🎶 സോളമന്റെ ഉത്തമഗീതം 🎶❤️: ഭാഗം 79

രചന: റിൻസി പ്രിൻസ്‌

അവൾക്ക് സന്തോഷം ആകും. അവൾ അത് ആഗ്രഹിക്കുന്നുണ്ട് ജീവിതത്തിൽ ഒരുപാട് വിഷമങ്ങൾ അനുഭവിച്ചതല്ലേ, നമ്മൾ കാരണം ഒരു സന്തോഷം കിട്ടുമെങ്കിൽ അത് നല്ല കാര്യമല്ലേ മമ്മ.?

അവൻ പറഞ്ഞപ്പോൾ ഒന്നും മിണ്ടാതെ മുറിക്ക് പുറത്തേക്ക് ഇറങ്ങിപ്പോയിരുന്നു അമല. എല്ലാം ഇനി പഴയതുപോലെ ആകുമോ എന്ന സംശയത്തോടെ തന്നെ നിന്നു സോളമനും

ഹോളിലേക്ക് വന്ന സണ്ണി അമലയെ നോക്കിയിരുന്നു..

അവൾ ആ ലോകത്തല്ല എന്ന് തോന്നി സണ്ണിയ്ക്ക്. ഷാളിൽ വിരൽ കോർത്തു അഴിച്ചും ചുറ്റിയും മറ്റെന്തോ ചിന്തയിലാണ് അവൾ. നല്ല ടെൻഷനിലാണെന്ന് അവളുടെ ആ പ്രവർത്തി കാണുമ്പോൾ തന്നെ മനസ്സിലാക്കാൻ സാധിക്കുന്നുണ്ട്..

മരിയ..

സണ്ണിയാണ് അവളെ വിളിച്ചത് അവൾ പേടിയോടെ എഴുന്നേറ്റു

മോളെവിടെ ഇരുന്നോ.?

സണ്ണി അവളുടെ അടുത്തേക്ക് വന്നു കൊണ്ട് പറഞ്ഞു..

മോളുടെ അമ്മയെ വിളിച്ചിട്ടുണ്ടായിരുന്നു അമല. അമ്മയോടെ കാര്യങ്ങളൊക്കെ പറഞ്ഞു ഞങ്ങൾ. ഈ വിവരങ്ങൾ സണ്ണിയോടും പറഞ്ഞു വിട്ടത് ആണ്. അയാൾക്ക് അത്ര താൽപര്യമുള്ളതായിട്ട് തോന്നിയില്ല. അത് പിന്നെ സ്വാഭാവികമായ കാര്യമാണല്ലോ.. നമുക്ക് എത്രയും പെട്ടെന്ന് ഈ കല്യാണം നടത്താമെന്ന ഞങ്ങളിപ്പോ കരുതുന്നത്. കല്യാണം കഴിഞ്ഞു മോൾക്ക് ഇവിടെ നിന്ന് പഠിക്കാമല്ലോ. ഞങ്ങളെ ടിക്കറ്റ് ബുക്ക് ചെയ്തിട്ടുണ്ട്. നാളെ ഈവനിംഗ് നാട്ടിലേക്ക് പോണം ഞങ്ങളുടെ കൂടെ മോളും വരണം. എല്ലാ കാര്യങ്ങളും ബെറ്റിയോട് പറഞ്ഞിട്ടുള്ളതുകൊണ്ട് കുഴപ്പങ്ങളൊന്നും ഉണ്ടാകില്ല.

സമാധാനത്തോടെ മോൾക്ക് പോകാം.. സണ്ണി പറഞ്ഞപ്പോൾ അവിടേക്ക് പോകുന്നത് ഓർത്ത് വല്ലാത്തൊരു ഭയം അവൾക്ക് തോന്നിയിരുന്നു. പക്ഷേ അത് പറയാനും വയ്യ

മോള് പേടിക്കേണ്ട ആരൊക്കെ എതിർത്താലും ഞങ്ങളുടെ തീരുമാനത്തിൽ ഇനി മാറ്റമൊന്നുമില്ല.

അവളുടെ മനസ്സ് അറിഞ്ഞതുപോലെ സണ്ണി പറഞ്ഞപ്പോൾ അവൾക്ക് ചെറിയൊരു ആശ്വാസം തോന്നിയിരുന്നു.

അല്ലേ അമല

ഭാര്യയോട് അയാൾ ചോദിച്ചപ്പോൾ അവരതെ എന്ന അർത്ഥത്തിൽ തലയാട്ടി കാണിച്ചു…

അതുതന്നെ വല്ലാത്തൊരു സമാധാനമായിരുന്നു എങ്കിലും അമലയോട് അങ്ങോട്ട് പോയി മിണ്ടാൻ അവൾക്കൊരു ബുദ്ധിമുട്ട് തോന്നി. ചിലപ്പോൾ ഇഷ്ടമായില്ലെങ്കിലോ. കാലിൽ പിടിച്ചു മാപ്പ് പറയണം എന്നുണ്ട്.

ഇവിടെയുള്ള ഞങ്ങളുടെ റിലേറ്റീവ്സിനൊക്കെ ചെറിയൊരു പാർട്ടി അറേഞ്ച് ചെയ്യണം. അതൊക്കെ ഇവിടെ വന്നതിനുശേഷം ആലോചിക്കാം എന്ന കരുതുന്നത്.

അവളത് കേട്ട് തലയാട്ടു ക മാത്രം ചെയ്തു.

അകത്തെ മുറിയിൽ നിന്നും സോളമൻ ഇറങ്ങി വന്നപ്പോൾ കണ്ണുകൾ അടച്ച് അവളോട് ടെൻഷൻ വേണ്ട എന്ന അർത്ഥത്തിൽ ആംഗ്യം കാണിച്ചു

അപ്പോഴാണ് അവൾക്ക് സമാധാനമായത്, കാര്യങ്ങൾ സംസാരിച്ചത് മുഴുവൻ സണ്ണിയാണ്…

മോളെ തൽക്കാലം ഇപ്പോൾ ഹോസ്റ്റലിലേക്ക് പോകുന്നത് ആണ് നല്ലത്. ഞങ്ങൾ നാളെ വന്ന് മോളെ പിക്ക് ചെയ്യാം. ശേഷം നമുക്ക് ഒരുമിച്ച് നാട്ടിലേക്ക് പോകാം. അതിനു മുൻപ് ഞാൻ ജോണിയെ ഒന്നുകൂടി വിളിച്ചു നോക്കട്ടെ. വെറുതെ ഒരു പ്രശ്നം ഉണ്ടാക്കാതിരിക്കുന്നതാണല്ലോ നല്ലത്

സണ്ണി പറഞ്ഞപ്പോൾ അവൾ സമ്മതപൂർവ്വം തലയാട്ടിയിരുന്നു..

സോളമാ നീ മോളെ കൊണ്ട് ഹോസ്റ്റലിൽ ആക്ക്

സണ്ണി പറഞ്ഞപ്പോൾ അവൻ അനുസരണയോടെ അവളെ ക്ഷണിച്ചു…

മനസ്സ് നിറഞ്ഞ സമാധാനത്തോടെ അവൾ സോളമനൊപ്പം പുറത്തേക്ക് നടന്നുവെങ്കിലും അമലേ ഒന്ന് തിരിഞ്ഞു നോക്കിയിരുന്നു. ആ നിമിഷം തന്നെ അവർ പെട്ടെന്ന് മുഖം താഴ്ത്തി കളഞ്ഞു. അത്രയും സന്തോഷങ്ങൾക്കിടയിലും അതൊരു വലിയ വേദനയായി തന്നെ അവളിൽ നിലനിന്നിരുന്നു.
എങ്കിലും മാറുമെന്ന് അവൾ വിശ്വസിച്ചു. സമ്മതമാണെന്ന് പറഞ്ഞല്ലോ ഒരുപക്ഷേ അമല ഈ വിവാഹത്തിന് സമ്മതിച്ചില്ലായിരുന്നുവെങ്കിൽ ഒരിക്കലും താൻ ഈ ജീവിതം തിരഞ്ഞെടുക്കുമായിരുന്നില്ല. സോളമൻ തനിക്ക് എത്ര പ്രിയപ്പെട്ടവൻ ആണെന്ന് പറഞ്ഞാലും അങ്ങനെയൊരു നന്ദികേട് കാണിക്കാൻ സാധിക്കില്ലായിരുന്നു എന്ന് അവൾ ചിന്തിച്ചു.

ഇപ്പോൾ തന്റെ സംശയങ്ങളൊക്കെ മാറിയല്ലോ.

തിരികെയുള്ള യാത്രയിൽ അവൻ ചോദിച്ചപ്പോൾ അവൾ സന്തോഷപൂർവ്വം അവന്റെ ചുമലിൽ തല ചായ്ച്ചു.

കാര്യം കേട്ടപാടെ വല്യമ്മച്ചി അതിനെ എതിർത്തുവെങ്കിലും പിറ്റേദിവസം തിരികെ കൊണ്ട് വീട്ടിൽ വിടാം എന്നുള്ള അമലയുടെ വാക്കിൽ അല്പം സമാധാനത്തോടെ ഇരുന്നു. ഈ വിവാഹത്തിന് പങ്കെടുക്കില്ല എന്നുള്ള തീരുമാനത്തിൽ തന്നെയാണ് അവരും.

ജോണി വീട്ടിൽ ചെന്ന് കലിതീരുവോളം ബെറ്റിയോട് ആ ദേഷ്യം മുഴുവൻ കാണിച്ചു. ജോണിയുടെ അമ്മ ലീലാമ്മയ്ക്കും ഇത് വല്ലാത്ത ദേഷ്യം ഉണ്ടാക്കിയ കാര്യമായിരുന്നു. തന്റെ മകന്റെയോ മകളുടെയോ മക്കൾക്ക് കിട്ടാതെ പോയ ഭാഗ്യം ഏതോ ഒരുത്തന്റെ മകൾക്ക് കിട്ടുന്നു എന്നത് അവർക്ക് അംഗീകരിക്കാൻ സാധിക്കുന്ന കാര്യമായിരുന്നില്ല.

എന്നാൽ ബെറ്റി ആവട്ടെ താൻ ഒരിക്കൽ ആഗ്രഹിച്ചതാണ് ഈ ആഗ്രഹം എന്ന് മനസ്സിൽ ചിന്തിച്ചു. ഈശ്വരനാ പ്രാർത്ഥന കേട്ടല്ലോ എന്ന സമാധാനമായിരുന്നു അവരുടെ മനസ്സിൽ. മകൾക്ക് നല്ലൊരു ജീവിതം ലഭിക്കണമെന്ന് അവർ അതിയായി ആഗ്രഹിച്ചു. ഭർത്താവും അമ്മായിയമ്മയും കാണിക്കുന്ന ദേഷ്യം ഒന്നും അവരെ ബാധിച്ചിരുന്നില്ല. തന്റെ മകൾക്ക് സുരക്ഷിതമായ ഒരു ജീവിതം ലഭിച്ചതിന്റെ സന്തോഷമായിരുന്നു അവരുടെ മനസ്സിൽ നിറയെ. അമലയുടെ കൈകളിലേക്ക് അവളെ നൽകാൻ സന്തോഷം മാത്രമേ ഉണ്ടായിരുന്നുള്ളൂ ബെറ്റിക്ക്..

ഫോൺ വിളിച്ച സമയത്ത് അമല പറഞ്ഞ വാക്കുകൾ ആയിരുന്നു ബെറ്റിയുടെ മനസ്സിൽ നിറഞ്ഞു നിന്നിരുന്നത്. “എന്റെ മകന് നിന്റെ മോളെ ലഭിക്കുവാനുള്ള അർഹത ഉണ്ടെന്ന് എനിക്ക് തോന്നുന്നില്ല”

എന്ന് അങ്ങനെ ചിന്തിക്കുന്ന അമലയുടെ കൈകളിൽ തന്റെ മകൾ സുരക്ഷിത ആയിരിക്കുമെന്ന് ഉറപ്പായിരുന്നു..

ഇതിനിടയിൽ ജീനയുടെ വകയും ബെറ്റിയ്ക്ക് കണക്കിന് കിട്ടിയിരുന്നു. ജീനയ്ക്ക് മരിയോട് ഇത്രയും ദേഷ്യം ഉണ്ടെന്ന് അന്നാണ് ബെറ്റിയ്ക്ക് മനസിലായത്. എന്തൊക്കെ പറഞ്ഞാലും സഹോദരങ്ങളല്ലേ എന്ന് താൻ ചിന്തിച്ചു. എന്നാൽ അവൾക്ക് ആ ഒരു ചിന്ത ഇല്ലല്ലോ എന്നത് വലിയ വേദനയിൽ ആഴ്ത്തി കളഞ്ഞിരുന്നു.

ജോണി എന്തൊക്കെ പറഞ്ഞാലും ഒരുപക്ഷേ മരിയോട് സ്നേഹമായിരിക്കും ജീനയ്ക്ക് എന്നായിരുന്നു അവർ പ്രതീക്ഷിച്ചിരുന്നത്. ആ പ്രതീക്ഷയാണ് ഇപ്പോൾ നഷ്ടമായിരിക്കുന്നത്..

അതിന്റെ വേദന നന്നായി തന്നെ ബെറ്റിയുടെ മുഖത്ത് ഉണ്ടായിരുന്നു.

ജീന അവളുടെ അച്ഛന്റെ മകൾ ആണെന്ന് വീണ്ടും തെളിയിക്കുകയാണെന്ന് ഒരു നിമിഷം ഓർമിച്ചു.

അന്നത്തെ ദിവസം ബെറ്റി കൊന്ത ചൊല്ലിയത് സോളമനും മരിയക്കും വേണ്ടിയായിരുന്നു. ഒരു പ്രശ്നങ്ങളും ഇല്ലാതെ ഈ വിവാഹം നടക്കുവാനും തന്റെ മകളെ അവൻ സ്നേഹത്തോടെ നോക്കാൻ സാധിക്കണമേ എന്നതും ആയിരുന്നു ആവശ്യം.

അന്ന് രാത്രിയിൽ തന്നെ സണ്ണി ജോണിയോട് സംസാരിച്ചിരുന്നു.. എന്നാൽ അയാൾ താൽപര്യമില്ലാത്ത മട്ടിൽ ആണ് സണ്ണിയോട് സംസാരിച്ചത്. ഒഴിഞ്ഞു പോകുന്നെങ്കിൽ ഒഴിഞ്ഞു പോകട്ടെ എന്ന നിലയിൽ. എന്നാൽ എന്തൊക്കെ പറഞ്ഞിട്ടും സണ്ണി വിവാഹത്തിൽ തന്നെ ഉറച്ചുനിൽക്കുകയാണെന്ന് മനസ്സിലായതോടെ അയാൾക്ക് വല്ലാത്ത അരിശം തോന്നി. കൂടുതൽ ഒന്നും ഇനി തനിക്ക് സംസാരിക്കാൻ ഇല്ല എന്ന് അയാൾ മനസ്സിലാക്കുകയും കൂടിയായിരുന്നു ചെയ്തത്..

അവസാനം ഈ വിവാഹത്തിന് സമ്മതിക്കാതെ തരമില്ലന്ന അവസ്ഥയിലേക്ക് സണ്ണി എത്തിയിരുന്നു.

ഒടുവിൽ എന്തെങ്കിലും ആവട്ടെ എന്ന് നിലയിൽ അയാൾ നിങ്ങൾക്ക് ഇഷ്ടമുള്ളത് എന്താണെന്ന് വെച്ചാൽ ചെയ്യുന്നും എന്റെ ഒരു സഹകരണവും ഇതിൽ ഉണ്ടാവില്ല എന്നും പറഞ്ഞ് അവസാനിപ്പിച്ചു.

ഒരു കണക്കിന് അയാളുടെ സഹകരണം ഇല്ലാതിരിക്കുന്നത് തന്നെയാണ് നല്ലത് എന്ന് ആ നിമിഷം സണ്ണിക്ക് തോന്നുകയും ചെയ്തു.

പിറ്റേദിവസം സണ്ണിയും അമലയും സോളമനും ചേർന്നാണ് ഹോസ്റ്റലിൽ നിന്നും മരിയയേ കൂട്ടുവാൻ വേണ്ടി വന്നത്. അവർ വരുമോ എന്ന സംശയമായിരുന്നു അവസാനം നിമിഷം വരെ മരിയയ്ക്ക്. തന്നെ ഒഴിവാക്കാൻ വേണ്ടി പറഞ്ഞതാണോ എന്ന ഭയം അവൾക്ക് മനസ്സിൽ നിറഞ്ഞു നിന്നിരുന്നു.

കാറിലേക്ക് കയറിയപ്പോൾ തന്നെ രൂക്ഷമായ രീതിയിൽ നോക്കുന്ന വല്യമ്മച്ചിയേയാണ് കണ്ടത്. അതോടെ വല്ലാത്തൊരു ഭയം തന്നെ അവൾക്ക് തോന്നിയിരുന്നു. സോളമൻ ഒന്നുമില്ല എന്ന് അർത്ഥത്തിൽ അവളെ കണ്ണ് അടച്ചു കാണിച്ചിരുന്നു. പിറകിലെ സീറ്റിൽ അമലയും വല്യമ്മച്ചിയും മരിയയും ആണ് ഇരുന്നത്..

ആരും ഒന്നും സംസാരിക്കുന്നില്ല എന്നത് മരിയ്ക്ക് വലിയ ബുദ്ധിമുട്ട് ഉണ്ടാക്കിയിരുന്നു..

നീ വല്ലതും കഴിച്ചിട്ടാണോ ഇറങ്ങിയത്..?

അവസാനം അമല ആ ചോദ്യം ചോദിച്ചപ്പോൾ വല്ലാത്തൊരു സമാധാനമായിരുന്നു മരിയ്ക്കും ഒപ്പം സോളമനും തോന്നിയത്..

അവൾ അതേ എന്ന അർത്ഥത്തിൽ തലയാട്ടിയിരുന്നു. പിന്നീട് ഒന്നും അമല ചോദിച്ചില്ല എങ്കിലും അവളുടെ മുടി കെട്ടിയ മനസ്സിന് അമലയുടെ ആ ചോദ്യം വലിയ ആശ്വാസം തന്നെയാണ് പകർന്നത്.

ഫ്ലൈറ്റിൽ കയറിയപ്പോഴും സോളമന്റെ അരികിൽ ആയിരുന്നു മരിയ ഇരുന്നത്. അവളുടെ മനസ്സിലെ ടെൻഷൻ മനസ്സിലാക്കി എന്നതുപോലെ അവൻ അവളുടെ കൈകളിൽ മുറുകെ പിടിച്ചു.

നമ്മുടെ സ്വപ്നങ്ങളൊക്കെ സാക്ഷാത്കരിക്കാൻ വേണ്ടിയാണ് ഈ ചെറിയ വിഷമങ്ങളൊക്കെ ദൈവം തന്നത് എന്ന് കരുതിയാൽ മതി. ആരൊക്കെ എന്തൊക്കെ കാണിച്ചാലും നീ അത് കാര്യമാക്കാൻ നിക്കണ്ട. ഇപ്പൊ ഇത് നമ്മുടെ ആവശ്യം ആണ്

നിന്നെ വിളിച്ചുകൊണ്ട് വല്ല രജിസ്റ്റർ ഓഫീസിലും പോയി കല്യാണം നടത്താൻ എനിക്ക് അറിയാൻ വയ്യാഞല്ല. നിന്റെ ജീവിതത്തിലെ പ്രധാനപ്പെട്ട ദിവസമാണ്. അന്ന് നീ സന്തോഷമായിരിക്കണം.

സോളമൻ പറഞ്ഞപ്പോൾ അവളൊന്നു അവനെ നോക്കി ചിരിച്ചു .

എയർപോർട്ടിൽ ചെന്ന് ഇറങ്ങിയതും ആദ്യം മരിയയേ കൊണ്ട് വിടാനാണ് തീരുമാനിച്ചത്. സോളമന് ഒട്ടും തന്നെ താൽപര്യമുണ്ടായിരുന്നില്ല അവളെ വീട്ടിലേക്ക് കൊണ്ടുവിടാൻ. അവിടെ അവൾക്ക് അനുഭവിക്കേണ്ടിവരുന്നത് എന്തൊക്കെ ആയിരിക്കുമെന്ന് അവന് അറിയാമായിരുന്നു.

മരിയയുടെ വീട്ടിലേക്ക് ചെന്നപ്പോൾ വലിയ സ്നേഹത്തോടെ ബെറ്റി ഓടി വന്നു. എങ്കിലും ജോണി അവരെ കണ്ട ഭാവം പോലും നടിച്ചിരുന്നില്ല. മുറ്റത്തിരുന്ന ജോണി നീട്ടി ഒരു തുപ്പ് വെച്ച് കൊടുത്തു കൊണ്ടാണ് അകത്തേക്ക് കയറിയത് മുഖത്ത് അടിക്കുന്നത് പോലെയാണ് സണ്ണിക്ക് തോന്നിയത്. എങ്കിലും അയാൾ സംയമനം പാലിച്ചു

ജോണി മരിയയേ ഇവിടെ ആക്കിയിട്ട് വീട്ടിലേക്ക് പോകാന് ആണ് ഞങ്ങൾ വന്നത്. കല്യാണത്തിന് ഇനി വളരെ കുറച്ച് ദിവസം കൂടിയല്ലേ ഉള്ളൂ. ബാക്കി കാര്യങ്ങളൊക്കെ എങ്ങനെയാണെന്ന് താൻ പറഞ്ഞില്ലല്ലോ.?

അയാളുടെ മുഖത്തേക്ക് നോക്കിക്കൊണ്ട് ജോണി ചോദിച്ചു

ബാക്കി എന്ത് കാര്യങ്ങൾ?

താൽപര്യമില്ലാത്ത മട്ടിൽ ജോണി തിരിച്ചു ചോദിച്ചു.

കുറച്ചുദിവസം കൂടിയുള്ളു കല്യാണത്തിന്. മന്ത്രകോടി എടുക്കാനും മിന്ന് എടുക്കാനും ഒക്കെ പോകണ്ടേ.? അപ്പൊ മരിയയെ താൻ കൊണ്ടുവരുമോ അതോ ഞങ്ങൾ വന്നു കൊണ്ടു പോകണോ.? അതൊക്കെ അറിയാൻ ആയിരുന്നു.

ഞാൻ ഇതിനാത്ത് ഒന്നും സഹകരിക്കില്ലെന്ന് തന്നോട് നേരത്തെ തന്നെ പറഞ്ഞതല്ലേ. പിന്നെന്തിനാ ഈ കാര്യങ്ങളൊക്കെ എന്നോട് ചോദിക്കുന്നത്.

അങ്ങനെ പറഞ്ഞാൽ എങ്ങനെയാ ജോണി ശരിയാവുന്നത്.

സണ്ണിക്ക് ദേഷ്യം വന്നിരുന്നു അയാളുടെ ശബ്ദം അല്പം പൊങ്ങി പോയിരുന്നു

എന്റെ മോൾ ഒന്നുമല്ല ഞാൻ ഓടി നടക്കാൻ….

അയാളുടെ ആ ഒരൊറ്റ മറുപടിയിൽ എന്തു മറുപടി പറയണം എന്ന് അറിയാത്ത അവസ്ഥയിലായിരുന്നു സണ്ണിയും. മരിയയുടെ കണ്ണുകൾ നിറഞ്ഞു

സോളമന് നന്നേ ദേഷ്യം വന്നു. എങ്കിലും അവൻ അത് മനസ്സിൽ തന്നെ ഒതുക്കി. ഇനി താൻ എന്തെങ്കിലും പറഞ്ഞ് അവസാനം നിമിഷം വിവാഹം മുടങ്ങണ്ട എന്ന് ഒരു ചിന്തയായിരുന്നു അവന്റെ മനസ്സിൽ.

നിങ്ങൾ ഇവിടെ വന്ന് കൊണ്ടുപോകുവോ സ്വർണം എടുത്തുകൊടുക്കുവോ എന്താണെന്ന് വെച്ചാൽ ചെയ്തോ എന്റെ ഭാഗത്തു നിന്ന് ഒരു നക്കാപ്പിച്ച പൈസ പോലും കിട്ടുമെന്ന് നിങ്ങൾ പ്രതീക്ഷിക്കേണ്ട. ഇവൾക്ക് വേണ്ടി മുടക്കാൻ ഇപ്പോൾ ഇവിടെ ഒരു രൂപ പോലും ഇല്ല.

ജോണി തീർത്തു പറഞ്ഞു.

താൻ ഒരു രൂപ പോലും അവൾക്ക് വേണ്ടി മുടക്കണ്ട, തന്റെ ഒരു ചില്ലി കാശ് പോലും അവൾക്ക് വേണ്ട.

ഇതിൽ കൂടുതൽ പിടിച്ചുനിൽക്കാൻ സോളമന് കഴിയുമായിരുന്നില്ല

ഇത്ര ഉരുക്കമുള്ള പെണ്ണിനെ എന്തിനാടാ നമുക്ക്, ആരോരും ഇല്ലാത്തൊരു പെണ്ണിനെ നമ്മുടെ ചെറുക്കനെ കൊണ്ട് കെട്ടിക്കാൻ സമ്മതിപ്പിച്ചപ്പോൾ ഇതുങ്ങൾക്കൊക്കെ അഹങ്കാരം

ദേഷ്യത്തോടെ വല്യമ്മച്ചി ചോദിച്ചപ്പോൾ അവളുടെ കണ്ണുകൾ നിറഞ്ഞു വന്നിരുന്നു..

നിങ്ങളെ ഞങ്ങൾ ആരെങ്കിലും ഇങ്ങോട്ട് ക്ഷണിച്ചൊ ഇല്ലല്ലോ

അവരുടെ മറുപടിക്ക് മറുപടി എന്നതുപോലെ ജോണി ചോദിച്ചപ്പോൾ സണ്ണിക്കും ദേഷ്യം വന്നിരുന്നു..

ശരി ഞങ്ങൾ വന്നു അവളെ കൊണ്ട് പൊക്കോളാം, പക്ഷേ കല്യാണസമയത്ത് വണ്ടി അറേഞ്ച് ചെയ്യേണ്ടേ.? പള്ളിയിലേക്ക് നിങ്ങൾ എങ്ങനെ വരും.?

എനിക്ക് ഇതിനെക്കുറിച്ച് ഒന്നും അറിയില്ല. കേൾക്കുകയും വേണ്ട..

ദേഷ്യത്തോടെ ജോണി അകത്തേക്ക് പോയപ്പോൾ എന്ത് ചെയ്യണം എന്ന് അറിയാത്ത അവസ്ഥയിലായിരുന്നു സണ്ണി..

” പപ്പാ, പപ്പ എനിക്ക് വേണ്ടി ഒരുപാട് നാണംകെട്ടു എനിക്ക് മനസ്സിലായി, ഇനി അയാളുടെ മുന്നിൽ തലകുനിച്ചു നിൽക്കണ്ട. മരിയയെ ഇവിടെ നിർത്താൻ പറ്റില്ല. അവൾ നമ്മുടെ കൂടെ വരട്ടെ.. എന്താണെങ്കിലും കല്യാണം കഴിഞ്ഞ് അവള് നമ്മുടെ കൂടെയല്ലേ വരേണ്ടത്. ഒരാഴ്ച മുൻപ് നമ്മുടെ കൂടെ നിന്നു എന്ന് പറഞ്ഞു ഒരു ബുദ്ധിമുട്ടും ഉണ്ടാകാൻ പോകുന്നില്ല. അയാൾ ലാസ്റ്റ് ടൈമിൽ എന്തെങ്കിലും കൊനഷ്ട് ഒപ്പിക്കാൻ ഉള്ള പരിപാടിയാ

ദേഷ്യത്തോടെ സോളമൻ സണ്ണിയുടെ മുഖത്തേക്ക് നോക്കി പറഞ്ഞപ്പോൾ അതുതന്നെയാണ് ശരിയെന്ന് സണ്ണിക്കും തോന്നി.

അവൾ നമ്മുടെ കൂടെ വരട്ടെ ഇച്ചായ

അമല കൂടി അങ്ങനെ പറഞ്ഞപ്പോൾ വലിയ സമാധാനം തോന്നിയിരുന്നു സോളമനും.

ബെറ്റി കല്യാണത്തിന് വരണം.!

നിറഞ്ഞ കണ്ണുകളോടെ ഒന്നും ചെയ്യാൻ പറ്റാതെ നിൽക്കുന്ന ബെറ്റിയുടെ മുഖത്തേക്ക് നോക്കി സണ്ണി പറഞ്ഞപ്പോൾ അവരുടെ കണ്ണുകൾ നിറഞ്ഞു പോയിരുന്നു അവളുടെ കൈയിൽ അധികാരത്തോടെ പിടിച്ചുകൊണ്ട് സോളമൻ കാറിലേക്ക് കയറ്റിയപ്പോൾ ആ കണ്ണുനീരിലും ആ മിഴികൾ ഒന്ന് തിളങ്ങി. തന്റെ മകൾ സുരക്ഷിതമായ കരങ്ങളിൽ ആണെന്നോർത്ത്…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…