🎶 സോളമന്റെ ഉത്തമഗീതം 🎶❤️: ഭാഗം 27

രചന: റിൻസി പ്രിൻസ്‌

സമാധാനമായിട്ട് ഇരിക്ക്.. ഞാനുണ്ട് കൂടെ ഈ ലോകം മുഴുവൻ എതിർത്താലും നിന്നെ എന്നും ഇങ്ങനെ ചേർത്തുപിടിക്കും.. അതിന്റെ പേരിൽ എനിക്ക് ഉപേക്ഷിക്കേണ്ടി വരുന്നത് എന്തൊക്കെയാണെന്ന് പറഞ്ഞാലും അത് നേരിടാൻ ഞാൻ ഒരുക്കമാണ്..

മനസ്സ് നിറഞ്ഞ അവന്റെ ആ വാക്കുകൾ ആ പെണ്ണ് ഒരുത്തിയിൽ പകർന്നു നൽകിയ ഊർജ്ജം ചെറുതായിരുന്നില്ല

അകലെ നിന്നും നടന്നു വരുന്ന അമലയെയും സണ്ണിയെയും കണ്ടപ്പോൾ രണ്ടുപേരും ഒരല്പം അകലം ഇട്ടു തന്നെയാണ് ഇരുന്നത്, അതുവരെ മനസ്സിൽ നിറഞ്ഞു നിന്ന എല്ലാ വേദനങ്ങൾക്കും ആശ്വാസം പകരുന്ന ഒരു മരുന്ന് തന്നെയായിരുന്നു അവന്റെ വാക്കുകൾ എന്ന് അവൾക്ക് തോന്നി. തന്റെ ജീവിതത്തിൽ അവൻ വലിയ സ്വാധീനം ഇതിനോടകം നേടിയിട്ടുണ്ട് എന്നും അവൾക്ക് തോന്നി. പക്ഷേ തനിക്ക് ആഗ്രഹിക്കാൻ അർഹതയുണ്ട്. ഇത് സത്യമാകുമോ.? അതുമാത്രമല്ല തന്റെ മനസ്സിൽ നിറഞ്ഞു നിൽക്കുന്ന വേദനിപ്പിക്കുന്ന ഓർമ്മകൾ ഇതെല്ലാം തന്നെ അവനോട് അടുക്കാൻ തന്നെ അനുവദിക്കുന്നില്ല എന്നത് ഒരു സത്യമാണെങ്കിലും അവന്റെ സാന്നിധ്യം നൽകുന്ന സന്തോഷം അത് ചെറുതല്ല എന്ന് അവൾക്ക് ഉറപ്പായിരുന്നു. താൻ പോലും അറിയാതെ താൻ അവനെ പ്രണയിച്ചു പോവുകയായിരുന്നു. ഇവിടേക്ക് വരുമ്പോൾ തന്നെ അമ്മ ഉപദേശിച്ചു തന്ന ഒരു കാര്യം ഒരിക്കൽ പോലും അമ്മയ്ക്ക് ഒരു നാണക്കേട് ഉണ്ടാക്കരുത് എന്നാണ്, അമ്മ ചെയ്തത് പോലെ മറ്റൊരു നാട്ടിൽ പോയി ഒരാളെ പ്രണയിച്ചു എന്ന് പറയാൻ ഇടവരുത്തരുത് എന്ന്… തന്റെ മനസ്സിൽ ആരും ചേക്കേറില്ല എന്ന മാത്രമല്ല ഒരിക്കലും തന്റെ മനസ്സിൽ പ്രണയത്തിന്റെ വിത്ത് മുളക്കില്ല എന്ന ഉറപ്പോടെ തന്നെയാണ് ഇവിടേക്ക് വന്നിരുന്നത്. അത്തരത്തിൽ ചിന്തിക്കുവാൻ കാരണങ്ങൾ ഏറെ ആയിരുന്നു. എന്നിട്ടും താൻ പോലും അറിയാതെ ഒരുവൻ തന്നിൽ ആധിപത്യം നേടിയിരിക്കുന്നു. ആദ്യമൊക്കെ പിറകെ നടന്നപ്പോൾ അവനോട് തോന്നിയ വികാരം ദേഷ്യം മാത്രമായിരുന്നു. തന്റെ നിസ്സഹായ അവസ്ഥ മുതലെടുക്കാൻ ശ്രമിക്കുകയാണ് അവന്‍ എന്നാണ് കരുതിയത്.. പിന്നീട് എപ്പോഴാണ് അതൊരു പ്രണയമായി വളർന്നത്..? ആരും ശ്രദ്ധിക്കാത്ത ഒരു പ്രത്യേകതകളും ഇല്ലാത്ത അനാഥയായ പെണ്ണിനെ അവൻ മനസ്സിൽ പേറുന്നുണ്ട് എന്ന് മനസ്സിലാക്കിയ നിമിഷം മുതൽ തന്റെ ജീവിതത്തിന്റെ ഏറ്റവും വലിയ സംരക്ഷണം ആ കൈകളിലാണെന്ന് താൻ മനസ്സിലാക്കി. ആ നിമിഷം അവൻ ജീവിതത്തിലെ ആരൊക്കെയോ ആയി, വളരെ പെട്ടെന്ന് തന്നെ ഹൃദയം അവനായി സ്ഥാനം ഒരുക്കി കഴിഞ്ഞു എന്ന് പറയുന്നതാണ് സത്യം. ഒരിക്കലും ഇങ്ങനെ ഒരു ഇഷ്ടത്തിലേക്ക് പോകാൻ പാടില്ല എന്ന് പലതവണ മനസ്സിനെ പറഞ്ഞു പഠിപ്പിച്ചതാണ്, പക്ഷേ അവന്റെ സാന്നിധ്യം ആ സംരക്ഷണം അതു തന്നെ താൻ അല്ലാതാക്കി മാറ്റുകയാണ് ചെയ്യുന്നത്.. എത്രയൊക്കെ അകന്നു നിന്നാലും അവന്റെ സംരക്ഷണം ആഗ്രഹിക്കുന്ന ഒരു മനസ്സ് തന്റെ ഉള്ളിലുണ്ട്.. അവന്റെ പ്രണയത്താൽ തരളിതയാവാൻ കൊതിക്കുന്ന ഒരു പെണ്ണ് തന്നെയാണ് ഈ നിമിഷം താൻ. പക്ഷേ അമല ആന്റിയെ കുറിച്ച് ഓർക്കുമ്പോഴാണ് വിഷമം. ജീവിതത്തിൽ ഒരു വലിയ പ്രതിസന്ധിഘട്ടത്തിൽ ഒപ്പം നിന്നെ ആളാണ്, ഒരിക്കലും അവരെ വേദനിപ്പിക്കാൻ പാടില്ല.. അവരുടെ സങ്കല്പത്തിനൊത്ത ഒരു മരുമകൾ അല്ല താനെന്ന് നന്നായി അറിയാമായിരുന്നിട്ടും എന്തിനാണ് വീണ്ടും മനസ്സിൽ അവനെ ഇങ്ങനെ പ്രതിഷ്ഠിക്കുന്നത് എന്ന് അവൾക്ക് തോന്നിയിരുന്നു. അതോ ഈ കാര്യത്തിൽ താൻ സ്വാർത്ഥയായി മാറിയോ.? അവനെ വേണമെന്ന വാശി തന്റെ മനസ്സിൽ ഉടലെടുത്തോ
.? എന്തൊക്കെയോ ചോദ്യങ്ങൾ അവളോട് തന്നെ ചോദിച്ചു അവൾ. വാശി പിടിക്കാനും ആഗ്രഹിക്കാനും ഒന്നു അർഹതയില്ലാത്തവളാണെന്ന് അറിയാവുന്നതിനാൽ ഒരു വാശിയും ഇല്ല. തനിക്കായി ഈശ്വരൻ കരുതിയതാണ് അവനെങ്കിൽ അവനെ തനിക്ക് തന്നെ ലഭിക്കുമെന്ന് വിശ്വസിക്കാം, അതിനുമപ്പുറം ഒരുപാട് ആഗ്രഹങ്ങളും പ്രതീക്ഷകളും വച്ചു പുലർത്തേണ്ട…! പക്ഷേ ആ ഒരു സാന്നിധ്യം അത് തന്നിൽ ഉണ്ടാക്കുന്ന മാറ്റങ്ങൾ വളരെ വലുതാണ്.

“മോൾ എന്താ ആലോചിക്കുന്നത്…?

ഓടിവന്ന് അരികിലിരുന്നു കൊണ്ട് ആദ്യം തന്നെ അമല ചോദിച്ചത് ആ ചോദ്യമായിരുന്നു.

” ഒന്നുമില്ല ആന്റി…

വളരെ സൗമ്യമായി അവൾ മറുപടി പറഞ്ഞു.. എനിക്കറിയാം ഈ യാത്രയിൽ മോളുടെ മനസ്സിനെ വേദനിപ്പിച്ച ഒരുപാട് സംഭവങ്ങൾ നടന്നിട്ടുണ്ടെന്ന്.. എന്റെ അമ്മച്ചിയുടെ ഭാഗത്തു നിന്നാണെങ്കിലും മോളുടെ വീട്ടുകാരുടെ ഭാഗത്തു നിന്നാണെങ്കിലും ഒക്കെ. അതൊന്നും കാര്യമായിട്ട് എടുക്കണ്ട, നിന്നെ ചെന്നൈയിൽ തന്നെ നിർത്തിയിട്ട് വന്നാൽ മതിയായിരുന്നു… ഒറ്റയ്ക്ക് അവിടെ നിർത്തുന്നത് ശരിയല്ലല്ലോ എന്ന് കരുതി നിന്നെയും കൂട്ടി ഞാൻ ഇവിടേക്ക് വന്നത്.. അതിപ്പോ നിന്റെ മനസ്സിനെ കൂടുതൽ നോവിക്കുന്ന കാര്യമായി മാറിയെങ്കിൽ അതിന് കാരണക്കാരി ഞാൻ തന്നെയല്ലേ..!

അല്പം കുറ്റബോധത്തോടെ അമല പറഞ്ഞു..

“മമ്മ വിഷമിക്കേണ്ട, എല്ലാ വിഷമങ്ങളും ഞാൻ തീർത്ത് കൊടുത്തിട്ടുണ്ട്…

ധൈര്യത്തോടെ പറയുന്നവനെ അത്ഭുതത്തോടെ നോക്കിയിരുന്നു മരിയ..! എന്ത് ധൈര്യത്തിന്റെ പുറത്താണ് അവൻ ഇങ്ങനെ സംസാരിച്ചത് എന്നായിരുന്നു ആ നിമിഷം അവൾ ചിന്തിച്ചത്.. അതേ സംശയ ഭാവം തന്നെ ഒരു നിമിഷം അമലയിലും നിറഞ്ഞു,

” നീ മാറ്റി കൊടുക്കുകയോ..? എങ്ങനെ…?

സംശയത്തോടെ അവന്റെ മുഖത്തേക്ക് നോക്കി അമല ചോദിച്ചു…

” എനിക്ക് അത്യാവശ്യം മോട്ടിവേഷൻ ഒക്കെ അറിയാന്നേ, ഒന്നുമല്ലെങ്കിലും ഞാനൊരു ഡോക്ടറല്ലേ.. പുള്ളിക്കാരി ഇപ്പോൾ ഹാപ്പിയാണ് ഇനി അമ്മയായിട്ട് പറഞ്ഞു പറഞ്ഞ് അതിന്റെ മനസ്സിൽ കുത്തിയിളക്കി വിഷമിപ്പിക്കാതെ ഇരുന്നാൽ മതി,

അമ്മയുടെ മുഖത്തേക്ക് നോക്കി അവൻ അത് പറഞ്ഞപ്പോൾ ചിരിയോടെ അവർ മരിയെ നോക്കി…

“ഇവൻ എന്താ മോളോട് പറഞ്ഞത്..?

അമല ചോദിച്ച ആ നിമിഷം അവളൊന്നു ഞെട്ടി, എന്തു മറുപടി പറയും, അവളുടെ മുഖത്തെ ഭാവം കണ്ടപ്പോൾ തന്നെ സംഗതി കൈവിട്ടുപോയി എന്ന് സോളമന് മനസ്സിലായി.. ഇനി ഇടപെടേണ്ടത് തന്റെ ഡ്യൂട്ടിയാണെന്ന് മനസ്സിലാക്കി അവൻ പെട്ടെന്ന് തന്നെ അവരുടെ മുഖത്തേക്ക് നോക്കി പറഞ്ഞു

” അത്രയ്ക്ക് ഒന്നും പറഞ്ഞില്ലെന്നെ കുറച്ച് കാര്യങ്ങൾ, സിമ്പിൾ ആയിട്ടുള്ള കുറച്ചു കാര്യങ്ങൾ. അതായത് പഠിച്ചു ജോലിയൊക്കെ വാങ്ങിയിട്ട് ഇപ്പോൾ ഈ കളിയാക്കിയവരുടെയൊക്കെ മുൻപിൽ പോയി നിന്ന് കൊഞ്ഞനം കുത്തി കാണിക്കണം എന്ന് പറഞ്ഞു..

തമാശയോടെ അവൻ പറഞ്ഞപ്പോൾ ആ നിമിഷം അമലയും ചിരിച്ചു പോയിരുന്നു. പെട്ടെന്ന് തന്നെ മരിയയുടെ മുഖത്തും ഒരു പുഞ്ചിരി തെളിഞ്ഞിരുന്നു.. ശരിക്കും അവളുടെ മൂടികെട്ടിയ മനസ്സിന് ഒരാശ്വാസം നൽകാൻ വേണ്ടിയാണ് അവൻ അങ്ങനെ പറഞ്ഞത്, അവളുടെ പുഞ്ചിരിയിൽ തന്നെ അവന്റെ മനസ്സും ഒന്ന് തണുത്തിരുന്നു. കുറച്ച് സമയത്തിനുള്ളിൽ തന്നെ എല്ലാവരും ഫ്ലൈറ്റിൽ കയറുകയും ചെയ്തു..

ഒരുപാട് താമസമില്ലാതെ ചെന്നൈയിലേക്ക് തിരികെ എത്തുമ്പോൾ എല്ലാവരും നന്നേ ക്ഷീണിതരായിരുന്നു, വീട്ടിലേക്ക് ചെന്നപാടെ മരിയ കുളിച്ച് എന്തൊക്കെ ജോലി ചെയ്യാനായി അടുക്കളയിലേക്ക് വന്നിരുന്നു… അവൾ അങ്ങനെ ചെയ്യുമെന്ന് ഉറപ്പുള്ളതു കൊണ്ടു തന്നെ നേരത്തെ വൈകിട്ടത്തേക്കുള്ള ഭക്ഷണം ആരോടും ആലോചിക്കാതെ സോളമൻ തന്നെ ഓർഡർ ചെയ്തിരുന്നു… അവൾ ജോലി ചെയ്യാൻ തുടങ്ങിയപ്പോൾ തന്നെ ആരുമില്ലാന്ന് ഉറപ്പു വരുത്തി അവൻ അടുക്കളയിലേക്ക് വന്ന് അവളുടെ മുഖത്തേക്ക് നോക്കി പറഞ്ഞു..

” ഇനി ഇവിടെ കിടന്ന് കഷ്ടപ്പെടേണ്ട, വൈകിട്ട് എല്ലാവർക്കും വേണ്ടിയുള്ള ആഹാരം ഞാൻ ഓർഡർ ചെയ്തിട്ടുണ്ട്.. എന്റെ കൊച്ച് സമാധാനത്തോടെ പോയിരുന്നു വല്ലതും പഠിക്കാൻ നോക്ക്…. കുറെ ദിവസം ക്ലാസ്സിൽ ആയിരുന്നല്ലോ അതുകൊണ്ട് പഠിച്ചതൊക്കെ മറന്നിട്ടുണ്ടാവും, ഈ മെഡിക്കൽ ഫീൽഡ് എന്ന് പറഞ്ഞാൽ പഠിച്ച കാര്യങ്ങൾ ഒന്നും അത്ര പെട്ടെന്ന് മനസ്സിൽ നിൽക്കില്ല… അതുകൊണ്ട് വേഗം ഇരുന്ന് എന്തെങ്കിലും പഠിക്കാൻ നോക്ക്, ഇല്ലെങ്കിൽ നാളെ ക്ലാസ്സിൽ വരുമ്പോൾ എന്റെ ഈ മുഖമല്ലാതെ വേറൊരു മുഖം കൂടി കാണും…

അവളുടെ മുഖത്തേക്ക് നോക്കി അല്പം ഗൗരവത്തോടെ അവൻ പറഞ്ഞു… അവന്റെ സംസാരം അവളിലും ഒരു ചിരി പടർത്തിയിരുന്നു…

“ഓഹോ അപ്പൊ വേറൊരു മുഖമുണ്ടല്ലേ…?

അല്പം തമാശയോടെ അവൾ ചോദിച്ചു,

ഇത് ആദ്യമായാണ് തന്നോട് എന്തെങ്കിലും അതേ രീതിയിൽ അവൾ ചോദിക്കുന്നത്.. അവൾ ഏറെ സന്തോഷവതിയാണെന്ന് അവന് തോന്നിയിരുന്നു, വലിയ സന്തോഷത്തോടെ അവളുടെ മുഖത്തേക്ക് നോക്കി അല്പം കുസൃതിയോടെ മീശ ഒന്ന് പിരിച്ച് അവൾക്ക് അരികിലേക്ക് കുറച്ച് നീങ്ങി നിന്നുകൊണ്ട് അവൻ മറുപടി പറഞ്ഞു,

“അങ്ങനെ കാണാൻ ഒരുപാട് മുഖങ്ങളുണ്ട്,, സമയം പോലെ ഓരോ മുഖങ്ങളും ഞാൻ കാണിച്ചു തരാം…

അതും പറഞ്ഞ് ആരും വരുന്നില്ല എന്ന് ഉറപ്പുവരുത്തി അവൻ അവളുടെ ഇടുപ്പിൽ പിടിച്ച് തന്നോട് ചേർത്തുനിർത്തി… ഒരു നിമിഷം അവൾ ഒന്ന് അമ്പരന്നു പോയി… പിന്നെ അവളുടെ മുഖത്തിന് നേരെ മുഖമടിപ്പിച്ചു, അവന്റെ നിശ്വാസം അവളുടെ മുഖത്ത് പതിച്ചു.

” ഇത് പ്രണയത്തിന്റെ മുഖം…!

ഏറെ പ്രണയാർദ്രമായി അവളുടെ മുഖത്തേക്ക് നോക്കി അവൻ പറഞ്ഞു…

“സോളമാ…

പെട്ടെന്നുള്ള അമലയുടെ വിളി കേട്ടപ്പോഴേക്കും രണ്ടുപേരും ഞെട്ടിപ്പോയി…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…