💕കാണാച്ചരട് 💕: ഭാഗം 75

രചന: RAFEENA MUJEEB

 " ആമിയും അപ്പുവും എയർപോർട്ടിൽ ഏറെ ആകാംക്ഷയോടെ അച്ചു വരുന്നതും നോക്കി നിൽക്കുകയാണ്. ഒരുപാട് പ്രതീക്ഷയുമായി വിദേശരാജ്യങ്ങളിലേക്ക് പറക്കാൻ ഒരുങ്ങുന്നവരും , ഒരുപാട് നാളായി തന്റെ ഉറ്റവരെയും ഉടയവരെയും വിട്ട് അന്യനാട്ടിൽ കഴിഞ്ഞവർ സന്തോഷത്തോടെ തിരികെ വരുന്നതും ആമി സസൂക്ഷ്മം വീക്ഷിച്ചു കൊണ്ടിരുന്നു. ഒരുപാട് കരളലിയിപ്പിക്കുന്ന മുഹൂർത്തങ്ങൾ അരങ്ങേറുന്ന ഒരിടം കൂടിയാണിത് ആമി മനസ്സിലോർത്തു. ഏറെ നേരത്തെ കാത്തിരിപ്പിന് ശേഷമാണ് മോളെയും കൊണ്ട് അച്ചു പുറത്തേക്കിറങ്ങിയത്. രണ്ടുപേരെയും കണ്ടപ്പോൾ അവൾ ഓടി വന്നു കെട്ടിപ്പിടിച്ചു ഏറെനാളത്തെ കാത്തിരിപ്പിന് ശേഷം ആ മൂന്നു കൂട്ടുകാരികൾ ഒരുമിച്ച് കണ്ട സന്തോഷത്തിലായിരുന്നു. അച്ചു ആകെ മാറിയിട്ടുണ്ട് പണ്ട് പെൻസില് പോലെയിരുന്ന ആളായിരുന്നു അവൾ ഇപ്പോൾ തടിച്ചുവീർത്തു വീപ്പക്കുറ്റിയായിട്ടുണ്ട്. " നിനക്ക് എന്താടീ രുദ്രൻ കലക്കി തരുന്നത്..? ആകെ മാറിയല്ലോ..? അവളെ അടിമുടി നോക്കി അപ്പു ചിരിച്ചുകൊണ്ട് ചോദിച്ചു. "എല്ലാവർക്കും എന്റെ കോലം കാണുമ്പോൾ വല്ല്യ പരാതി അല്ലായിരുന്നോ...?എനിക്ക് വണ്ണമില്ലായെന്നും പറഞ്ഞിട്ട് ഇപ്പോ വണ്ണം വെച്ചതായോ പ്രശ്നം "അച്ചു പരിഭവത്തോടെ പറഞ്ഞു.

" അയ്യോ ഇല്ല ആരും നിന്നെ കണ്ടാൽ ഇനി ഒരു പരാതിയും പറയില്ല നീ അടിമുടി മാറി". ആമി അവളെ കെട്ടിപ്പിടിച്ചു കൊണ്ടു പറഞ്ഞു. " ഡെലിവറിയൊക്കെ കഴിഞ്ഞതല്ലേ മോളെ അതിന്റെയാ.. ഞാൻ വണ്ണം കുറയ്ക്കാൻ ശ്രമിക്കുന്നുണ്ട്." നീയിപ്പോ അധികം വണ്ണം കുറക്കാനൊന്നും ശ്രമിക്കേണ്ട!! കുഞ്ഞിന് ഫീഡിങ് ഉള്ളതല്ലേ നല്ല പോഷകാഹാരങ്ങൾ കഴിക്കണം എന്നാലേ കുഞ്ഞിന് പാല് കിട്ടൂ... ആമി അവളുടെ കുഞ്ഞിനെ കൈകളിൽ കോരിയെടുത്ത് കൊണ്ട് പറഞ്ഞു. രണ്ടുപേരും അവളെ മാറി മാറി സ്നേഹിച്ചതും അപരിചിതരെ മനസ്സിലാവാതെ അവൾ വാവിട്ടു കരയാൻ തുടങ്ങി. അവസാനം അച്ചു അവളെയെടുത്ത് തോളിലിട്ടപ്പോഴാണ് അവൾ കരച്ചിലൊന്ന് അവസാനിപ്പിച്ചത്. ആമി പക്ഷെ വിടാൻ ഉദ്ദേശിച്ചില്ല അവൾ കുഞ്ഞിന് ഓരോന്നൊക്കെ കാണിച്ചു പതിയെ അവളെ കയ്യിലെടുത്തു. ആമിയുമായി അവൾ പെട്ടെന്ന് ഇണങ്ങി. തിരികെയുള്ള യാത്രയിൽ ആമി യോടൊപ്പം തന്നെയായിരുന്നു കുഞ്ഞ്. അവർ മൂന്നുപേരും കൂടി നേരെ അപ്പുവിന്റെ വീട്ടിലേക്കാണ് പോയത്.

അവിടെ അപ്പുവിന്റെയമ്മ അവർക്കായി നല്ല നാടൻ വിഭവങ്ങൾ ഒരുക്കിയിരുന്നു. വിശപ്പ് കാരണം മൂന്നുപേരും അതൊക്കെ ഒറ്റയിരിപ്പിന് അകത്താക്കി. അന്നത്തെ ദിവസം മൂന്നുപേരും കളിയും ചിരിയുമായി അവിടെത്തന്നെ കൂടി. പഴയ ഓർമ്മകൾ അയവിറക്കിയും വിശേഷങ്ങൾ പങ്കുവെച്ചും ഉറങ്ങാൻ ഒരുപാട് വൈകി. രാത്രി ഏറെ വൈകിയപ്പോഴാണ് അപർണ്ണ ജാനകിയെ വിളിച്ച് ആമിയെ ഇന്ന് വിടില്ല എന്ന് പറഞ്ഞത്. ജാനകിയ്ക്ക് ഒട്ടും തൃപ്തി ഇല്ലാതെയാണ് അതിന് അർദ്ധ സമ്മതം മൂളിയത്. രാഘവൻ ഇതു വല്ലതും അറിഞ്ഞാൽ ദേഷ്യപ്പെടുമോയെന്ന ഭയം കാരണമാണത്. അവർ ഉള്ളിലെ ആതി പ്രസാദിനെ വിളിച്ചു പങ്കുവെച്ചു. നേരം പുലർന്നാൽ അവളെയും വിളിച്ച് വീട്ടിലേക്ക് വരാൻ അവനെ ഏൽപ്പിച്ചു. രാവിലെ ആമി ഉണർന്നത് തന്നെ പ്രസാദിനെ കണികണ്ടു കൊണ്ടാണ്. ജാനകി സ്വൈര്യം കൊടുക്കാതെ പറഞ്ഞു വിട്ടതാണ് ആമിയെ വിളിച്ചോണ്ട് വരാൻ. അമ്മയുടെ ആതിയും വെപ്രാളവും എന്തിന്റെ പേരിലാണെന്ന് അറിയാവുന്നത് കൊണ്ട് തന്നെ ആമി മറുത്തൊന്നും പറയാതെ പ്രസാദിന്റെ കൂടെ വീട്ടിലേക്ക് പുറപ്പെട്ടു .

അച്ചുവിനെ അപ്പു തന്നെയാണ് വീട്ടിൽ കൊണ്ടു വിട്ടത്. എത്ര നിർബന്ധിച്ചിട്ടും അവൾ വെളിയിലിറങ്ങാൻ കൂട്ടാക്കാതെ അവളെ മുറ്റത്തിറക്കി പെട്ടെന്ന് തന്നെ പോയി. ഒരുപാട് നാളുകൾക്കു ശേഷം തന്റെ തറവാട് കണ്ട സന്തോഷത്തിൽ ആയിരുന്നു അച്ചു. അവളെ കണ്ടതും വീട്ടുകാരെല്ലാം സന്തോഷത്തോടെ ഓടി വന്ന് അവളെ സ്വീകരിച്ചകത്തേക്ക് കൊണ്ടുപോയി. ************ ആമിയേയും കൊണ്ടു പ്രസാദ് വീട്ടിലെത്തുമ്പോൾ ഉമ്മറത്ത് തന്നെ അവരെയും പ്രതീക്ഷിച്ച് ജാനകി ഇരിപ്പുണ്ടായിരുന്നു. ആമിയെ കണ്ടപ്പോഴാണ് ജാനകിയുടെ ശ്വാസം നേരെ വീണത്. വീട്ടിലെത്തിയ പ്രസാദ് ആദ്യം അന്വേഷിച്ചത് ദേവയേയാണ്. അവളോട് ഗൗരവമുള്ള ചില കാര്യങ്ങളൊക്കെ സംസാരിച്ച ശേഷം പ്രസാദ് തന്റെ വീട്ടിലേക്ക് പോയി. ************ അച്ചുവിനു താൻ ജനിച്ചു വളർന്ന വീട്ടിൽ വീണ്ടും വന്ന സന്തോഷമായിരുന്നു.

രുദ്രന്റെ കൂടെ ഈ വീടുപേക്ഷിച്ചു പോയതിനുശേഷം ആദ്യമായിട്ടാണ് താൻ ഇങ്ങോട്ട് വരുന്നത്. അച്ഛനേയും അമ്മയേയും അനിയത്തിമാരേയും കണ്ട സന്തോഷത്തിലാണവൾ. അവളെയും കുഞ്ഞിനേയും കണ്ട സന്തോഷം വീട്ടുകാർക്കുമുണ്ട്. എല്ലാവരും അവർക്ക് ചുറ്റുമിരുന്നു വിശേഷങ്ങൾ ചോദിക്കുന്ന തിരക്കിലാണ്. അപ്പോഴാണ് അവിടേക്ക് അതിഥിയും ഋതുവും വരുന്നത്. അതിഥി അമ്മായിയെ അവൾ കുഞ്ഞിലേ കണ്ടതാണ് മോന്റെ ആക്സിഡന്റിന് ശേഷം അവരാരും നാട്ടിൽ വന്നിട്ടില്ല, ഇടയ്ക്ക് മഹേഷ് മാമൻ വന്നു ഋതുവിനെ തറവാട്ടിൽ ആക്കാറുണ്ട് അതുകൊണ്ട് അവരെ രണ്ടുപേരെയും എല്ലാവർക്കുമറിയാം. അച്ചു അമ്മായിയോടും ഋതുവിനോടും അവൾ വിശേഷങ്ങളൊക്കെ സംസാരിച്ചിരുന്നു. തനവ് രാവിലെതന്നെ പ്രാക്ടീസിന് പോയതാണ്. അവനു കൂട്ടായി ക്ഷമയും മഹേഷും പോയിട്ടുണ്ട്.. അതുകൊണ്ട് അവരെ മാത്രം അവൾ കണ്ടില്ല.

കുറച്ചുനേരം എല്ലാവരോടും വിശേഷം പറഞ്ഞ് അവൾ കുഞ്ഞിനെ ഉറക്കാനായി റൂമിലേക്ക് പോയി. മോളെ ഉറക്കിയ ശേഷം അവൾ കുളിക്കാനായി കുളത്തിലേക്ക് നടന്നു.. പണ്ട് കോളേജ് ഹോസ്റ്റലിൽ പഠിക്കുന്ന കാലത്തും വീട്ടിലെത്തിയാൽ കുളത്തിൽ വിസ്തരിച്ച് ഒരു കുളി നിർബന്ധമാണ്, ആ ഓർമ്മകളുടെ കൂട്ടുപിടിച്ച് അവൾ വീണ്ടും ആ കുളത്തിലേക്ക് ഇറങ്ങി . കുളികഴിഞ്ഞ് ഈറനോടെ നടുമുറ്റത്ത്എത്തിയപ്പോഴാണ് മുറ്റത്തേക്ക് ഒരു കാർ വന്നു നിന്നത്. അതിൽ നിന്നും ആദ്യം ഇറങ്ങിയത് മഹേഷാണ്. മാമനെ കണ്ടതും അവൾ ഒന്ന് പുഞ്ചിരിച്ചു അദ്ദേഹത്തിനരികിലേക്ക് നടന്നു. പുറകെ ഇറങ്ങിയ ക്ഷമയെ അവൾക്ക് പരിചിതമില്ലാത്തതുകൊണ്ട് അവളൊന്നു സംശയിച്ചു നിന്നു. അപ്പോഴേക്കും അവളെ കണ്ട മഹേഷും പുഞ്ചിരിയോടെ അവളെ നോക്കി. മാമനേയും കൂടെയുള്ള ആ പെൺകുട്ടിയേ യും മാറിമാറി നോക്കുന്നതിനിടയിലാണ് അവളെ ഞെട്ടിച്ചുകൊണ്ട് ഡ്രൈവിംഗ് സീറ്റിൽ നിന്നും തനവ് ഇറങ്ങി വന്നത്. "അരവി "

അവനെ കണ്ടതും അവളുടെ ചുണ്ടുകൾ മന്ത്രിച്ചു. അവൾക്ക് അവളുടെ കണ്ണുകളെ വിശ്വസിക്കാൻ കഴിയുന്നില്ല. തന്റെ മുൻപിൽ നിൽക്കുന്നത് ആരാണ്...? ഒറ്റനോട്ടത്തിൽ തന്നെ അറിയാം അത് അരവിയാണെന്ന്. പക്ഷേ രൂപത്തിലും ഭാവത്തിലും ഒരുപാട് വ്യത്യാസങ്ങളുണ്ട്. അച്ചുവിനെ കണ്ടിട്ടും അവന്റെ മുഖത്ത് യാതൊരു ഭാവ വ്യത്യാസവും ഇല്ല. അവളെ മുൻപ് കണ്ട ഒരു പരിചയവും അവന്റെ മുഖത്തില്ല അവളത് പ്രത്യേകം ശ്രദ്ധിച്ചു. ഇതാണ് എന്റെ മകൻ തനവ് എന്നും പറഞ്ഞ് അതിഥി അവരുടെ അടുത്തേക്ക് വന്നു. തനവിനെ അവൾക്കും അവളെ തനവിനും പരിചയപ്പെടുത്തി. അവൾക്ക് എന്ത് പറയണം എന്നറിയാത്ത ഒരു അവസ്ഥയായിരുന്നു. അവർ പറയുന്നതിനെല്ലാം യാന്ത്രികമായി അവൾ തലയാട്ടികൊണ്ടിരുന്നു. അവരെല്ലാം അകത്തേക്ക് കയറി പോയപ്പോഴാണ് അവൾക്ക് ബോധം വന്നത്. അവൾ ധൃതിയിൽ റൂമിലേക്ക് നടന്നു. ഫോണെടുത്തു അപ്പുവിനെ വിളിച്ചു കാര്യം പറഞ്ഞു. അവൾ പറയുന്ന കാര്യം കേട്ടതും അപ്പു ഒരു ഞെട്ടലോടെ നിന്നു. ചില കാര്യങ്ങൾ നേരിട്ട് പറയാനുണ്ട് നീ പെട്ടെന്ന് തന്നെ ടൗണിലേക്ക് എത്തണമെന്ന് അപ്പു അവളോട് പറഞ്ഞു. തൽക്കാലം ഈ വിവരമൊന്നും ആമി അറിയരുതെന്നവൾ പ്രത്യേകം അച്ചുവിനോട് പറഞ്ഞു. അച്ചു അതെല്ലാം അംഗീകരിച്ച അവളെ കാണാനായി അപ്പോൾതന്നെ ടൗണിലേക്ക് പുറപ്പെട്ടു...... തുടരും..

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...