യെമനിലെ സോകോത്ര ദ്വീപിൽ പോഷകാഹാരക്കുറവ് തടയുന്നതിനായി യുഎഇയും ലോകാരോഗ്യ സംഘടനയും (WHO) ചേർന്ന് ഒരു പുതിയ പദ്ധതിക്ക് തുടക്കം കുറിച്ചു. ചൊവ്വാഴ്ചയാണ് ഈ സംയുക്ത സംരംഭം ആരംഭിച്ചത്. യുഎഇയുടെ ഖലീഫ ബിൻ സായിദ് അൽ നഹ്‌യാൻ ഫൗണ്ടേഷനും ലോകാരോഗ്യ സംഘടനയും ചേർന്നാണ് ഇത് നടപ്പിലാക്കുന്നത്.
സോകോത്ര ദ്വീപിലെ സ്ത്രീകളിലും കുട്ടികളിലുമുള്ള പോഷകാഹാരക്കുറവ് പരിഹരിക്കുകയാണ് ഈ പദ്ധതിയുടെ പ്രധാന ലക്ഷ്യം. ആഗോള റിപ്പോർട്ടുകൾ പ്രകാരം, സോകോത്ര ദ്വീപിൽ അഞ്ച് വയസ്സിൽ താഴെയുള്ള കുട്ടികളിൽ ഗുരുതരമായ പോഷകാഹാരക്കുറവിന്റെ (Severe Acute Malnutrition – SAM) നിരക്ക് 1.6% ഉം, പൊതുവായ പോഷകാഹാരക്കുറവിന്റെ (Acute Malnutrition – GAM) നിരക്ക് 10.9% ഉം ആണ്.
രണ്ട് വർഷം നീണ്ടുനിൽക്കുന്ന ഈ സമഗ്രമായ പദ്ധതിയിലൂടെ പോഷകാഹാരക്കുറവ് മൂലമുണ്ടാകുന്ന അമ്മമാരുടെയും കുട്ടികളുടെയും മരണനിരക്ക് കുറയ്ക്കാൻ ലക്ഷ്യമിടുന്നു. മാതൃ-ശിശു പരിചരണ സേവനങ്ങൾ മെച്ചപ്പെടുത്തുന്നതിനും പകർച്ചവ്യാധികളെ നേരിടാനുള്ള സന്നദ്ധത വർദ്ധിപ്പിക്കുന്നതിനും ഈ പദ്ധതി സഹായകമാകും.
ഈ സംയുക്ത സംരംഭം യെമനിൽ പ്രതിരോധശേഷിയുള്ള ആരോഗ്യ സംവിധാനങ്ങൾ കെട്ടിപ്പടുക്കുന്നതിനുള്ള തങ്ങളുടെ പങ്കിട്ട കാഴ്ചപ്പാട് പ്രതിഫലിപ്പിക്കുന്നുവെന്ന് ലോകാരോഗ്യ സംഘടനയുടെ യെമനിലെ ആക്ടിംഗ് പ്രതിനിധി ഡോ. ഫെരിമ കൂലിബാലി-സെർബോ പറഞ്ഞു. അടിയന്തിര ആവശ്യങ്ങൾ നിറവേറ്റുന്നതിനും ദ്വീപിലെ ദീർഘകാല ആരോഗ്യ സുരക്ഷയ്ക്ക് അടിത്തറ പാകുന്നതിനും യുഎഇയുമായും ദേശീയ അധികാരികളുമായും ചേർന്ന് പ്രവർത്തിക്കുമെന്നും അവർ കൂട്ടിച്ചേർത്തു.
വൈദ്യപരിശീലനം നൽകുക, മരുന്നുകൾ ലഭ്യമാക്കുക, അടിയന്തര സാഹചര്യങ്ങൾ നേരിടാനുള്ള സംവിധാനങ്ങൾ സ്ഥാപിക്കുക എന്നിവയിലൂടെ സോകോത്രയിലെ ആരോഗ്യ സംരക്ഷണ അടിസ്ഥാന സൗകര്യങ്ങൾ ശക്തിപ്പെടുത്താനും ഈ പദ്ധതി ലക്ഷ്യമിടുന്നു. കൂടാതെ, പോഷകാഹാരക്കുറവിന് സുസ്ഥിരമായ പരിഹാരങ്ങൾ കണ്ടെത്താനും ഭക്ഷ്യസുരക്ഷ ഉറപ്പാക്കാനും സമൂഹത്തിൽ അവബോധം വളർത്താനും രോഗനിരീക്ഷണം മെച്ചപ്പെടുത്താനും ഇത് സഹായിക്കും.
