💕കാണാച്ചരട് 💕: ഭാഗം 53

രചന: RAFEENA MUJEEB

  അയാളുടെ നേർക്ക് ചീറിപ്പാഞ്ഞടുത്ത ആമി ഒരു ഭ്രാന്തനെപ്പോലെ അലറി. പറയെടോ അരവിന്ദ് എവിടെ..? എന്തിനാ അയാൾ എന്നോട് ഈ ചതി ചെയ്തത്..? ഞാൻ എന്ത് തെറ്റാണ് അയാളോട് ചെയ്തത്..? സ്നേഹിച്ചിട്ടല്ലേയുള്ളൂ ഞാൻ, മനസ്സും ശരീരവും കൊടുത്ത് സ്നേഹിച്ചു അതാണോ ഞാൻ ചെയ്ത തെറ്റ്..? എന്റെ ജീവിതം നശിപ്പിച്ചിട്ട്‌ ആയാൾ എന്ത് നേടി..? സ്വന്തം കുഞ്ഞാണ് എന്റെ ഉദരത്തിൽ വളരുന്നതെറിഞ്ഞിട്ടും നിഷ്ക്കരുണം അയാളെന്നെ ഉപേക്ഷിച്ചില്ലേ .? ഇത്രയ്ക്കും നീചൻ ആയിരുന്നോ അയാൾ..? അങ്ങനെ ഒരാളെയാണോ ഞാൻ ഇത്രകാലം സ്നേഹിച്ചത്...? പറ ആദി എനിക്ക് അതിനുള്ള ഉത്തരം കിട്ടിയേ മതിയാവൂ അയാൾ എവിടെ...? ഇയാളെ എനിക്ക് കാണണം...? പാവത്താനെ പോലെ എന്റെ മുൻപിൽ അഭിനയിച്ചതായിരുന്നു അല്ലേ....? ആമി അയാളുടെ ഷർട്ടിൽ കുത്തിപ്പിടിച്ച് ഉച്ചത്തിൽ ചോദിച്ചു.

അവളുടെ ഈ പ്രവർത്തി കണ്ട് അമ്പരന്ന ജാനകിയും രാഘവനും അവളുടെ അടുത്തേക്കോടി. അയാളോട് അത്രയൊക്കെ ആക്രോഷിച്ചപ്പോഴേക്കും അവൾ തളർന്നു വീണു. തന്റെ ഷർട്ടിലെ പിടി അഴിഞ്ഞു വരുന്നത് കണ്ടു നോക്കിയ ആദി അവളെ തന്റെ കയ്യിൽ കോരിയെടുത്ത് അകത്തേക്ക് കൊണ്ടുപോയി. ആദിക്ക് പുറകെ സരസ്വതി ഭായിയും അകത്തേക്ക് കയറി. അപ്പോഴേക്കും ജാനകി അകത്തു പോയി കുറച്ച് വെള്ളം കൊണ്ട് ഓടി വന്നു. ആദി തന്നെ ജാനകിയുടെ കയ്യിൽ നിന്ന് ആ വെള്ളം വാങ്ങി ആമിയുടെ മുഖത്ത് തളിച്ചു. മുഖത്ത് വെള്ളത്തുള്ളികൾ ഇറ്റിറ്റു വീണതും അവൾ പതിയെ കണ്ണു തുറന്നു. തന്റെ മുൻപിൽ നിൽക്കുന്ന ആദിയെ കണ്ടതും അവൾ ചാടിയെഴുന്നേറ്റു. അപ്പോഴേക്കും രാഘവനും കാര്യങ്ങൾ ഏറെക്കുറെ മനസ്സിലായിരുന്നു, അയാളുടെ മുഖം ദേഷ്യം കൊണ്ട് ചുവന്നു. അയാൾ ആദിയുടെ കഴുത്തിന് നേരെ കുത്തിപ്പിടിച്ച് ചുമരിനോട് ചേർത്തുനിർത്തി എന്റെ മകൾ പറഞ്ഞ അറിവ് ശരിയാണെങ്കിൽ നീയാണ് ആ നെറികെട്ടവന്റെ കൂട്ടുകാരൻ,

നിങ്ങൾ അവന്റെ മുത്തശ്ശിയും രാഘവൻ സരസ്യതി ഭായിയെ നോക്കി ദേഷ്യത്തോടെ പറഞ്ഞു. എങ്ങനെ ധൈര്യം വന്നു ഇവിടേക്ക് വരാൻ, ഞാൻ നിങ്ങളെയൊക്കെ അന്വേഷിക്കാൻ തുടങ്ങിയിട്ട് നാളുകൾ ഏറെയായി, എന്റെ മോളുടെ ജീവിതം ഇല്ലാതാക്കി സുഖിച്ച് വാഴാം എന്ന് കരുതിയോ നിങ്ങൾ...,? ഒറ്റ ഒരെണ്ണത്തിനെ ഞാൻ വെറുതെ വിടില്ല, രാഘവനാണ് പറയുന്നത്, അയാൾ അതും പറഞ്ഞു ആദിയെ അടിക്കാനായി കയ്യുയർത്തി , അവനെ അടിക്കാൻ ഉയർത്തിയ രാഘവന്റെ കൈയ്യിൽ ൽ സരസ്വതിയമ്മ കേറി പിടിച്ചു. നിങ്ങളോട് എന്റെ കുഞ്ഞ് ചെയ്തതൊക്കെ തെറ്റ് തന്നെയാണ്, പക്ഷേ കാര്യമറിയാതെ നിങ്ങളിങ്ങനെ സംസാരിക്കരുത്, നിങ്ങളോട് സംസാരിക്കാനാണ് ഞങ്ങൾ വന്നത്, ഒരു വഴക്കിനല്ല. സരസ്വതി ഭായ് വളരെ ശാന്തമായാണ് രാഘവനോട് സംസാരിച്ചത്. നിങ്ങളോടൊന്നും സംസാരിക്കാൻ എനിക്ക് താല്പര്യമില്ല,

എനിക്ക് അവനെയാണ് കിട്ടേണ്ടത് ആ നാറിയെ,. തന്തയില്ലായ്മ കാണിച്ച് മുങ്ങി നടക്കുന്ന ആ വൃത്തികെട്ടവനെ എന്റെ മുൻപിലിട്ടു താ, അവനെ കൊന്നു ജയിലിൽ പോകേണ്ടി വന്നാലും സാരമില്ല ഞാനതും ചെയ്യും രാഘവന്റെ കണ്ണുകളിൽ പകയുടെ തീജ്വാല ജ്വലിച്ചു. ഇതുവരെ താൻ അനുഭവിച്ച എല്ലാ അപമാനവും സങ്കടവും ആ ഉള്ളിൽ നിന്നും ദേഷ്യമായി മാറി. അരവിന്ദിനെ ദാഹിപ്പിക്കാനുള്ള തീ ജ്വാല അദ്ദേഹത്തിന്റെ കണ്ണുകളിൽ ഉണ്ടായിരുന്നു. രാഘവൻ പറയുന്നത് കേട്ടതും സരസ്വതിയമ്മയുടെ ഭാവം മാറി അവരുടെ മുഖം കോപം കൊണ്ട് ജ്വലിച്ചു. നിങ്ങൾ എന്തറിഞ്ഞിട്ടാണ് ഈ പറയുന്നത്..? നിങ്ങൾക്കറിയോ എന്റെ കണ്ണൻ ആരാണെന്ന്..? അവന്റെ നിഴലിൽ പോലും സ്പർശിക്കാനുള്ള യോഗ്യത നിങ്ങൾക്കാർക്കുമില്ല, എന്റെ കുഞ്ഞിനെ കുറിച്ച് നിങ്ങൾക്ക് എന്തറിയാം..? അവർ ദേഷ്യത്തോടെ രാഘവനോട് ചോദിച്ചു. അവനെ കുറിച്ച് കൂടുതലൊന്നും എനിക്കറിയേണ്ട, ഒരു പെൺകുട്ടിയെ സ്നേഹിച്ച് ചതിച്ച് അവളുടെ വയറ്റിൽ ഒരു കുഞ്ഞിന് ജന്മം നൽകി കടന്നുകളഞ്ഞ തന്തയില്ലാത്തവന് വേറെ എന്ത് ബഹുമതിയാണ് ഞാൻ കൊടുക്കേണ്ടത്..?

അവൻ മൂലം നശിച്ചത് എന്റെ കുടുംബമാണ്, ഞാൻ പൊന്നുപോലെ വളർത്തിക്കൊണ്ടുവന്ന മകളാണ് ജീവിതം നഷ്ടപ്പെട്ട് കണ്മുൻപിൽ കഴിയുന്നത്..? എന്റെ കയ്യിൽ കിട്ടിയാൽ വെറുതെ വിടില്ല ഞാൻ ആ നാറിയെ . നിർത്ത ടൊ ... ഇതുവരെ ഞാൻ സഭ്യമായ ഭാഷയിൽ തന്നെയാണ് നിങ്ങളോട് സംസാരിച്ചത്, എന്റെ കുഞ്ഞിനെ കുറിച്ച് ഇനി ഒരക്ഷരം മിണ്ടിയാൽ നിങ്ങളുടെ നാവ് ഞാൻ പിഴുതെറിയും ഈ പറയുന്നത് സരസ്വതി ഭായി ആണ്, അവർ ഏറെ രോഷാകുലയായി എന്തറിയാം എന്റെ കുഞ്ഞിനെ കുറിച്ച്, അവൻ ആരാണെന്ന് അറിയോ നിങ്ങൾക്ക് ..? ജന്മരാശി കൊണ്ട് നാഗദൈവങ്ങൾ അനുഗ്രഹിച്ച ജന്മമാണ് അവന്റെത്, ആണ്ടിലൊരിക്കൽ പിറവിയെടുക്കുന്ന ജന്മം അതുതന്നെയാണ് അവന്റെ ശാപവും അവനെക്കുറിച്ച് പറയുന്നതിനു മുമ്പ് ഞങ്ങളെ കുറിച്ച് പറയണം ഞങ്ങളുടെ തലമുറയെ കുറിച്ച് പറയണം, "കൊടക് പ്രദേശമായ സ്വർഗ്ഗപുത്രി അടക്കിവാണിരുന്ന രാജകുടുംബമാണ് ഞങ്ങളുടേത്.

കേരളത്തിൽ തന്നെ ലക്ഷ്മീപുരം കൊട്ടാരത്തിൽ താമസിച്ചിരുന്ന പൂർവികരിൽ ഒരാൾ കുടിയേറിപ്പാർത്ത അതാണ് അവിടേക്ക്. സമ്പത്ത് കൊണ്ടും ഐശ്വര്യം കൊണ്ടും സമ്പൽസമൃദ്ധമാണ് ആ നാട് , അതിനൊരു പ്രധാന കാരണമുണ്ട്, നാഗദേവത കുടികൊള്ളുന്ന രാജകുടുംബമാണ് ഞങ്ങളുടേത്, പൂർവ്വികർ മുതൽ ആചരിച്ചുപോന്നിരുന്നു ഒരു ചടങ്ങുണ്ട് ഞങ്ങളുടെ കുടുംബത്തിൽ ഇവിടെ നാഗ ദേവന്മാർ അനുഗ്രഹിച്ച ഒരു ആൾ ജന്മം പിറവിയെടുക്കും, പല അനുഗ്രഹങ്ങളും അവനിൽ ദേവന്മാർ ചൊരിയും, അവന്റെ ജന്മ രാശിയും പ്രത്യേകത നിറഞ്ഞ താവും , കുടുംബത്തിൽ അങ്ങനെയൊരു പിറവിയെടുത്താലും അതു മനസ്സിലാക്കാൻ ആരെക്കൊണ്ടും കഴിയണമെന്നില്ല എന്നാൽ അങ്ങനെ ഒരു ജന്മം തിരിച്ചറിയാൻ കുഞ്ഞു ജനിച്ച ശേഷം അവന് അഞ്ച് വയസ്സ് തികയുന്നതിനു മുമ്പ് എപ്പോൾ വേണമെങ്കിലും അവന്റെ മുതുകിൽ ഒരു തൃഭുജ നക്ഷത്രം തെളിയും അങ്ങനെ ജനിക്കുന്ന ആ കുഞ്ഞ് പിന്നെ നാഗദേവതകൾക്കുള്ളതാണ്, നാഗദേവതയ്ക്ക് ജീവിതം സമർപ്പിച്ച് ബ്രഹ്മചാരിയായി സ്വയം കഴിയേണ്ടിവരും,

ജീവിത സൗഭാഗ്യമൊക്കെ വെടിയേണ്ടി വരും ആ കുഞ്ഞ് എത്ര വർഷം കഴിഞ്ഞ് ജനിച്ചാലും അവൻ നാഗദേവതയ്ക്കുള്ളതാണ്, ഇല്ലെങ്കിൽ രാജ്യത്ത് അനിഷ്ടങ്ങൾ സംഭവിക്കും, ഓരോ വിപത്തുകൾ അവരെ പിന്തുടർന്നു കൊണ്ടിരിക്കും, അങ്ങനെ വർഷങ്ങളായി ഈ ആചാരങ്ങൾ ഞങ്ങൾക്കിടയിൽ തുടർന്ന് പൊയ്ക്കൊണ്ടിരുന്നു.നൂറ്റാണ്ടിൽ എപ്പോഴെങ്കിലും ആണ് ആ അത്ഭുത പിറവി സംഭവിക്കുന്നത്. ഏറെ സന്തോഷത്തോടെയാണ് അരവിന്ദന്റെ ജനനം, രാജകുടുംബത്തിൽ ഒരു ആൺകുഞ്ഞ് പിറന്നതിന്റെ എല്ലാ സന്തോഷവും അന്നുണ്ടായിരുന്നു, എല്ലാവരുടെയും കണ്മണിയായി അവൻ വളർന്നു. പക്ഷേ അധികം വൈകാതെ അരുന്ധതി ആ സത്യം മനസ്സിലാക്കി തന്റെ കുഞ്ഞ് തനിക്ക് വേണ്ടി പിറന്നതല്ല അവൻ നാഗദേവതയ്ക്കുള്ളതാണെന്ന്, അരവി മോന് രണ്ടര വയസ്സ് തികഞ്ഞപ്പോഴാണ് അവന്റെ മുതുകത്ത് ത്രിഭുജ നക്ഷത്രം തെളിഞ്ഞു വന്നത്, അതോടുകൂടി അരുന്ധതി തളർന്നു, തന്റെ ഒരേയൊരു മകനെ സർവ്വവും ഉപേക്ഷിച്ച് സന്യാസിയായി ജീവിതം നയിക്കുന്നത് കാണാൻ അവൾക്ക് കഴിയില്ലായിരുന്നു,

അവൾ ആ സത്യം എല്ലാവരിൽ നിന്നും മറച്ചു വെച്ചു അവനെ വളർത്തി. പക്ഷേ അവന് പതിനാല് വയസ്സുവരെയേ ആ സത്യം മൂടിവെക്കാൻ അവൾക്ക് സാധിച്ചുള്ളൂ, രാജ്യത്ത് അനിഷ്ടങ്ങൾ ഓരോന്നോരോന്നായി സംഭവിക്കാൻ തുടങ്ങി, വിട്ടുമാറാത്ത രോഗങ്ങൾ കൊണ്ട് പലരും കഷ്ടപ്പെടാൻ തുടങ്ങി. അവസാനം പ്രശ്നം വെച്ചപ്പോൾ നാഗദേവതയ്ക്കുള്ള ആ കുഞ്ഞ് പിറവിയെടുത്തിട്ടുണ്ടെന്ന് പ്രശ്നത്തിൽ കണ്ടു, പിന്നീട് അതാരാണെന്ന് കണ്ടുപിടിക്കാനുള്ള ഓട്ടത്തിൽ ആയിരുന്നു എല്ലാരും അവസാനം അത് ചെന്നത്തിയത് അരവിന്ദനിലും. കാലം മാറുന്നതിനനുസരിച്ച് വിശ്വാസങ്ങളും കുറഞ്ഞുവരും, അരവിന്ദന് ഒരിക്കലും അതൊന്നും ഉൾക്കൊള്ളാൻ കഴിയില്ലായിരുന്നു, അവനെന്നല്ല ഇന്നത്തെ തലമുറയിലെ ആരും ഇതൊന്നും വിശ്വസിക്കില്ല, അവനതിനെ ശക്തമായി എതിർത്തു തന്റെ ജീവിതം അങ്ങനെ പൂജയും വഴിപാടും ചെയ്തു തള്ളിനീക്കാൻ അവന് ആഗ്രഹമില്ലായെന്ന് തീർത്തു പറഞ്ഞു, ദേവേന്ദ്രൻ നിസ്സഹായാവസ്ഥയിലായി

രാജ്യത്ത് തന്റെ പ്രജകളുടെ ക്ഷേമം നോക്കണം തന്റെ പുത്രന്റെ ജീവിതവും തനിക്ക് വലുതാണ് ആരെയും കൈവിടാൻ കഴിയാത്ത അവസ്ഥ, പക്ഷേ അതിനെ എതിർത്തുകൊണ്ട് തറവാട്ടിലെ കാരണവന്മാർ ശക്തമായി മുന്നോട്ട് വന്നു, അവരുടെയെല്ലാം വാശിക്കു മുമ്പിൽ ദേവേന്ദ്രൻ തന്റെ മകനെ വളരെ വേദനയോടെ തന്നെ നാഗദേവതയ്ക്ക് വിട്ടുകൊടുക്കാൻ തീരുമാനിച്ചു. പക്ഷേ തന്റെ മകനെ ഒരു സന്യാസിയായി കാണാൻ അരുന്ധതിതിയ്ക്ക് കഴിയില്ലായിരുന്നു. അവൾ അതിനെ ശക്തമായി എതിർത്തു, ഇത് മുതലെടുത്ത് കുടുംബത്തിലെ ചിലർ മുമ്പോട്ട് വരികയും നാട്ടിലെ ജനങ്ങളെ പറഞ്ഞു ഭീതിപ്പെടുത്തുകയും അവരെയെല്ലാം രാജകുടുംബത്തിനെതിരെ തിരിക്കുകയും ചെയ്തു പ്രകോപിതരായ ജനങ്ങൾ എന്റെ മകനെയും മകളെയും ചുട്ടുകൊന്നു. അവരുടെ മരണം അരവിന്ദന് താങ്ങാവുന്നതിൽ കൂടുതൽ ആയിരുന്നു , ആ കുഞ്ഞു പ്രായത്തിലും അവന് തന്റെ അച്ഛനേയും അമ്മയേയും ഇല്ലാതാക്കിയവരോടുള്ള പ്രതികാരമായിരുന്നു, ഇനി അവനെ കൂടി ഇവിടെ നിർത്തിയാൽ അവനെയും തനിക്ക് നഷ്ടപ്പെടുമെന്നുള്ള ഭയം കാരണം ഞാൻ അവനെ ക എന്റെ കേരളത്തിലുള്ള ഒരു കൂട്ടുകാരിയുടെ കയ്യിലേൽപ്പിച്ചു, പിന്നീട് അവൻ വളർന്നതും പഠിച്ചതും എല്ലാം ഇവിടെയാണ്,

അവനെ അന്വേഷിച്ചു ആ നാട് ഇളകിമറിഞ്ഞു. അവൻ ആരും കാണാതെ ഇവിടെ വളരുമ്പോഴും അവന്റെയുള്ളിൽ തന്റെ അച്ഛനേയുമമ്മയേയും ഇല്ലാതാക്കിയവരോടുള്ള പ്രതികാരം മാത്രമായിരുന്നു. ആരെയും താൻ വെറുതെ വിടില്ല എന്ന ഉറച്ച തീരുമാനത്തിൽ തന്നെയാണ് അവൻ വളർന്നത്. അതിനിടയിൽ കൊട്ടാരമെല്ലാം അവർ പിടിച്ചെടുത്തു അധികാരം അവരുടെ കൈക്കലാക്കി. എന്നെ അവിടെ ഒരു സേവകയാക്കി നിർത്തി. ഇതൊന്നും അവനറിയാതെയിരിക്കാനും അവനെ ആരും കണ്ടുപിടിക്കാതിരിക്കാനും അവനൊരു പുതിയ അഡ്രസ്സ് തന്നെ ഞങ്ങൾ ഉണ്ടാക്കി. വീറും വാശിയോടെ തന്നെ അവൻ വളർന്നു. നീ കണ്ട പാവം പിടിച്ച അരവിന്ദനല്ല അവൻ, ഉള്ളിൽ അണയാതെ ഒളിപ്പിച്ച ഒരു കനലുണ്ട് , അർജുനന്റെ കരുത്തുള്ളവൻ, ആര് മുമ്പിൽ വന്നു നിന്നാലും തൽക്ഷണം അവരെയെല്ലാം തകർക്കാനുള്ള ശേഷി അവനുണ്ട്. അവര് പോലും അറിയാതെ അവൻ അവരോടുള്ള പക വീട്ടിത്തുടങ്ങി,

തന്റെ അച്ഛനെയും അമ്മയെയും ഇല്ലാതാക്കിയവരെ എല്ലാം അവൻ ഉന്മൂലനം ചെയ്തു. അവളുടെ കയ്യിൽ നിന്നും കൊട്ടാരം പിടിച്ചെടുത്തു എന്നെ അവിടെ റാണി ആയി വാഴിച്ചു. നിന്നോടുള്ള ഇഷ്ടം കൊണ്ട് തന്നെയാണ് അവൻ നിന്നോട് അടുത്തത്,. പക്ഷേ അന്ന് ആ ദിവസം സംഭവിച്ചതെല്ലാം അവൻ മനപ്പൂർവം ചെയ്ത തന്നെയാണ്. അവന്റെ ബ്രഹ്മചര്യം നഷ്ടപ്പെടാതെ അവന് മറ്റുള്ളവരുടെ മുൻപിലേക്ക് വരാൻ സാധ്യമല്ലായിരുന്നു. അവൻ ആഗ്രഹിച്ചത് പോലെ തന്നെ അവൻ ഏറെ ഇഷ്ടപ്പെടുന്ന നിന്നോട് കൂടെ തന്നെ അവനാ നിമിഷങ്ങൾ ചിലവഴിച്ചു. തനിക്കൊരു കുഞ്ഞുണ്ടാവുന്നു എന്ന് കേട്ടപ്പോൾ അവൻ ഏറെ സന്തോഷിച്ചതാണ്, നിന്നോടും കുഞ്ഞിനോടുമൊത്തുള്ള ജീവിതം ഒരുപാട് സ്വപ്നം കണ്ടിരുന്നു അവൻ . എല്ലാ അവകാശത്തോടെയും നിന്നെ സ്വന്തമാക്കാൻ അവൻ ഏറെ ആഗ്രഹിച്ചിരുന്നു. എന്നോട് ആ സന്തോഷവാർത്ത വിളിച്ചുപറഞ്ഞു ഉടനെ വരുന്നുണ്ട് എന്നും പറഞ്ഞു കോൾ കട്ട് ആക്കിയതാണ് . പിന്നെ ഞാൻ അറിയുന്നത് അവർ സഞ്ചരിച്ചിരുന്ന ബൈക്ക് ഒരു ലോറിയുമായി കൂട്ടിയിടിച്ചെന്നാണ്.

ചങ്കിടിപ്പോടെയാണ് ഞാൻ അങ്ങോട്ട് വന്നത്. അവിടെ എത്തിയപ്പോൾ മനസ്സിലായി കേട്ട വാർത്ത സത്യമാണെന്ന്. അവിടെനിന്ന് ഗുരുതരാവസ്ഥയിൽ കിടക്കുന്ന ആദിയെ കിട്ടിയെങ്കിലും അരവിന്ദനെ കുറിച്ച് ഒരു വിവരവും ഉണ്ടായില്ല, അന്നുമുതൽ അവനുള്ള അന്വേഷണത്തിലാണ് ഞാൻ, അവന്റെ ജീവനായ ആദിയെ കൈവിടാൻ എനിക്ക് തോന്നിയില്ല, സമ്പന്നൻ ആണെന്ന് മറ്റുള്ളവരെ തെറ്റിദ്ധരിപ്പിച്ച് അനാഥനായ ആദിയെ അവൻ നെഞ്ചോടുചേർത്തതാണ്, ഒരുവർഷത്തോളം അബോധാവസ്ഥയിൽ ഹോസ്പിറ്റൽ കഴിഞ്ഞ ആദി ഈ അടുത്താണ് ജീവിതത്തിലേക്ക് തിരിച്ചു വന്നത്. അരവി പറഞ്ഞ അറിവ് വച്ച് ഞാൻ നിന്നെ കുറിച്ച് ഒരുപാട് അന്വേഷിച്ചു. പക്ഷേ നിന്നെ കുറിച്ച് ഒരു വിവരവും എനിക്ക് കിട്ടിയില്ല, അന്നുതന്നെ നിനക്കുറിച്ച് അറിവ് ഉണ്ടായിരുന്നെങ്കിൽ നീ ഒരിക്കലും അച്ഛനില്ലാത്ത ഒരു കുഞ്ഞിനെ പ്രസവിക്കില്ലായിരുന്നു. ഞാൻ കൊണ്ടു വന്നേനെ നിന്നെ എന്റെ മരുമകളായിട്ട് തന്നെ. പക്ഷേ എനിക്ക് നിങ്ങളെ കുറിച്ച് കൂടുതൽ ഒന്നും അറിയില്ലായിരുന്നു അവൻ പറഞ്ഞ അറിവല്ലാതെ.

ഇപ്പൊ ആദിയാണ് നിന്നെക്കുറിച്ചുള്ള വിവരങ്ങൾ എന്നോട് പറഞ്ഞത്. ഇന്നത്തെ കാലത്ത് ആരും വിശ്വാസിക്കാത്ത ഒരു കഥയാണെങ്കിലും ഇതൊക്കെ വിശ്വസിച്ചേ പറ്റൂ, ഇത് വെറും കെട്ട് കഥയല്ല ഞങ്ങളുടെ ജീവിതമാണ് വേണമെങ്കിൽ നിങ്ങൾക്ക് അന്വേഷിച്ചാൽ മനസ്സിലാവും . അവർ പറയുന്ന കാര്യങ്ങൾ എല്ലാം കേട്ട് എല്ലാവരും അത്ഭുതപ്പെട്ടു നിൽക്കുകയാണ്. ആമിക്ക് കേട്ടതൊന്നും വിശ്വസിക്കാൻ കഴിയുന്നില്ല, തന്റെ അരവി ഈ ഭൂമിയിൽ ഇല്ലേ..? ജീവനോടെ ഉണ്ടെങ്കിൽ എവിടെ..? എന്താണ് സംഭവിച്ചത്..? അവൾക്ക് ഒരു ഉത്തരം കിട്ടാതെ വിഷമിച്ചു നിന്നു. എല്ലാം കേട്ട് ദേവയും ആ മുറിക്ക് പുറത്തുണ്ടായിരുന്നു. കേട്ടതൊക്കെ വിശ്വസിച്ചേ പറ്റൂ എന്റെ കുഞ്ഞ് ജീവനോടെയുണ്ട് എവിടെയാണെങ്കിലും അവനെ ഞാൻ കണ്ടെത്തും. അവന്റെ കൈകളിലേക്ക് അവന്റെ കുഞ്ഞിനേയും പെണ്ണിനേയും സുരക്ഷിതമായി ഞാൻ ഏൽപ്പിക്കും. അവർ സ്നേഹത്തോടെ ആമിയെ നോക്കിക്കൊണ്ട് പറഞ്ഞു. വന്നിട്ട് എത്ര നേരമായി ഞാൻ ഇതുവരെ എന്റെ പേരകുട്ടിയെ ഒന്ന് കണ്ടില്ലല്ലൊ..? അവർ കണ്ണുകൾ കൊണ്ട് ചുറ്റും പരതി എവിടെ എന്റെ കുട്ടി, എന്റെ അരവിയുടെ ചോര, ആ മുഖം കാണാൻ ഓടി വന്നതാണ് ഞാൻ. അവരുടെ ആകാംക്ഷയോടെയുള്ള ചോദ്യം കേട്ട് ഒരു മറുപടി പറയാതെ എല്ലാവരും നിന്നു..... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...