🎶 സോളമന്റെ ഉത്തമഗീതം 🎶❤️: ഭാഗം 63

രചന: റിൻസി പ്രിൻസ്‌

നിനക്കെന്തിന്റെ അസുഖം ആണ് അമലേ. ഇതിനെ ഒന്നും വീട്ടിൽ കയറ്റാൻ കൊള്ളില്ലാത്തതാ. അവസാനം ഇത് നിനക്ക് തന്നെ പാര ആയിട്ട് വരും. ഞാൻ പറഞ്ഞില്ലെന്ന് വേണ്ട.

ദേഷ്യത്തോടെ അമ്മച്ചി പറഞ്ഞു

” അമ്മച്ചി പറയുന്നത് പോലെ ആ പെൺകൊച്ച് ഒരു മോശം സ്വഭാവമുള്ള കൊച്ചോന്നുമല്ല. എന്തൊരു വിനയം ആണെന്ന് അറിയോ.? എനിക്ക് ഭയങ്കര ഇഷ്ടമാണ്. എല്ലാ കാര്യങ്ങളും നന്നായിട്ട് ചെയ്യും. എല്ലാവരോടും സംസാരിക്കാൻ ആണെങ്കിലും ഇടപെടാൻ ആണെങ്കിലും ആ കൊച്ചിന് നന്നായി അറിയാം.

പിന്നെ അതിന്റെ സാഹചര്യം കൂടി ഒന്ന് ഓർത്തു നോക്കു. ആരും അതിനെ ഒന്ന് സ്നേഹിച്ചിട്ട് പോലുമില്ല. നല്ലൊരു തുണി പോലും ഇല്ല അവൾക്ക്.

അവളുടെ അമ്മയെ ഒരു തെറ്റ് ചെയ്തു എന്നും പറഞ്ഞു അതിൽ അവൾ എന്തു പിഴിച്ചു.? അമ്മച്ചി അവളെ വിഷമിപ്പിക്കുന്നത് ശരിയല്ല. അമ്മച്ചി അവളെ ഓരോന്ന് പറഞ്ഞ് വിഷമിപ്പിക്കരുത്.

അമല പറഞ്ഞു

” നിനക്ക് അത്രയ്ക്ക് ഇഷ്ടമാണെങ്കിൽ നീ നിന്റെ മോനെ അവന് കെട്ടിച്ചു കൊടുക്ക്. അപ്പൊ പിന്നെ എന്നും അവൾ ഇവിടെ കാണുമല്ലോ…..

അമ്മച്ചി അത് പറഞ്ഞപ്പോൾ അമല അവരെയൊന്ന് രൂക്ഷമായി നോക്കി.

” അമ്മച്ചി എന്തിനാ ഈ ഒരു രീതിയിൽ മാത്രം ചിന്തിക്കുന്നത്.

” എടി എന്തൊക്കെ പറഞ്ഞാലും തള്ളയുടെ സ്വഭാവം കുറച്ചെങ്കിലും അവളുടെ കൈയിൽ കാണാതിരിക്കുമോ.? ആണുങ്ങളെ വളക്കാനും വശീകരിക്കാനും ഒക്കെ അവൾക്ക് നന്നായിട്ട് അറിയാം. അതുകൊണ്ട ഞാൻ പറഞ്ഞത്.

” ഇവിടെ ഒരു ചെറുക്കൻ ഉണ്ട്. നീ അവളെ ഇടയ്ക്കിടയ്ക്ക് ഇവിടെ വിളിച്ചു നിർത്തുന്നത് അത്ര നല്ലതല്ല

” എന്റെ മോനെയും അവളെയും എനിക്ക് നന്നായിട്ടറിയാം. അമ്മച്ചി അതിന് വേറെ അർഥങ്ങൾ ഒന്നും ഉണ്ടാക്കാൻ നിക്കണ്ട.

താല്പര്യമില്ലാതെ അത്രയും പറഞ്ഞ് അമല അകത്തേക്ക് പോയപ്പോൾ ദേഷ്യത്തോടെ അവളെ തന്നെ സൂക്ഷിച്ചു നോക്കുകയായിരുന്നു ആ സമയത്ത് അമ്മച്ചി.

വല്യമ്മച്ചി വന്നിട്ടുണ്ട് എന്ന് അറിഞ്ഞപ്പോൾ മുതൽ വീട്ടിലേക്ക് അവളെ കൊണ്ടുവരുന്നതിനോട് വലിയ താല്പര്യമുണ്ടായിരുന്നില്ല സോളമന്.

എങ്കിലും അവളോടെ എങ്ങനെ പറയാനാണ്. അതുകൊണ്ട് അവൻ വല്യമ്മച്ചി വന്നിട്ടുണ്ടെന്ന് മാത്രം അവൾക്ക് മെസ്സേജ് അയച്ചു. അതറിഞ്ഞപ്പോൾ മുതൽ വീട്ടിലേക്ക് പോകാൻ അവൾക്കും വലിയ താല്പര്യമുണ്ടായിരുന്നില്ല.

” ഞാൻ വരണോ ഇച്ചായ.?

എന്ന് അവൾ മെസ്സേജ് ചെയ്തപ്പോൾ വരണ്ട എന്ന് പറയാൻ സോളമന് തോന്നിയില്ല.

കാരണം അവളുടെ സാന്നിധ്യം അത്രമേൽ അവനും ആഗ്രഹിക്കുന്നുണ്ടല്ലോ.

” അതെന്താ വരണോ എന്നൊരു ചോദ്യം ?

അവൻ തിരിച്ചു ചോദിച്ചു

” അമ്മച്ചി എന്തെങ്കിലുമൊക്കെ പറഞ്ഞാൽ അത് പിന്നെ എനിക്ക് വിഷമമാവില്ലേ.?

” ഞാനവിടെ ഉള്ളപ്പോൾ ആരും നിന്നെ ഒന്നും പറയാൻ പോകുന്നില്ല.

ഉറച്ചതായിരുന്നു അവന്റെ മറുപടി.

അവന്റെ ആ മറുപടിക്ക് മുൻപിൽ താനെന്ത് തിരിച്ചു പറയണമെന്ന് അറിയാതെ അവളും നിന്നു.

വൈകുന്നേരം ക്ലാസ് കഴിഞ്ഞപ്പോൾ സണ്ണിക്കൊപ്പമാണ് അവൾ സോളമന്റെ വീട്ടിലേക്ക് പോകാൻ തയ്യാറെടുത്തത്.

ശരീരത്തിലൂടെ ഒരു വിറയൽ പടരുന്നത് അവൾ അറിയുന്നുണ്ടായിരുന്നു. അങ്ങോട്ടുള്ള യാത്രയിൽ സണ്ണി എന്തൊക്കെയോ വിശേഷങ്ങൾ ചോദിക്കുന്നുണ്ടെങ്കിലും ഒന്നും വ്യക്തമായി പറയാൻ അവൾക്ക് കഴിയുന്നുണ്ടായിരുന്നില്ല.

ഫ്ലാറ്റിനു മുൻപിലെത്തി സണ്ണി കോളിംഗ് ബെൽ അമർത്തി. അപ്പോഴും മറ്റ് എന്തോ ചിന്തിച്ചുകൊണ്ട് നിൽക്കുകയായിരുന്നു അവൾ.

“മോൾ എന്താണ് ആലോചിക്കുന്നത്.? അവളെ നോക്കി സണ്ണി ചോദിച്ചു.

“ഒന്നുമില്ല അങ്കിൾ

അവൾ പറഞ്ഞു. അവളുടെ മുഖം കണ്ടപ്പോൾ തന്നെ അയാൾക്ക് കാര്യം മനസ്സിലായി.

” അമ്മച്ചി ഇവിടെ ഉണ്ടെന്ന് പറഞ്ഞതുകൊണ്ടാണോ.? അതൊന്നും കാര്യമാക്കണ്ട, പ്രായമായ ആളുകളല്ലേ. എന്നെ തന്നെ എന്തൊക്കെ പറയുന്നു. ചിലപ്പോൾ ഞാൻ നല്ല മറുപടി പറയും. ചിലതോന്നും കേട്ടില്ല എന്ന് കരുതും. അങ്ങനെ വിചാരിച്ചാൽ പ്രശ്നമില്ലല്ലോ.

ചിരിയോടെ അയാൾ പറഞ്ഞതും വാതിൽ തുറന്നതും ഒരുമിച്ചായിരുന്നു.

അമലയെ മുൻപിൽ കണ്ടപ്പോൾ തന്നെ അവൾക്ക് പകുതി ആശ്വാസമായി. അവളെ കണ്ടതും ഏറെ സ്നേഹത്തോടെ അമല അവളെ ചേർത്തുപിടിച്ചു.

” കുറച്ചുദിവസം കൊണ്ട് നീ അങ്ങ് ക്ഷീണിച്ചു പോയല്ലോടി കൊച്ചേ,

അവളുടെ മുഖത്ത് ഒക്കെ തഴുകി വളരെ വാത്സല്യത്തോടെയാണ് അവർ പറഞ്ഞത്.

അത് മാത്രം മതിയായിരുന്നു മറ്റെല്ലാ വേദനകളും അവൾക്കു മറക്കാൻ.

” നിന്നെ കുറച്ചുദിവസം കാണാഞ്ഞു എനിക്ക് വലിയ വിഷമമായിരുന്നു. ഹോസ്റ്റലിലോട്ട് വന്നൊന്ന് കണ്ടാലോ എന്ന് ഓർത്തതാ. പിന്നെ ഇച്ചായൻ പറഞ്ഞു ആ വാർഡന് അങ്ങനെ ഇടയ്ക്ക് ചെന്ന് കാണുന്നത് ഇഷ്ടമല്ലെന്ന്. അതുകൊണ്ട വരാതിരുന്നത്. മോള് വാ…

ഏറെ സന്തോഷത്തോടെ അവളെയും വിളിച്ചുകൊണ്ട് അമല അകത്തേക്ക് കയറിയപ്പോൾ അവളുടെ മനസ്സ് നിറഞ്ഞിരുന്നു.

” ഞാൻ ചായ എടുക്കാം

അമല പറഞ്ഞു

“ഞാനും വരാം

അവൾ അമലയ്ക്ക് പിന്നാലെ അടുക്കളയിലേക്ക് ചെന്നു. ഫ്രിഡ്ജ് തുറന്ന് അമല പാൽ എടുത്തപ്പോഴേക്കും അവൾ പാത്രം കഴുകാൻ തുടങ്ങി.

” നീ അതൊക്കെ അവിടെ വച്ചേ, വന്നപ്പോഴേ ജോലി തുടങ്ങിയോ? നീ ആദ്യം വിശേഷങ്ങളൊക്കെ പറ, ഹോസ്റ്റലിന്റെയും കോളേജിന്റെയും ഒക്കെ… ഞാൻ നിനക്ക് ഒരു ഫോൺ വാങ്ങി തരാം. നമുക്ക് ഇടയ്ക്ക് ഫോൺ വിളിക്കാല്ലോ. ഞാൻ ഇന്നലെ ആ കാര്യത്തെക്കുറിച്ച് ഓർത്തത്.

അമല തിളച്ച ചായയിൽ ഏലക്കയും തേയിലയും ഇട്ട് പറഞ്ഞു

” അയ്യോ വേണ്ട, എന്റെ ഒരു ഫ്രണ്ട് അവളുടെ ഒരു പഴയ ഫോൺ എനിക്ക് തരാമെന്ന് പറഞ്ഞിട്ടുണ്ട്. അത് കിട്ടുമ്പോൾ ഞാൻ ആന്റിയെ അങ്ങോട്ട് വിളിക്കാം. നമ്പർ എഴുതി തന്നാൽ മതി.

“ആണോ എന്നാപ്പിന്നെ അതുമതി. അത് ഉടനെയെങ്ങാനും കിട്ടുമോ.?

” അവളെ അടുത്ത ആഴ്ച കൊണ്ട് തരാന്നാ പറഞ്ഞത്.

സോളമൻ വാങ്ങിയ ഫോൺ പെട്ടെന്ന് കാണിക്കാൻ പറ്റാത്തതുകൊണ്ട് അവൾ പറഞ്ഞു.

അമല അപ്പോഴേക്കും ചായ ഇട്ട് അവൾക്ക് നേരെ നീട്ടി.

” അങ്കിളിന് ആദ്യം കൊടുക്ക്

” അങ്കിളിന് ഒക്കെ ഞാൻ കൊടുത്തോളാം. നീ ആദ്യം കുടിക്ക്. ക്ഷീണിച്ചു വന്നതല്ലേ.

ചായ കുടിക്കുന്നതിനിടയിൽ അവൾക്ക് ബിസ്കറ്റും എണ്ണ പലഹാരങ്ങളും ഒക്കെ എടുത്തു കൊടുക്കുന്നുണ്ടായിരുന്നു അമല. ഒരു അമ്മയുടെ വാത്സല്യത്തോടെ…

അപ്പോഴാണ് അടുക്കളയിലേക്ക് വല്യമ്മച്ചി വരുന്നത് കണ്ടത്.. അവൾ പെട്ടെന്ന് ഇരുന്നിടത്തു നിന്നും എഴുന്നേറ്റു അമലയൊന്നു നോക്കി.

” മോളെ ആശുപത്രി വച്ച് കണ്ടത് ഓർക്കുന്നില്ലേ.? എന്റെ അമ്മച്ചി,

ഭാവഭേദം ഒന്നുമില്ലാതെ അമല മരിയയോട് പറഞ്ഞു.

അവൾ അതെന്നർത്ഥത്തിൽ തലയാട്ടി.

അമ്മച്ചി അവളെ തന്നെ ആകെ ഉഴിഞ്ഞു നോക്കി. കാണാനൊക്കെ ഒരു ഭംഗിയുണ്ട്. അത് അവരിൽ ഭയം വർധിപ്പിച്ചു.

” അമ്മച്ചി ഇരിക്ക് ഞാൻ ചായ തരാം…

അമല പറഞ്ഞു അപ്പോൾ അവർ അവളെ ഒന്ന് സൂക്ഷിച്ചു നോക്കി. ഒന്നും മിണ്ടാതെ അവർ പുറത്തേക്കിറങ്ങി.

അവർ പോയപ്പോൾ വലിയൊരു ആശ്വാസം തോന്നിയിരുന്നു മരിയയ്ക്ക്.

, ” നീ പേടിക്കണ്ട, അമ്മച്ചി ഒന്നും പറയത്തില്ല. ഒന്നും നിന്നേ പറയല്ലേ എന്ന് ഞാൻ പ്രത്യേകം പറഞ്ഞിട്ടുണ്ട്.

അവളുടെ മുഖത്തേക്ക് നോക്കി അമല പറഞ്ഞപ്പോൾ അവൾ ഒന്ന് ചിരിച്ചു കാണിച്ചു.

വീണ്ടും കുറച്ച് സമയങ്ങൾക്ക് ശേഷമാണ് സോളമനെത്തിയത് മനപ്പൂർവം അവൻ താമസിച്ചതാണ്. ആർക്കും സംശയം തോന്നണ്ട എന്ന് കരുതി. വന്നപ്പോൾ കയ്യിൽ വലിയൊരു കവറും ഉണ്ടായിരുന്നു. അത് അമലയുടെ കയ്യിലേക്ക് അവൻ കൊടുത്തു.

” ഇതെന്നെടാ..?

” ചെട്ടിനാട് ബിരിയാണി..!

അവൻ പറഞ്ഞു.

” വല്യമ്മച്ചി ഒക്കെ വന്നതല്ലേ സ്പെഷ്യൽ ആയിട്ട് എന്തെങ്കിലും ഇരിക്കട്ടെ എന്ന് വിചാരിച്ചു.

അങ്ങനെയാണ് പറഞ്ഞതെങ്കിലും നോട്ടം ചെന്നെത്തിയത് മരിയയിലേക്കാണ്. ഒരിക്കൽ പുറത്തു പോയപ്പോൾ അവൾ ആസ്വദിച്ച് ആ ഭക്ഷണം കഴിക്കുന്നത് അവൻ കണ്ടിരുന്നു. അവൾക്ക് അത് വളരെയധികം ഇഷ്ടമായി എന്നും അവനും മനസ്സിലായി. അതുകൊണ്ടാണ് ഇന്ന് ഇത് വാങ്ങിയത്. അത് മരിയയ്ക്കും നന്നായി മനസ്സിലായി. അവളുടെ ചോടിയിൽ ആരും കാണാതെ ഒരു ചിരി മിന്നി.

” അത് കാര്യമായി, വൈകിട്ടത്തേക്ക് ഒന്നുമുണ്ടായിരുന്നില്ല, ഞാൻ ഇനി ചപ്പാത്തി ഉണ്ടാക്കണല്ലോ എന്ന് വിചാരിച്ചിരിക്കുകയായിരുന്നു.. ആശ്വാസത്തോടെ അമല പറഞ്ഞു.

” അല്ലെങ്കിലും എന്റെ ചെറുക്കൻ എനിക്ക് വേണ്ടി എന്തെങ്കിലും കൊണ്ടുവരുമെന്ന് എനിക്കറിയായിരുന്നു.

അഭിമാനത്തോടെ വല്യമ്മച്ചി പറഞ്ഞപ്പോൾ നന്നായി ഒന്ന് ചിരിച്ചു കാണിച്ചിരുന്നു.

തിരികെ മുറിയിലേക്ക് പോകും നേരം ആരും കാണാതെ അവളുടെ വിരൽത്തുമ്പിൽ ഒന്ന് പിടിക്കാൻ അവൻ മറന്നില്ല………..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…