🎶 സോളമന്റെ ഉത്തമഗീതം 🎶❤️: ഭാഗം 72

രചന: റിൻസി പ്രിൻസ്‌

ഇവിടെ പറ്റില്ല. ഇത് എന്റെ ഭർത്താവും ഞാനും കൂടി കഷ്ടപ്പെട്ടുണ്ടാക്കിയ വീട്. ഇവിടെ ആരൊക്കെ താമസിക്കണമെന്ന് ഞങ്ങൾ തീരുമാനിക്കും.ഇവിടെ ഇവളെ നിർത്താൻ പറ്റില്ല..

മറുപടി പറഞ്ഞത് അമലയായിരുന്നു.

അമലയുടെ ആ വെളിപ്പെടുത്തലിൽ മരിയയും സണ്ണിയും സോളമനും ഒക്കെ ഞെട്ടിപ്പോയിരുന്നു.

“മമ്മ….

വിശ്വാസം വരാത്തതുപോലെ
അവൻ ഒരിക്കൽ കൂടി അവരെ വിളിച്ചു….

ഒരു ഭാവ വ്യത്യാസവും വരാതെ അമല ദേഷ്യത്തോടെ അവനെ നോക്കി..

” ഇനിമേലിൽ നീ എന്നെ അങ്ങനെ വിളിക്കരുത്..

അമല അത് പറഞ്ഞപ്പോൾ വല്ലാത്തൊരു വിഷമം തന്നെയാണ് അവന് തോന്നിയത്.

പക്ഷേ അവനത് പ്രകടിപ്പിച്ചില്ല.

” ആരോരുമില്ലാതെ വിഷമിക്കുന്നത് കണ്ടപ്പോൾ നിന്റെ അമ്മ വിളിച്ചു പറഞ്ഞപ്പോൾ രക്ഷപ്പെടുന്നെങ്കിൽ രക്ഷപ്പെട്ടോട്ടെ എന്ന് കരുതിയ ഞാൻ ഇങ്ങോട്ട് കൊണ്ടുവന്നത്. എന്റെ സ്വന്തം മോളെ പോലെ ആണ് ഞാൻ ഇവിടെ നിന്നെ നിർത്തിയത്. അത് എന്റെ മോന്റെ ഭാര്യയായി ഇവിടെ കഴിയാൻ വേണ്ടി ആയിരുന്നില്ല. എന്റെ സ്വന്തം അമ്മ പോലും എന്നോട് പറഞ്ഞു, എന്തു ഉദ്ദേശിച്ച നിന്നെ ഞാൻ ഇവിടെ നിർത്തിയിരിക്കുന്നത് എന്ന്. അപ്പോഴൊന്നും ഞാൻ ആർക്കും മറുപടി കൊടുത്തില്ല. നിന്നെ എനിക്ക് വിശ്വാസമായിരുന്നു.! എന്റെ മോനെ തന്നെ നീ കൈവശപ്പെടുത്തുമെന്ന് ഞാൻ വിചാരിച്ചില്ല….

അമല കൂടി അങ്ങനെ പറഞ്ഞപ്പോഴേക്കും തകർന്നു പോയിരുന്നു മരിയ

“മമ്മ…

അല്പം ദേഷ്യത്തോടെ എന്നാൽ ശാസനയോടെയാണ് സോളമൻ അമലയേ താക്കീത് ചെയ്തത്..

” എന്താടാ അവളെ പറഞ്ഞപ്പോൾ നിനക്ക് സഹിക്കാൻ പറ്റുന്നില്ലേ..?

ദേഷ്യത്തോടെ മകനോട് അമല ചോദിച്ചു

” ഞാൻ എത്ര തവണ പറഞ്ഞു അവളുടെ കുറ്റമല്ല എന്റെ കുഴപ്പമാണെന്ന്, അവൾ പലതവണ പറ്റില്ലെന്ന് പറഞ്ഞപ്പോൾ ഞാനാ അവളുടെ പിന്നാലെ നടന്നതും അവളെ ഇതിലേക്ക് വലിച്ചിട്ടതും പിന്നെ മമ്മി എന്തിനാ അവളുടെ കുറ്റമായിട്ട് അത് പറയുന്നത്. കുറ്റം ചെയ്തെങ്കിൽ അവളെ പോലെ തന്നെ ഞാനും തെറ്റുകാരനല്ലേ.? എന്നെ വഴക്കു പറയാതെ അവളെ മാത്രം എന്തിനു മമ്മ കുറ്റപ്പെടുത്തുന്നത്.

സോളമൻ പറഞ്ഞു

” ജോണി എത്രയും പെട്ടെന്ന് നിങ്ങളുടെ മകളെയും വിളിച്ചുകൊണ്ട് നിങ്ങൾ ഇവിടെ നിന്നും പോകണം.

അമല ജോണിയോട് അങ്ങനെ പറഞ്ഞപ്പോൾ അമ്പരന്നു പോയിരുന്നു സണ്ണിയും. അവളിൽ നിന്നും അങ്ങനെയൊരു പ്രതികരണം പ്രതീക്ഷിച്ചിരുന്നില്ല അയാളും.

” അമല നീ ഒന്ന് കൂൾ ആവു

സണ്ണി പറഞ്ഞു

” നോക്കിനിൽക്കാതെ എന്താണെന്ന് വെച്ചാൽ എടുത്തിട്ട് വരാൻ നോക്കടി,

മരിയയോട് ആയി ജോണി പറഞ്ഞു

” ഞാൻ സമ്മതിക്കില്ല മമ്മ!

സോളമെന്റേത് ഉറച്ച തീരുമാനമായിരുന്നു.

“ഇവൾ ഇവിടുന്ന് പോകാൻ ഞാൻ സമ്മതിക്കില്ല!

” പിന്നെ എന്താ നിന്റെ തീരുമാനം.? ഇവളെ കല്യാണം കഴിച്ച് ഇവിടെ താമസിക്കാനോ.?

ദേഷ്യത്തോടെ അവന്റെ അരികിലേക്ക് വന്നുകൊണ്ട് അമല ചോദിച്ചു

” പിന്നെ ഞാൻ വെറുതെ ഫ്ലർട്ട് ചെയ്യാൻ വേണ്ടി അവളെ സ്നേഹിച്ചതാണെന്നാണോ അമ്മ കരുതിയത്. അവളോട് ഇഷ്ടമാണെന്ന് പറഞ്ഞ നിമിഷം തന്നെ ഞാൻ അവൾക്കൊരു വാക്ക് കൊടുത്തിരുന്നു. ജീവിതകാലം മുഴുവൻ ഞാൻ അവളുടെ ഒപ്പം ഉണ്ടാകുമെന്ന്. എനിക്ക് ആ വാക്ക് പാലിച്ചേ പറ്റൂ.

മകന്റെ വെളിപ്പെടുത്തലിൽ അമ്പരന്നു പോയിരുന്നു അമല. എങ്കിലും അവർ അമ്പരപ്പ് മറച്ച് അവർ സംസാരിക്കാൻ തുടങ്ങി.

” ഈ വിവാഹത്തിന് ഞാൻ സമ്മതിക്കില്ല.!

അമലയുടേത് ഉറച്ച മറുപടിയായിരുന്നു. ജോണിയുടെയും ജീനയുടെയും ചുണ്ടിൽ അവർ പോലും അറിയാതെ ഒരു പുഞ്ചിരി നിറഞ്ഞു. ഒപ്പം പ്രതീക്ഷയുടെ ഒരു നാളവും.

” എന്നെ എതിർത്തുകൊണ്ട് ഇവൾക്കൊപ്പം ജീവിക്കാൻ ആണെങ്കിൽ നിനക്ക് അങ്ങനെ ചെയ്യാം, പക്ഷേ പിന്നെ നിനക്ക് മമ്മി ഇല്ലെന്ന് കൂട്ടിയാൽ മതി. നമ്മൾ തമ്മിലുള്ള എല്ലാ ബന്ധങ്ങളും ഇവിടെ അവസാനിപ്പിച്ചു ഈ നിമിഷം ഇവൾക്കൊപ്പം നിനക്ക് ഇറങ്ങാം. രണ്ടിൽ എന്തു വേണമെന്ന് നിനക്ക് തീരുമാനിക്കാം,

അമല പറഞ്ഞപ്പോൾ അമ്മയും മകനും തമ്മിലുള്ള ഒരു തുറന്ന യുദ്ധമാണ് അവിടെ നടക്കുന്നത് എന്നും അതിൽ തങ്ങൾ ആരും ഇടപെടാതിരിക്കുന്നതാണ് നല്ലത് എന്നും സണ്ണിക്ക് തോന്നി.

” അമലാന്റി എത്ര കാര്യായിട്ട് നിന്നെ നോക്കിയത് എന്നിട്ട് ആന്റിയോട് തന്നെ ഇങ്ങനെ ചെയ്യാൻ നിനക്ക് എങ്ങനെ തോന്നി.?

അമലയുടെ ദേഷ്യത്തിന് കൂടുതൽ എരിവ് പകരാൻ ജീന ശ്രമിച്ചപ്പോൾ കൈ മടക്കിയൊന്നു കൊടുക്കാനാണ് സോളമന് തോന്നിയത്. പക്ഷേ അവൻ സ്വയം നിയന്ത്രിച്ചു.

” നീ ഇത്രയ്ക്ക് നന്ദികെട്ടവൾ ആണ് എന്ന് ഞാനും അറിഞ്ഞില്ല.

മരിയയുടെ മുഖത്തേക്ക് നോക്കി അമല പറഞ്ഞു

” നിന്റെ തീരുമാനം എന്താണെന്ന് പെട്ടെന്ന് പറയണം സോളമാ,

അമല അവന്റെ മുഖത്തേക്ക് നോക്കി പറഞ്ഞു.

” അങ്ങനെ ഒരു തീരുമാനമാണ് മമ്മയെടുക്കുന്നതെങ്കിൽ എനിക്കും തീരുമാനം എടുത്തല്ലേ പറ്റൂ, ഞാനും മരിയയും ഇവിടുന്ന് ഇറങ്ങികോളാം..

സോളമൻ അത് പറഞ്ഞപ്പോൾ അക്ഷരാർത്ഥത്തിൽ ഞെട്ടിയത് മരിയയാണ്. തനിക്കുവേണ്ടി അവൻ അങ്ങനെ സംസാരിക്കുമെന്ന് അവൾ ഒരിക്കൽ പോലും പ്രതീക്ഷിച്ചിരുന്നില്ല. തന്നോട് സ്നേഹമാണെങ്കിലും അമ്മയോടുള്ള സ്നേഹത്തിലും വലുതായിരിക്കില്ല അതെന്നു തന്നെയാണ് പ്രതീക്ഷിച്ചത്. അവന്റെ മറുപടിയിൽ അമലയും ഞെട്ടിപ്പോയിരുന്നു.

” നിനക്ക് എന്നെക്കാളും വലുത് ഇവൾ ആണെന്നല്ലേ ആ പറഞ്ഞതിന്റെ അർത്ഥം.

സ്വരം ഇടറാതെ അമല ചോദിച്ചു.

” അർത്ഥവും വ്യാകരണവും ഒന്നും കണ്ടുപിടിക്കാൻ എനിക്ക് സമയമില്ല. പക്ഷേ ഇവളെ ഞാൻ കൈവിടില്ല.

അവളെ തന്നോട് ചേർത്തുപിടിച്ചുകൊണ്ട് അവനത് പറഞ്ഞപ്പോൾ എന്തെന്നില്ലാത്ത ദേഷ്യം ആ നിമിഷം മരിയോട് തോന്നിയിരുന്നു ജീനയ്ക്ക്

” ഞാനിവളെ കൈവിട്ടാൽ അവിടെ തോറ്റുപോകുന്നത് മമ്മ തന്നെയാണ്. ഒരിക്കൽ മമ്മ എന്നോട് പറഞ്ഞത് ഓർക്കുന്നുണ്ടോ നമ്മൾ കാരണം അവൾക്ക് ഒരു വിഷമം ഉണ്ടാവരുതെന്ന്. ഞാനിപ്പോ അവളെ ഉപേക്ഷിച്ചാൽ അതിലും വലിയൊരു ദുഃഖം അവൾക്ക് ജീവിതത്തിൽ ഉണ്ടാവാൻ പോകുന്നില്ല. മമ്മയ്ക്ക് വിഷമം വന്നാൽ പറഞ്ഞൊന്ന് കരയാൻ പപ്പ ഉണ്ട്, ഞാൻ ഉണ്ട്, വല്ല്യമ്മച്ചി ഉണ്ട്. പക്ഷേ അവൾക്ക് ആരുമില്ല.! ഇവിടെ എന്തൊക്കെ പ്രശ്നങ്ങൾ നടന്നാലും എനിക്ക് ജീവനുണ്ടെങ്കിൽ മരിയ എന്റെ ഒപ്പമുണ്ടാവും. അവളെ ഉപേക്ഷിച്ചു മുൻപോട്ടു പോകാൻ ഞാൻ തയ്യാറല്ല. ഞാൻ മോഹം കൊടുത്ത പെണ്ണാ, സ്വപ്നം കൊടുത്ത പെണ്ണാ അവളെ ഞാനായി കരയിക്കില്ല. മമ്മ എന്നോട് ക്ഷമിക്കണം….കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…