🎶 സോളമന്റെ ഉത്തമഗീതം 🎶❤️: ഭാഗം 56

രചന: റിൻസി പ്രിൻസ്‌

ഏറെ പ്രണയത്തോടെ അവൻ മീശ കടിച്ചുകൊണ്ട് ചോദിച്ചു. അവളൊന്നും മറുപടി പറയാതെ അവന്റെ മുഖത്തേക്ക് നോക്കി.

അവൻ അവളുടെ ചുണ്ടകളിൽ വിരൽ തൊട്ടു കാണിച്ചു.

” ഇത് വേണം..!

ഏറെ പ്രണയത്തോടെ പറഞ്ഞവൻ

” എന്റെ പൊന്നു ഇച്ചായ കുറച്ചുസമയം അടങ്ങിയിരിക്കെ,
ആരെങ്കിലും കണ്ടോണ്ടു വന്നാൽ അതുമതി.

” നീയല്ലേ ചോദിച്ചത് എന്തുവേണമെന്ന്..? ആവശ്യമുള്ളത് പറഞ്ഞപ്പോൾ ഇപ്പോ അതും കുഴപ്പമായോ.?

അവൻ അവളുടെ മുഖത്തേക്ക് നോക്കി പറഞ്ഞു.

“വൈകുന്നേരം കാണാം, പോരെ…!

ചിരിയോടെ അവൾ പറഞ്ഞപ്പോൾ അവൻ ഒന്ന് ചിരിച്ചു

“പോതും പോതും…!

അവൻ തലയാട്ടി എഴുന്നേറ്റിരുന്നു.

” ഞാൻ ഹോസ്റ്റലിനു മുൻപിൽ കൊണ്ട് വിടാം

വാതിൽക്കൽ എത്തി തിരിഞ്ഞവൻ പറഞ്ഞപ്പോൾ അവൾ ചിരിയോടെ തലയാട്ടി.

കുറച്ച് സമയം കഴിഞ്ഞാണ് ജോണിയെ സണ്ണി തിരിച്ചു വിളിച്ചത്. അപ്പോൾ അയാൾ കോളേജിൽ നിൽക്കുകയായിരുന്നു എങ്കിലും അയാൾ പെട്ടെന്ന് തന്നെ ഫോൺ എടുത്തു.

” കുറച്ചു തിരക്കിലായിരുന്നു ജോണി, അതാ ഞാൻ തിരിച്ചു വിളിക്കാൻ താമസിച്ചത്..

അയാൾ ക്ഷമാപണം നടത്തി.

” സാരമില്ല ഞാനിവിടെ കോളേജിൽ നിൽക്കുക ആണ് സണ്ണി. അഡ്മിഷന്റെ കാര്യങ്ങളൊക്കെ ശരിയാക്കാൻ വേണ്ടി.

,” ഞാൻ അങ്ങോട്ട് വരാം

സണ്ണി പറഞ്ഞു

” വേണ്ട ആശുപത്രിയിൽ തിരക്കല്ലേ..? ഇവിടുത്തെ കാര്യങ്ങളൊക്കെ കഴിഞ്ഞ് ഞാൻ ഹോസ്പിറ്റലിൽ വന്ന് സണ്ണിയെ കാണാം…

“ഓക്കേ,മരിയയെ കാണാൻ പോകുന്നുണ്ടോ?

സണ്ണി ചോദിച്ചപ്പോൾ പെട്ടെന്ന് എന്ത് മറുപടി പറയണമെന്ന് ജോണിക്കറിയില്ലായിരുന്നു.

” പിന്നെ അവളെ കാണണം, അതും കൂടി ഉദ്ദേശിച്ച ഞാൻ ഇങ്ങോട്ട് വന്നത്.

അങ്ങനെ മറുപടി പറയാനാണ് അയാൾക്ക് തോന്നിയത്. താൻ അവൾക്ക് കൂടി പരിഗണന കൊടുക്കുന്നുണ്ടെന്നും അവളെ കൂടി സ്നേഹിക്കുന്നുണ്ടെന്നും അവരെ മനസ്സിലാക്കേണ്ടത് തന്റെ കടമയാണ്..

മരിയയെ അവർക്കെല്ലാം വലിയ ഇഷ്ടമാണ്. അവളോട് താൻ ഇഷ്ടക്കേട് കാണിക്കുകയാണെങ്കിൽ ചിലപ്പോൾ അത് താൻ ഉദ്ദേശിച്ച കാര്യം നല്ല രീതിയിൽ നടക്കാനുള്ള സാധ്യതയെ കെടുത്തുമെന്ന് അയാൾക്ക് തോന്നിയതുകൊണ്ട് ആണ് അങ്ങനെ പറഞ്ഞത്

” ശരി, എങ്കിൽ ഒരു കാര്യം ചെയ്യ് പരിപാടികളൊക്കെ കഴിഞ്ഞിട്ട് സണ്ണി ഇവിടേക്ക് വന്നാൽ മതി…

” ശരി ജോണി..

കാര്യങ്ങളൊക്കെ നടക്കട്ടെ,

അത്രയും പറഞ്ഞ് അയാൾ ഫോൺ വച്ചപ്പോൾ അഡ്മിഷന്റെ കാര്യങ്ങളെക്കുറിച്ച് വീണ്ടും സംസാരിക്കുകയായിരുന്നു പ്രിൻസിപ്പാളുമായി ജോണി.

ഉച്ചയ്ക്കുശേഷം പ്രാക്ടിക്കൽ ആയിരുന്നു മരിയയ്ക്ക്. അതുകൊണ്ടു തന്നെ അവനെ കാണാനും സാധിച്ചില്ല. ഒരു ഇംപോർട്ടന്റ് കേസ് ഉണ്ട് എന്നും ഓപ്പറേഷൻ തീയേറ്ററിൽ ആണ് എന്നും അവൻ മെസ്സേജ് ചെയ്തിരുന്നത് കൊണ്ട് അവനെ ബുദ്ധിമുട്ടിക്കേണ്ട എന്ന് കരുതി അവൾ പിന്നെ വിളിക്കുവാനും നിന്നില്ല. ക്ലാസ് കഴിഞ്ഞ് പോകുന്നതിനു മുൻപ് അവൾ ഫോൺ എടുത്തു നോക്കി വിളിക്കണോ വേണ്ടയോ എന്ന് മടിച്ചു നിന്നപ്പോഴാണ് അവന്റെ മെസ്സേജ് വന്നത്.

” ഇന്ന് കാണാൻ പറ്റില്ല… സോറി അർജന്റ് മീറ്റിംഗ് ഉണ്ട്..

” സാരമില്ല

എന്ന് അവൾ തിരിച്ച് റിപ്ലൈ ചെയ്തു. അവൻ ഉടനെ തന്നെ കരയുന്ന ഒരു സ്മൈലി അയച്ചു. അത് കാണെ അവൾക്ക് ചിരിയാണ് വന്നത്.

ചിരിയോട് ഫോൺ ഓഫ് ചെയ്ത് ബാഗിൽ ഇട്ട് അവൾ ബസ്റ്റോപ്പിലേക്ക് നടക്കുമ്പോഴാണ് സണ്ണി എതിരെ വരുന്നത് കണ്ടത്…

” മോളുടെ ക്ലാസിന്ന് നേരത്തെ കഴിഞ്ഞൊ..?

ഏറെ സ്നേഹത്തോടെ അയാൾ ചോദിച്ചു…

” ഇന്ന് പ്രാക്ടിക്കൽ ആയിരുന്നു അങ്കിൾ, അത് കഴിഞ്ഞു. ഞാൻ ഹോസ്റ്റലിലേക്ക് പോവുകയായിരുന്നു..

” നാളെ മോള് വീട്ടിലേക്ക് വരുന്നുണ്ടെന്ന് അമല പറഞ്ഞു. മോളോട് വരുന്ന കാര്യം പ്രത്യേകം പറയണമെന്നും അവൾ പറഞ്ഞു വിട്ടിരുന്നു.

” ആന്റി എന്നോട് പറഞ്ഞിരുന്നു ശനിയാഴ്ച ദിവസം വീട്ടിലേക്ക് വരണം എന്ന്.

” എങ്കിൽ പിന്നെ നാളെ ക്ലാസ്സ് കഴിയുമ്പോ മോള് എന്റെ ഓഫീസിലേക്ക് വന്നാൽ മതി. നമുക്ക് ഒരുമിച്ച് പോകാം…

” ശരി മോളെ…! ചായ കുടിച്ചോ..?

” വേണ്ടങ്കിൾ ഹോസ്റ്റലിൽ ഉണ്ട്. ഞാൻ ചെന്നിട്ട് കുടിച്ചോളാം

” സാരമില്ല…

“ഞാൻ ഒരു ചായയും കുടിച്ച് മോളെ കാണാമെന്ന് കരുതി ഇറങ്ങിയത് ആണ്.

” നമുക്ക് ഒരു ചായ കുടിച്ചിട്ട് പോകാം.

അയാളവളെ വിളിച്ചു കൊണ്ട് പോയി… അവൾക്ക് ചായയും വടയും ഒക്കെ വാങ്ങി കൊടുത്തു

” ജോണി വന്നിട്ടുണ്ട്..

അവൾ പെട്ടെന്ന് ഞെട്ടലോടെ അയാളുടെ മുഖത്തേക്ക് നോക്കി.

” പപ്പയോ..?

” ഇവിടെ വന്നോ..?

അവൾ ചോദിച്ചു

” ഇവിടെ വന്നില്ല, മോൾടെ ഇളയ കുട്ടിയുടെ അഡ്മിഷൻ ശരിയാക്കാൻ കോളേജിൽ എവിടെയോ നിൽക്കാണ് എന്നാണ് പറഞ്ഞത്..

” അഡ്മിഷനോ ആർക്ക്..?

മനസ്സിലാവാതെ ചോദിച്ചു

” ജോണിയുടെ രണ്ടാമത്തെയാൾ ഇല്ലേ.? ആ കുട്ടിക്ക് വേണ്ടി ആണെന്ന് പറഞ്ഞത്.

സണ്ണി എപ്പോഴും അങ്ങനെയാണ് ജോണിക്ക് മൂന്നു മക്കൾ ഉണ്ട് എന്ന് രീതിയിലാണ് അവളോട് സംസാരിച്ചിട്ടുള്ളത്. അവളാണ് മൂത്തമകൾ എന്ന് എപ്പോഴും ഊന്നി പറയുകയും ചെയ്യും. എന്നാൽ ആ വീട്ടിൽ തനിക്ക് അങ്ങനെയൊരു സ്ഥാനമില്ലെന്ന് വ്യക്തമായി തനിക്കറിയാം സണ്ണിക്കുമാ വിവരം അറിയാം.. തന്നെ ആശ്വസിപ്പിക്കുവാൻ വേണ്ടിയും താൻ ഒറ്റയ്ക്കല്ല എന്ന് അറിയിപ്പിക്കാൻ വേണ്ടിയും ആണ് ഇടയ്ക്കിടെ ജോണിയുടെ മൂത്തമകൾ എന്ന് തന്നെ സംബോധന ചെയ്യുന്നത്.

” ജീനയേ ഇവിടെ പഠിപ്പിക്കുമെന്ന് ഞാൻ വിചാരിച്ചില്ല.

” ചിലപ്പോൾ മോളും കൂടി ഇവിടെ ഉണ്ടല്ലോ, ഒരു നോട്ടം ചെല്ലുമല്ലോ എന്ന് വിചാരിച്ചിട്ട് ആവും.. എന്നേ കാണാൻ വൈകുന്നേരം വരും എന്ന് പറഞ്ഞിരുന്നു. മോളെ കാണണം എന്നാ പറഞ്ഞത്. സാരമില്ല അയാൾ ഇവിടെ വരുന്നത് വരെ വെയിറ്റ് ചെയ്യണ്ട. ഇപ്പോൾ തന്നെ സമയം ഒരുപാട് ആയി. ആ വാർഡൻ ആണെങ്കിൽ ഒരു ജാതി സ്വഭാവമുള്ള സ്ത്രീയാ. നേരത്തെ ചെന്നില്ലെങ്കിൽ അവർക്ക് ഇഷ്ടപ്പെടത്തില്ല. ജോണി വരികയാണെങ്കിൽ അയാളെയും കൂട്ടി ഞാൻ ഹോസ്റ്റലിലേക്ക് വന്നേക്കാം.

” ശരി അങ്കിൾ…

അവൾക്ക് വീണ്ടും തന്നോട് എന്തോ ചോദിക്കാനുണ്ടെന്ന് ആ മുഖം വിളിച്ചു പറഞ്ഞു.

ഇടയ്ക്കിടെ അവൾ തന്റെ മുഖത്തേക്ക് നോക്കുന്നുണ്ട്.

, ” എന്താ മോളെ..?

അയാൾ അരുമയോടെ അവളുടെ മുഖത്തേക്ക് നോക്കി ചോദിച്ചു.

“അമ്മ…. അമ്മ വന്നിട്ടുണ്ടോ..?

പ്രതീക്ഷയോടെയാണ് ആ ചോദ്യം. ഒരു അമ്മയുടെ സ്നേഹം അവൾ എത്രത്തോളം ആഗ്രഹിക്കുന്നുണ്ടെന്ന് ആ വാക്കുകളിൽ നിന്ന് തന്നെ സണ്ണിക്കു മനസ്സിലാക്കാൻ സാധിച്ചു. അവളോട് അയാൾക്ക് വല്ലാത്ത സഹതാപം തോന്നിയിരുന്നു. സ്വന്തം അമ്മയുടെ വിവരം മറ്റൊരാളിനോട് ചോദിച്ചറിയേണ്ടിവരുന്ന ഒരു മകളുടെ ഗതികേട്.

” അറിയില്ല മോളെ… എന്നോട് പറഞ്ഞില്ല, മോളെ ബെറ്റി വിളിക്കാറില്ലേ.?

രണ്ടും കൽപ്പിച്ച് അയാൾ അവളുടെ മുഖത്തേക്ക് നോക്കി ചോദിച്ചു.

അവളില്ല എന്ന് തല അനക്കി.. അയാൾ ഒന്നും മിണ്ടാതെ വാൽസല്യത്തോടെ അവളുടെ മുടിയിൽ തഴുകി

………കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…