SOULMATES_💙: ഭാഗം 1

എഴുത്തുകാരി: SAHALA SACHU

"അല്ല,,,,ദിയ മോൾടെ പഠിപ്പൊക്കെ കഴിഞ്ഞില്ലേ....? ഇനിയെന്താ പരിപാടി... ജോലി വല്ലോം നോക്കുന്നുണ്ടോ....?" കസിന്റെ എൻഗേജ്‌മെന്റിന് പോയപ്പോൾ വകയിലെ ആന്റിയുടെ വകയായിരുന്നു ചോദ്യം.... "ആഹ്....അവൾക്ക് ജോലി ശരിയായി..... അടുത്താഴ്ച ദുബായിൽ പോകുവാണ്... അവൾടെ ഫ്രണ്ട് മുഖേനെ കിട്ടിയതാണ്.... തനിച്ച് വിടാൻ ഞങ്ങൾക്ക് പേടിയുണ്ട്.... പക്ഷെ അവൾ നല്ല സന്തോഷത്തിലാണ്....." അമ്മ ആന്റീക്ക് മറുപടി കൊടുത്തു.... അവർക്കൊക്കെ ഞാനൊന്ന് ചിരിച്ച് കൊടുക്കുകയും ചെയ്തു.... സത്യത്തിൽ പഠിക്കുന്ന കാലം തൊട്ടെ ഉള്ള മോഹം ആയിരുന്നു വർക്ക് ചെയ്യാൻ അബ്രോഡ് പോകണം എന്നുള്ളത്.... M com കഴിഞ്ഞതിന് ശേഷം നാട്ടിൽ ജോബിന് ട്രൈ ചെയ്യാൻ അച്ഛനും അമ്മയും നിർബന്ധിച്ചെങ്കിലും ഞാൻ കേട്ട ഭാവം നടിച്ചില്ല.... എന്റെ ആഗ്രഹത്തിന് കൂട്ട് നിൽക്കാൻ അവർക്കും വയ്യായിരുന്നു....കാരണം,,,, അവർക്ക് ആണായും പെണ്ണായും ഞാൻ മാത്രമേ ഉള്ളൂ.... അതുകൊണ്ട് തന്നെ എന്നെ ദൂരേക്ക് പറഞ്ഞു വിടാൻ അവർക്ക് യാതൊരു വിധ മനസും ഉണ്ടായിരുന്നില്ല....

പക്ഷെ ഞാൻ നിരാഹാരം കിടക്കാൻ തുടങ്ങിയപ്പോൾ അവർക്ക് മനസിലായി,, എന്റെ വാശിയെ ജയിക്കൂ എന്ന്.... അങ്ങനെ എന്റെ ബെസ്റ്റി വഴി എനിക്ക് അവിടെ ഒരു ജോലി ശരിയായി.... ഓൺലൈൻ ആയി ചെറിയ ഒരു ഇന്റർവ്യൂ ഒക്കെ നടത്തിയിരുന്നു അവർ....അതിൽ ഞാൻ പുഷ്പം പോലെ പാസാവുകയും ചെയ്തു...ഒരു വർഷം ട്രെയിനി ആണെന്നും,,,,പിന്നീട് പെർഫോമൻസ് നോക്കി പെർമനന്റ് ആക്കുമെന്നും അവർ പറഞ്ഞു.... എനിക്ക് അത്രേം മതിയായിരുന്നു.... അങ്ങനെ അങ്ങ് ദുഫായിലേക്ക് പറക്കുന്നതിന്റെ സന്തോഷത്തിൽ ആണ് ഞാൻ.... അച്ഛനെയും അമ്മയെയും മിസ് ചെയ്യുന്നതിൽ നല്ല സങ്കടം ഉണ്ടെന്നത് വേറൊരു സത്യം..... ** "ഇനി സമയം കളയേണ്ട മോളെ.... വാ... ഇറങ്ങാം...." അച്ഛൻ പറഞ്ഞത് കേട്ടപ്പോൾ ഞാൻ അമ്മയ്ക്ക് ഒരു ഉമ്മയും കൊടുത്ത് റ്റാറ്റയും പറഞ്ഞു അച്ഛന്റെ കൂടെ കാറിൽ കയറി....എന്തോ,,,,,ഇത്രേം ദിവസം ഇല്ലാതിരുന്ന വല്ലാത്ത ഒരു അസ്വസ്ഥത തോന്നുന്നുണ്ട് എനിക്കിപ്പോ,,,, നാടും വീടും വിട്ട് പോകുന്നതിന്റെ പ്രയാസം ആയിരിക്കാം..... എയർപോർട്ടിൽ എത്തിയപ്പോൾ അച്ഛൻ ലഗേജ് ഒക്കെ കാറിൽ നിന്ന് ഇറക്കി വെച്ചതിന് ശേഷം എന്നെ നോക്കി.... "പോയിട്ട് വാ...."

എന്ന് അച്ഛൻ പറഞ്ഞപ്പോ തന്നെ ഞാൻ കരയാൻ തുടങ്ങി....അച്ഛനെ കെട്ടിപ്പിടിച്ചു ഇത്തിരി നേരം കരഞ്ഞു.... അച്ഛന്റെ കണ്ണും നിറയാൻ തുടങ്ങിയപ്പോ എന്നെ അടർത്തി മാറ്റി പോയിട്ട് വാ എന്ന് ഒരിക്കൽ കൂടി പറഞ്ഞു.... ഇനിയും ഇവിടെ നിന്നാൽ ഞാൻ മിക്കവാറും അച്ഛന്റെ കൂടെ തിരികെ വീട്ടിലേക്ക് തന്നെ പോകുമെന്ന് തോന്നിയപ്പോൾ അച്ഛനോട് ബൈ പറഞ്ഞു തിരിഞ്ഞു നടന്നു.... ഫ്ളൈറ്റിൽ കയറിയപ്പോഴും മനസ് മുഴുവൻ വീട്ടിൽ ആയിരുന്നു.... ഞാൻ ഇല്ലാതെ അവര് രണ്ടുപേരും വിഷമിക്കില്ലേ എന്നൊക്കെ ഓർത്തപ്പോൾ വീണ്ടും കണ്ണ് നിറഞ്ഞു.... "ഹെലോ...." എന്റെ അടുത്ത് ആരോ ഇരുന്നെന്ന് തോന്നിയതിനോടൊപ്പം തന്നെ ഒരു പുരുഷ ശബ്ദം കേട്ടതും ഞാൻ സൈഡിലേക്ക് തല ചെരിച്ചു നോക്കി.... അപ്പൊ ഒരുത്തൻ എന്നെ നോക്കി ഇളിച്ചോണ്ട് ഇരിക്കുന്നത് കണ്ടതും ഞാൻ എന്തേ എന്ന മട്ടിൽ അവനെ നോക്കി പുരികം പൊക്കി.... "തനിച്ചേ ഉള്ളോ....?" എന്നവൻ ചോദിച്ചപ്പോ അതെയെന്ന് ഞാൻ തലയാട്ടി.... "ആണോ....ഞാനും തനിച്ചാണ്.... കമ്പനിക്ക് ഒരാളെ കിട്ടുമോ എന്ന് നോക്കി ഇരിക്കുവായിരുന്നു ഞാൻ.... എന്റെ പേര് അർജുൻ....കുട്ടീടെ പേരെന്താ....?" ആളൊരു പൂവൻ കോഴി ആണെന്ന് മനസിലായതും അവൻ ചോദിച്ചത് ഒന്നും കേൾക്കാത്ത മട്ടിൽ ഞാൻ വിൻഡോ സൈഡിലേക്ക് തിരിഞ്ഞിരുന്നു..... "ഹെലോ....ഞാൻ ചോദിച്ചത് കേട്ടില്ലേ...."

ഇത് വല്യ ശല്യമായല്ലോ എന്ന് മനസ്സിൽ കരുതി ഇരിക്കുമ്പോഴാണ് വീണ്ടും മറ്റൊരു പുരുഷ ശബ്ദം കേട്ടത്.... "എക്സ്ക്യൂസ്മി,,," ശബ്ദം കേട്ട ഭാഗത്തേക്ക് ഞാനും അവനും നോക്കിയപ്പോൾ വേറൊരുത്തൻ ഞങ്ങടെ സീറ്റിന് അടുത്ത് നിൽക്കുന്നതാണ് കണ്ടത്.... "ഇതെന്റെ സീറ്റ് ആണ്....പ്ലീസ് മൂവ്...." എന്റെ അടുത്ത് ഇരിക്കുന്ന കോഴിയെ നോക്കി അവനത് പറഞ്ഞപ്പോ ഓഹ് എന്ന മട്ടിൽ അവൻ എണീറ്റ് അറ്റത്ത് പോയി ഇരുന്നു....മറ്റവൻ ഞങ്ങൾക്ക് നടുവിലും കയറി ഇരുന്നു....ഭാഗ്യം,,,, അല്ലേൽ ദുബായിൽ എത്തുന്നതിന് മുന്നേ എനിക്ക് അവനെ ഇതിൽ നിന്ന് എടുത്ത് പുറത്തേക്ക് കളയേണ്ടി വന്നേനെ..... ഇപ്പൊ എന്റടുത്ത് ഉള്ളവൻ വന്നിരുന്നപ്പാടെ ഹെഡ് സെറ്റും വെച്ച് കണ്ണടച്ച് ഇരുന്നത് കൊണ്ട് എനിക്ക് വല്യ ശല്യം ഒന്നും ഉണ്ടായില്ല....ഫ്‌ളൈറ്റ് പൊങ്ങുന്ന സമയത്ത് എന്റെ ഉള്ളിലൂടെ എന്തോ ഒന്ന് പാഞ്ഞു പോയത് പോലെ തോന്നി.... വേറൊന്നും കൊണ്ടല്ല,,,, ഫ്ളൈറ്റിൽ ഞാൻ ആദ്യമായിട്ടാണെ കയറുന്നത്.... അപ്പൊ ചെറിയൊരു പേടി.... അതുകൊണ്ട് കണ്ണുമടച്ച് കൈകൂപ്പി ശിവനെ എന്നെ കാത്തോണെ എന്ന് പ്രാർത്ഥിച്ച് കണ്ണ് തുറന്ന് സൈഡിലേക്ക് നോക്കിയപ്പോൾ എന്റെ അടുത്ത് ഇരുന്നവൻ എന്നെ നോക്കി ചിരിക്കുന്നുണ്ട്..... അവനെ നോക്കി അവിഞ്ഞ ഒരു ചിരി പാസാക്കി ചമ്മൽ പുറത്ത് കാണിക്കാതെ ഞാൻ സ്റ്റഡി ആയിട്ട് ഇരുന്നു.... "ഫ്ളൈറ്റിൽ ആദ്യമായിട്ടാണല്ലേ.....?"

എന്നവൻ സ്വകാര്യം ചോദിക്കുന്നത് പോലെ ചോദിച്ചപ്പോൾ ഞാൻ ക്ളോസപ്പിന്റെ പരസ്യം കാണിക്കുന്നത് പോലെ പല്ല് മുഴുവൻ കാണിച്ച് നല്ലൊരു ചിരി അങ്ങട് കൊടുത്തു....അങ്ങനെ അവന്റെ മുന്നിൽ നാണം കെട്ട നിർവൃതിയിൽ ഞാൻ ഹെഡ് സെറ്റും വെച്ച് പാട്ടും കേട്ട് സീറ്റിലേക്ക് ചാരി ഇരുന്നു..... പാട്ട് കേട്ട് എപ്പോഴോ ഉറങ്ങി പോയി.... എന്റെ അടുത്ത് ഇരുന്നവൻ എന്നെ തട്ടി വിളിച്ചപ്പോഴാണ് ഞാൻ കണ്ണ് തുറന്നത്... ഫ്‌ളൈറ്റ് ലാന്റ് ചെയ്യാൻ ആയെന്ന് അവൻ പറഞ്ഞപ്പോ ഞാൻ കണ്ണൊക്കെ ഒന്ന് വലിച്ച് തുറന്ന് ഫോണ് ബാഗിലേക്ക് വെച്ച് അവനെ നോക്കി ഒന്ന് ചിരിച്ചു.... അവനും ഹൃദ്യമായ ഒരു പുഞ്ചിരി എനിക്ക് സമ്മാനിച്ചു....ഹൈവാ.... നല്ല ലുക്ക്....ഇത്രേം നേരം മര്യാദക്ക് ഞാൻ അവനെ ശ്രദ്ധിച്ചിരുന്നില്ല എന്നതാണ് സത്യം....ഇപ്പോഴാണ് ചെക്കനെ ശരിക്കും ഒന്ന് നോക്കുന്നത്.....കൊള്ളാലോ പയ്യൻ..... ഞാൻ പോലുമറിയാതെ എന്റെ ഉള്ളിൽ ഉറങ്ങി കിടന്നിരുന്ന കോഴി എണീറ്റു തല പൊക്കി എന്നത് അവന്റെ ചോദ്യം കേട്ടപ്പോഴാണ് മനസിലായത്.... "താനെന്താടോ എന്നെ ഇങ്ങനെ നോക്കുന്നത്.....? ഞാൻ അത്രക്ക് ഗ്ലാമർ ഉണ്ടോ....?" ഇന്നത്തെ ദിവസം പോക്ക് ആണല്ലോ ദേവിയെ എന്നോർത്ത് അവനോട് ഒരു സോറിയും പറഞ്ഞു നേരെ നോക്കി ഇരുന്നു....

പിന്നെ അബദ്ധത്തിൽ പോലും അവനെ നോക്കാൻ ഞാൻ തുനിഞ്ഞില്ല.. കാണാൻ ലുക്കുള്ള പയ്യന്മാരെ കണ്ടാൽ പരിസര ബോധം പോലും ഇല്ലാതെ വായിനോക്കാൻ നാണം ഇല്ലേ ദിയാ നിനക്ക്....ഞാൻ എന്നോട് തന്നെ പറഞ്ഞു കൊണ്ട് തലക്കടിച്ചു..... ഫ്ളൈറ്റിൽ നിന്ന് ഇറങ്ങി ലഗേജ് ഒക്കെ എടുത്ത് നടക്കാൻ തുടങ്ങിയപ്പോ ആ കാട്ടുകോഴി എന്റടുത്തേക്ക് വന്നു.... "കുട്ടിയെ പിക് ചെയ്യാൻ ആരേലും വരുമോ....? ഇല്ലെങ്കിൽ എവിടെ ആണെന്ന് വെച്ചാൽ ഞാൻ ഡ്രോപ്പ് ചെയ്യാം...." അവന്റെ സംസാരം കേട്ടപ്പോ വല്ല കല്ലും കയ്യിൽ ഉണ്ടായിരുന്നേൽ തലമണ്ട നോക്കി ഒരെണ്ണം കൊടുക്കാൻ ആണ് തോന്നിയത്..... പക്ഷെ അതൊക്കെ മറച്ച് പിടിച്ച് ഞാൻ അവനെ നോക്കി ഒന്ന് പുഞ്ചിരിച്ചു.... "No.... thanks...." "ഹാ....അങ്ങനെ പറയല്ലേഡോ....ഞാൻ ഒരു ഹെല്പ് ചെയ്യാൻ വേണ്ടി ചോദിച്ചത് അല്ലെ...." "എയർപോർട്ടിൽ കാണുന്ന എല്ലാവരെയും താൻ ഹെല്പ് ചെയ്യാറുണ്ടോ....?" എന്റെ മനസിൽ വന്ന ചോദ്യം ഞാൻ ചോദിക്കുന്നതിന് മുന്നേ ഫ്ളൈറ്റിൽ ഞങ്ങടെ കൂടെ ഉണ്ടായ മറ്റവൻ ചോദിച്ചപ്പോ ഇവനിത് വീണ്ടും എവിടുന്ന് വന്നു എന്ന രീതിയിൽ ഞാൻ അവനെ നോക്കി..... "അല്ല,,,,അതിന് താനേതാ....?"

ആ കോഴി ചോദിച്ചപ്പോ അതിനൊരു മറുപടി കൊടുക്കാതെ അവൻ എന്നെ നോക്കി.... "തനിക്ക്‌ വേണേൽ ഇവന്റെ കൂടെ പോകാം....അല്ലേൽ എന്റെ കൂടെ വരാം... തന്റെ ഇഷ്ടം...." എന്ന് പറഞ്ഞു അവൻ മുന്നോട്ട് നടന്നപ്പോ ഈ കോഴീടെ അടുത്ത് നിന്ന് രക്ഷപ്പെടാൻ ഉള്ള മാർഗം അവനാണെന്ന് മനസിലായപ്പോ ഞാൻ അവന്റെ പിന്നാലെ വെച്ചു പിടിച്ചു.... ഞാൻ അവന്റെ ഒന്നിച്ച് നടക്കുന്നത് കണ്ടപ്പോൾ അവൻ എന്നെ നോക്കി ഒന്ന് ചിരിച്ച് തന്നു.... "താങ്ക്സ്...." "എന്തിന്...? തന്റെ മുഖം കണ്ടപ്പോ എനിക്ക് തോന്നി അവന്റെ അടുത്ത് നിന്ന് എസ്കേപ്പ് ആവാനുള്ള ആഗ്രഹം ഉണ്ടെന്ന്....അതാണ് അങ്ങനെ പറഞ്ഞത്....അല്ലാതെ എനിക്ക് തന്നെ ഡ്രോപ്പ് ചെയ്യാനൊന്നും വയ്യ കേട്ടോ...." "അതിന് ഡ്രോപ്പ് ചെയ്യണം എന്നാരു പറഞ്ഞു....എന്റെ ഫ്രണ്ട് വരും എന്നെ പിക് ചെയ്യാൻ.... സൊ,,,,താൻ അത്രയ്ക്ക് ബുദ്ധിമുട്ടേണ്ട ആവശ്യമില്ല...." "തൽക്കാലം ബുദ്ധിമുട്ടാൻ ഞാൻ ഒരുക്കവും അല്ല...." "ഹ്മ്മ...." എയർപോർട്ടിന് പുറത്ത് എത്തിയപ്പോ അനുവിനെ കണ്ടതും ഞങ്ങൾ രണ്ടും ഓടിപ്പോയി പരസ്പരം ഒന്ന് ഹഗ് ചെയ്തു....അവൾ ഇങ്ങോട്ട് വന്നിട്ട് ഒരു വർഷം ആയി... അതിന് ശേഷം നേരിൽ കാണുന്നത് ഇപ്പോഴാണ്...

പെണ്ണ് എന്റെ ലഗേജ് എടുത്ത് പോയതും ഞാൻ അപ്പൊ തന്നെ അവന്റെ നേരെ തിരിഞ്ഞു..... "എനിവേ,,,,താങ്ക്സ്....." "വെൽക്കം...." "ബൈ...." "അതേയ്...." ബൈ പറഞ്ഞു ഞാൻ തിരിഞ്ഞു നടന്നപ്പോ അവൻ വിളിച്ചതും ഞാൻ എന്തേ എന്ന മട്ടിൽ തിരിഞ്ഞു നോക്കി.... "തന്റെ പേരെന്താ...?" "പേരില്ല മാഷെ....ഇനി എപ്പോഴേലും കാണുവാണേൽ പറഞ്ഞു തരാം.... അപ്പൊ ഓകെ...." അതും പറഞ്ഞു ചിരിച്ചോണ്ട് ഞാൻ തിരിഞ്ഞു നടന്നു.... എനിക്ക് ഇഷ്ടായി അവന്റെ കാരക്റ്റർ....എപ്പോഴും നല്ല പ്ലെസെന്റ് ആയി നിൽക്കുന്ന മുഖം.... നല്ല സംസാരം....മൊത്തത്തിൽ ആളൊരു ജെന്റിൽമാൻ ആണെന്ന് തോന്നുന്നു..... * അനുവിന്റെ കൂടെ അവിടുത്തെ വേറൊരു സ്റ്റാഫും കൂടെ താമസിക്കുന്നുണ്ട്.... ആമി.... റൂമിൽ എത്തിയപ്പോ ആമിയെയും പരിചയപ്പെട്ടു..... യാത്ര കഴിഞ്ഞു വന്നത് കൊണ്ട് തന്നെ ക്ഷീണം ഒന്ന് മാറി കിട്ടാൻ ഞാൻ പെട്ടെന്ന് പോയി ഫ്രഷ് ആയി...ഞാൻ ഫ്രഷ് ആയി ഇറങ്ങിയപ്പോഴേക്ക് ആമി എനിക്ക് കോഫി ഉണ്ടാക്കി തന്നു.... അവളോട് സംസാരിച്ച് കോഫി കുടിക്കുന്നതിനിടയിൽ അനു എനിക്ക് ഇവിടുത്തെ ഒരു സിം കാർഡ് തന്നു.... അത് കിട്ടിയ സ്പോട്ടിൽ ഞാൻ വീട്ടിൽ വിളിച്ച് അച്ഛനോടും അമ്മയോടും ഇവിടെ എത്തിയെന്ന് പറഞ്ഞു.....

അവരോട് സംസാരിക്കുമ്പോ എനിക്ക് വല്ലാതെ സങ്കടം വരുന്നുണ്ടായിരുന്നു.... കോളേജിൽ നിന്ന് ട്രിപ്പ് ഒക്കെ പോകുമ്പോഴായിരുന്നു മൂന്ന് നാല് ദിവസം ഞാൻ അവരുടെ അടുത്ത് നിന്ന് മാറി നിൽക്കുന്നത്.... ഇതിപ്പോ ഞാൻ ഇനി നാട്ടിലേക്ക് എന്നാണെന്ന് കൂടെ അറിയില്ല....സങ്കടം വന്ന് എനിക്ക് തീരെ സംസാരിക്കാൻ പറ്റാതെ ആയപ്പോ പെട്ടെന്ന് തന്നെ കോൾ കട്ട് ചെയ്തു .... "ആഹാ....അച്ഛനെയും അമ്മയെയും വിട്ട് വന്നതിന്റെ സങ്കടം ആണോ ദിയയുടെ മുഖത്ത് കാണുന്നത്....?" ആമി എന്നെ കളിയാക്കുന്നത് പോലെചോദിച്ചപ്പോൾ ഞാൻ അവളെ നോക്കി ചിരിച്ചു.... "ബെസ്റ്റ്....നല്ല ആളോടാണ് നീ ചോദിക്കുന്നെ....കോളേജിൽ നിന്ന് ട്രിപ്പ് വന്നാൽ ആ മൂന്ന് ദിവസവും മൂന്ന് നേരം ആണ് ഇവള് വീട്ടിൽ വിളിക്കാറ്... ഞങ്ങൾ ഒക്കെ മാക്സിമം എൻജോയ് ചെയ്യുമ്പോ ഇവൾ ആകെപ്പാട് ഡൾ ആയിരിക്കും...." "അടിപൊളി....അപ്പൊ അച്ഛന്റെയും അമ്മയുടെയും പൊന്നുമോൾ ആണെന്ന് അർത്ഥം...." അവറ്റകൾ രണ്ടും എന്നെ ആക്കാൻ തുടങ്ങിയപ്പോ രണ്ടിനെയും നോക്കി ചുണ്ട് കോട്ടി കാണിച്ച് ഞാൻ പോയി കിടന്നുറങ്ങി..... * രാവിലെ ഞങ്ങൾ മൂന്ന് പേരും ഒരുമിച്ച് ആണ് കമ്പനിയിലേക്ക് പോയത്....

സത്യത്തിൽ കമ്പനി കണ്ടപ്പോ ഞാൻ ഒന്ന് അമ്പരന്നു.....അതിനോടൊപ്പം പേടിയും ഉണ്ടായിരുന്നു... ഇത്രേം വല്യ കമ്പനിയിൽ വർക്ക് ചെയ്യുമ്പോൾ അതുപോലെ ശ്രദ്ധിച്ച് വേണ്ടെ ഓരോ കാര്യങ്ങളും ചെയ്യാൻ.... ഓരോന്ന് ആലോചിച്ച് ഞാൻ അവരുടെ കൂടെ അകത്തേക്ക് നടന്നു.... "ദിയ.....നിനക്ക് MD യെ കാണണ്ടേ....?" "ആഹ്....വേണം..." "ആമി....നീ പൊക്കോ....ഞാൻ ഇവളെ അവിടെ വിട്ടിട്ട് വരാം...." അതിന് ഓകെ പറഞ്ഞു ആമി പോയി... ഞങ്ങൾ നേരെ റിസപ്ഷനിലേക്കും പോയി.... "പുതിതായി ആര് വന്നാലും,,,MD യെ കാണണം എങ്കിൽ അപ്പോയിൻമെന്റ് എടുക്കണം....സെർ ഓകെ പറഞ്ഞാൽ മാത്രമേ അകത്തേക്ക് കടക്കാൻ പാടുള്ളൂ....നീ വാ...." എന്നോട് അത്രേം പറഞ്ഞതിന് ശേഷം അവൾ റിസപ്ഷനിസ്റ്റിനോട് എന്നെ കാണിച്ച് അറബിയിൽ ഏതാണ്ടൊക്കെയോ പറഞ്ഞു.... അപ്പൊ റിസപ്ഷനിസ്റ്റ് ഫോണിൽ ആരോടോ സംസാരിച്ചതിന് ശേഷം അനുവിനോട് വീണ്ടും എന്തോ പറഞ്ഞു.... "ഡീ....നിന്റെ പേരെഴുതി സൈൻ ചെയ്യ്....എന്നിട്ട് എന്റെ കൂടെ വാ.... MD യുടെ ക്യാബിൻ ഞാൻ കാണിച്ച് തരാം..." സൈൻ ചെയ്‌തതിന് ശേഷം ഞാൻ അവളുടെ കൂടെ നടന്നു....അനുവിന്റെ കൂടെ പരിചയം ഇല്ലാത്ത എന്നെ കണ്ടിട്ട് ആണെന്ന് തോന്നുന്നു,,,,എല്ലാവരും ഞങ്ങളെ നോക്കുന്നുണ്ട്....ഞാൻ ആണെങ്കിൽ ആകെപ്പാട് നേർവസ് ആണ്.....

"ദാ.... അതാണ് MD യുടെ ക്യാബിൻ.... നീ പൊക്കോ....പിന്നെ,,,,നോക്ക് ചെയ്തിട്ട് വേണം അകത്തേക്ക് കയറാൻ.... അല്ലെങ്കിൽ അങ്ങേര് എടുത്ത് പുറത്തേക്ക് എറിയും....." "അയ്യോ....ഹീറ്റർ ആണോടി....?" "അത്രയ്ക്ക് വല്യ ഹീറ്റർ ഒന്നുമല്ല.... എന്നാലും ഒന്ന് സൂക്ഷിക്കുന്നത് നല്ലതാണ് മോളെ....അല്ലേൽ അവൻ നിന്നെ എടുത്ത് കറി വെക്കാനുള്ള സാധ്യത ഉണ്ട്....എന്തായാലും നീ വിട്ടോ... ഓൾ ദി ബെസ്റ്റ്...." മനുഷ്യന്റെ നെഞ്ചിലേക്ക് തീ കോരി ഇട്ടിട്ട് അവൾടെ കോപ്പിലെ ഒരു ഓൾ ദി ബെസ്റ്റ്....അവൾടെ കാലിന് നോക്കി ഒരു ചവിട്ട് കൊടുത്ത് ഞാൻ ഒന്ന് ശ്വാസം വലിച്ച് വിട്ട് MD യുടെ ക്യാബിൻ ലക്ഷ്യമാക്കി നടന്നു.... ഡോറിൽ നോക്ക് ചെയ്ത് എക്സ്ക്യൂസ്മി സെർ എന്ന് പറഞ്ഞതും ഫയലിൽ നിന്ന് കണ്ണുയർത്താതെ അവൻ കമിൻ പറഞ്ഞപ്പോ ഞാൻ അകത്തേക്ക് കയറി.... ഫയലിൽ നിന്ന് കണ്ണുയർത്താതെ തന്നെ അവൻ എന്നോട് ഇരിക്കാൻ പറഞ്ഞതും ഞാൻ അവന്റെ അഭിമുഖം ആയി ഇരുന്ന് അവനേ ഒന്ന് നോക്കി.... പെട്ടെന്ന് അവൻ ഫയലിൽ നിന്ന് കണ്ണുയർത്തി എന്റെ മുഖത്തേക്ക് നോക്കിയതും ഞാൻ ഒന്ന് ചിരിച്ച് കൊടുത്തു.... മുഖത്ത് ഒരു ചിരി പോലും വരുത്താതെ അവൻ എനിക്ക് നേരെ കൈ നീട്ടിയപ്പോ ഞാൻ ഫയൽ അവന്റെ കയ്യിലേക്ക് വെച്ചു കൊടുത്തു.....

ഫയൽ ഒന്ന് മൊത്തം നോക്കി അത് ടേബിളിലേക്ക് വെച്ചു അവനെന്നെ നോക്കിയപ്പോ എന്റെ കണ്ണ് പോയത് ടേബിളിൽ ഉള്ള അവന്റെ നെയിം ബോർഡിലേക്ക് ആയിരുന്നു.... ദീക്ഷിത് വർമ.... "ദിയ.... അല്ലെ....?" അവന്റെ നെയിം ബോർഡ് നോക്കുന്നതിനിടയിൽ അവൻ എന്നോട് ചോദിച്ചത് കേട്ടപ്പോൾ ഞാൻ പെട്ടെന്ന് തലയുയർത്തി അതേ എന്ന മട്ടിൽ തല കുലുക്കി... "ഹ്മ്മ....അനുശ്രീയുടെ റിക്വസ്റ്റ് കാരണമാണ് ഓണലൈൻ ആയി ഒരു സിമ്പിൾ ഇന്റർവ്യൂ തന്ന് തന്നെ ഇവിടെ അപ്പോയിന്റ് ചെയ്‍തത്....തന്റെ പെർഫോമൻസ് നോക്കി ആയിരിക്കും തന്നെ ഇവിടെ പെർമനന്റ് ആക്കുന്നത്... വൺ ഇയർ ടൈം ഉണ്ട്..... ഒന്നുകിൽ താൻ പെർമനന്റ് ആവാം.... അല്ലെങ്കിൽ താൻ ഇവിടുന്ന് പുറത്ത് ആവുകയും ചെയ്യാം.... എനിവേ,,,ബെസ്റ്റ് ഓഫ് ലക്ക്.... അനുശ്രീയുടെ തൊട്ട് അടുത്ത് തന്നെയാണ് തന്റെ സ്‌പേസ്.... യൂ കാൻ ഗോ നൗ....." എന്നവൻ പറഞ്ഞപ്പോ അവനോടൊരു താങ്ക്സ് പറഞ്ഞു കൊണ്ട് ഫയലും എടുത്ത് അനുവിന്റെ അടുത്ത് ഒഴിഞ്ഞു കിടക്കുന്ന ചെയറിൽ പോയി ഞാൻ ഇരുന്നു.....

എന്നെ കണ്ടതും പെണ്ണ് എന്റെ അടുത്തേക്ക് നീങ്ങി വന്നു.... "എന്ത് പറഞ്ഞെടി....?" "ബെസ്റ്റ് ഓഫ് ലക്ക് എന്ന്....." "എങ്കിൽ തുടങ്ങിക്കോ പെണ്ണേ.... ആദ്യം ഇവിടുത്തെ ഓരോ കാര്യങ്ങളും നീ മനസിലാക്ക്....ദാ....ഈ ഫയൽ ഒക്കെ ഒന്ന് ശരിക്ക് പഠിക്ക്.... ഓകെ....ഞാൻ ഇത്തിരി ബിസിയാണെ...." എന്നും പറഞ്ഞു പെണ്ണ് അവൾടെ ടേബിളിലേക്ക് തന്നെ വലിഞ്ഞു.... എന്റെ ശ്രദ്ധ അവൾ പറഞ്ഞ ഫയലിലേക്കും പോയി....അതൊക്കെ വായിച്ചു നോക്കി ഇരിക്കുമ്പോഴാണ് പെട്ടെന്ന് ഒരുത്തൻ കൊടുങ്കാറ്റ് പോലെ പാഞ്ഞു വന്ന് MD യുടെ റൂമിന്റെ ഡോർ തള്ളി തുറന്ന് അകത്തേക്ക് കയറി പോയി MD യുടെ കോളറയിൽ പിടുത്തം ഇട്ടത്..... ഞാൻ ഒന്ന് ഞെട്ടി കൊണ്ട് MD യുടെ റൂമിന് അകത്തേക്ക് ഒന്ന് സൂക്ഷിച്ച് നോക്കിയപ്പോ വ്യക്തമായിട്ടൊന്നും കാണാൻ കഴിഞ്ഞില്ലെങ്കിലും അവിടെ പൊരിഞ്ഞ വഴക്ക് നടക്കുവാണെന്ന് മനസിലായി..... "അനു.... എന്താടി പ്രോബ്ലം....?" അവൾ ആകാംക്ഷയോടെ അവരുടെ വഴക്ക് ഏന്തി വലിഞ്ഞു നോക്കുന്നതിനിടയിൽ ഞാൻ ചോദിച്ചപ്പോൾ അവളെന്റെ നേരെ തിരിഞ്ഞു.... "ഇപ്പൊ കയറി പോയവനും നമ്മുടെ ബോസും തമ്മിൽ ഭയങ്കര ശത്രുത ആണ്.....രണ്ടും നേരിൽ കണ്ടാൽ അവിടെ വേൾഡ് വാർ ആണ് നടക്കാറ്...

അവര് തമ്മിൽ പ്രോബ്ലം എന്താണെന്ന് അറിയില്ലെങ്കിലും രണ്ടാൾക്കും പരസ്പരം കൊല്ലാൻ ഉള്ള ദേഷ്യം ഉണ്ടെന്ന് അറിയാം..... പിന്നെ,,,,,പേഴ്‌സണലി എനിക്ക് ഇവരുടെ ഈ ഫൈറ്റ് കാണാൻ ഭയങ്കര ഇഷ്ടമാണ് മോളെ....രണ്ട് ഹാൻസം ഗയ്‌സ് മുഖമൊക്കെ ചുവപ്പിച്ച് നിൽക്കുന്നത് കാണുമ്പോൾ എനിക്ക് ആവേശമാണ്...." കോപ്പിന്റെ സംസാരം കേട്ട് ഞാൻ ഓഹ് ദുരന്തം എന്ന് പറഞ്ഞോണ്ട് ക്യാബിൻ തന്നെ നോക്കിയപ്പോ കയറി പോയവൻ കലിപ്പോടെ തന്നെ ഇറങ്ങി വരുന്നതാണ് കണ്ടത്....അവന്റെ സ്യുട്ട് ഒന്ന് ശരിയാക്കി കൊണ്ട് അവൻ നോക്കിയത് എന്റെ മുഖത്തേക്ക് ആയിരുന്നു.... "ങേ....? ഇത് അവനല്ലേ....." എന്ന് ഞാൻ അറിയാതെ പറഞ്ഞതും അവനും എന്നെ തന്നെ നോക്കി നിൽക്കുന്നുണ്ട്....ഞാൻ പറഞ്ഞത് കേട്ടപ്പോൾ അനു ആര് എന്ന മട്ടിൽ എന്നെ നോക്കി എങ്കിലും ഞാൻ കണ്ണ് മാറ്റാതെ അവന്റെ മുഖത്തേക്ക് തന്നെ നോക്കി നിന്നപ്പോൾ അവൻ പെട്ടെന്ന് നോട്ടം തെറ്റിച്ച് അവിടുന്ന് ഇറങ്ങി പോയി.... "ഡി.... നിനക്ക് അവനെ അറിയോ....?" അവൻ പോയ വഴിയേ ഏന്തി വലിഞ്ഞു നോക്കുന്ന എന്നെ അവിടെ പിടിച്ച് ഇരുത്തി അനു ചോദിച്ചപ്പോ അറിയാം എന്ന മട്ടിൽ ഞാൻ തല കുലുക്കി....അത് കേട്ടപ്പോ ങേ എന്ന രീതിയിൽ അവളെന്നെ നോക്കി....

"നിനക്ക് എങ്ങനെ അവനെ അറിയാം.... നീ ഇന്നലെ ഇവിടേക്ക് വന്നതല്ലേ ഉള്ളൂ..." "ഇന്നലെയാണ് പരിചയപ്പെട്ടത്.... ഫ്ളൈറ്റിൽ വെച്ച്...." എന്ന് തുടങ്ങി ഞാൻ അവളോട് എല്ലാം പറഞ്ഞപ്പോ അവള് കണ്ണ് തള്ളി എന്നെ നോക്കി... "അപ്പൊ ഇന്നലെ എയർപോർട്ടിൽ അവനും ഉണ്ടായിരുന്നോ...? നീയെന്റെ അടുത്തേക്ക് വന്നപ്പോഴും ഉണ്ടായിരുന്നോ...." "ഉണ്ടായിരുന്നു....എന്റെ പിന്നിൽ തന്നെ ഉണ്ടായിരുന്നു...." "ഓഹ്...ഗോഡ്....എന്നിട്ട് ഞാൻ കണ്ടില്ലല്ലോ...." "കണക്കായി പോയി....അല്ല,,,,അവനും ബോസും ആയിട്ട് എന്താവും പ്രോബ്ലം....?" "എനിക്ക് അറിയില്ല പെണ്ണേ.... രണ്ട് പേർക്കും പരസ്പരം കാണുന്നത് കലി ആണെന്ന് മാത്രം അറിയാം....." "അവന്റെ പേരെന്താ....?" "വിക്രം..." തുടരും....