കേരളത്തിൽ കഴിഞ്ഞ 24 മണിക്കൂറിനിടെ രേഖപ്പെടുത്തിയ ഉയർന്ന അൾട്രാ വയലറ്റ് സൂചികയുടെ റിപ്പോർട്ടുമായി ദുരന്തനിവാരണ അതോറിറ്റി. കോട്ടയം, ആലപ്പുഴ, പത്തനംതിട്ട എന്നീ മൂന്ന് ജില്ലകളിലാണ് ഓറഞ്ച് അലർട്ട്. ദുരന്തനിവാരണ അതോറിറ്റി സ്ഥാപിച്ച ചങ്ങനാശ്ശേരി, ചെങ്ങന്നൂർ, കോന്നി സ്‌റ്റേഷനുകളിൽ അൾട്രാ വയലറ്റ് സൂചിക 8 ആണ്
യുവി ഇൻഡക്‌സ് 8 മുതൽ 10 വരെയാണ് ഓറഞ്ച് അലർട്ട്. ഈ ജില്ലകളിൽ അതീവ ജാഗ്രത വേണമെന്നും കാര്യമായ മുൻകരുതലുകൾ സ്വീകരിക്കണമെന്നും മുന്നറിയിപ്പിൽ പറയുന്നു. കൊല്ലം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ യെല്ലോ അലർട്ടാണ്. യുവി ഇൻഡക്‌സ് 6 മുതൽ 7 വരെയാണ് യെല്ലോ അലർട്ട്
തുടർച്ചയായി കൂടുതൽ സമയം അൾട്രാ വയലറ്റ് രശ്മികൾ ശരീരത്തിൽ ഏൽക്കുന്നത് സൂര്യതാപത്തിനും ത്വക്ക് രോഗങ്ങൾക്കും നേത്രരോഗങ്ങൾക്കും കാരണമാകും. പകൽ 10 മണി മുതൽ വൈകിട്ട് 3 മണി വരെയാണ് ഉയർന്ന അൾട്രാ വയലറ്റ് സൂചിക രേഖപ്പെടുത്തുന്നത്.