💓സഖാവ് 💓: ഭാഗം 2

രചന: റഫീന മുജീബ്

" അന്ന് നമ്മൾ നീതിക്കായി കയറിയിറങ്ങിയ നീതിപീഠം ഇപ്പോൾ നമ്മുടെ കൈകുമ്പിളിൽ ആണ്. ഇനിയെങ്കിലും എന്റെ അച്ചുവിന് നീതി കിട്ടണം, അതു വാങ്ങിക്കുന്നത് വരെ എനിക്ക് വിശ്രമമില്ല, അയാൾ അതു പറയുമ്പോൾ അവളുടെ കണ്ണിലും ആ പകയുടെ ജ്വാല വളരെ വ്യക്തമായിരുന്നു. അന്ന് നീതിക്കായി കയറിയിറങ്ങാത്ത ഒരിടവും ബാക്കിയുണ്ടായിരുന്നില്ല, ആരും തങ്ങളെ സഹായിക്കാൻ തയ്യാറായിരുന്നില്ല. എടാ അന്തപ്പാ അവരുടെ സംസാരത്തിന് ഭംഗം വരുത്തിക്കൊണ്ട് വാതിലിനടുത്തു നിന്നും ആ ശബ്ദം കേട്ടതും രണ്ടാളുടെയും ശ്രദ്ധ വാതിലിനടുത്തേക്ക് തിരിഞ്ഞു. ആളെ കണ്ടതും അവരുടെ മുഖത്ത് പുഞ്ചിരി വിരിഞ്ഞു. അന്തപ്പൻ നിന്റെ മറ്റവളാടാ കോപ്പേ.. മുഖത്ത് കപട ദേഷ്യം വരുത്തിക്കൊണ്ട് അയാൾ പറഞ്ഞു. ഡാ സ്ഥലം എംഎൽഎ യോടാണ് ഈ പറയുന്നത് എന്ന് ഓർമ്മവേണം അയാൾ ചിരിച്ചു കൊണ്ട് അവരുടെ അടുത്തേക്ക് വന്നു. ഓ പിന്നെ എംഎൽഎ ആകാൻ ഏത് വിവരമില്ലാത്തവനും പറ്റും ഇത്തിരി തൊലിക്കട്ടി മാത്രം മതി

അതുപോലെയാണോ ഐപിഎസ് നല്ല അസ്സലായി പഠിച്ചു കഷ്ടപ്പെട്ട് വാങ്ങിച്ച ജോലിയാണിത് w. നിന്നെക്കാൾ എന്തായാലും പവർ എനിക്ക് തന്നെ അയാളും വിട്ടുകൊടുത്തില്ല. ഒന്ന് പോടാ നമുക്കിടയിൽ എംഎൽഎയും ഐപിഎസ് ഒക്കെ വേണോ മച്ചൂ.. അവനെ നോക്കി അയാൾ പുഞ്ചിരിയോടെ പറഞ്ഞു. ഗുഡ്മോണിങ് മാഡം ശിവക്ക് നേരെ വിഷ് ചെയ്തു അയാൾ അവിടെ ഉണ്ടായിരുന്ന കസേര വലിച്ച് അതിലേക്ക് ഇരുന്നു. ശ്യാം ഏട്ടാ നിങ്ങൾ രണ്ടും എന്നെ മേഡെം എന്ന് വിളിക്കുമ്പോൾ എനിക്ക് എന്തോ ഒരു വല്ലാത്ത അകലം ഫീൽ ചെയ്യുന്നു കേട്ടോ.. അവൾ അയാളോട് പരിഭവം നടിച്ചു. എന്തുകൊണ്ടും നിന്നെ അങ്ങനെ വിളിക്കുന്നത് ഞങ്ങൾക്ക് അഭിമാനം തന്നെയാടോ, അത്ര ത്യാഗങ്ങൾ സഹിച്ചിട്ടുണ്ട് നീ ഈ പദവിയിലെത്താൻ ശ്യാം അവളെ നോക്കി പറഞ്ഞു. അതിനെനിക്ക് താങ്ങും തണലുമായി നിന്നത് നിങ്ങളാണ് നിങ്ങൾ ഇല്ലേൽ ഇന്നീ പദവിയിൽ ഞാനില്ല, അവൾ വിഷമത്തോടെ മിഴികൾ താഴ്ത്തി പറഞ്ഞു.

ഞങ്ങളെ അച്ചുവിന്റെ സ്വപ്നം ആയിരുന്നില്ലേ നിന്റെ ഐഎഎസ്, അവൻ ഇല്ലാത്ത സമയത്ത് അവന്റെ പെണ്ണിനെ ഞങ്ങൾ ഒറ്റയ്ക്കിടാൻ പറ്റുമോ..? അങ്ങനെ ചെയ്താൽ അവന്റെ ആത്മാവ് പോലും ഞങ്ങളോട് പൊറുക്കില്ല. ഒന്ന് നിർത്തിയതിനുശേഷം അവളെ ഒന്നു നോക്കി ശ്യാം തുടർന്നു, ഇനി ആകെയുള്ള സങ്കടം നിങ്ങൾ രണ്ടുപേരും ആണ് ഒരാൾ മണ്മറഞ്ഞ പ്രണയത്തിൽ ജീവിക്കുമ്പോൾ മറ്റൊരാൾ തന്റെ പ്രണയത്തെ ഉള്ളിലിട്ടു ജീവിക്കുന്നു അയാൾ അച്ചായനെ നോക്കി പറഞ്ഞു. ഇനിയെങ്കിലും രണ്ടാൾക്കും ഒരുമിച്ചു കൂടെ അതുതന്നെയാവും നമ്മുടെ അച്ചും ആഗ്രഹിക്കുന്നത്. ദയവുചെയ്ത് ഒന്നു നിർത്തു ശ്യാമേട്ടാ അയാളെ പറഞ്ഞു മുഴുമിപ്പിക്കാൻ സമ്മതിക്കാതെ അവൾ കയറി പറഞ്ഞു. ഞാൻ എത്ര തവണ പറഞ്ഞു കഴിഞ്ഞു ഇതിനുള്ള ഉത്തരം, ഇനിയും നിങ്ങൾ എന്താ അത് മനസ്സിലാക്കാത്തത് എന്റെ സഖാവേ ഈ ഭൂമിയിൽ ഇല്ലാതായിട്ടുള്ളു ഞങ്ങളുടെ പ്രണയം നശിച്ചിട്ടില്ല, നശിക്കുകയും ഇല്ല എന്റെ മരണംവരെ അത് എന്നിൽ ജീവിക്കും, മറക്കാൻ പറയാൻ എല്ലാവർക്കും പറ്റും പക്ഷേ മറന്നു കളയേണ്ടത് സ്വന്തം ജീവനെ തന്നെയാണ് എന്ന് ആരും എന്താ മനസ്സിലാക്കാത്തത് നിറകണ്ണുകളോടെ അവൾ തുടർന്നു.

ദയവുചെയ്ത് അച്ചായൻ വേറെ വിവാഹം കഴിക്കണം എന്നെ ഓർത്തു കാലം കഴിക്കേണ്ടതില്ല, അമ്മച്ചിക്ക് സ്നേഹിക്കാൻ ഒരു മോള് വേണം വേറെ ആരുമില്ല ആ പാവത്തിന് അവൾ ദയനീയമായി അച്ചായനോട്‌ പറഞ്ഞു. ഇതിന് നീ പറഞ്ഞ ഉത്തരമേ എനിക്കും പറയാനുള്ളൂ എന്റെ പ്രണയം എന്റെ മനസ്സിലാണ് അത് വേണ്ടെന്ന് വെക്കാൻ പറയാൻ ആർക്കും അവകാശമില്ല, അച്ചു നെഞ്ചിലേറ്റുന്നതിനു മുൻപേ ഈ ആന്റ്റോ ആന്റണി നെഞ്ചിലേറ്റിയ പെണ്ണാണ് നീ, ഒടുവിൽ ചങ്കായി കൂടിയവന്റെ ചങ്കിടിപ്പ് നീയാണെന്ന് അറിഞ്ഞപ്പോൾ ആരെയും ഒന്നും അറിയിക്കാതെ വഴിമാറി നടന്നു. ഇന്നിപ്പോൾ ജീവനായി കൊണ്ടു നടന്ന പെണ്ണ് ജീവിതം നഷ്ടപ്പെട്ടു നിൽക്കുമ്പോൾ ഞാൻ മാത്രം പുതിയ ജീവിതം തുടങ്ങണം അല്ലേ..? എന്റെ പ്രണയത്തിൽ ജീവിച്ചു മരിക്കാൻ തന്നെയാണ് എന്റെയും തീരുമാനം അതിൽ ആരും കൈകടത്തേണ്ടതില്ല അത് പറയുമ്പോൾ അച്ചായന്റെ സ്വരം കടുത്തതായിരുന്നു. അയാൾ ദേഷ്യത്തോടെ അവിടെ നിന്നും പോയി. ശിവ ദയനീയമായി ശ്യാമിനെ ഒന്ന് നോക്കി, അവൻ എന്തു പറയണമെന്നറിയാതെ മിഴിച്ചു നിൽക്കുകയാണ്. 

പുറത്തെ തൂണിൽ ചാരി ദേഷ്യത്തിൽ നിൽക്കുകയാണ് അച്ചായൻ, അയാളുടെ ഉള്ളിൽ ഒരു കടലിരമ്പുന്നുണ്ട് ആരും കാണാതെ പോയ ഒരു സ്നേഹത്തിന്റെ ആഴക്കടൽ. അയാളുടെ ഓർമ്മകളിലേക്ക് താൻ ആദ്യമായി ശിവയെ കണ്ട രംഗം ഓടിവന്നു. അമ്മച്ചിക്ക് സുഖമില്ല എന്ന് പറഞ്ഞ് വീട്ടിൽ നിന്നും വിളി വന്നപ്പോൾ വെപ്രാളപ്പെട്ട് ഒരു ഷോട്ട് കട്ട് വഴി വേഗം വീട്ടിലെത്താൻ ബൈക്ക് പറപ്പിക്കുക യായിരുന്നു താൻ, തന്റെ പുറകിൽ ആന്റിയുടെ മകൻ ജെയിംസും ഉണ്ട്, അവനോട് പിടിക്കാൻ പറഞ്ഞ് ഞാൻ വണ്ടി ഫുൾ സ്പീഡിൽ വിട്ടു. എന്റെ അമ്മച്ചിക്ക് ഒന്നും പറ്റരുത് എന്ന് മാത്രമേ മനസ്സിൽ ഉണ്ടായിരുന്നുള്ളൂ. സ്വന്തമെന്ന് പറയാൻ എനിക്ക് അമ്മച്ചിയും അമ്മച്ചിക്കും ഞാനും മാത്രമേ ഉണ്ടായിരുന്നുള്ളൂ. ചാച്ചൻ ചെറുപ്പത്തിൽ തന്നെ മരിച്ചു. ഇട്ടു മൂടാൻ സ്വത്ത് ഉള്ളതുകൊണ്ട് ജീവിക്കാൻ ബുദ്ധിമുട്ടുണ്ടായില്ല, ചാച്ചൻ പോയതിന്റെ ഒരു കുറവും വരുത്താതെ യാണ് അമ്മച്ചി എന്നെ വളർത്തിയത്. എന്നും എന്റെ ഒരു നല്ല സുഹൃത്താണ് അമ്മച്ചി, അമ്മച്ചിയെ കാത്തോളണേ കർത്താവേ എന്നും മനസ്സിൽ വിചാരിച്ച് ഞാൻ വണ്ടി ഒരു വളവിലൊട്ടു കയറ്റിയതും എവിടെനിന്നോ ഒരു പെൺകുട്ടി ഞങ്ങളുടെ മുൻപിലേക്ക് ചാടിവീണു.

വളവ് ആയതുകൊണ്ട് ഞാൻ വണ്ടി സ്പീഡ് കുറച്ചത് കാരണം വണ്ടി സൈഡിലേക്ക് മറിഞ്ഞെങ്കിലും എനിക്കും വണ്ടിക്കും യാതൊരു കുഴപ്പവും പറ്റിയില്ല. ഞാൻ കലിപ്പിൽ അവളുടെ അടുത്തേക്ക് പോയി. ഉരഞ്ഞ മുട്ടു പൊത്തിപ്പിടിച്ചു പേടിയോടെ നിൽക്കുന്ന അവളെ കണ്ടതും ഞാൻ ഒരു നിമിഷം അമ്മയെ പോലും മറന്നുപോയി. ചുവന്ന പട്ടുപാവാടയിൽ പിടക്കുന്ന മാൻ മിഴികളും വിറയാർന്ന ചുണ്ടും ഒരു അപ്സരസ്സ് വന്ന് മുന്നിൽ നിൽക്കുന്നത് പോലെ തോന്നി. എവിടെ നോക്കിയാ ടി നടക്കുന്നത് നിനക്ക് ചാവാൻ വേറെ വണ്ടി ഒന്നും കിട്ടിയില്ലേ..? ഞാൻ അവളെ നോക്കി അങ്ങനെ നിൽക്കുമ്പോഴാണ് എന്റെ പുറകിൽ നിന്ന് ആ അപ ശബ്ദം കേട്ടത്. ഓ... ഇവൻ ഇത് നശിപ്പിച്ചു എന്നും മനസ്സിൽ വിചാരിച്ച് അവനെ നോക്കിയ ഞാൻ ഞെട്ടി പോയി. രണ്ട് കൈയും മുറിവും പറ്റി നെറ്റിയിൽ നിന്നും ചോരയും ഒലിപ്പിച്ചു നിൽക്കുകയാണ് അവൻ. അവന്റെ നിൽപ്പ് കണ്ടാൽ ചിരി വരും. ഞാൻ അവന്റെ അടുത്തേക്ക് ഓടിച്ചെന്നു. ജയിംസ് കുട്ടി എന്തെങ്കിലും പറ്റിയോ..?

ഞാൻ അവനെ നോക്കി ചോദിച്ചു. ഇല്ലടാ വണ്ടിയും നീയും സൈഫായി, എന്റെ കാര്യത്തിൽ ഒരു തീരുമാനവുമായി. അവൻ ആ മുറിവിലേക്ക് നോക്കി പറഞ്ഞു. ഈ വടയക്ഷി എന്തു ധൈര്യത്തിലാ നമ്മളെ മുൻപിലേക്ക് ചാടിയത്, ഇവൻ ഇത് നിർത്തുന്നില്ലല്ലോ കർത്താവേ.., ഞാൻ മനസ്സിൽ പറഞ്ഞു. അവന്റെ അട്ടഹാസം കൂടി ആയപ്പോൾ ആ കുട്ടി ആകെ പേടിച്ച മട്ടുണ്ട്, രണ്ട് കണ്ണിൽ നിന്നും ഡാം തുറന്നിട്ട് പോലെ വെള്ളം വരാൻ തുടങ്ങി. അതു കൂടി കണ്ടപ്പോൾ എന്റെ സകല നിയന്ത്രണവും പോയി. ഞാൻ ആ കുട്ടിയുടെ അടുത്തേക്ക് ചെന്ന് ഹോസ്പിറ്റലിൽ ഒക്കെ പോണോ എന്നൊക്കെ ചോദിച്ചു. അത് കണ്ടു ലെവനു പിന്നെ കലികയറി അവൻ ഓരോന്നൊക്കെ വീണ്ടും പറയാൻ തുടങ്ങി. ഞാൻ അവന്റെ വായപൊത്തി ഒരുതരത്തിൽ ഒക്കെ സമാധാനിപ്പിച്ചു ആ കുട്ടിയെ നോക്കിയപ്പോൾ അവൾ അവിടെയില്ല എങ്ങോട്ടോ മാഞ്ഞുപോയി. പിന്നെ വീട്ടിൽ ചെന്ന് അമ്മച്ചിയെ ഹോസ്പിറ്റലിൽ ആക്കുന്ന തിരക്കിലായി പോയി ഞാനും. എന്നാലും ഞാൻ അവളെ കുറിച്ച് അന്വേഷിച്ചു കൊണ്ടിരുന്നു. പല രാത്രികളും പിടിക്കുന്ന ആ മാൻമിഴി എന്റെ ഉറക്കം കെടുത്തി. നീ ഇവിടെ വന്ന് നിൽക്കാണോ..? പോകേണ്ടേ..,? ശ്യാമിന്റെ ശബ്ദമാണ് ചിന്തയിൽ നിന്നും ഉണർത്തിയത്. ശിവയോട് യാത്രപറഞ്ഞ് അവർ അവിടെ നിന്നും ഇറങ്ങി. അവളും ഓഫീസും കാര്യങ്ങളുമായി തിരക്കിൽ ഏർപ്പെട്ടു....... തുടരും 

എല്ലാ പാർട്ടുകളും വായിക്കാൻ ഇവിടെ ക്ലിക്ക് ചെയ്യുക