🎶 സോളമന്റെ ഉത്തമഗീതം 🎶❤️: ഭാഗം 26

രചന: റിൻസി പ്രിൻസ്‌

സ്വന്തം മകളെ ഒന്ന് ചേർത്ത് പിടിക്കാൻ ധൈര്യമില്ലാത്തവൾ എന്തിനാണ് അവൾക്കു വേണ്ടി കണ്ണുനീർ ചിന്തുന്നത് എന്നാണ് ആ നിമിഷം അമല ചിന്തിച്ചത്. സോളമന്റെ മനസ്സിലും അതേ ചിന്തയായിരുന്നു. അതോടൊപ്പം എങ്ങനെയെങ്കിലും ഇവിടെ നിന്നും മരിയയെ രക്ഷപ്പെടുത്താൻ സാധിച്ചല്ലോ എന്ന ആശ്വാസവും

തിരികെയുള്ള യാത്രയിൽ ആ വണ്ടിയിൽ മുഴുവനായി മൗനമായിരുന്നു ഇടം പിടിച്ചത്.. ആർക്കും എന്തു പറയണമെന്ന് പോലും അറിയില്ലായിരുന്നു.. നേർത്ത ശ്വാസം ചെവിയിലേക്ക് അടിച്ച സമയത്താണ് തൊട്ടരികിൽ ഇരുന്ന് മരിയയെ അമല ശ്രദ്ധിച്ചത്. അവൾ അപ്പോഴേക്കും സീറ്റിൽ പാതിചാരി ഉറങ്ങിപ്പോയിരുന്നു.. നന്നേ ക്ഷീണമുണ്ട് അവൾക്ക് എന്ന് അമലയ്ക്ക് തോന്നിയിരുന്നു.. അതേസമയം വല്ലാത്ത ഒരു വേദനയും, ചെറിയ കുട്ടിയാണ്, അവളെ ആദ്യമായി കൈകളിൽ എടുത്ത നിമിഷം മുതലുള്ള കാര്യങ്ങൾ ഒരു നിമിഷം അവരുടെ മനസ്സിലൂടെ പാഞ്ഞു പോയി…

സുന്ദരിയായ ഒരു കൊച്ചു മിടുക്കി. അവളെ ഒന്ന് സ്വന്തമായി കിട്ടിയിരുന്നുവെങ്കിൽ എന്ന് താൻ ആഗ്രഹിച്ചിരുന്നു. ആദ്യത്തെ മകനായിരുന്നപ്പോൾ ഒരു പെൺകുട്ടിയെ കൂടി വേണമെന്ന് ഒരുപാട് ആഗ്രഹിച്ചിരുന്നു. എന്നാൽ തന്റെ ശരീരം അതിന് ഒരുമല്ല എന്നും ഇനി ഒരു ഗർഭധാരണം തന്റെ ജീവനു തന്നെ ആപത്താണ് എന്നും ഡോക്ടർ പറയുക കൂടി ചെയ്ത സമയത്താണ് ആ സ്വപ്നം ഇല്ലാതായത്. അപ്പോഴയിരുന്നു ബെറ്റിയുടെ മകളെ തന്റെ കൈകളിലേക്ക് വെച്ച് തന്നത്. ആ കുഞ്ഞുമാലാഖയെ ആദ്യം കണ്ട നിമിഷം തന്നെ അവൾ തന്റെ മകൾ ആയിരുന്നുവെങ്കിൽ എന്ന് താൻ ആഗ്രഹിച്ചിരുന്നു. ഒരു നിമിഷം മരിയയുടെ മുഖത്തേക്ക് നോക്കിയപ്പോൾ ആ പഴയ വാത്സല്യം വീണ്ടും അമലയ്ക്ക് തോന്നിയിരുന്നു..

ദൈവം അല്ലെങ്കിലും അങ്ങനെയാണ് ചില കാര്യങ്ങൾ അർഹതപ്പെട്ടവരുടെ കൈകളിൽ കൊടുക്കില്ല. അതുപോലെ ഒന്നായിരുന്നു ബെറ്റിയ്ക്ക് മരിയയെ കിട്ടിയത്. സ്നേഹമില്ല എന്നല്ല പക്ഷേ എതിർത്ത് പറയാൻ പണ്ട് മുതലേ അറിയില്ല. അല്ലെങ്കിൽ ജീവിതത്തിലുള്ള പ്രശ്നങ്ങളും ദുരിതങ്ങളും അവളെ നിസ്സംഗ ആക്കിയതായിരിക്കാം. അവളോട് ഒരിക്കൽ ദേഷ്യം തോന്നിയിരുന്നു എങ്കിലും അവളുടെ അവസ്ഥയെക്കുറിച്ച് ഓർക്കുമ്പോൾ സങ്കടം തോന്നുന്നു. അവർ പതിയെ മരിയ്യെ തഴുകിയിരുന്നു. അവൾ അത് അറിഞ്ഞു പോലുമില്ല. അത്രത്തോളം ക്ഷീണിതയാണ് അവൾ എന്ന് അവർക്ക് മനസ്സിലാക്കാൻ സാധിച്ചു. പിന്നെ തന്നോട് ചേർത്ത് പിടിച്ചു. റിയർവ്യൂ മിററിലൂടെ ഈ ദൃശ്യം കണ്ട സോളമന്റെ മനസ്സ് നിറഞ്ഞിരുന്നു.. എന്നും ഇങ്ങനെ അവളെ അമ്മ ചേർത്തുപിടിച്ചിരുന്നു എങ്കിൽ എന്ന് അവൻ ചിന്തിച്ചു.. ഒരുപക്ഷേ തന്റെ ഉള്ളിലെ ഇഷ്ടം അറിയുമ്പോൾ എന്തായിരിക്കും അമ്മയുടെ മാനസികാവസ്ഥ..? അമ്മയപ്പോൾ അതിനെ സപ്പോർട്ട് ചെയ്യുമോ? ആ ഒരു കാര്യത്തിൽ എന്തായിരിക്കും അമലയുടെ പ്രതികരണം എന്നത് അവനും അറിയില്ലായിരുന്നു. ചിലപ്പോൾ എതിർക്കുമായിരിക്കും. വല്യമ്മച്ചിയുടെ ഇന്നത്തെ പ്രതികരണം കണ്ടപ്പോൾ തന്നെ കുടുംബത്തിൽ നിന്നും എതിർപ്പ് വരും എന്നുള്ളത് ഉറപ്പാണ്. പിന്നീടുള്ള ആകെ പ്രതീക്ഷ അമ്മയാണ്. അമ്മ പറഞ്ഞാൽ പപ്പ കേൾക്കും, അമ്മ പറയുന്നതിനപ്പുറം ഒന്നും പപ്പയ്ക്കില്ല. പലരും കളിയാക്കുന്നതുപോലെ അമ്മയെ പപ്പ പേടിച്ചത് കൊണ്ടല്ല സ്നേഹം കൊണ്ടുള്ള ഒരു വിധയത്വമാണ് അത്. പല പുരുഷന്മാരും അത്തരത്തിൽ ഭാര്യയോട് സ്നേഹം കൊണ്ടുള്ള വിധേയത്വം കാണിക്കാറുണ്ട്. മറ്റുള്ളവരുടെ കണ്ണിൽ അത് ചിലപ്പോൾ തെറ്റായിരിക്കാം. അതുകൊണ്ടാണല്ലോ ചില സാഹചര്യങ്ങളിൽ അവരെ പെൺകോന്തൻ എന്നും ഭാര്യ പറയുന്നത് മാത്രം കേൾക്കുന്നവൻ എന്നുമൊക്കെ പട്ടം ചാർത്തി സമൂഹം വിളിക്കുന്നത്. മമ്മയും പപ്പയും മാത്രം തനിക്കൊപ്പം നിന്നാൽ മതി. മറ്റുള്ളവർ ഒന്നും തന്റെ വിഷയമല്ല. അവരെന്തു പറഞ്ഞാലും അതുതന്നെ ബാധിക്കുകയുമില്ല. പക്ഷേ ഈ ലോകം മുഴുവൻ എതിർത്താലും അവളെ സ്വന്തമാക്കും ഇനി അവളെ വിട്ടുകളയാൻ പറ്റില്ല.. അത്രമേൽ ആ പാവം ഇപ്പോൾ തന്നിൽ പ്രതീക്ഷ വെച്ചിട്ടുണ്ട്. ജീവിതത്തിൽ മുഴുവൻ വേദനകളും ദുഃഖങ്ങളും മാത്രം അനുഭവിച്ച ഒരു പെൺകുട്ടി. അവളെ ഇനി താനായി കൂടി വേദനിപ്പിക്കാൻ പാടില്ല. അങ്ങനെ ചെയ്താൽ താൻ ചെയ്യുന്ന ഏറ്റവും വലിയ ക്രൂരത അതായിരിക്കും..! ദൈവം ഒരിക്കലും തന്നോട് ക്ഷമിക്കില്ല എന്ന് സോളമൻ മനസ്സിൽ ഓർത്തു. ഓരോന്ന് ചിന്തിച്ച് എയർപോർട്ട് എത്തിയത് അവർ അറിഞ്ഞിരുന്നില്ല എന്നതാണ് സത്യം. എയർപോർട്ടിൽ ഇറങ്ങിയപ്പോൾ മരിയക്കൊപ്പം തന്നെയായിരുന്നു അമല അവളെ ചേർത്ത് പിടിച്ചത്. ഒരു കൊച്ചു കുഞ്ഞിനെ പോലെ എന്തൊക്കെ വേണം എന്ന് ചോദിച്ചു നടക്കുന്ന അമലയെ കണ്ടപ്പോൾ വലിയ സന്തോഷം സോളമെന് തോന്നിയിരുന്നു. ഇടയ്ക്കിടെ അവളുടെ നേത്രങ്ങൾ തന്നെയും തേടി വരുന്നുണ്ട്..അവളുടെ മുഖത്തേക്ക് നോക്കി ചെറുചിരി നൽകി കണ്ണുകൾ രണ്ടും അടച്ചു കാണിച്ചിരുന്നു.. അവളിപ്പോൾ സുരക്ഷിതമായ കൈകളിൽ ആണ് ആ സമാധാനം അവന്റെ മുഖത്തും ഉണ്ടായിരുന്നു.. എയർപോർട്ടിൽ എത്തിയതിനു ശേഷം വീട്ടിൽ വിളിച്ച് തിരികെ പോകുന്ന കാര്യം അമല പറഞ്ഞിരുന്നു. ഇടയിൽ സണ്ണിയും അമലയും ഒരു ചായ കുടിക്കാൻ പോയപ്പോൾ സോളമനും മരിയയും വീണ്ടും ഒറ്റയ്ക്കായി. പലകുറി മരിയെ ചായ കുടിക്കുവാൻ ആയി അമല വിളിച്ചുവെങ്കിലും ഭക്ഷണം കഴിച്ചത് കൊണ്ട് വിശപ്പില്ല എന്നു പറഞ്ഞ് അവൾ ഒഴിഞ്ഞുമാറി. സോളമനും താൻ വരുന്നില്ല എന്ന് പറഞ്ഞിരുന്നു.. മരിയയോടെ ഒറ്റയ്ക്ക് സംസാരിക്കുക എന്നതായിരുന്നു അവന്റെ ലക്ഷ്യം..

ക്ഷീണം ഉള്ളതുകൊണ്ടു തന്നെ അമലയെയും കൂട്ടി ഒരു ചായ കുടിക്കാനായി പോയത് സണ്ണിയാണ് ആ സമയത്ത് ആരും കാണാതെ മരിയയുടെ കൈകൾക്ക് മുകളിൽ കൈകൾ വച്ചുകൊണ്ട് സോളമൻ പതിയ മുഖത്തേക്ക് ഒന്ന് നോക്കി. നിറഞ്ഞു തുളുമ്പിയ ആ കണ്ണുകൾ അവനോട് എന്തൊക്കെയോ പറയുന്നുണ്ടായിരുന്നു
.ഇത്ര സമയം അവൾ അനുഭവിച്ച വേദനകൾ, ഒറ്റപ്പെടലുകൾ, ശകാരവർഷം അതെല്ലാം ആ കണ്ണുനീരിൽ ഉണ്ടായിരുന്നു. ചേർത്തു പിടിച്ച ആ കൈകൾക്ക് മാത്രമേ അവളിൽ സന്തോഷം നിറയ്ക്കാൻ സാധിക്കുവെന്ന് ആ കണ്ണുകൾ പറയാതെ പറയുന്നതു പോലെ അവന് തോന്നി. ആരുമില്ല എന്ന് ഉറപ്പുവരുത്തി അവൾ അവന്റെ തോളിലൂടെ കൈയിട്ട് തന്നോട് ചേർത്തു പിടിച്ചു. ഒരു നിമിഷം അവന്റെ ആ പ്രവർത്തിയിൽ മരിയയും അമ്പരന്നു പോയിരുന്നു. പെട്ടെന്ന് ആരെങ്കിലും ഇത് കണ്ടുകൊണ്ട് വന്നാലോ എന്നാണ് അവൾ പേടിച്ചത്. എന്നാൽ ഒന്നിനെയും പേടിക്കാതെ ഒരു ഭാവഭേദവും ഇല്ലാതെ അവളെ തന്റെ നെഞ്ചോട് ചേർത്തു പിടിച്ച് വിദൂരതയിലേക്ക് നോക്കിയിരിക്കുകയാണ് അവൻ.. ആ നിമിഷം അവൾക്ക് ആവശ്യമായ ഒരു ചേർത്തുപിടിക്കൽ ആണെന്ന് അവന് മനസ്സിലാക്കാൻ സാധിച്ചിരുന്നു. അവളും അത് ഒരുപാട് ആഗ്രഹിച്ചിരുന്നു എന്നത് സത്യമാണ്. ഇടയിൽ എപ്പോഴോ അവളുടെ തല അവന്റെ ചുമലിൽ ഇടം പിടിച്ചിരുന്നു
. പെട്ടെന്ന് തന്നെ സ്ഥലകാല ബോധം വീണ്ടെടുത്ത് അവൾ ആ ചുമലിൽ നിന്നും എഴുന്നേറ്റു.. അവൻ അവളുടെ മുഖത്തേക്ക് ഒന്ന് നോക്കി. രണ്ട് കണ്ണുകളും നന്നായി ഒന്നു ചിമ്മി ചിരിച്ചു.. പിന്നെ അവളുടെ തോളിൽ നിന്നും കൈയെടുത്ത അവളുടെ വലതു കരം മുറുക്കിപ്പിടിച്ച് തന്റെ കൈകളിൽ ചേർത്ത് പിടിച്ചുകൊണ്ട് അവളുടെ മുഖത്തേക്ക് നോക്കി പറഞ്ഞു..

” ഒന്നുകൊണ്ടും വിഷമിക്കേണ്ട ജീവിതത്തിൽ ഇനി എന്നും ഞാൻ ഉണ്ടാവും, അവിടെവച്ച് കേട്ടതിനൊന്നും എനിക്കിപ്പോൾ പ്രതികരിക്കാൻ പറ്റില്ല. പക്ഷേ എല്ലാവരോടും നമ്മൾ ഇതിനു മറുപടി പറയും, വാക്കു കൊണ്ടല്ല നമ്മുടെ ജീവിതം കൊണ്ട്.. ഇന്ന് നിന്നെ അവഹേളിച്ചവരുടെയൊക്കെ മുൻപിൽ നിന്നെ ചേർത്തുപിടിച്ച് ഞാൻ ഒരിക്കൽ പോകും. അന്ന് ഞാൻ അവരോട് പറയും ഇനി നിങ്ങൾക്കൊന്നും തട്ടി കളിക്കാൻ ഞാൻ എന്റെ പെണ്ണിനെ തരില്ല എന്ന്. ഇന്ന് ഞാൻ മിണ്ടാതെ നിൽക്കുന്നത് ഞാൻ അത് പറയാൻ ആരാണെന്ന് അവർ ചോദിക്കും എന്നുള്ള പേടി കൊണ്ട് മാത്രമല്ല ഇത് പറയാൻ ഞാൻ അവിടെ വരുമ്പോൾ നിന്റെ കഴുത്തിൽ ഞാൻ കെട്ടിയ ഒരു താലി കൂടി ഉണ്ടാവണം എന്ന വാശി ഉള്ളോണ്ട, അവകാശത്തോടെ അതിലേറെ അധികാരത്തോടെ എനിക്ക് അവരോട് സംസാരിക്കണം. നിന്റെ മനസ്സിൽ ഇപ്പോൾ തോന്നുന്ന വിഷമങ്ങൾ എന്തൊക്കെയാണെന്ന് എനിക്ക് മനസ്സിലാവും. അതിന് എങ്ങനെ ആശ്വസിപ്പിക്കണം എന്ന് എനിക്കറിയില്ല. പക്ഷേ ഒരു കാര്യം മാത്രം അറിയാം, നിന്നെ കണ്ട നിമിഷം മുതൽ ഈ നിമിഷം വരെ ഞാൻ ആവർത്തിച്ച ആ ഒരു കാര്യം മാത്രം, ഞാൻ നിനക്ക് ഇപ്പോഴും ഉറപ്പു തരാം എന്റെ ജീവിതത്തിൽ നീയല്ലാതെ മറ്റൊരു പെണ്ണ് ഉണ്ടാവില്ല. ഈ ജന്മത്തിൽ മാത്രമല്ല വരും ജന്മങ്ങളിലും.. അതിനപ്പുറം നിനക്കൊരു മറുപടി തരാൻ എന്റെ കയ്യിൽ ഇല്ല.. സമാധാനമായിട്ട് ഇരിക്ക്.. ഞാനുണ്ട് കൂടെ ഈ ലോകം മുഴുവൻ എതിർത്താലും നിന്നെ എന്നും ഇങ്ങനെ ചേർത്തുപിടിക്കും.. അതിന്റെ പേരിൽ എനിക്ക് ഉപേക്ഷിക്കേണ്ടി വരുന്നത് എന്തൊക്കെയാണെന്ന് പറഞ്ഞാലും അത് നേരിടാൻ ഞാൻ ഒരുക്കമാണ്..

മനസ്സ് നിറഞ്ഞ അവന്റെ ആ വാക്കുകൾ ആ പെണ്ണ് ഒരുത്തിയിൽ പകർന്നു നൽകിയ ഊർജ്ജം ചെറുതായിരുന്നില്ല…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…