🎶 സോളമന്റെ ഉത്തമഗീതം 🎶❤️: ഭാഗം 42

രചന: റിൻസി പ്രിൻസ്‌

സന്തോഷിക്കണം..! പക്ഷേ അതിനപ്പുറം അതിനൊരു അപകടം ഒളിഞ്ഞിരിക്കുന്നുണ്ട്. അതുകൂടി നമ്മൾ ചിന്തിക്കണം

” എന്ത് അപകടം?

മനസ്സിലാവാതെ അവർ ഭർത്താവിന്റെ മുഖത്തേക്ക് സൂക്ഷിച്ചു നോക്കി..

“എന്ത് അപകടത്തെക്കുറിച്ച് ആണ് ഈ പറയുന്നത്..?

” എനിക്ക് മനസ്സിലാകുന്നില്ല, നമ്മുടെ മോൻ നന്നാവുന്നതും അവന് കാര്യപ്രാപ്തി ഉണ്ടാകുന്നതും ഒക്കെ സന്തോഷം ഉണ്ടാക്കുന്ന കാര്യമാണ്, നിങ്ങൾക്ക് അത് സന്തോഷം അല്ലെ..?

” നിന്നെക്കാളും കൂടുതൽ ആ കാര്യത്തിൽ എനിക്ക് സന്തോഷമുണ്ട്, കാരണമവനെ കുറിച്ച് മറ്റുള്ളവരെ കുറ്റങ്ങൾ ഒന്നും പറയാതിരിക്കാൻ അത്രത്തോളം ഞാൻ ആഗ്രഹിച്ചിട്ടുണ്ട്, നമ്മുടെ ഹോസ്പിറ്റലിൽ തന്നെ അവനെപ്പറ്റി ഒരുപാട് ആളുകൾ മോശമായിട്ട് സംസാരിക്കാറുണ്ട്. ഇനി കുറച്ചുനാളുകൾ ആയിട്ട് അങ്ങനെയുള്ള വാക്കുകളും കാര്യങ്ങളും ഒന്നും കേൾക്കാറില്ല. അതുകൊണ്ട് കൂടിയ ഞാൻ അവനെ ഒന്ന് ശ്രദ്ധിക്കാൻ വേണ്ടി തീരുമാനിച്ചത്. ശ്രദ്ധിച്ചപ്പോൾ ശരിയാ. അവന് ഒരുപാട് മാറ്റങ്ങൾ വന്നിട്ടുണ്ട്. പക്ഷേ ആ മാറ്റങ്ങളുടെ കാരണം എന്താണെന്ന് എനിക്കറിയില്ല. പക്ഷേ ഒരു കാര്യം ഉറപ്പ് ആണ്. അവൻ ആർക്കൊ കൊടുത്ത ഒരു ഉറപ്പിന്റെ പുറത്ത് അല്ലെങ്കിൽ അപ്പുറത്ത് നിൽക്കുന്ന വ്യക്തിയോടുള്ള ആത്മാർത്ഥതയുടെയോ പ്രതിബദ്ധതയുടെയോ പുറത്താണ് ഇത്രത്തോളം മാറിയത്. പെട്ടെന്ന് ഒരു ദിവസം ഇങ്ങനെയുള്ള ഒരാൾക്ക് മാറാൻ സാധിക്കില്ല, അതിനു വ്യക്തമായിട്ടുള്ള ഒരു കാരണം വേണം,

” നിങ്ങൾ എന്താ ഈ പറഞ്ഞു വരുന്നത്..?

” ഇതൊക്കെ എന്റെ സംശയങ്ങൾ മാത്രമാണ്. ഒരുപക്ഷേ സത്യമായിരിക്കില്ല എനിക്ക് തോന്നുന്ന ചില സംശയങ്ങൾ ഞാൻ പങ്കുവെച്ചു എന്നേയുള്ളൂ. സോളമനെ കാണുമ്പോൾ മരിയയുടെ മുഖത്ത് ഒരു പ്രത്യേക സന്തോഷം എനിക്ക് തോന്നുന്നുണ്ട്.. അതേപോലെ അവളുടെ അടുത്ത് ഇടപെടുമ്പോൾ ഒരു പ്രത്യേക അവകാശവും അധികാരവും ഒക്കെ അവനും കാണിക്കുന്നതുപോലെ തോന്നി. ഒരുപക്ഷേ അവൻ മരിയയ്ക്ക് കൊടുത്ത ഉറപ്പാണെങ്കിലോ, ഇനി മോശം സ്വഭാവങ്ങളൊന്നും കാണിക്കില്ല എന്ന്. നീ ശ്രദ്ധിച്ചിരുന്നോ അവൻ കഴിഞ്ഞ ഞായറാഴ്ച പള്ളിയിൽ വന്നിരുന്നു, മാത്രമല്ല അവന്റെ അടുത്ത സുഹൃത്തുക്കൾക്കൊപ്പം ഉള്ള ഞായറാഴ്ചകളിലെ കമ്പനികൂടൽ ഒക്കെ മാറ്റിവെച്ചു. അവൻ ഇപ്പോൾ കൂടുതൽ സമയവും ഈ വീട്ടിൽ തന്നെ സ്പെൻഡ് ചെയ്യാനാണ് ആഗ്രഹിക്കുന്നത്. ഞാൻ വരുമ്പോഴൊക്കെ അവൻ വീട്ടിൽ തന്നെ കാണും, പൊതുവേ അവനെ പോലൊരാളെ ഈ വീട്ടിൽ ഇങ്ങനെ അടച്ചിരിക്കുന്നത് ഞാൻ ശ്രദ്ധിച്ചിട്ടില്ല. അവനെ വീട്ടിൽ തന്നെ പിടിച്ചു നിർത്തുന്ന എന്തോ ഒരു ഘടകം ഇവിടെ ഉള്ളതു കൊണ്ടാണ് അവൻ ഇവിടെ തന്നെ കൂടുതൽ സമയം നിലനിൽക്കുന്നത്. അതിന്റെ കാരണം കണ്ടുപിടിക്കേണ്ടത് അത്യാവശ്യമാണ്. അവൻ വെറുതെയിരുന്ന് നീ കണ്ടിട്ടുണ്ടോ..?

“മരിയയോട് അവൻ അങ്ങനെ ഒന്നും ചെയ്യില്ല, മാത്രമല്ല അങ്ങനെ ഒന്നും ചെയ്യരുത് എന്ന് ഞാൻ പ്രത്യേക അവനോട് പറഞ്ഞിട്ടുണ്ട്.. അവന്റെ മനസ്സിൽ മരയോടുള്ളത് ഒരു സഹോദരിയുടെ ഇഷ്ടം ആണ്.. അതിനപ്പുറം ഒന്നുമില്ല. ഒരു കുരുത്തക്കേടും അവളോട് കാണിക്കരുതെന്ന് ഞാൻ അവനോട് പറഞ്ഞിട്ടുള്ളത് ആണ്… അങ്ങനെ അവൻ അവളോട് ഒരു കളിതമാശയ്ക്ക് പോവില്ല. അത് ഇച്ചായൻ പേടിക്കേണ്ട. അവൻ എനിക്ക് ഉറപ്പു തന്നിട്ടുള്ളത് ആണ്.

“ഇത് അവന് കളി തമാശ അല്ലെങ്കിലോ..?

“എന്നുവച്ചാൽ..?

” മരിയയുടെ കാര്യം അവൻ കുറച്ച് സീരിയസായിട്ടാണ് കണ്ടിരിക്കുന്നതെങ്കിലോ..? നമുക്ക് അതിനെ കളി തമാശ എന്ന് വിളിക്കാൻ പറ്റൂമോ.? ഒരിക്കലുമില്ല ഇതൊക്കെ എന്റെ സംശയങ്ങളാണ്. എന്റെ മനസ്സിൽ തോന്നിയത്. നിനക്കറിയാമല്ലോ.? മെഡിസിൻ പഠിക്കുന്ന സമയത്ത് എല്ലാ ഡോക്ടർസിനും സൈക്കോളജി എന്ന് പറഞ്ഞിട്ട് ഒരു പ്രത്യേക ക്ലാസ്സ് കിട്ടാറുണ്ട്. അതുകൊണ്ട് കൂടിയാണ് ഞാൻ പറയുന്നത്. പിന്നെ നമ്മൾ ഈ പ്രായം കഴിഞ്ഞു വന്നതല്ലേ..? ഈ തുള്ളി ചാട്ടം കണ്ടാൽ നമുക്ക് മനസ്സിലാവാതിരിക്കുമോ.? സോളമൻറെ കാര്യം ഞാൻ ഉറപ്പ് പറയുന്നില്ല, പക്ഷേ മരിയയ്ക്ക് ആരോടോ ഒരു ഇഷ്ടം തോന്നിയിട്ടുണ്ട്, അത് ചിലപ്പോൾ കോളേജിലുള്ള ആരോടെങ്കിലും ആയിരിക്കും.. ഒന്നാമത് വീട്ടിൽ ഒരുപാട് ബുദ്ധിമുട്ടും കാര്യങ്ങളും അനുഭവിച്ച ഒരു കുട്ടിയാണ്. ആരെങ്കിലും സ്നേഹത്തോടെ ഒരു വാക്ക് പറഞ്ഞാൽ അത് അവളെ വല്ലാതെ സ്വാധീനിക്കും. ചിലപ്പോൾ അത് മുതലെടുക്കാനും നൂറ് പേര് കാണും. സമയം പോലെ നീ പതുക്കെ അവളോട് ചോദിച്ചേക്കണം അവളുടെ മനസ്സിൽ ആരെങ്കിലും ഉണ്ടോ എന്ന്. പറഞ്ഞു മനസ്സിലാക്കണം ചെന്നൈ പോലൊരു സിറ്റിയിലെ ഒരു പുരുഷന് ഒരു പെൺകുട്ടിയോട് ഒരു ഇഷ്ടം തോന്നുന്നത് വലിയ കാര്യം ഒന്നുമല്ല. പക്ഷേ അത് ഏത് തരത്തിലുള്ളതാണെന്ന് നമുക്കറിയാൻ പറ്റില്ല. മരിയയെപ്പോലെ അവളുടെ വീടിനു പുറത്തു ഒരു ലോകം കണ്ടിട്ടില്ലാത്ത ഒരു പെൺകുട്ടിക്ക് അങ്ങനെയൊരു അഫക്ഷൻ ഉണ്ടായാൽ ചിലപ്പോ അത് മുതലെടുക്കാൻ നൂറ് പേരുണ്ടാകും, അതുകൊണ്ട് നീ പറഞ്ഞു കൊടുക്കണം. ഉപദേശിക്കാൻ നിൽക്കരുത്. ഇവിടത്തെ സാഹചര്യങ്ങളും അതുപോലെ ഉണ്ടാകുന്ന ചൂഷണങ്ങളെ കുറിച്ചും ഒരു അവബോധം നൽകുക എന്ന് മാത്രമാണ് ഞാൻ ഉദ്ദേശിച്ചത്. പിന്നെ കഴിയുന്നതും ഞാൻ പറഞ്ഞതുപോലെ മരിയയും സോളമനും ഒറ്റയ്ക്ക് ആവാനുള്ള ഒരു സമയം നീ കൊടുക്കരുത്. രണ്ടുപേരും ചെറുപ്പക്കാരാണ്. മനസ്സിൽ എന്തെങ്കിലും തോന്നാൻ ഒരു മിനിറ്റ് മതി. അതിനുള്ള ഇട നീയായിട്ട് ഉണ്ടാക്കരുത്, അയാൾ അത്രയും പറഞ്ഞപ്പോൾ അവർ സമ്മതപൂർവ്വം തലയാട്ടിരുന്നു..

സണ്ണി പറയുന്ന ചില കാര്യങ്ങൾ ശരിയാണെന്ന് അമലയ്ക്കും തോന്നിയിരുന്നു. മരിയോടുള്ള സോളമന്റെ താല്പര്യ കൂടുതൽ താൻ ശ്രദ്ധിച്ചതാണ്. അവളോട് അല്പം അധികാരത്തോടെയാണ് അവനിടപെടാറുള്ളത്. പക്ഷേ അതൊക്കെ ഒരു വീട്ടിൽ ഒരുമിച്ച് താമസിക്കുന്ന ആളുകൾ എന്ന നിലയിൽ മാത്രമേ താൻ കണ്ടിരുന്നുള്ളൂ. സോളമന് അവളോട് പ്രത്യേകമായ എന്തെങ്കിലും ഇഷ്ടമുണ്ടായിരിക്കുമോ ഒരു നിമിഷം അവരുടെ മനസ്സിൽ ആ സംശയം നിറഞ്ഞു നിന്നു.

അന്ന് രാത്രിയിൽ എത്ര കിടന്നിട്ടും സോളമന് ഉറക്കം വരുന്നുണ്ടായിരുന്നില്ല. മരിയയിൽ നിന്നും അങ്ങനെ ഒരു പ്രവർത്തി അവൻ ഒട്ടും പ്രതീക്ഷിച്ചിരുന്നില്ല. അതുകൊണ്ടു തന്നെ അവളെ ഒന്ന് കാണാതെ സംസാരിക്കാതെ കിടന്നുറങ്ങാൻ പറ്റില്ല, രാത്രിയിൽ കഴിക്കാൻ ഇരുന്നപ്പോൾ സണ്ണി കൂടി ഉള്ളതുകൊണ്ട് അവൾ പ്രത്യക്ഷപ്പെട്ടിരുന്നില്ല. അവളും അമ്മയും ഒരുമിച്ചാണ് കഴിച്ചത്. അതുകൊണ്ട് ഒന്ന് കാണാനും പറ്റിയില്ല. കൂടുതൽ സമയം കറങ്ങി നിൽക്കാൻ സാധിക്കാത്തതു കൊണ്ട് അടുക്കളയിൽ നിന്നില്ല. കുറേസമയം തിരിഞ്ഞും മറിഞ്ഞും കമിഴ്ന്നുമൊക്കെ കിടന്നിട്ടും ഉറക്കം വരാത്തതുകൊണ്ട് അവൻ എഴുന്നേറ്റു.

ലൈറ്റ് ഇടാതെ പതുക്കെ അവളുടെ മുറിയുടെ വാതിലിൽ വന്ന് തട്ടി, അവൾ നല്ല ഉറക്കമായിരുന്നു. കുറെ സമയമായി മുറിയിൽ ആരോ തട്ടുന്നത് കേട്ടാണ് അവൾ കണ്ണ് തുറന്നത്. അമലയാകും എന്ന് ഓർത്താണ് അവൾ മുറി തുറന്നത്.. മുൻപിൽ സോളമനെ കണ്ടതും അവൾ അമ്പരന്നിരുന്നു, മിണ്ടരുത് എന്ന് വാ കൊണ്ട് അവൾ ആംഗ്യം കാണിച്ച ശേഷം അവളുടെ മുറിക്കുള്ളിലേക്ക് അവൻ കയറി, ഡോറു കുറ്റിയിട്ടു.

“ഇച്ചായൻ എന്താണ് ഈ സമയത്ത്..?

” അതൊക്കെ പറയാം എനിക്ക് ചില കാര്യങ്ങൾ അപ്പോൾ തന്നെ തന്നില്ലെങ്കിൽ ഒരു സമാധാനം ഉണ്ടാവില്ല. നീ അടുക്കളയിൽ വച്ച് ഒരു കാര്യം തന്നില്ലേ അത് തിരിച്ചു വരാൻ വേണ്ടി വന്നതാ…

“മോളെ….

പുറത്ത് അമല കതകിൽ കൊട്ടിയപ്പോൾ രണ്ടുപേരും ഒരേ പോലെ ഞെട്ടിപ്പോയിരുന്നു….കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…