🎶 സോളമന്റെ ഉത്തമഗീതം 🎶❤️: ഭാഗം 41

രചന: റിൻസി പ്രിൻസ്‌

അവൾ വിളിച്ചപ്പോഴാണ് സ്ഥലകാല ബോധം വീണ്ടെടുത്ത് അവൻ അവളെ നോക്കിയത്.. തന്നെ അഭിമുഖീകരിക്കാൻ ഉള്ള മടിയായി നിൽക്കുകയാണ് അവൾ.

പുറത്ത് വീണ്ടും കോളിംഗ് ബെൽ അടിക്കുന്നുണ്ട്.. അത് കേട്ടതും അവൻ ചിരിയോടെ അവളുടെ മുഖത്തേക്ക് ഒന്ന് നോക്കി തലയാട്ടി കണ്ണിറുക്കി കാണിച്ച് പുറത്തേക്ക് നടന്നിരുന്നു.. അവൾ അപ്പോഴേക്കും നാണത്തിൽ കുതിർന്ന് അങ്ങനെ നിന്നു

കതക് തുറന്നതും മുന്നിൽ സണ്ണിയാണ്…

“ആഹാ പപ്പയായിരുന്നോ..?
പപ്പ രണ്ടുമൂന്നുദിവസം വരില്ല എന്നു മമ്മ പറഞ്ഞു

” അങ്ങനെയാ തീരുമാനിച്ചത് പക്ഷേ അതൊന്ന് പോസ്പോണ്ട് ചെയ്യേണ്ടി വന്നു, നിന്റെ അമ്മ എവിടെ?

അതും ചോദിച്ച് ബാഗ് സെറ്റിയിലേക്ക് വെച്ചതിനു ശേഷം ഇരുന്നിരുന്നു സണ്ണി…

‘ മമ്മ ഇവിടെയില്ല അസോസിയേഷന്റെ എന്തോ മീറ്റിങ്ങിനു പോയിരിക്കുക ആണ്… പിന്നെ മമ്മ പറയുന്നു വല്യമ്മച്ചിക്ക് നമ്മുടെ കൂടെ ഇവിടെ വന്ന് നിൽക്കണം എന്ന് ആഗ്രഹമുണ്ടെന്ന്,

“ഇവിടൊ..?

സണ്ണി മനസ്സിലാവാതെ അവന്റെ മുഖത്തേക്ക് നോക്കി

” ഹോസ്പിറ്റലിൽ നിന്നും അങ്കിൾ വിളിച്ചിരുന്നു, ആദ്യം പറഞ്ഞത് വല്യമ്മച്ചിക്ക് എന്തോ സീരിയസ് ആണെന്ന്… പിന്നെ പറഞ്ഞു ഒരുപാട് ഇമ്പ്രൂവ്മെന്റ് ഉണ്ട്, ഇങ്ങോട്ട് വന്ന് നിൽക്കണം എന്ന് ആഗ്രഹമുണ്ടെന്ന്…

” എങ്കിൽ പിന്നെ ഞാനും നിന്റെ അമ്മയും കൂടി ഉടനെ ഡിവോഴ്സ് ആകും..

“അതെന്താ

സോളമൻ അത്ഭുതപൂർവ്വം ചോദിച്ചു

” നിന്റെ വല്ല്യമ്മച്ചിയ്ക്ക് എന്നെ കാണുന്നത് ഇഷ്ടമല്ലല്ലോ, എന്നെ കാണുമ്പോൾ തുടങ്ങും കുറ്റം പറച്ചിൽ… സാധാരണ ചെറുക്കന്റെ വീട്ടിലെ അമ്മമാർ ആണ് പോരെടുക്കുന്നത്, ഇത് ആദ്യമായിട്ടാ പെണ്ണിന്റെ വീട്ടിലെ അമ്മ പോരെടുക്കുന്നത് കാണുന്നത്…

സോളമൻ ഒന്ന് ചിരിച്ചു

” പപ്പയ്ക്ക് കോഫി വേണോ..?
മരിയ അകത്തുണ്ട് ഞാൻ കോഫി എടുത്തുകൊണ്ട് വരാൻ പറയാം…

അതും പറഞ്ഞുകൊണ്ട് ചിരിയോടെ അവൻ അകത്തേക്ക് കയറിയപ്പോൾ അയാൾ അവനെ തന്നെ സൂക്ഷിച്ചു നോക്കിയിരുന്നു… കുറച്ചു സമയങ്ങൾക്ക് ശേഷം കോഫിയുമായി അവൻ തന്നെയാണ് തിരികെ വന്നത്, ചിരിയോടെ അവന്റെ കയ്യിൽ നിന്നും ആ കാപ്പി അയാൾ വാങ്ങിയിരുന്നു,

“സോളമാ….

ഗൗരവത്തോടെ അയാൾ അവനെ വിളിച്ചു,

“എന്താ പപ്പാ..?

” നീ ഒരുപാട് ഇമ്പ്രൂവ് ആയിട്ടുണ്ട്,

അവൻ മനസ്സിലാവാതെ അയാളെ നോക്കി…

” കുറച്ച് ഉത്തരവാദിത്വബോധം വന്നു എന്ന് എനിക്ക് തോന്നുന്നു,

” നേരത്തെ ആകപ്പാടെ ഒരു കുട്ടിക്കളി ആയിരുന്നു.

” ഇപ്പഴാ ഒരു ഡോക്ടറുടെ പക്വതയൊക്കെ വന്നത്, മാത്രമല്ല നിന്നെപ്പറ്റി അടുത്തകാലത്തായിട്ട് ഞാൻ അശുഭ വാർത്തകൾ ഒന്നും അറിയുന്നില്ല…

അവനൊന്ന് ചിരിക്കുക മാത്രം ചെയ്തു, ശേഷം മുകളിലേക്ക് കയറി പോയി…

കുറച്ചു കഴിഞ്ഞപ്പോൾ അകത്തു നിന്നും ബിസ്ക്കറ്റുമായി മരിയ വന്നിരുന്നു.. അവളുടെ മുഖത്ത് ഒരു പ്രത്യേക തിളക്കം ഉണ്ടെന്ന് അയാൾക്ക് തോന്നിയിരുന്നു,

അവൾ ചിരിയോടെ അയാൾക്ക് ബിസ്ക്കറ്റ് നീട്ടിയപ്പോൾ അവളുടെ വിശേഷങ്ങളൊക്കെ അദ്ദേഹം ചോദിക്കുകയും ചെയ്തു… വീണ്ടും കുറെ നേരം കഴിഞ്ഞാണ് അമല വന്നത്, അമല വന്നപ്പോഴും സെറ്റിയിൽ എന്തോ ആലോചിച്ചുകൊണ്ട് ഇരിക്കുകയാണ് സണ്ണി…

അയാളെ കണ്ട അമ്പരപ്പോടെ അവർ അയാൾക്ക് അരികിലേക്ക് ഇരുന്നു…

“ഇച്ചായൻ വരില്ലെന്ന് പറഞ്ഞിട്ട്..?

അത്ഭുതത്തോടെ അവർ ചോദിച്ചു,

” മീറ്റിങ്ങിന് ചെറിയൊരു ചേഞ്ച് വന്നു അതുകൊണ്ട് ഞാൻ ഇങ്ങ് പോന്നത്…

” അസോസിയേഷൻ മീറ്റിംഗ് ആണെന്നും പറഞ്ഞ് കേണൽ വിളിച്ചു, പിന്നെ പോകാതിരിക്കാൻ പറ്റുമോ…?

‘ നീ പോയപ്പോൾ മരിയ കൂടി കൊണ്ടുവാഞ്ഞതെന്താ..?

അല്പം സംശയത്തോടെയാണ് അയാൾ അവളുടെ മുഖത്തേക്ക് നോക്കി ചോദിച്ചത്… കാരണം അറിയാതെ അമ്പരപ്പോടെ അമല അയാളെ നോക്കി, താൻ പോയ സമയത്ത് സോളമൻ വല്ല പ്രശ്നവും ഉണ്ടാക്കിയൊന്ന് അവർ സംശയിച്ചു. ഒരു തല്ലുകൊള്ളിത്തരവും അവളോട് കാണിക്കില്ല എന്നുള്ള വിശ്വാസത്തിന്റെ പുറത്താണ് താൻ അവളെ ഒറ്റയ്ക്ക് ആക്കി പോയത്… മാത്രമല്ല താൻ പോകുമ്പോൾ അവൻ ഉറക്കവും ആയിരുന്നു, സാധാരണ ഇങ്ങനെ വന്നു കിടന്നാൽ അവൻ പിന്നീട് വൈകുന്നേരത്തേക്ക് ഉണരാറുള്ളൂ…

“എന്താ ഇച്ചായ എന്തെങ്കിലും കുഴപ്പമുണ്ടോ…? അവനാ കുട്ടിയോട് എന്തെങ്കിലും മോശമായിട്ട് ഇടപെട്ടോ..? ഇച്ചായൻ വന്നപ്പോൾ എന്തെങ്കിലും പ്രശ്നമുണ്ടായിരുന്നോ.?

പേടിയോടെ അമലയുടെ മുഖം മാറുന്നത് സണ്ണി കണ്ടു…

” ഞാനൊന്നും കണ്ടില്ല ചോദിച്ചെന്നേയുള്ളു,

ഗൗരവത്തോടെ അത്രയും പറഞ്ഞ അയാൾ ബെഡ്റൂമിലേക്ക് നടന്നപ്പോൾ അവരും അയാളെ അനുഗമിച്ചിരുന്നു

” ഞാനങ്ങ് പേടിച്ചുപോയി. അവൻ എന്തെങ്കിലും മോശമായിട്ട് ആ കുട്ടിയോട് പെരുമാറിന്ന് ഓർത്തു…

“അമലേ നമ്മുടെ മോൻ വലിയൊരു പുരുഷനായി, ആ കുട്ടിയും അത്ര ചെറിയ കുട്ടി ഒന്നുമല്ല, കൗമാരം കഴിഞ്ഞ് യൗവനത്തിലേക്ക് കടക്കാൻ വേണ്ടി നിൽക്കുന്ന ഒരു പ്രായമാണ്.. അവളുടെ വീട്ടിൽ നിന്നും പുറത്തേക്കു അധികം പോയിട്ടില്ലാത്ത ഒരു കുട്ടി. ഇത്രയും വലിയൊരു സിറ്റിയിൽ വന്നു നിൽക്കുമ്പോൾ അതും നമ്മളെ വിശ്വസിച്ച് അവളെ ഇവിടെ കൊണ്ട് നിർത്തുമ്പോൾ നമ്മളും കുറച്ചൊക്കെ ഉത്തരവാദിത്വം കാണിക്കണം.. മാത്രമല്ല അവളെവിടെ ജോലിക്കാരിയായി കൊണ്ടുവന്നത് അല്ലല്ലോ, അപ്പോൾ ഏതുനേരം ആ കുട്ടിയെ അടുക്കളയിലിട്ട് ഇങ്ങനെ ജോലി ചെയ്യിപ്പിക്കേണ്ട കാര്യമുണ്ടോ..?

“ഇച്ചായൻ എന്താണ് പറയുന്നത് ഞാൻ അങ്ങനെ ചെയ്യിപ്പിക്കുമോ അവളോട്..? ഒരു ജോലിയും ചെയ്യേണ്ട എന്ന് പറഞ്ഞിട്ട് ആണ് ഞാൻ പോയത് പഠിക്കാനുള്ളതൊക്കെ എടുത്തുവച്ചു പഠിച്ചോളാനാ പറഞ്ഞത്, അവള് ജോലി ചെയ്യുന്നത് സ്വന്തമായിട്ടുള്ള തീരുമാനത്തിലാണ് അല്ലാതെ ഞാൻ നിർബന്ധിച്ച് ചെയ്യിപ്പിക്കുന്നത് ഒന്നുമല്ല…

” നീ എവിടെ പോയാലും മരിയേയും കൂടി കൂടെ കൂട്ടണം.. സോളമനും അവളും ഒറ്റയ്ക്ക് ആകാനുള്ള സാഹചര്യം നീയായിട്ട് ഒരുക്കി കൊടുക്കരുത്..

” സോളമൻ അവളോട് അങ്ങനെയൊന്നും ചെയ്യില്ല, മാത്രമല്ല അവളുടെ അവസ്ഥകളൊക്കെ ഞാൻ അവനോട് പറഞ്ഞു കൊടുത്തിട്ടുണ്ട്…അവന് അവളെ വല്ല്യ ഇഷ്ടം ആണ്

അമല പറഞ്ഞു

” സോളമന് അവളോടുള്ള ഇഷ്ടം ഏത് തരത്തിലുള്ളതാണെന്ന് നിനക്കറിയോ..?

ചോദ്യഭാവത്തോടെ അയാൾ ഭാര്യയെ നോക്കി, ഒന്നും മനസ്സിലാവാതെ അയാളെ തന്നെ അവർ നോക്കി..

” ഇച്ചായൻ എന്താ ഇങ്ങനെയൊക്കെ സംസാരിക്കുന്നത്…?

” എനിക്കെന്തോ അവര് തമ്മിലുള്ള ബന്ധം അത്ര നല്ലതായിട്ട് തോന്നിയില്ല.. പ്രത്യേകിച്ച് സോളമൻ ആയതുകൊണ്ട്.

” അല്ലെങ്കിലും നിങ്ങൾക്കെന്റെ മോനെ ഇഷ്ടമല്ലല്ലോ, അതുകൊണ്ട് ആണ് എന്തെങ്കിലും ഒക്കെ കാര്യം പറഞ്ഞ് അവനെ കുറ്റം പറയുന്നത്.. അത് നിങ്ങളുടെ സ്ഥിരം പരിപാടിയല്ലേ..?

” ഞാൻ അവനെ വെറുതെ കുറ്റം പറഞ്ഞതല്ല, സോളമൻ കുറച്ച് കാലങ്ങളായിട്ട് കുറച്ചു പക്വത കാണിക്കുന്നതായിട്ട് ഞാൻ ശ്രദ്ധിച്ചു… ഇത്രയും കാലം ഉണ്ടായിരുന്ന ഒരു കുട്ടിക്കളി അല്ല അവന് ഇപ്പോൾ ജീവിതത്തിനോടുള്ളത്. വ്യക്തമായിട്ടുള്ള എന്തോ ഒരു ലക്ഷ്യം അവന് ലൈഫിനോട് ഉള്ളതുപോലെ.. എനിക്ക് അങ്ങനെ ഫീൽ ചെയ്തു.. മാത്രമല്ല അവനിപ്പോ അധികം ഗേൾഫ്രൻസ് ഒന്നുമില്ല. അത് ഞാൻ അന്വേഷിച്ച കാര്യം ആണ്…

” ഇതിനൊക്കെ സന്തോഷിക്കുകയല്ലേ വേണ്ടത്..? നമ്മുടെ മോന് കാര്യപ്രാപ്തി ഉണ്ടായതിന് നമുക്ക് സന്തോഷം അല്ലേ വരേണ്ടത്…? മാത്രമല്ല അവൻ മോശ സ്വഭാവങ്ങളും കൂട്ടുകെട്ടുകളും ഒക്കെ നിർത്തിയെങ്കിൽ അതിന് നമുക്ക് സന്തോഷം അല്ലേ വരേണ്ടത്..?

” സന്തോഷിക്കണം..! പക്ഷേ അതിനപ്പുറം അതിനൊരു അപകടം ഒളിഞ്ഞിരിക്കുന്നുണ്ട്. അതുകൂടി നമ്മൾ ചിന്തിക്കണം

” എന്ത് അപകടം?

മനസ്സിലാവാതെ അവർ ഭർത്താവിന്റെ മുഖത്തേക്ക് സൂക്ഷിച്ചു നോക്കി….കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…