💕കാണാച്ചരട് 💕: ഭാഗം 67

രചന: RAFEENA MUJEEB

 " അവര് പറഞ്ഞ കാര്യങ്ങളാ അങ്കിൾ ഇതൊക്കെയും. അവൻ പിഴപ്പിച്ച ഒരു പെൺകുട്ടിയുണ്ട് നാട്ടിലെന്ന് അവനെയും കാത്തിരിക്കുന്ന ഒരു പെണ്ണ്! അതിനർത്ഥം അവൻ ഒരച്ഛനാണെന്നല്ലേ....?അവൻ മറ്റൊരു പെണ്ണിന്റേതായിരുന്നോ...?ക്ഷമ സങ്കടത്തോടെ മഹേഷിനോട് ചോദിച്ചു. "അപ്പോൾ അവന്റെ തിരോധാനത്തിൽ വേദനിച്ച് കഴിയുന്ന ഒരു കുടുംബം ഉണ്ടല്ലേ....?എല്ലാം നഷ്ടപ്പെട്ട് അവന് വേണ്ടി കാത്തിരിക്കുന്ന ഒരു പെണ്ണുണ്ടോ...? നമ്മൾ ചെയ്യുന്നത് പാപമാണോ മോളെ..? മഹേഷ് വേദനയോടെ ചോദിച്ചു. "ഒരിക്കലുമല്ലാ..മരണത്തിന്റെ വക്കിൽ നിന്നുമാണ് നമ്മളവനെ രക്ഷിച്ചത്,! അന്നവൻ മരണപ്പെട്ടിരുന്നുവെങ്കിൽ ഈ പറയുന്നവരൊക്കെ എന്ത് ചെയ്യുമായിരുന്നു ....?ഇത് അവന്റെ രണ്ടാം ജന്മമാണ്, ഒരു പെണ്ണിനും ഞാനവനെ കൊടുക്കില്ല. അവനില്ലാതെ എനിക്ക് ജീവിക്കാൻ പറ്റില്ല അങ്കിൾ ക്ഷമ പൊട്ടിക്കരഞ്ഞുകൊണ്ട് മഹേഷിന്റെ കൈകളിൽ പിടിച്ചു. മോള് വിഷമിക്കണ്ട ആരും ഒന്നും അറിയില്ല, തനവ് ഒന്നുമറിയാതെ നമുക്ക് ശ്രദ്ധിക്കാം.

നിന്റെ തനവിനെ നിന്നിൽ നിന്നും തട്ടിയെടുക്കാൻ ഞാൻ ആരെയും സമ്മതിക്കില്ല അത് പോരെ മോൾക്ക്"!. " അതുമതി എനിക്ക് അങ്കിളിനെ വിശ്വാസമാണ് , തനവ് എനിക്കുള്ളതാണെന്ന് ആദ്യം പറഞ്ഞത് അങ്കിളാണ് ആ വാക്ക് വിശ്വസിച്ചാണ് ഞാനിത്ര കാലം ജീവിച്ചത്. അവർ തനവിനെ ഒരിക്കലും കാണാൻ പാടില്ല, നമുക്ക് ഇന്ന് തന്നെ ലണ്ടനിലേക്ക് തിരിച്ചു പോകണം.. ക്ഷമ അപേക്ഷയോടെ മഹേഷിനോട് പറഞ്ഞു. അത് നടക്കുമെന്ന് തോന്നുന്നില്ല,! അവർ നാട്ടിലേക്ക് പോകാനുള്ള അനുവാദം എന്റെ കയ്യിൽ നിന്നും മേടിച്ചിട്ടുണ്ട്,ഇന്ന് തന്നെ നാട്ടിലേക്ക് പുറപ്പെടാനാണ് തീരുമാനം ലണ്ടനിലേക്ക് നമ്മൾ മാത്രമേ പോകുന്നുള്ളൂ അവർ മൂന്നുപേരും അമ്മയുടെ അടുത്തേക്ക് പോവുകയാണ്. അങ്കിളിത് എന്തൊക്കെയാണ് പറയുന്നത്...?ഈ സമയത്ത് തനവ് കേരളത്തിലെത്തിയാലുള്ള അവസ്ഥ അറിയാമല്ലോ..? അവനെ കാണാനിനി പല അവകാശികളും വരും. നമുക്ക് അവനെ നഷ്ടപ്പെടും അതൊക്കെ അറിഞ്ഞു കൊണ്ട് അവനെ കേരളത്തിലേക്ക് വിടുകയാണോ...?

ഒരിക്കലും ഈ യാത്ര അനുവദിച്ചുകൂടാ...! ഇത് തടഞ്ഞേ മതിയാവൂ . നീ ഒന്നടങ്ങ് ക്ഷമേ അവൻ നാട്ടിലേക്ക് പോകാതിരുന്നാൽ പോരെ അത് ഞാൻ പറഞ്ഞോളാം. നീ വാ എന്റെ കൂടെ..എന്നും പറഞ്ഞ് മഹേഷ് വാതിൽ തുറന്ന് പുറത്തേക്ക് പോയി. ക്ഷമയും അയാൾക്ക് പുറകെ നടന്നു മഹേഷ് റൂമിലെത്തുമ്പോൾ തനവും ഋതുവും അതിഥിയുമുണ്ട് ആ റൂമിൽ. എല്ലാവരും ബാഗ് പാക്ക് ചെയ്യുന്ന തിരക്കിലാണ്. അത് കണ്ടതും മഹേഷ് ക്ഷമയെ ഒന്നു നോക്കി അവൾ കാര്യം പറയെന്നുള്ള രീതിയിൽ മഹേഷിന് തല കൊണ്ട് ആംഗ്യം കാണിച്ചു കൊടുത്തു. എല്ലാവരും പെട്ടെന്നുതന്നെ ബാഗ് പാക്ക് ചെയ്തോളൂ..ആരും നാട്ടിലേക്ക് പോകുന്നില്ല. നമ്മളെല്ലാവരും ഒരുമിച്ച് ലണ്ടനിലേക്ക് തന്നെ മടങ്ങുകയാണ്. പെട്ടെന്നുള്ള മഹേഷിന്റെ ശബ്ദം കേട്ടതും മൂന്നുപേരും ജോലി ഉപേക്ഷിച്ച് മഹേഷിനെ തന്നെ സംശയത്തോടെ നോക്കി . എന്താ എല്ലാവരും എന്നെ ഇങ്ങനെ സൂക്ഷിച്ചു നോക്കുന്നത് കമ്പനിയിൽ ഒരു അർജന്റ് ഇഷ്യൂ ഉണ്ടായിട്ടുണ്ട് പെട്ടെന്ന് തന്നെ അവിടെയെത്തണം.

നാട്ടിലേക്കുള്ള ടിക്കറ്റ് ക്യാൻസൽ ചെയ്യാം നിങ്ങളും എന്റെ കൂടെ വരണം. അതെന്തേ പപ്പേ ഇങ്ങനെ ഒരു തീരുമാനം ഞാനിപ്പോൾ റഹീമിനെ വിളിച്ച് വച്ചേയുള്ളല്ലോ.? കമ്പനിയിൽ അങ്ങനെയൊരു ഇഷ്യൂ ഉള്ളതായിട്ട് അവൻ പറഞ്ഞില്ലല്ലോ..? പോകുന്ന കാര്യം അവനോട് പറഞ്ഞപ്പോൾ ധൈര്യമായിട്ട് പോയിട്ട് വാ അവിടുത്തെ കാര്യങ്ങളെല്ലാം അവൻ തന്നെ നോക്കിക്കോളാം എന്നാണ് പറഞ്ഞത്. അല്ലെങ്കിലും ഞാൻ ഉള്ളപ്പോൾ പോലും റഹീം ആണല്ലോ കമ്പനി കാര്യങ്ങളൊക്കെ നോക്കുന്നത്. അവൻ ഉള്ളപ്പോൾ എന്തിനാ പേടിക്കുന്നത് അവിടെ ഒരു പ്രശ്നവും ഉണ്ടായിട്ടില്ല. " തർക്കുത്തരം പറയാതെ ഞാൻ പറയുന്നതങ്ങ് അനുസരിച്ചാൽ മതി അമ്മയും മക്കളും.എനിക്കിപ്പോൾ നിങ്ങളെ നാട്ടിലേക്ക് വിടാൻ സൗകര്യമില്ല മൂന്നാളും എന്റെ കൂടെ ലണ്ടനിലേക്ക് വരണം ഇത് എന്റെ അന്തിമ വാക്കാണ്. പെട്ടെന്ന് ഇങ്ങനെ തീരുമാനം മാറാൻ എന്താ പപ്പാ...പപ്പ അനുവാദം തന്നത് കൊണ്ടല്ലേ ഞങ്ങൾ നാട്ടിലേക്ക് വിളിച്ചു വരുന്ന വിവരം അച്ഛമ്മയെ അറിയിച്ചത്. ഇനി വരില്ല എന്ന് പറഞ്ഞാൽ അച്ഛമ്മയ്ക്ക് വിഷമം ആവില്ലേ..?

ഋതു സങ്കടത്തോടെ പറഞ്ഞു. പിള്ളേര് ഒരുപാട് ആഗ്രഹിച്ചതല്ലേ മഹേഷേട്ടാ രണ്ടുദിവസമെങ്കിലും അവിടെ പോയി നിന്നിട്ട് പോയാൽ പോരേ..? അതിഥിയും അവരുടെ പക്ഷം ചേർന്ന് പറഞ്ഞു. നിങ്ങളോടെന്താ കാര്യം പറഞ്ഞാൽ മനസ്സിലാവില്ലേ...,? ഇപ്പോൾ നാട്ടിലേക്ക് പോകേണ്ട എന്നാണ് പറഞ്ഞത്. എന്റെ തീരുമാനത്തിന് ഇനി ഒരു മാറ്റവുമില്ല മഹേഷ്‌ കടുപ്പിച്ചു പറഞ്ഞു. അതിന്റെ കാര്യമാണ് അറിയേണ്ടത്!, പപ്പയോട് അനുവാദം ചോദിച്ചിട്ടാണ് ഞങ്ങൾ നാട്ടിലേക്ക് പോകാൻ തയ്യാറെടുത്തത്, വരുന്നുണ്ടെന്ന് അച്ഛമ്മയേയും അറിയിച്ചു. അവരെല്ലാം ഒരുപാട് സന്തോഷത്തിലാണ്. ഇനി വരില്ല എന്ന് പറഞ്ഞാൽ അച്ഛമ്മയ്ക്കത് സഹിക്കാൻ കഴിയില്ല. തക്കതായ കാരണമില്ലാതെ ഞാൻ ഈ യാത്രയിൽ നിന്ന് പിന്മാറില്ല.. തനവിന് ദേഷ്യം വന്നു തുടങ്ങിയിരുന്നു. വാശി കാണിക്കേണ്ട ഞാൻ പറയുന്നതങ്ങ് അനുസരിച്ചാൽ മതി. പപ്പ പറയുന്നത് എന്താണ് ഞാൻ അനുസരിക്കാതിരുന്നിട്ടുള്ളത്...? നാട്ടിലേക്ക് പോകേണ്ടായെന്ന് പറയാനുള്ള കാരണമാണ് ഞാൻ ചോദിച്ചത്..?

അതറിഞ്ഞാൽ ഞാൻ വാശി കാണിക്കില്ല. നീ എന്നെ ചോദ്യം ചെയ്യുകയാണോ...?മഹേഷ് ദേഷ്യത്തോടെ അവനെ നോക്കി. നിങ്ങൾ രണ്ടും ഇതെന്തിനുള്ള പുറപ്പാടാണ്...? അവൻ ചോദിച്ചതിൽ എന്താണ് തെറ്റ് മഹേഷേട്ടാ. നാട്ടിലേക്ക് പോകേണ്ട എന്നതിനുള്ള കാരണമല്ലേ ചോദിച്ചത്..? വരുമെന്നുള്ള പ്രതീക്ഷയിൽ നിൽക്കുന്ന അമ്മയോട് ഇനി എന്ത് പറയും.. അതിഥി നിരാശയോടെ പറഞ്ഞു. നിങ്ങൾക്ക് കാരണമല്ലേ അറിയേണ്ടത്...? ഞാനാണ് അങ്കിളിനോട് ഈ യാത്ര മുടക്കാൻ പറഞ്ഞത്. എന്നെ തറവാട്ടിലേക്ക് അച്ഛമ്മ ഒരിക്കലും കയറ്റില്ല കല്ല്യാണം കഴിയാതെ. അല്ലെങ്കിലും അച്ഛമ്മയ്ക്ക് എന്നെ കണ്ടുകൂടാ, നിങ്ങളാരുമില്ലാതെ എനിക്ക് ലണ്ടിനിലേക്ക് പോവേണ്ട. തനവിനറിയുന്ന കാര്യമല്ലേ എനിക്ക് നിന്നെ കാണാതെ ഒരുനിമിഷം പോലും നിൽക്കാൻ കഴിയില്ലെന്ന്. നീ നാട്ടിൽ നിന്നും തിരിച്ചെത്തുന്നതുവരെ എനിക്ക് നീ ഇല്ലാതെ പറ്റില്ല ടാ ഒന്ന് മനസ്സിലാക്ക് ക്ഷമ സങ്കടത്തോടെ പറഞ്ഞു. അതുകേട്ടതും അതിഥിയുടെയും തനവിന്റെയും മുഖമൊന്നു വാടി. അവൾ പറയുന്നത് ശരിയാണ്,

അവളെ അച്ഛമ്മയ്ക്കത്ര ഇഷ്ടമില്ല, അതിന് കാരണം ഏറെയുണ്ട്, ആരെയും ബഹുമാനിക്കാത്ത ഒരു പ്രകൃതമാണ് ക്ഷമയ്ക്ക് പെട്ടെന്ന് ദേഷ്യം വരും, പിന്നെ ലണ്ടനിൽ വളർന്നതുകൊണ്ട് തന്നെ കേരളത്തിലെ സംസ്കാരത്തോട് ഒട്ടും ഇണങ്ങില്ല അവൾ വസ്ത്രധാരണ രീതിയിലും ഭക്ഷണരീതിയിലും ജീവിതശൈലിയിലും എല്ലാം അവൾക്ക് അവളുടേതായ കാഴ്ചപ്പാടുകളുണ്ട്, അതിനെ ആരു വിമർശിച്ചാലും അവൾ ശക്തമായി എതിർക്കും. മുൻപ് രണ്ടു തവണ എല്ലാവരുടേയും കൂടെ അവൾ നാട്ടിൽ വന്നപ്പോഴും അച്ഛമ്മയുമായി നല്ല ഉടക്ക് കഴിഞ്ഞതാണ്. അതുകൊണ്ടുതന്നെ രണ്ടാൾക്കും പരസ്പരം ഒട്ടും ഇഷ്ടമല്ല. ക്ഷമയോട് എത്ര പറഞ്ഞിട്ടും കാര്യമില്ല അച്ഛമ്മയെ ബഹുമാനിക്കാൻ. ചുണ്ടിൽ ചായം തേച്ച് മുടി തോളറ്റം മുറിച്ച് പ്രായത്തിനിണങ്ങാത്ത വസ്ത്രവും ധരിച്ച് മോഡേൺ ചിന്താഗതിയുമായി കഴിയുന്ന അവളുടെ ഗ്രാൻഡ്മ്മയുമായിട്ടാണ് അച്ഛമ്മയെ അവൾ താരതമ്യം ചെയ്യുന്നത്. നാട്ടിൻപുറത്തിനപ്പുറം ഒരു ലോകമില്ലാത്ത അച്ഛമ്മയുടെ സംസ്കാരവും അവരുടെ സംസ്കാരവും തമ്മിൽ വലിയ അന്തരമുണ്ട്.

അത് മനസ്സിലാക്കി പെരുമാറേണ്ടത് നമ്മളാണ്, അതിനെ എതിർക്കുമ്പോഴാണ് പ്രശ്നം ഒന്നനുസരിച്ച് നോക്കിയാൽ മതി. അത് പറഞ്ഞാൽ അവൾക്കും മനസ്സിലാവില്ല. എന്ത് ചെയ്യുമെന്നറിയാതെ അഥിതി തനവിനെ നോക്കി. അമ്മയോട് എന്തെങ്കിലും കാരണം ഞാൻ പറഞ്ഞോളാം.. നിങ്ങളാരും അതിനെ കുറിച്ചോർത്തു വിഷമിക്കേണ്ട ലണ്ടനിലേക്ക് പോകാൻ തയ്യാറായിക്കോളൂ മഹേഷ് എല്ലാവരെയും നോക്കി പറഞ്ഞു. ഇനി പ്രത്യേകിച്ച് കാര്യങ്ങളൊന്നും അച്ഛമ്മയോട് ആരും പറയേണ്ട കാര്യങ്ങളൊക്കെ ഞാൻ പറഞ്ഞിട്ടുണ്ട്, അച്ഛമ്മ ലൈനിലുണ്ട്, പപ്പയോട് സംസാരിക്കണമെന്ന്. ഋതു മഹേഷിന് നേരെ ഫോൺ നീട്ടിക്കൊണ്ട് പറഞ്ഞു. മഹേഷ് എല്ലാവരെയും നോക്കി ആ ഫോണ് വാങ്ങി ചെവിയോടടുപ്പിച്ചു. ഇതിനിടയിൽ നീ ഇതെപ്പോൾ സാധിച്ചു. തനവ് അവളെ നോക്കി പതിയെ ചോദിച്ചു. പപ്പ ചേച്ചിയേയും കൊണ്ട് വരുന്നത് കണ്ടപ്പോഴേ ഞാൻ ഉറപ്പിച്ചു എന്തോ പന്തികേടുണ്ടെന്ന്, കാര്യം അറിഞ്ഞതും ആരും കാണാതെ പോയി അച്ഛമ്മയ്ക്ക് വിളിച്ചു കാര്യങ്ങളെല്ലാം പറഞ്ഞു.

ആവശ്യത്തിന് എരിവും പുളിയും എല്ലാം ചേർത്തിട്ടുണ്ട്, ബാക്കി കാര്യം അച്ഛമ്മ നോക്കിക്കോളും അവൾ കണ്ണിറുക്കി കൊണ്ട് തനവിനെ നോക്കി പതിയെ പറഞ്ഞു. എന്താ അവിടെ ഒരു വിഷയം...? ഇങ്ങോട്ട് എത്തുമ്പോഴേക്കും എത്ര ടൈം ആവുമെന്ന് കൃത്യമായിട്ട് പറയണം.. കൂട്ടാനായിട്ട് രാഘവനോട് പറഞ്ഞിട്ടുണ്ട് ടൈം അറിഞ്ഞാൽ അവൻ എയർപോർട്ടിലേക്ക് വന്നോളും.അമ്മയുടെ ആ സംസാരത്തിന് മുമ്പിൽ എന്തുപറയണമെന്നറിയാതെ മഹേഷ് ഒന്നു പരുങ്ങി . അതമ്മേ കമ്പനിയിൽ ചെറിയൊരു പ്രശ്നം, അവിടേക്ക് പെട്ടെന്ന് എത്തണം അതുകൊണ്ട് ഞങ്ങൾ യാത്ര ഒന്ന് മാറ്റി. യാത്ര മാറ്റീന്നോ..?കാര്യം എന്താണെന്നൊക്കെ എന്നോട് മോള് പറഞ്ഞു, നിങ്ങൾക്ക് രണ്ടുപേരും വേണമെങ്കിൽ ലണ്ടനിലേക്ക് പൊയ്ക്കോളു. എന്റെ മക്കളെ എനിക്ക് കാണണം, അവര് വരും എന്നറിഞ്ഞപ്പോൾ തൊട്ട് സന്തോഷത്തിലിരിക്കുകയാണ്, എല്ലാവരെയും വിളിച്ചു തറവാട്ടിൽ എത്തണമെന്ന് പ്രത്യേകം പറഞ്ഞിട്ടുണ്ട്. മക്കളേയും പേരക്കുട്ടികളേയും മരുമക്കളുയുമൊക്കെ എനിക്ക് കണ്ണ് നിറച്ച് ഒന്ന് കാണണം അവരെ എല്ലാവരുടെയും കൂടെ ഒരു ദിവസമെങ്കിലും കഴിയണം

എനിക്ക്. നാളും പ്രായവും കൂടിവരികയാണ്, ഓരോ ദിവസം കഴിയുംതോറും ഓരോ അസുഖങ്ങളാണ് ശരീരത്തിൽ ഇനി ഒരു പക്ഷേ ആരെയും ഒന്നിച്ച് കണ്ടു കണ്ണടയ്ക്കാൻ എനിക്ക് കഴിഞ്ഞെന്ന് വരില്ല, എന്റെ ഒരു വലിയ ആഗ്രഹമാണ് എല്ലാവരെയും കൂടെ എല്ലാവരും ഒരുമിച്ച് തറവാട്ടിൽ ഒന്ന് കൂടണമെന്ന്.അതിന് നിനക്ക് എതിർപ്പാണെങ്കിൽ ഞാൻ നിർബന്ധിക്കുന്നില്ല എന്റെ മക്കളെങ്കിലും ഇങ്ങോട്ട് വിടണം. ഇനി നിന്റെ ഭാവി മരുമകളാണ് പ്രശ്നമെങ്കിൽ അവളുമായിട്ട് ഞാൻ യാതൊരുവിധ പ്രശ്നത്തിനും പോവില്ല അവളെയും കൂടെ കൂട്ടിക്കോ എനിക്ക് എതിർപ്പില്ല, അല്ലെങ്കിലും കുടുംബത്തിൽ കേറ്റാൻ കൊള്ളാത്ത ഓരോന്നിനെ പിടിച്ച് മരുമകൾ ആക്കിയാൽ ഇങ്ങനെ ഇതൊക്കെ അനുഭവിച്ചല്ലേ മതിയാവൂ, മുറപ്പെണ്ണ് ഒരുത്തിയുള്ളത് ആദ്യമേ ഇഷ്ടപ്പെട്ട ഒരുത്തന്റെ കൂടെ ഇറങ്ങി പോയില്ലേ..?

അല്ലെങ്കിൽ ഇങ്ങനെയുള്ളവരെ ഒന്നും ഞാനീ കുടുംബത്ത് കേറ്റില്ലായിരുന്നു ... അവരുടെ വാക്കുകളിൽ ക്ഷമയോടുള്ള അമർഷം നന്നായി പ്രകടമായിരുന്നു. ഞാൻ പറഞ്ഞതിൽ ഒരു മാറ്റവുമില്ല നിങ്ങൾക്ക് വരാൻ പറ്റിയില്ലെങ്കിലും മക്കളെ വിടണം എല്ലാവരും ഇവിടെ അവരുടെ വരവിനായി കാത്തിരിക്കുകയാണ് എന്റെ വാക്ക് എതിർത്ത് നീ ഒന്നും പറയില്ല എന്നൊരു വിശ്വാസം ഉണ്ട്. ഇനി എന്താച്ചാ നിന്റെ ഇഷ്ടം പോലെ ചെയ്തോളൂ എന്നും പറഞ്ഞ് അവർ ഫോൺ കട്ട് ചെയ്തു. മഹേഷ് ആകെ തോറ്റു കൊടുക്കുന്ന ഒരാളുണ്ടെങ്കിൽ അത് തന്റെ സ്വന്തം അമ്മയുടെ മുൻപിൽ മാത്രമാണ്. ഇത്തവണയും അത് തന്നെ സംഭവിച്ചു അമ്മയുടെ വാക്ക് എതിർക്കാൻ അയാളുടെ മനസ്സ് അനുവദിച്ചില്ല. അമ്മ പറഞ്ഞതുപോലെ അമ്മയ്ക്ക് വയസ്സായതാണ് എന്തെങ്കിലും സംഭവിച്ചു പോയാൽ അത് എന്നും ജീവിതത്തിൽ ഒരു തീരാദുഃഖമായിരിക്കും,

എന്തു സംഭവിച്ചാലും നാട്ടിലേക്ക് പോയേ മതിയാവൂ . എല്ലാവരും വേഗം റെഡിയായിക്കോളൂ നാട്ടിലേക്ക് പുറപ്പെടാം ഒരുമിച്ച്. ആരും തന്നെ ഇവിടെ നിന്ന് ലണ്ടനിലേക്ക് പോകുന്നില്ല അമ്മ അവിടെ കാത്തിരിക്കുന്നുണ്ട് പെട്ടെന്ന് തന്നെ തയ്യാറായിക്കോളൂ . എന്നും പറഞ്ഞ് അദ്ദേഹം അവിടെ നിന്നും പോയി. ക്ഷമ ഒന്നും മനസ്സിലാവാതെ അയാൾക്ക് പിറകെ ഓടി. അങ്കിൾ എന്തൊക്കെയാണ് പറഞ്ഞത് നമ്മൾ എങ്ങനെയാ തനുവിനെകൊണ്ട് നാട്ടിലേക്ക് പോകുന്നത്..? അവിടെവച്ച് എന്തും സംഭവിക്കാം, അവനെ നഷ്ടപ്പെടുത്താൻ ആണോ ഇപ്പോൾ ഈ യാത്ര...? ഒന്നും സംഭവിക്കില്ല നമ്മൾ ഉള്ളപ്പോൾ അവനെ ആരും കാണില്ല, അവന്റെ ചുറ്റും നമ്മൾ ഉണ്ടാവും. ഈ യാത്ര ഒഴിവാക്കാൻ കഴിയില്ല മോളെ പോയി റെഡിയാവാൻ നോക്ക് അവളുടെ തോളിൽ തട്ടി ആശ്വസിപ്പിച്ചു കൊണ്ട് മഹേഷ് അവിടെ നിന്നും പോയി. എന്തും വരട്ടെ എന്നും മനസ്സിൽ ഉറപ്പിച്ച് ക്ഷമയും തന്റെ ബാഗ് പാക്ക് ചെയ്യാൻ തുടങ്ങി...... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...