💔തമസാ...!!❤️: ഭാഗം 1

എഴുത്തുകാരി: ഭാഗ്യ ലക്ഷ്മി

നഗ്നമായ മേനിയിലേക്ക് നീർത്തുള്ളികൾ ഇറ്റിറ്റ് വീണതും അങ്ങിങ്ങായി വല്ലാത്ത നീറ്റൽ അനുഭവപ്പെട്ടു... മനസ്സിൻ്റെ നീറ്റലുകൾക്ക് മുൻപിൽ ശരീരത്തിൻ്റെ വ്രണങ്ങൾ ഒന്നുമല്ലാതായപ്പോൾ മിഴികൾ ഇറുക്കിയടച്ചു.... പാതി മാഞ്ഞ നെറുകയിലെ സിന്ദൂരത്തെ പൂർണ്ണമായി മായിച്ചു കൊണ്ട് നീർത്തുള്ളികൾ അവളുടെ കവിളിനെ ചുംബിച്ച് താഴേക്കിറങ്ങി... മിഴിനീരിൻ്റെ ഉപ്പുരസത്തിനൊപ്പം ആ സിന്ദൂരച്ചുവപ്പലിഞ്ഞ് ചേർന്നു... ഷവറിൽ നിന്നും വന്നു കൊണ്ടിരുന്ന വെള്ളത്തിൻ്റെ ശക്തി കുറഞ്ഞ് വന്നതും പതിയെ പുറത്തേക്കിറങ്ങി... അർദ്ധനഗ്നനായി ബെഡിൽ തളർന്നുറങ്ങുന്നവനെ വിരക്തിയോടെ നോക്കി... കഴിഞ്ഞു പോയ നിമിഷങ്ങളെ ഓർമ്മിപ്പിക്കാനെന്നോണം ബെഡിൽ അങ്ങിങ്ങായി ചതഞ്ഞരഞ്ഞ മുല്ലപ്പൂക്കൾ... നിലത്തേക്ക് ചിതറി കിടക്കുന്ന ഉടയാടകൾ... അവൾ മരവിച്ച മനസ്സോടെ അവൻ്റെ സമീപത്തായി ചുരുണ്ടു കൂടി കിടക്കുന്ന വില കൂടിയ കല്ല്യാണ സാരി വലിച്ചെടുത്തു.. സ്വന്തം നഗ്നതയെ മറച്ചു കൊണ്ട് ഭിത്തിയോട് ചേർന്നിരുന്നു... ഇതാണോ ജീവിതം...?! ഇങ്ങനെയാണോ ജീവിതം...?! അവൾ സ്വയം ചോദിച്ചു... പ്രണയത്താൽ തൻ്റെ പാതിയിലലിയാൻ കൊതിച്ചവൾ ഒരു നിമിഷത്തെ കാമത്തിൻ്റെ വന്യമായ ഇരയായി മാറിയതവൾക്ക് ഉൾക്കൊള്ളാനായില്ല... മുൻപേ പ്രതീക്ഷിച്ചതല്ലേ ഇതൊക്കെ..? തൻ്റെ പ്രണയം തനിക്ക് സമ്മാനിച്ച ജീവിതം...!!

എല്ലാം ഓർക്കെ പുച്ഛം തോന്നിയവൾക്ക്...!! ചുറ്റിനും നിറഞ്ഞ് നിന്നിരുന്ന മദ്യത്തിൻ്റെയും പാതിയെരിഞ്ഞ സിഗരറ്റിൻ്റെയും രൂക്ഷ ഗന്ധം അവളിൽ അറപ്പുളവാക്കി... ഇല്ല...തോറ്റ് കൊടുക്കാൻ തയ്യാറല്ല ഞാൻ... നിങ്ങളോടുള്ള വാശി തീർക്കാൻ എനിക്ക് ജീവിക്കണം... ഞാൻ നരകിക്കുന്നത് കൺകുളിർക്കെ കണ്ട് കുറ്റബോധത്താൽ നീറണം നിങ്ങൾ...!! കവിളിനെ തലോടിയ മിഴിനീരിനെ വാശിയോടെ തുടച്ചു മാറ്റിക്കൊണ്ടവൾ തീരുമാനിച്ചു... 💔______!!❤️🖤 "മോനേ ദത്താ വയസ്സ് മുപ്പത് കഴിഞ്ഞു നിനക്ക്.... ഇപ്പോൾ ദാ നിൻ്റെ അനിയൻ്റെ വിവാഹവും കഴിഞ്ഞു... ഇനിയെങ്കിലും സ്വന്തമായി ഒരു ജീവിതത്തെ പറ്റി ചിന്തിക്കാറായില്ലേ നിനക്ക്...? എത്ര നാളെന്ന് വെച്ചാ ഒറ്റത്തടിയായിട്ടിങ്ങനെ..?" ഭാരതിയമ്മയുടെ ചോദ്യം കേൾക്കെ നേർത്ത ഒരു പുഞ്ചിരി വിടർന്നു ആ ചൊടികളിൽ... മുഖത്തെ വട്ടക്കണ്ണട ഒന്നും കൂടെ ചേർത്ത് വെച്ചാ പത്രത്താളുകളിലേക്ക് മിഴികൾ പായിച്ചപ്പോൾ പതിവ് ചോദ്യത്തിനുത്തരം നല്കാത്തതിൽ പരിഭവം നിറഞ്ഞ് തുടങ്ങിയിരുന്നു അവരിൽ...!! "മറുപടി ഈ പുഞ്ചിരിയിൽ ഒതുക്കാനാണോ എന്നും നിൻ്റെ ഭാവം..? എൻ്റെ ഉള്ളിലെ ആധി നിനക്കറിയണ്ടല്ലോ കുട്ട്യേ... അതെങ്ങനാ ജീവിതത്തിലൊരു പെണ്ണ് വന്ന് കയറിയാലേ ഐശ്വര്യം ഉണ്ടാവൂന്ന് പറഞ്ഞാൽ തെല്ലും മനസ്സിലാവില്ലല്ലോ... ഇനീം ഇവൻ സ്ത്രീ വിരോധിയാണോ എന്തോ..?" പിറുപിറുത്തു കൊണ്ടവർ പറമ്പിലേക്ക് നടന്നപ്പോഴും അവനിൽ ഭാവ വ്യത്യാസം തെല്ലും ഉണ്ടായില്ല... 💔_____!!❤️

🖤 ആദ്യം നിങ്ങൾക്ക്...ശേഷം നിങ്ങളുടെ അനിയന്...!! ഗ്ലാസ്സിലേക്ക് ചായ പകർന്നു കൊണ്ടവൾ ഓർത്തു... വരാന്തയിൽ പത്രം വായിച്ചു കൊണ്ടിരിക്കുന്നവനെ അവൾ വേദനയോടെ നോക്കി... മിഴികളിൽ വല്ലാത്തൊരു പിടപ്പ്.... "ചായ..." ഉള്ളിലെ ദേഷ്യം പുറമെ പ്രകടിപ്പിക്കാതെ നിർവികാരതയോടെ ചായ നീട്ടുമ്പോൾ അവൻ വാങ്ങുമോ എന്ന സംശയം അവളിൽ നിറഞ്ഞ് നിന്നിരുന്നു.... എന്നാൽ അവളിലെ പ്രതീക്ഷകളെ തെറ്റിച്ചു കൊണ്ട് കൂസലില്ലാതെ അവനത് വാങ്ങിയതും അവൻ്റെ ശിരസ്സ് കുറ്റബോധത്താൽ താഴുന്നത് കാണാൻ കാത്തിരുന്നവളുടെ മുഖത്ത് നിരാശ പടർന്നു... "ഉണ്ണി എഴുന്നേറ്റില്ലേ...?" ചായ ഗ്ലാസ്സ് ചുണ്ടോട് ചേർത്ത് കൊണ്ടവൻ പത്രത്തിലേക്ക് തന്നെ മിഴികൾ പായിച്ച് ചോദിച്ചു.. "ഇല്ല...." താത്പര്യമില്ലായ്മ മറുപടിയിൽ പ്രകടിപ്പിച്ചു കൊണ്ട് പിൻതിരിഞ്ഞ് നടക്കുമ്പോൾ താൻ വീണ്ടും തോറ്റ് പോയിരിക്കുന്നു എന്ന് പറഞ്ഞ മനസാക്ഷിയെ അവൾ ശപിച്ചു... സമയം പത്ത് മണിയോടടുക്കുന്നു... ഇനിയും നിദ്ര വിട്ടുണരാത്ത ശിവയെ അവൾ ദേഷ്യത്തിൽ നോക്കി... ദൈവത്തിൻ്റെ പേരും അസുരൻ്റെ സ്വഭാവവും...!!!!! രണ്ട് പേരും അങ്ങനെ തന്നെ...!! ഈ ലോകത്ത് നിങ്ങൾ രണ്ടും നിങ്ങളെ മാത്രമേ സ്നേഹിക്കുന്നുള്ളൂ...

അത് കൊണ്ടാണല്ലോ എൻ്റെ ജീവിതം വെച്ച് ഇരുവരും കളിച്ചത്... പിൻതിരിഞ്ഞ് പോകാൻ തുടങ്ങിയതും ശിവ അവളുടെ കൈകളിൽ പിടുത്തമിട്ടു....ഉറക്കമല്ലായിരുന്നോ എന്ന മട്ടിൽ അവൾ മുഖം തിരിച്ച് നോക്കിയതും അവൻ അവളെ തന്നിലേക്ക് വലിച്ചടുപ്പിച്ചു... അവൾ പരിഭ്രമത്തോടെ നോക്കി... "ഇനിയും തീർന്നില്ലേ നിൻ്റെ പേടിയും വെപ്രാളവും ഒക്കെ...?" ബെഡിൽ നിന്നും എഴുന്നേറ്റ് ഒരു സിഗരറ്റ് ചുണ്ടോട് ചേർത്തവൻ പുരികം പൊക്കി ചോദിച്ചതും അവൾ അവജ്ഞയോടെ മുഖം തിരിച്ചു... അവൻ അവളെ ഒന്നുഴിഞ്ഞ് നോക്കി... മേലാകെ ഒച്ചിഴയും പോലെയുള്ള അസ്വസ്ഥത അവളിൽ ഉടലെടുത്തു...നിർവ്വചിക്കാനാവാത്ത ഭയം ഉള്ളത്തെ കീഴ്പ്പെടുത്തിയപ്പോൾ ചെന്നിയിലൂടെ വിയർപ്പ് തുള്ളികൾ ഒലിച്ചിറങ്ങി.... അവൻ്റെ നോട്ടം ഒഴിഞ്ഞ് കിടന്ന അവളുടെ സീമന്തരേഖയിൽ ചെന്ന് പരിണമിച്ചു.... എന്തോ ഓർത്ത പോലെ ഒരു സിന്ദൂരച്ചെപ്പ് കരങ്ങളിൽ എടുത്തവളുടെ സീമന്തരേഖ ചുവപ്പിക്കുമ്പോൾ അവൾ നിർവികാരതയോടെ അവനെ നോക്കുന്നുണ്ടായിരുന്നു.... "ഇതെന്നും ഓർമ്മിപ്പിക്കരുത്....!!" താക്കീതോടെ അതും പറഞ്ഞ് ഷെൽഫ് തുറന്ന് മദ്യ കുപ്പിയെടുത്തു... അവ കാലിയായത് കണ്ട് മുഖം ദേഷ്യത്താൽ ചുവന്നു...

ഇന്നലെ മൂക്കറ്റം കുടിച്ചപ്പോൾ ഓർത്തിട്ടുണ്ടാവില്ല തീരുമെന്ന്... അവൾ പറയാൻ തുടങ്ങിയതും എന്തോ ഓർത്ത് പിൻ വാങ്ങി.... പൊടുന്നനെ അവൻ അവളെ വലിച്ചടുപ്പിച്ച് ആ പിൻകഴുത്തിലേക്ക് മുഖം ചേർത്തു... തൻ്റെ ദന്തക്ഷതങ്ങളേറ്റ് ചുവന്നടുത്ത് അധരങ്ങൾ കൊണ്ടവൻ പുല്കിയതും ഇയാൾക്ക് ഭ്രാന്താണോ എന്നു പോലും അവൾക്ക് തോന്നി.... ഉടലാകെ വിറയ്ക്കുന്നു... തലേന്ന് തന്നെ ശ്വാസം മുട്ടിച്ച മദ്യത്തിൻ്റെ രൂക്ഷ ഗന്ധമുള്ള ചുംബനങ്ങൾ മാത്രം ഓർമ്മയിൽ സ്ഥാനം പിടിക്കുന്നു... ഇനീം വീണ്ടും എന്താണാവോ...?! ഭയത്തോടെ വരാൻ പോകുന്ന നിമിഷങ്ങളെ കുറിച്ചോർത്തു... "ഉണ്ണീ...മോനേ... എണ്ണീറ്റില്ലേ ഇതുവരെ..?" ഏട്ടൻ്റെ സ്വരം കേട്ടതും വെപ്രാളത്തോടെ അവളിൽ നിന്നും പിടി വിട്ടു... "ദാ വരുന്നു ഏട്ടാ..." അതും പറഞ്ഞ് ബെഡിൻ്റെ മൂലയിൽ കിടന്ന ഷർട്ടെടുത്തിട്ടു അനുസരണയുള്ള കുട്ടിയേ പോലെ താഴേക്ക് നടന്നു... 💔_____!!❤️🖤 "അവൾക്ക് എത്ര പൈസ വേണോങ്കിലും കൊടുക്കാം... കുറച്ച് നാൾ മാത്രം എൻ്റെ കൂടെ കഴിഞ്ഞാൽ മതി... അത് കഴിഞ്ഞ് അവൾ വീട്ടിലേക്ക് പൊയ്ക്കോട്ടെ..." വിവാഹത്തിന് മുൻപ് ശിവ പറഞ്ഞ വാക്കുകൾ ദത്തൻ്റെ കാതുകളിൽ മുഴങ്ങി.... അനിയൻ ചോദിക്കുന്നതെന്തും വിലയ്ക്ക് വാങ്ങി കൊടുക്കുന്ന ചേട്ടൻ...!!

അവൻ ചാരുകസേരയിലേക്ക് ചാഞ്ഞിരുന്നു മിഴികൾ പൂട്ടി... സ്വന്തം പ്രവർത്തിയെ വിശകലനം ചെയ്യാൻ തയ്യാറാവാതെ... ഒരു പക്ഷേ അവ തന്നിൽ പശ്ചാതാപത്തിൻ്റെ കണികകൾ വാരി വിതറിയാലോ...?! "ഏട്ടാ...." ശിവ സ്നേഹത്തോടെ ദത്തനെ വിളിച്ചു... തൻ്റെ ചിന്തകൾക്ക് വിരാമമിട്ട് ദത്തൻ മിഴികൾ തുറന്ന് മുൻപിൽ നിൽക്കുന്ന അനിയനെ നോക്കി... "സന്തോഷമായോ ഉണ്ണീ നിനക്ക്...?" ദത്തൻ ശാന്തമായി ചോദിച്ചു... "ആയി... അല്ലേലും എൻ്റെ ഏത് ആഗ്രഹമാ ഏട്ടൻ നടത്തി തരാതിരുന്നിട്ടുള്ളത്...?" ശിവ ഉത്സാഹത്തോടെ പറഞ്ഞു... ഉം... ദത്തൻ ഒന്ന് മൂളി... സന്തോഷവാനായി അകത്തേക്ക് കയറി പോകുന്ന അനിയനെ അവൻ നോക്കിക്കണ്ടു... എൻ്റെ നെഞ്ചിൽ ചവിട്ടിക്കൊണ്ടാണ് നീ നിൻ്റെ ആഗ്രഹം പറഞ്ഞത്... ഞാനത് സഫലമാക്കി തന്നതോ എൻ്റെ ഹൃദയത്തെ കീറി മുറിച്ചു കൊണ്ടും... ദത്തൻ വേദനയോടെ ഓർത്തു... 💔_____!!❤️🖤 കാർമേഘമൊഴിഞ്ഞ് ആ അന്തരീക്ഷം പതിയെ ശാന്തമായിക്കൊണ്ടിരിക്കുന്നത് അവൾ നോക്കി നിന്നു... " രാഘവൻ മാഷ് വന്നിട്ടുണ്ട് കുഞ്ഞേ..." ഭാരതിയമ്മ വിളിച്ചു പറഞ്ഞതും അവൾ ഉമ്മറത്തേക്ക് എത്തി നോക്കി... മകളെ പ്രിയ്യപ്പെട്ട അനിയന് കെട്ടിച്ചു കൊടുത്തതിന് പകരം പഴയ കാര്യസ്ഥന് ദത്തൻ നല്കിയ പ്രതിഫലമാകും അയാളുടെ വീട്ടിൽ സർവ്വ സ്വാതന്ത്ര്യം... !!

ഓർക്കെ ജന്മം തന്ന പിതാവിനോട് പുച്ഛം തോന്നി.... തന്നെ കാണും മുൻപേ അകത്തേക്ക് കയറി വന്നവൾ... അറിയാതെ പഴയ ഓർമ്മകളിലേക്ക് മനസ്സ് പോയി... "എൻ്റെ അനിയൻ സ്നേഹിക്കുന്ന പെണ്ണാണ് നീ... നീയെനിക്കെൻ്റെ മകളെ പോലെയാണ്....!!" അവൻ പറഞ്ഞ വാക്കുകൾ ഓർക്കെ അവൾക്ക് പുച്ഛം തോന്നി... ഹും... സ്നേഹിക്കുന്ന പെണ്ണ്...!! അതിന് നിങ്ങളുടെ അനിയന് സ്നേഹമെന്താണെന്ന് അറിയാമോ..? കാമുകിയെ മകളാക്കി മാറ്റിയ നിങ്ങൾക്കും അതറിയില്ലല്ലോ ദേവേട്ടാ....!! അല്ല ദേവദത്ത്....!!!! 💔_____!!❤️🖤 "ദത്താ ശിവൻ കുഞ്ഞ് ഇന്നും കുടിച്ച് കൂത്താടി ആരുമായോ കവലയിൽ വെച്ച് അടിയുണ്ടാക്കി... വിവാഹം കഴിഞ്ഞ് രണ്ട് ദിവസം പോലും ആയിട്ടില്ല.. ആ കൊച്ചിനെ ഓർത്തെങ്കിലും അവന് സ്വഭാവം കുറച്ചൊന്ന് മാറ്റിക്കൂടെ..?" പതിവ് പരാതികൾ രാവിലെ തന്നെ ദത്തൻ്റെ ചെവിയിൽ എത്തി...

മിഴികളടച്ച് ശാന്തമായി എല്ലാം കേട്ടിരുന്നു... "ഞാൻ അവനോട് പറയാം..." "ഇതു തന്നെയല്ലേ എന്നും പറയാറ്..?" ദത്തൻ്റെ മറുപടിയിൽ നിന്നുയർന്ന അതൃപ്തി പ്രകടമാക്കും വിധത്തിലായിരുന്നു ആ ചോദ്യം.... ങും... ദത്തൻ മൂളി... അയാൾ നടന്നകലുന്നതും നോക്കി ദത്തൻ ആ ചാരു കസേരയിൽ ചാഞ്ഞിരിന്നു.... "ദേവേട്ടാ....!!" പാദസര കിലുക്കം ചുറ്റിനും മുഴക്കി തൊടിയിലൂടെ ഓടി വരുന്നവളുടെ കൊഞ്ചലോടെയുള്ള വിളികൾ കാതിൽ മുഴങ്ങി.... അതെ...സർവ്വരുടെയും ദത്തൻ ഒരുവൾക്ക് മാത്രം ദേവനായിരുന്നു...തുടരും