💔 മൊഴിയിടറാതെ 💔 : ഭാഗം 32

എഴുത്തുകാരി: തമസാ

കടന്ന് പോകുന്ന ഓരോ ഘട്ടങ്ങളിലും പെണ്ണിന് ഓരോ മണമാണ്….. തുനിഞ്ഞിറങ്ങിയാൽ സർവ്വം മുടിയ്ക്കുന്ന വിഷവാതകത്തിന്റെ മണവും അവളിൽ നിന്ന് വ്യാപിക്കും….. മോളെയും നോക്കി ഒന്നും മിണ്ടാതെ ഇരുന്നു ഗീതു…… കഴിഞ്ഞു പോയ നിമിഷങ്ങൾ ഓർക്കുമ്പോൾ തനിക്കെവിടെ നിന്ന് ഈ ധൈര്യം കിട്ടി എന്ന് സംശയമാണ്…….. വിറ പിടിച്ച കൈകളോടെ നിന്നതാണ്… പക്ഷേ എന്റെ മോളുടെ നേരെയും അവരുടെ കൈകൾ നീളുന്നു എന്ന് കണ്ടപ്പോൾ….. അറിയില്ല എത്ര മാത്രം ധൈര്യം ഉള്ളിൽ തോന്നിയെന്ന്….

ഈ ഒരു രാത്രി തന്റെ മുൻപിൽ വർഷങ്ങൾ മുൻപ് ഉള്ള ആ നശിച്ച ദിവസത്തിൽ തന്റെ മുന്നിൽ ഉണ്ടായിരുന്ന എല്ലാ രൂപങ്ങളേയും കാണിച്ചു തന്നു…… മക്കൾക്കായി കരഞ്ഞ അമ്മയുടെ രൂപം. പെങ്ങൾക്കായി കരഞ്ഞ ഏട്ടൻ. എല്ലാം താൻ കണ്ടു. അനുഭവിച്ചു. അഭിനയിച്ചു. എവിടെ എങ്കിലും പിഴവ് പറ്റിയിരുന്നെങ്കിൽ, എന്റെ മോള്…….. ഇല്ല.. ഗീതുവിനെ ഒരു കാര്യത്തിലും തോൽപ്പിക്കുവാൻ ആർക്കുമാവില്ല. മോൾക്ക് മതിയാകുവോളം പാലൂട്ടിയിരുന്നു അവൾ… നിനിൽ…. അവൻ വന്നില്ലാലോ ഇത് വരെ?!! ഇനി അവന് എന്തെങ്കിലും അപകടം സംഭവിച്ചു കാണുമോ? താൻ കാരണം അവനും ആപത്ത് വന്ന് കാണുമോ?

മോളെയും നോക്കി ഇരിക്കുന്ന അവളുടെ കൃഷ്ണമണികൾ ആ വെള്ളക്കിണ്ണത്തിലൂടെ ഓടിക്കളിച്ചു നടന്നു……. ഫോണിന് വേണ്ടി കണ്ണോടിച്ചു … പക്ഷേ കണ്ടില്ല എങ്ങും……. ഈ നേരം മുഴുവനും അവളെ നിരീക്ഷിക്കുകയായിരുന്നു ദീപൻ… ചെയ്തുകൂട്ടിയ പാപങ്ങളെ ഉരുക്കിക്കളയുവാൻ സ്വയം കുറ്റം ഏറ്റെടുക്കുന്നത് കൊണ്ട് മാത്രം കഴിയുമോ? തൂക്കുകയർ…… അതാകുമോ തനിക്കായി കരുതി വെച്ചിരിക്കുന്ന ശിക്ഷ? ഇല്ല …..എനിക്ക് ജീവിച്ചേ മതിയാവുകയുള്ളു….. മനസ്സിൽ അവൻ കണക്കുകൾ കൂട്ടിയും കിഴിച്ചും നോക്കി…..എവിടെയും നൂലിഴ തെറ്റാതെ നോക്കണം…..

അതിന് ഗീതുവിന്റെ സഹായവും വേണം…… കുറേ നേരം ആലോചിച്ചതിനു ശേഷം അവൻ ഗീതുവിന്റെ അടുത്തേക്ക് നീങ്ങിയിരുന്നു..,.. നന്ദൂട്ടി അപ്പോഴും ശബ്ദങ്ങൾ കേൾപ്പിച്ചു പാല് കുടിക്കുകയായിരുന്നു… “” ഗീതൂ……””” അവളുടെ കാലിൽ പതിയെ വിരൽ കൊണ്ട് തട്ടിയിട്ട് അവൻ സംസാരിച്ചു തുടങ്ങി…. “” ഗീതൂ ഞാൻ കുറ്റം ഏറ്റെടുത്താൽ അത് ചിലപ്പോൾ കൊലക്കയർ വരെ അത് നീണ്ടുപോകാം…. കാരണം കൊലപാതകം ഒന്നല്ല….. അതുപോലെ ഞാൻ വരുന്ന വഴിയിൽ എന്നേ ഇയാളുടെ ആളുകൾ തടഞ്ഞു വന്നു… ദാ കണ്ടോ…. ഈൗ മുറിവുകളെല്ലാം അവർ തന്നതാ…. ഞാൻ വെറുതെ വീട്ടിട്ടൊന്നും ഇല്ലാട്ടോ….

നിന്നെയും കുഞ്ഞിനേയും കൊല്ലാൻ വേണ്ടി ആളുകൾ ഇറങ്ങിക്കഴിഞ്ഞെന്ന് അറിഞ്ഞപ്പോൾ പിന്നെ മറ്റൊന്നും ഓർത്തില്ല….. എത്രയും പെട്ടെന്ന് ഇങ്ങോട്ട് ഓടി വരണംന്ന് മാത്രേ ഉണ്ടായിരുന്നുള്ളു……. കുറേ അങ്ങോട്ടും കൊടുത്തു…. ഇങ്ങോട്ടും വാങ്ങി…. എങ്കിലും ഇതൊന്നും വില പോവില്ല…….എനിക്ക് കടുത്ത ശിക്ഷ കിട്ടും…… പക്ഷെ ഒരു പെണ്ണിനേയും കുഞ്ഞിനേയും രക്ഷപ്പെടുത്താൻ വേണ്ടിയാണ് ഞാൻ ഈ കൊലകളെല്ലാം ചെയ്തതെന്ന് ആയാൽ ഞാൻ രക്ഷപെടും……പിന്നെ ശേഷാദ്രി മരിച്ചത് കൊണ്ട് ഇനി ബാക്കി അവന്മാരെ കൊണ്ട് ശല്യവും ഉണ്ടാവില്ല…… എനിക്ക് ജീവിക്കണം ഗീതൂ…..

എന്റെ കുഞ്ഞിനെ കാണാതെ പറ്റില്ലാത്തത് കൊണ്ടാ……. അതുകൊണ്ട്,…………. അതുകൊണ്ട് നീ സത്യം പറയരുത് ഗീതൂ… സത്യം മുഴുവനും മറച്ചു വെയ്ക്കണം…. അന്വേഷണം നാളെ മുതൽ ഉണ്ടാകും…. അപ്പോൾ നീ…….. പറയണം – എന്നേ ഇങ്ങോട്ട് ഓടിച്ചു കയറ്റിയതാണെന്ന്…. കൂടെ ആരൊക്കെ ഉണ്ടായിരുന്നു എന്ന് അറിയില്ല… ഭയന്ന് പോയി…… നിന്നെയും കുഞ്ഞിനേയും കയറിപ്പിടിച്ചപ്പോൾ ഞാൻ വെട്ടിയതാണെന്ന് നീ പറയണം…… എന്തിനാണ് ഞാൻ നിനക്ക് വേണ്ടി കൊല ചെയ്തതെന്ന് അവർ ചോദിക്കും…. ചോദിച്ചേ പറ്റൂ …… പക്ഷേ ഉത്തരം പറയുമ്പോൾ അന്ന് പീഡിപ്പിച്ച കഥ പറയരുത്…….

ഞാൻ നിന്നേ വിവാഹം ചെയ്യാൻ ആഗ്രഹിച്ചിരുന്നെന്ന് പറയണം….. എങ്ങനെയാ പരിചയം എന്ന് ചോദിച്ചാൽ…….. കള്ളം പറയണം നീ……. ഗിരിയുടെ പരിചയക്കാരൻ ആണെന്ന് പറഞ്ഞിട്ടാണ് ഞാൻ മാസങ്ങളായി നിന്റെ പുറകേ വന്നതെന്ന് പറയണം….. തെറ്റ് പറയരുത്…..നിനക്കെന്നെ മുൻ പരിചയം ഉണ്ടെന്നും പറയണ്ട…… ഈ നുണകൾക്ക് നമ്മുടെ ജീവിതത്തിന്റെ വിലയുണ്ട് ഗീതൂ ….. ഗിരിയെ കൊന്നതും പിന്നെ ഉണ്ടായ സംഭവങ്ങളും ഈ മരണവുമായി നീ കൂട്ടിക്കുഴച്ചാൽ അപകടം നിനക്ക് തന്നെ ആണ്….. നിന്റെ നേരെ വരും ഈ അന്വേഷണങ്ങൾ എല്ലാം…. അതുകൊണ്ട് ഞങ്ങൾ തമ്മിൽ ഉള്ള വൈരാഗ്യവും നിന്നെയും കുഞ്ഞിനേയും ഉപദ്രവിച്ചപ്പോൾ എന്റെ ഭാഗത്തു നിന്ന് പറ്റിയ അബദ്ധം മാത്രം ആയിട്ടേ ആര് ചോദിച്ചാലും പറയാൻ പാടുള്ളു …..

ഗിരി വധവും എന്റെ കുഞ്ഞിന്റെ പിതൃത്വവും വരരുത് എങ്ങും….”” അവളെ നോക്കിക്കൊണ്ട് അവൻ പറഞ്ഞവസാനിപ്പിച്ചിട്ടും അവൾ ഒന്നും മിണ്ടിയില്ല…. “””നീ കേൾക്കുന്നില്ലേ ഗീതൂ “”” ഒന്നും പറഞ്ഞില്ലവൾ….. പക്ഷേ നൂറ് ചിന്തകൾ ആയിരുന്നു……അവന് കിട്ടുന്ന ശിക്ഷകൾ കുറഞ്ഞു പോകുന്നതിന്റെ വിഷമങ്ങൾ….. അപ്പോഴുമവളുടെ മനസ് അവനെ കൊല്ലൂ എന്ന് അവളോട് ആവശ്യപ്പെട്ടുകൊണ്ടിരുന്നു…….. അവളുടെ ഒന്നും മിണ്ടാതെ, ശ്രദ്ധിക്കാതെ ഉള്ള ഇരിപ്പ് കണ്ടിട്ട് അവൻ മടിയിൽ സൂക്ഷിച്ചിരുന്ന ഫോൺ എടുത്തു നിനിലിന്റെ നമ്പർ ഡയൽ ചെയ്തു…….

ചോര ഒരുപാട് നഷ്ടപ്പെട്ടിട്ട് അവന് തല വേച്ചു തുടങ്ങിയിരുന്നു…… താൻ വീഴും മുൻപേ അവളെ സുരക്ഷിതയാക്കണം…… ഫോണിൽ സമയം നോക്കിയപ്പോൾ മൂന്ന് മണി കഴിഞ്ഞു….. ഇത്രയും നേരം ഇവിടെ…… അവന് അതിശയം തോന്നി…. ഒരുപാട് സമയം പിന്നിട്ടിരിക്കുന്നു. പക്ഷെ എല്ലാം കുറഞ്ഞ നിമിഷങ്ങൾക്ക് ഉള്ളിൽ കഴിഞ്ഞ പോലെ…… അപ്പുറത്ത് ബെൽ മുഴങ്ങിക്കൊണ്ടിരുന്നു….. അലാറം അടിയ്ക്കുന്നതാണെന്ന് വിചാരിച്ചു ചെവിയ്ക്ക് മീതെ തലയിണ കയറ്റി വെച്ച് കിടക്കുകയായിരുന്നു നീന…..

വീണ്ടും വീണ്ടും അടിച്ചുകൊണ്ടിരിക്കുമ്പോൾ ആണ് നിനിലിന്റെ റിങ്ടോൺ ആണല്ലോ ഇത് എന്ന് അവളുടെ തലച്ചോർ അവളോട് പറഞ്ഞത്…. ഇന്നലെ കസിൻസ് വീഡിയോ കോൾ വിളിച്ചപ്പോൾ അവനോട് ഫോൺ ചോദിച്ചു വാങ്ങിയതാണ്…… എല്ലവരോടും ഹാളിൽ ഇരുന്ന് അടി വെച്ച് കൊണ്ടിരുന്നപ്പോൾ ടീവിയിലേക്കാൾ ശബ്ദം ആണെന്ന് പറഞ്ഞു മമ്മി എഴുന്നേൽപ്പിച്ചു വിട്ടതാണ് …… വാതിലടച്ചു സ്വന്തം മുറിയിൽ കിടന്നു വിളിച്ചു വിളിച്ചങ്ങ് ഉറങ്ങിപ്പോയി…..നിനിലും വിളിക്കാൻ പോയില്ല നീനയെ…..

ഉറങ്ങുവാണെങ്കിൽ ഉറങ്ങട്ടെ എന്ന് വിചാരിച്ചു കതകിൽ ഒന്ന് മുട്ടിനോക്കിയിട്ട് അവൻ പിന്നെ പോയി കിടന്നിരുന്നു…… കണ്ണും തിരുമ്മി എണീറ്റിട്ടു നിനിലിന്റെ മുറിയിൽ പോയി അവനെ നീന വിളിച്ചെഴുന്നേൽപ്പിച്ചു ദീപൻ വിളിക്കുന്നു എന്ന് പറഞ്ഞു….. മുൻപേ ഫോണിൽ നമ്പർ സേവ് ആയിരുന്നു …….. ദീപനെന്ന് കേട്ടപ്പോൾ അവന് എന്തോ ശങ്ക തോന്നി….. നീനയെ മുറിയിലേക്ക് പറഞ്ഞു വിട്ടിട്ട് അവൻ കോൾ എടുത്തു…. എത്രയും പെട്ടെന്ന് മണ്ണെണ്ണ ഉണ്ടെങ്കിൽ അതും ആയിട്ട് ആരെയും അറിയിക്കാതെ ഗീതുവിന്റെ വീട്ടിലേക്ക് വരണം….. അത്യാവശ്യം ആണ്….. അവളും കുഞ്ഞും സേഫ് ആണെന്ന് പറഞ്ഞിട്ട് ദീപൻ ഫോൺ വെച്ചു…….

എല്ലാം മൂളികേൾക്കാൻ ഉള്ള സമയം മാത്രമേ നിനിലിനും കിട്ടിയുള്ളൂ… അവൻ വേഗം ഉടുത്തിരുന്ന കൈലിയ്ക്ക് മീതെ ഒരു ഷർട്ടും എടുത്തിട്ടിട്ട് കാറുമായി ഇറങ്ങി………ഗീതുവിന്റെ അടുത്തേക്ക്…… ദീപൻ പറഞ്ഞതിൽ നിന്ന് എന്തൊക്കെയോ അപകടം തോന്നിയത് കൊണ്ട് കാർ അവൻ മുറ്റത്തേയ്ക്ക് കയറ്റിയില്ല….. പക്ഷേ അവിടെ അപ്പോൾ വേറെ രണ്ട് വണ്ടികളും കിടക്കുന്നത് കണ്ട് അവൻ വീട്ടിലേക്ക് ഓടി……. മുറ്റത്തു കിടക്കുന്ന ശരീരവും കണ്ട് അവൻ വിറച്ചു….. മുൻവശത്തെ വാതിലിൽ തട്ടി……. തുറക്കാതെ ആയപ്പോൾ ഗീതുവിന്റെ മുറിയുടെ ജനലിലേക്ക് ഓടി…… ” ഗീതൂ…..

വാതിൽ തുറക്ക് മോളേ…. ഞാനാ നിനിലാ……. ” ജനലിൽ കൊട്ടി വിളിച്ചു അവൻ….. അതുകേട്ട് ദീപൻ എഴുന്നേറ്റ് വന്നു ജനലഴി തുറന്നു….. “”” ദീപാ…. അവളെന്ത്യേ……… മോള്…. ഗീതു….. “” നിനിലിന്റെ ശബ്ദം വല്ലാതെ കിടുങ്ങിയിരുന്നു…… “”” നിനിൽ ഇങ്ങോട്ട് കയറേണ്ട…. അവിടെ നിന്നാൽ മതി… അല്ലെങ്കിൽ പ്രശ്നം ആണ്….. മണ്ണെണ്ണ ഉണ്ടായിരുന്നോ…?””” ദീപന്റെ ചോദ്യത്തിന് വണ്ടിയിൽ ഇരിപ്പുണ്ടെന്ന് പറഞ്ഞിട്ട് അവൻ ജനലഴിയിലൂടെ ഉള്ളിലേക്ക് നോക്കാൻ ശ്രമിച്ചു…. “” നോക്കണ്ട നിനിൽ….. ഞാൻ…..

ഒരാളെ കൊന്നു ഇവിടെ ഇട്ട്…..തെളിവ് നശിപ്പിക്കണം….. അല്ലെങ്കിൽ അത് ഗീതുവിന്‌ എതിരാകും….. നീ ചെയ്യില്ലേ?… “””” ദീപൻ പറഞ്ഞത് കേട്ട് തറഞ്ഞു പോയി നിനിൽ…. ഒരു കൊലപാതകം കൂടി…… ഈ വീട്ടിൽ വെച്ച്….. “”” ഗീതുവിനെയും കുഞ്ഞിനേയും കാണിക്ക് ദീപാ…. എനിക്ക് നിന്നേ വിശ്വാസം ഇല്ല….. “”” എത്ര തടയുവാൻ നോക്കിയിട്ടും അടങ്ങാതെ അകത്തേക്ക് കയറും എന്ന ഭാവത്തിൽ നിൽക്കുന്ന നിനിലിന്റെ മുമ്പിലേക്ക് ഗീതുവിനെ പിടിച്ചു നിർത്തി, ദീപൻ…… എങ്ങും ഉറയ്ക്കാത്ത മിഴികൾ നിനിലിനെയും കടന്ന് പല ദിക്കുകളിലേയ്ക്ക് പാഞ്ഞു……

പക്ഷേ അവളുടെ ചോര നിറഞ്ഞ ഉടുപ്പും കയ്യും നിനിലിനു വ്യക്തമാക്കി കൊടുത്തു, ദീപൻ അല്ല കൊലപാതകി എന്ന്…. കാരണം ഗീതുവിനെ ഉയർത്തി എഴുന്നേൽപ്പിച്ച അവൻ്റെ കൈകളിലെ കറ, അവൻ്റെ കയ്യിൽ നിന്ന് അപ്പോഴും ഒഴുകിയിരുന്നു…… അവളുടെ വസ്ത്രങ്ങളെക്കാൾ തീരെ കുറവ് രക്തം ആയിരുന്നു അവൻ്റെ തുണികളിൽ ഉണ്ടായിരുന്നത് …. ചിതറി തെറിച്ച പോലെ തുള്ളി തുള്ളികളായി അവളുടെ വസ്ത്രത്തിൽ ചോര കിടന്നിരുന്നു…… നിനിലിനെ അവിടെ നിർത്തി, ദീപൻ കുളിമുറിയിലേക്ക് ചെന്നു…. അമ്മയുടെ മരണം മുതൽ ആാാ വീടിന്റെ മുക്കും മൂലയും ദീപന് പരിചിതം ആയിരുന്നു ……

പാത്രങ്ങളിൽ നിറഞ്ഞിരിക്കുന്ന വെള്ളം സൂക്ഷിച്ചെടുത്തവൻ കൈകൾ നന്നായി സോപ്പ് ഉപയോഗിച്ച് കഴുകി….പക്ഷേ ചോരയോഴുക്ക് നില്കുന്നുണ്ടായിരുന്നില്ല…കയ്യിൽ കെട്ടിയിരുന്ന തുണി ക്ലോസെറ്റിലേക്ക് ഇട്ടു വെള്ളം കുത്തനെ ഒഴിച്ചു…….ഷർട്ട് ഊരി വെള്ളത്തിൽ മുക്കി നനച്ചു തോളിലേക്ക് തന്നെ ചുരുട്ടി ഇട്ടു…. രക്തം ഒഴുകുന്ന കൈ ഉയർത്തിപ്പിടിച്ചു കൊണ്ട് അവനൊന്നു നിവർന്നു…. ഇടുപ്പിൽ നിന്ന് വേദന ചങ്കിലേക്ക് കീറിയിറങ്ങി……തല കറങ്ങിയിട്ട് തനിയേ നടക്കുമ്പോൾ വീണു പോകുമോ എന്ന് അവൻ ഭയന്നു…. വീഴരുത് ……….

ഭിത്തിയിൽ പിടിച്ച് ഗീതുവിന്റെ അടുത്തേക്ക് ചെന്നു രക്തം ആവാത്ത കൈകൊണ്ട് അലമാരയിൽ നിന്ന് ഗീതുവിന്റെ ഒരു നൈറ്റിയും അടിപ്പാവാടയും വലിച്ചെടുത്തു……അത് കട്ടിലിലേക്ക് ഇട്ടിട്ട് മോളേ ഒരു കൈകൊണ്ടു തന്നെ വലിച്ചെടുത്തു കട്ടിലിലേക്ക് അവൻ കിടത്തി………. അവൻ ഗീതുവിന്റെ അടുത്തേക്ക് ചേർന്ന് ചെന്നു രക്തം പുരണ്ട അവളുടെ മേൽ മുഴുവൻ നനഞ്ഞ ഷർട്ട് കൊണ്ട് തുടച്ചു…. നഖത്തിന്റെ ഇടപോലും അവൻ സൂക്ഷിച്ചു തുടച്ചു വൃത്തിയാക്കി…..സാധാരണ നിറം ആകുവോളം അവൻ ഷർട് കൊണ്ട് കൈ ഉരച്ചു കഴുകി….. “”” ഡ്രെസ് ഊരി മാറ്റി, ഇത് വേഗം ഇട്ടോ…… “””

ഒരു നിമിഷം മടിച്ചു നിന്നിട്ട് അവൾ വസ്ത്രം ഊരി….ദീപൻ എടുത്തു വെച്ച നൈറ്റിയും പാവാടയും ഇട്ടു……അവൾ മാറിയ വസ്ത്രം അവിടെ ഒരു കൈ കൊണ്ട് തപ്പിയിട്ട് ഒടുവിൽ കിട്ടിയ ഒരു കവറിലേക്ക് ഇട്ടു…. ജനലിന്റെ അപ്പുറത്ത് മാറി നിന്ന നിനിലിനേ വിളിച്ചു വിടവിലൂടെ തിക്കി ആ കവർ ദീപൻ കൊടുത്തു….. “”” ദൂരേ എവിടെ എങ്കിലും ആരും തേടി വരാതിടത്തു കൊണ്ട് പോയി കത്തിച്ചു കളയണം……

കത്തി തീർന്നിട്ടേ വരാൻ പാടുള്ളു……എന്റെ ഗീതുവിനെ ആർക്കും വിട്ട് കൊടുക്കാൻ ഉള്ള ഇട ഉണ്ടാക്കരുത് “” പാതി ജീവൻ പോയി നിൽക്കുമ്പോഴും ” എന്റെ ഗീതു ” എന്ന് കേട്ടപ്പോൾ അവളുടെ മുഖത്തെ മാറ്റം അവൻ നോക്കി….. ആ മുഖം ശൂന്യമായിരുന്നു………. “”” പൊയ്ക്കോ…… നീ പോയി മടങ്ങി വരും വരെ പോലീസ് അറിയണ്ട……. “”” അവരെ ഒന്ന് നോക്കിയിട്ട് നിനിൽ കാറിന്റെ അടുത്തേക്ക്, പതിയെ നടന്നു…… തുടരും….. © തമസാ ലക്ഷ്മി ….

മൊഴിയിടറാതെ : ഭാഗം 31