🎶 സോളമന്റെ ഉത്തമഗീതം 🎶❤️: ഭാഗം 49

രചന: റിൻസി പ്രിൻസ്‌

അങ്ങനെയാവുമ്പോൾ അവളുടെ അഡ്മിഷനും മറ്റുമായിട്ട് എനിക്ക് തന്നെ സണ്ണിയെ ഒന്ന് പോയി കാണുകയും ചെയ്യാം. ആ സമയത്ത് എങ്ങനെയെങ്കിലും എനിക്ക് സണ്ണിയോട് ഈ വിവരം പറയാമല്ലോ. ഇത് അവരൊന്ന് സമ്മതിച്ചു കിട്ടിയാൽ രക്ഷപ്പെട്ടു.

മകന്റെ ബുദ്ധി അറിഞ്ഞു അമ്പരന്ന് നിൽക്കുകയായിരുന്നു ലീലാമ്മ… അമ്മച്ചിയുടെ മറുപടിക്ക് വേണ്ടി കാത്ത് ജോണിയും

” അങ്ങനെയൊരു തീരുമാനം നിന്റെ മനസ്സിൽ ഉണ്ടെങ്കിൽ അതുതന്നെയാ നല്ലത്, എന്തെങ്കിലും കിട്ടുന്നെങ്കിൽ അത് ഈ കുടുംബത്തിലേക്ക് വേണ്ടെ കിട്ടാന്.? അല്ലാതെ മരുമോന്റെ കുടുംബത്തിലോട്ട് പോയിട്ട് നമുക്ക് എന്ത് ഗുണം കിട്ടാനാ.? മാത്രമല്ല അവൾ നിനക്ക് എന്തെങ്കിലും നക്കാപ്പിച്ച തന്നു എന്ന് പറഞ്ഞാലും അതിലും അവൾ ലാഭം നോക്കിയ തരത്തൊള്ളൂ. മാത്രമല്ല നിന്റെ കൊച്ചിനെക്കാളും സൗകര്യത്തിൽ വല്ലവന്റെയും കൊച്ചു കഴിയുന്നത് എനിക്ക് വലിയ താല്പര്യമുള്ള കാര്യമല്ല. നമ്മുടെ ജീന മോൾക്ക് വേണ്ടി തന്നെ ആ ചെറുക്കനെ ആലോചിക്കാം. അവനൊരു ഡോക്ടറല്ലേ അതിന്റെ പത്രാസ് ഒക്കെ എന്താണെങ്കിലും ഇത്തിരി വലുത് തന്നെയാണ്.

ലീലാമ്മ പറഞ്ഞു

“അവർ സമ്മതിക്കണം എന്നുള്ളതാണ് അമ്മച്ചിപ്രധാന പ്രശ്നം.

” അതെന്നാ സമ്മതിക്കാതിരിക്കാൻ.? അവരുടെ അത്രയും ഇല്ലെങ്കിലും നമുക്ക് പണം ഒക്കെ ഉണ്ടല്ലോ, പിന്നെ നിന്റെ കെട്ടിയോള് പറഞ്ഞാൽ സമ്മതിക്കും.

” അവളോട് ഇപ്പോൾ ഈ കാര്യം പറയണ്ട എന്നാണ് എന്റെ ഒരു അഭിപ്രായം. അവളും അമലയും നേരത്തെ കാര്യം സംസാരിക്കുന്നത് ശരിയല്ല. ഞാൻ സണ്ണിയോട് പറയുകയാണെങ്കിൽ അത് വേറൊരു രീതിയാണ്. ഞങ്ങൾ തമ്മിൽ സംസാരിക്കുമ്പോൾ അത് പെട്ടെന്ന് തീരുമാനമാകും. അമലയോട് വല്ലതും പറഞ്ഞാൽ അമല ഒറ്റയടിക്ക് താല്പര്യമില്ലെന്ന് സണ്ണിയോട് പറഞ്ഞാൽ അത് പ്രശ്നം ആണ്. സണ്ണിയോട് ആദ്യം സംസാരിച്ചു സണ്ണി ഒക്കെ പറഞ്ഞാൽ പിന്നെ പ്രശ്നമില്ല.

ജോണി പറഞ്ഞു

” നമ്മുടെ കൊച്ചിനെ അമലയ്ക്ക് ഇഷ്ടപ്പെടുന്ന രീതിയിലേക്ക് മാറ്റിയിട്ട് അമലയെ കൊണ്ട് തന്നെ എങ്ങനെയെങ്കിലും സമ്മതിപ്പിക്കണം…

ലീലാമ്മ തന്റെ ആഗ്രഹം പറഞ്ഞപ്പോൾ അതുതന്നെയാണ് ശരിയെന്ന് ജോണിയ്ക്കും തോന്നി.

” എങ്കിൽ പിന്നെ നീ എത്രയും പെട്ടെന്ന് നമ്മുടെ കൊച്ചിന് അഡ്മിഷൻ ശരിയാക്കാൻ നോക്ക്.

” ഈ കാര്യം അറിയാതെ പോലും അമ്മച്ചി ബെറ്റിയോട് പറഞ്ഞേക്കരുത്.

” പിന്നെ എനിക്ക് അവളെ പിന്നെ ഭയങ്കര ഇഷ്ടമായതുകൊണ്ട് ഞാൻ എല്ലാ കാര്യങ്ങളും അവളോട് പറയുമല്ലോ, നീ ഒന്ന് പോടാ ചെറുക്കാ. ഞാൻ ഈ കാര്യങ്ങൾ ഒന്നും അവളോട് പറയാൻ പോകുന്നില്ല. നീ സമാധാനമായിട്ട് ബാക്കി കാര്യങ്ങൾ നോക്ക്..

അമ്മച്ചി അങ്ങനെ പറഞ്ഞപ്പോൾ വലിയൊരു ആത്മവിശ്വാസം ജോണിക്കും കൈവന്നു .

വലിയ സന്തോഷത്തോടെ ആണ് അമല സണ്ണിക്കരിയിലേക്ക് വന്നത്. അവരുടെ മുഖത്തെ സന്തോഷം കണ്ട് എന്താണ് കാര്യം എന്ന് അറിയാതെ സണ്ണി അവരെ തന്നെ അത്ഭുതത്തോടെ നോക്കി.

” നമുക്ക് തെറ്റി ഇച്ചായാ, നമ്മൾ ചിന്തിച്ചതൊക്കെ വെറുതെ ആയിരുന്നു, സോളമനും മരിയയും തമ്മില് ഒന്നുമില്ല..

” അതെന്താ നിനക്ക് അങ്ങനെ തോന്നാൻ..,? നീ മരിയോട് ഈ കാര്യത്തെപ്പറ്റി വല്ലതും ചോദിച്ചോ..?

പെട്ടെന്ന് അമ്പരപ്പോട് അയാൾ അവരോട് ചോദിച്ചു.

” ഇല്ല ഞാൻ അങ്ങനെ ചോദിക്കുമോ..? പക്ഷേ മരിയ എന്നോട് ഒരു കാര്യം പറഞ്ഞു.

” എന്ത് കാര്യം..?

” ഇവിടുന്ന് മാറി താമസിക്കണം എന്ന്…

” അതിന് നീ എന്തിനാ ഇത്ര സന്തോഷിക്കുന്നത്..?

മനസ്സിലാവാതെ സണ്ണി ചോദിച്ചു.

‘ അവൾക്ക് സോളമനെ ഇഷ്ടമാണെന്നുണ്ടെങ്കിൽ തീർച്ചയായിട്ടും സോളമൻ ഉള്ള സ്ഥലത്ത് നിൽക്കാനല്ലേ ആഗ്രഹിക്കു, അതിപ്പോ എന്തൊക്കെ പ്രശ്നമുണ്ടെന്ന് പറഞ്ഞാലും. മാത്രമല്ല നമ്മുടെ മനസ്സിൽ ഇങ്ങനെയൊരു ചിന്തയുണ്ടെന്ന് അവർക്ക് അറിയുകയില്ല. ഹോസ്റ്റൽ പോകണം എന്നാണ് അവൾ എന്നോട് പറഞ്ഞത്. അതായിത് ഇവിടുന്ന് മാറണമെന്ന്. നമ്മൾ വെറുതെ ആ കൊച്ചിനെ സംശയിച്ചല്ലോ എന്ന് ഓർക്കുമ്പോൾ എനിക്ക് വിഷമം വരുന്നു.

“അങ്ങനെയാണെങ്കിൽ കൊള്ളാം… അങ്ങനെ ആവണമെന്ന് നമുക്ക് പ്രാർത്ഥിക്കാം

സണ്ണി അത് പറഞ്ഞപ്പോൾ അമല ഒന്നും മിണ്ടാതെ നിന്നു.

അന്ന് പതിവിലും താമസിച്ചായിരുന്നു സോളമനും എത്തിയത് ഒരു പുഞ്ചിരി അമലയ്ക്ക് സമ്മാനിക്കുകയല്ലാതെ മറ്റൊന്നും അവന്റെ ഭാഗത്തു നിന്നും ഉണ്ടായില്ല. എന്നാൽ പഴയത് പോലെ തന്നെ ചിരിയോടെ തന്നെ മരിയോട് ഇടപെടാൻ അവൻ മറന്നതുമില്ല. പെട്ടെന്ന് മരിയയോട് ഒരു അകൽച്ച കാണിച്ചാലും അത് മമ്മയിൽ സംശയമുളവാക്കുമെന്നും അവന് ഉറപ്പായിരുന്നു. അതുകൊണ്ടു തന്നെയാണ് അവൻ വ്യക്തമായ രീതിയിൽ മുൻപോട്ട് പോയത്. ഇതിനിടയിൽ ആരും കാണാതെ അവൻ മരിയയുടെ റൂമിൽ കൊണ്ടുപോയി ചാർജർ വയ്ക്കുകയും ചെയ്തു.

ശേഷം അവളുടെ ഫോണിൽ മെസ്സേജ് അയച്ചു. ചാർജർ എവിടെയാണ് വച്ചിരിക്കുന്നത് എന്ന് അവൻ പറഞ്ഞു. അവൻ വച്ച സ്ഥലത്തു നിന്നും അവൾ ചാർജ് എടുത്തു കൊണ്ട് വന്ന് ഫോൺ ചാർജ് ചെയ്യുകയും ചെയ്തു. അന്ന് രാത്രി മുഴുവൻ പരസ്പരം ഫോണിലൂടെ സംസാരിക്കുകയായിരുന്നു ഇരുവരും. നേരിട്ട് സംസാരിക്കുന്നതിനേക്കാൾ കൂടുതൽ സോളമനോട് ഫോണിൽ കൂടി തനിക്ക് സംസാരിക്കാൻ കഴിയുമെന്ന് മരിയ മനസ്സിലാക്കി. തന്റെ വേദനകളെക്കുറിച്ചോ വേദനിപ്പിക്കുന്ന ഓർമ്മകളെ കുറിച്ചോ ഒന്നും പറയുന്നത് അവന് ഇഷ്ടമല്ല. അതിനെക്കുറിച്ച് സംസാരിക്കുമ്പോൾ ഉടൻ തന്നെ അവൻ വിഷയം മാറ്റും. എന്നാൽ തന്നെക്കുറിച്ച് ഒരുപാട് അവനോട് സംസാരിക്കണമെന്ന് മരിയ്ക്കുണ്ടായിരുന്നു. രണ്ടും കൽപ്പിച്ച് താൻ തന്നെ പറ്റി പറയട്ടെ എന്ന് അവനോട് ചോദിച്ചപ്പോൾ ഒക്കെ വേദനിപ്പിക്കുന്ന തന്റെ ഓർമ്മകളെക്കുറിച്ച് ഒന്നും അറിയേണ്ട എന്നാണ് സോളമൻ പറയുന്നത്. സന്തോഷിക്കുന്ന കാര്യങ്ങൾ മാത്രം സംസാരിച്ചാൽ മതിയെന്ന് അവൻ പറഞ്ഞപ്പോൾ കൂടുതൽ നിർബന്ധിക്കാൻ തോന്നിയിരുന്നില്ല.

സോളമനെ കുറിച്ചും കൂടുതൽ മരിയ അറിയുന്നത് ഫോൺ സംഭാഷണങ്ങളിലൂടെ തന്നെയായിരുന്നു. അവന്റെ ഇഷ്ടങ്ങളും രീതികളും ഒക്കെ വളരെ പെട്ടെന്ന് തന്നെ മനസ്സിലാക്കി എടുത്തിരുന്നു മരിയ. അതുപോലെ തന്നെ മരിയയുടെ ഇഷ്ടങ്ങളും മറ്റും സോളമനും ചോദിച്ചു മനസ്സിലാക്കി. അവളോട് സംസാരിച്ചതിൽ നിന്നും സോളമൻ മനസ്സിലാക്കിയ ഒരു പ്രധാന വിഷയം എന്നത് മരിയ ഇതുവരെയും മനസ്സറിഞ്ഞ് സന്തോഷിച്ചിട്ടില്ല എന്നത് ആണ്. ഉദാഹരണത്തിന് അവൾക്ക് ഇതുവരെ ഒരു നല്ല പുതിയ ഉടുപ്പ് ആരും മേടിച്ചു കൊടുത്തിട്ടില്ല. അമ്മയുടെ പഴയ സാരി ഉപയോഗിച്ചുള്ള ഉടുപ്പുകൾ ഒക്കെ ആയിരുന്നു കുട്ടിക്കാലം മുതൽ അവൾക്ക് ലഭിക്കുന്നത്. ഇനിയിപ്പോൾ ക്രിസ്മസൊ ഓണമോ ഒക്കെ വരികയാണെങ്കിൽ പോലും ജോണിയുടെ സഹോദരിയുടെ മകൾ ജീനയുടെ ഉടുപ്പുകൾ ആണ് കൊടുക്കുന്നത്. അവൾക്ക് പുതുതായി ഒന്നും വാങ്ങി കൊടുക്കുവാൻ ജോണി അനുവദിച്ചിരുന്നില്ല. അവളെ പുറത്തു കൊണ്ടു പോവുകയോ സിനിമ കാണിക്കുകയോ ബിരിയാണി വാങ്ങി കൊടുക്കുകയോ ഒന്നും ആരും ചെയ്തിട്ടില്ല. അത്തരം കാര്യങ്ങളൊക്കെ അവൾക്ക് അജ്ഞാതമാണ്. അവളുടെ ആ നിസ്സഹായത സോളമനെ വല്ലാതെ വേദനിപ്പിച്ചു. അത്തരം വേദനകളിൽ ഒക്കെ അവൾക്ക് താനൊരു ആശ്വാസമാകണമെന്നും ഇനി അവളിൽ സന്തോഷത്തിന്റെ കണികകൾ താൻ ഒരുക്കി കൊടുക്കണം എന്നും ആ നിമിഷം തന്നെ സോളമൻ തീരുമാനിച്ചിരുന്നു. പ്രണയത്തേക്കാൾ ഉപരി അവളോട് വല്ലാത്തൊരു വാത്സല്യവും സഹാനുഭൂതിയും ഒക്കെയാണ് അവന് തോന്നിയത്. തന്നിലൂടെ അവൾ സന്തോഷം അറിയുന്നത് ദൈവികമായ ഒരു അനുഭവമാണെന്ന് അവന് തോന്നി. അവളുടെ ചുംബനങ്ങൾ നൽകുന്ന ശോണിമ തന്നിൽ ഉദയത്തെക്കാൾ പ്രഭ ചൊരിയണം.
അവളുടെ രാവുകളിൽ അസ്തമനത്തിന്റെ നിമിഷങ്ങളിലും താൻ എന്ന സൂര്യൻ ആവണം കിനാവുകളിൽ തെളിയുന്നത്.

അവളിലേക്ക് ഒരു ഇടവപ്പാതി പോലെ പെയ്യണം തന്റെ സ്നേഹം ..
ഒരു പെരുമഴകാലം തീർത്തു അവളെ നനയ്ക്കണം
അവൻ ഓർത്തു

കുട്ടിക്കാലത്ത് സ്കൂളിൽ വച്ച് അവൾക്ക് അനുഭവപ്പെട്ട ഒറ്റപ്പെടുത്തലുകളും അച്ഛനും അമ്മയും കൂടെ കൊണ്ടു വിടുന്ന സ്വപ്നങ്ങളും ഒക്കെ പറയുന്നത് കേട്ടപ്പോൾ അവളെ ഒന്ന് വാരിപ്പുണരാൻ ആണ് അവന് തോന്നിയത്. അവളുടെ മാനസികാവസ്ഥയെ കുറിച്ച് ചിന്തിച്ചപ്പോൾ അവന് വല്ലാത്ത വേദന തോന്നി.

പോയ കാലങ്ങൾ അവൾക്ക് സമ്മാനിച്ച മുറിവുകളുടെ നീറ്റൽ ബാക്കിയാകുന്നത് അവളേക്കാളേറെ
തന്നിലാണെന്ന് അവന് തോന്നി. ..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…