🎶 സോളമന്റെ ഉത്തമഗീതം 🎶❤️: ഭാഗം 21

രചന: റിൻസി പ്രിൻസ്‌

അവളെ നോക്കി അത്രയും പറഞ്ഞ് അവളുടെ മുഖത്ത് തന്റെ കൈവിരലുകൾ കൊണ്ട് ഒന്ന് തഴുകി ഇരുകണ്ണുകളും അടച്ച് കാണിച്ച് അവൻ അടുക്കളയിൽ നിന്നും പുറത്തേക്ക് ഇറങ്ങിയിരുന്നു… ആ സമയം തന്റെ ശരീരത്തിൽ സുഖമുള്ള ഒരു തണുപ്പ് വന്നു മൂടുന്നത് അവൾ അറിഞ്ഞു… പ്രണയത്തിന്റെ സുഖമുള്ള തണുപ്പ്

ചെയ്യുന്നത് ശരിയാണോ എന്ന് ചോദിച്ചാൽ അതിനു വ്യക്തമായ ഒരു മറുപടി തന്റെ കയ്യിൽ ഇല്ല. പക്ഷേ അവന്റെ സ്നേഹം താൻ ആഗ്രഹിക്കുന്നുണ്ട്. അവന്റെ സാനിധ്യയത്തിൽ താൻ സന്തോഷവതിയാണ്. അവൾ ചിന്തിച്ചു.

കുറച്ചു സമയങ്ങൾക്ക് ശേഷം ആനി അടുക്കളയിലേക്ക് തിരികെ വന്നിരുന്നു. അപ്പോഴും എന്തൊക്കെ ജോലി ചെയ്യുകയാണ് മരിയ.

” വൈകുന്നേരം ആകുമ്പോൾ അമല ഇങ്ങ് വരും

ആനി പറഞ്ഞു

ആണോ?

പെട്ടെന്ന് ഒരു ഉത്സാഹത്തോടെ അവൾ ചോദിച്ചു. അവളുടെ മുഖത്ത് വിരിഞ്ഞ ആ ഉത്സാഹം തന്നെ അമലയെ അവൾ എത്ര ഇഷ്ടപ്പെടുന്നു എന്നതിന് ഉദാഹരണമായിരുന്നു.

” അമ്മച്ചിക്ക് ഇപ്പൊ വലിയ കുഴപ്പമില്ലന്നാ പറഞ്ഞത് വൈകിട്ട് ഞാൻ ആശുപത്രിയിൽ നിന്നോളാം എന്ന് പറഞ്ഞു. അമല യാത്ര ചെയ്തു വന്നതല്ലേ, ഒന്ന് റസ്റ്റ് പോലും എടുക്കാതെ ആശുപത്രിയിൽ നിൽക്കാമെന്ന് പറഞ്ഞാൽ അത് ബുദ്ധിമുട്ടുള്ള കാര്യമല്ലേ.?

ആനി എന്തൊക്കെയോ സംസാരിക്കുന്നുണ്ട് മരിയയും അതൊക്കെ കേൾക്കുന്നുണ്ട്. രണ്ടുപേരുംകൂടി ജോലികൾ ഒക്കെ പെട്ടെന്ന് തീർത്തിരുന്നു. എല്ലാ കാര്യങ്ങളും അറിഞ്ഞു ചെയ്യുന്ന കൂട്ടത്തിലാണ് മരിയ എന്ന് ആനിക്കും മനസ്സിലാക്കാൻ സാധിച്ചു. വെറുതെയല്ല അമലയ്ക്ക് അത്രയും ഇഷ്ടം എന്ന് ആ നിമിഷം ആനി ചിന്തിച്ചിരുന്നു. ഉച്ചയ്ക്ക് ഭക്ഷണം കഴിക്കുന്ന സമയമായപ്പോഴാണ് പിന്നീട് സോളമനെ മരിയ കാണുന്നത്. ആനിയാണ് അവനുവേണ്ടി എല്ലാം വിളമ്പിയത്. ആദ്യമായി അവനുവേണ്ടി ഭക്ഷണം വിളമ്പാൻ അവൾക്ക് ആഗ്രഹം തോന്നി. ഇഷ്ടമുള്ളതൊക്കെ മതിയാവുന്നത് വരെ അവൻ കഴിക്കുന്നതും താനത് വെച്ചുണ്ടാക്കി കൊടുക്കുന്നതും ഒക്കെ അവർ സങ്കൽപ്പത്തിൽ കണ്ടു. അത് അവളിൽ ഒരു പുഞ്ചിരി വിടർത്തി. തന്നെ ചിരിക്കുന്ന അവളെ കണ്ടുകൊണ്ട് കണ്ണു കൂർപ്പിച്ച് എന്താണ് എന്ന രീതിയിൽ അവൻ കണ്ണുകൾ കൊണ്ട് ഒന്ന് ചോദിച്ചു. ഒന്നുമില്ലന്ന് ചുമൽ കോച്ചി കാണിച്ചവൾ അടുക്കളയിലേക്ക് കയറിപ്പോയിരുന്നു. ആ നിമിഷം അവനിലും ഒരു പുഞ്ചിരി നിറഞ്ഞിരുന്നു….

ആനിക്കൊപ്പം ഇരുന്നാണ് മരിയ ഭക്ഷണം കഴിച്ചത്. എല്ലാ കാര്യത്തിലും ഒരു അച്ചടക്കമുള്ള കൂട്ടത്തിലാണ് മരിയ എന്ന് തോന്നി. അവൾ ചെയ്യുന്ന കാര്യങ്ങളിലും ആ വൃത്തി പ്രകടമാണ്.

“കുറച്ചുനേരം പോയി കിടന്നോ കൊച്ചേ.. വന്നപ്പോ തൊട്ട് ഓരോ ജോലിയും ചെയ്ത് ഇങ്ങനെ ഇരിക്കുകയല്ലേ,

ആനി പറഞ്ഞു

” എന്തെങ്കിലും ചെയ്തില്ലെങ്കിൽ എനിക്ക് ബോറടിക്കും. ഞാൻ എപ്പോഴും എന്തെങ്കിലും ചെയ്തു കൊണ്ടിരിക്കും. ഇല്ലെങ്കിൽ എനിക്ക് ബോറടിക്കുവാൻ തുടങ്ങും. ഞാൻ പണ്ടുമുതലേ ഇങ്ങനെ ജോലികളൊക്കെ ചെയ്തിട്ടുള്ളത് കൊണ്ടാവും ഭയങ്കര ബോറടിയാ ജോലി ചെയ്തില്ലെങ്കിൽ. കിടന്നാലും ഉറക്കം ഒന്നും വരില്ല…

” ഏതായാലും നാട്ടിൽ വന്ന സ്ഥിതിക്ക് കൊച്ചിന്റെ വീട്ടിലേക്കും ഒന്ന് പോണ്ടേ.?

ആനി ചോദിച്ചപ്പോൾ അവളുടെ മുഖത്തെ സന്തോഷം മങ്ങുന്നത് അവർ ശ്രദ്ധിച്ചിരുന്നു.

” പോകുന്നുണ്ടെന്ന് അമലയാന്റി പറഞ്ഞത്. എപ്പോഴാണെന്ന് എനിക്കറിയില്ല,

പതിഞ്ഞ സ്വരത്തിൽ അവൾ മറുപടി പറഞ്ഞപ്പോൾ ആനി ഒന്ന് ചിരിച്ചിരുന്നു. ഒരു അഞ്ചുമണിയോടെ അടുപ്പിച്ചപ്പോൾ ആണ് സണ്ണിയും അമലയും വന്നത്. അമലയുടെ മുഖം കണ്ടപ്പോൾ തന്നെ നന്നേ ക്ഷീണവതിയാണ് എന്ന് മരിയയ്ക്ക് തോന്നിയിരുന്നു. എങ്കിലും അമലയെ കണ്ടപ്പോൾ ഒരു വല്ലാത്ത ആശ്വാസം അവൾക്ക് തോന്നി. സ്വന്തം അമ്മയെ കാണുമ്പോൾ പോലും ഇങ്ങനെയൊരു സമാധാനം തോന്നിയിട്ടില്ല. വളരെ കുറച്ചു സമയം കൊണ്ട് തനിക്ക് വലിയൊരു ആത്മബന്ധം അമലയോട് ഉണ്ടായിട്ടുണ്ട് എന്ന് അവൾക്ക് തോന്നിയിരുന്നു. തന്നോടുള്ള അവരുടെ ഇടപെടൽ തന്നെയാണ് അതിന് കാരണം. മരിയയെ നോക്കി നന്നായി ഒന്ന് പുഞ്ചിരിച്ചു കൊണ്ടാണ് അമല കയറി വന്നത്.

” നീ അങ്ങ് ക്ഷീണിച്ചു പോയല്ലോ ഒറ്റ ദിവസം ആശുപത്രിയിൽ നിന്നപ്പോഴേക്കും…

ആനി പറഞ്ഞു

” ആശുപത്രിയിൽ നിൽപ്പ് മാത്രമായിരുന്നില്ലല്ലോ ആനിച്ചേച്ചി, വന്നതും ക്ഷീണിച്ചായിരുന്നു, പിന്നെ അമ്മച്ചി ആണെങ്കിൽ വെറുതെ ഇരുത്തുമോ എന്നെ, കാലും കൈയും ഒക്കെ തിരുമ്മിപ്പിച്ചു. പിന്നെ അതൊക്കെ ഒരു സന്തോഷം അല്ലേ,

” അമ്മച്ചി ഡിസ്ചാർജ് ആവാൻ എന്താണെങ്കിലും കുറച്ചധികം സമയം എടുക്കും.

ആനി പറഞ്ഞു

” ശരിയാ ഇന്ന് സണ്ണിച്ചായനും എന്നോട് പറഞ്ഞു..

അമല പറഞ്ഞു.

” അയ്യോ ഞാൻ നിങ്ങളെ വന്ന പാടെ വിശേഷം ചോദിക്കുക ചെയ്തത്, ചായ എടുത്തുകൊണ്ടു വരാം.

അതും പറഞ്ഞ് ആനി പോയപ്പോഴേക്കും രണ്ട് കപ്പിൽ ചായയുമായി മരിയ വന്നിരുന്നു. അത് കാണെ ആനി അവളെ നോക്കി നന്നായി ഒന്ന് ചിരിച്ചു. അമലയും സണ്ണിയും മുഖത്തോട് മുഖം നോക്കി. ഹൃദയം നിറഞ്ഞ ഒരു പുഞ്ചിരി സമ്മാനിച്ചു.

” ഞാൻ പറഞ്ഞപ്പോഴേക്കും ചായ കൊണ്ട് ആളിങ്ങ് എത്തിയല്ലോ.

മരിയേ നോക്കിക്കൊണ്ട് ആനി പറഞ്ഞപ്പോൾ അവളും ഒന്ന് ചിരിച്ചിരുന്നു. സണ്ണിയുടെയും അമലയുടെയും കൈകളിലേക്ക് ചായ കൊടുത്തതിനു ശേഷം അവൾ മാറി നിന്നു.

” നീ വല്ലതും കഴിച്ചോ മോളെ..?.

അമല വാത്സല്യത്തോടെ അവളുടെ മുഖത്തേക്ക് നോക്കി ചോദിച്ചു

” അതെന്നെ വർത്തമാനമാണ് അമലേ നീ പറയുന്നത്, ഞാൻ എന്നാ അവളെയിവിടെ പട്ടിണികിട്ടേക്കുവാണോ.?

അല്പം ദേഷ്യത്തോടെ എന്നാൽ ഒരു കുസൃതിയോടെ ആനി ചോദിച്ചപ്പോൾ അമലയൊന്ന് ചിരിച്ചു കാണിച്ചു

“അതുകൊണ്ടല്ല ചേച്ചി…! വേണമെങ്കിൽ കൂടി വേണ്ടെന്ന് പറയുന്ന കൂട്ടത്തിൽ ആണ് മരിയ. അത് എനിക്ക് നന്നായിട്ട് അറിയാവുന്നതു കൊണ്ട് ഞാൻ ഈ കൊച്ചിനെ നിർബന്ധിച്ചു എന്തെങ്കിലും കഴിപ്പിക്കും, അതാ ചോദിച്ചത് വല്ലതും കഴിച്ചോന്ന്

” അത് നീ പറഞ്ഞത് സത്യമാ. ആഹാരമൊക്കെ കഴിക്കുന്നത് നുള്ളി പെറുക്കിയാ, വന്നപ്പോൾ തൊട്ട് എന്റെ കൂടെ ഓരോ ജോലിയും ചെയ്തു കൂടിയത് ആണ്. ഒന്ന് കിടക്കാൻ പറഞ്ഞിട്ട് പോലും കേട്ടില്ല.

” നിനക്കൊന്ന് റസ്റ്റ് എടുക്കായിരുന്നില്ലേ മോളെ എത്രനേരം യാത്ര ചെയ്തു വന്നതാ..

അമല സ്നേഹത്തിൽ ചാലിച്ച ഒരു ശാസനം പോലെ പറഞ്ഞു. അവൾ ഒന്ന് ചിരിക്കുക മാത്രമാണ് ചെയ്തത്..

” അമ്മച്ചി ഏതായാലും കുറച്ചുനാൾ എടുക്കും ഒരു പഴയ ഫോമിൽ എത്താൻ നാളെ വൈകുന്നേരം ഞാൻ പോകുവാ, ഇച്ചായന് സമയമില്ല പിന്നെ സോളമന്റെ കാര്യം അറിയാമല്ലോ, ഒരു ദിവസം എന്നും പറഞ്ഞുകൊണ്ട് അവനെ വിളിച്ചു കൊണ്ടു വന്നത്, അവൻ ഇവിടെ നിൽക്കത്തില്ല മാത്രമല്ല മരിയയുടെ വീട്ടിൽ ഒന്ന് കയറണം.. ബെറ്റി പ്രത്യേകം വിളിച്ചു പറഞ്ഞിരുന്നു ജോണിന് അറിയില്ല ഞങ്ങൾ ഇന്നലെ വന്നു എന്ന്. വേറൊരു വീട്ടിൽ ഇവൾ അന്തിയുറങ്ങി എന്നൊക്കെ അറിഞ്ഞാൽ ജോണിന് അത് ഇഷ്ടപ്പെടുത്തുന്നുമില്ല. അതുകൊണ്ട് നാളെ അവിടെ കൂടി കയറിയിട്ട് ഞങ്ങൾ പെട്ടെന്ന് തന്നെ തിരിച്ചു പോവാ.. ഞാൻ അമ്മച്ചിയോട് പറഞ്ഞിട്ടുണ്ട്, ഒന്ന് കാണാൻ വേണ്ടി ഞാൻ ഓടിപ്പിടിച്ച് വന്നതാണെന്ന്… ഇവിടെ ഇപ്പോൾ എന്റെ ആവശ്യമുണ്ടോ ചേച്ചി, അല്ലെങ്കിൽ പിന്നെ ഇവരെ വിട്ടിട്ട് ഞാൻ ഇവിടെ നിൽക്കാമെന്ന് വയ്ക്കാം…
അമല ചോദിച്ചു..

” അതിന്റെ ഒന്നും ആവശ്യമില്ലന്നേ ഇവിടെ ജോലിക്ക് നിൽക്കുന്ന ഒരു പെണ്ണ് ഉണ്ട്. പിന്നെ ഞാനും ഉണ്ട്, മാറിമാറി ആശുപത്രിയിൽ നിൽക്കാൻ ഒക്കെ. ഇഷ്ടം പോലെ ആൾക്കാർ ഉണ്ട് നീ അതൊന്നു ഓർത്തു വിഷമിക്കേണ്ട, പിന്നെ അമ്മച്ചിക്ക് നിന്നെ കാണണമെന്ന് പറഞ്ഞതുകൊണ്ട് വിളിച്ചു വരുത്തി എന്നെ ഉള്ളൂ. പ്രായമായവരുടെ ആഗ്രഹങ്ങളു നമ്മളെ സാധിപ്പിച്ചു കൊടുക്കണ്ടേ..?

ആനി പറഞ്ഞു.

” സോളമൻ എവിടെ? കണ്ടില്ലല്ലോ സണ്ണിയാണ് ചോദിച്ചത്

” മുകളിലുണ്ട് ഞാൻ വിളിക്കാം, നിങ്ങൾ വന്നത് അവൻ അറിഞ്ഞു കാണില്ല..

ആനി അങ്ങോട്ട് നോക്കി പറഞ്ഞപ്പോൾ അറിയാതെ മരിയയുടെ മിഴികളും അവിടേക്ക് പോയിരുന്നു.. ആനിയെ തുടർന്നുപോകുന്ന മരിയയുടെ മിഴികൾ ഒരു നിമിഷം സണ്ണിയുടെ കണ്ണിൽ പതിച്ചിരുന്നു…..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…