🎶 സോളമന്റെ ഉത്തമഗീതം 🎶❤️: ഭാഗം 23

രചന: റിൻസി പ്രിൻസ്‌

ഒരു വാക്കിൽ എല്ലാവരോടും യാത്ര പറഞ്ഞ് അവൻ ആദ്യം തന്നെ ഇറങ്ങി കാറിന്റെ ഡ്രൈവിംഗ് സീറ്റിലേക്ക് കയറിയിരുന്നു. മരിയയുടെ മുഖത്തേക്ക് പോലും അവൻ നോക്കിയില്ല. ദേഷ്യത്തിൽ ചുവന്നിരിക്കുകയാണ് മുഖം. എന്താണ് കാര്യമെന്ന് അവൾക്കും മനസ്സിലാക്കാൻ സാധിച്ചില്ല. പക്ഷേ അവന്റെ ദേഷ്യം നിറഞ്ഞ മുഖം അവളിൽ ഒരു അസ്വസ്ഥത നിറച്ചിരുന്നു.

ഇടയ്ക്ക് അമല എന്തൊക്കെ ചോദിക്കുന്നതിന് മറുപടി പറയുന്നു എന്നല്ലാതെ വലിയ സംസാരങ്ങൾ ഒന്നും തന്നെ സോളമനിൽ നിന്നും ഉണ്ടായില്ല. ഇടയ്ക്കിടെ അവൾ അവനെ നോക്കുന്നുണ്ട്. അത് കണ്ടിട്ടും മനപ്പൂർവം കാണാത്തതു പോലെ അവൻ ഡ്രൈവിങ്ങിൽ ശ്രദ്ധ കേന്ദ്രീകരിക്കുകയാണ് അപ്പോൾ പിണക്കം തന്നോട് തന്നെയാണെന്ന് മരിയ്ക്കും മനസ്സിലായി. എന്തിനാണ് അവൻ തന്നോട് ഇത്തരം ഒരു ദേഷ്യം കാണിക്കുന്നത് എന്ന് അവൾക്ക് മനസ്സിലാക്കാൻ സാധിച്ചിരുന്നില്ല. കാര്യം എന്ത് എന്ന് അറിയാത്ത രീതിയിൽ തന്നെ അവൻ അവളെ നോക്കി. ഇടയ്ക്ക് കരിക്ക് കണ്ടപ്പോൾ വണ്ടി നിർത്താൻ അമല പറഞ്ഞു എല്ലാവർക്കും കരിയ്ക്ക് വാങ്ങിക്കൊണ്ട് വന്നതും അവനാണ്. അവൾക്ക് നേരെയും ഒരെണ്ണം നീട്ടിയിരുന്നു. അവൾ വേണ്ട എന്ന് പറഞ്ഞപ്പോൾ അല്പം രൂക്ഷമായി അവളുടെ മുഖത്തേക്ക് നോക്കി. അവളുടെ കൈകളിലേക്ക് കരിയ്ക്കു കൊടുത്തു. പിന്നീട് കുടിക്കാതെ തരം ഉണ്ടായിരുന്നില്ല അവൾക്ക്. അവന് എന്താണ് സംഭവിച്ചത് എന്ന് ആലോചിച്ചുകൊണ്ട് ഇരിക്കുകയായിരുന്നു അവൾ.

ഇതിനിടയിൽ വീടെത്തിയതൊന്നും അവൾ അറിഞ്ഞില്ല എന്ന് പറയുന്നതാണ് സത്യം. പുറത്തേക്ക് അമല ഇറങ്ങിയപ്പോഴാണ് തന്റെ വീട്ടിൽ വന്നു എന്ന സത്യം മരിയ മനസ്സിലാക്കിയത്.. അതുവരെ ചിന്തകളിൽ സോളമൻ മാത്രമായിരുന്നു. പെട്ടെന്ന് ശരീരത്തിലേക്ക് ഒരു ഭയം അരിച്ചു കയറാൻ തുടങ്ങി. ഇവിടെ വരുമ്പോൾ മാത്രം താൻ നിസ്സഹായ ആകുമെന്ന് അവൾ ചിന്തിച്ചു.

സ്വന്തം വീട്ടിലേക്ക് വലിയ ഭയത്തോടെ വരുന്ന ഏക വ്യക്തിയും താനായിരിക്കും എന്ന് അവൾക്ക് തോന്നിയിരുന്നു. പുറത്തേക്ക് ഇറങ്ങിയപ്പോൾ തന്നെ കണ്ടിരുന്നു ഉമ്മറത്ത് തങ്ങളെ കാത്തു നിൽക്കുന്ന ബെറ്റിയെ ഒപ്പം തന്നെ കൂടെ ജോണുമുണ്ട്. തന്റെ അരികിലേക്ക് വരാൻ പോലും സാധിക്കാതെ മുഖത്തേക്ക് നോക്കി സന്തോഷത്തോടെ നിൽക്കുകയാണ് ബെറ്റി. ഇടയ്ക്ക് ജോണിനെ നോക്കുന്നുണ്ട്. അവിടെ നിന്ന് ഒരു മൗനനുവാദം കിട്ടിയാൽ മാത്രമേ തന്റെ അരികിലേക്ക് വരാൻ സാധിക്കു. സണ്ണിയെ നോക്കി ഒന്ന് പുഞ്ചിരിക്കുക മാത്രമാണ് ജോൺ ചെയ്യുന്നത്.
ഗൗരവത്തിൽ തന്റെ മുഖത്തേക്കും ഒന്ന് നോക്കി. ശേഷം സണ്ണിയുടെ അരികിലേക്ക് വന്ന അയാൾക്ക് നേരെ ഹസ്തദാനം നൽകി. ആ സമയത്ത് ബെറ്റി ഇറങ്ങി വന്നിരുന്നു. ആദ്യം അമലയുടെ അടുത്തേക്കാണ് ചെന്നത്. തന്റെ അരികിലേക്ക് ആദ്യം ഇറങ്ങിവന്നാൽ ജോണിന്റെ കയ്യിൽ നിന്നും വഴക്ക് കിട്ടും എന്നുള്ളത് ഉറപ്പാണ്. ശേഷം ജോണിനെ ഒന്നു നോക്കി, പ്രശ്നങ്ങളൊന്നുമില്ല എന്ന് മനസ്സിലാക്കി തന്റെ അരികിലേക്ക് വന്നു. അത് കഴിഞ്ഞ് മുഖത്തൊക്കെ ഒന്ന് തലോടി. അവൾക്ക് വല്ലാത്ത ദേഷ്യമാണ് അപ്പോൾ തോന്നിയത്. തന്നെയൊന്ന് തലോടാൻ പോലും സ്വന്തം ഭർത്താവിന്റെ അനുവാദം അമ്മയ്ക്ക് വേണമെന്ന് അവൾ ചിന്തിച്ചിരുന്നു. തന്നെക്കാൾ വലുത് അദ്ദേഹമാണെന്ന് തന്നെയാണ് അതിനർത്ഥം. അല്ലെങ്കിലും അമ്മയ്ക്ക് എപ്പോഴും തന്നെക്കാൾ വലുത് അദ്ദേഹം തന്നെ ആയിരുന്നല്ലോ. എന്നും രണ്ടാം സ്ഥാനം നൽകിയിട്ടുള്ളത് തനിക്ക് ആണല്ലോ.

അകത്തു നിന്നും ആ നിമിഷം തന്നെ ജോണിന്റെ സഹോദരിയും മകളും ഇറങ്ങി വന്നിരുന്നു. അവർ കൂടി ഇവിടെ ഉള്ളതു കൊണ്ടായിരിക്കാം അമ്മ തന്നോട് ഇത്രയും അകൽച്ച കാണിച്ചത് എന്ന് അവൾക്ക് തോന്നിയിരുന്നു.

” ജോണച്ചായന്റെ പെങ്ങളും മോളും ആണ്.. നീ കണ്ടിട്ടില്ലല്ലോ

അമലയോട് ആയി ബെറ്റി പറഞ്ഞു

“ഇല്ല നീ പറഞ്ഞിട്ടുണ്ടല്ലോ..?

അമല ചിരിയോടെ പറഞ്ഞു

“നിങ്ങൾ എപ്പോഴാ അവിടുന്ന് ഇറങ്ങിയത്,

ജോണിന്റെ സഹോദരി ജെസ്സി ചോദിച്ചു

” ഞങ്ങള് ഇന്നലെയാ വന്നത്. പിന്നെ ഹോസ്പിറ്റലിൽ കയറി അമ്മച്ചിയെയും കണ്ട് അവിടെ ഇരിക്കുകയായിരുന്നു. അതും കഴിഞ്ഞാ ഇങ്ങോട്ട് വന്നത്. ഹോസ്പിറ്റലിൽ തന്നെ ഒരേ ഇരിപ്പിരുന്നു.

അമല പറഞ്ഞു

“ഇവിടുന്ന് പോയപ്പോഴത്തേക്ക് ഇവൾ അങ്ങ് വണ്ണം വച്ചല്ലോ.

താല്പര്യമില്ലാതെ മരിയയുടെ മുഖത്തേക്ക് നോക്കി ജോണിയുടെ സഹോദരിയായ ജെസ്സി പറഞ്ഞിരുന്നു. ആ നിമിഷം തന്നെ അവരെ ഒന്ന് രൂക്ഷമായ രീതിയിൽ സോളമൻ നോക്കിയിരുന്നു. അവരുടെ സംസാരത്തിൽ തന്നെ അവൾക്ക് നൽകുന്ന വില മനസ്സിലാക്കാൻ സാധിക്കും.

“ഇവർക്ക് ഹോസ്പിറ്റൽ കാന്റീനിലാ ഉച്ചയ്ക്ക് ഫുഡ്. നമ്മൾ കഴിക്കുന്ന പോലത്തെ ആഹാരം ഒന്നുമല്ല നെയ്യൊക്കെ കൂടുതൽ ഇട്ട ചോറൊക്കെയാ കിട്ടുന്നത്. അതുകൊണ്ടായിരിക്കും..!

അമല പറഞ്ഞു

“അവിടെ അമലയെ ഇവള് സഹായിക്കുമോ വല്ലോം ചെയ്യൂമോ.? അതോ എപ്പോഴും പഠിത്തമാണെന്നും പറഞ്ഞ് മാറിയിരിപ്പാണോ പണി? ജോലിയൊക്കെ ചെയ്യാൻ വലിയ മടിയാ… പിന്നെ ഇവിടെ ബെറ്റിക്ക് ഇവളെ കൊണ്ട് ഒന്നും ചെയ്യിപ്പിക്കുന്നത് ഇഷ്ടമല്ല, അതുകൊണ്ട് ആരും ഒന്നും പറയില്ലല്ലോ. നിങ്ങടെ വീട്ടിലും വന്ന് ആഹാരം മാത്രമേ കഴിക്കുന്നുള്ളൂന്ന് അറിയണ്ടേ..

ഒരു പുച്ഛഭാവത്തോടെ അവരത് പറഞ്ഞപ്പോൾ അവരുടെ സ്വഭാവം നല്ല രീതിയിൽ തന്നെ മനസ്സിലാക്കാൻ സോളമന് സാധിച്ചിരുന്നു. അവന്റെ മുന്നിൽവച്ച് അവർ അങ്ങനെയൊക്കെ പറഞ്ഞപ്പോൾ വല്ലാത്ത നാണക്കേട് മരിയയ്ക്ക് തോന്നിയിരുന്നു. എന്തു മറുപടി പറയണം എന്നറിയാതെ നിൽക്കുകയായിരുന്നു അവർ. ആ നിമിഷം സോളമനു ദേഷ്യം തോന്നിയത് ബെറ്റിയോടാണ്. സ്വന്തം മകളെ കുറിച്ചാണ് ഭർത്താവിന്റെ സഹോദരി പറയുന്നത്. എന്നിട്ട് ഒന്നും പ്രതികരിക്കാതെ നിൽക്കുകയാണ് അവർ.

” അങ്ങനെയൊന്നുമല്ല ജെസ്സി, ഒരു മിനിറ്റ് പോലും മരിയ അടങ്ങിയിരിക്കില്ല. ഞാൻ അവളെ കൊണ്ട് ഒരു ജോലിയും ചെയ്യിപ്പിക്കാറില്ല. പറയുമ്പോൾ ജനറൽ നഴ്സിംഗ് ആണ്. പക്ഷേ പഠിക്കാൻ ഒരു നൂറുകൂട്ടം ഉണ്ട്. ഞാൻ പഠിക്കാൻ പറഞ്ഞാലും അവൾ പോയി പഠിക്കില്ല അടുക്കളയിൽ എന്തെങ്കിലും ചെയ്തു എന്നെ സഹായിച്ചു കൊണ്ട് നിൽക്കും. അവസാനം ഞാൻ ദേഷ്യപ്പെട്ട് പറഞ്ഞു വിടുമ്പോഴാണ് എന്തെങ്കിലും ഒന്ന് പോയി പഠിക്കുന്നത്. വീട്ടിലേക്ക് വന്നതിനു ശേഷം അവൾ വെറുതെ ഇരിക്കുന്നതായിട്ട് ഞാനും ഇച്ചായനും കണ്ടിട്ടേയില്ല. ഒരിക്കൽ ഇച്ചാ യൻ എന്നെ വഴക്കു കൂടി പറഞ്ഞു, നമ്മുടെ വീട്ടിൽ നിൽക്കാൻ വന്ന ഒരു കൊച്ചിനെ കൊണ്ട് ഇങ്ങനെ ജോലി ചെയ്യിപ്പിക്കുന്നത് ശരിയാണോ എന്നും ചോദിച്ചു.

അമലയുടെ ആ മറുപടി ഒട്ടും തന്നെ ജെസ്സിക്ക് ഇഷ്ടമായില്ല എന്ന് അവരുടെ മുഖം കണ്ടപ്പോൾ തന്നെ സോളമന് മനസ്സിലാക്കാൻ സാധിച്ചു. ആ നിമിഷം തന്റെ അമ്മയെ കുറിച്ച് ഓർത്ത് വല്ലാത്ത മതിപ്പാണ് അവനു തോന്നിയത്. ഈ സമയത്ത് മരിയുടെ അമ്മയായിരുന്നു ഇങ്ങനെ പ്രതികരിക്കേണ്ടിയിരുന്നത്. എന്നാൽ അവർ അവിടെ മൗനം പാലിച്ചു നിൽക്കുകയാണ്. ആ സ്ഥാനത്താണ് അവൾക്ക് വേണ്ടി തന്റെ അമ്മ സംസാരിച്ചത്. അത് വലിയ സന്തോഷമാണ് അവന് നൽകിയത്. എല്ലാകാലത്തും അവൾക്കു വേണ്ടി സംസാരിക്കാൻ അമ്മ ഇങ്ങനെ ഉണ്ടായിരുന്നുവെങ്കിൽ എന്ന് ആ നിമിഷം അവൻ ആഗ്രഹിച്ചു പോയിരുന്നു.. അതേപോലെ മരിയയുടെ മുഖവും താഴ്ത്തിയുള്ള നിൽപ്പ് കണ്ടപ്പോൾ വല്ലാത്ത വേദനയും തോന്നിയിരുന്നു. എല്ലാവരും സംസാരത്തിലാണ്

” മുറ്റത്തുനിന്ന് സംസാരിച്ചത് മതി ഇനി അകത്തേക്ക് കയറി ഇരിക്കാം

സന്ദർഭം ഒന്നു മയപ്പെടുത്താൻ എന്നതു പോലെ ബെറ്റി പറഞ്ഞു ആ നിമിഷം തന്നെ എല്ലാവരും അകത്തേക്ക് കയറിയിരുന്നു. ഏറ്റവും അവസാനമാണ് മരിയ അകത്തേക്ക് കയറിയത് എല്ലാവരും അകത്തേക്ക് പോയി എന്ന് ഉറപ്പായി കഴിഞ്ഞപ്പോൾ അവളുടെ കൈകളിൽ ഒന്നു മുറുക്കിപ്പിടിച്ചിരുന്നു സോളമൻ. അടരാൻ വെമ്പുന്ന മിഴികളോടെ അവന്റെ മുഖത്തേക്ക് അവൾ നോക്കിയപ്പോൾ കൈകളിൽ ഒന്നുകൂടി അമർത്തി കണ്ണുകൾ കൊണ്ട് ഒന്നുമില്ല എന്ന് അവൻ കാണിച്ചു. ആരും കാണുന്നില്ല എന്ന് മനസ്സിലാക്കി അവളുടെ കൈകളിൽ ഒന്ന് തഴുകി. താൻ കൂടെയുണ്ട് എന്ന് ആശ്വസിപ്പിച്ചു. അത്രയും നേരം ഏറ്റ എല്ലാ അപമാനങ്ങൾക്കും മനസ്സിൽ കെട്ടി നിന്നിരുന്ന ദുഃഖങ്ങൾക്കും ഒരു വലിയ പരിഹാരമായിരുന്നു അവന്റെ ആശ്വസിപ്പിക്കൽ എന്ന് അവൾക്ക് തോന്നിയിരുന്നു. ആ നിമിഷം തന്നെ നിറകണ്ണുകളിൽ ഒരു പുഞ്ചിരി നിറഞ്ഞു. അതിൽ നിന്ന് തന്നെ തന്റെ ആശ്വസിപ്പിക്കലിൽ അവൾ എത്രത്തോളം സന്തോഷം നേടി എന്ന് അവനും മനസ്സിലാക്കാൻ സാധിച്ചു. ഇരുകണ്ണുകളും അടച്ച് അവളുടെ മുഖത്തേക്ക് നോക്കി നന്നായി ഒന്ന് പുഞ്ചിരിച്ചിരുന്നു സോളമൻ….കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…