🎶 സോളമന്റെ ഉത്തമഗീതം 🎶❤️: ഭാഗം 73

രചന: റിൻസി പ്രിൻസ്‌

മമ്മയ്ക്ക് വിഷമം വന്നാൽ പറഞ്ഞൊന്ന് കരയാൻ പപ്പ ഉണ്ട്, ഞാൻ ഉണ്ട്, വല്ല്യമ്മച്ചി ഉണ്ട്. പക്ഷേ അവൾക്ക് ആരുമില്ല.! ഇവിടെ എന്തൊക്കെ പ്രശ്നങ്ങൾ നടന്നാലും എനിക്ക് ജീവനുണ്ടെങ്കിൽ മരിയ എന്റെ ഒപ്പമുണ്ടാവും. അവളെ ഉപേക്ഷിച്ചു മുൻപോട്ടു പോകാൻ ഞാൻ തയ്യാറല്ല. ഞാൻ മോഹം കൊടുത്ത പെണ്ണാ, സ്വപ്നം കൊടുത്ത പെണ്ണാ അവളെ ഞാനായി കരയിക്കില്ല. മമ്മ എന്നോട് ക്ഷമിക്കണം

സോളമൻ ആ കാര്യം തീർത്ത് പറഞ്ഞപ്പോൾ വല്യമ്മച്ചി അമ്പരപ്പോടെ അമലയുടെ മുഖത്തേക്ക് നോക്കി.

അതേസമയം തന്നെ ജോണിയും ജീനയും ഞെട്ടിപ്പോയിരുന്നു.

” ഈ കാര്യമോക്കെ നീ തന്നെയങ്ങ് തീരുമാനിച്ചാൽ മതിയോ.? ഇവളുടെ കാര്യങ്ങൾ തീരുമാനിക്കുന്നത് ഞാനാണ്. ഇവൾ ആരുടെ കൂടെ ജീവിക്കണം എന്നൊക്കെ ഞാൻ തീരുമാനിക്കും. നിന്റെ കൂടെ കെട്ടിച്ചുവിടാൻ എനിക്ക് താല്പര്യമില്ലെങ്കിലോ.?

ദേഷ്യത്തോടെ ജോണി സോളമന്റെ മുഖത്തേക്ക് നോക്കി ചോദിച്ചു.

ദേഷ്യം അവനും നിയന്ത്രിക്കാൻ കഴിയുന്നുണ്ടായിരുന്നില്ല. ഇത്രയും നേരം അവൻ സ്വയം പിടിച്ചു നിൽക്കുകയായിരുന്നു..

” പിന്നെ താൻ എന്താ കരുതിയത് തന്റെ മോളെ എന്റെ തലമണ്ടയ്ക്ക് വെച്ച് കേട്ടാന്നോ?
അതിനു വേണ്ടിയാണല്ലോ താൻ ട്രെയിനും കയറി ഇങ്ങോട്ട് വന്നത്.. താൻ ഇവളോട് ചെയ്തിട്ടുള്ള ക്രൂരതകൾ എന്തൊക്കെയാണെന്ന് ഞാൻ നേരിട്ട് കണ്ടിട്ടുള്ളത് ആണ്. ഒരു വേലക്കാരിയുടെ സ്ഥാനമെങ്കിലും താൻ ആ വീട്ടിൽ ഇവൾക്ക് കൊടുത്തിരുന്നോ.? ഇല്ലല്ലോ, എന്നിട്ട് അവകാശം പറയാൻ വന്നിരിക്കുന്നു. ഇവളുടെ കാര്യത്തിൽ തീരുമാനമെടുക്കാൻ താനാരാ.? സ്ഥാനം കൊണ്ട് പോലും താൻ അച്ഛൻ എന്ന ആ പേരിന് അർഹനല്ല. ഒരിക്കലെങ്കിലും അവളെ മനസ്സറിഞ്ഞ്താൻ മോളെ എന്ന് വിളിച്ചിട്ടുണ്ടോ.? തന്റെ മോളെ കെട്ടി എടുത്തു ക്കൊണ്ട് താൻ ഇങ്ങോട്ട് വന്നതിന്റെ ഉദ്ദേശം ഒക്കെ എനിക്ക് മനസ്സിലായി. അങ്ങനെയുള്ള മോഹം വല്ലതും മനസ്സിൽ ഉണ്ടെങ്കിൽ അത് മാറ്റി വെച്ചേക്ക്. ഈ ജീവിതത്തിൽ ഞാനൊരു പെണ്ണിനെ കെട്ടുന്നുണ്ടെങ്കിൽ അത് മരിയ മാത്രമായിരിക്കും. മറ്റൊരു ബന്ധത്തിനും സോളമൻ ഒരുക്കമല്ല. എല്ലാരും കേൾക്കാൻ വേണ്ടിയാ പറയുന്നത്

അമലയെ ഒന്ന് നോക്കി അവൻ പറഞ്ഞു

” പിന്നെ ഇവളുടെ കാര്യത്തിൽ പ്രത്യേകിച്ച് താൻ ഒരു തീരുമാനമെടുക്കേണ്ട, പ്രായപൂർത്തിയായ ഒരു പെണ്ണ് ആണ് ഇവൾ. അവളുടെ കാര്യത്തിൽ തീരുമാനമെടുക്കാനുള്ള എല്ലാ അവകാശങ്ങളും അവൾക്ക് ഉണ്ട്. അത് നമ്മുടെ ഇന്ത്യൻ പീനൽ കോഡ് അവൾക്കു നൽകുന്ന അവകാശമാണ്. എന്താ എടുക്കാനുള്ളത് എന്ന് വച്ചാൽ എടുത്തു റെഡി ആകു

മരിയയുടെ മുഖത്തേക്ക് നോക്കി സോളമൻ പറഞ്ഞപ്പോൾ വല്യമ്മച്ചിയും അമലയും സണ്ണിയും ഒക്കെ ഒരേപോലെ ഞെട്ടിപ്പോയിരുന്നു…

ജോണിയുടെ മുഖത്ത് ഒരു അടി കിട്ടിയത് പോലെ നിൽക്കുകയായിരുന്നു. ജീനക്ക് എന്തെന്നില്ലാത്ത സങ്കടം വന്നു. വളരെ ചെറിയ സമയം കൊണ്ട് തന്നെ താൻ സോളമനെ ഒരുപാട് ഇഷ്ടപ്പെട്ടു തുടങ്ങിയിരുന്നു. അവനോടൊപ്പം ഉള്ള ഒരു ജീവിതം സ്വപ്നം കണ്ടു തുടങ്ങിയിരുന്നു. അതിനിടയിലാണ് ഇങ്ങനെ ഒരു പ്രഹരം. അത് അവൾക്ക് അംഗീകരിക്കാൻ സാധിക്കുന്നതിലും അപ്പുറമായിരുന്നു.

വീണ്ടും കരഞ്ഞുകൊണ്ട് നിൽക്കുന്ന മരിയയെ നോക്കി അല്പം ദേഷ്യത്തോടെ തന്നെയാണ് സോളമൻ സംസാരിച്ചത്.

“ഞാൻ പറഞ്ഞത് നിനക്ക് മനസ്സിലായില്ലേ.? എന്താണെന്ന് വെച്ചാൽ എടുക്കാൻ ഉള്ളത് എടുക്കാൻ

അവൾ ഭയത്തോടെ അമലയുടെ മുഖത്തേക്ക് നോക്കി അമല അവൾക്ക് മുഖം കൊടുക്കാതെ മുഖം വെട്ടിച്ചു മാറ്റിയിരുന്നു മരിയ നിന്നോട് പറയുന്നത് മറ്റാരുടെയും സമ്മതത്തിന് നീ നോക്കണ്ട ദേഷ്യത്തോടെ അവളോട് അത്രയും പറഞ്ഞു അവൻ അവിടെ നിന്നും സ്വന്തം മുറിയിലേക്ക് ഇറങ്ങിപ്പോയി.

സ്വന്തം മുറിയിലേക്ക് ചെന്ന് ഒരു ബാഗിൽ കൊള്ളുന്ന സാധനങ്ങൾ അവൻ എടുത്തുവച്ചു.

എങ്ങനെയൊക്കെ കരച്ചിലിന്റെ ഒപ്പം തന്നെ മരിയ ബാഗ് പായ്ക്ക് ചെയ്തിരുന്നു..ആ മുറിയിൽ നിന്ന് ഓരോരുത്തരായി ഇറങ്ങിപ്പോയി..

എന്നാൽ ജീന മാത്രം അവിടെ നിന്നു.

” നന്നായി ആലോചിച്ചു വേണം നീ ഒരു തീരുമാനം എടുക്കാൻ. നമ്മുടെ അമ്മയ്ക്ക് ഏറ്റവും വലിയ നാണക്കേട് ഉണ്ടാക്കിയാ നീ ഇപ്പോൾ അയാളുടെ കൂടെ ഇറങ്ങി പോകാൻ പോകുന്നത്. അമ്മ നിന്നെ വിശ്വസിച്ച ഇവിടേക്ക് വിട്ടത്.

ജീന അവളുടെ ഏറ്റവും വലിയ വീക്ക് പോയിന്റിൽ തന്നെ കയറിപ്പിടിക്കാൻ തീരുമാനിച്ചു. എങ്ങനെയും സോളമനേ സ്വന്തമാക്കുക എന്ന ലക്ഷ്യം മാത്രമായിരുന്നു ആ സമയം അവളുടെ മുൻപിൽ ഉണ്ടായിരുന്നത്.

മുറിക്കുള്ളിലേക്ക് കയറിവന്ന സോളമൻ ഇത് കേട്ടുകൊണ്ടാണ് അങ്ങോട്ട് വന്നത്.

“നിർത്തടി നിന്റെ ഉപദേശം

ദേഷ്യത്തോടെ സോളമൻ അത് പറഞ്ഞപ്പോൾ അവൾ സോളമനെ ഭയത്തോടെ നോക്കി.

“‘ കുറച്ച് നേരം കൊണ്ട് നിനക്ക് വേണ്ടി ഞാൻ ഒരെണ്ണം ഓങ്ങി വെച്ചിരിക്കുകയാണ്. നീ ഉണ്ടല്ലോ നിന്റെ തന്തയുടെ അതേ പകർപ്പ് ആണ്. ലാസ്റ്റ് നീ അവളുടെ സെന്റിമെന്റ്സിൽ കേറി പിടിക്കാൻ ആണോ നോക്കുന്നത്. ഇവളുടെ അമ്മയ്ക്ക് നാണക്കേട് ഉണ്ടാകുമെങ്കിൽ അത് അവരെ അങ്ങ് സഹിക്കണം. അവർക്ക് ഇവളോട് കുറച്ചെങ്കിലും സ്നേഹം ഉണ്ടായിരുന്നെങ്കിൽ നിന്നെപ്പോലെയുള്ള ദുഷ്ട ഭൂതങ്ങളുടെ ഇടയിലേക്ക് ഇവളെ എറിഞ്ഞു കൊടുക്കുകയായിരുന്നോ.? ഇനി ഇവളുടെ മനസ്സ് വിഷമിപ്പിക്കുന്ന എന്തെങ്കിലും വാക്ക് നിന്റെ ഭാഗത്തുനിന്ന് വന്നാൽ എന്റെ കയ്യിൽ നിന്ന് നീ വാങ്ങും, ഇറങ്ങിപ്പോടീ ഇവിടുന്ന്…

ദേഷ്യത്തോടെ ജീനയോട് സോളമൻ അത്രയും പറഞ്ഞപ്പോൾ അവൾ ഭയത്തോടെ മുറിയിൽ നിന്ന് പുറത്തേക്ക് ഇറങ്ങിയിരുന്നു.

കരച്ചിലിന്റെ വക്കിൽ തന്നെയാണ് മരിയ

” എല്ലാം എടുത്തോ..?

അവളുടെ ബാഗിലേക്ക് നോക്കിക്കൊണ്ട് അവൻ ചോദിച്ചു.

അവൾ അവനെത്തന്നെ സൂക്ഷിച്ചു നോക്കിക്കൊണ്ട് പറഞ്ഞു

” ഇച്ചായാ ഇത് വേണ്ട, അമലയാന്റിയെ വിഷമിപ്പിച്ച് ഇവിടുന്ന് ഇറങ്ങി പോകേണ്ട. ഞാൻ ഹോസ്റ്റലിലേക്ക് പൊയ്ക്കോളാം, ഇച്ചായൻ അവരെ വിഷമിപ്പിച്ചാൽ ദൈവം പോലും പൊറുക്കില്ല. ഞാൻ കാരണം അങ്ങനെ ഒരു അവസ്ഥ ഇവിടെ ഉണ്ടാകാൻ പാടില്ല.
ഇങ്ങനെയൊന്നുമല്ല ഞാൻ ഇച്ചായന്റെ കൂടെ ജീവിക്കാൻ ആഗ്രഹിച്ചത്…

അവൾ പറഞ്ഞു

” ഇത്രയായ സ്ഥിതിക്ക് ഇനി ഇവിടുന്ന് പോവുകയല്ലാതെ നമുക്ക് മുന്നിൽ മറ്റൊരു മാർഗ്ഗമില്ല. ഇങ്ങനെയൊന്നുമല്ലല്ലോ ആരും ആഗ്രഹിക്കുന്നത്. പക്ഷേ റിയാലിറ്റി ഇതാണ് അത് അംഗീകരിച്ചേ പറ്റൂ. മമ്മക്ക് എന്നെ മനസ്സിലാവും. മറ്റാരെക്കാളും നന്നായി മമ്മ എന്നേ മനസ്സിലാക്കിയിട്ടുണ്ട്.

പറഞ്ഞപ്പോൾ അവന്റെ കണ്ണൊന്നു നിറഞ്ഞു.

” ഇപ്പോഴത്തെ ദേഷ്യത്തിന് ഇങ്ങനെയൊക്കെ പറയുന്നത് ആണ്. അതൊന്നും നീ കാര്യമായിട്ട് എടുക്കേണ്ട. ഒരു കണക്കിന് എല്ലാവരും അറിഞ്ഞത് നന്നായി. ഞാനായിട്ട് പറയുന്നത് എങ്ങനെയാണെന്ന് ഓർത്തിരിക്കുകയായിരുന്നു. വാ പോകാം
.
അവളുടെ കയ്യിൽ കയറി പിടിച്ചു സോളമൻ. എതിർക്കാൻ ആ നിമിഷം അവൾക്കും കഴിയില്ലായിരുന്നു. പെട്ടന്ന് മുറിയിലേക്ക് സണ്ണി കയറി വന്നു….കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…