💕കാണാച്ചരട് 💕: ഭാഗം 64

രചന: RAFEENA MUJEEB

 " അരവിന്ദൻ" ടിവിയിലേക്ക് വിരൽചൂണ്ടിയ ആമിയുടെ ചുണ്ടുകൾ പതിയെ മന്ത്രിച്ചു. അപർണയും വിശ്വാസം വരാതെ ടി വിയിലേക്ക് തന്നെ നോക്കി , അതരവി തന്നെയാണോ...? അതോ മറ്റാരെങ്കിലുമാണോ..? അപർണ്ണ ആമിയെ ചേർത്തുപിടിച്ചു. ആമി ടിവിയിലേക്ക് തന്നെ നോക്കുകയാണ്. അത് നമ്മുടെ അരവി അല്ല മോളെ,....നീ ഒന്ന് നോക്ക് കാഴ്ച്ചയിൽ ഒരു പക്ഷെ രണ്ടു പേരും തമ്മിൽ നല്ല സാദൃശ്യമുണ്ടാവും പക്ഷെ ഇത് നമ്മുടെ അരവിയല്ല. നമ്മുടെ അരവിയെ നീ എപ്പോഴെങ്കിലും നാടൻ ലുക്കിൽ അല്ലാതെ കണ്ടിട്ടുണ്ടോ...? അയാളെ നോക്ക് നീ ഒരു മലയാളത്തനിമ പോലുമില്ല ആ മുഖത്ത് വേഷത്തിലും ഭാവത്തിലും രൂപത്തിലും അരവിയുടെ നേരെ വിപരീതം, അത് നമ്മുടെ അരവി അല്ല ടീ... നീ കരയാതിരിക്ക് അപർണ്ണ അവളെ ആശ്വസിപ്പിച്ചു കൊണ്ട് പറഞ്ഞു. രൂപവും ഭാവവും വസ്ത്രവുമെല്ലാം മാറ്റിക്കോട്ടെ അപ്പു പക്ഷേ എന്റെ അരവിയെ കാണുമ്പോൾ എനിക്കറിയാം എന്റെ ശരീരം മൊത്തം അവന്റെ സാമിപ്യം തിരിച്ചറിയാറുണ്ട്, ഏത് ഉറക്കത്തിൽ പോലും അവൻ മുമ്പിൽ വന്നു നിന്നാൽ എനിക്ക് തിരിച്ചറിയും..

അത് എന്റെ അരവി തന്നെയാണ്. അവൻ ഏതു രൂപത്തിൽ വന്നാലും എനിക്കറിയാം അപ്പു അതെന്റെ അരവി തന്നെയാണ് ഞാൻ പറയുന്നതൊന്നു വിശ്വസിക്ക് ആമി കരഞ്ഞുകൊണ്ട് അവളോട് പറഞ്ഞു. നീയൊന്ന് അടങ്ങ് ആമി നമുക്ക് അന്വേഷിക്കാം അത് ആരാണെങ്കിലും ദേ...നീ കരയുന്നത് കണ്ട് ചുറ്റുമുള്ളവരൊക്കെ നോക്കുന്നത് കണ്ടോ....? നീ ഇങ്ങനെ കരഞ്ഞു വിളിച്ച് വെറുതെ എല്ലാവരെയും അറിയിക്കേണ്ട നീ ഇവിടെ ഇരിക്ക് സമാധാനത്തോടെ അപർണ്ണ അവിടെ കണ്ട ചെയറിലേക്ക് ആമിയെ പിടിച്ചിരുത്തി. അവളുടെ കരച്ചിലും ബഹളവുമെല്ലാം മറ്റുള്ളവർ ശ്രദ്ധിക്കുന്നുണ്ടായിരുന്നു . ആമിയുടെ ശ്രദ്ധ അപ്പോഴും ആ ടീമിൽ തന്നെയാണ്. ആമി അത് അരവി തന്നെയാണെന്ന് ഉറച്ചു വിശ്വസിക്കുന്നുണ്ട്. അപർണ്ണയുടെ മനസ്സ് എന്തോ അത് അംഗീകരിക്കാൻ തയ്യാറാകുന്നില്ല. അവൾ ആമിയെ ഒന്നു നോക്കി. ഒരുപാട് പ്രതീക്ഷകളോടെയാണ് ആമി തന്നെ നോക്കുന്നത് ടിവിയിൽ പുതിയ താരങ്ങളെല്ലാം മാധ്യമങ്ങളോട് സംസാരിക്കുകയാണ്. തനവ് ശർമ എന്നാണല്ലേ മുഴുവൻ പേര്...?

അരവിന്ദൻ എന്ന് തോന്നിക്കുന്ന ആളോട് ഒരു മാധ്യമ പ്രവർത്തകൻ ചോദിച്ചു. അതെ തനവ് മഹേഷ്‌ ശർമ അച്ഛൻ മഹേഷ് ശർമ അമ്മ അതിഥി ശർമ., അനിയത്തി ഹൃതിക ശർമ്മ . അയാൾ പുഞ്ചിരിയോടെ മറുപടി കൊടുത്തു. താങ്കൾ പഠിച്ചതും വളർന്നതുമൊക്കെ ലണ്ടനിൽ ആണെന്ന് കേട്ടിട്ടുണ്ട്. അവിടെ അച്ഛന്റെ ബിസിനസ് നോക്കി നടത്തുകയല്ലേ..? പിന്നെ എങ്ങനെ ഈ രംഗത്തേക്ക് വന്നു എന്താണ് മോട്ടീവ്...? മാധ്യമപ്രവർത്തകരിൽ ഒരാൾ അവനോടു ചോദിച്ചപ്പോൾ അവൻ അയാളെ നോക്കി സൗമ്യമായി ഒന്ന് പുഞ്ചിരിച്ചു. ഞാൻ ജനിച്ചതും വളർന്നതും ലണ്ടനിൽ ആണെങ്കിലും മലയാളത്തനിമ നല്ലതുപോലെ കാത്തുസൂക്ഷിക്കുന്ന ഒരു കുടുംബം തന്നെയാണ് എന്റേത് , എന്നെയും അനിയത്തിയെയും എല്ലാവർഷവും അച്ഛനുമമ്മയും നാട്ടിൽ കൊണ്ടുവരും . ചെറുപ്പം തൊട്ടേ കാൽപന്ത് കളിയിൽ കേമനായിരുന്നു വീട്ടുകാരുടെ പിന്തുണ കൊണ്ട് എല്ലാ മത്സരങ്ങളിലും പങ്കെടുക്കാറുണ്ട് വിജയം കൊയ്യാറുമുണ്ട് . അങ്ങനെ യാദൃച്ഛികമായിട്ടാണ് കേരള ടീമിൽ എത്തിപ്പെട്ടത് ഇനി മുൻപിൽ ഒരേ ഒരു ലക്ഷ്യം

എന്റെ ടീമിനെ വിജയിക്കുക അതിനുവേണ്ടി ഞാൻ പരിശ്രമിക്കും . എന്റെ ലക്ഷ്യത്തോടൊപ്പം എന്റെ കുടുംബവുമുണ്ട് അതാണ് എന്റെ ഭാഗ്യവും . ചോദിക്കുന്നത് കൊണ്ട് ഒന്നും തോന്നരുത് സാർ വിവാഹിതനാണോ...? കൂട്ടത്തിൽ നിന്നും ഒരു മാധ്യമപ്രവർത്തകയുടെ ചോദ്യംകേട്ട് എല്ലാവരും അവനെ തന്നെ നോക്കി. വിവാഹിതനല്ല പക്ഷേ അധികം വൈകാതെ വിവാഹിതനാകും എന്നു പറഞ്ഞവൻ പുറകിലേക്ക് നോക്കിയതും പുഞ്ചിരിയോടെ ഒരു പെൺകുട്ടി അവന്റെ അടുത്തേക്ക് വന്നു.ഇറുകി ശരീരത്തോട് ഒട്ടിയ ജീൻസും ഷർട്ടുമാണ് വേഷം. തോളറ്റം വെട്ടിയൊതുക്കിയ മുടി സ്ട്രൈറ്റ് ചെയ്തിട്ടുണ്ട് ചുണ്ടിൽ അല്പം ചായം തേച്ചിട്ടുണ്ടെങ്കിലും അതൊരു അഭംഗിയായി തോന്നിയില്ല. അവൾ വന്നവന്റെ കൈ തന്റെ കയ്യിൽ ചേർത്ത് പുഞ്ചിരിയോടെ നിന്നു . ഇത് ഞാൻ കല്യാണം കഴിക്കാൻ പോകുന്ന പെൺകുട്ടി പേര് ക്ഷമ വാര്യർ എന്റെ അച്ഛന്റെ ബിസിനസ് പാർട്ണർ ശ്രീരാജ് വാര്യരുടെ മൂന്നാമത്തെ മകൾ അവൻ ക്ഷമയെ എല്ലാവർക്കു മുമ്പിലും പരിചയപ്പെടുത്തി.

ആമി അത് കണ്ടതും ദേഷ്യത്തോടെ അവിടെനിന്നും എഴുന്നേറ്റു. നോ... ഇത് ഞാൻ ഒരിക്കലും അനുവദിക്കില്ല അത് എന്റെ അരവിയാണ്, എനിക്കറിയാം അവനെ കണ്ടാൽ ആമി ഭ്രാന്തമായി അലറി. അവളെ നിയന്ത്രിക്കാൻ അപർണയ്ക്ക് കഴിയാതെ വന്നു. അത് അരവിന്ദല്ല ടീ അയാളുടെ പേരും നാടും ഒക്കെ നീ കണ്ടില്ലേ നീ ഒന്നടങ്ങി നിൽക്ക് പെണ്ണെ.. അപർണ്ണ തന്റെ കൈകൊണ്ട് അവളെ ചുറ്റി വരിഞ്ഞു പറഞ്ഞു. അത് അരവി തന്നെയാണ് അപർണയുടെ പിടിയിൽ നിന്നും ആമി കുതറി മാറാൻ ശ്രമിച്ചു. അവിടെ കൂടിയവർ എല്ലാം അവർക്ക് ചുറ്റും കൂടി നിന്നു. ആമി ഭ്രാന്തിയെപ്പോലെ എന്തൊക്കെയോ പുലമ്പുന്നുണ്ട്. അവസാനം തളർന്നു കൊണ്ട് അപർണ്ണയുടെ കൈകളിലേക്ക് വീണു. അപ്പോഴും അവളുടെ ചുണ്ടുകൾ അരവി എന്ന് മന്ത്രിക്കുന്നുണ്ടായിരുന്നു. അപർണ്ണയ്ക്ക് അവളുടെ മുഖത്തേക്ക് നോക്കിയപ്പോൾ സങ്കടം സഹിക്കാൻ കഴിഞ്ഞില്ല. ആ സമയത്താണ് പ്രസാദ് അവിടേക്ക് വന്നത് ആളുകൾ തിങ്ങി നില്ക്കുന്നത് കണ്ട് അവൻ അങ്ങോട്ട് ഓടി വന്നു .

അപർണ്ണയുടെ കയ്യിൽ തളർന്നുകിടക്കുന്ന ആമിയെ കണ്ടതും അവൻ ഓടി വന്നു അവളെ ചേർത്ത് പിടിച്ചു. എന്താ എന്താണുണ്ടായത്..? ഇവൾക്ക് പെട്ടെന്ന് ഇങ്ങനെ വരാൻ എന്താണ് കാരണം ആമിയെ തന്റെ കൈകളിൽ കോരിയെടുത്ത് കൊണ്ട് പ്രസാദ് ചോദിച്ചു. അപർണ്ണ ഉണ്ടായ കാര്യങ്ങളെല്ലാം വളരെ വിശദമായി തന്നെ അവനെ പറഞ്ഞുകേൾപ്പിച്ചു. ടി വി യിൽ അപ്പോഴും അവരുടെ അഭിമുഖം നടന്നുകൊണ്ടിരിക്കുകയാണ്. അതുകണ്ടതും പ്രസാദിന്റെ മുഖം ദേഷ്യം കൊണ്ട് വലിഞ്ഞുമുറുകി. അവിടെയുണ്ടായിരുന്ന ബോട്ടിൽ എടുത്ത് തന്റെ കൈയിലേക്ക് ഇത്തിരി വെള്ളമൊഴിച്ച് ആമിയുടെ മുഖത്തേക്ക് കുടഞ്ഞു. മുഖത്തു നനവ് പടർന്നതും അവൾ പതിയെ കണ്ണു തുറന്നു തന്നെ ചേർത്തുപിടിച്ചിരിക്കുന്ന കിച്ചനെ കണ്ടതും അവൾക്ക് സങ്കടം സഹിക്കാനായില്ല. അവൾ അവന്റെ അരക്കെട്ടിലൂടെ കെട്ടിപ്പിടിച്ചു പൊട്ടിക്കരഞ്ഞു. കിച്ചൻ അവളെ സമാധാനിച്ച് അപർണ്ണയോട് യാത്ര പറഞ്ഞ് അവിടെ നിന്നും അവളെയും കൊണ്ട് ഇറങ്ങി. യാത്രയിലുടനീളം ആമി മൗനത്തിലായിരുന്നു. അവളുടെ ഉള്ളിൽ ഒരു മുഖം മാത്രമായിരുന്നു തന്റെ അരവിയുടെ. അവന്റെ കൈകൾ ചേർത്തു പിടിച്ചു നിന്ന ആ പെണ്ണിന്റെ, അതോർക്കുന്തോറും അവളുടെ കണ്ണുകൾ നിറഞ്ഞൊഴുകാൻ തുടങ്ങി.

പ്രസാദ് ഇടയ്ക്കിടെ അവളെ നോക്കുന്നുണ്ടായിരുന്നു. അവളോട് കാര്യമായിട്ടൊന്നും സംസാരിക്കാതെ അവൻ അവൻ മനപ്പൂർവ്വം മൗനം പൂണ്ടിരുന്നു. ഈ അടുത്താണ് അവൾ ജീവിതത്തിലേക്ക് തിരിച്ചു വന്നത്, പഴയ ഓർമ്മകൾ അവളെ വീണ്ടും ഒരു രോഗിയാക്കുമോ എന്നവനൊരു പേടിയുണ്ട് വീട്ടിലെത്തുമ്പോൾ അവരെ പ്രതീക്ഷിച്ച് ഒരു അതിഥി മുറ്റത്തുതന്നെ കാത്തുനിൽപ്പുണ്ടായിരുന്നു. ആമി അയാളെ കണ്ടതും കാറിൽ നിന്നും ചാടിയിറങ്ങി. ആദി അതെന്റെ അരവിയല്ലേ....? ആരും ഞാൻ പറയുന്നതൊന്നും വിശ്വസിക്കുന്നില്ല, നീ പറ അത് എന്റെ അരവി അല്ലേ..? നീയല്ലേ അരവി യോടൊപ്പം നിഴലുപോലെ എപ്പോഴും ഉണ്ടായിരുന്നത് ….? നിനക്കല്ലേ അവനെ തിരിച്ചറിയാൻ സാധിക്കുന്നത്....?അതെന്റെ അരവി തന്നെയല്ലേ ഒന്നു പറ ആദി അവൾ കരഞ്ഞുകൊണ്ട് അവന്റെ തോളിലേക്ക് ചാഞ്ഞു. അതെ അത് അരവി തന്നെയാണ്.. പെട്ടെന്നുള്ള അവന്റെ മറുപടികേട്ട് ആമി അത്ഭുതത്തോടെ അവനെ നോക്കി. എനിക്ക് ഉറപ്പാണ് അത് എന്റെ അരവി തന്നെയാണെന്ന്,

അവൻ ഏത് രൂപത്തിലും ഭാവത്തിലും വന്നാലും എനിക്ക് തിരിച്ചറിയാൻ കഴിയും ഏതു പേരിൽ അവൻ അറിയപ്പെട്ടാലും അത് അരവി തന്നെയാണ് അത് ഞാൻ തെളിയിച്ചിരിക്കും . നമുക്കറിയാത്ത എന്തൊക്കെയോ സംഭവിച്ചിട്ടുണ്ട്, അവൻ നമ്മളെ ഉപേക്ഷിച്ചതാണോ അതോ മറ്റെന്തെങ്കിലും കാരണം കൊണ്ടാണോ ഇങ്ങനെ രൂപത്തിലും ഭാവത്തിലും പേരിലും മാറ്റം വരുത്തി കഴിയുന്നതെന്ന് ആദ്യം അറിയണം. ഇത്രകാലം നമ്മളെയൊക്കെ വിഡ്ഢികളാക്കുകയായിരുന്നൊ എന്നും അറിയണം. അവൻ രണ്ടുദിവസം മുംബൈയിൽ ഉണ്ട്, അത് കഴിഞ്ഞാൽ ലണ്ടനിലേക്ക് മടങ്ങും എന്നാണ് സൂചന കിട്ടിയത് അവൻ അവിടേക്ക് പോകുന്നതിനു മുൻപ് എനിക്കവനെ ഒന്നു കാണണം ചില കാര്യങ്ങൾ അവന്റെ വായിൽ നിന്ന് തന്നെ എനിക്ക് കേൾക്കണം. അവൻ നിന്റെ അരവിന്ദൻ ആണെങ്കിൽ അവനെ കൊണ്ട് വന്നു നിന്റെ കാൽച്ചുവട്ടിൽ ഇട്ട് തരും ഇത് ആദി തരുന്ന വാക്കാണ്. ഞാൻ പോയിട്ട് വരാം ഒന്ന് കൊണ്ടും സങ്കടപ്പെടേണ്ട ധൈര്യമായിട്ടിരിക്കണം അവളുടെ കൈകൾ മുറുകെ പിടിച്ച് ആദി പറഞ്ഞു.

എല്ലാവരെയും നോക്കി അയാൾ അവിടെ നിന്നും പോകാൻ തുടങ്ങിയതും പ്രസാദ് അയാൾക്ക് തടസ്സമായി മുൻപിൽ കയറി നിന്നു. ഞാനും വരുന്നുണ്ട് തന്റെ കൂടെ നിങ്ങൾ പറഞ്ഞതുപോലെ അത് അരവിയാണെങ്കിൽ ഇവളെ ചതിച്ചിട്ട് പോയ അവനെ ഞാൻ വെറുതെ വിടില്ല, മറ്റൊരു പെണ്ണുമൊത്ത് ജീവിക്കാനാണ് അവന്റെ ഉദ്ദേശമെങ്കിൽ തീർക്കും ഞാനവനെ പ്രസാദ് ദേഷ്യത്തോടെ പറഞ്ഞു. അവനങ്ങനെ ഒരു പെണ്ണിനെ ചതിച്ച് കടന്നുകളയുന്ന ഒരാളല്ല ആദ്യം കാര്യം എന്താണെന്ന് അറിയണം അറിയാനുള്ള ക്ഷമയുണ്ടെങ്കിൽ മാത്രം വേണമെങ്കിൽ എന്റെ കൂടെ വരാം. പ്രസാദ് ഒരു നിമിഷം ഒന്നും മിണ്ടാതെ നിന്നു ശേഷം ആദിയുടെ കൂടെ പോകാം എന്ന് തീരുമാനിച്ചു. അങ്ങനെ ആദിയുടെ കൂടെ പ്രസാദും മുംബൈയിലേക്ക് പോകാൻ തയ്യാറായി . താൻ വരുന്നത് വരെ അബദ്ധത്തിൽ ഒന്നും ചാടരുത് എന്ന് ആമിയോടും ദേവയോടും പ്രത്യേകം പറഞ്ഞു. ഉള്ളിൽ ഒരുപാട് സംശയങ്ങളുമായി പ്രസാദും ആദിയും അരവിയെ തേടി പുറപ്പെട്ടു. അവർ കണ്ണിൽനിന്ന് മായുന്നത് വരെ ആമി അവരെ തന്നെ നോക്കി നിന്നു. അരവി അത്‌ നീ തന്നെയാണ്, നീ വരുമ്പോൾ അതെനിക്കറിയാം നിന്നെ ഞാൻ ഏത് ആൾക്കൂട്ടത്തിലും തിരിച്ചറിയും, എന്നെ ഇനിയും തളർത്തല്ലേ... അവൾ തളർച്ചയോടെ അവിടെ ഇരുന്നു....... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...