വഖഫ് നിയമഭേദഗതി ബിൽ രാജ്യസഭയിലും പാസായി. 128 പേർ ബില്ലിനെ അനുകൂലിച്ചപ്പോൾ 95 പേർ എതിർത്തു. കഴിഞ്ഞ ദിവസം ലോക്‌സഭയിലും ബിൽ പാസായിരുന്നു. പാർലമെന്റ് കടന്നതോടെ ബിൽ രാഷ്ട്രപതിയുടെ അംഗീകാരത്തിനായി അയക്കും. രാഷ്ട്രപതി ബില്ലിൽ ഒപ്പിടുന്നതോടെ നിയമമായി മാറും.
രാജ്യസഭയിൽ മണിക്കൂറുകൾ നീണ്ട ചർച്ചക്ക് ശേഷമായിരുന്നു വോട്ടെടുപ്പ്. പ്രതിപക്ഷ അംഗങ്ങളുടെ നിർദേശം വോട്ടിനിട്ട് തള്ളി. കേന്ദ്ര ന്യൂനപക്ഷകാര്യ മന്ത്രി കിരൺ റിജിജുവാണ് രാജ്യസഭയിലും ബിൽ അവതരിപ്പിച്ചത്. നേരത്തെ ലോക്‌സഭയിലും പ്രതിപക്ഷ അംഗങ്ങളുടെ നിർദേശങ്ങൾ വോട്ടിനിട്ട് തള്ളിയിരുന്നു
കഴിഞ്ഞ ദിവസം പുലർച്ചെ രണ്ട് മണിയോടെയാണ് ബിൽ ലോക്‌സഭയിൽ പാസായത്. 232 പേർ ബില്ലിനെ എതിർത്തപ്പോൾ 288 പേർ അനുകൂലിച്ചു. 14 മണിക്കൂർ നേരമാണ് ബില്ലിൽ ലോക്‌സഭയിൽ ചർച്ച നടന്നത്. വഖഫ് സ്വത്തുക്കളെ നിയന്ത്രിക്കുന്ന 1995ലെ നിയമം ഭേദഗതി ചെയ്യുന്നതിനാണ് കേന്ദ്രം ബിൽ അവതരിപ്പിച്ചത്.
