🎶 സോളമന്റെ ഉത്തമഗീതം 🎶❤️: ഭാഗം 29

രചന: റിൻസി പ്രിൻസ്‌

അയ്യോ അത്…..

“ഒരു അയ്യയോയും പറയണ്ട

എന്തോ പറയാൻ വന്നവളുടെ ചുണ്ടിൽ ചൂണ്ടുവിരൽ വച്ച് അവൻ പറഞ്ഞു, ഒരു നിമിഷം മിഴികൾ തമ്മിൽ കോർത്ത് പോയിരുന്നു.. അവളുടെ മിഴികളിൽ ആദ്യമായി പ്രണയം നിറഞ്ഞു നിൽക്കുന്നത് അവൻ കണ്ടു.. ആ വിരലുകൾ അവളുടെ ചുണ്ടിനേ മൃദുവായി തഴുകി തലോടി

പെട്ടെന്ന് ആ മുഖത്ത് ഒരു പരിഭ്രമം ഉടലെടുക്കുന്നതും അതോടൊപ്പം ചെറിയൊരു നാണം ആ മുഖത്ത് നിറഞ്ഞുനിൽക്കുന്നതും അവൻ കണ്ടിരുന്നു… ചെറു ചിരിയോടെ അവൻ അവളിൽ നിന്നും അകന്നുമാറി. പക്ഷേ അവൻ അകന്നത് പോലും അറിയാതെ അവന്റെ അരികിൽ തന്നെ കണ്ണുകൾ അടച്ചു നിൽക്കുകയായിരുന്നു അവൾ, അവളിൽ നിന്നും അകന്നു അവൻ കൈകൾ കെട്ടി ആ കാഴ്ച ചിരിയോടെ നോക്കി കണ്ടു. പെട്ടെന്ന് കണ്ണുതുറന്ന് അവൾ ചമ്മലോടെ മുഖം മാറ്റി കളഞ്ഞു അവന്റെ നിൽപ്പ് കണ്ട്.

” എന്റെ മറിയാമ്മ കൊച്ചിന് വേറെന്തൊക്കെ തോന്നിത്തുടങ്ങി എന്ന് തോന്നുന്നു…

ഒരു കുസൃതിയോടെ അവളുടെ മുഖത്തേക്ക് നോക്കി അവൻ പറഞ്ഞു… മുഖത്ത് വന്ന പരിഭ്രമവും നാണവും ഒക്കെ മറയ്‌ക്കാൻ അവൾ വല്ലാതെ പാടുപെടുന്നുണ്ട് എന്ന് അവനു തോന്നിയിരുന്നു..

“എന്ത് തോന്നുന്നു എന്ന്..?

അവനിൽ നിന്നും അകന്നു മാറി അവൾ ചോദിച്ചു…

” അതിപ്പോ ഞാനെങ്ങനെയാ പറഞ്ഞു തരുന്നത്…? കുറച്ചുകൂടി കഴിഞ്ഞാരുന്നേൽ കാണിച്ചു തരാരുന്നു… നമ്മുടെ കല്യാണം ഒക്കെ കഴിഞ്ഞ് ഞാനത് നിനക്ക് എന്താണെന്നു വ്യക്തമാക്കി തരാം, പറഞ്ഞതിന്റെ ഭംഗി കളയണ്ടല്ലോ…

ഒരു ചിരിയോടെ മീശ പിരിച്ച് അവനത് പറഞ്ഞപ്പോൾ അവളുടെ മുഖത്ത് നാണമലതല്ലുന്നുണ്ടായിരുന്നു,

” ഇങ്ങനെയുള്ള വഷളത്തരങ്ങൾ ഒന്നും പറയുന്നത് എനിക്കിഷ്ടമല്ല കേട്ടോ,

അവൾ പരിഭവിച്ചു…

” ശരി ഇനി അങ്ങനെ ഒന്നും പറയുന്നില്ല, ചെയ്താലോ…?

കുസൃതിയോടെ അവൻ ചോദിച്ചപ്പോൾ അവൾ ഒന്നു മുഖം കൂർപ്പിച്ചു

” അതൊക്കെ അവിടെ നിൽക്കട്ടെ ഞാൻ പറഞ്ഞത് പോലെ നാളെ വൈകുന്നേരം ഹോസ്പിറ്റലിന്റെ പുറകിലെ ഗേറ്റ്….

അത്രയും പറഞ്ഞു അവൻ തിരിഞ്ഞു പോയപ്പോൾ കുറച്ചു മുൻപ് അവൻ പകർന്നു നൽകിയ അനുഭൂതിയുടെ തേരിൽ തന്നെയായിരുന്നു അവളും, മനസ്സിലേക്ക് ഒരേസമയം പരിഭ്രമവും സന്തോഷവും ഒക്കെ കടന്നു വരുന്നുണ്ട്.. പക്ഷേ….? ആ രണ്ട് അക്ഷരം അവൾക്കു മീതെ ഒരു വലിയ ചോദ്യചിഹ്നമായി നിന്നു.. തന്നിൽ എന്തൊക്കെയോ പ്രത്യേകതകളും വികാരങ്ങളും ഉണരുന്നത് അവൾ അറിയുന്നുണ്ടായിരുന്നു.. ഹൃദയവാതിൽക്കൽ അവൻ നിൽക്കുകയാണ്, പഴയ ഓർമ്മകളെ മായ്‌ച്ച് പുതിയൊരു നാളെയെ വരവേൽക്കാൻ തന്റെ മനസ്സും ആഗ്രഹിക്കുന്നു. എല്ലാത്തിനുമുപരി അവന്റെ സ്നേഹം കരുതൽ അതൊക്കെ ഒരുപാട് തന്നെ അവനോട് അടുപ്പിച്ച് നിർത്തുന്നുണ്ട്. അവനോട് അടുക്കുവാൻ തന്നെ പ്രേരിപ്പിക്കുന്ന ഘടകങ്ങളും അതാണ്, ആ സംരക്ഷണം അത് നഷ്ടപ്പെട്ടു പോകാൻ താൻ ആഗ്രഹിക്കുന്നില്ല.. അതെന്നും നിലനിൽക്കണം,അതൊരുപക്ഷേ തന്റെ സ്വാർത്ഥ മനസ്സിന്റേതായിരിക്കാം, പക്ഷേ ആ സംരക്ഷണം എന്നും നിലനിൽക്കണമെന്ന് താൻ ആഗ്രഹിക്കുന്നുണ്ട്… അവനിലേക്ക് തന്നെ അടുപ്പിക്കുന്ന ഏക ഘടകവും അവൻ തനിക്ക് നൽകുന്ന ആ സംരക്ഷണ കവചം തന്നെയാണ്. മനസ്സിൽ നിറഞ്ഞുനിൽക്കുന്ന പല ഓർമ്മകളും അവനിൽ നിന്നും അകലം വയ്ക്കാൻ നിർബന്ധിക്കുമ്പോഴും അവനോട് ചേരാൻ തന്നെ നിർബന്ധിക്കുന്നത് അവൻ തനിക്ക് നൽകുന്ന കരുതലൊന്നു മാത്രമാണ്.. ജീവിതത്തിൽ ഇതുവരെ ആരും തന്നെ ഇത്രത്തോളം കരുതിയിട്ടില്ലാത്തതിനാൽ അവൻ നൽകുന്ന കരുതൽ അമൂല്യമാണ് തനിക്ക്.. അത് തനിക്ക് വലിയൊരു ആശ്വാസം മാത്രമല്ല സമാധാനവും സന്തോഷവും കൂടിയാണ്..പ്രണയം ഒരു തിരിച്ചറിവാണ്. സ്വയം അറിയുവാനുള്ള ഒരു മനോഹരമായ തിരിച്ചറിവ്. തന്റെ ഹൃദയത്തിന്റെ ആഴവും പരപ്പും അളക്കുവാനുള്ള ഒരു അവസരം കൂടിയാണ് പ്രണയം. തനിക്ക് സ്നേഹിക്കുവാനും തന്നെ സ്‌നേഹിക്കുവാനും ഒരു ഹൃദയമുണ്ട് എന്ന സ്വര്‍ഗ്ഗതുല്ല്യമായ ഒരു തിരിച്ചറിവ്. വരണ്ടിരുന്ന തന്റെ ഹൃദയത്തിലേക്ക് പ്രണയത്തിന്റെ മാരിയായി അവൻ പെയ്യുക ആയിരുന്നു.

അന്ന് വൈകുന്നേരം ഭക്ഷണം വന്നപ്പോൾ എല്ലാവരും ഒരുമിച്ചിരുന്നാണ് കഴിച്ചത്. രാത്രിയിൽ മുഴുവൻ മരിയയുടെ ഒപ്പം അമല ഉണ്ടായിരുന്നതിനാൽ മരിയോടെ ഒന്നു സംസാരിക്കാൻ പോലും സാധിച്ചിരുന്നില്ല സോളമന്… എങ്കിലും കണ്ണുകൾ കൊണ്ട് അവൻ അവളോട് ഒരു ശുഭരാത്രി നേർന്നിരുന്നു. ഇതിനോടകം തന്നെ മിഴികൾ പരസ്പരം സംഭാഷണം കൈമാറുന്നതിൽ വലിയ കഴിവ് കണ്ടെത്തിയിരുന്നു… മിഴികൾ തമ്മിൽ കോർക്കുമ്പോൾ ആ നോട്ടത്തിൽ പോലും പ്രണയം രണ്ടുപേരും പരസ്പരം അറിഞ്ഞിരുന്നു. സംഭാഷണങ്ങൾ പലപ്പോഴും നയനങ്ങൾ തമ്മിലായിരുന്നല്ലോ. അവന്റെ മുഖഭാവത്തിൽ അറിയുന്ന ഓരോ ഭാവങ്ങളും മനസ്സിലാക്കി എടുക്കാൻ അവൾക്ക് സാധിക്കുന്നുണ്ടായിരുന്നു. അത്രത്തോളം മനസ്സുകൾ ഒരുമിച്ചിട്ടുണ്ട്. തന്റെ അരികിൽ ഒരിക്കൽ കൂടി വരണമെന്നും തന്നോട് സംസാരിക്കണമെന്നും അവൻ ആഗ്രഹിക്കുന്നുണ്ടെന്ന് അവൾക്ക് വ്യക്തമായി അറിയാമായിരുന്നു. പക്ഷേ സാഹചര്യമതല്ല. അതുകൊണ്ടാണ് അവൻ തന്നിൽ നിന്നും അകലം സൂക്ഷിക്കുന്നത്. അവനെ ഒരിക്കൽ കൂടി കണ്ടിരുന്നെങ്കിൽ എന്ന് അവളും ആഗ്രഹിച്ചിരുന്നു. പക്ഷേ നിർബന്ധം പിടിക്കാൻ സാധിക്കില്ലല്ലോ, തന്റെ മനസ്സ് ഇപ്പോൾ അവനുവേണ്ടി വാശിപിടിക്കുന്നു എന്ന് അവൾക്ക് തോന്നി. ഒരു കാര്യങ്ങളിലും വാശി ഇല്ലാതിരുന്നവളാണ്, പക്ഷേ അവന്റെ കാര്യങ്ങളിൽ താൻ എവിടെയൊക്കെ സ്വാർത്ഥ മതിയായി പോകുന്നതുപോലെ.. അവൻ തന്നോട് ഒപ്പം എപ്പോഴും ഉണ്ടായിരുന്നുവെങ്കിൽ എന്ന് ആഗ്രഹിക്കുന്നു.. അവനോട് സംസാരിക്കാൻ ലഭിക്കുന്ന സമയങ്ങളെ സ്വർഗ്ഗം പോലെ കാണുന്നു. ഇരുണ്ട് മൂടിക്കട്ടിയ കാര്‍മേഘത്തിന്റെ നെഞ്ചിലേയ്ക്ക് വെളിച്ചത്തിന്റെ മിന്നലായ് പതിച്ചത് ആണ് അവന്റെ പ്രണയം. താനാകുന്ന കാര്‍മേഘത്തിലേയ്ക്ക് ഉദിച്ചു വന്ന പ്രകാശം. പോയ കാലത്തിന്റെ ചുവരുകളില്‍ ഞാന്‍ കോറിയിട്ട വരികള്‍ക്കെല്ലാം അവന്റെ മുഖമായിരുന്നു! പക്ഷെ എന്തെന്നറിയില്ല, ഞാന്‍ വിങ്ങുകയാണ്… മനസ്സിന്റെ ഭാരത്താല്‍, ഹൃദയത്തിന്റെ വേദനയാല്‍, എല്ലാത്തിലും ഉപരി അവനോടുള്ള മോഹത്താല്‍!

അവൻ പറഞ്ഞ കാര്യങ്ങൾ പെട്ടെന്നാണ് അവൾ ഓർത്തത്. പഠിക്കണം, നാളെ മുതൽ ക്ലാസ്സ് തുടങ്ങുകയാണ്.. ഇതിനോടകം പഠിച്ച കാര്യങ്ങൾ ഒക്കെ മറന്നു പോയി. അതിനുള്ള കാരണങ്ങൾ നിരവധി ആയിരുന്നല്ലോ. അതിൽ ഒരു കാരണം സോളമൻ കൂടിയാണ്.. കുറച്ചുനാളുകളായി പഠിക്കാനായി ബുക്ക് തുറക്കുമ്പോൾ കാണുന്നത് മുഴുവൻ ആ ഒരാളുടെ മുഖമാണ്. ക്ലാസ് എടുക്കുന്ന സമയത്തും ആളെ തന്നെ നോക്കിയിരിക്കാൻ തോന്നും.. പക്ഷേ താൻ സ്വയം നിയന്ത്രിച്ചിരിക്കുകയാണ്. പുസ്തകം എടുത്ത് പഠിച്ച കാര്യങ്ങൾ ഒക്കെ ഒന്നുകൂടി വായിച്ചുനോക്കി. എല്ലാം ഒരു വിധം മനസ്സിൽ സ്ഥാനം പിടിച്ചു എന്ന് മനസ്സിലാക്കിയതിനു ശേഷമാണ് കിടന്നുറങ്ങിയത്. നിദ്രയിലും തെളിഞ്ഞു വന്നത് ആ മുഖം തന്നെയായിരുന്നു..! വളരെ ചെറിയ സമയം കൊണ്ട് തന്നിൽ വലിയ സ്വാധീനം ചെലുത്താൻ സാധിച്ച ആ മുഖം.

💜

” ഇച്ചായൻ ഇത് എന്നാത്തിന്റെ കേടായിരുന്നു..? അവളെ അവിടെ വിട്ട് പഠിപ്പിക്കാൻ, ഇനിയിപ്പോൾ വല്ല നഴ്സിംഗ് കഴിഞ്ഞു വന്ന് ഗൾഫിലോട്ടോ മറ്റോ പോയിക്കഴിഞ്ഞാൽ പിന്നെ പറയുകയും വേണ്ട, നമ്മുടെ കയ്യിൽ നിൽക്കില്ല.

സഹോദരനോട് പരിഭവം പറയുകയായിരുന്നു ആ സമയത്ത് ജെസ്സി..

” ബെറ്റിയ്ക്ക് ഒരേ നിർബന്ധം, അവളെന്തെങ്കിലും പഠിക്കാൻ വിടണം എന്ന്.. ഇപ്പോഴും സ്വത്തുക്കൾ ഒക്കെ ഞങ്ങളുടെ രണ്ടുപേരുടെയും പേരിലാ, അല്ലാതെ എന്റെ മാത്രം പേരിലല്ല. ഞാൻ എന്തെങ്കിലും പറഞ്ഞാൽ ആ ദേഷ്യത്തിന് എല്ലാംകൂടി സ്വന്തം മോളുടെ പേരിലേക്ക് അവൾ എഴുതിക്കൊടുത്താൽ എന്ത് ചെയ്യും. ഈ രണ്ടാം കൂട്ടുകാരിയെ ഞാൻ കല്യാണം കഴിച്ചത് വെറുതെയായി പോവില്ലേ…? അതുകൊണ്ടാ ഞാൻ പിന്നെ ഒന്നും മിണ്ടാതിരുന്നത്. മാത്രമല്ല ആ ശല്യം അങ്ങനെ ഒഴിയുമല്ലോ എന്ന് കരുതി…

” നിങ്ങൾ ഇത്രയ്ക്ക് പൊട്ടനാണോ ഇച്ചായ? അവൾ അവിടെ പോയി ജോലിയൊക്കെ നേടിയിട്ട് വന്ന് അമ്മയുടെ സ്വത്ത് വേണം എന്ന് പറഞ്ഞാൽ എന്ത് ചെയ്യും…? ഇവിടെ അടുക്കളപ്പുറത്ത് കിടക്കുന്ന പോലെ ആണോ..? അതല്ല ഇനിയിപ്പോ ഇച്ചായന് അവളെ നോക്കാൻ വയ്യെന്നു ഉണ്ടായിരുന്നെങ്കിൽ ഏതെങ്കിലും ഒരു രണ്ടാട്ടുകാരനോ ഒരു രൂപ പോലും സ്ത്രീധനം വേണ്ടെന്ന് പറയുന്ന ഏതെങ്കിലും ഒരു പൊട്ടന്റെയോ കയ്യിലേക്ക് പിടിച്ചു കൊടുക്കണം ആയിരുന്നു. അതിന് പകരം പൈസ മുടക്കി പഠിക്കാൻ വിട്ടിരിക്കുന്നു. അതും ചെന്നൈയില്, തള്ളയെപ്പോലെ ആരുടെയെങ്കിലും തലവട്ടം കണ്ടാൽ ചാടി പോകില്ലന്ന് ആര് കണ്ടു…?

” ആ ഒരു ഉദ്ദേശം കൂടി വച്ചുകൊണ്ട് ആണ് ഞാൻ പഠിക്കാൻ വിട്ടത്, തള്ളയുടെ സ്വഭാവം ആണെങ്കിൽ എന്താണെങ്കിലും ആരുടെയെങ്കിലും പുറകെ പോകും.. പിന്നെ അവളൊന്നു പോയി കിട്ടിയാൽ അത് പറഞ്ഞു എനിക്ക് ഇവിടുന്ന് അവളെ ഉപേക്ഷിക്കാല്ലോ, തള്ളയോടും പറയാലോ, കുടുംബത്തിന് നാണക്കേട് ഉണ്ടാക്കിയതുകൊണ്ട് ഒരു രൂപ പോലും അവൾക്ക് കൊടുക്കില്ലെന്ന്… നിനക്കറിയാലോ ഈ സ്വത്ത് ഭാഗം വയ്ക്കുമ്പോൾ എന്താണെങ്കിലും ഒരു പങ്ക് അവൾക്ക് കൊടുക്കണം. ഇതൊക്കെ അവളുടെ വല്ല്യപ്പൻ ഉണ്ടാക്കിയ മുതലാ. അപ്പോൾ മൂത്ത കൊച്ചുമകൾക്ക് അതിൽ ഒരു സ്ഥാനം ഉണ്ടാവും. ഇല്ലെങ്കിൽ ആരെങ്കിലും അതും പറഞ്ഞു കൊണ്ടുവരും. ഒന്നുമല്ലെങ്കിലും ഇവൾടെ ആങ്ങള തന്നെ അവളെ ഏറ്റെടുക്കാമെന്ന് പറഞ്ഞു വന്ന കാര്യങ്ങൾ എല്ലാം കുഴഞ്ഞു പോകും, ഏകദേശം നല്ലൊരു എമൗണ്ട് തന്നെ അവൾക്ക് കൊടുക്കേണ്ടി വരും. ഇത് ആണെങ്കിൽ നമുക്ക് ഒരു രൂപ പോലും ചെലവാക്കേണ്ട കാര്യമില്ലല്ലോ. അത് പറഞ്ഞാൽ ഇവളും എന്റെ പുറകെ വരില്ല. അതും കൂടി ഉദ്ദേശിച്ചാണ് ഞാൻ അങ്ങോട്ട് പറഞ്ഞുവിട്ടത്…

ജോൺ പറഞ്ഞു

” അതൊരു അബദ്ധമായി ആണ് എനിക്ക് തോന്നുന്നത്. അങ്ങനെയൊന്നും സംഭവിക്കാൻ പോകുന്നില്ല..

” നീ പേടിക്കാതിരിക്കു ഏതായാലും ഒന്ന് മുന്നിൽ കാണാതെ ഞാൻ ഒന്നും ചെയ്യില്ല.. ഒരു കൊച്ചുള്ള ഒരുത്തിയെ കല്യാണം കഴിച്ചപ്പോൾ തന്നെ നമ്മുടെ മനസ്സിലും ചില കണക്കുകൂട്ടലുകൾ ഒക്കെ ഉണ്ടായിരുന്നല്ലോ.. അത് ബുദ്ധിപൂർവ്വം മനസ്സിലാക്കി അവളുടെ തന്ത എല്ലാം ഞങ്ങളുടെ രണ്ടുപേരുടെയും കൂടെ പേരില് എഴുതി വെച്ചിരിക്കുന്നത്..

” അവളുടെ ആ കൂട്ടുകാരിയുടെ ആ മോനില്ലേ..? ആ ചെറുക്കൻ നല്ല മിടുക്കനാ അല്ലെ..?

ജെസ്സി തഞ്ചത്തിൽ തന്റെ വിഷയം ജേഷ്ഠനോട് അവതരിപ്പിക്കാനായി ചോദിച്ചു..

” കുഴപ്പമില്ല..! കുറച്ച് ജാഡ പാർട്ടി ആണെന്ന് തോന്നുന്നു

” ഒരു ഡോക്ടറല്ലേ അതിന്റെ ജാഡയൊക്കെ അവന് കാണും, അതൊന്നും സാരമില്ലെന്നേ, നമ്മുടെ ജീന മോൾക്ക് വേണ്ടി ആ ചെറുക്കനെ ഒന്ന് ആലോചിച്ചാലോ..?

അവൾ ചോദിച്ചു …….കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…