💔 മൊഴിയിടറാതെ 💔 : ഭാഗം 36- അവസാനിച്ചു

എഴുത്തുകാരി: തമസാ

ആദ്യം തന്നെ എഴുതി വന്നപ്പോൾ വിട്ട് പോയ വായനക്കാരോട്, സോറി. പ്രത്യേകിച്ച് ആര്യ കലേഷ്, സജിത പ്രശാന്ത് അങ്ങനെ കുറേപ്പേർ…പെട്ടെന്ന് എഴുതുമ്പോൾ വിട്ട് പോകുന്നതാ കേട്ടോ..ഇൻബോക്സിൽ പറഞ്ഞവരുടെ സ്വകാര്യത മാനിച്ചുകൊണ്ട് ഇട്ടിട്ടില്ല… ചോറ്റുപാത്രവും കയ്യിൽ പിടിച്ചു നിൽക്കുമ്പോൾ ഗീതു വിറയ്ക്കുന്നുണ്ടായിരുന്നു……. ചുണ്ടുകൾ പരസ്പരം അടുക്കാതെ, തണുപ്പാർന്ന പോലെ നിന്നു……… അവളെ വീണ്ടും നോക്കി നിൽക്കുമ്പോൾ ദീപന് ഈ നാളുകൾ മുഴുവൻ ജീവിക്കുവാൻ തന്നെ പ്രേരിപ്പിച്ച പ്രതീക്ഷകൾ ഒന്നുകൂടി ഉയിരിൽ തൊടും പോലെ തോന്നി….. ആ ചെറു സന്തോഷം അവൻ്റെ കണ്ണുകളെ വീണ്ടും നനച്ചുകൊണ്ടിരുന്നു…. “””

മോളെവിടെ ഗീതൂ…. ഒന്ന് വിളിക്ക്….. കൊതിയാവുവാ കാണാൻ….. ഒന്നെന്റെ കുഞ്ഞിനെ കാണാൻ കൊതിച്ചു നരകിച്ചു ജീവിക്കുകയായിരുന്നു ഞാൻ അവിടെ…… അവിടെ തന്നെ ജീവൻ അവസാനിപ്പിച്ചാലോ എന്ന് പലയാവർത്തി തോന്നിയതാ….. പക്ഷേ എന്റെ മോളേ കാണാതെ വയ്യ ഗീതുവേ…. അതുകൊണ്ടാ ഞാൻ ജീവിച്ചത്….. വലുതായോ ഗീതൂ അവള്…. വല്ല്യ കുട്ടിയായോ….. എന്നെ മറന്ന് കാണുവോ ഗീതൂ….. പണ്ട് അച്ഛേന്ന് വിളിച്ചതൊക്കെ മറന്ന് പോയിക്കാണൂലെ………. “”””” ഗീതുവിന്റെ മുഖത്തേക്ക് നോക്കി പറഞ്ഞുകൊണ്ട് ദീപൻ വലതു പുറം കൈ കൊണ്ട് നിറഞ്ഞൊഴുകുന്ന രണ്ട് കണ്ണും തുടച്ചു……. “”” അങ്ങനെയൊന്നും എന്റെ കുഞ്ഞിന് എന്നെ മറക്കാൻ പറ്റില്ല…..

അച്ഛനാന്ന് ഞാൻ വീണ്ടും പറഞ്ഞാൽ എന്റെ മോളോടിവരും…..അച്ഛേനേ കെട്ടിപ്പിടിക്കും….. എനിക്കറിയാം…… എന്റെ കുഞ്ഞിന്റെ മനസ് എനിക്കേ അറിയൂ……. “””” പറഞ്ഞുകൊണ്ട് അവൻ ഇറയത്തേയ്ക്ക് ഇരുന്നു…. “””” കുഞ്ഞോളേ…………………….. “”””” അകത്തേയ്ക്ക് നോക്കി വിളിച്ചു കൊണ്ട് അവൻ ചിരിച്ചു………കുഞ്ഞിനെ കുറിച്ചുള്ള ഓർമ്മകൾ പോലും ചുണ്ടിൽ തെളിമ നിറയ്ക്കും……. ആ കുഞ്ഞു മുഖം….. അവസാനമായി കണ്ട അന്ന് രാത്രി മുഴുവൻ തന്റെ നെഞ്ചോട് ചേർന്നുറങ്ങിയ പീലിക്കണ്ണുകൾ………. ആദ്യമായി നെഞ്ചിൽ മുഖമമർത്തി അവൾ ഉറങ്ങിയ അന്ന് തൊട്ട് ആ പിഞ്ചുകുഞ്ഞിന്റെ ചൂട് തന്റെ നെഞ്ചിലുണ്ട്…….. കുഞ്ഞുകൈകളിലെ കരിവളയും ചുരുണ്ടു വളഞ്ഞ കറുത്ത മുടിയും കൺമഷിപ്പൊട്ടും……. എല്ലാം അതുപോലെ ചങ്കിലുണ്ട്………

നീയില്ലായിരുന്നെങ്കിൽ….. നിനക്കായ്‌ അല്ലായിരുന്നെങ്കിൽ ഞാൻ ഇത്രയും നാൾ ജീവിക്കുമായിരുന്നില്ല മോളേ….. മകളെ കുറിച്ച് ഉള്ളിൽ തുടിക്കുന്ന ഓരോ വാക്കും നാവിനാൽ അടക്കം ചെയ്ത് അവൻ പിന്നെയും മോൾ വരുന്നതും കാത്ത് അകത്തേക്ക് കണ്ണും നട്ടിരുന്നു….. ആ നേരം മുഴുവൻ പകച്ചു നിൽക്കുകയായിരുന്നു ഗീതു…… ഇനി എന്ത്‌ വേണമെന്ന് അറിയില്ല…. ഒന്ന് വായ് തുറന്ന് പറയാൻ പോലുമാകുന്നില്ല……. വെറുതെ, മുൻവശത്തു വർഷങ്ങളായി സ്ഥാനം പിടിച്ചിരുന്ന അമ്മയെയും ഗിരിയെയും അവൾ നോക്കി…. പൊറുക്കുവാനാകുമോ നിങ്ങൾക്ക് ഇവനോട്?!!!! അവൾ അവരെ നോക്കി ചോദിച്ചു, ഉള്ളാലെ….. “”” കുഞ്ഞോളിവിടെ ഇല്ലേ……??? “””””” ദീപന്റെ ചോദ്യമാണ് അവളെ തിരികെ കൊണ്ടുവന്നത്….

“”” നന്ദു ഇവിടെ ഇല്ല….സ്കൂളിൽ പോയേക്കുവാ…….””” അവനോട് പറഞ്ഞിട്ട് അവൾ അകത്തേക്ക് പോകുവാൻ ഒരുങ്ങി……… “”” ഗീതൂ….. മോള്……. സ്കൂളിൽ……. എത്രാം ക്ലാസ്സിലാ….. “””” അത് ചോദിക്കുമ്പോൾ മറ്റൊരു മുഖഭാവമായിരുന്നു ദീപന്…..ഇന്നലെ തന്റെ നെഞ്ചിൽ നിന്ന് എഴുന്നേറ്റ് മാറിയ പോലെയാണ് കുഞ്ഞിനെ കുറിച്ച് ചിന്തിക്കാറ്….. അവൻ അറിയാതെ തന്നെ അവൻ്റെ താടിച്ചുഴികൾ ചിരിച്ചു….. സന്തോഷം കൊണ്ട്… “”” രണ്ടിൽ…… “”” അത്രയും പറഞ്ഞിട്ട് മറുചോദ്യത്തിന് കാക്കാതെ ഗീതു അകത്തേക്ക് കയറി വാതിൽ അടച്ചു…….. വാതിൽ കുട്ടിയിട്ട് തറയിലേക്ക് ഇരിക്കുമ്പോൾ അവളുടെ ഉള്ളിൽ തുലാക്കാലമായിരുന്നു…. ആകാശം ഇടികൊട്ടി പാടാൻ വെമ്പി നിന്നു, കൂടെ മിന്നലുകളും…..

ഏതു നിമിഷവും അവ ആർത്തുപെയ്യുവാൻ തയ്യാറായിരുന്നു……. “”” ഗീതൂ….. വാതിലുതുറക്ക് ഗീതൂ …… നിങ്ങളെ കാണാൻ കൊതിച്ചു വന്നതല്ലേ ഗീതൂ ഞാൻ…… എനിക്ക് സുഖമായിരുന്നോ എന്നെങ്കിലും ചോദിക്ക് ഗീതൂ…… നിങ്ങൾക്ക് വേണ്ടിയല്ലേ ഞാൻ മടങ്ങി വന്നത്……. അവിടെ ഇട്ട് നരകിപ്പിച്ചു പോലീസ്കാര്…… ആ ശേഷാദ്രിയുടെ കുടുംബക്കാരാകും…… ചോര ശർദിച്ചു കിടന്നപ്പോഴും എന്റെ കുഞ്ഞിനെ ഓർത്താ ഞാൻ അവരോട് ഇത്തിരി ജീവൻ ബാക്കി വെയ്ക്കാനായി കാല് പിടിച്ചത്…… ചെയ്തുപോയ എല്ലാ തെറ്റുകൾക്കും ഞാൻ പശ്ചാത്തപിച്ചില്ലേ…… ഇനിയെങ്കിലും ക്ഷമിക്ക് ഗീതൂ……..”””” അതേ വാതിലിപ്പുറം ഇരുന്നുകൊണ്ട് അവളോടായി ദീപൻ പറഞ്ഞുകൊണ്ടിരുന്നു…… “””” ഗീതൂ….

ഞാനും ഗിരിയും ചെയ്തത് ഒന്ന് തന്നെ അല്ലേ ഗീതൂ…. വല്ലവനും വേണ്ടി കൂലിക്ക് ജീവിതം കളഞ്ഞു….. എന്നിട്ട് അവനെ സ്നേഹിക്കാമെങ്കി എന്നേക്കൂടെ സ്നേഹിച്ചു കൂടെ ഗീതൂ…തെറ്റുകൾ തിരുത്തുന്നവരോട് ക്ഷമിക്കുവല്ലേ വേണ്ടത്…… “””” വാതിലിനോട് ചേർന്നിരുന്നു വാതിലിൽ തട്ടിക്കൊണ്ട് ദീപൻ പറഞ്ഞു…. “”” നീയും ഏട്ടനും ചെയ്തത് ഒന്നുതന്നെ ആണോ ദീപാ….എന്റെ ഏട്ടൻ നിന്നെപ്പോലെ ഒരു പെണ്ണിനേം ആക്രമിച്ചിട്ടുണ്ടാവില്ല….. “””” ദീപനോടങ്ങനെ പറയുമ്പോൾ അവളുടെ നാവിന് ഊർജം വന്നു… “””” നിനക്കുറപ്പുണ്ടോ ഗീതൂ…… ഗിരി ഒരു പെണ്ണിനോടും മോശമായി പെരുമാറിയിട്ടില്ലെന്ന് ഉറപ്പിച്ചു പറയാൻ കഴിയുമോ….. കഴിയില്ല….. നിന്റെ കൂടെപ്പിറപ്പ് മോശമാകില്ല എന്ന നിന്റെ വിശ്വാസം മാത്രല്ലേ ഗീതൂ അത്…..

തെറ്റ് ചെയ്ത ആരുടെയും കുടുംബം അവരെ തെറ്റുകാരായി കാണില്ല……എനിക്കൊരു കുടുംബം ഉണ്ടായിരുന്നൽ അവരോട് ചോദിച്ചാലും നല്ലതേ പറയുമായിരുന്നുള്ളു……. “”””” ദീപന്റെ മറുപടിയിൽ ഉത്തരമില്ലാതെ ഗീതു മൗനമായിരുന്നു……… “”” ഒന്ന് വാതിൽ തുറക്ക് ഗീതൂ…… “”” ദീപൻ പിന്നെയും വാതിലിൽ മുട്ടി….ദീപന്റെ ശബ്ദം പിന്നെയും ഉയർന്നു തുടങ്ങിയപ്പോൾ അവൾ ചെന്നു വാതിൽ തുറന്നു…… “”’ തനിക്കെന്താ വേണ്ടത്…… എന്നെ ഇനിയെങ്കിലും ജീവിക്കാൻ വിടൂ…. അനുഭവിച്ചു മതിയായി…. ഏഴു വർഷമായി ഞാൻ ഇങ്ങനെ…… ഒന്നൊഴിയുമ്പോൾ മറ്റൊന്നെന്ന പോലെ ഉറക്കം നഷ്ടപ്പെട്ടു ഞാൻ ജീവിക്കുകയാ……. ഉപദ്രവിക്കല്ലേ ദീപാ….. ആ കൊച്ചിനേം കൊണ്ട് ഞാനെങ്ങനേലും ഒന്ന് തള്ളിനീക്കട്ടെ ഈ ജീവിതം…..

തമ്പുരാൻ ബാക്കി നിർത്തിപ്പോയില്ലേ….. ഒടുക്കാൻ പറ്റില്ലല്ലോ…. അതുകൊണ്ടാ വിധിയോട് പോരിട്ട് ഞാൻ പിടിച്ചു നിൽക്കുന്നത്…….”””” ദീപന്റെ മുന്നിൽ അവൾ കൈക്കൂപ്പി….. കണ്ണുനീർ ഒഴുകി……. ആ മണ്ണിനിതു പരിചിതമായിരുന്നു…… അവ ഉറച്ചത് തന്നെ അവളുടെ കണ്ണുനീരിന്റെ ചൂടിലായിരുന്നു….. “””” മോള് എപ്പഴാ വരുന്നത്…..?…. “””” അവളുടെ കണ്ണുനീരിനിയും കാണുവാൻ വയ്യാതെ അവൻ തിരിഞ്ഞു നിന്ന് ചോദിച്ചു…… “”” നാലരയാകും…… “””” “””” ഞാൻ….. എങ്കിൽ ജംഗ്ഷനിലെ കടയിൽ പോയി കുഞ്ഞോള് വരാറാകുമ്പോഴേക്കും എന്തേലുമൊക്കെ മേടിച്ചിട്ട് വരാം…. മോളേ ഒന്ന് കാണാനുള്ള തിടുക്കത്തിലേ……. ഒന്നും മേടിക്കാൻ പറ്റീല…..

ഒന്ന് കണ്ടാൽ മതീന്നേ ഉണ്ടായിരുന്നുള്ളു…… സാരമില്ല….. പോയിട്ട് ഞാൻ വേഗം വരും……”””” കയ്യും മെയ്യും അവൻ്റെ നാവിനൊപ്പം ആംഗ്യങ്ങൾ കാണിച്ചു……. തറയിൽ നിന്ന് കവറുമെടുത്തു പുറത്തേക്കിറങ്ങിയിട്ട് അവൻ അവൾക്കടുത്തേക്ക് ഒന്ന് കൂടി വന്നു…… “””” അന്ന് ഞാൻ ഏൽപ്പിച്ചു പോയ DNA റിസൾട്ടില്ലേ…. അതൊന്ന് എടുത്തു വെച്ചേക്ക് ഞാൻ വരുമ്പോഴേക്കും…. എനിക്കത് വേണം…… “””” അതും പറഞ്ഞവനിറങ്ങുമ്പോൾ അത് ഞാൻ കത്തിച്ചു കളഞ്ഞെന്ന് അവളുറക്കെ വിളിച്ചു പറഞ്ഞു…..പക്ഷേ അവളുടെ ഇടറിയ ശബ്ദം വേർതിരിച്ചെടുക്കുവാനാകാതെ അവൻ മുന്നോട്ട് തന്നെ നടന്നു………

ചായക്കടയിലേക്കുള്ള വഴിയിൽ ഓർമകളിൽ നിന്ന് തന്നെ ചിക്കിച്ചികയുംപോലെ നോക്കുന്നത് അവൻ കണ്ടു…… നിശബ്ദമായൊരു ചിരിയും അവർക്കായി നൽകി അവൻ ചായക്കടയിലേക്ക് കയറി…. തൊട്ടപ്പുറത്തുള്ള പി എസ് സി കോച്ചിംഗ് സെന്ററിലേക്ക് നോക്കി അവൻ മിഴി നിറച്ചു ചിരിച്ചു….. ഇവിടെയെല്ലായിടത്തും നിന്റെയുമെന്റെയും ഓർമകളുണ്ടാകും ഗീതൂ…. ഒരു ഗ്ലാസ് ചായയുടെ ചൂടിൽ നിനക്കായി ഞാൻ കാവലിരുന്ന ഓർമ്മകൾ……. “”” ഒരു ചായ, സ്ട്രോങ്ങ്‌ “””” ഒരു ചിരിയോടെ അകത്തേക്ക് നോക്കി വിളിച്ചു പറയുമ്പോൾ എല്ലാ മുഖങ്ങളും അവനെ തന്നെ ഉറ്റുനോക്കി….. പത്രങ്ങളിൽ ഒരു വർഷക്കാലം നിറഞ്ഞു നിന്ന മുഖം….. ആർക്ക് മറക്കാനാകും!!!! കുറ്റി വെട്ടി നിർത്തിയിരിക്കുന്ന അവൻ്റെ മുടിയിലേക്ക് അവർ നോക്കി….

ക്ഷീണിച്ച ശരീരത്തിലേക്കും ……. ഒരുപാട് ഇടിച്ചു പിഴിഞ്ഞതാണ്…….. സ്വാധീനം ഉണ്ടെങ്കിൽ എന്തുമാകാം എന്ന് വേദനയോടെ അവൻ മനസിലാക്കിയിരുന്നു..,…… മുൻപ് വരെ സ്വാധീനം എന്താണെന്നു സന്തോഷത്തോടെ ആയിരുന്നു അറിഞ്ഞത്…… നാവിലൊന്ന് ചായ തൊട്ടപ്പോഴേ വല്ലാത്തൊരു രുചി….. ഈ നാവിതെല്ലാം മറന്നിട്ടെത്ര നാളായിരിക്കുന്നു…… തേയിലയുടെ കട്ട് നാവിൽ ഉണ്ടാക്കിയ തരിപ്പറിഞ്ഞു കുടിച്ചു…. കുഞ്ഞോൾക്ക് പൊറോട്ടയും ബീഫ് ഫ്രൈയ്യും കോഴിക്കറിയും പഴംപൊരിയും ഉഴുന്നുവടയുമെല്ലാം വാങ്ങി….. ജയിലിൽ നിന്ന് ഇറങ്ങിപ്പോന്നപ്പോൾ സർ തന്നതാണ്…. അവിടെ ചെയ്ത വേലകൾക്കുള്ള കൂലിപ്പണം…. ചായക്കടയിലെ ക്ലോക്കിൽ സമയം നോക്കിയപ്പോൾ മൂന്നേമുക്കാൽ…….

കുഞ്ഞോള് വരാൻ ഇനിയും സമയമുണ്ട്……. നാളെ എറണാകുളം പോവണം….. നല്ല വിലക്കൂടിയ ഒരു ഉടുപ്പ് തന്നെ വാങ്ങിക്കണം….. അവളതുമിട്ട് തന്റെ അടുത്തേക്ക് ഓടിവരുമ്പോൾ നിലത്തു നിന്ന് വാരിയെടുത്ത് നിറുകയിൽ മുത്തം വയ്ക്കണം…..നെഞ്ചോടൊട്ടിച്ചു കെട്ടിപ്പിടിക്കണം……. അച്ഛനാണെന്ന് പറയണം…….. പിന്നെ…… പിന്നെ…… ഒരുപാട് നേരം മടിയിലിരുത്തണം…… അച്ഛയെ ഇഷ്ടാണോന്ന് ചോദിക്കണം…. നിറച്ചും മോഹങ്ങളാ….. ചങ്ക് നിറച്ചു പരന്ന് കിടക്കുന്ന മോഹക്കൂട്ടങ്ങൾ…… എല്ലാത്തിനും മേലേ എന്റെ കുഞ്ഞിനെ ഒന്ന് കണ്ണ് നിറച്ചു കാണണം….. ടൗണിൽ നിന്ന് ഗീതുവിന്റെ വീട്ടിലേക്ക് തിരിച്ചു നടക്കുമ്പോൾ മനസ്സിൽ പറഞ്ഞും പുറമേ ചിരിച്ചും ദീപൻ നാളെയെ സങ്കൽപ്പിച്ചു നോക്കി…..

തൊട്ട് മുൻപിൽ വന്ന് ഒരു ചുവന്ന ഐ ട്വന്റി നിർത്തിയപ്പോൾ ആണ് സ്ഥലകാല ബോധം ദീപന് വന്നത്…… അതുവരെ അവൻ നെയ്യുകയായിരുന്നു, അവൻ്റെ മാത്രം സ്വപ്നങ്ങളെ……. കാറിന്റെ പുറകിലെ ഡോർ തുറന്ന് ദേവസി വക്കീലും, പുറകെപ്പുറകെ ഓരോരുത്തരായി നാലുപേർ അവന്റെ മുന്നിൽ വന്ന് നിന്നു……. ചുറ്റും ഒന്ന് നോക്കിയപ്പോൾ മനസിലായി ആരും ഇല്ല സഹായിക്കാൻ എന്ന്…….. “”” ജയിലിലെ കിടപ്പ് സുഖമായിരുന്നോ ദീപാ…?? “”” അയാളുടെ മുഴുവൻ വെളുത്ത തലമുടി, സൂര്യന്റെ വെയിലിൽ തിളങ്ങുന്നുണ്ടായിരുന്നു…… കൂടെ നിന്നവരുടെ മുഖത്ത് നോക്കിനിന്ന് കുറച്ചു കഴിഞ്ഞപ്പോൾ ആണ് ദീപന് അവരെ മനസിലായത്…. അന്നത്തെ പ്രശ്നങ്ങൾക്ക് തുടക്കമിട്ടവർ …..

റിസൾട്ട്‌ വാങ്ങി മടങ്ങി വരുന്ന വഴി തന്നേ തടഞ്ഞവർ….. “”””” കുഴപ്പമില്ലായിരുന്നു….. “”” അവരുടെ മുഖത്തേക്ക് നോക്കാതെ വശങ്ങളിലേക്ക് ദൃഷ്ടി മാറ്റി ദീപൻ പറഞ്ഞു…… “”” നിനക്ക് വേണ്ട സുഖങ്ങളൊക്കെ ഞങ്ങള് വാങ്ങിത്തന്നതാടാ…….. ഈർക്കിൽ പ്രയോഗം ദേ, ഞങ്ങള് സ്പെഷ്യൽ ആയിട്ട് സ്പോൺസർ ചെയ്തതാ…. എന്റെ ഉള്ളം കാലും കുത്തിക്കീറി വെച്ചിട്ട്, കൂടെ നിന്നവരെ കുത്തി പത്തുനൂറു കഷ്ണമാക്കിയിട്ട് സുഖിപ്പിക്കാൻ പറ്റുവോ നിന്നെ…….. നല്ല കാശിറക്കി കളിച്ചതാ ഞങ്ങള്…… “”” ദീപന് അതൊരു ഞെട്ടലായിരുന്നു…… ജനനേന്ദ്രിയത്തിലൂടെ ഈർക്കിൽ തുളഞ്ഞു കയറുമ്പോൾ ഉണ്ടാകുന്ന വേദന പച്ചയ്ക്ക് അനുഭവിച്ചതാണ്….. ജയിലറയിൽ കിടന്നുറക്കെ കരഞ്ഞതാണ്……

പക്ഷേ പ്രതീക്ഷിച്ചില്ല ഇവരാകുമെന്ന്…. അപ്പോൾ ശേഷാദ്രിയുടെ ആൾക്കാർ അല്ലെങ്കിൽ പിന്നെ….. ഇവർക്കെങ്ങനെ ഒറ്റയ്ക്ക്…… ചട്ടിച്ചട്ടി മുൻപിലേക്ക് കയറിവരുന്നവനെ സംശയത്തോടെ ദീപൻ നോക്കി… “”” പേടിക്കണ്ടടാ….. വക്കീലാ ആള്…. ശേഷാദ്രി സാറങ്ങു ചത്തു പോയപ്പോൾ ബിനാമിയായി നിന്ന വക്കീല് അതെല്ലാം അടിച്ചെടുത്തു….. ഞങ്ങൾക്കും ഒരു നാഥൻ വേണ്ടേ…… ഇപ്പോ വക്കീലിന്റെ കൂടെയാ….. “””””” കൂടെ നിന്നവൻ മരിക്കുമ്പോൾ അയാളുടെ സ്വത്തുകൾ സ്വന്തമാക്കുകയോ…. ആത്മാർത്ഥ മിത്രത്തെ ചതിക്കാൻ പറ്റുവോ ദേവസി വക്കീലിന്…. ദീപന്റെ തലച്ചോർ അവനോട് ചോദിച്ചുകൊണ്ടിരുന്നു…. “”” നീയെന്നതാ ചിന്തിക്കുന്നതെന്ന് എനിക്കറിയാം…..

ഒത്തിരിയൊന്നും എടുത്തില്ല ദീപാ……. ശേഷൻ കണക്കിൽ പെടുത്താതെ മാറ്റിവെച്ചില്ലേ…. അത് മാത്രേ ഞാൻ എടുത്തോളൂ….. വേറൊന്നും എനിക്ക് വേണ്ടായേ…… “””” ഷർട്ടിന്റെ കോളർ പുറകിലേക്ക് വലിച്ചിട്ടു കൊണ്ട് വക്കീൽ പറഞ്ഞു… “”” വക്കീലേ….. കഴിഞ്ഞത് കഴിഞ്ഞു…. ഇനി ഒന്നും വേണ്ട….. ജയിലിൽ വെച്ചു ശിക്ഷിച്ചില്ലേ നിങ്ങളെന്നെ…. അത് മതി… വെറുതെ വിട്…… “””” എല്ലാവരുടെയും മുഖത്തേക്ക് മാറിമാറി നോക്കി ശബ്ദം താഴ്ത്തി ദീപൻ പറഞ്ഞു….. “””” വെറുതെ വിടാൻ പറ്റില്ലലോ ദീപാ…. അതിനായിരുന്നേൽ നീ പോകുന്നിടവും തപ്പി നടക്കേണ്ട കാര്യമില്ലല്ലോ ഞങ്ങൾക്ക്….. “”” ഒരാൾ വിളിച്ചു പറഞ്ഞു…. “”” വക്കീലേ…… ഞാൻ….. എന്റെ മോളേ കാണാൻ വേണ്ടി…. കൊതിച്ചു വന്നതാ …….. എന്തൊരുമായി അവളെന്നു പോലും എനിക്കറിയില്ല….. പക്ഷേ അവളില്ലാതെ പറ്റില്ല വക്കീലേ എനിക്ക് ….

ജയിലിൽ നിന്ന് ഞാൻ നേരെ വന്നതിങ്ങോട്ടാ…. എന്റെ കുഞ്ഞിനെ ഒന്ന് കാണാൻ…. ഇത്‌ കണ്ടോ…. അവൾക്ക് വേണ്ടി ഞാൻ വാങ്ങീതാ…….. വെറുതെ വിട് വക്കീലേ….. ഞാനിനി ഒന്നിനും വരില്ല … നിങ്ങളുടെ കൺവെട്ടത്ത് പോലും വരില്ല……””” കയ്യിലെ പൊതി പെരുവിരലിൽ കോർത്തിട്ട് അവർക്ക് നേരെ ഉയർത്തിക്കാട്ടി ദീപൻ പറഞ്ഞു…… “””” ശെരി…. നിന്നെ വെറുതെ വിട്ടേക്കാം… പക്ഷേ….. അവള് നിന്റെ കൊച്ചാണെന്ന് നിനക്കെന്താടാ ഇത്ര ഉറപ്പ്…. കൊച്ചിന്റെ തള്ളയ്ക്ക് പോലും അറിയില്ല…. അപ്പോഴാ ഒരു തന്ത……. “””” ദേവസ്സി അത് പറഞ്ഞപ്പോൾ കൂടെ നിന്നവരെല്ലാം അവനെ നോക്കി പുച്ഛിച്ചും കളിയാക്കിയും ചിരിച്ചു…… “”” എന്റെ അല്ലെന്ന് വക്കീലിനെന്താ ഇത്ര ഉറപ്പ്…??? “”””

ഉള്ളിൽ പതഞ്ഞ അരിശം നാവിൻ തുമ്പാൽ തൊടുത്തു വിട്ടു ദീപൻ…… “”” എടാ ചെറുക്കാ…… നാക്ക് ഒത്തിരി അങ്ങോട്ട് പൊക്കല്ലേ….. നീ പറഞ്ഞ ആ കൊച്ചില്ലേ…. ആ പെഴച്ചവള് പെറ്റ സന്താനം…. അത് എന്റെ ഒരു വാശിയാരുന്നു……പ്രതികാരം “””” വക്കീൽ പറഞ്ഞത് മനസിലാകാതെ ദീപൻ അയാളെ പകച്ചു നോക്കി…. “”” ഹയ്യോ എന്റെ വിത്താണെന്ന് ഒന്നും അല്ലടാ ചെറുക്കാ…. അവളെ അന്ന് ബോധമില്ലാതേ ആശുപത്രിയുടെ ഐ സി യുവിൽ നാട്ടുകാര് കൊണ്ടിട്ടപ്പോൾ, ഞാനാ അവൾക്കുള്ള പിൽസ് മുടക്കിയത്….. രണ്ടു കോടിയിൽ എനിക്ക് കിട്ടേണ്ടിയിരുന്ന മുക്കാൽ കോടി ആ ഗിരി കൊണ്ടുപോയി തുലച്ചതിനുള്ള പ്രതികാരം….. അവൻ്റെ കുടുംബം ഒരു ജന്മം മുഴുവനും അനുഭവിക്കുന്നത് എനിക്ക് കാണണമായിരുന്നു…. എമർജൻസി കോൺട്രാസെപ്റ്റിവ് പിൽ കൊടുക്കും റേപ്പ് വിക്ടിമുകൾക്ക്…..

പ്രെഗ്നന്റ് ആവാതിരിക്കാൻ… ഒരു ലക്ഷം എന്റെയീ കൈകൊണ്ടാ, അവളെ നോക്കിയ ഡോക്ടറുടെ ഉള്ളംകയ്യിലേക്ക് വെച്ച് പിടിപ്പിച്ചത്…. മേടിച്ച കാശും പോക്കറ്റിലും ഗർഭ നിരോധന ഗുളിക വേസ്റ്റ് ബിന്നിലും വീണപ്പോൾ ഉണ്ടായതാ ആ കൊച്ച്…. എന്റെ സൗജന്യമാടാ നീ പറഞ്ഞ മോള്……. ദേവസ്സിയുടെ സൗജന്യം കൊണ്ട് പിറന്നത്…… അല്ലെങ്കിൽ അവൾ അമ്മേടെ ഗർഭപാത്രം പോലും കാണില്ലായിരുന്നു……”””” ദേവസ്സി പറഞ്ഞതിലെ അർത്ഥങ്ങൾ ഗ്രഹിക്കുകയായിരുന്നു ദീപൻ….. അല്ലെങ്കിലും ഇന്ത്യയിലെ ലൈംഗിക പീഡനങ്ങൾക്ക് വിധേയരാകുന്ന പല കുട്ടികളും ഗർഭിണി ആകുന്നത് ഇങ്ങനെ ഉള്ള തിരിമറികൾ കൊണ്ടോ, കൃത്യ സമയത്ത് എമർജൻസി കോൺട്രാസെപ്റ്റിവ് ഗുളികകൾ നൽകാതെ പോകുന്ന ഹോസ്പിറ്റലുകളുടെ അനാസ്ഥ മൂലമോ ആണ്……

അതുമല്ലെങ്കിൽ ഒളിച്ചു വെച്ചു സ്വയം ചികിത്സ നൽകുന്ന കുടുംബമോ കുട്ടിയോ കാരണവും …… “””” ആരുടെ സൗജന്യമായാലും അവളെന്റെ കുഞ്ഞാ വക്കീലേ…… ഞാനും എന്റെ മോളും ഇനിയൊന്നു ജീവിച്ചോട്ടെ…… പോകുവാ ഞാൻ…. “””” അവരോട് പറഞ്ഞിട്ട് മുന്നോട്ട് നടന്ന ദീപനെ അവരെല്ലാവരും കൂടി മണ്ണിലേക്ക് ചവിട്ടി വീഴ്ത്തി ഉപദ്രവിക്കുവാൻ തുടങ്ങി…. “””” വേണ്ടാന്ന് പറ വക്കീലേ ഇവരോട്….. എനിക്കെന്റെ മോളേ ഒന്ന് കണ്ടേച്ചാൽ മതി… എനിക്ക് പോണം….. എന്റെ കുഞ്ഞിനെ കണ്ടേ പറ്റോളൂ….. “””” വർഷങ്ങളായി കിട്ടിയ ശിക്ഷകൾ കൊണ്ട് തിരിച്ചൊന്നു തല്ലാൻ പോലും ആകാത്തവണ്ണം തളർന്നു പോയിരുന്നു ദീപന്റെ ശരീരം…… പക്ഷേ ഒരുകാലത്തു മിത്രങ്ങളായിരുന്ന ഇപ്പോഴത്തെ ശത്രുക്കൾ അവൻ്റെ വയ്യായ്കയെ പോലും മുതലാക്കിക്കൊണ്ട് അവൻ്റെ മുഖം നിലത്തിട്ട് ഉരച്ചു….

അപ്പോഴും അവൻ്റെ ഇടം കയ്യിൽ നന്ദൂട്ടിയ്ക്ക് വേണ്ടി അവൻ വാങ്ങിച്ച പലഹാരപ്പൊതി സുരക്ഷിതമായിരുന്നു…. “””” എന്നെ……………. കൊല്ലല്ലേടാ….. ഞാനെന്റെ കുഞ്ഞിനെ ഒരുവട്ടം എങ്കിലും കണ്ടോട്ടെടാ….. “”” ദീപൻ അവരുടെ കീഴിൽ കിടന്ന് കൊണ്ട് കരഞ്ഞു കൊണ്ട് ഇടറിപ്പറഞ്ഞു……. “”””” പറ്റില്ലടാ…. നിന്നെ ഞങ്ങൾക്ക് കൊല്ലണം….. കൂടെ നിന്നവരെ ഒരു പെണ്ണിന് വേണ്ടി ചതിച്ചിട്ട് പോയ നിന്നെ തീർക്കും ഞങ്ങൾ….. “”” ദീപന്റെ രണ്ട് കയ്യും പുറകിലേക്ക് വലിച്ചു പിടിച്ചിട്ട് പുറത്ത് ചവിട്ടിപ്പിടിച്ചു അവർ….. ആ റോഡിന്റെ വശത്തെ മണ്ണ് അവൻ്റെ വായിൽ കലർന്നു … ഉരഞ്ഞ മുഖത്തു നിന്നു ചോരയും വായിൽ നിന്ന് മണ്ണ് കലർന്ന ഉമിനീരും നിലത്തേക്ക് വീണു കൊണ്ടിരുന്നു….. “””” ഈയൊരു ദിവസമെങ്കിലും താ വക്കീലേ എനിക്ക് …. നാളെ നിങ്ങൾ പറയുന്നിടത്തു വന്നോളാം ഞാൻ….

എനിക്കെന്റെ കൊച്ചിനെ കാണണം വക്കീലേ…… എന്നെ ഒരു ദിവസത്തേക്ക് വെറുതെ വിട് വക്കീലേ…. “”” നിലത്തു കൂടി ഇഴഞ്ഞു ചെന്നവൻ, വക്കീലിന്റെ കറുത്ത പാന്റിന്റെ കാലുകളിൽ പിടിച്ചു കരഞ്ഞു …. “”” എന്റെ മോള്…. ഒന്ന് കണ്ടാൽ മാത്രം മതി..എന്നിട്ടെന്നെ കൊന്നോ….””” കരഞ്ഞു കാല് പിടിക്കുന്ന ദീപനെ തൊഴിച്ചു മാറ്റിയിട്ടു വക്കീൽ കൂടെയുള്ളവരെ നോക്കി…. “””” തീർത്തേക്കടാ ഈ നായിന്റെ മോനെ…. അല്ലെങ്കിൽ നാളെ ഇവൻ ഉയിർത്തെഴുന്നേറ്റാലോ……!!!.. “”””” കാറിന്റെ ഡോർ തുറന്നു വലിയ വടിവാൾ എടുത്ത് ദീപന് നേരെ വീശുമ്പോഴും അവൻ കൈകൂപ്പി നിന്ന് കേണു അവർക്ക് മുന്നിൽ….. “”” ഒന്നെന്റെ കുഞ്ഞോളേ കണ്ടാൽ മതിയെനിക്ക് “”””” മുടന്തി വന്ന അയാൾ ദീപന്റെ നെഞ്ചിലേക്ക് വടിവാൾ വെട്ടിയിറക്കി…..

വേദന കൊണ്ട് നിലത്തു കിടന്നു പുളയുമ്പോഴും പുറകേ പുറകെ ശരീരത്തിൽ വീഴുന്ന ഓരോ വെട്ടുകളിലും നോവാതെ അവനെ നീറ്റിയത് പണ്ടൊരുനാളിൽ നെഞ്ചിൽ കയറ്റിവെച്ച ആ പിഞ്ചു മുഖമായിരുന്നു…. കുനുകുനെ ചുരുണ്ട മുടിയും…… തൂവെള്ളക്കവിളും….. കറുത്തപീലിക്കണ്ണും…. ചിരിക്കുമ്പോൾ കൂടെ ചിരിക്കുന്ന കൃഷ്ണമണിയും……… ചുവന്ന ഇത്തിരിച്ചുണ്ടും… എന്റേതും നിന്റേതും നമ്മുടേതുമായ താടിയിലെ ചുഴിയും…… അവസാന നിമിഷത്തിലെങ്കിലും ഒന്ന് കാണാൻ ആയിരുന്നെങ്കിൽ എന്ന് അവൻ്റെ ഹൃദയം ഒരുപാട് കൊതിച്ചു .. ആ മുഖമൊന്ന് കണ്ടിരുന്നെങ്കിൽ……. അച്ഛേടെ പൊന്നേ എന്ന് വിളിച്ചുകൊണ്ട് മാറിൽ ചേർക്കുവാൻ കഴിഞ്ഞിരുന്നെങ്കിൽ… നിറയെ മുത്തം നൽകുവാൻ കഴിഞ്ഞിരുന്നെങ്കിൽ….

പണ്ട് ഒളിച്ചു നിന്ന് അച്ഛേടെ കുഞ്ഞോളേ എന്ന് വിളിച്ചുവിളിച്ച് ഒടുവിൽ, എന്റെ കുഞ്ഞോളേ എന്ന വിളിയ്ക്ക് അച്ഛേ എന്ന് അന്നത്തേത് പോലെ നീ വിളികേൾക്കുന്നതും തിരികെ വിളിയ്ക്കുന്നതും കേൾക്കുവാൻ ആയെങ്കിൽ….. അവൻ്റെ കണ്ണുകൾ മുകളിലേക്ക് മലച്ചു തുടങ്ങിയിരുന്നു …. കുഞ്ഞോളേ, ദൂരേ നിന്നെങ്കിലും അച്ഛയ്ക്ക് നിന്നെ എനിക്ക് കാണാൻ കഴിഞ്ഞിരുന്നെങ്കിൽ….. നിലത്തു വീണു കിടന്ന പലഹാരപ്പൊതിയെ തേടാൻ തുടങ്ങി പൂർത്തിയാക്കും മുൻപേ ആ കണ്ണുകൾ നിശ്ചലമായിരുന്നു……. തന്റെ മകളാകണേ എന്ന് മോഹിച്ച്, അവളെ ഒന്ന് കാണുവാൻ കൊതിച്ച്, അവളെയൊന്ന് ചുംബിക്കാൻ ആഗ്രഹിച്ച്, അവളുടെ വിളിയൊന്നു കേൾക്കുവാൻ കാത്തിരുന്നൊടുവിൽ ആ സ്വപ്നവും ബാക്കി വെച്ച് ആ പാപി യാത്രയായി……… “””””” ഭൂമിയിൽ ഒരു സ്വർഗം കാത്തിരിക്കേ, സ്വയം നരകം പണിതതും നീ താൻ…… “”””

“”” വക്കീലേ….. ഒന്നുമില്ലേ ഇവിടെ “”” ദീപനെ തീർത്തതിന്റെ സന്തോഷം വില കൂടിയ മദ്യങ്ങൾ കൊണ്ട് ആഘോഷിക്കുന്നതിനിടയിൽ ഒരുവൻ ചോദിച്ചു…… “”” കഴിച്ചു തീർന്നില്ല… അതിന് മുന്നേ തുടങ്ങി….. “”‘ ഗ്ലാസിലെ അവശേഷിക്കുന്ന മദ്യവും വായിലേക്ക് കമിഴ്ത്തി ദേവസി പറഞ്ഞു…. ഒന്നും തിരിച്ചു പറയാതെ ചിരിച്ചുകൊണ്ടിരിക്കുന്ന അവരുടെ മുന്നിലെ മേശയിലേക്ക് താക്കോൽ വെച്ചു വക്കീൽ… “”” ആദ്യം ആര് പോകണമെന്ന് നിങ്ങൾക്ക് തീരുമാനിക്കാം…….ആള് വിദേശിയാ….. രാത്രി വഴി തെറ്റി പെട്ട് പോയതാ…. നമ്മളിങ്ങോട്ട് ചൂണ്ടി….. നിങ്ങളൊക്കെ ഇല്ലേ ആവശ്യക്കാരായിട്ട്….. “””” ദേവസി അത് പറഞ്ഞപ്പോഴേക്കും എല്ലാവരെയും നോക്കിയിട്ട് കൂട്ടത്തിൽ ഒരുവൻ കൂറ്റൻ ബംഗ്ലാവിന്റെ മുൻവശത്തെ വാതിൽ ലക്ഷ്യമാക്കി താക്കോലും എടുത്തു നടന്നു….. “””

എന്നാ ഞാനങ്ങോട്ട് ഇറങ്ങുവാ ടാ പിള്ളേരെ…. നിങ്ങളിവിടെ ഉണ്ടാവില്ലേ…. രാവിലെ ഞാൻ ഇറങ്ങാം… വീട്ടിൽ അവരൊറ്റയ്ക്കാ…. നേരത്തെ ചെന്നില്ലേൽ ശരിയാകത്തില്ല…””” അവർക്ക് നേരെ ഒന്നുകൂടി കയ്യുയർത്തി കാണിച്ചു ദേവസ്സി വക്കീൽ കാറിൽ കയറി വീട്ടിലേക്ക് തിരിച്ചു….. അയാൾ പൂട്ടുകളെല്ലാം തുറന്ന് സ്ഥിരം മുറിയിൽ എത്തുമ്പോൾ, കട്ടിലിൽ തളർന്ന് കിടക്കുകയായിരുന്നു അവൾ…. മറ്റൊരു നാട്ടിൽ നിന്ന് അതിഥിയേ ദേവതുല്യമായി കാണുന്നവരുടെ നാട്ടിലേക്ക് വിശ്വസിച്ചു വന്നവൾ…… തന്റെ കാലിൽ അനുഭവപ്പെടുന്ന വേദന സഹിക്കാനാകാതെ അവൾ കണ്ണ് തുറന്നു നോക്കുമ്പോൾ അവളുടെ രണ്ടു തുടകൾക്കും മീതെ തന്റെ മുട്ടുകാലുകൾ അമർത്തി അവളെ തനിക്ക് കീഴിലാക്കി കഴിഞ്ഞിരുന്നു അയാൾ……

സ്വന്തം മാതൃഭാഷയിൽ അവൾ അയാളോട് വെറുതെ വിടുവാൻ കെഞ്ചുമ്പോഴും സ്ത്രീ ശരീരത്തിൽ കാമം മാത്രം കണ്ടിട്ടുള്ള അയാൾ അവളുടെ മനസും ശരീരവും തല്ലിയുടച്ചിരുന്നു……. ഇനിയും പുറത്തു നിൽക്കുന്നവരുടെ ഭ്രാന്തിനു കൂടി താൻ കീഴ്പ്പെടേണ്ടി വരും എന്ന് അറിയാതെ അവശയായി കിടന്നു, ആ പെണ്ണ്…. ഇന്ത്യയിൽ ഓരോ നിമിഷവും ഒരു സ്ത്രീ എങ്കിലും ആക്രമിക്കപ്പെടാറുണ്ട്…. രജിസ്റ്ററുകളിൽ വരാത്തവ…. പുറത്ത് പറയാത്തവ…. പറഞ്ഞിട്ടും നീതി കിട്ടാത്തവ….. ഒരു ചോദ്യം മാത്രം ബാക്കി.. തെറ്റുകാർ ശിക്ഷിക്കപ്പെടുന്നുണ്ടോ? നൂറിൽ ഒന്ന്…. ആയിരത്തിൽ ഒന്ന്… പതിനായിരത്തിൽ ഒന്ന്….. ലക്ഷത്തിൽ ഒന്നെങ്കിലും… ഇല്ല…….അത്ര പോലും ഒരു കുറ്റവാളിയും ശിക്ഷിക്കപ്പെടുന്നില്ല……

ദീപന്റെ കൊലപാതകം വാർത്തകളിൽ നിറഞ്ഞു നിന്നു…. അവളുടെ അടുത്ത് ദീപൻ വന്നിരുന്നെന്ന് അവളോ നാട്ടുകാരോ പറഞ്ഞില്ല…. ആരും അവൻ ആദ്യം വന്നത് കണ്ടുകാണില്ലായിരിക്കാം…. പക്ഷേ പലഹാരവുമായി വന്നത് വീണ്ടും ഗീതുവിന്‌ വിവാഹമാലോചിച്ചാകും എന്ന് ചായക്കട മുതൽ മറ്റൊരു വാർത്തയായി…… അന്നും ഗീതു ഓഫീസിൽ പോയില്ല… ഒരാഴ്ച അവധി പറഞ്ഞു…മനസാകെ അസ്വസ്ഥമാണ്…. സമാധാനമായൊന്ന് ചോറുണ്ണുവാൻ പോലും ആകുന്നില്ല….. ഇന്നലെ ദീപന്റെ മരണം അറിഞ്ഞത് മുതൽ തലേ ദിവസങ്ങളിൽ അനുഭവിച്ചതിനേക്കാൾ വലിയ പെരുപ്പാണ് ഇന്നലെ മുതൽ…… നന്ദൂട്ടി വരേണ്ട സമയമായിട്ടും നീനയുടെ അടുത്തേക്ക് മോളേ വിളിക്കാൻ പോകാതെ, ഗീതു കട്ടിലിൽ തന്നെ കിടന്നു….

വർഷങ്ങളായി അവളുടെ ജീവിതത്തിൽ നടന്നത് ഓരോന്നും അവളുടെ മുന്നിൽ നടക്കുന്നത് പോലെ തെളിഞ്ഞു വന്നു…… “””” ഗീതുവമ്മേ…… “””” പുറത്തു നിന്ന് വിളി കേട്ടപ്പോൾ ആണ് ഗീതു എണീറ്റ് ചെന്നത്…. നീനയും കുഞ്ഞാറ്റയുമാണ്…. “”” ഈ പെണ്ണ് അവിടെ നിക്കണ്ടേ ഇച്ചേച്ചീ….. ചായ കൊടുത്തിട്ടും അത് കുടിക്കാൻ പോലും സമ്മതിക്കാതെ എന്നേം വലിച്ചോണ്ട് ഓട്ടമായിരുന്നു കുഞ്ഞാറ്റ…. “””” ബാഗ് ഗീതുവിന്റെ കയ്യിലേക്ക് കൊടുത്തുകൊണ്ട് നീന പറഞ്ഞു…. “”” എങ്കിൽ ഇവിടുന്ന് ചായ കുടിക്കാം മോളേ….. “”” “”” വേണ്ട ഇച്ചേച്ചീ…. മമ്മി അവിടെ നോക്കിയിരിക്കുവല്ലേ… ഞാൻ പോയേക്കുവാണേ…… “””” ഗീതുവിന്റെ ക്ഷണം നിരസിച്ചു കൊണ്ട് നീന പോകാനിറങ്ങിയപ്പോൾ ഗീതു വെറുതെ തലയാട്ടി നിന്നു…..

“””” വാ…. “”” നന്ദൂട്ടിയുടെ പുറത്തു തട്ടിക്കൊണ്ട് അകത്തേക്ക് അവളെ ഉന്തിക്കൊണ്ട് പോകുമ്പോഴാണ് നന്ദൂട്ടി ചോദിച്ചത്… “”””” അമ്മേ…. പത്രത്തിൽ മരിച്ച ചേട്ടനാണോ നന്ദൂട്ടീടെ അച്ഛൻ…. “”””” ശിലപോലെ നിന്നുപോയി ഗീതു…… ഇത് ആരാ എന്റെ കുട്ടിക്ക് പറഞ്ഞു കൊടുത്തിട്ടുണ്ടാവുക…. നാവ് ഇറങ്ങിപ്പോയത് പോലെ…….. ഗീതു ഉത്തരം മുട്ടി നിൽക്കുമ്പോൾ മേശയിൽ നിന്നും ഇന്നത്തെ പത്രം കയ്യെത്തിച്ചെടുത്തു കുഞ്ഞാറ്റ……. ഗീതുവിന്റെ മുന്നിൽ തന്നെ ആ പത്രം നിവർത്തി വെച്ച്, ആദ്യ പേജിലെ ദീപന്റെ ഫയൽ ചിത്രത്തിലേക്ക് നോക്കിയിരുന്നു നന്ദൂട്ടി …… “”” ഇത് കണ്ടോമ്മേ…. ഇതാണോ മോൾടെ അച്ഛൻ…… “””” ദീപന്റെ ഫോട്ടോയ്ക്ക് മേലേ വിരലുകൾ ഓടിച്ചുകൊണ്ട് വീണ്ടും ഗീതുവിനെ വിളിച്ചു ചോദിച്ചു മോള്…… “”” മോളോട് ആരാ ഇതൊക്കെ പറഞ്ഞത്….?”””

ശബ്ദത്തിന് തന്നെക്കൊണ്ട് ആവുന്നപോലെ ബലം കൊടുത്തുകൊണ്ട് അവൾ ചോദിച്ചു…. “”” മോൾടെ ബെഞ്ചിലെ ഷാനു പറഞ്ഞു, അവന്റെ പറഞ്ഞതാ… മോൾക്ക് കാണിച്ചു തരാൻ പേപ്പർ കീറിക്കൊണ്ട് വന്നു ഷാനു… മോൾക്ക് തന്നില്ലമ്മേ… ഞാൻ പറഞ്ഞതാ അമ്മേനെ കാണിച്ചിട്ട് പറയാംന്ന്… അവനെ അപ്പ തല്ലുംന്ന് പറഞ്ഞു കൊണ്ടോയി…. ഈ പടം തന്നെയാരുന്നുമ്മേ അവൻ്റെ കയ്യിലും…… “””” ദീപന്റെ ഫോട്ടോയിൽ നിന്ന് മോള് കണ്ണെടുക്കുന്നതേ ഉണ്ടായിരുന്നില്ല….. ഗീതു കുഞ്ഞിന്റെ അടുത്ത് ചമ്രം പടിഞ്ഞിരുന്നു….. “”” മോള് അച്ഛേപ്പോലെ ആണോമ്മേ…..? “”” ഗീതു, കുഞ്ഞാറ്റയുടെ കുഞ്ഞുകൈകൾ മാറ്റി പത്രം എടുക്കുവാൻ തുനിഞ്ഞപ്പോഴും കുഞ്ഞ് അത് തന്നെ ആവർത്തിച്ചു….. “””” ഇതാണോമ്മേ മോൾടെ അച്ഛൻ….? “””” ഒന്ന് പൊട്ടിക്കരയുവാൻ ചുമലില്ലെങ്കിലും ഒരു ചുവരെങ്കിലും ആ നിമിഷം ഗീതു ആഗ്രഹിച്ചു….

പക്ഷേ മകളുടെ മുൻപിൽ പിടിച്ചുകെട്ടേണ്ട കണ്ണുനീർ അവൾക്ക് കരയുവാൻ കൽപ്പിക്കപ്പെട്ട നിഷേധമായിരുന്നു….. പോകുന്നിടത്തെല്ലാം പിടി വിടാതെ കുഞ്ഞാറ്റ അച്ഛനെ ചോദിച്ചപ്പോൾ വർഷങ്ങൾക്ക് മുൻപ് അടച്ചിട്ടും ഇതുവരെ തുറക്കാത്ത അലമാരയിലെ ആ അറ അവൾ തുറന്നു….. പൂപ്പൽ പോലെ പൊടി…. ദീപൻ അറസ്റ്റിലായ സമയത്ത് ഒരിക്കൽ അതെടുത്തതാണ്…. പക്ഷേ തുറക്കുവാൻ മനസ് വന്നില്ല……. ഇനി വന്നാൽ തിരിച്ചേൽപ്പിക്കാം എന്ന് തന്നെ വിചാരിച്ചതായിരുന്നു…… പച്ച നിറത്തിലുള്ള ദുപ്പട്ടയുടെ പുറകിൽ സുരക്ഷിമായി ഇരിക്കുന്നുണ്ടായിരുന്നു അത്…. അത് കൈകളിൽ എടുത്തു ഗീതു… DNA Laboratory പുറത്തെഴുതിയിരിക്കുന്ന പേരുകളിലൂടെ അവൾ വായിച്ചു……

ഇതിനകത്ത് നന്ദു മോളുടെ ചോദ്യത്തിനുള്ള ഉത്തരമുണ്ട്. ദീപനാണോ അവളുടെ അച്ഛൻ എന്ന ചോദ്യത്തിന്റെ ശാസ്ത്രീയ തെളിവുകളോട് കൂടിയ ഉത്തരം…. പൊട്ടിക്കുവാൻ തുടങ്ങവേ, അടുക്കളയിൽ നിന്ന് മോള് വിളിച്ചത്……. അവിടെ ചെന്നപ്പോൾ മോള് പാല് കുടിക്കാൻ ചോദിക്കുന്നതാണ്……. കടുക് ടിന്നിന്റെ മുകളിലേക്ക് കയ്യിലിരുന്ന റിപ്പോർട്ട്‌ വെച്ചിട്ട് അവൾ പാല് തിളപ്പിച്ച്‌ ആറ്റി ക്കൊടുത്തു മോൾക്ക്……. കുഞ്ഞ്, തറയിൽ ഇട്ടിരിക്കുന്ന പൊക്കം കുറഞ്ഞ സ്ടൂളിലേക്ക് ഇരുന്നുകൊണ്ട് പിന്നെയും അച്ഛൻ ചോദ്യങ്ങൾ ചോദിച്ചു തുടങ്ങിയപ്പോൾ ഗീതു റിപ്പോർട്ട്‌ കയ്യിലെടുത്തു…… ഒരു വശം കീറി മടക്കി വെച്ചിരിക്കുന്ന റിപ്പോർട്ട്‌ വായിക്കാനായി കയ്യിലെടുത്തു…… അല്ലെങ്കിൽ ഞാനെന്തിന് നോക്കണം ദീപനാണോ എന്റെ കുഞ്ഞിന്റെ അച്ഛനെന്ന്…. എന്റെ മോൾക്ക് അമ്മ മാത്രമല്ലെ ഉള്ളൂ…..

അങ്ങനെ വിചാരിച്ചു തന്നെയാണ് അവളെ പ്രസവിച്ചതെങ്കിൽ ഇനി താൻ മരിക്കുവോളം ഈ അമ്മ മാത്രം മതി അവൾക്ക്….. അമ്മയെ പീഡിപ്പിച്ചവനെ അച്ഛനായി കണ്ട്, തെറ്റിനെ ന്യായീകരിച്ചല്ല അവൾ വളരേണ്ടത്….. തെറ്റ് ആരുടേതാണെങ്കിലും തലയുയർത്തി നിന്ന് പറയണമെങ്കിൽ അവൾക്ക് കുഞ്ഞിലേ തെറ്റും ശരിയും പറഞ്ഞു കൊടുത്തു തന്നേ വളർത്തണം….. അച്ഛൻ ഇല്ലെങ്കിലും നല്ല അഭിമാനമുള്ള അമ്മയുടെ മകളായിട്തന്നെ തന്നെ…… അവൾക്ക് ഒരു അച്ഛൻ വേണമെന്ന് എല്ലാ സത്യവും മനസിലാക്കി കഴിഞ്ഞിട്ട് അവൾ ആഗ്രഹിക്കുന്നുവെങ്കിൽ അപ്പോൾ ആലോചിക്കാം ഒരു അച്ഛനെ അവൾക്ക് കൊടുക്കുന്നതിനെ കുറിച്ച്……

ഒരു കുഞ്ഞിനും അവളുടെ അച്ഛൻ, അവളുടെ അമ്മയെ പീഡിപ്പിച്ച കുറ്റവാളിയാണെന്ന് പറയുവാൻ അവസരം ഉണ്ടാകാതിരിക്കട്ടെ…… ഗീതു, ഗ്യാസ് ലൈറ്റർ ഗൺ ഉപയോഗിച്ച് സ്റ്റവ്വിലേക്ക് തീ പടർത്തി…. ആ തീജ്വാലയിലേക്ക് കയ്യിലിരുന്ന റിപ്പോർട്ട്‌ മുട്ടിച്ചു…… നിമിഷനേരങ്ങൾ കൊണ്ട് കറുത്ത ചാരമായി ആ കടലാസും അതിലെ രഹസ്യവും തറയിലേക്ക് പൊടിഞ്ഞു വീണു…. “”” ഷാനു കാണിച്ചു തന്നതല്ല കുഞ്ഞാറ്റേ മോൾടെ അച്ഛൻ…..അയാൾ നമ്മുടെ ആരുമല്ല….. “”” സ്ടൂളിൽ ഇരുന്നു ചായ ഊതിക്കുടിക്കുന്ന ഗൗരിനന്ദയുടെ മുഖത്തു നോക്കി ഗീതു പറഞ്ഞു…. മറ്റൊന്നും ഓർക്കാതെ…… കണ്ണ് കലങ്ങാതെ…… മനസ് പതറാതെ…… ... © തമസാ ലക്ഷ്മി …. അവസാനിച്ചു

മൊഴിയിടറാതെ : ഭാഗം 35