🌻സൂര്യകാന്തി 🌻: ഭാഗം 65

രചന: മിഴി

ഇല്ല കുഞ്ഞേ... ഇവൾ നമ്മുടെ പൊന്നുമോളാ... അങ്ങനെ വന്നു ചോദിക്കുമ്പോൾ പെട്ടെന്നെടുത്തു നൽകുമോ..? പേടിക്കണ്ട... ഇവളെന്നും നമുക്കൊപ്പം ഉണ്ടാകും... പറയുമ്പോൾ അധരങ്ങൾ കാന്തിയുടെയും കുഞ്ഞിന്റെയും നെറുകയിൽ പതിഞ്ഞിരുന്നു.. ♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️♦️ അമ്മയുടെയും അച്ഛന്റെയും അസ്ഥിതറയ്ക്ക് മുൻപിൽ കുറച്ചു നേരം നിശ്ശബ്ദനായി ഇരുന്നു... ജനിച്ച നാൾ മുതൽ ഒന്നിനും കുറവുണ്ടായിട്ടില്ല.. പണത്തിനു പണം.... സ്നേഹത്തിനു സ്നേഹം.. എല്ലാത്തിനും നടുവിൽ നിന്നാണ് പെട്ടെന്നൊരു ദിവസം ഓരോ ബന്ധങ്ങളായി നഷ്ടപ്പെടുന്നത്. അപ്പോഴും തളരാൻ അനുവദിച്ചിട്ടില്ല.. കണ്ണൊന്നു നിറയാതെ.. ഉള്ളൊന്നു നോവാതെ ചേർത്തുപിടിച്ചു.. വിച്ചു വാശിയോടെ നിറഞ്ഞ കണ്ണുകൾ ഉള്ളം കൈയാൽ തുടച്ചെടുത്തു. എന്നിട്ട്... ആ ഉള്ളല്ലേ ഒരു ആളലും ഇല്ലാതെ ഇച്ചേച്ചി തച്ചുടച്ചത്...

ഓർക്കുംതോറും അവനു സങ്കടം സഹിക്കവയ്യാതായി.. ഇതുപോലെ നെഞ്ചു പൊട്ടി കരയാൻ ജിത്തേട്ടൻ അനുവദിച്ചിട്ടില്ല... അതുകൂടി ഓർത്തപ്പോൾ ഒരു വേള ഗദ്ഗദം പുറത്തേയ്ക്ക് ചിതറി.. പെട്ടെന്ന് ദേഹത്തേയ്ക്ക് ചേർത്ത കൈകളുടെ ചൂടിൽ തൊട്ടു മുൻപ് മനസ്സിൽ പറഞ്ഞതൊക്കെ അടിവരയിട്ട് ഉറപ്പിക്കുകയായിരുന്നു വിച്ചു.. ഏട്ടാ.... അറിഞ്ഞില്ല... മാപ്പ്... മാപ്പ്.. വിച്ചു സൂര്യന്റെ നെഞ്ചിൽ മുഖമമർത്തി പറഞ്ഞു.. ആ മുഖത്തേയ്ക്ക് ഒന്നു തലയുയർത്തി നോക്കാൻ പോലും ജാള്യത തോന്നിപ്പോയി. മോനെ...വിച്ചു... എന്താടാ ഇത്... കരയാതെ.. സൂര്യൻ അവനെ അശ്വസിപ്പിച്ചു.. സോറി.. ജിത്തേട്ടാ... ഒരിക്കലും ചെയ്യാൻ പാടില്ലാത്ത തെറ്റാ ഇച്ചേച്ചി ചെയ്തത്.. തിരുത്താമായിരുന്നില്ലേ.. അതുമല്ലെങ്കിൽ എന്നോടെങ്കിലും പറയാമായിരുന്നില്ലേ... എന്നിട്ട്.. എന്നിട്ട് ഏട്ടൻ ചെയ്തതെന്താ..? ഒന്നും മിണ്ടാണ്ട് എല്ലാത്തിനും കൂട്ടുനിന്നു... എന്തിനാ അത്..? ഒന്നു അറിയിച്ചിരുന്നേൽ ഇങ്ങനൊക്കെ ഉണ്ടാകുമായിരുന്നോ? വിച്ചു പരിഭവിച്ചു.. ഏട്ടന്റെ കുഞ്ഞുങ്ങളല്ലേ നിങ്ങൾ......

നിങ്ങക്കൊരു വിഷമം വന്നാൽ എനിക്ക് കണ്ടു നില്ക്കാൻ പറ്റുമോ ? അത്രയേ ഓർത്തുള്ളൂ. കുഞ്ഞി അവളെ വിവാഹം കഴിക്കുമോയെന്നു കേട്ടപ്പോഴും ആദ്യം ഒന്നും അംഗീകരിക്കാൻ പറ്റിയില്ലെങ്കിലും പിന്നീട് ചിന്തിച്ചപ്പോൾ ശരിയെന്നു തോന്നി.. എന്നും എന്റെ അടുത്തുണ്ടാകുമല്ലോ... ആ ആശ്വാസമായിരുന്നു.. സൂര്യൻ പറഞ്ഞു നിർത്തി.. തൊട്ടു പുറകിൽ എല്ലാം കേട്ടുകൊണ്ട് വിദ്യയുമുണ്ടായിരുന്നു.. എന്നിട്ട് ഇച്ചേച്ചി എന്താ ചെയ്തത്. ജിത്തേട്ടനെ സ്നേഹിച്ചോ..? പറ്റിച്ചില്ലേ.. മോനെ.. വിച്ചു... അങ്ങനല്ലടാ.. അവള്.. കുഞ്ഞിക്ക്... എന്നെയെന്നല്ല ഒരു പുരുഷനെയും ജീവിതത്തിൽ ഭർത്താവായി കാണാൻ കഴിയില്ല.. അവളെ.. നമ്മൾ മനസ്സിലാക്കിയില്ലെങ്കിൽ പിന്നാര് മനസ്സിലാക്കാനാ... സൂര്യൻ വിഷ്ണുവിനെ പറഞ്ഞു മനസ്സിലാക്കിക്കാൻ ശ്രമിച്ചു.. വിച്ചുവിന്നപ്പോഴും വിദ്യയെക്കുറിച്ച് കേട്ടതൊക്കെ പൂർണമായും അംഗീകരിയ്ക്കാൻ പറ്റാത്ത അവസ്ഥയായിരുന്നു.. ജിത്തേട്ടാ.. എന്നാലും.. ഇച്ചേച്ചി... എനിക്കിതൊന്നും ഓർക്കാൻ കൂടി പറ്റുന്നില്ല... വിച്ചു തല ചലിപ്പിച്ചു നിഷേധിച്ചു..

അത് കാൻകെ വിദ്യയ്ക്കുള്ളം പൊള്ളി .. വിച്ചു അവൻ തന്നെ ഒരിയ്ക്കലും അംഗീകരിക്കില്ലേ... അവൾക്കതു ചിന്തിക്കാൻ കൂടി ആയില്ല.. വിച്ചു... എന്താടാ ഇത്.. നീ അറിവും വിവേകവുമുള്ള ആളല്ലേ... നമുക്കൊരോരുത്തർക്കും ഓരോ വ്യക്തിത്വങ്ങളില്ലേ... അതുപോലരു വ്യക്തിയാണ് കുഞ്ഞിയും. അവൾക്ക് മറ്റൊരു സ്ത്രീയെ മാത്രമേ ഉൾക്കൊള്ളാൻ ആവുള്ളുവെങ്കിൽ അത് അംഗീകരിക്കുകയല്ലേ ചെയ്യേണ്ടത്.. സമൂഹത്തിൽപോലും ഒറ്റപ്പെടൽ ഭയന്നു പലരും ഇതൊക്കെ മൂടി വയ്ക്കാറുണ്ട്. എന്നാൽ ജീവിതകാലം മുഴുവൻ സ്വന്തം സ്വത്വം അടിച്ചമർത്തി വെറും അടിമകളെപ്പോലെ ജീവിക്കേണ്ടിവരും. നമ്മുടെ കുഞ്ഞി അതുപോലെ വീർപ്പുമുട്ടിക്കഴിയണമെന്നാണോ നീ ആഗ്രഹിക്കുന്നത് മോനെ.? നമ്മളെപ്പോലെതന്നെ അവൾക്കും ഈ ഭൂമിയിൽ എല്ലാ സ്വാതന്ത്രത്തോടും കൂടി കഴിയാനുള്ള അവകാശമുണ്ട്. അത് ഹനിക്കാതെ കൂടെ നിൽക്കുവല്ലേ നമ്മൾ ചെയ്യേണ്ടത്.. അവൻ വിച്ചുവിന്റെ മുഖം കൈക്കുമ്പിളിൽ എടുത്തു ചോദിച്ചു.

വിച്ചു സൂര്യന്റെ വാക്കുകൾ ഉള്ളിലിട്ട് പലവുരു ചികഞ്ഞു.. തന്റെ ഇചേച്ചിയാണ്.. ആ ഉള്ളു പിടയുന്നത് ഒട്ടും സഹിക്കില്ല. അങ്ങാനുള്ളപ്പോൾ ജീവിതകാലം മുഴുവൻ അവൾ വീർപ്പുമുട്ടി കഴിയുന്നത് തനിക്ക് സഹിക്കാൻ ആകുമോ..? ഇല്ലയെന്നു പറയാൻ ഒരു നിമിഷം പോലും ചിന്തിക്കേണ്ടി വന്നില്ലവന്.. അതിന്റെ പ്രതിഫലണമെന്നോണം തല നിഷേധാർത്ഥത്തിൽ ചലിപ്പിച്ചു. എന്നാൽ അതെ നിമിഷം റിച്ചുമോളുടെയും സൂര്യന്റെയും മുഖം മനസ്സിൽ തെളിഞ്ഞു.. ഇച്ചേച്ചിയിനി എങ്ങനായാലും എനിക്ക് വെറുക്കാൻ പറ്റുമോ ജിത്തേട്ടാ... എന്നും നമ്മൾ കൂടെ കാണില്ലേ.. അപ്പോൾ ഇതൊന്നും പറയാണ്ട്.. പറഞ്ഞു വരുമ്പോഴാണ് പുറകിൽ നിറമിഴികളോടെ നിൽക്കുന്നവളെ വിച്ചു കാണുന്നത്.. ഇതൊന്നും തുറന്നു പറയാണ്ട് നിങ്ങളെ ജീവിതം കൂടി ബലികൊടുക്കുവാനോ ഇവൾ ചെയ്യേണ്ടത്..? ഹേ... ഒന്നും പോരാഞ്ഞു അതിനിടയിലേയ്ക്ക് ഒരു കുഞ്ഞ് ജീവനും കൂടി കൊണ്ടു വന്നു.. വിച്ചു വിദ്യയ്ക്കടുത്തേയ്ക്ക് പാഞ്ഞു വന്നുകൊണ്ട് പറഞ്ഞു.. വിദ്യയ്ക്ക് എന്തു പറയണമെന്ന് പോലും നിശ്ചയമുണ്ടായില്ല..

എന്താ ഇച്ചേച്ചി ഒന്നും മിണ്ടാനില്ലേ..? സ്വന്തം മകളെപ്പോലെയല്ലേ ഈ മനുഷ്യൻ നിങ്ങളെ കൊണ്ടു നടന്നത്.. എന്നിട്ട് ആ മനസ്സിൽ വേറെ മോഹങ്ങൾ നൽകി കൂടെകൂട്ടി.. എന്നെങ്കിലും മനസ്സറിഞ്ഞു തന്നെ സ്നേഹിക്കുമെന്ന് സ്വപ്നം കണ്ടവനെ അപ്പാടെ തകർത്തില്ലേ നിങ്ങൾ.. ഒടുവിൽ ചോദ്യചിഹ്നമായി ഒരു കുഞ്ഞിനേയും കൊണ്ടു വന്നു.. എന്റെ ഇച്ചേച്ചിയ്ക്ക് ഇത്രയ്ക്കും ഒക്കെ മനുഷ്യത്വരഹിതമായി ചെയ്യാൻ എങ്ങനെ പറ്റി..? അതും നമ്മുടെ ഏട്ടനോട്..? വിച്ചുവിന്റെ സ്വരം ദുഖത്താൽ ഇടറി. എന്നാൽ അപ്പോഴും അവളുടെ മുഖം കുനിഞ്ഞുതന്നെ ഇരുന്നു.. മോനെ വിച്ചു... അവളെ... വിഷമിപ്പിക്കാതെ.. കുഞ്ഞിക്കു നൊന്തപ്പോൾ ജിത്തേട്ടന് പൊള്ളിയല്ലേ.. അപ്പോൾ അച്ഛനെക്കുറിച്ച് ഓർത്തോ നിങ്ങൾ രണ്ടാളും. ആ ആത്മാവ് എത്ര വേദനിച്ചിരിക്കും... അമ്മാവനെ ഓർത്താണ് ഞാൻ കുഞ്ഞിയെ ജീവിതത്തിലേയ്ക്ക് വിളിച്ചത്. മരണക്കിടക്കയിലും ഒന്നേ പറഞ്ഞുള്ളൂ ആ മനുഷ്യൻ.. എന്റെ മക്കളെ നോക്കിക്കോണേയെന്നു.. ഇവൾ ഒറ്റപ്പെടുമോയെന്ന ആധിയായിരുന്നു..

അതുകൊണ്ടാ എല്ലാമറിഞ്ഞിട്ടും കുഞ്ഞിയുടെ സന്തോഷത്തിനായി എല്ലാം സഹിക്കാൻ തയ്യാറായത്.. ഈ സ്നേഹം... നല്ലതൊന്നും നൽകിയിട്ടില്ല എന്നിട്ടും ഒരു കുറവുമില്ലാതെ.. ഇന്നും ആ സ്നേഹപ്പുഴ തങ്ങൾക്കായി ഒഴുകുന്നു.. ഇരുവരെയും ചേർത്തുപിടിച്ചു സൂര്യൻ കുറച്ചു നേരം കൂടി മാവിൻ ചുവട്ടിലിരുന്നു. ♦️♦️♦️♦️♦️♦️♦️♦️♦️♦️♦️♦️♦️ സൂര്യന് പിറകേ വിദ്യയും പുറത്തേയ്ക്ക് പോകുന്നത് മുകളിൽ ബാൽക്കണിയിൽ ഇരുന്നപ്പോൾ ദയ കണ്ടിരുന്നു.. സൂര്യനോട് അങ്ങനൊക്കെ സംസാരിച്ചതിൽ വിദ്യയ്ക്ക് അൽപ്പമല്ലാത്ത നീരസമുണ്ട്.. അത് തുറന്നു പറയുകയും ചെയ്തിട്ടാണ് റൂമിൽ നിന്നും പോയത്.. സൂര്യനൊപ്പം കാന്തിയെ കാണുന്ന ഓരോ നിമിഷവും ദയയ്ക്കുള്ളിൽ അമർഷം നിറഞ്ഞു.. ആ മുഖം ഒന്നോർക്കുമ്പോൾ തുടികൊട്ടുന്ന നെഞ്ചവും ഉണർന്നെഴുന്നേൽക്കുന്ന രോമകൂപങ്ങളും... തനിയ്ക്കുള്ളിൽ അഭിനേവേശം കൂട്ടുന്നതവളറിഞ്ഞു.. വിദ്യയും സൂര്യനും തമ്മിലുള്ള ഡിവോഴ്സ് അതൊരിക്കലും സമ്മതിച്ചു കൊടുക്കരുതായിരുന്നു.. അത് മാത്രമാണ് എല്ലാം തകിടം മറിച്ചത്..

ഇന്നൊരുവൾക്ക് ആ ജീവിതത്തിൽ അവകാശം ഉറപ്പിയ്ക്കാനും കാരണം ഡിവോഴ്സ് മാത്രമാണ്. ദയ റൂമിലേയ്ക്ക് ചെല്ലുമ്പോൾ റിച്ചു മോൾ ബെഡിൽ ഉറങ്ങുവാണ്.. ബാത്റൂമിൽ നിന്നും വെള്ളം വീഴുന്ന ഒച്ച കേൾക്കാം.. അതിൽനിന്നും കാന്തി കുളിക്കുവാണെന്ന് മനസ്സിലായി. റൂമോന്നാകെ കറങ്ങി നോക്കി.. ചുമരിൽ റിച്ചുമോളും സൂര്യനുമൊത്തുള്ള ഒരു ഫോട്ടോ ഉണ്ട്.. പിന്നെ ചുവരിൽ കിളികളുടെയും മിക്കി മൗസിന്റെയും വരയുണ്ട്.. പതിയെ ശ്രദ്ധ ബെഡിൽ ഉറങ്ങുന്ന കുഞ്ഞിലേയ്ക്കെത്തി.. അവൾക്കടുത്തായി ഇരുന്നു ആ കുഞ്ഞി ക്കാലിൽ ഒന്നുതൊട്ടു. അന്ന് പ്രസവം കഴിഞ്ഞു ആദ്യനാളുകളിൽ എടുത്തത് തന്നെ.. സൂര്യനെ തന്നിലേയ്ക്ക് അടുപ്പിയ്ക്കാനായി നന്നായി തന്നെ നോക്കി. എന്നാൽ കുഞ്ഞിലേയ്ക്കല്ലാതെ അറിയാതെപോലും ഒരു നോട്ടമോ ചായ്‌വോ ഉണ്ടായില്ല.. വിദ്യ വഴി വേണ്ടതെല്ലാം എത്തിച്ചിരുന്നു.. ആ വാശിയിലാണ് കുഞ്ഞിനെ അവനെ ഏൽപ്പിച്ചു ജോലിയ്ക്കു പോയി തുടങ്ങിയത്.. കുഞ്ഞിന്റെ കരച്ചിലിൽ അവൻ തന്റെ കാൽച്ചുവട്ടിൽ വരുമെന്ന് കരുതി...

അതുപോലെ തന്നെ ആള് വന്നു... കരയുന്ന കുഞ്ഞിനെ കൊണ്ടു വന്നു വിശപ്പടക്കാൻ അപേക്ഷിച്ചു.. അന്ന് ഉള്ളിലെ സൂര്യനോടുള്ള മോഹത്തേക്കാൾ വീര്യമൊന്നും ഈ കുഞ്ഞിനോടുള്ള സ്നേഹത്തിനുണ്ടായില്ല.. അതുകൊണ്ട് തന്നെ പകരം ചോദിച്ചത് സൂര്യനെ തന്നെയായിരുന്നു.. സ്നേഹനിധിയായ.... അച്ഛൻ... സ്വന്തം ജീവിതം പോലും ത്യാഗം നൽകിയ ആൾ... ഈ കുഞ്ഞിന് വേണ്ടി എന്റെ ആഗ്രഹം അംഗീകരിക്കുമെന്ന് നൂറ്റിയൊന്നു വട്ടവും ഉറപ്പിച്ചു.. പക്ഷേ.. പ്രതീക്ഷകളെ കാറ്റിൽ പറത്തി... സൂര്യൻ ആദ്യമായി സ്വാർത്ഥനായി.. ഇവളെന്റെ പ്രാണനാണ്.. സൂര്യജിത്തിന്റെ ജീവിതത്തിൽ ആകെയുള്ള പ്രതീക്ഷയാണ്...

എന്നെപ്പോലെ നശിച്ചൊരു ജീവിതം എന്റെ കുഞ്ഞിന് വേണ്ട... നിന്നെപ്പോലെ വൃത്തികെട്ടൊരുവളുടെ പാല് പോലും വിഷമാണ്... ഇതെന്റെ സ്വാർത്ഥതയാണെങ്കിൽ ആകട്ടെ... പെണ്ണിന് മാത്രമല്ല സ്വന്തം ശരീരത്തിലും മാനത്തിലും വിലയുള്ളത്.. ഏതൊരു ആണിനും ഉണ്ട്.. തന്റെ മനസ്സറിഞ്ഞു വേണം ഒരു പങ്കാളിയുമായി ജീവിതം പങ്കുവെയ്ക്കാൻ.. അല്ലാതെ നിന്നെപ്പോലുള്ളവളുമാരുടെ വെറും കാമത്തിനായി കൂട്ടുനിന്നാൽ എന്റെ മകൾക്കു മുൻപിൽ പോലും എനിക്ക് അസ്തിത്വമുണ്ടാകില്ല.. സൂര്യന്റെ വാക്കുകൾ ഇപ്പോഴെന്നപോൽ തെളിമയോടെ കർണ്ണപടത്തിലലയടിക്കുന്നത് ദയയറിഞ്ഞു..... കാത്തിരിക്കുക...💕

നോവലുകൾ ഇനി വാട്സാപ്പിലും വായിക്കാം. ഗ്രൂപ്പിൽ ജോയിൻ ചെയ്യാൻ ഇവിടെ ക്ലിക്ക് ചെയ്യുക.

എല്ലാ പാർട്ടുകളും വായിക്കാൻ ഇവിടെ ക്ലിക്ക് ചെയ്യുക