരിയോടെ തന്നെ നോക്കുന്ന രുദ്രനെ ആണ്. രുദ്രനെ ഒന്ന് കണ്ണ് ഇരുട്ടി നോക്കിയ ശേഷം അപ്പു അവൻ്റെ അരികിൽ നിന്നും കുറച്ച് നീങ്ങി നിന്നു. എന്നാൽ രുദ്രൻ കാൽ എത്തിച്ചു കൊണ്ട് വീണ്ടും അപ്പുവിൻ്റെ കാലിൽ തട്ടി. അപ്പു രുദ്രനെ നോക്കി ഒന്ന് ചിരിച്ച് രുദ്രൻ്റെ അരികിലേക്ക് നീങ്ങി നിന്നു. ശേഷം അവൻ്റെ കൈയ്യിൽ അമർത്തി നുള്ളി. രുദ്രൻ വേദന കൊണ്ട് പുളഞ്ഞു. അവൾ നുള്ളിയ ഭാഗം നീറി പുകഞ്ഞു.രുദ്രന് നന്നായി വേദനിച്ചെങ്കിലും അവൻ അത് മുഖത്ത് പ്രകടിപ്പിക്കാതെ ഇരുന്നു.

" രുദ്രാ " മഹാദേവൻ്റെ വിളി കേട്ട് അപ്പു രുദ്രൻ്റെ കൈയ്യിലെ പിടി വിട്ടു. ''എന്താ ഡാഡ് '' രുദ്രൻ ആരും കാണാതെ കൈ തടവി കൊണ്ട് ചോദിച്ചു. "നാളെയാണ് നിങ്ങൾ മുബൈക്ക് പോവുന്നത്. നാളെ നെറ്റ് 8 മണിക്കാണ് ഫ്ലയ്റ്റ്" . " ശരി ഡാഡ് " രുദ്രൻ തല കുലുക്കി കൊണ്ട് ഭക്ഷണം കഴിച്ച് എഴുന്നേറ്റു. അപ്പുവിനെ നോക്കി ഒരു കള്ള ചിരി ചിരിച്ച ശേഷം അവൻ മുകളിലേക്ക് നടന്നു. ** രാത്രി ഭക്ഷണം ഒക്കെ കഴിച്ചതിനു ശേഷം അപ്പുവും ഗായുവും ഹാളിൽ വർത്തമാനം പറയുകയാണ്. പവി അപ്പുവിൻ്റെ മടിയിൽ കിടന്ന് ഉറങ്ങിയിരുന്നു. "ഗായു നീ നാളെ ഞങ്ങളുടെ ഒപ്പം വരുന്നോ " ''എയ് ഞാൻ ഒന്നും ഇല്ല. എനിക്ക് നാളെ കോളേജ് ഉണ്ട് " " ഇത് എന്ത് അത്ഭുതം .ഞാൻ എങ്ങോട്ട് പോയാലും എൻ്റെ വാല് പോലെ വരുന്ന നീ വരുന്നില്ല എന്നോ. " അപ്പു അത്ഭുതത്തോടെ ചോദിച്ചു. " അത്. അതെനിക്ക് വരാൻ താൽപര്യം ഇല്ല '' ഗായു തല താഴ്ത്തി കൊണ്ട് പറഞ്ഞു. "അതെന്താ എൻ്റെ ഗായൂട്ടിക്ക് താൽപര്യം ഇല്ലാത്തെ " ഗായുവിൻ്റെ താടി പിടിച്ച് മുഖം ഉയർത്തി കൊണ്ട് അപ്പു ചോദിച്ചു.

''അത് .അത് പിന്നെ അമ്മയും ഡാഡിയും എന്നോട്ട് മുൻകൂട്ടി പറഞ്ഞിരുന്നു. നിങ്ങളുടെ ഒപ്പം വരണമെന്ന് പറഞ്ഞ് വാശി പിടിക്കരുത് എന്ന് " . ''ഞാൻ അമ്മയോട് സംസാരിക്കാം. നീ ഞങ്ങളുടെ ഒപ്പം വായോ" " വേണ്ടാ ടീ .ഡാഡിയും അമ്മയും പറഞ്ഞതാണ് ശരി. എട്ടൻ്റെ മമ്മിയുടെ വീട്ടിൽ ഞാൻ ആരാണ് എന്ന് പറഞ്ഞാ ചെന്ന് കയറുക. അത് ശരിയാവില്ല.ഞാൻ വരുന്നില്ല: . പക്ഷേ നിന്നേ ഒരാഴ്ച്ച കാണാതെ ഇരിക്കണം എന്ന് ആലോചിക്കുമ്പോൾ എന്തോ ഒരു സങ്കടം" ഗായു നിറ കണ്ണുകളോടെ അപ്പുവിനെ കെട്ടിപിടിച്ചു. '' ഇതായിരുന്നോ കാര്യം. ഞാൻ വിചാരിച്ചു നിൻ്റെ അലോക്ക് സാറിനെ കാണാതെ ഇരിക്കാൻ പറ്റാത്തതു കൊണ്ട് ആണ് നീ എൻ്റെ കൂടെ വരാത്തത് എന്ന് " അപ്പു ഗായുവിനെ കളിയാക്കി കൊണ്ട് പറഞ്ഞു. "ഒന്ന് പോടി അവിടുന്ന്. അയാൾ ആരാ എൻ്റെ കെട്ടിയോൻ ആണോ കാണാതിരിക്കുമ്പോൾ സങ്കടം വരാൻ " " ആർക്കറിയാം. ഇനി ചിലപ്പോൾ കെട്ടിയോൻ ആയി കൂടാ എന്നോന്നും അറിയില്ല "

" അപ്പു നിനക്ക് എന്നേ കളിയാക്കൽ കുറച്ച് കൂടിയിട്ടുണ്ട് ട്ടോ. നോക്കിക്കോ നീ ആ ഹിന്ദിക്കാരുടെ ഇടയിൽ പോയി അവർ പറയുന്നതൊന്നും മനസിലാവാതെ പെട്ട് തിരിയും. അപ്പോ നീ എന്നേ വിളിക്കും ഗായൂ ഈ വാക്കിൻ്റെ ഹിന്ദി ഒന്ന് പറഞ്ഞു തരുമോ എന്ന് ചോദിച്ചു കൊണ്ട്. നീ നോക്കിക്കോ അപ്പു " ഗായത്രി വിരൽ ഞൊടിച്ച് കൊണ്ട് പറഞ്ഞു. " അതിന് നിനക്ക് ഹിന്ദി അറിയോ ''അപ്പു സംശയത്തോടെ ചോദിച്ചു. "പിന്നെ അറിയാതെ. തുമാരാ നാം ക്യാ ഹേ,മേരാ നാം ഗായത്രി ഹേ " " ഇത് മാത്രമല്ലേ അറിയുള്ളു. അല്ലാതെ വേറെ ഒന്നും അറിയില്ലാ ലോ" അപ്പു ഗായുവിനെ കളിയാക്കി കൊണ്ട് ചോദിച്ചു. " ഞാൻ ഇപ്പോ പറഞ്ഞതെന്താ ഹിന്ദിയില്ലേ." ഗായു സോഫയിൽ നിന്നും എഴുന്നേറ്റ് ചോദിച്ചു കൊണ്ട് നൈസ് ആയി റൂമിലേക്ക് പോയി. ഗായു മുങ്ങിയതാണ് എന്ന് മനസിലായതും അപ്പു ഉറങ്ങുന്ന പവിയെ എടുത്ത് മുറിയിലേക്ക് നടന്നു. മുറിയിൽ എത്തിയ അപ്പു രുദ്രനെ മുറിയിൽ നോക്കിയെങ്കിലും അവിടെ എവിടേയും കാണാൻ ഇല്ല.

അവൾ പവിയെ ബെഡിൽ കിടത്തിയ ശേഷം ഫ്രഷ് ആവാനായി ബാത്ത് റൂമിലേക്ക് കയറി. അപ്പു ബാത്ത് റൂമിൽ നിന്ന് ഇറങ്ങിയതും രുദ്രൻ ബാൽക്കണിയിൽ നിന്നും ഫോണിൽ സംസാരിച്ച് കൊണ്ട് റൂമിനകത്തേക്ക് വന്നതും ഒരുമിച്ചായിരുന്നു. അപ്പുവിനെ കണ്ടതും രുദ്രൻ ഫോൺ ഓഫ് ചെയ്യ്ത് മേശക്ക് മുകളിൽ വച്ച് പതിയെ ഒരു കള്ള ചിരിയോടെ അപ്പുവിൻ്റെ അരികിലേക്ക് നടന്നു വന്നു. രുദ്രൻ്റെ വരവ് കണ്ട് അപ്പുവിൻ്റെ ഹൃദയമിടിപ്പ് വർദ്ധിക്കുന്നുണ്ട്. പക്ഷേ അവൾ അത് മുഖത്ത് പ്രകടിപ്പിക്കാതെ തന്നെ നിന്നു. രുദ്രൻ അവളുടെ അരികിലേക്ക് വരുന്തോറും അപ്പു പതിയെ പിന്നിലേക്ക് പോവാൻ തുടങ്ങി.അവസാനം അവൾ ചുമരിൽ തട്ടി നിന്നു. രുദ്രൻ്റെ നിശ്വാസം അവളുടെ മുഖത്ത് പതിച്ചതും അവളുടെ മുഖം നാണത്താൽ കുനിഞ്ഞു. "പാറു " അവളുടെ കാതുകളിൽ അവൻ ആർദ്രമായി വിളിച്ചു. " ഉം " അവൾ തല താഴ്ത്തി കൊണ്ട് തന്നെ വിളി കേട്ടു ....തുടരും.......................

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...