ഐസിഇ ഇനി 'നൈസ്' ആകണോ; ജനങ്ങളോട് അഭിപ്രായം തേടി ട്രംപ്: മാധ്യമങ്ങൾക്ക് വട്ടാകുമെന്ന് യുഎസ് പ്രസിഡന്റ്

വാഷിംഗ്ടൺ: അമേരിക്കയിലെ വിവാദ കുടിയേറ്റ വിരുദ്ധ ഏജൻസിയായ 'ഐസിഇ'യുടെ (ICE - Immigration and Customs Enforcement) പേര് മാറ്റാൻ പൊതുജനങ്ങളുടെ അഭിപ്രായം തേടി യുഎസ് പ്രസിഡന്റ് ഡൊണാൾഡ് ട്രംപ്. ഏജൻസിയുടെ പേരിനൊപ്പം 'നാഷണൽ' (National) എന്ന വാക്കുകൂടി ചേർത്ത് അതിനെ 'നൈസ്' (NICE - National Immigration and Customs Enforcement) എന്ന് പുനർനാമകരണം ചെയ്യാനാണ് ട്രംപിന്റെ ആലോചന. തന്റെ സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യൽ' വഴിയാണ് ട്രംപ് ഈ വിചിത്രമായ പോൾ (Poll) പങ്കുവെച്ചത്.

​വ്യാജ വാർത്താ മാധ്യമങ്ങൾ ഐസിഇ (ICE) ഏജൻസിയെ നിരന്തരം വേട്ടയാടുകയാണെന്ന് ട്രംപ് ആരോപിച്ചു. ഏജൻസിയുടെ പേര് 'നൈസ്' (NICE) എന്നാക്കി മാറ്റിയാൽ മാധ്യമങ്ങൾക്ക് അതിനെതിരെ സംസാരിക്കാൻ ബുദ്ധിമുട്ടാകുമെന്നും അവർക്ക് "വട്ടാകുമെന്നും" ട്രംപ് പരിഹസിച്ചു.

​"മാധ്യമങ്ങൾക്ക് 'ഞങ്ങൾ ഇന്ന് ഒരു നൈസ് (NICE) ഫെസിലിറ്റി സന്ദർശിച്ചു' എന്നോ, അല്ലെങ്കിൽ 'നൈസ് (NICE) ഏജന്റുമാർ ഒരു അപകടകാരിയായ മയക്കുമരുന്ന് മാഫിയക്കാരനെ നാടുകടത്തി' എന്നോ പറയേണ്ടി വരും. അവർക്കത് താങ്ങാൻ കഴിയില്ല, മാധ്യമങ്ങൾ പൂർണ്ണമായും ഭ്രാന്ത് പിടിച്ച അവസ്ഥയിലാകും!" - ട്രംപ് തന്റെ പോസ്റ്റിൽ കുറിച്ചു.

​അനധികൃത കുടിയേറ്റക്കാർക്കെതിരെയുള്ള കർശന നടപടികളുടെ പേരിൽ ഐസിഇ ഏജൻസി വലിയ രീതിയിലുള്ള വിമർശനങ്ങൾ നേരിടുന്ന പശ്ചാത്തലത്തിലാണ് ട്രംപിന്റെ ഈ പുതിയ നീക്കം. എന്നാൽ പേര് മാറ്റുന്നതിനോട് ഏജൻസിയിലെ ഉദ്യോഗസ്ഥർക്ക് പൂർണ്ണ സമ്മതമല്ലെന്ന് ട്രംപ് തന്നെ വ്യക്തമാക്കിയിട്ടുണ്ട്. ഉദ്യോഗസ്ഥർക്ക് പഴയ പേര് തന്നെയാണ് കൂടുതൽ താല്പര്യമെന്ന് മുൻ അതിർത്തി സുരക്ഷാ മേധാവി ടോം ഹോമൻ തന്നെ അറിയിച്ചിട്ടുണ്ടെന്നും ട്രംപ് കൂട്ടിച്ചേർത്തു.