വീട്ടിലെ പ്രസവത്തിൽ യുവതി മരിച്ച സംഭവം; അസ്മയുടെ പ്രസവമെടുക്കാൻ സഹായിച്ച സ്ത്രീ പിടിയിൽ

മലപ്പുറത്ത് വീട്ടിലെ പ്രസവത്തിനിടെ യുവതി മരിച്ച സംഭവത്തിൽ ഒരാൾ കൂടി അറസ്റ്റിൽ. മരിച്ച അസ്മയുടെ പ്രസവമെടുക്കാൻ സഹായിച്ച സ്ത്രീയെയാണ് അറസ്റ്റ് ചെയ്തത്. ഒതുക്കുങ്ങൽ സ്വദേശി ഫാത്തിമയാണ് പിടിയിലായത്. സംഭവത്തിൽ അസ്മയുടെ ഭർത്താവ് സിറാജുദ്ദീനെ പോലീസ് നേരത്തെ അറസ്റ്റ് ചെയ്തിരുന്നു അസ്മയെ വീട്ടിൽ വെച്ച് പ്രസവിക്കുന്നതിന് സിറാജുദ്ദീൻ നിർബന്ധിച്ചെന്നാണ് ഇയാൾക്കെതിരായ കുറ്റം. പ്രസവത്തിൽ അസ്മ മരിച്ചതിനാൽ നരഹത്യയും തെളിവ് നശിപ്പിച്ചതിനാൽ ഈ കുറ്റവും സിറാജുദ്ദീനെതിരെ ചുമത്തിയിട്ടുണ്ട്. അഞ്ചാമത്തെ പ്രസവത്തിലാണ് അസ്മ മരിച്ചത് ആദ്യ രണ്ട് പ്രസവവും ആശുപത്രിയിലായിരുന്നു. പിന്നീടുള്ള പ്രസവങ്ങൾ വീട്ടിലും. സിറാജുദ്ദീൻ അനുവദിക്കാത്തതിനാലാണ് അസ്മ ആശുപത്രിയിൽ പോകാതിരുന്നതെന്ന് അന്വേഷണത്തിൽ വ്യക്തമായിട്ടുണ്ട്. പ്രസവശേഷം വൈദ്യസഹായം ലഭിക്കാതെ രക്തം വാർന്നാണ് യുവതി മരിച്ചത്.