ലഡാക്കിലെ 28 സ്ഥലങ്ങളുടെ നാമകരണം: ചൈനയുടെ എതിർപ്പ് തള്ളി ഇന്ത്യ; ലഡാക്ക് ഇന്ത്യയുടെ അവിഭാജ്യ ഘടകമെന്ന് വിദേശകാര്യ മന്ത്രാലയം

ലഡാക്കിലെ 28 തന്ത്രപ്രധാന സ്ഥലങ്ങൾക്കും ഭൂപ്രദേശങ്ങൾക്കും ഔദ്യോഗിക ഭൂപടത്തിൽ പേര് നൽകിയ ഇന്ത്യയുടെ നടപടിയെ എതിർത്ത ചൈനയ്ക്ക് ശക്തമായ മറുപടിയുമായി വിദേശകാര്യ മന്ത്രാലയം. ലഡാക്ക് ഇന്ത്യയുടെ അവിഭാജ്യവും അഭേദ്യവുമായ ഭാഗമാണെന്നും, ചൈന എത്ര എതിർത്താലും ഈ യാഥാർത്ഥ്യം മാറ്റാൻ കഴിയില്ലെന്നും ഇന്ത്യ വ്യക്തമാക്കി.

​ഇന്ത്യയുടെ ഈ നടപടി നിയമവിരുദ്ധമാണെന്നും ലഡാക്കിലെ പേരുമാറ്റങ്ങൾ അംഗീകരിക്കില്ലെന്നുമായിരുന്നു ചൈനയുടെ വാദം. ഇതിന് പിന്നാലെയാണ് വിദേശകാര്യ മന്ത്രാലയ വക്താവ് രൺധീർ ജൈസ്വാൾ ഇന്ത്യയുടെ നിലപാട് കടുപ്പിച്ച് രംഗത്തെത്തിയത്. 2020-ലെ അതിർത്തി സംഘർഷങ്ങളിൽ നിർണായകമായ ഗോഗ്ര, ഹോട്ട് സ്പ്രിങ് തുടങ്ങിയ പ്രദേശങ്ങൾ ഉൾപ്പെടെയുള്ളവയുടെ ഔദ്യോഗിക നാമകരണമാണ് ഇപ്പോൾ നയതന്ത്ര തലത്തിൽ ചർച്ചയായിരിക്കുന്നത്.