ഭാസ്‌കര കാരണവർ വധക്കേസ് പ്രതി ഷെറിന് പരോൾ അനുവദിച്ചു. രണ്ടാഴ്ചത്തെ പരോളാണ് അനുവദിച്ചിരിക്കുന്നത്. സ്വാഭാവിക നടപടിയെന്നാണ് ജയിൽ വകുപ്പിന്റെ വിശദീകരണം. ശിക്ഷായിളവ് നൽകി ഷെറിനെ മോചിപ്പിക്കാനുള്ള നീക്കം വിവാദമായതിനെ തുടർന്ന് സർക്കാർ തത്കാലം ഇത് മരവിപ്പിച്ചിരുന്നു
പിന്നാലെയാണ് പരോൾ നൽകി ഷെറിനെ ജയിലിന് പുറത്തെത്തിച്ചത്. സഹതടവുകാരിയെ മർദിച്ചതിന് കഴിഞ്ഞ മാസം ഷെറിനെതിരെ കേസെടുത്തിരുന്നു. കണ്ണൂരിലെ വനിതാ ജയിലിലാണ് ഷെറിൻ ഇപ്പോഴുള്ളത്. ശിക്ഷായിളവ് നൽകാനുള്ള തീരുമാനം മന്ത്രിസഭ അംഗീകരിച്ചതിന് പിന്നാലെയായിരുന്നു തടവുകാരിയെ മർദിച്ച കേസ് വന്നത്.
ഷെറിന് മാനസാന്തരം വന്നെന്നും നല്ല നടപ്പെന്നും വിലയിരുത്തിയായിരുന്നു ജയിൽ ഉപദേശക സമിതി ശിക്ഷാ ഇളവിന് ശുപാർശ ചെയ്തത്. ഇതിനെതിരെ വ്യാപക വിമർശനം ഉയർന്നിരുന്നു. 14 വർഷം പൂർത്തിയായെന്ന കാരണം പറഞ്ഞാണ് ഷെറിനെ മോചിപ്പിക്കാൻ ശ്രമിച്ചത്.
