💕തട്ടത്തിന്മറയത്ത് 💕 : ഭാഗം 3

രചന: റഫീന മുജീബ്

"ഈശോയേ " അവൾ അറിയാതെ വിളിച്ചു പോയി. അവൾ വീണ്ടും വീണ്ടും ആ ഫോട്ടോയിലേക്ക് തന്നെ നോക്കി. കർത്താവേ ഇത് അത് തന്നെ, ഈ മുഖം തന്നെയാണ് എന്റെ സ്വപ്നത്തിൽ വന്ന മുഖം, ഈ മുഖത്തെയാണ് ഞാൻ ഒരു നോക്ക് കാണാൻ കൊതിച്ചത്, ഈ മുഖത്തോട് ആണ് എനിക്ക് ആദ്യമായി ഇഷ്ടം തോന്നിയത്.. അവൾക്ക് അവളുടെ കണ്ണുകളെ വിശ്വസിക്കാനായില്ല. അപ്പോൾ നീ എന്നെ അയാൾക്ക് അരികിലേക്ക് എത്തിക്കുകയാണല്ലേ, കർത്താവിനു സ്തോത്രം, ഒരുപാട് നീ എന്നെ സങ്കടപ്പെടുത്തിയെങ്കിലും എനിക്കായി നീ ഒരുപാട് സന്തോഷവും കാത്തുവച്ചിട്ടുണ്ടല്ലേ..? അവൾ ഈശോയുടെ രൂപത്തിനു മുൻപിൽ കൈകൂപ്പി മുട്ടുകുത്തി നിന്നു. വീണ്ടും ആ ഫോട്ടോയിലേക്ക് തന്നെ നോക്കുമ്പോൾ അവളുടെ ഉള്ളിൽ പുതിയ പ്രതീക്ഷകളുടെ നാമ്പ് മുളപൊട്ടുന്നുണ്ടായിരുന്നു. അയാളെ കുറിച്ച് കൂടുതൽ അറിയാനായി ആ അക്കൗണ്ട് മൊത്തം അവൾ പരതി.

പേര് പ്രണവ് എന്നാണ് എന്നു മാത്രമേ അറിയാൻ കഴിഞ്ഞുള്ളൂ, വേറെ ഒരു വിവരവും അതിൽ ഉണ്ടായിരുന്നില്ല, ഒരുപാട് ഫോട്ടോസുകൾ അപ്‌ലോഡ് ചെയ്തതിൽ നിന്നും ഒരു കാര്യം മനസ്സിലായി , ആള് നല്ലൊരു ആനപ്രേമി ആണ്, അതിലുള്ള കൂടുതൽ ചിത്രങ്ങളും ആനയുടേത് തന്നെയാണ്, അതിലേക്ക് കൂടുതൽ സൂക്ഷ്മതയോടെ നോക്കിയപ്പോഴാണ് വേറൊരു കാര്യം കൂടി മനസ്സിലായത്, ഫെയ്സ്ബുക്ക് ഐഡി ഉപയോഗിച്ചിട്ട് വർഷങ്ങൾ ആയിട്ടുണ്ട്, അതിലെ ലാസ്റ്റ് ചിത്രം ഒരുപാട് വർഷങ്ങൾക്കു മുമ്പ് ഉള്ളതാണ്. അതവളിൽ ചെറിയൊരു നിരാശയുണ്ടാക്കിയെങ്കിലും പ്രതീക്ഷ കൈവിടെണ്ട എന്ന് അവളുടെ ഉള്ളിലിരുന്ന് ആരോ പറഞ്ഞു. പുറത്ത് മഴ തകർത്തു പെയ്യുന്നുണ്ട്, അവൾ എഴുന്നേറ്റ് മെല്ലെ ജനലരികിലേക്ക് നീങ്ങി. തണുത്ത ഇളം കാറ്റ് അവളെ തഴുകി പോയി. മുറിയിൽ നിന്നും വരുന്ന വെളിച്ചത്തിൽ മഴവെള്ളത്തിന് സ്വർണ്ണനിറം ഉള്ളതുപോലെ തോന്നി. മഴയെ ഇത്ര മനോഹരം ആയിട്ട് തനിക്ക് മുമ്പ് തോന്നിയിട്ടില്ല.

മുൻപ് ഒരു റെയ്‌ച്ചൽ ഉണ്ടായിരുന്നു പ്രതീക്ഷകളെല്ലാമറ്റ് ജീവച്ഛവമായി ജീവിച്ച ഒരു റേച്ചൽ. ഇന്ന് തന്റെ ഉള്ളിലും ജീവിക്കാൻ ഉള്ള പ്രതീക്ഷയുണ്ട്, ഒരുപിടി സ്വപ്നങ്ങൾ ഉണ്ട്, കാണുന്ന കാഴ്ചകൾക്കെല്ലാം ഭംഗിയുണ്ട്, അതാസ്വദിക്കാനുള്ള ഒരു മനസ്സുണ്ട്, തന്നിലെ മാറ്റം അവൾ തിരിച്ചറിയുകയായിരുന്നു. ആ മഴയും നോക്കിയങ്ങനെ നിൽക്കുമ്പോൾ തന്റെ ഉള്ളം കുളിരണിയുന്നതവളറിഞ്ഞു. °°°°°°°°°°°°°°°°°°°°°°°°°°°°°°°°°°°°°°°°°°° പുറത്ത് പെയ്യുന്ന ശക്തമായ മഴയൊന്നും അറിയാതെ ശരീത്തിന്റെ കുളിരു മാറ്റാൻ തലവഴി പുതപ്പു മൂടി നല്ല ഗാഢനിദ്രയിൽ ആണ് ഐനു. തൊട്ടടുത്തുതന്നെ അനിയത്തി ഐഷുട്ടിയുമുണ്ട്, രണ്ടാൾക്കും എത്ര തണുപ്പ് ആണെങ്കിലും ഫാനിന്റെ ശബ്ദം കേൾക്കാതെ ഉറക്കം വരില്ല. മക്കളുടെ ഈ സ്വഭാവം തോമാച്ചന് അത്ര പിടിക്കാറില്ല. അറുത്ത കൈക്ക് ഉപ്പു തേക്കാത്ത സ്വഭാവമാണ് പുള്ളിക്ക്, ഇതിന്റെ പേരിൽ മക്കളുമായി എന്നും ഉടക്കാണ്. ഉറക്കത്തിനു ഭംഗം വരുത്തിക്കൊണ്ട് ഐനുവിന്റെ ഫോൺ ശബ്ദിക്കാൻ തുടങ്ങി.

ഉറക്കത്തിന്റെ ആലസ്യം വിട്ടുമാറാതെ ഐനു മുഖത്തെ പുതപ്പുമാറ്റി കൈകൊണ്ടു പരതി ടേബിളിൽ നിന്ന് ഫോൺ എത്തിച്ച് എടുത്തു. ഡിസ്പ്ലേയിൽ തെളിഞ്ഞ റിച്ചുവിന്റെ പേര് കണ്ടതും അവൾ ഞെട്ടിപ്പിടഞ്ഞെഴുന്നേറ്റു. എന്തെടീ, വല്ല വയ്യായ്കയും ഉണ്ടായോ ഫോൺ എടുത്തതും ഐനു ചോദിച്ചു. ശോ.. നിങ്ങൾക്കൊക്കെ എന്നോട് ഇതു തന്നെ ചോദിക്കാൻ ഉള്ളൂ...? റെയ്‌ച്ചൽ നിരാശയോടെ ചോദിച്ചു. അല്ല നീ ഈ പാതിരാത്രി വിളിച്ചപ്പോൾ, ഞാൻ പെട്ടെന്ന് നിനക്ക് വയ്യാതെ ആയോ എന്ന് പേടിച്ചാ ചോദിച്ചേ, നീ കാര്യം പറ ഐനു ഒരു കോട്ടുവാ ഇട്ടുകൊണ്ട് പറഞ്ഞു. എന്ത് കാര്യം.? ഞാൻ ചുമ്മാ വിളിച്ചതാ... എന്റെ പൊന്നു മോളെ നിന്നെ ഞാൻ ഇന്നും ഇന്നലെയും കാണാൻ തുടങ്ങിയതല്ലല്ലോ...? നിനക്ക് എന്തെങ്കിലും എന്നോട് പറയാൻ ഉണ്ടെങ്കിൽ അത് ഏതു പാതിരാത്രി ആണെങ്കിലും പറയാതെ നിനക്ക് ഉറക്കം വരില്ല എന്ന് എനിക്ക് നന്നായി അറിയാം, അതുകൊണ്ട് എന്റെ പൊന്നുമോൾ വിളിച്ച കാര്യം പറ ഐനു ശബ്ദം കുറച്ചുയർത്തി പറഞ്ഞു.

അതുപിന്നല്ലേ, ഞാൻ നിന്നോട് പറഞ്ഞിട്ടുണ്ടായിരുന്നില്ലേ എന്റെ സ്വപനത്തിൽ വന്ന ഒരാളെ കുറിച്ച്. റെയ്‌ച്ചൽ മടിച്ചു മടിച്ചു പറഞ്ഞു. ഏത് ആ ചുംബന വീരനോ ഐനു സംശയത്തോടെ ചോദിച്ചു. ചുംബന വീരൻ നിന്റെ കോശൻ തെണ്ടി, റിച്ചു കേട്ടയുടനെ മറുപടി നൽകി. ആഹ്, അതെന്തെങ്കിലും ആയിക്കോട്ടെ നീ കാര്യം പറ ഐനു വീണ്ടും ഒരു കോട്ടുവായിട്ടുകൊണ്ട് പറഞ്ഞു. ബെസ്റ്റ്, നീയൊക്കെ ഒരു നല്ല കാമുകിയാണോ...? കാമുകനെക്കുറിച്ച് എന്ത് പറഞ്ഞാലും ഒരു കൂസലുമില്ല. നീ ഉള്ള കാര്യം പറയുമ്പോൾ ഞാൻ എന്തിന് എതിർക്കണം, നീ കാര്യം പറയുന്നുണ്ടോ എനിക്ക് കിടന്നുറങ്ങണം ഐനു ഇത്തിരി ദേഷ്യത്തോടെ പറഞ്ഞു. ആഹ് പറയാം, ഞാൻ അന്ന് സ്വപ്നം കണ്ട ആളില്ലേ അയാൾ ശരിക്കും ജീവനോടെ ഉണ്ടെടീ, പേര് പ്രണവ് നാട് തൃശൂർ റിച്ചു ഒറ്റശ്വാസത്തിൽ പറഞ്ഞു മുഴുവനാക്കി. നീ വീണ്ടും സ്വപ്നം കണ്ടോ...? ഐനു സംശയത്തോടെ ചോദിച്ചു. സ്വപ്നം കണ്ടത് ഒന്നും അല്ലെടീ, ഞാൻ ഫേസ്ബുക്കിൽ ആളെ കണ്ടു,

ആള് അത് തന്നെ, പേര് പ്രണവ് ആണെന്നറിയാം വേറെ ഒരു ഡീറ്റെയിൽസും ഇല്ല, ആ ഐഡി ഉപയോഗിച്ചിട്ട് വർഷങ്ങളായി. ആ പേരിൽ വേറെ അക്കൗണ്ട് ഇല്ല, ഞാൻ ഒരുപാടു നോക്കി അവൾ നിരാശയോടെ പറഞ്ഞു. ആഹ്, അതു ചിലപ്പോൾ പുള്ളിയുടെ ഭാര്യക്ക് ഇഷ്ടം ഉണ്ടാവില്ല ഫേസ്ബുക്ക് ഉപയോഗിക്കുന്നത് അതാവും, ഐനു അലസതയോടെ പറഞ്ഞു. മാതാവേ ചങ്കിൽ കൊള്ളുന്ന വർത്താനം ഒന്നും പറയല്ലേ ടീ, അങ്ങേരു കല്യാണം ഒന്നും കഴിച്ചിട്ടുണ്ടാവില്ല, റിച്ചുവിന്റെ മറുപടി കേട്ടപ്പോൾ ഐനുവിന് ചിരിയാണ് വന്നത്. എന്റെ പൊന്നു റിച്ചു, നീ ഇപ്പോൾ ഒന്ന് പോയി ഉറങ്ങെടീ, ബാക്കിയൊക്കെ നമുക്ക് നാളെ ആലോചിക്കാം, രാവിലെ നേരത്തെ ഇറങ്ങേണ്ടതല്ലേ, അപ്പോൾ ഗുഡ് നൈറ്റ് ഐനു അവളുടെ മറുപടിക്ക് പോലും നിൽക്കാതെ ഫോൺ കട്ടാക്കി പുതപ്പിനുള്ളിലേക്ക് വീണ്ടും ചുരുണ്ടു കൂടി. റിച്ചു അവളു പറഞ്ഞ കാര്യം ആലോചിച്ചു എപ്പോഴോ ഉറങ്ങി. രാവിലെ മമ്മയുടെ വിളിയാണ് അവളെ ഉണർത്തിയത്.

ഒരുപാടു ദൂരം യാത്ര ചെയ്യേണ്ടതുകൊണ്ട് വീട്ടിൽ നിന്നും നേരത്തെ ഇറങ്ങണം. ഫിലിപ്പും റോഷനും ആണ് അവരെ കൊണ്ട് വിടുന്നത്. ആനിയ്ക്ക് ഒരുപാട് ദൂരം യാത്ര ചെയ്യാൻ വയ്യാത്തതുകൊണ്ട് അവൾ പോകുന്നില്ല. ഐനു റെഡിയായി നേരത്തെ തന്നെ അവിടേക്കെത്തി. എല്ലാവരോടും യാത്ര പറഞ്ഞു റിച്ചു പോകാൻ റെഡിയായി വന്നു. ആനി മകളെ ചേർത്തു പിടിച്ച് നെറുകയിൽ ചുംബിച്ചു. മകളെക്കുറിച്ചുള്ള ആവലാതിയും അവളെ വിട്ടു പിരിയുന്നതിലുള്ള സങ്കടവും ആ മുഖത്ത് നിഴലിച്ചു കാണാം. അമ്മയെ നോക്കി അവൾ പുഞ്ചിരിയോടെ കണ്ണിറുക്കി കാണിച്ചു. ഐനു ആനിയുടെ കയ്യിൽ പിടിച്ച് ആശ്വസിപ്പിച്ചു. പേടിക്കേണ്ട ആന്റി ഞാനില്ലേ കൂടെ അവൾ പുഞ്ചിരിയോടെ ആനിയോട് പറഞ്ഞു. അവളോട് യാത്ര പറഞ്ഞ് അവർ അവരുടെ യാത്ര തുടർന്നു. യാത്രയിലുടനീളം റിച്ചു മൗനമായി പുറത്തെ കാഴ്ചകൾ ആസ്വദിച്ചിരുന്നു. ഐനുവും റോഷനും കണ്ണുകൾകൊണ്ട് അവരുടേതായ ഭാഷയിൽ സംസാരിച്ചുകൊണ്ടിരുന്നു.

തൃശ്ശൂർ എത്തിയപ്പോൾ റെയ്ച്ചലിന്റെ ഉള്ളം എന്തിനോ വേണ്ടി തുടിച്ചു. കണ്ണുകൾ ആരെയോ അന്വേഷിക്കുന്നത് പോലെ, താൻ തേടുന്ന മുഖം അവിടെ കാണുന്നവരിലെല്ലാം അവൾ പരതി. ടൗണിൽ നിന്ന് കുറച്ചു മാറി ഒരു ഉൾ വഴിയിലൂടെ പോകണം അവർ താമസിക്കുന്ന ഹോസ്റ്റലിലേക്ക്. റോഡിന്റെ ഇരു സൈഡിലും വയലുകൾ നിൽക്കുന്നത് ആ വീതിയെ കൂടുതൽ മനോഹരമാക്കി. കുറച്ചു കൂടി മുൻപോട്ടു പോയപ്പോൾ ഹോസ്റ്റലിന്റെ മെയിൻ കവാടം കാണാൻ തുടങ്ങി. അവിടെ കാർ നിർത്തി ഇറങ്ങിയതിനു ശേഷം റെയ്‌ച്ചൽ ചുറ്റും ഒന്ന് കണ്ണോടിച്ചു. ഒരുപാട് കുട്ടികൾ താമസിക്കുന്ന നഗരത്തിന്റെ തിരക്കുകളിൽ നിന്നെല്ലാം ഒഴിഞ്ഞു മാറി നല്ലൊരു ഹോസ്റ്റൽ. അവരെ അവിടെ ആക്കി റോഷനും ഫിലിപ്പും അപ്പോൾ തന്നെ മടങ്ങി. ഐനുവും റെയ്ച്ചലും മാത്രമായിരുന്നു അവർക്ക് കിട്ടിയ മുറിയിൽ ഉണ്ടായിരുന്നത്. രാത്രി ആയപ്പോഴേക്കും ആനി ഒരുപാട് തവണ മോളെ വിളിച്ച് വിശേഷം ചോദിച്ചറിഞ്ഞിരുന്നു.

അവൾക്കറിയാം അവൾ മാറിനിന്നാൽ ഉറങ്ങിപ്പോകും അവിടം. തന്റെ കളിചിരികൾ ഇല്ലാതെ ആ വീട്ടിൽ ആരും സന്തോഷത്തോടെ ഇരിക്കില്ല എന്നും. ഐനു കൂടെയുള്ളത് കൊണ്ട് റെയ്ച്ചലിന് വലിയ ബുദ്ധിമുട്ടൊന്നും വന്നില്ല. രാത്രി ഏറെ വൈകിയും അവർ സംസാരിച്ചു, ഉറങ്ങാൻ കിടന്നപ്പോൾ അർദ്ധരാത്രി കഴിഞ്ഞിരുന്നു. രാവിലെ രണ്ടുപേരും നേരത്തെ തന്നെ കുളിച്ചു റെഡി ആയി. അവിടെനിന്നും കുറച്ചു ദൂരം നടന്നാൽ കോളേജിലേക്ക് എത്തും. ആ വയലുകൾക്കിടയിലുള്ള നടപ്പാതയിലൂടെയുള്ള നടത്തത്തിനും ഒരു പ്രത്യേക സുഖം ഉണ്ട്. കളിചിരികളും ആയി അവർ കോളേജിൽ എത്തിയത് അറിഞ്ഞില്ല. വളരെ വലിയ ഒരു കോളേജ് ആണ്, ശാന്തമായ അന്തരീക്ഷം. എല്ലാംകൊണ്ടും രണ്ടുപേർക്കും അവിടം ഒരുപാട് ഇഷ്ടമായി. കോളേജിനകത്തേക്ക് പ്രവേശിച്ചപ്പോൾ തന്നെ കണ്ടു എല്ലാ കുട്ടികളും എന്തോ കാണാൻ എന്നവണ്ണം ഓടിപ്പോകുന്നത്. അവർ രണ്ടുപേരും സംശയത്തോടെ മുഖത്തോടു മുഖം നോക്കി. അങ്ങോട്ടേക്ക് ഓടിപ്പോകുന്ന ഒരു കുട്ടിയെ റെയ്‌ച്ചൽ പിടിച്ചുനിർത്തി കാര്യം അന്വേഷിച്ചു.

തനിക്കൊന്നും അറിയില്ല എല്ലാവരും പോകുന്നത് കണ്ടപ്പോൾ താനും പോകുന്നു എന്നും പറഞ്ഞ് അവൾ നടന്നകന്നു. എങ്കിൽ വാ നമുക്കും ഒന്ന് ചെന്ന് നോക്കാം റെയ്‌ച്ചൽ ഐനുവിന്റെ കൈപിടിച്ച് മുന്നോട്ട് നടന്നു. ഐനു അവളെ വിലക്കിയെങ്കിലും അവൾ അത് കൂട്ടാക്കിയില്ല. അവിടെ ചെന്നപ്പോൾ എല്ലാവരും കൂട്ടംകൂട്ടമായി നിൽക്കുന്നത് കണ്ടു. എല്ലാവരെയും തള്ളിമാറ്റി റെയ്‌ച്ചൽ വരാന്തയിലേക്ക് കയറിയതും തൊട്ടടുത്ത ക്ലാസ്സിൽ നിന്നും ഒരാൾ തെറിച്ച് അവളുടെ കാൽച്ചുവട്ടിലേക്ക് വീണു. അവൾ ഞെട്ടിത്തരിച്ച് രണ്ടടി പുറകോട്ട് മാറി. , അയാളുടെ വീഴ്ച കണ്ടാലറിയാം ആരോ അടിച്ചു തെറിപ്പിച്ചത് ആണെന്ന്. എല്ലാവരെയും പോലെ അവളും ആകാംക്ഷയോടെ ആ ക്ലാസിലേക്ക് ഉറ്റുനോക്കി ആരാണയാൾ എന്നറിയാൻ. അവിടെ നിന്നും വന്ന രൂപത്തെ കണ്ട് അവൾ ഞെട്ടി. മുഷ്ടി ചുരുട്ടിയ കൈയിലെ ഞരമ്പുകൾ എല്ലാം വളരെ വ്യക്തമായി കാണുന്നുണ്ടായിരുന്നു. വലിഞ്ഞുമുറുകിയ ഞരമ്പുകളും അതിലേറെ ദേഷ്യത്താൽ വിറക്കുന്ന മുഖവുമായി അയാൾ വീണു കിടക്കുന്നവനെ നോക്കി....  (തുടരും )

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക...