💕കാണാച്ചരട് 💕: ഭാഗം 55

രചന: RAFEENA MUJEEB

 " സരസ്വതി ഭായി പോയി കഴിഞ്ഞതും ആമി ആരോടും മിണ്ടാതെ തന്റെ റൂമിൽ കയറി വാതിൽ അടച്ചു കുറ്റിയിട്ടു. രാഘവന്റെ ഉള്ളിലും ജാനകിയുടെ ഉള്ളിലും അവർ പറഞ്ഞ ഓരോ വാക്കുകളും കൂടുതൽ ശക്തിയോടെ കിടന്നു മുഴങ്ങുകയാണ്, അവർ രണ്ടുപേരും ഒന്നും മിണ്ടാതെ അകത്തേക്ക് പോയി. ദേവയാണെങ്കിൽ അവർ പറഞ്ഞ കാര്യങ്ങളോർത്ത് തന്റെ കുഞ്ഞിനെയും മാറോടുചേർത്ത് ഒരു പ്രതിമ കണക്കെ നിൽക്കുകയാണ് . അവർ പറഞ്ഞതത്രയും സത്യങ്ങളാണ്, എന്തൊക്കെയോ ദിവ്യശക്തിയുണ്ട് അവർക്ക് അവരുടെ മുഖത്ത് തന്നെയത് വ്യക്തമാണ്, വളരെ ശാന്തമായി പുഞ്ചിരിയോടെയാണ് അവർ ഓരോ കാര്യങ്ങളും പറയുന്നത്, തന്റെ കുഞ്ഞിന് മറ്റൊരു അവകാശിയുണ്ടോ ദൈവമേ..? ഇനി ഇവന്റെ അവകാശം പറഞ്ഞാരെങ്കിലും വരുമോ..? ഒരിക്കലും ഇനി ആരു വന്നാലും ഞാൻ ഇവനെ ആർക്കും വിട്ടുകൊടുക്കില്ല, താൻ പ്രസവിച്ചില്ല എന്നേയുള്ളൂ,

തന്റെ മോൻ തന്നെയാണിവൻ ആർക്കും താൻ ഇവനെ വിട്ടുകൊടുക്കില്ല, ദേവ അവനെ മാറോടടക്കി പിടിച്ചുകൊണ്ട് അവനെ ചുംബനം കൊണ്ട് മൂടി അവളുടെ കണ്ണുകളിൽ നിന്നും ഉതിർന്നു വീണ കണ്ണുനീർ അവനെ നനച്ചു. തന്റെ കുഞ്ഞിനെ നഷ്ടപ്പെടുമോ എന്നവൾ വല്ലാതെ ഭയപ്പെടുന്നുണ്ട്. സരസ്വതി ഭായ് പോയതിനുശേഷം ആ വീട് ഉറങ്ങിയപോലെയായി . ഒച്ചയും അനക്കവുമില്ലാതെ ആകെയൊരു മൂകത തളം കെട്ടി നിന്നു. എല്ലാവരുടെയുള്ളിലും ഓരോ ചോദ്യങ്ങൾ അവശേഷിപ്പിച്ചിട്ടാണ് അവർ മടങ്ങിയത്. രാഘവനും ജാനകിയും പിന്നീട് പുറത്തേക്ക് വന്നിട്ടില്ല, റൂമിൽ തന്നെയാണ്, ആമീ ഇതുവരെ ആ റൂമിൽ നിന്ന് ഒന്ന് വെളിയിൽ ഇറങ്ങുകയോ ഭക്ഷണം കഴിക്കുകയോ ചെയ്തിട്ടില്ല. ദേവ കുഞ്ഞിനെ അല്ലിയെ ഏൽപ്പിച്ച് അവിടെയുള്ള ജോലികൾ പെട്ടെന്ന് തീർത്ത് മക്കളെയും കൊണ്ട് തന്റെ വീട്ടിലേക്ക് പോയി. ************

ആമിയുടെ ഉള്ളിൽ ഉത്തരമില്ലാതെ ഒരുപാട് ചോദ്യങ്ങൾ ഉയർന്നു വന്നു. സരസ്വതിയമ്മ പറഞ്ഞ ഓരോ വാക്കുകളും അവളെ കൂടുതൽ ചിന്തിപ്പിക്കാനുതകുന്നതായിരുന്നു. മുത്തശ്ശി പറഞ്ഞത് പോലെ തന്റെ കുഞ്ഞ് ജീവനോടെയുണ്ടോ..? ഉണ്ടെങ്കിൽ അവൻ എവിടെ...? അവന് എന്തുപറ്റി, എന്തിനാ എല്ലാവരും കൂടി അവനെ തന്നിൽ നിന്നും അകറ്റിയത്..? അരവി തന്നെ ചതിച്ചിട്ടില്ല എന്ന് ഓരോ നിമിഷവും തന്റെ മനസ്സ് പറഞ്ഞിരുന്നു, അതിപ്പോൾ സത്യമായി പുലർന്നിരിക്കുന്നു, അതുപോലെ തന്റെ കുഞ്ഞും എവിടെയോ ജീവിച്ചിരിപ്പുണ്ടെന്ന് തന്നെ പലപ്പോഴും തോന്നിയിട്ടുണ്ട്, പല സമയത്തും അവന്റെ കരച്ചിൽ താൻ അറിയാറുണ്ട്, അവനീ ഭൂമിയിൽ ജീവിച്ചിരിപ്പില്ല എന്ന് ഇന്നീ നിമിഷംവരെ തനിക്ക് വിശ്വസിക്കാൻ കഴിഞ്ഞിട്ടില്ല, മുത്തശ്ശി പറയുന്നതിൽ എന്തൊക്കെയോ സത്യങ്ങളുണ്ട്, അതെന്തൊക്കെയാണെന്ന് കണ്ടുപിടിച്ചേ മതിയാവൂ,

അച്ഛനോട് ചോദിച്ചാൽ ഒരിക്കലും സത്യം തുറന്നു പറയില്ല,. അമ്മയ്ക്ക് അച്ഛന്റെ വിലക്കുള്ളതുകൊണ്ട് അമ്മയും തന്നോട് രഹസ്യങ്ങൾ തുറന്നു പറയില്ല, ആകെയുള്ള ഒരു വഴി അപ്പച്ചിയാണ്, അച്ഛനോടുള്ള സ്നേഹം കൊണ്ട് അപ്പച്ചിയും ഒന്നും തുറന്നു പറയില്ല, പക്ഷേ എങ്ങനെയെങ്കിലും തനിക്കതൊക്കെ കണ്ടുപിടിക്കണമെങ്കിൽ അപ്പച്ചിയുടെ അടുത്തേക്ക് പോയേ മതിയാവൂ , അധികം വൈകാതെ തന്നെ നാഗപട്ടണത്തേക്ക് പോകണം , താൻ അന്വേഷിക്കുന്നതെല്ലാം അവിടെയാണ് നടന്നത്, എന്തെങ്കിലുമൊക്കെ തെളിവുകൾ തനിക്ക് കിട്ടാതിരിക്കില്ല, അപ്പച്ചിയുടെ അടുത്തേക്ക് പോകണമെന്ന് പറഞ്ഞാൽ ഒരിക്കലും അച്ഛൻ സമ്മതിക്കില്ല, അതുകൊണ്ട് തന്നെ ആർക്കും സംശയമില്ലാത്ത രീതിയിൽ കാര്യങ്ങൾ അവതരിപ്പിക്കണം, അപ്പച്ചി യെ കൊണ്ട് തന്നെ തന്നെ അങ്ങോട്ട് വിളിപ്പിക്കണം, തന്റെ മനസ്സിലുള്ള സംശയങ്ങൾ തൽക്കാലമിപ്പോൾ ആരും അറിയേണ്ട.

തന്റെ കുഞ്ഞിനോട് അച്ഛൻ നീതികേടു കാണിച്ചിട്ടുണ്ടെങ്കിൽ ഒരിക്കലും തനിക്ക് അച്ഛനോട് ക്ഷമിക്കാനാവില്ല, എന്തൊക്കെ കാരണങ്ങൾ കൊണ്ടാണെങ്കിലും ഒരു പിഞ്ചു കുഞ്ഞിനോട് അനീതി കാണിച്ചിട്ടുണ്ടെങ്കിൽ അത് തെറ്റ് തന്നെയാണ്, ആ തെറ്റ് ഒരിക്കലും തനിക്ക് ക്ഷമിക്കാനാവില്ല. എല്ലാം കലങ്ങി തെളിയട്ടെ, അതുവരെ കാത്തിരിക്കാം. ആമി മനസ്സിൽ പല പദ്ധതികളും തയ്യാറാക്കി. ആമി അവിടെ നിന്നും എഴുന്നേറ്റ് കയ്യും മുഖവും കഴുകി അച്ഛന്റെയും അമ്മയുടെയുമടുത്തേക്ക് നടന്നു. വാതിലിൽ ശക്തമായ മുട്ട് കേട്ടാണ്ജാനകി കതക് തുറന്നത് മുന്നിൽ പുഞ്ചിരിയോടെ നിൽക്കുന്ന ആമിയെ കണ്ടതും ജാനകി രാഘവനെ ഒന്ന് പാളി നോക്കി. രാഘവനും അവളെ തന്നെ നോക്കി നിൽക്കുകയാണ്. ഇതെന്താ രണ്ടാളും എന്നെ ഇങ്ങനെ മിഴിച്ചു നോക്കുന്നത്....? എത്ര നേരമായി ഇതിനുള്ളിൽ കയറി കതകടച്ചിരിക്കുന്നു , അതിനു മാത്രം ഇവിടെ എന്താണുണ്ടായത്, മുത്തശ്ശി വന്നു എന്തൊക്കെയോ പറഞ്ഞിട്ട് പോയി, അതുമുഴുവൻ വിശ്വസിക്കണം എന്ന് നമുക്ക് നിർബന്ധം ഒന്നുമില്ലല്ലോ..?

എനിക്ക് എന്റെ അച്ഛനെയും അമ്മയെയും വിശ്വാസമാണ് നിങ്ങൾ അതോർത്തു വിഷമിക്കേണ്ട, സമയം എത്രയായി എന്ന് വല്ല അറിവുമുണ്ടോ..? വിശന്നിട്ട് മനുഷ്യന്റെ കുടല് കരിയുന്നു, അടുക്കളയിൽ പോയി വല്ലതും കഴിക്കാനെടുത്ത് വയ്ക്കമ്മേ ആമി വയറിൽ പിടിച്ചു കൊണ്ട് ജനികിയോട് പറഞ്ഞു. അവളുടെ പെരുമാറ്റം കണ്ട് രണ്ടുപേരും പരസ്പരം ഒന്ന് നോക്കി ആമിയായിട്ട് അതിനെകുറിച്ച് ഒന്നും ചോദിക്കാത്തത് രാഘവന് തെല്ലൊന്നുമല്ല ആശ്വാസമുണ്ടാക്കിയത് . പിന്നീട് ആ വിഷയത്തെക്കുറിച്ച് അവരാരും സംസാരിച്ചില്ല. ദിവസങ്ങൾ ഓരോന്നും കഴിയുംതോറും ആമിയിൽ ഒരുപാട് മാറ്റങ്ങൾ വന്നുതുടങ്ങി, ആ പഴയ ആമിയിലേക്ക് അവൾ പതിയെ അടുത്തു . തന്റെ മകളെ ആ പഴയ പ്രസരിപ്പോടെ തിരിച്ചുകിട്ടിയത് രാഘവനിലും ജാനകിയിലും അതിയായ സന്തോഷമുണ്ടാക്കി .

അവളുടെ എല്ലാ പ്രശ്നങ്ങളും മാറി പഴയ ആമിയായി തിരിച്ചു കിട്ടാൻ വേണ്ടി സകല അമ്പലത്തിലും വഴിപാട് നേർന്നിട്ടുണ്ട് ജാനകി. അതൊക്കെ ഓരോന്നോരോന്നായി നടത്തണമെന്ന് ജാനകി പറഞ്ഞു. ജാനകിയുടെ ആഗ്രഹത്തിന് രാഘവൻ എതിരൊന്നും നിന്നില്ല. അവർ രണ്ടുപേരും തന്നെ വഴിപാടുകൾ ചെയ്യാനായി അമ്പലങ്ങളിലേക്ക് പുറപ്പെട്ടു. ആമിയെ ദേവയെ ഏൽപ്പിച്ചാണവർ രാവിലെ തന്നെ അമ്പലത്തിലേക്ക് ഇറങ്ങുന്നത്, അവർ അമ്പലത്തിലേക്ക് പോയശേഷം ആമിയും ദേവയും കുഞ്ഞുങ്ങളെയും കളിപ്പിച്ചിരിക്കുകയായിരുന്നു അപ്പോഴാണ് പുറത്ത് ആരോ കോളിംഗ് ബെൽ അടിച്ചത്. വന്നത് ആരാണെന്നറിയാൻ ദേവ ഹാളിലേക്ക് പോയി. ആരാ...? കതക് തുറന്നു തനിക്കു മുൻപിൽ പുറംതിരിഞ്ഞു നിൽക്കുന്ന ആളെ മനസ്സിലാവാതെ ദേവ ചോദിച്ചു. ദേവയുടെ ശബ്ദം കേട്ടതും അയാൾ ദേവയ്ക്ക് അഭിമുഖമായി നിന്നു. ആമുഖം കണ്ടതും ദേവ ഒരു ഞെട്ടലോടെ പുറകിലേക്ക് വേച്ചു പോയി..... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...