🎶 സോളമന്റെ ഉത്തമഗീതം 🎶❤️: ഭാഗം 48

രചന: റിൻസി പ്രിൻസ്‌

തൽക്കാലം ഇത് കൈയിൽ ഉണ്ടെന്നുള്ള കാര്യം മമ്മ അറിയേണ്ട. ഞാൻ സൈലന്റ് ആക്കി ഇട്ടിരിക്കുവാ. എന്റെ നമ്പർ മാത്രമേ ഉള്ളൂ. ഫോൺ തരണ്ടാന്ന് കരുതിയത് ആണ്. പിന്നെ നിനക്ക് ഒരു വിശ്വാസക്കുറവ് വേണ്ടെന്നു കരുതി തന്നത് ആണ്. വിഷമിക്കാതെ ഞാനില്ലേ കൂടെ?

ആർദ്രമായി അവളുടെ കൈകളിലേക്ക് പിടിച്ചുകൊണ്ട് അവൻ പറഞ്ഞു

” ഇനി സമാധാനമായിട്ട് പൊയ്ക്കോ…

അവളെ ആശ്വസിപ്പിച്ചാണ് അവൻ അവിടെ നിന്നും യാത്രയാക്കിയത്.

തിരികെയുള്ള യാത്രയിൽ അവൻ പറഞ്ഞ കാര്യങ്ങളെക്കുറിച്ച് തന്നെയാണ് അവളും ചിന്തിച്ചത്. തീർച്ചയായും ഒരു അകലം ഇടേണ്ടത് അത്യാവശ്യമാണ്.

മരിയ വീട്ടിലേക്ക് എത്തിയപ്പോൾ അമല അവൾക്ക് വേണ്ടി പ്രത്യേകം തയ്യാറാക്കിയ ഉപ്പുമാവും കോഫിയും ഒക്കെ കൊടുത്തിരുന്നു.

അവളോട് ഇവിടെ നിന്നും മാറുന്ന കാര്യം പറയാൻ അമലയ്ക്കും ബുദ്ധിമുട്ടുണ്ടായിരുന്നു.

വൈകുന്നേരം ആ കാര്യം പറയാം എന്നാണ് അവർ തീരുമാനിച്ചിരുന്നത്. മരിയ വീട്ടിലെത്തി കുറച്ച് അധികം സമയം കൂടി കഴിഞ്ഞെ വീട്ടിലേക്ക് പോകുന്നുള്ളൂ എന്ന് സോളമൻ തീരുമാനിച്ചിരുന്നു.

ഒരുപക്ഷേ താൻ നേരത്തെ ചെല്ലുമ്പോൾ അതും മമ്മയിൽ സംശയം ഉണർത്തിയാലോ.? ഇനിയെങ്കിലും സംശയത്തിനുള്ള വഴികൾ ഉണ്ടാക്കരുത് എന്ന് അവൻ മനസ്സിൽ കരുതിയിട്ടുണ്ടായിരുന്നു.

മരിയ ഭക്ഷണം കഴിച്ച് കുളിയൊക്കെ കഴിഞ്ഞ് അടുക്കളയിലേക്ക് വന്നു അമലയുടെ മുഖത്തേക്ക് നോക്കിക്കൊണ്ട് പറഞ്ഞു.

” എനിക്കൊരു കാര്യം പറയാനുണ്ട് ആന്റി. ഞാനത് പറയുമ്പോൾ ആന്റി എങ്ങനെ എടുക്കുമെന്ന് എനിക്ക് അറിയില്ല…

” എന്താ മോളെ..?

അമല അവളുടെ മുഖത്തേക്ക് നോക്കി ചോദിച്ചു…

” അടുത്ത സെമസ്റ്റർ തുടങ്ങാൻ പോവാ അതുകൊണ്ട് എനിക്ക് ചിലപ്പോൾ നൈറ്റിലും ചില പ്രാക്ടിക്കൽസ് ഒക്കെ കാണും. അങ്ങനെയാവുമ്പോൾ ഇവിടുന്ന് പോയി വരുന്നത് ബുദ്ധിമുട്ടാണ്. എനിക്ക് രാത്രിയിൽ ഒന്നും ഇവിടെ കൂടെ യാത്ര ചെയ്യാനുള്ള ധൈര്യവും ഇല്ല. അതുകൊണ്ട് എനിക്കൊന്ന് ഹോസ്റ്റലിലേക്ക് മാറണം എന്ന് ആഗ്രഹമുണ്ട്. ആന്റി അങ്കിളിനോട് ഒന്ന് പറയൂ. എനിക്ക് വേണ്ടി ഹോസ്റ്റൽ ഒന്ന് റെഡിയാക്കി തരാവോന്ന്.. കാരണം ഇവിടുന്ന് പോയി വരിക എന്ന് പറയുന്നത് ഇത്തിരി ബുദ്ധിമുട്ടുള്ള കാര്യമാ…

അവളുടെ വാക്കുകൾ കേട്ടപ്പോൾ ഒരു നിമിഷം സന്തോഷമാണോ അത്ഭുതമാണോ തോന്നിയതെന്ന് മനസ്സിലാക്കാൻ സാധിക്കാത്ത ഒരു അവസ്ഥയിലായിരുന്നു അമല..

താൻ അവളോട് ഈ കാര്യത്തെക്കുറിച്ച് എങ്ങനെ പറയും എന്ന് വിഷമിക്കുക ആയിരുന്നു.ആ സമയത്താണ് ഇതേ കാര്യത്തെക്കുറിച്ച് തന്നെ അവൾ പറയുന്നത്. ആ നിമിഷം അവളുടെ മുഖത്തേക്ക് തന്നെ നോക്കി നിൽക്കുകയായിരുന്നു അമല… അവളും അമലയുടെ മുഖത്തേക്ക് നോക്കുകയായിരുന്നു..

” മോൾക്ക് ഇവിടെ എന്തേലും ബുദ്ധിമുട്ടുണ്ടായിട്ടാണോ അങ്ങനെ പറഞ്ഞത്..?

വീണ്ടും ഒരിക്കൽ കൂടി അമല അവളുടെ മനസ്സ് അറിയാൻ വേണ്ടി ചോദിച്ചു

” എനിക്ക് ഇവിടെ എന്ത് ബുദ്ധിമുട്ട് ഉണ്ടാവാനാണ് ആന്റി. അതൊന്നുമല്ല എനിക്ക് ക്ലാസിന് പോകാൻ അത് ആണ് എളുപ്പം. അതുകൊണ്ട് ഞാൻ ആന്റിയോട് പറയാൻ വേണ്ടി വന്നതാ. അങ്കിളിനോട് പറയണം

” ഞാൻ പറയാം മോളെ…

” ഉടനെ തന്നെ മോൾക്ക് പറ്റിയ ഒരു ഹോസ്റ്റൽ നമുക്ക് കണ്ടുപിടിക്കാം..

അമല പറഞ്ഞപ്പോൾ മരിയ്ക്കും ആശ്വാസം തോന്നിയിരുന്നു. മരിയ തിരികെ പോയ സമയത്ത് അമല ശരിക്കും കൺഫ്യൂഷനിൽ ആയി എന്ന് പറയുന്നതാണ് സത്യം. എന്താണ് മരിയയുടെ മനസ്സിൽ എന്ന് മനസ്സിലാക്കാൻ സാധിക്കുന്നില്ല. ഒരിക്കലും സോളമനുമായി അവൾക്ക് ഒരു ബന്ധവുമില്ല എന്ന് അമല ആ നിമിഷം തന്നെ മനസ്സിൽ ഉറപ്പിച്ചിരുന്നു. അങ്ങനെയാണെങ്കിൽ ഒരിക്കലും ഇവിടെ നിന്ന് പോകാൻ അവൾ ആഗ്രഹിക്കില്ലല്ലോ. അതിപ്പോൾ എത്ര മോശം സാഹചര്യമാണെന്ന് പറഞ്ഞാലും. ഒക്കെ തന്റെ തോന്നലായിരുന്നു എന്ന് മനസ്സിലാക്കി അമല. ആ നിമിഷം തന്നെ വലിയൊരു സമാധാനവും അവരുടെ മനസ്സിൽ നിറഞ്ഞുനിന്നു.

കുറെ ദിവസങ്ങളിലായി എന്തോ ചിന്തയിലാണ് മകൻ എന്ന് മനസ്സിലാക്കിയാണ് ജോണിന്റെ അമ്മയായ ലീലാമ്മ അവന്റെ അരികിലേക്ക് വരുന്നത്. കുറച്ചു ദിവസം മകന്റെ കൂടെ നിൽക്കാൻ വന്നതാണ് അവർ അപ്പോൾ മുതൽ മകന്റെ വ്യത്യാസം അവർ ശ്രദ്ധിക്കുകയാണ്. ജോണിനെ പോലെ തന്നെ മനസാക്ഷി ഒട്ടുമില്ലാത്ത ഒരു സ്വഭാവമാണ് അവരുടേതും.

” എന്നതാടാ നീ കുറേ ദിവസമായിട്ട് കാര്യമായിട്ടുള്ള എന്തോ ആലോചനയിൽ ആണല്ലോ…

“അങ്ങനെ ചോദിച്ചാൽ അമ്മച്ചി പറഞ്ഞത് ശരിയാണ്. ഞാൻ ഒരു കാര്യത്തിനെപ്പറ്റി ആലോചിച്ചു കൊണ്ടിരിക്കുകയായിരുന്നു.

” എന്നാടാ അത്

” ജെസ്സി എന്നോട് പറഞ്ഞ ഒരു കാര്യം ആണ്. ഞാൻ അതിനെക്കുറിച്ച് കൂടുതൽ ആലോചിച്ചു..

“എന്താ കാര്യം

“ബെറ്റിയുടെ കൂട്ടുകാരി ഇല്ലേ അമല,

” ആ അറിയാം അറിയാം, നിന്റെ വളർത്തുപുത്രി നിൽക്കുന്ന വീട്ടിലെ അവരല്ലേ, പിന്നെ നമ്മുടെ ലൈസമ്മയുടെ അനിയത്തിയുടെ മോളും അല്ലേ. ഇന്നാളിൽ ഇവിടെ വന്നെന്ന് പറഞ്ഞത് അവരല്ലേടാ

” അതെ അതെ അവർ തന്നെ.. അവർക്ക് ഒരു മോനുണ്ട്. അവർ വന്നപ്പോൾ ജെസ്സി ഉണ്ടാരുന്നു ഇവിടെ. അവൾ അത് കഴിഞ്ഞു എന്നോട് ഒരു കാര്യം പറഞ്ഞു. ആ ചെറുക്കനെ ജെസിയുടെ മോള് ജീനയ്ക്ക് വേണ്ടി ഒന്ന് ആലോചിക്കാന്…

പെട്ടെന്ന് ലീലാമ്മയുടെ കണ്ണുകൾ ഒന്ന് ചുരുങ്ങി. അവർ മകൻ പറയുന്നത് എന്താണെന്ന് ശ്രദ്ധിച്ചു.

” ജെസ്സി പറയുന്നത് അവർക്ക് ഇട്ടു മൂടാനുള്ള സ്വത്തുണ്ട് ആ സ്വത്തൊക്കെ വേറെ എവിടെങ്കിലും പോകുന്നത് നല്ലത് ഇവിടെ നിൽക്കുന്നതല്ലേ എന്ന് ആണ്. അതുകൊണ്ട് ആ ചെറുക്കനെ അവളുടെ മോൾക്ക് വേണ്ടി ആലോചിക്കുകയാണെങ്കിൽ എനിക്കും ഗുണമുണ്ടാകും എന്ന്.

” എന്നിട്ട് നീ എന്ത് തീരുമാനിച്ചു..?

മകന്റെ മുഖത്തേക്ക് നോക്കി ലീലാമ്മ ചോദിച്ചു.

” അവൾ പറഞ്ഞത് ശരിയാണ്. ഇട്ടു മൂടാനുള്ള സമ്പത്ത് അവർക്കുണ്ട്. എല്ലാം ആ ചെറുക്കന് മാത്രം ഉള്ളത് ആണ്. പോരാത്തതിന് അവൻ ഒരു ഡോക്ടർ. കാണാനും മോശമില്ല. അമലയുടെയും സണ്ണിയുടെയും സ്വത്ത് ഒരുമിച്ച് കൂട്ടി നോക്കിയാൽ പോലും ഏകദേശം ഒരു രണ്ടു തലമുറയ്ക്ക് ഇരുന്നു ഉണ്ണാൻ ഉള്ളതു കാണും.

ജോൺ പറഞ്ഞു

” അത് ശരിയാ പിന്നെ അവര് നല്ല കുടുംബക്കാരും ആണ്,
പറയുമ്പോൾ അതും കൂടി പറയണമല്ലോ..

ലീലാമ്മ പിന്താങ്ങി മകനെ

” അതും ശരിയാ അതുകൊണ്ട് ഞാൻ ഒരു കാര്യം ചിന്തിക്കുകയായിരുന്നു. നമ്മളിപ്പോൾ ജെസ്സിയുടെ മോൾക്ക് വേണ്ടി അവനെ കല്യാണം ആലോചിച്ചു എന്ന് തന്നെ ഇരിക്കട്ടെ, അത് നടന്നു തന്നെ ഇരിക്കട്ടെ ഈ കണ്ട പണമൊക്കെ പോകുന്നത് ആരുടെ കൈയിലോട്ട് ആണ്..? തോമസിന്റെ കുടുംബത്തിലേക്ക്. ജെസ്സിയും തോമസും ഒട്ടും മോശമല്ല. പാലം കടക്കുന്നത് വരെ നാരായണ പിന്നീട് അവരെന്തായിരിക്കും ചെയ്യാൻ പോകുന്നത് എന്ന് നമുക്കറിയാം. ഞാൻ ആലോചിച്ചപ്പോൾ എന്റെ ജീന മോളെ ആ കൊച്ചിന് ഒന്ന് ആലോചിച്ചാലൊന്ന് ചിന്തിക്കുകയായിരുന്നു. അവൾ ഏതായാലും പ്ലസ് ടു കഴിഞ്ഞ് നിൽക്കുക അല്ലേ..? ഇനിയിപ്പോൾ അവളെയും എന്തെങ്കിലും പഠിക്കാൻ വിടണം. അവളെ ചെന്നൈയിലെ എൻജിനീയറിങ് പഠിക്കാൻ വിട്ടാലോ എന്നാണ് ഞാനിപ്പോൾ ആലോചിക്കുന്നത്. അങ്ങനെയാവുമ്പോൾ അവളുടെ അഡ്മിഷനും മറ്റുമായിട്ട് എനിക്ക് തന്നെ സണ്ണിയെ ഒന്ന് പോയി കാണുകയും ചെയ്യാം. ആ സമയത്ത് എങ്ങനെയെങ്കിലും എനിക്ക് സണ്ണിയോട് ഈ വിവരം പറയാമല്ലോ. ഇത് അവരൊന്ന് സമ്മതിച്ചു കിട്ടിയാൽ രക്ഷപ്പെട്ടു.

മകന്റെ ബുദ്ധി അറിഞ്ഞു അമ്പരന്ന് നിൽക്കുകയായിരുന്നു ലീലാമ്മ… അമ്മച്ചിയുടെ മറുപടിക്ക് വേണ്ടി കാത്ത് ജോണിയും…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…