💕കാണാച്ചരട് 💕: ഭാഗം 20

രചന: RAFEENA MUJEEB

" ഓ രക്ഷകൻ എത്തിയോ..? ഈ വരവ് ഞാൻ പ്രതീക്ഷിച്ചു, ഇത്തിരി വൈകിയോ എന്നൊരു സംശയം...? തന്നെ രൂക്ഷമായി നോക്കുന്ന അനിരുദ്ധൻ സാറെ പരിഹസിച്ചുകൊണ്ട് സി ഐ അശോകൻ ചോദിച്ചു. ഞാനെന്ന രക്ഷകനെ കുറിച്ച് നീ നന്നായി സ്റ്റഡി ചെയ്തിട്ടുണ്ട് എന്ന് എനിക്ക് മനസ്സിലായി, അല്ലെങ്കിൽ നീ ആർക്കുവേണ്ടിയാണോ കുരക്കുന്നത് അവർ പറഞ്ഞു തന്നിട്ടുണ്ടാവും അല്ലാതെ നീ എന്നെ ഇത്രത്തോളം പ്രതീക്ഷിച്ചു നിൽക്കില്ല. അനിരുദ്ധനും അതേ സ്വരത്തിൽ തന്നെ മറുപടി നൽകി. നിങ്ങളെ കുറിച്ച് എനിക്ക് ആരെങ്കിലും പറഞ്ഞു തന്നിട്ടു വേണോ അറിയാൻ മിസ്റ്റർ അനിരുദ്ധൻ, കോടതിയിലെ ഗർജിക്കുന്ന സിംഹം, ഏറ്റെടുത്ത കേസുകളെല്ലാം നിഷ്പ്രയാസം വിജയിപ്പിച്ചയാൾ, ഗിരിയുടെ എല്ലാ തോന്നിവാസത്തിനും കൂട്ടുനിന്നു അയാളെ ഇതുവരെ നിയമത്തിന്റെ പിടിയിൽ നിന്നും രക്ഷിച്ചയാൾ, നിങ്ങൾ ഇതുവരെ അയാളെ രക്ഷിച്ചിട്ടുണ്ടാവും എന്നാൽ ഈ കേസിൽ നിന്നും ഗിരി രക്ഷപ്പെടില്ല അയാൾ ഒരു പുഞ്ചിരിയോടെ പറഞ്ഞു.

ഓഹോ അത്രയ്ക്ക് കോൺഫിഡൻസ് ആണോ...? എങ്കിൽ നമുക്കൊന്ന് കാണാം. നിങ്ങൾ ആരോട് ചോദിച്ചിട്ടാണ് കസ്റ്റഡിയിലിരിക്കുന്ന പ്രതിയെ ഇത്ര ക്രൂരമായി മർദ്ദിച്ചത്,...? ഗിരിയുടെ ദേഹത്തെ പാടുകളിലേക്ക് നോക്കി അനിരുദ്ധൻ ദേഷ്യത്തോടെ ചോദിച്ചു. അതൊക്കെ ഞങ്ങൾ പറയേണ്ടിടത്ത് പറഞ്ഞോളാം, താങ്കളെ ബോധിപ്പിക്കേണ്ട ആവശ്യമില്ല മിസ്റ്റർ അനിരുദ്ധൻ. ആരു പറഞ്ഞു എന്നെ ബോധിപ്പിക്കേണ്ട ആവശ്യമില്ല എന്ന്...? എന്റെ കക്ഷിയെ ഈ പോലീസ് സ്റ്റേഷനിലിട്ട് ദേഹോപദ്രവം ചെയ്താൽ അവന്റെ വക്കീൽ എന്ന നിലയ്ക്ക് എനിക്ക് അറിയേണ്ട കാര്യമുണ്ട് മിസ്റ്റർ അശോകൻ, താങ്കൾ നിയമം എന്നെ പഠിപ്പിക്കുകയാണോ....? ഞാനാരെയും നിയമം പഠിപ്പിക്കാൻ വന്നിട്ടില്ല, പോലീസ് സ്റ്റേഷനിൽ വന്ന് പോലീസുകാരെ ദേഹോപദ്രവം ചെയ്താൽ തിരിച്ചും ചെയ്തന്നൊക്കെ വരും അത് ചോദ്യം ചെയ്യാൻ ആരും വരണ്ട. താങ്കളെ ചോദ്യം ചെയ്യാൻ ഞാൻ വരുന്നില്ല, എന്റെ കക്ഷിയെ എനിക്ക് ജാമ്യത്തിലിറക്കണം നമുക്ക് അതിനുള്ള നിയമ നടപടികൾ സ്വീകരിക്കാം.

സോറി മിസ്റ്റർ അനിരുദ്ധൻ, ഇയാളെ ഇപ്പോൾ ജാമ്യത്തിൽ വിടാൻ സാധ്യമല്ല, ഞങ്ങൾ കേസ് രജിസ്റ്റർ ചെയ്തിട്ടുണ്ട് അതുകൊണ്ട് തന്നെ ഇനി കോടതിയിൽ നിന്ന് ജാമ്യം കിട്ടുകയുള്ളൂ, അവിടെനിന്നും ഊരിപ്പോരാൻ സാധിക്കാത്തവിധം കേസ് ഞാൻ മുറുക്കി കൊള്ളാം അയാൾ ഒരു വളിച്ച ചിരിയോടെ പറഞ്ഞു. ഓഹോ ഇപ്പോൾ എല്ലാം മുൻകൂട്ടി തയ്യാറാക്കിയ തിരക്കഥ ആണല്ലേ..? ജാമ്യം കിട്ടുമോ ഇല്ലയോ അത് നിങ്ങൾ തീരുമാനിക്കേണ്ട, ആയിരം കുറ്റവാളികൾ സംരക്ഷിക്കപ്പെട്ടാലും ഒരു നിരപരാധി പോലും ശിക്ഷിക്കപ്പെടരുത് എന്നാണ്, ഗിരി നിരപരാധിയാണെന്ന് എനിക്കും നിങ്ങൾക്കും പകലുപോലെയറിയാം, ജീവിച്ചിരിപ്പുണ്ടെങ്കിൽ ഗിരിയെ ഞാൻ ജാമ്യത്തിൽ ഇറക്കും. കാണാം നമുക്ക്, ഒരു പരിഹാസത്തോടെ തന്നെ അനിരുദ്ധനെ നോക്കി അശോകൻ പറഞ്ഞു. നീ വിഷമിക്കേണ്ട കോടതി കൂടുന്ന അന്ന് നിന്നെ ഞാൻ ജാമ്യത്തിലിറക്കിയിരിക്കും.. എനിക്ക് ആ കാര്യത്തിൽ ഒരു സംശയവും ഇല്ല സാർ, എനിക്ക് സങ്കടം ഇയാളുടെ കാര്യം ഓർത്താണ്, പോകുന്ന വഴിക്ക് സാർ ഇയാളുടെ ആരോഗ്യത്തിനു വേണ്ടി ഒന്നു പ്രാർത്ഥിക്കണേ.....

അത് പിന്നെ നീ പ്രത്യേകം പറയണോ...? ഇയാൾക്ക് കേടുപാട് ഒന്നും പറ്റാതെ സുരക്ഷിതനായി ജീവിക്കാനുള്ള അവസരം ദൈവം കൊടുത്താൽ മതിയായിരുന്നു.. അശോകനെ നോക്കി അനിരുദ്ധൻ ഒരു പുഞ്ചിരിയോടെ പറഞ്ഞു. ഗിരിയെ ഒന്നു നോക്കി അനിരുദ്ധൻ അവിടെനിന്നും ഇറങ്ങി. പകുതി വഴിയിൽ എത്തിയതും എന്തോ ഓർത്തിട്ടെന്നപോലെ അദ്ദേഹം തിരിച്ചുവന്നു. താങ്കളോടുള്ള സ്നേഹം കൊണ്ട് പറയുകയാണ്, ഇനി ഇവന്റെ ദേഹത്ത് കൈ വെച്ചാൽ അതിന്റെ നൂറിരട്ടി തിരിച്ചു കിട്ടുമെന്ന് ഓർത്തുകൊണ്ട് മാത്രം കൈ വെക്കുക, അല്ലാത്തപക്ഷം ഖേദിക്കേണ്ടി വരും, അപ്പോ വരട്ടെ, കോടതിയിൽ വെച്ച് പാക്കലാം അദ്ദേഹത്തിന്റെ കോൺഫിഡൻസോടെയുള്ള സംസാരം അശോകനിൽ ഒരു ചെറിയ ഭയം ഉണ്ടാക്കി. ഗിരിയെ ദേഷ്യത്തോടെ നോക്കി, സെല്ല് പൂട്ടി അദ്ദേഹം തന്റെ റൂമിലേക്ക് പോയി. ****************

ദേവ അനിരുദ്ധൻ സാറ് ഗിരിയെ യും കൂട്ടി വരുന്നതും നോക്കിയിരിക്കുകയാണ്. പുറത്ത് അദ്ദേഹത്തിന്റെ കാർ വന്നു നിന്നതും അവൾ ഓടി വന്നു. കാറിൽനിന്ന് അനിരുദ്ധൻ തനിയെ ഇറങ്ങി വരുന്നത് കണ്ട് അവൾ അദ്ദേഹത്തെ സംശയത്തോടെ നോക്കി. അവന്റെ പേരിൽ കേസ് രജിസ്റ്റർ ചെയ്തതുകൊണ്ട് ജാമ്യം ലഭിക്കില്ല ഇനി കോടതിയിൽ നിന്നേ ജാമ്യം ലഭിക്കൂ.. സാറ് പറയുന്നത് കേട്ടതും ദേവയുടെ മുഖത്ത് നിരാശ പടർന്നു. ഒരു തെറ്റും ചെയ്യാത്ത ആളെ എന്തിനാ അങ്കിളേ വെറുതെ ജയിലിൽ പിടിച്ചിട്ടിരിക്കുന്നത്...,? അവൾ നിരാശയോടെ ചോദിച്ചു. മോള് വിഷമിക്കേണ്ട അവനെ ഞാൻ അധികം താമസിയാതെ കുറ്റവിമുക്തൻ ആക്കും അതോർത്ത് മോള് വിഷമിക്കേണ്ട. അവളെ സമാധാനിപ്പിച്ച് അവളോട് യാത്ര പറഞ്ഞു അനിരുദ്ധൻ അവിടെനിന്നും ഇറങ്ങി. °°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°° ഗിരിയേട്ടൻ ഒരിക്കലും ഇങ്ങനെ ചെയ്യില്ല, അങ്ങനെ ഒരു അക്രമവും ഇതുവരെ ഗിരീയേട്ടൻ ചെയ്തിട്ടുമില്ല. നീയെന്താ ദേവാ എന്നിട്ടും ഒന്നും പ്രതികരിക്കാതെ നിൽക്കുന്നത്...? നിനക്ക് ആ കേസ് പിൻവലിക്കാനുള്ള അധികാരം ഇല്ലേ..? ഗിരിയേട്ടനെ എങ്ങനെയെങ്കിലും രക്ഷിച്ചു കൂടെ...? ആരോഹി ദേവയോട് ചോദിച്ചു. എനിക്ക് ഈ കാര്യത്തിൽ ഒന്നും ചെയ്യാനില്ല,

ഗിരിയേട്ടനെ അങ്കിൾ ഇറക്കി കൊണ്ടു വരും നീ ആ കാര്യം ഓർത്ത് വിഷമിക്കേണ്ട. എന്റെ അച്ഛനെ ആരെങ്കിലും കൊന്നതാണെങ്കിൽ അവരെ നിയമത്തിന് മുന്നിൽ കൊണ്ടുവരാൻ ഞാൻ മുൻപന്തിയിൽ ഉണ്ടാവും. എന്നെ അനാഥായാക്കിയവരെ ദൈവം വെറുതെ വിടില്ല. അവൾ വിറയാർന്ന ശബ്ദത്തോടെ പറഞ്ഞു. അവർ രണ്ടുപേരും സംസാരിച്ചിരിക്കുമ്പോഴാണ് അവിടേക്ക് നകുലനും അഖിലും വന്നത്. നകുലേട്ടാ, അവരെ ഒന്ന് നോക്കി മുകളിലേക്ക് പോകാനൊരുങ്ങിയ നകുലനെ ദേവ പുറകിൽ നിന്നും വിളിച്ചു. അച്ഛൻ പോയതിൽ പിന്നെ ഓഫീസ് കാര്യങ്ങൾ എല്ലാം നിങ്ങൾ തനിച്ചല്ലേ നോക്കുന്നത്...? നിങ്ങൾ ഒരുപാട് കഷ്ടപ്പെടുന്നുണ്ടെന്നറിയാം, ഇനിമുതൽ ഓഫിസ് കാര്യങ്ങളൊക്കെ ഞാനും ശ്രദ്ധിച്ചോളാം, അത് കേട്ടതും നകുലനും അഖിലും വല്ലാതായി. അവർ ദേവയെ നോക്കി ഒന്ന് പുഞ്ചിരിക്കുക മാത്രം ചെയ്തു. ഇന്ന് ഇവിടെ നടന്ന കാര്യങ്ങൾ നിങ്ങൾ അറിഞ്ഞിരിക്കുമല്ലോ..? എനിക്കുറപ്പുണ്ട് ഗിരീയേട്ടൻ അങ്ങനെ ഒരു കൃത്യം ചെയ്യില്ല എന്ന്. അങ്ങനെ പറയാൻ വരട്ടെ, അവന്റെ ബാഗ്രൗണ്ട് അത്ര നല്ലതല്ല, ഗുണ്ടയെ പിടിച്ച് ഓഫീസിൽ കയറ്റിയാൽ ഇങ്ങനെയിരിക്കും അഖിൽ ദേഷ്യത്തോടെ പറഞ്ഞു. ഗിരിയേ ട്ടൻ ഇങ്ങനെ ചെയ്യില്ല എന്ന് എനിക്കും ഉറപ്പാണ്,

ദേവയെ സപ്പോർട്ട് ചെയ്തു ആരോഹിയും എത്തി. നിന്റെ അഭിപ്രായം ഇവിടെ ആരും ചോദിച്ചില്ല, ആവശ്യമില്ലാത്ത കാര്യങ്ങളിൽ തലയിടണ്ട, നകുലൻ അവളെ ദേഷ്യത്തോടെ നോക്കി പറഞ്ഞു. പിന്നെ ഒരു കാര്യം നിന്നോട് പ്രത്യേകം പറയാം, ആ ഗുണ്ടയെ രക്ഷിക്കാൻ നീ ഇവിടെ നിന്നും ഇറങ്ങി പുറപ്പെടരുത്, അങ്ങനെ വല്ലതും സംഭവിച്ചാൽ ഇപ്പോൾ കിട്ടുന്ന സ്വാതന്ത്ര്യം പോലും നിനക്ക് ഇനി കിട്ടിയെന്നു വരില്ല. വെറുതെ ഞങ്ങളെ ദേഷ്യം പിടിപ്പിക്കാതെ അടങ്ങി ഒതുങ്ങി നിൽക്കുന്നതാണ് നിനക്ക് നല്ലത്, അവളെ നോക്കി അവർ അതും പറഞ്ഞു മുകളിലേക്ക് പോയി. ദേവയ്ക്ക് അത്ഭുതമാണ് തോന്നിയത്, അവർക്ക് വന്ന മാറ്റം അത്രത്തോളമുണ്ട്, അവർ പോയ വഴിയെ നോക്കി അവൾ സങ്കടത്തോടെ നിന്നു. രാത്രി ഉറങ്ങാൻ കിടക്കുമ്പോഴും അവളുടെ മനസ്സിൽ ഗിരി നിറഞ്ഞു നിൽക്കുകയായിരുന്നു. നാളെ കോടതിയിൽ നിന്നും ഗിരിയേട്ടന് ജാമ്യം ലഭിക്കണമെന്നവൾ മനമുരുകി പ്രാർത്ഥിച്ചു. അച്ഛന്റെയും അമ്മയുടെയും ഓർമ്മകൾ അവളുടെ മനസ്സിനെ തളർത്തി. താൻ ഇന്ന് തികച്ചും അനാഥയായിരിക്കുന്നു, ആരും തനിക്കു ചുറ്റും ഇല്ല ആൾക്കൂട്ടത്തിൽ തനിയെ നിൽക്കുന്നതുപോലെ. അച്ഛന്റെ ലാളനയും അമ്മയുടെ സ്നേഹവും കൊതിക്കുകയാണ്, ഒരിക്കൽക്കൂടി അവരെ തനിക്ക് ഒന്ന് കാണാൻ കിട്ടിയെങ്കിലെന്നു അവൾ അതിയായി ആഗ്രഹിച്ചു. സങ്കടം അണപൊട്ടിയൊഴുകി കണ്ണീരിൽ കുതിർന്ന തലയിണയിൽ മുഖം പൂഴ്ത്തി അവൾ എപ്പോഴോ ഉറക്കത്തെ പുൽകി. ഇന്ന് എന്തും സംഭവിക്കാം അതൊന്നും അറിയാതെ ദേവ ഒരു പുതിയൊരു പുലരിയെ വരവേറ്റു...... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...