🎶 സോളമന്റെ ഉത്തമഗീതം 🎶❤️: ഭാഗം 20

രചന: റിൻസി പ്രിൻസ്‌

ഇന്നോളം സ്നേഹം ലഭിച്ചിട്ടില്ലാത്തതു കൊണ്ടുതന്നെ ആ സ്നേഹം കയ്യെത്തി പിടിക്കാൻ അവൾക്കും ആഗ്രഹം തോന്നി…. എല്ലാം മറന്ന് ആ നിമിഷം അവൾ അവന്റെ കൈകൾ തന്റെ നെഞ്ചോട് ചേർത്തുവച്ച് പൊട്ടിക്കരഞ്ഞിരുന്നു.

“എന്നെ പറ്റിക്കുമോ…?

കരച്ചിലിന്റെ ഒപ്പം ആ ചോദ്യം കൂടി ഉയർന്നു

” ഇനിയും അക്കാര്യത്തിൽ തനിക്ക് സംശയമാണെങ്കിൽ എന്റെ ജീവിതം കൊണ്ട് മാത്രമേ എനിക്ക് അതിന് മറുപടി പറയാൻ സാധിക്കുകയുള്ള… ഇതിൽ കൂടുതൽ ഹൃദയം തുറന്ന് സംസാരിക്കാൻ എനിക്കറിയില്ലന്റെ മറിയാമ്മേ…..

അവന്റെ വാക്കുകൾ ഇടറി തുടങ്ങി…

” എനിക്ക് ഓർമ്മയുള്ള കാലം മുതല് എല്ലാവരും എന്നെ പറ്റിച്ചിട്ടേയുള്ളൂ… അമ്മ പോലും. സ്നേഹമുണ്ടെന്ന് പറഞ്ഞു അത് പ്രകടിപ്പിക്കാതെ മറ്റുള്ളവരെ പേടിച്ച് അമ്മ എന്നെ പറ്റിച്ചു, നല്ലൊരു സുഹൃത്ത് പോലും എനിക്ക് ഉണ്ടായിട്ടില്ല.. അതിന്റെ കാരണം എനിക്ക് പേടിയായിരുന്നു, ആരോടെങ്കിലും കൂട്ടുകൂടിയാൽ പിന്നെ അവര് നഷ്ടപ്പെട്ടുപോയ എനിക്കത് സഹിക്കാൻ പറ്റില്ലല്ലോന്ന്… അതുകൊണ്ട് സ്കൂളിൽ ഒക്കെ പഠിക്കുന്ന കാലത്ത് എല്ലാവരിൽ നിന്നും സ്വന്തമായിട്ട് ഒരു അകലം ഞാൻ പാലിച്ചിട്ടുണ്ട്, ഇതിനിടയിൽ ഇഷ്ടമാണെന്ന് പറഞ്ഞു വന്നിട്ടുള്ളവരുമുണ്ട്, അവരുടെയൊക്കെ ഉദേശം വേറെ പലതും ആയിരുന്നു എന്ന് എനിക്ക് അറിയാമായിരുന്നു… എന്റെ സാഹചര്യം മുതലെടുക്കാൻ വേണ്ടിയാണ് കൂടുതൽ ആളുകളും ശ്രമിച്ചിട്ടുള്ളത്… അതുകൊണ്ട് തന്നെ സ്നേഹം ഇഷ്ടം എന്നൊക്കെ പറയുന്നതിനോട് എനിക്ക് പേടിയായിരുന്നു, ഇപ്പോൾ ആദ്യമായിട്ടാ ഒരാൾ എന്നോട് ഇനിയുള്ള ജീവിതം മുഴുവൻ എന്നെ സ്നേഹിക്കാനുള്ള ലക്ഷ്യം മാത്രമേ ഉള്ളൂ എന്നു പറയുന്നത്… അത് കേട്ടപ്പോൾ എവിടെയൊക്കെ എന്റെ മനസ്സിൽ ഒരു ചലനം…. ആദ്യം മുതൽ എന്റെ ഓരോ വിഷമങ്ങളിലും ഇരു കണ്ണുകളും അടച്ച് എന്നെ ഒരു നോട്ടം കൊണ്ട് സമാധാനിപ്പിക്കുമ്പോൾ പലപ്പോഴും ഞാൻ ആലോചിച്ചിട്ടുണ്ട് എന്തിനാണ് ഞാൻ ആ മിഴികളിൽ ഇങ്ങനെ നോക്കി നിന്ന് പോകുന്നതെന്ന്, പലപ്പോഴും എന്റെ വിഷമങ്ങളിൽ എനിക്ക് വലിയൊരു ആശ്വാസം തന്നെയായിരുന്നു ആ നോട്ടവും കുസൃതികളും ഒക്കെ… പക്ഷേ…

അവൾ ഒന്ന് നിർത്തി…

” ആ രണ്ടു വാക്കിന് ഇനി നമുക്കിടയിൽ പ്രസക്തിയില്ല,

അവൻ പറഞ്ഞു.. ശേഷം ജീൻസിന്റെ പോക്കറ്റിൽ നിന്നും ഫോണെടുത്ത് അത് ഊരുകയും അതിൽ നിന്നും ഒരു സിം കാർഡ് എടുത്ത് അവൾക്ക് മുൻപിൽ വെച്ച് തന്നെ രണ്ടായി ഒടിച്ചു റോഡിലേക്ക് വലിച്ചെറിയുകയും ചെയ്തിരുന്നു അവൻ….

” എന്റെ സകല കള്ളത്തരങ്ങളും ഞാൻ സൂക്ഷിച്ചിരുന്നത് ആ സിം കാർഡിലാണ്, അതിനി എനിക്ക് ആവശ്യമില്ല…! ഒരിക്കലും ഞാൻ കാരണം നിനക്ക് വിഷമിക്കേണ്ടി വരില്ല.. ഞാൻ വിഷമിച്ചാലും നിന്റെ കണ്ണ് നിറയാതെ ഞാൻ നോക്കും, അതിനപ്പുറം മറ്റൊന്നും എനിക്ക് പറയാൻ സാധിക്കില്ല..

അവളെ ഒരിക്കൽ കൂടി തന്റെ നെഞ്ചോട് ചേർത്തു പിടിച്ച് അവൻ പറഞ്ഞപ്പോൾ അവന്റെ ഷർട്ടിനെ നനച്ചുകൊണ്ട് ആ കണ്ണീർ പെയ്തു തുടർന്നിരുന്നു…. അങ്ങനെ തന്നെ അവൾ കരയട്ടെ എന്ന് അവൻ ഓർത്തു, ഒരു ജന്മം മുഴുവൻ അനുഭവിച്ച വേദനകളും വിഷമങ്ങളും ഒരു മാരിപോലെ അവൾ തന്റെ നെഞ്ചകത്തിൽ ഒഴുക്കി കളയട്ടെ… തന്റെ ശരീരത്തിന്റെ ചൂടിൽ അവളുടെ കണ്ണുനീർ ബാഷ്പീകരിക്കപ്പെടട്ടെ…

അവൾക്ക് കരയുന്നതിനനുസരിച്ച് അവന്റെ കൈകൾ അവളുടെ തലമുടിയിൽ തഴുകി കൊണ്ടേയിരുന്നു… എത്രത്തോളം അവൾ തന്നെ ഇഷ്ടപ്പെട്ടിരുന്നു എന്ന് ആ കരച്ചിൽ നിന്ന് തന്നെ അവന് മനസ്സിലാക്കാൻ സാധിച്ചിരുന്നു.. ഒരു കൊച്ചുകുട്ടിയെ പോലെ ഓർത്തോർത്ത് ഓരോ വേദനകളെയും കുറിച്ച് ആലോചിച്ചു കരയുകയാണ് അവൾ….

” കഴിഞ്ഞതൊക്കെ പോട്ടെ ഇനിമുതൽ ഞാനുണ്ട്… എന്ത് വിഷമത്തിനും എന്ത് സന്തോഷത്തിനും കൂട്ടായിട്ട്… അതുമാത്രം ചിന്തിച്ചാൽ മതി..!

ഏറെ ആർദ്രമായി അവളുടെ കാതിൽ അവൻ പറഞ്ഞു… ആ നിമിഷം അവന്റെ മുഖത്തേക്ക് ഒന്ന് നോക്കിയതിനു ശേഷം അവൾ ഒരു ജാള്യതയോടെ അവനിൽ നിന്നും അകന്നുമാറി.. എന്താണ് താൻ ചെയ്തത് ഒരു നിമിഷം താൻ തന്നെ തന്നെ മറന്നു പോയി അവൾക്ക് വല്ലാത്ത നാണക്കേട് തോന്നിയിരുന്നു.. അവളുടെ അവസ്ഥ മനസ്സിലായത് കൊണ്ട് തന്നെ ഒരു ചെറുചിരിയോടെ അവൻ വണ്ടി സ്റ്റാർട്ട് ചെയ്തു..

” ഇത്രയുംമാത്രം എനിക്ക് കേട്ടാൽ മതി…! ഇനിയും ഒരുപാട് ഞാൻ ബുദ്ധിമുട്ടിക്കില്ല..

ചെറുചിരിയോട് പറഞ്ഞവൻ… ആ വണ്ടി നിന്നത് ഒരു റസ്റ്റോറന്റിന്റെ മുൻപിൽ ആണ്.. ഒന്നും മനസ്സിലാവാതെ അവൾ അവന്റെ മുഖത്തേക്ക് നോക്കി,

” വല്ലതും കഴിക്കണ്ടേ ഇന്ന് ആകെപ്പാടെ കഴിച്ചത് ഒരു കാലി ചായയാണ്…

” എനിക്ക് വിശക്കുന്നില്ല പോയി കഴിച്ചിട്ട് വാ…

അവന്റെ മുഖത്തേക്ക് നോക്കാതെ അവൾ പറഞ്ഞു.

” അങ്ങനെ പറഞ്ഞാൽ ഞാൻ പോകുന്നുമെന്ന് തോന്നുന്നുണ്ടോ….? ഏതായാലും നമ്മൾ രണ്ടുപേരും കൂടെ കഴിക്കുന്നുള്ളൂ, അത് വേറെ കാര്യം, ഒന്നല്ലെങ്കിലും നീ എന്നെ ഇഷ്ടമാണെന്ന് പറഞ്ഞു കഴിഞ്ഞെ പിന്നെയുള്ള ആദ്യത്തെ നമ്മുടെ ഫുഡിങ് പരിപാടി അല്ലേ? അപ്പോൾ നിന്നെ ഇവിടെ ഇരുത്തിയിട്ട് ഒറ്റയ്ക്ക് പോയി ഫുഡ് തട്ടാനും മാത്രം ബോറനാണ് ഞാനെന്ന് തോന്നുന്നുണ്ടോ…? ഇറങ്ങി വന്നേ

അവളുടെ കൈക്ക് പിടിച്ചു വലിച്ചുകൊണ്ട് അവൻ പറഞ്ഞു..

” എനിക്ക് വേണ്ടാഞ്ഞിട്ടാ

” നിനക്ക് വേണോ എന്ന് ഞാൻ ചോദിച്ചില്ല ഫുഡ് കഴിക്കാം എന്നാണ് പറഞ്ഞത്… ഇന്ന് രാവിലെ മുതൽ ഒരു വക കഴിച്ചിട്ടില്ലല്ലോ,

പെട്ടെന്ന് അവനിൽ ഒരു കാമുകന്റെ അധികാരം മുളപൊട്ടിയത് അവൾ ശ്രദ്ധിച്ചിരുന്നു… ചെറു ചിരിയോടെ അവൾ വണ്ടിയിൽ നിന്നും ഇറങ്ങിയപ്പോൾ അവളുടെ കൈകൾ കോർത്തുപിടിച്ചു കൊണ്ടാണ് അവൻ റെസ്റ്റോറന്റിലേക്ക് കയറിയത്… അവൾക്ക് അതും ഒരു പുതിയ അനുഭവമായിരുന്നു. ആദ്യമായാണ് ആൾക്കൂട്ടത്തിൽ ഒരാൾ തന്നെ ചേർത്തുപിടിക്കുന്നത്, എല്ലാവർക്കും തന്നെ അകറ്റിനിർത്താൻ ആയിരുന്നു താൽപര്യം.. അമ്മയ്ക്ക് പോലും മറ്റുള്ളവരുടെ മുൻപിൽ മകൾ ആണെന്ന് പറയാൻ പലപ്പോഴും അമ്മ ബുദ്ധിമുട്ടുന്നത് താൻ നേരിട്ട് കണ്ടിട്ടുണ്ട്.. ഒളിവിലും മറവിലും ആയിരുന്നു സ്നേഹപ്രകടനങ്ങളൊക്കെ ഇതിപ്പോൾ ആദ്യമായാണ് ഇങ്ങനെ ഒരു പൊതുവിടത്ത് ഒരാൾ തന്നെ ചേർത്തുപിടിച്ചു നടക്കുന്നത്.. അത് അവളെ സംബന്ധിച്ചിടത്തോളം പുതിയൊരു അനുഭവവും ഒരു അത്ഭുതവും ആയിരുന്നു. അകത്തേക്ക് കയറിയതും പാലപ്പവും താറാവ് റോസ്റ്റും ആയിരുന്നു സോളമൻ പറഞ്ഞിരുന്നത്… അവൾക്ക് എന്തുവേണമെന്ന് ചോദിച്ചപ്പോൾ അവന്റെ ഇഷ്ടത്തിന് വിട്ടുകൊടുക്കുകയായിരുന്നു ചെയ്തത്.. അങ്ങനെ അവൻ പറഞ്ഞത് തന്നെ അവൾക്കും ഓർഡർ ചെയ്തു… കഴിക്കുന്നതിനിടയിൽ പലതവണ അവളെ നിർബന്ധിപ്പിച്ചു ഒക്കെ ഭക്ഷണം കഴിച്ചപ്പോൾ അവൻ പറഞ്ഞതുപോലെ ഉത്തരവാദിത്വമുള്ള ഒരു രക്ഷകർത്താവായിരുന്നു ആ സമയത്ത് അവനെന്ന് അവൾക്ക് തോന്നി… ഭക്ഷണം കഴിക്കുന്നതിനിടയിൽ അത് തൊണ്ടയിൽ കുരങ്ങിയപ്പോൾ ആധിയോടെ അവളുടെ ഗ്ലാസിലേക്ക് വെള്ളമൊഴിച്ചു തലയിൽ തട്ടി കൊടുത്തപ്പോഴും അവളുടെ കാമുകൻ എന്നതിലുപരി മറ്റേതൊക്കെയോ സ്ഥാനം അവൻ വഹിക്കുന്നതുപോലെ അവൾക്ക് തോന്നി…. ഇതുവരെ ജീവിതത്തിൽ ലഭിക്കാതിരുന്നത് നിറഭേദങ്ങൾ ഒക്കെ തന്നെ തേടി വരുന്നത് പോലെ… ഋതുകൾ അകന്നു നിന്നിരുന്ന തന്നിൽ ഒരു വസന്തം തളിരുടുന്നത് പോലെ… ഏതോ സ്വപ്നലോകത്തായിരുന്നു മരിയ അപ്പോഴും…. ഞാൻ ചെയ്യുന്നത് ശരിയാണോ എന്ന് മനസ്സിന്റെ ഒരു ഭാഗം അവളോട് ചോദിച്ചു കൊണ്ടേയിരുന്നു… തിരികുള്ള യാത്രയിൽ രണ്ടുപേരും അധികമൊന്നും സംസാരിച്ചിരുന്നില്ല മൗനമായിരുന്നു കൂടുതൽ വാചാലമായത്..

” കുറച്ചുകൂടി ദൂരം ഉണ്ട് താൻ ഏതായാലും ഒന്നും സംസാരിക്കുന്ന ടൈപ്പ് അല്ലന്ന് എനിക്ക് മനസ്സിലായി. എന്നെക്കുറിച്ച് അറിയേണ്ടേ…? ഞാൻ എന്നെ കുറിച്ച് പറയട്ടെ? എന്റെ പഴയ തല്ലിപ്പൊളി സ്വഭാവത്തെ കുറിച്ചൊക്കെ…

അവൻ തന്നെയാണ് അവളുടെ മുഖത്തേക്ക് നോക്കി ചോദിച്ചത് ചിരിയോടെ അവൾ തലയാട്ടി… അവന്റെ വീരശൂരപരാക്രമ കഥകളൊക്കെ കേട്ടപ്പോൾ അമ്പരന്നു പോയിരുന്നു അവൾ… അവന്റെ മുഖത്തേക്ക് അത്ഭുതത്തോടെ നോക്കിയപ്പോൾ ചിരിയോടെ അവൻ പറഞ്ഞു

” അതൊക്കെ നിർത്തിയിട്ട് ഇപ്പോൾ കുറച്ച് നാളായി, ഇനി ഞാൻ നല്ല കുട്ടി ആയിരിക്കും എന്റെ മറിയാമ്മയുടെ നല്ല കുട്ടി…

” ഈ പറഞ്ഞ പെമ്പിള്ളാരൊക്കെ അന്വേഷിച്ചു വന്നാലോ

അവൾ ചോദിച്ചു

“അവളുമാരൊന്നും അന്വേഷിച്ചു വരുന്ന ടൈപ്പ് ഒന്നുമല്ല… എന്നെ കിട്ടിയില്ലെങ്കിൽ അടുത്ത ആളെ കിട്ടും അവരൊന്നും ഈ ട്രൂ ലവ് പാർട്ടികൾ ഒന്നുമല്ല… ജസ്റ്റ് ഒന്ന് ചില്ല് ചെയ്യണം അതിന് ക്യാഷ് മുടക്കാൻ ഒരുത്തനെ വേണം, സിനിമയ്ക്ക് പോകാനും അവളുമാർക്ക് ഇഷ്ടപ്പെട്ട് ഡ്രസ്സ് ഒക്കെ വാങ്ങാനും ഒക്കെ ചെലവ് ചെയ്യാൻ ഒരുത്തനെ വേണം.. അതിന് പറ്റിയ ഒരു കുറ്റിയായിരുന്നു ഞാനൊന്ന് അവർക്ക് തോന്നി..

” എങ്കിലും അതിൽ ഏതെങ്കിലും ഒരു പെൺകുട്ടി എങ്കിലും വിശ്വസിച്ചിട്ടുണ്ടാവില്ലേ കല്യാണം കഴിക്കുന്ന്, ആശ കൊടുത്തിട്ടില്ലേ…? പെൺകുട്ടികളെ പറ്റിക്കുന്നത് എത്ര വലിയ തെറ്റാണെന്ന് അറിയോ…?

” താൻ വിചാരിക്കുന്ന പോലെയുള്ള ഡീപ് റിലേഷൻഷിപ്പ് ഒന്നുമായിരുന്നില്ല.. ജസ്റ്റ് ഫൺ അത്ര ഉണ്ടായിരുന്നുള്ളൂ, ഇവളുമാരുടെ ഒന്നും കയ്യില് പോലും ഞാൻ ഒന്ന് തൊട്ടിട്ടില്ല, ശാപം മേടിച്ച് കെട്ടാനും മാത്രമുള്ള ഒരു പരിപാടിക്കും ഞാൻ പോയിട്ടില്ല.. സീ ഐ അം വെർജിന്

ഒരു കുസൃതിയോടെ സോളമൻ പറഞ്ഞപ്പോൾ കൂർപ്പിച്ച് അവൾ അവനെ തന്നെ നോക്കിയിരുന്നു…

” എന്റെ മനസ്സിൽ എന്തെങ്കിലും കള്ളത്തരം ഉണ്ടെങ്കിൽ ഞാൻ ഈ കാര്യങ്ങളൊക്കെ തുറന്നു പറയൂമോ…? ഈ കാര്യങ്ങളൊക്കെ താൻ അറിയണമെന്ന് തോന്നി, ഇതൊന്നും പറയാതിരിക്കുന്നത് ശരിയല്ല എന്ന് തോന്നി… നമ്മൾ തമ്മിൽ ഒരു ബന്ധം തുടങ്ങുമ്പോൾ അത് ഏറ്റവും പരിശുദ്ധമാകണം എന്നാണ് എന്റെ ആഗ്രഹം… അതുകൊണ്ടാണ് ഞാൻ എന്റെ പൂർവ്വകാല ചരിത്രങ്ങൾ എല്ലാം തന്നെ തുറന്നു പറഞ്ഞത്.. ഒരു കള്ളത്തരവും ഉണ്ടാവാതിരിക്കാൻ,

” എങ്കിൽ ഇനി ഞാൻ എന്നെക്കുറിച്ച് പറയട്ടെ…

അവന്റെ മുഖത്തേക്ക് നോക്കി വിഷാദത്തോടെ അവൾ ചോദിച്ചു

“വേണ്ട…

പെട്ടെന്നായിരുന്നു അവന്റെ മറുപടി…

” തന്നെക്കുറിച്ച് എനിക്കൊന്നും അറിയണ്ട എനിക്ക് ഇപ്പൊൾ അറിയാവുന്ന എന്റെ മുൻപിൽ ഇരിക്കുന്ന ഈ മറിയാമ്മ ആ കുട്ടിയേയാണ് ഞാൻ സ്നേഹിച്ചത്… അവളാണ് ആദ്യത്തെ കാഴ്ചയിൽ തന്നെ എന്റെ ഹൃദയം കീഴടക്കിയത്.. അവളെ കുറിച്ച് എനിക്ക് കൂടുതൽ ഒന്നും അറിയണ്ട.. എനിക്കറിയാം പറഞ്ഞു കഴിയുമ്പോൾ നീ കരയും… ഒരുപാട് ബുദ്ധിമുട്ടിയ അവളുടെ കുട്ടിക്കാലത്തെക്കുറിച്ച്, അവഗണനകൾ ഏറ്റുവാങ്ങിയ അവളുടെ കൗമാര കാലത്തെ കുറിച്ച് കേൾക്കാൻ എനിക്ക് ഒട്ടും താല്പര്യമില്ല… പൊതുവേ സെന്റിമെന്റൽ വിഷയങ്ങളോട് ഒരു താല്പര്യമില്ലാത്ത ആളാ ഞാൻ… പറയുമ്പോൾ നീ കരയും പറഞ്ഞുവരുമ്പോൾ ആ കരച്ചിൽ കൂടുകയും ചെയ്യും, ആ കണ്ണ് നിറയുന്നത് കാണുന്നത് എനിക്കിഷ്ടമല്ല… ആദ്യം മുതലേ അങ്ങനെയാ, അതുകൊണ്ട് ഈ കൊച്ചിനെ കുറിച്ച് എനിക്കൊന്നും അറിയണ്ട… ഒന്നുമില്ലാതെ ഒന്നും അറിയാതെ വെറുതെ തോന്നിയ ഒരു ഇഷ്ടമാണ് എനിക്ക്… പ്രത്യേകിച്ച് ഒരു കാരണങ്ങളും ഇല്ലാതെ എപ്പോഴോ എന്റെ ഹൃദയത്തിലേക്ക് ചേക്കേറി വന്നൊരിഷ്ടം, അതിൽ സൗന്ദര്യമോ നിന്റെ സാഹചര്യമോ നിന്റെ ജോലിയോ സ്മാർട്ട്സോ ഒന്നും ഒരു ഭാഗമായിട്ടില്ല, വെറുതെ എന്തിനോ തോന്നിയ ഇഷ്ടം,

” വെറുതെ തോന്നിയ ഇഷ്ടം..വെറുതെ പോയാലോ കുറച്ചു നാളെ കഴിയുമ്പോൾ എന്തിനോ തോന്നിയ ഇഷ്ടം എവിടെയോ പോയാലോ…? ഇതൊന്നും വേണ്ടെന്ന് തോന്നിയാലോ..

ആധിയോട് അവൾ ചോദിച്ചു.

” അങ്ങനെ പോകുന്നൊരു ഇഷ്ടമല്ല ഇത്, അങ്ങനെ പോകുന്നുണ്ടെങ്കിൽ ആ ഇഷ്ടത്തിന്റെ കൂടെ ഞാനും പോകും… ഈ ലോകത്തൂന്നു തന്നെ.. അത്രയ്ക്ക് ഇഷ്ടമാ.. എന്റെ ജീവനെക്കാളേറെ. ..

അവനത് പറഞ്ഞപ്പോൾ അവളുടെ മിഴികൾ ചുവന്നിരുന്നു സന്തോഷം കൊണ്ട് ആ മിഴികളിൽ നിന്നും രണ്ട് നീർത്തുള്ളികൾ താഴേക്ക് പതിക്കാൻ വെമ്പിയപ്പോൾ അവന്റെ ചൂണ്ടുവിരൽ അതിനെ കവർന്നെടുത്തിരുന്നു, ഇനി ഒരിക്കലും ആ മിഴികളെ നിറയാൻ അനുവദിക്കില്ല എന്ന വാശിയോടെ ……കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…