ആശമാരുടെ സമരം: സർക്കാർ പരമാവധി വിട്ടുവീഴ്ച ചെയ്തു, ഇതിനപ്പുറം ചെയ്യാനാകില്ലെന്ന് മന്ത്രി ശിവൻകുട്ടി

ആശ വർക്കർമാരുടെ സമരം തീർക്കാൻ സർക്കാർ പരമാവധി വിട്ടുവീഴ്ച ചെയ്‌തെന്ന് തൊഴിൽ വകുപ്പ് മന്ത്രി വി ശിവൻകുട്ടി. ഇതിനപ്പുറം വിട്ടുവീഴ്ച ചെയ്യാനാകില്ലെന്നും മന്ത്രി പറഞ്ഞു. ആശവർക്കർമാർ തൊഴിൽ മന്ത്രി എന്ന നിലയിൽ തന്നെ കാണാൻ വന്നിരുന്നു. അവരുടെ നിവേദനം ഞാൻ കൈപ്പറ്റിയെന്നും മന്ത്രി പറഞ്ഞു. അതേസമയം ആശ വർക്കർമാരുടെ സമരം ഇന്ന് 58ാം ദിവസം പിന്നിട്ടു. ഓണറേറിയം കൂട്ടണമെന്നതടക്കമുള്ള ആവശ്യങ്ങൾ ഉന്നയിച്ച് സമരസമിതി ഇന്നലെ മന്ത്രിക്ക് അഞ്ച് നിവേദനങ്ങൾ നൽകിയിരുന്നു. ആവശ്യങ്ങൾ പഠിക്കാനുള്ള കമ്മിറ്റി ഒരു മാസത്തിനുള്ളിൽ രൂപീകരിച്ച് റിപ്പോർട്ട് നൽകുമെന്നാണ് മന്ത്രി നൽകിയ ഉറപ്പ് എന്നാൽ അതിൽ ചർച്ച ചെയ്ത് നിലപാട് അറിയിക്കാമെന്നായിരുന്നു സമര സമിതിയുടെ മറുപടി. നിലവിൽ സമരവുമായി മുന്നോട്ടു പോകാൻ തന്നെയാണ് സമര സമിതിയുടെ തീരുമാനം.