യാത്രയയപ്പ് ചടങ്ങിന് മുമ്പ് പിപി ദിവ്യ ഫോണിൽ വിളിച്ചിരുന്നു; ചടങ്ങിലേക്ക് ക്ഷണിച്ചിരുന്നില്ലെന്ന് കണ്ണൂർ കലക്ടർ
എഡിഎം നവീൻ ബാബുവിന്റെ യാത്രയയപ്പ് ചടങ്ങിൽ പിപി ദിവ്യയെ ക്ഷണിച്ചിട്ടില്ലെന്ന് കലക്ടർ അരുൺ കെ വിജയൻ. ദിവ്യ എത്തുന്നത് അറിഞ്ഞിരുന്നില്ല. ചടങ്ങിലേക്ക് ആരെയും ക്ഷണിച്ചിട്ടില്ലെന്നും കലക്ടർ പറഞ്ഞു. എന്നാൽ ചടങ്ങിന് മുമ്പ് പി പി ദിവ്യ ഫോണിൽ വിളിച്ചിരുന്നുവെന്നും കലക്ടർ വ്യക്തമാക്കി
നവീൻ ബാബുവിന്റെ യാത്രയയപ്പ് ദിവസം പി പി ദിവ്യ ഫോൺ ചെയ്തിരുന്നു. കോൾ റെക്കോർഡ് അടക്കമുള്ള കാര്യങ്ങൾ അന്വേഷണ സംഘത്തിന് കൈമാറിയിട്ടുണ്ട്. പി പി ദിവ്യയെ പരിപാടിയിലേക്ക് ക്ഷണിച്ചിട്ടില്ല എന്ന് തന്നെയാണ് മൊഴി നൽകിയത്. മൊഴിയിൽ പറഞ്ഞ കാര്യങ്ങൾ പുറത്തു പറയാനാകില്ലെന്നും കലക്ടർ പറഞ്ഞു
യാത്രയയപ്പിന് ശേഷം നവീൻ ബാബുവുമായി സംസാരിച്ചിരുന്നോ എന്ന ചോദ്യത്തിന് അത് അന്വേഷണത്തിന്റെ ഭാഗമെന്നായിരുന്നു കലക്ടറുടെ വിശദീകരണം. അക്കാര്യം പുറത്തുപറയാൻ ബുദ്ധിമുട്ടുണ്ട്. നല്ല ബന്ധമായിരുന്നു എഡിഎമ്മുമായി ഉണ്ടായിരുന്നതെന്നും കലക്ടർ പറഞ്ഞു.
