🎶 സോളമന്റെ ഉത്തമഗീതം 🎶❤️: ഭാഗം 75

രചന: റിൻസി പ്രിൻസ്‌

എടി എരണം കെട്ടവളെ കെട്ടവളേ നീ എന്റെ കൊച്ചനെയും ഞങ്ങളിൽ നിന്ന് നടത്തി മാറ്റിക്കൊണ്ട് പോകല്ലേ നീ ഒരു കാലത്തും ഗതി പിടിക്കില്ലടി പിഴച്ചവളെ…

വല്ല്യമ്മച്ചി വിളിച്ചു പറഞ്ഞു. സോളമൻ ഒന്ന് നിന്നു

വാതിൽ കടന്ന് പോയ സോളമൻ പെട്ടെന്ന് തിരികെ വന്നു ദേഷ്യത്തോടെ വല്യമ്മച്ചിയുടെ മുഖത്തേക്ക് നോക്കി…

അവന്റെ നോട്ടം കണ്ടതും അവർക്ക് വല്ലാത്ത ഭയം തോന്നി.

” എന്റെ അമ്മയുടെ അമ്മയാണെന്നുള്ള പരിഗണന കൊണ്ടാ നിങ്ങളെ ഞാൻ ഇത്രനേരവും ഒന്നും പറയാതിരുന്നത്.. എന്റെ പരിധി വിട്ടു പോകുന്നുണ്ട്, ആദ്യമായിട്ട് ഇവളെ കണ്ട സമയം മുതൽ തുടങ്ങിയതാ നിങ്ങൾക്ക് സൂക്കേട്. അവൾ പിഴച്ചവളൊന്നുമല്ല, അവൾ ജീവിതത്തിൽ ഒരു ഒറ്റ ആളെ സ്നേഹിച്ചിട്ടുള്ളൂ, അയാളെ മാത്രമേ ചേർത്ത് പിടിച്ചിട്ടുള്ളൂ. പിഴച്ചത് നിങ്ങളുടെ കൊച്ചു മകനാ, ഒന്നിൽ കൂടുതൽ പെൺകുട്ടികളെ ഒരേസമയം പ്രേമിച്ചു കൂടെ കൊണ്ട് നടന്നിട്ടുള്ളവനാ ഞാൻ,
ആ എന്നെ അപ്പോൾ എന്ത് പേരിലാ നിങ്ങൾ വിളിക്കാൻ പോകുന്നത്.? അവനത് പറഞ്ഞപ്പോൾ അവർ അമ്പരപ്പോടെ അവനെ നോക്കി.

അവൾ ജീവിതത്തിൽ ഒരു ഒറ്റ ആളെ സ്നേഹിച്ചിട്ടുള്ളൂ. അയാൾക്കൊപ്പം മാത്രമേ ചേർന്നു നിന്നിട്ടുള്ളൂ. അവളെ ഇനി മേലിൽ അങ്ങനെ വിളിച്ചു പോയേക്കരുത്.!

ദേഷ്യത്തോടെ അത്രയും പറഞ്ഞു അവളുടെ കൈപിടിച്ച് വലിച്ച് അവൻ പുറത്തേക്കിറങ്ങിയിരുന്നു.
*

അപ്പുറത്തെ മുറിയിൽ കിടന്ന് അമല എല്ലാം കേൾക്കുന്നുണ്ടായിരുന്നു. അവർക്ക് കണ്ണുനീർ വന്ന് കണ്ണുകളെ മറച്ചു കളഞ്ഞു.

ഫ്ലാറ്റിൽ നിന്നും പുറത്തേക്കിറങ്ങി പാർക്കിങ്ങിൽ എത്തി കാറിലേക്ക് കയറുമ്പോൾ മരിയ എന്ത് ചെയ്യണമെന്ന് അറിയാത്ത അവസ്ഥയിലായിരുന്നു..

സോളമന്റെ മുഖത്തേക്ക് നോക്കുമ്പോൾ അവൻ വല്ലാത്ത ദേഷ്യത്തിലാണ്. വണ്ടി ഓടിക്കുമ്പോൾ അവൻ ഒന്നും മിണ്ടിയില്ല. അവൾക്ക് വല്ലാത്ത വേദന തോന്നി ,

അവൻ ബീച്ചിന്റെ സൈഡിലായി കൊണ്ട് വണ്ടി നിർത്തി, രാവിലെ ആയോണ്ട് അവിടെ ആൾ അധികം ഇല്ല. ശേഷം സ്റ്റിയറിങ്ങിലേക്ക് തല വെച്ച് കിടന്നു അവൻ.

അവനെ വിളിക്കണോ വേണ്ടയോ എന്ന് സംശയിച്ചു ഇരുന്നു…

അവസാനം എന്തു വരട്ടെ എന്ന് കരുതി അവൾ അവന്റെ തോളിലേക്ക് തൊട്ടപ്പോഴേക്കും നിറഞ്ഞ കണ്ണുകളോടെ അവന് അവളെ നോക്കി…

ശേഷം അവളെ തന്നോട് ചേർത്ത് കെട്ടിപ്പിടിച്ചു. അവളുടെ കഴുത്തിടുക്കിൽ മുഖം ഒളിപ്പിച്ചു. അവന്റെ കണ്ണുകളിലെ നനവ് അവളുടെ കഴുത്തിടുക്കിൽ പതിയുന്നുണ്ടായിരുന്നു.

എന്തിനാണ് അവൻ കരയുന്നതെന്ന് അവൾക്ക് മനസ്സിലാക്കാൻ സാധിച്ചില്ല. ശേഷം പതിഞ്ഞ ശബ്ദത്തോടെ അവളുടെ കാതോരം അവൻ പറഞ്ഞു

“സോറി”

അവൾക്ക് കരച്ചിൽ വന്നു.

അവൾ ബലമായി അവന്റെ മുഖമുയർത്തി, ആദ്യമായി ആണ് ഒരു പുരുഷൻ കരയുന്നത് നേരിൽ കാണുന്നത്. അലിവോടെ അവൾ അവന്റെ കണ്ണുകൾ തുടച്ചു കൊടുത്തു.

” ഞാനല്ലേ സോറി പറയേണ്ടത്.? ഇച്ചായൻ എന്തിനാ സോറി പറഞ്ഞത്.

” ഞാൻ കാരണമല്ലേ എല്ലാവരുടെയും മുമ്പിൽ നീ ഇങ്ങനെ നാണംകെട്ട നിൽക്കേണ്ടി വന്നത്.. മനപ്പൂർവം അല്ല മോളെ നീ കരഞ്ഞുകൊണ്ട് അകത്തേക്ക് ഓടിയപ്പോൾ വരാതിരിക്കാൻ കഴിഞ്ഞില്ല.

വലിയ തെറ്റ് ചെയ്ത ഒരു കുറ്റക്കാരനെ പോലെ അവൻ ഏറ്റു പറഞ്ഞപ്പോൾ അവൾക്ക് അവനോട് വല്ലാത്ത സ്നേഹം തോന്നിയിരുന്നു.. എന്തിനാണ് അവൻ തന്നെ ഇങ്ങനെ സ്നേഹിക്കുന്നതെന്ന് പോലും ആ നിമിഷം അവൾ ഓർത്തു..

അവന്റെ മുഖം കയ്യിൽ പിടിച്ചു അവൾ.

“എന്നേ ഇങ്ങനെ സ്നേഹിക്കല്ലേ ഇച്ചായ, അത് കാണുമ്പോൾ എനിക്ക് പേടിയാ… ഇച്ചായന്റെ സ്നേഹം ദൈവം എന്നിൽ നിന്ന് അകറ്റി കളയുമെന്ന്. പണ്ടുമുതൽ ഞാൻ എന്ത് ആഗ്രഹിച്ചാലും അത് എന്നിൽ നിന്നും തട്ടിയെടുത്ത് സന്തോഷം കണ്ടെത്തും ദൈവം. ഇത് കാണുമ്പോൾ എനിക്ക് പേടിയാ…

അവൾ കരഞ്ഞു പോയിരുന്നു.

അവൻ പെട്ടെന്ന് കണ്ണുകൾ അമർത്തി തുടച്ച് അവളെ തന്റെ നെഞ്ചോട് ചേർത്ത് പിടിച്ചു.

” നീ വിഷമിക്കേണ്ട ഞാനൊരിക്കലും നിന്നെ ഉപേക്ഷിക്കില്ല,

” അതെനിക്കറിയാം….!

അവളുടെ വാക്കുകൾ ഉറച്ചതായിരുന്നു… കുറച്ചു മുൻപ് നടന്ന സംഭവങ്ങൾ തന്നെ അവനോടുള്ള അവളുടെ വിശ്വാസം ഇരട്ടിയാക്കാൻ ഉതകുന്നതായിരുന്നു.

” വേദനയുണ്ടോ..?

അവളുടെ കൈകളിൽ പിടിച്ചുനോക്കി കൊണ്ട് അവൻ ചോദിച്ചു…

അവൾ ഇല്ല എന്ന് അർത്ഥത്തിൽ തലയാട്ടി…

“പപ്പാ എന്താണ് പറഞ്ഞത് എന്ന് അറിയോ.?

അവൻ അവളോട് ചോദിച്ചു. അവൾ അവന്റെ മുഖത്തേക്ക് നോക്കി…

“എനിക്ക് നിന്നേ മടുക്കുമ്പോൾ ഞാൻ ഉപേക്ഷിച്ചു കളയുമെന്ന്, നിനക്ക് അങ്ങനെ തോന്നുന്നുണ്ടോ മറിയാമ്മേ..? നിന്റെ ഇച്ചായന് നിന്നേ വേണ്ടതാവുമെന്ന്, എന്റെ സ്നേഹത്തിൽ വിശ്വാസകുറവ് ഉണ്ടോ.?

അവൻ കണ്ണു നിറച്ചു ചോദിച്ചു അവളോട്, അവൾ വിലങ്ങനെ തലയാട്ടി, ശേഷം അവന്റെ മുഖം കൈകളിൽ എടുത്തു

“എനിക്ക് എന്റെ ഇച്ചായനെ വിശ്വാസമാ….

അവൾ പറഞ്ഞു

“എനിക്ക് അത് മതി, അത് മാത്രം

അവൻ കണ്ണ് തുടച്ചു പറഞ്ഞു.

“മമ്മ സമ്മതിക്കും എനിക്ക് ഉറപ്പാ, മമ്മയ്ക്ക് പെട്ടെന്ന് ഇങ്ങനെ കണ്ടപ്പോൾ വിശ്വസിക്കാൻ കഴിഞ്ഞില്ല അതുകൊണ്ട, നീ വിഷമിക്കേണ്ട…

അവൻ പറഞ്ഞു

,” എനിക്ക് വിഷമം ഇല്ല ഈ ലോകം മുഴുവൻ എതിർത്താൽ എന്താ, എന്നെ സ്നേഹിക്കുന്ന ഈ ഒരാളുണ്ടല്ലോ.. അതുമാത്രം മതി എനിക്ക്,

അവളും ഏറെ ആർദ്രമായി അവന്റെ നെഞ്ചിലേക്ക് ചാഞ്ഞു. അവൻ അവളുടെ നെറ്റിയിൽ ഒരു ചുംബനം നൽകി, ആ മുടി ഇഴകളെ തഴുകുകയും ചെയ്തു.

**
സോളമൻ ഇറങ്ങിപ്പോയ നിമിഷം മുതൽ അമലയും ഒരേ കിടപ്പാണ്, അമലയ്ക്ക് അരികിൽ ആശ്വസിപ്പിക്കുവാൻ ആയി സണ്ണി എത്തി…

” നീ ഇങ്ങനെ കരഞ്ഞാൽ എങ്ങനെയാ.?

” എങ്കിലും അവൻ നമ്മളോട് ഇങ്ങനെ ചെയ്തല്ലോ, നമ്മളെക്കാളും വലുത് അവൾ ആണെന്ന് ഉള്ളതുകൊണ്ടല്ലേ അവന് അവളെയും വിളിച്ചുകൊണ്ട് ഇറങ്ങിപ്പോയത്..

അമല ചോദിച്ചപ്പോൾ സണ്ണി അവളെ തന്നെ ഒന്ന് സൂക്ഷിച്ചു നോക്കി. ശേഷം പറഞ്ഞു

” കാര്യത്തോട് അടുക്കുമ്പോൾ എല്ലാ മനുഷ്യരും സ്വാർത്ഥരാണ്. നിനക്ക് മരിയെ എന്ത് ഇഷ്ടമായിരുന്നു

” ഇഷ്ടമാണെന്ന് വെച്ചാൽ എന്റെ മോനെ അവൾക്ക് കെട്ടിച്ചു കൊടുക്കാമെന്ന് ഞാൻ പറഞ്ഞിട്ടുണ്ടോ.?

” നിന്റെ മോനെ കിട്ടാവുന്നതിൽ വച്ച് ഏറ്റവും നല്ല വിവാഹാലോചന തന്നെയാണ് ഇത്. അവളെ പോലൊരു നല്ല പെണ്ണിനെ കിട്ടാനുള്ള ഒരു അർഹതയും അവനുണ്ട് എന്ന് എനിക്ക് തോന്നുന്നില്ല.

സണ്ണി പറഞ്ഞു

” ഞാനൊരു കാര്യം ചോദിക്കട്ടെ അമലേ… മരിയ ജോണിയുടെയും ബെറ്റിയുടെയും മകൾ ആയിരുന്നെങ്കിൽ നീ ഈ കല്യാണത്തിന് യാതൊരു തടസ്സവും പറയാതെ സമ്മതിക്കുകയായിരുന്നില്ലേ.?

സണ്ണി ചോദിച്ചപ്പോൾ അമ്പരപ്പോടെ അവർ അയാളെ നോക്കി

പ്രത്യക്ഷത്തിൽ പറയുന്നില്ലെങ്കിലും മരിയ ആരുമില്ലാത്തവളാണെന്നത് തന്നെയല്ലേ നിന്റെ മകൻ അവളെ വിവാഹം കഴിക്കാൻ അയോഗ്യനാണെന്ന് നീ കരുതുന്നതിന്റെ കാരണം..

“ഇച്ചായൻ അങ്ങനെയാണോ എന്നെപ്പറ്റി വിചാരിച്ചിരിക്കുന്നത്.?

” അതുതന്നെയാണ് അമലേ സത്യം, ഇല്ലെങ്കിൽ ജീനയുടെ കാര്യം പറഞ്ഞപ്പോൾ നിനക്ക് ഉണ്ടാവാത്ത അമ്പരപ്പ് എന്താ അമലയുടെ കാര്യത്തിൽ നിനക്ക് ഉണ്ടായത്. സ്വന്തം കാര്യം വരുമ്പോൾ എല്ലാ മനുഷ്യരും സ്വാർത്ഥരാണ്. അല്ലാത്ത ആദർശം പറയാനും മറ്റുള്ളവരെ സഹായിക്കാനും ഒക്കെ നമുക്ക് മനസ്സ് തോന്നും പക്ഷേ നിന്റെ സ്വന്തം മോനെ കെട്ടിച്ചു കൊടുക്കാൻ നിനക്ക് പറ്റില്ല.

” ഇച്ചായ അതൊന്നുമല്ല എന്റെ പ്രശ്നം. അവനും അവളും കൂടി എന്നെ വിഡ്ഢിയാക്കുകയായിരുന്നില്ലേ. അവനെങ്കിലും എന്നോട് എല്ലാം തുറന്നു പറയാമായിരുന്നില്ലേ.

” പറഞ്ഞിരുന്നെങ്കിൽ നീ സമ്മതിക്കുമായിരുന്നോ.?ഇരുകൈയും നീട്ടി അവളെ സ്വീകരിക്കുമായിരുന്നോ.?

സണ്ണി അങ്ങനെ ചോദിച്ചപ്പോൾ അതിന് അമലയുടെ പക്കൽ മറുപടി ഉണ്ടായിരുന്നില്ല.

” അവന് അവളെ അത്രയ്ക്ക് ഇഷ്ടമായതു കൊണ്ടാണ് നിന്നെ അവൻ എതിർത്തത്. ഈ ലോകത്ത് മറ്റാരെയും അവൻ നിന്നെക്കാൾ വലുതായി കണ്ടിട്ടില്ലന്ന് എനിക്ക് ഉറപ്പാ.

സണ്ണി പറഞ്ഞു

” നമുക്ക് ഒരു മോനല്ലേ ഉള്ളൂ, അവന്റെ സന്തോഷത്തിലും വലുതല്ലല്ലോ മറ്റൊന്നും. അവൻ കുറച്ചെങ്കിലും നന്നായെങ്കിൽ അത് അവൾ വന്നതിനുശേഷം ആണ്. അവളോട് അവന് വലിയ ഇഷ്ടം ആണ്. നമ്മൾ ആയിട്ട് വാശി പിടിക്കേണ്ട, നമ്മൾ പണ്ടേ തീരുമാനിച്ചതല്ലേ അവന്റെ ഇഷ്ടത്തിന് അവന്റെ ജീവിതം വിട്ടുകൊടുക്കും എന്ന്. അവനാണ് ജീവിക്കേണ്ടത് നമ്മുടെ മോൻ കാരണം ഒരു പാവപ്പെട്ട പെൺകുട്ടിയുടെ സ്വപ്നങ്ങൾക്ക് തിളക്കം ഉണ്ടാവുന്നെങ്കിൽ അതല്ലേ വലിയ കാര്യം.? നീയായിട്ട് വാശി പിടിക്കണ്ട, നമ്മുക്ക് അത് നടത്തി കൊടുക്കാടി

സണ്ണി പറഞ്ഞപ്പോൾ അമല അയാളെ തന്നെ സൂക്ഷിച്ചു നോക്കി…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…