💞പ്രണയിനി 💞: ഭാഗം 17

രചന: SHREELEKSHMY SAKSHA

ചേക്കാട്..... ഒരു കൊച്ചു ഗ്രാമം. നിറയെ നെൽപ്പാടങ്ങളും കുന്നും മലകളുമുള്ള ഒരു കൊച്ചു ഗ്രാമം. പത്താം ക്ലാസ്സിൽ പഠിക്കുമ്പോൾ അമ്മക്ക് സ്ഥലം മാറ്റം കിട്ടി ആണ് ചെക്കാടേക്ക് പോകുന്നത്. അച്ഛനും അമ്മയ്ക്കും രണ്ടിടത്തായിരുന്നു ജോലി. അച്ഛൻ ഞായർഴ്ച മാത്രം വന്നുപോകാം എന്ന തീരുമാനത്തിൽ ചേക്കാട് ഒരു വാടക വീട്ടിൽ അമ്മയും ഞാനും ലെച്ചുവും താമസിക്കാൻ പോകുന്നു. അന്ന് വീട്ടിലേക്ക് അച്ഛനും ഉണ്ടായിരുന്നു... നേരത്തെ താമസിച്ച സ്ഥലത്തുനിന്നും തികച്ചും വ്യത്യസ്തമായ സ്ഥലം. കണ്ണെത്ത ദൂരത്തോളം പരന്നു കിടക്കുന്ന നെൽപ്പാടം അതിന്റെ വരമ്പത്തുകൂടെ നടന്നു വേണം പോകാൻ.. എനിക്ക് അത് പുതിയ കാഴ്ചകൾ ആയിരുന്നു. കുസൃതിയോടെ കതിരിൽ തട്ടി നടക്കുമ്പോൾ അച്ഛൻ വഴക്ക് പറയും. അവർ എത്ര കഷ്ടപ്പെട്ട് കൃഷി ചെയ്യുന്നതാണ് ,കതിരിൽ തട്ടി നെല്ല് പൊഴിക്കാതെ വരമ്പത്തുകൂടെ നടക്കാൻ പറയും. അമ്മ ലെച്ചുവിന്റെ കൈയിൽ പിടിച്ചിട്ടുണ്ട്. എന്നെ വഴക്ക് പറയുമ്പോൾ അവൾ വാ പൊത്തി ചിരിക്കും.

പാടം കടന്നു പാലത്തിനു മുകളിൽ കയറിയപ്പോൾ തോടിനു കലിങ്കിനു താഴെ കുറെ പെൺകുട്ടികൾ തുണി അലക്കുന്നു. കലുങ്കിൽ ഒരു ചെറിയ ആൺകുട്ടി ഇരിപ്പുണ്ട്. അവനെക്കാൾ പ്രായം കുറഞ്ഞ ഒരു കൊച്ചുകുട്ടിയും അവിടെ ഉണ്ട്. അവൾ ആദ്യം തന്നെ എന്നെ നോക്കി ചിരിച്ചു. മുൻപിലെ മുകളിലെ രണ്ട് പാൽ പല്ലുകളും കൊഴിഞ്ഞു പോയിരുന്നു. അവൾ ചിരിക്കുമ്പോൾ അവളുടെ കുഞ്ഞി വെള്ളാരം കണ്ണുകൾ തിളങ്ങുന്നത് കാണാൻ നല്ല ഭംഗിയാണ്.. ഞാനും തിരിച്ചു ചിരിച്ചു. അവളുടെ അടുത്തുനിന്ന ഒരു പെൺകുട്ടി അലക്കിയ തുണി മാറ്റിവെച്ചു. പാദം മറച്ചു കിടന്ന പാവാട എടുത്തു ഇടുപ്പിൽ പൊക്കി കുത്തി വെച്ച് അവളെ എടുത്ത് അലക്ക് കല്ലിന്മേൽ നിർത്തി കുളിപ്പിക്കാൻ തുടങ്ങി. "ഡാ അപ്പു ഇറങ്ങി കുളിക്കട..."അടുത്തു നിന്ന ഒരു പെൺകുട്ടി കാലിങ്കിന്മേൽ ഇരുന്ന ചെറുക്കനോട് പറഞ്ഞു അവൾ എഴുന്നേറ്റ് ഒരു മലക്കം മറിഞ്ഞു തോട്ടിലേക്ക് ചാടി.. അവളുടെ സംസാരം കേട്ടപ്പോൾ അച്ഛനും അമ്മയും ലെച്ചുവും അവിടേക്ക് നോക്കി... ഞാൻ അങ്ങോട്ട് നോക്കി നടക്കുന്നത് കണ്ട് ചെക്കൻ ഇപ്പോഴേ പെൺകുട്ടിയോൾ കുളിക്കുന്നതാ നോട്ടം.. എന്നുപറഞ്ഞു എന്റെ തലക്ക് ഒരു കോട്ടും തന്ന് നേരെ നടത്തിച്ചു.

എങ്കിലും അവരുടെ നോട്ടം മാറിയപ്പോൾ ഞാൻ അങ്ങോട്ട് തന്നെ നോക്കി വെള്ളം തെറിച്ചു പെൺകുട്ടികളുടെ എല്ലാം ദേഹത്ത് വീണു. കല്ലിന്മേൽ നിന്ന് കൊച്ചരി പല്ലുകൾ കാട്ടി അവൾ ചിരിച്ചു. അപ്പൂസേ എന്ത് പണിയ കാണിച്ചേ... അവളെ കുളിപ്പിച്ച് കൊണ്ട് നിന്ന പെൺകുട്ടി ചോദിച്ചു. അപ്പോഴാണ് ഞാൻ അവളെ ശ്രദ്ധിക്കുന്നത്. പച്ച പാവാടക്കാരി, നീണ്ട കോലൻ മുടി വകഞ്ഞു പൊക്കി ചുറ്റി കെട്ടിയിരുന്നു. കാതിൽ ഒരു കൊച്ചു ജിമിക്കി. ഒരു കാലു വെള്ളത്തിലും മറ്റേ കാലു കുറച്ചു പൊക്കി കല്ലിന്മേലും വെച്ചാണ് നിൽപ്പ്. കാലിൽ വെള്ളം പറ്റി കാലിനോട് ചേർന്ന കിടക്കുന്ന ഒറ്റ ചെയിനുള്ള വെള്ളി പാദസരം. കൈയിൽ വളയൊന്നും ഇല്ലാ... അലക്കാൻ വന്നതുകൊണ്ട് ഊരി വെച്ചതാണോ... ഞാൻ ഞാൻ മറ്റു കുട്ടികളുടെ കയ്യിലേക്കും നോക്കി.. ആരുടെ കൈയിലും ഇല്ലാ... അപ്പൊ അതുകൊണ്ടാകും... പാലം കഴിയും വരെയും ഞാൻ അവരെ തന്നെ നോക്കി നടന്നു. പാലം കഴിഞ്ഞ് ഒരു വളവ് തിരിഞ്ഞാൽ ഉടനെ വീട് ആണ്..

ഓടിട്ട ഒരു കുഞ്ഞു വീട്. മുൻപിലത്തെ തുളസി തറയിൽ പച്ച പായാൽ ചെറുതായി പിടിച്ചു കയറി തുടങ്ങിയിട്ടുണ്ട്.. മുറ്റത്തിന്റെ വടക്കേ അറ്റത് ഒരു കൊച്ചു ചാമ്പ മരം. അതിനു അടുത്തായി തന്നെ ഒരു പേര മുറ്റത് നിറയെ ചെടികൾ ഉണ്ട്. ഗേറ്റിനോട് ചേർത്ത് മതിലിന്റെ പൊക്കത്തിൽ മഞ്ഞ കോളാമ്പി വളർന്നു നിൽപ്പുണ്ട് അതിനിപ്പുറത്തായി രാജമല്ലി, തെച്ചി കനകാംബരം, മല്ലി, ശിവനരുളി ഗന്ധരാജൻ, അങ്ങനെ കുറെ ചെടികൾ. വീടും ചുറ്റുപാടും വളരെ പെട്ടന്ന് തന്നെ എനിക്കിഷ്ടമായി.. രണ്ട് മുറിയെ ഉള്ളു വീട്ടിൽ. പിന്നെ അടുക്കള അതിനോട് ചേർന്നൊരു ചെറിയ ചായിപ്പ്. നടുമുറി, ഉമ്മറം, കുളിപ്പുര ഓക്കെ വെളിയിലാണ്. വീടിന്റെ പിന്നാമ്പുറത്ത് ചെന്നാൽ മുൻപേ കണ്ട തോടിന്റെ ബാക്കി കാണാം. അതിന്റെ ചിറയിൽ എല്ലാം കവുങ്ങ് നട്ടു പിടിപ്പിച്ചിരുന്നു. അച്ഛൻ അന്ന് തന്നെ തിരികെ ജോലി സ്ഥലത്തേക്ക് പോയി. പോകുംമുമ്പ് എന്നെ കുറെ ഉപദേശിച്ചു. ഇനി ഇവിടെ അമ്മയും നീയും ലെച്ചുവും ആണ് നിൽക്കേണ്ടത് കളിച്ചു നടക്കരുത് അമ്മക്ക് വേണ്ടതെല്ലാം ചെയ്തു കൊടുക്കണം ലെച്ചുവുമായി വഴക്ക് കൂടാതെ എല്ലാം കണ്ട് അറിഞ്ഞു ചെയ്യണം. കുട്ടിക്കളി മാറ്റി വെക്കണം. അങ്ങനെ കുറെ.... എല്ലാം കേട്ട് കഴിഞ്ഞ് ഞാൻ വലിയ ആളാരോ ആയപോലെ തോന്നി എനിക്ക്. അല്പം ഗൗരവം ഓക്കെ മുഖത്ത് വെച്ചു. എല്ലാം തലകുലുക്കി കേട്ടു.

അച്ഛൻ പോയി കഴിഞ്ഞ് ഞാൻ അച്ഛന്റെ സ്ഥാനം ഏറ്റെടുത്തു. ലെച്ചു വന്നു മുടിയിൽ പിടിച്ചു വലിക്കുമ്പോൾ പഴയ പോലെ തല്ലു കൂടാതെ അവളെ വഴക്ക് പറഞ്ഞു മാറ്റി നിർത്തി. അമ്മ പറയുമുന്ബെ എല്ലാം കണ്ടറിഞ്ഞു ചെയ്തു. ലെച്ചുവിനും എനിക്കും പുതിയ സ്കൂളിൽ അഡ്മിഷൻ ഓക്കെ അമ്മ ശരിയാക്കി.. അമ്മയും ആ സ്കൂളിൽ തന്നെയാണ് പഠിപ്പിക്കുന്നത്.ഒരു കൊച്ചു സ്കൂൾ ആയിരുന്നു 10വരെ ഉണ്ടായിരുന്നുള്ളു സ്കൂളിൽ ചെന്നപ്പോ അന്ന് തോട്ടിൽ കണ്ട പെൺകുട്ടികൾ എല്ലാം ഉണ്ട്. എന്റെ ക്ലാസ്സിൽ അല്ല 8ലോ മറ്റോ ആണ്. ഞാൻ തിരഞ്ഞത് മുഴുവൻ ആ കൊച്ചു പെറ്റിക്കോട്ടുകാരിയെ ആയിരുന്നു. അവൾക്ക് സ്കൂളിൽ ആവാനുള്ള പ്രായം ആയി കാണില്ലല്ലോ എന്ന് ഓർത്തപ്പോൾ സ്വയം തലക്ക് കൊട്ട് കൊടുത്തു. വൈകിട്ട് സ്കൂൾ വിട്ട് ഞാനും ലെച്ചുവും കൂടെ ആണ് നടന്നു വരിക.. അമ്മ പിന്നെ കുറെ കൂടെ കഴിഞ്ഞേ വരൂ. അപ്പോഴും ആ പാവടക്കാരി കൂട്ടുകാരികളോടൊപ്പം കാര്യം പറഞ്ഞു നടക്കും. ഇപ്പൊ കൈ നിറയെ കുപ്പിവളകൾ ഉണ്ട്. മിക്ക ദിവസങ്ങളിലും അവൾ ഞങ്ങളുടെ മുൻപിലാകും നടക്കുക.. ലെച്ചുവിനെ നോക്കി അവൾ എന്നും ചിരിക്കും അവളും ചിരിക്കും. ഒരു ഞായർഴ്ച അച്ഛൻ വന്നിട്ടുണ്ടായിരുന്നു.

ഞാൻ മുറ്റത്തു നിന്ന് ലെച്ചുവിന് ചാമ്പക്ക പൊട്ടിച്ചു കൊടുക്കുമ്പോൾ. പെട്ടന്ന് ഗേറ്റ് കടന്ന് ഒരു പശുകുട്ടി കേറി വന്നത്. അത് ചാടി തുള്ളി തെച്ചി മുഴുവൻ ചവിട്ടി നശിപ്പിച്ചു. ഞാനും ലെച്ചുവും എന്ത് ചെയ്യണം എന്ന് അറിയാതെ നോക്കി നിന്നു. അതിന്റെ ചാട്ടവും കഴുത്തിൽ കെട്ടിയ മണിയുടെ കിലുക്കവും എല്ലാം കേട്ട് ലെച്ചു ആകെ രസിച്ചു ഇരിക്കുവാണ്.. അത് തെച്ചി തിന്നുന്നത് കണ്ട് എനിക്ക് പേടിയും. കുറച്ചു കഴിഞ്ഞതും ആ പാവടക്കാരിയും പിന്നാലെ പെറ്റിക്കോട്ട് കാരിയും ഗേറ്റ് കടന്നു വന്നു. അവൾ അതിന്റെ കയറിൽ പിടിച്ചു നിർത്തി. ചെടി തിന്നാതെ അതിനെ പിടിച്ചു മാറ്റി അടക്കി നിർത്തി. അപ്പോഴേക്കും അത് തെച്ചി പകുതിയും ചവിട്ടിയും തിന്നും നശിപ്പിച്ചിരുന്നു. സോറി... കയറു പൊട്ടിച്ചു ഓടി വന്നതാ.... അവൾ എന്നെ നോക്കി പറഞ്ഞു. ഞാൻ അവളെയും തെച്ചിയേയും മാറി മാറി നോക്കി എന്റെ നോട്ടം കണ്ടാകും അവൾ ചെടിയിലേക്ക് നോക്കി. അപ്പൊ തന്നെ അവളുടെ കണ്ണെല്ലാം കരയാൻ ആയി നിൽപ്പുണ്ടായിരുന്നു. തെച്ചി വേറെ തരാം... ചുവപ്പ് ആണെന്നെ ഉള്ളു..

ചിലമ്പിച്ച ശബ്ദത്തോടെ അവൾ പറഞ്ഞു. അവിടെ നിന്നത് മഞ്ഞയാണ് പെറ്റിക്കോട്ട് കാരി അപ്പോഴേക്കും ചിരിച്ചുകൊണ്ട് ലെച്ചുവിന്റെ കൈയിൽ വന്നു പിടിച്ചു. സാരില്ല.. അത് കിളിച്ചോളും അവൾ കരയും എന്നായപ്പോഴേക്ക് ഞാൻ പറഞ്ഞു.. അവളുടെ മുഖം വിടർന്നു പേരെന്താ..... പെറ്റിക്കോട്ടുകാരി ലെച്ചുവിനോട് ചോദിച്ചു. ലെച്ചൂന്ന് വിളിച്ചാൽ മതി അവളുടെ കവിളിൽ പിച്ചി കൊണ്ട് ലെച്ചു പറഞ്ഞു. ഇയാടെ പേരെന്താ... ലെച്ചു തിരിച്ചു ചോദിച്ചു. സച്ച.... ചിരിച്ചുകൊണ്ട് പറഞ്ഞു. ചേച്ചീടെയോ.. അവൾ പാവടക്കാരിയോട് ചോദിച്ചു. മാളു. വരുത്തിയ ചിരിയോടെ അവൾ പറഞ്ഞു. പൊക്കോട്ടെ... അവൾ പേടിയോടെ ചോദിച്ചു. അതുകേട്ടു എനിക്ക് ചിരിയാണ് വന്നത് എങ്കിലും ചിരിക്കാതെ തലയാട്ടി. ടീച്ചർ വഴക്ക് പറയോ... അവൾ തലത്താഴ്ത്തി കൊണ്ട് ചോദിച്ചു. ഇല്ലാ.. ഞാൻ അമ്മയോട് പറഞ്ഞോളാം.. ഞാൻ ചെറിയ ഗൗരവത്തോടെ പറഞ്ഞു. മ്മ് അവൾ ചെറുതായി ചിരിച്ചുകൊണ്ട് പശുകുട്ടിയുടെ കയറും പിടിച്ചു നടന്നു. തിരിഞ്ഞ് ലെച്ചുവിന്റെ കൈയിൽ പിടിച്ചു നിൽക്കുന്ന അവളെ നോക്കി വിളിച്ചു. സച്ചൂ.... വാ.. അവൾ ലെച്ചുവിന്റെ കൈവിട്ട് അവളുടെ അടുത്തേക്ക് ഓടി.......തുടരും………..........

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...